عید
ہندوستان میں مختلف مذہبوں کے ماننے والے لوگ رہتے ہیں۔ ان سب کے تہوار بھی الگ الگ ہیں اور وہ انھیں اپنےاپنےطریقےسے
مناتے ہیں۔ ان میں سے کچھ ایسے تہواربھی ہیں جو پورے ہندوستان میں منائےجاتے ہیں۔ ایسے تہواروں میں عیٖد، ہولی ، دیوالی اور کِرسمس وغیرہ بہت مشہور ہیں۔
عیٖد مسلمانوں کا سب سے بڑا تہوار ہے۔ عیٖدکے دن نماز ادا کرنے سے پہلے ایک مقررہ رَقم غریبوں میں تقسیم کی جاتی ہے۔ اسے ’فطرہ‘ کہتے ہیں۔اسی لیے اس عیٖدکو ’عید الفطر‘بھی کہا جاتا ہے۔ اس دن ہر گھر میں سویّاں بنتی ہیں۔ لوگ مٹھائیاں خرید کر لاتے اور گھر میں بھی بناتے ہیں۔ اسی لیے اسے میٹھی عیٖدبھی کہا جاتا ہے۔ عیٖدکا مطلب ہی ‘خوشی’ اور ’خوشی کا تہوار‘ہے۔ یہ تہوار رمضان کا مہینہ ختم ہونے کی خوشی میں منایا جاتا ہے۔
مسلمان رمضان کے پورے مہینے روزے رکھتے ہیں۔ روزہ صبح ہونے سے تھوڑی دیر پہلے شروع ہوتا ہے اور سورج ڈوبنے تک جاری رہتا ہے۔ اس دوران روزے دار نہ کچھ کھاتے ہیں اور نہ پیتے ہیں۔ بس صبح ہونے سے پہلے کچھ کھا پی لیتےہیں جسے’سحری‘ کہتے ہیں۔ سورج ڈوبنے کے بعد روزہ کھولتے ہیں جسے ’افطار‘ کہا جاتا ہے۔ اکثر لوگ زکوٰۃ بھی اسی مہینے میں نکالتے ہیں اوراسے ضرورت مندوں میں تقسیم کرتے ہیں۔
رمضان کے روزے پورے ہونے کے بعد جب انتیسویں یا تیسویں روزے کی شام چانددکھائی دیتا ہے تو اگلے دن بڑی دھوم دھام سے عیٖدمنائی جاتی ہے۔ کئی دن پہلے سے عیٖدکی تیاریاں شروع ہو جاتی ہیں۔ بازاروں میں بڑی رونق ہوتی ہے۔ کوئی کپڑے خریدتا ہے تو کوئی جوتے۔ سویّاں اور مٹھائیاں تو سبھی خریدتے ہیں۔ چوڑیوں اور کپڑوں کی دُکانوں پر بھیٖڑ لگی ہوتی ہے۔ سب اپنی اپنی پسند اور ضرورت کی چیزیں خریدنے میں لگے ہوتے ہیں۔ لوگ اپنے گھروں کو صاف ستھرا کر کے سجاتے ہیں۔
عیٖدکی صبح سبھی نہا دھوکر نئے اور صاف ستھرے کپڑے پہنتے ہیں اور عِطر لگاتے ہیں۔ چھوٹے بڑے سبھی عیٖدگاہ یا بڑی مسجدوں میں عیٖدکی نماز پڑھنے کے لیے جاتے ہیں۔ نماز پڑھنے کے بعد لوگ آپس میں گلے ملتے ہیں اور ایک دوسرے کو عیٖدکی مبارک باد دیتے ہیں۔ عیٖدکی نماز پڑھ کر واپس آتے ہوئے بچوں کے لیےطرح طرح کے کھلونے اور غبّارے خریدے جاتے ہیں۔ گھر آنے کے بعد گھر کے بڑے، بچوں کو عیدی دیتے ہیں۔عیدی پاکر بچے بہت خوش ہوتے ہیں۔ عیٖدکےموقعے پر گھروں میں کھانے پینے کا خاص اہتمام ہوتا ہے۔سویّاں اور طرح طرح کی چیزیں پکائی جاتی ہیں۔ اس موقعے پر دوست، رشتے دار سب مل کر مختلف قسم کے پکوان کھاتے ہیں۔ سویّوں اور مٹھائیوں کے بھی مزے لیتے ہیں۔
عیٖدکے دن عید گاہ کے باہر، گاؤں اورشہر میں جگہ جگہ میلہ لگتا ہے۔ مٹھائی اور کھلونوں کی دُکانیں سجائی جاتی ہیں۔ ہنڈولے بھی لگائے جاتے ہیں جن میں بچے جھولا جھولتے ہیں۔ عیٖدکے دن ہر گھر میں بڑی رونق ہوتی ہے۔ بازاروں میں چہل پہل رہتی ہے اور ہر طرف خوشی کا ماحول ہوتا ہے۔ عیٖدہمیں آپسی محبت اور اُخوّت کا پیغام دیتی ہے۔
اساتذہ کے لیے ہدایات
عید سے متعلق طلبا سے گفتگو کروائی جاسکتی ہے۔
مضمون کی تصویروں پر بچوں سےبات چیت کروائی جاسکتی ہے۔
مشق
پڑھیے اور سمجھیے
پڑھیے اور سمجھیے
سوچیے اور بتائیے
بلند آواز سے پڑھیے اور خوش خط لکھیے
درست متضاد پر دائرہ بنائیے
دیے گئے الفاظ سے پہلا حرف ہٹا کر مثال کے مطابق نیا لفظ بنایئے
کالم ’الف‘ اور‘ب’ کے صحیح جوڑ ملائیے۔
اس سبق میں ایک لفظ ہے’رشتے دار‘ جو کہ ‘رشتے’ اور ‘دار’سے مل کر بنا ہےجس کے معنی ہیں’رشتے والے‘۔ایسے ہی نیچے کے الفاظ میں بھی ‘دار’ جوڑ کر مثال کے مطابق نیا لفظ بنایئے
مثال : خبر + دار = خبر دار
ایمان + ......... = ................
شان + ......... = ................
دین + ......... = ................
عزت + ......... = ................
جان + ......... = ................
زمین + ......... = ................
لکھیے
کیجیے
عیٖد کارڈ بنا کر اس میں رنگ بھریے