4

ہمارا اسکول — ایک خوش گوار مقام

سر سبز اسکول

آشا اور موہت ساتھ ساتھ اسکول جا رہے تھے۔ آشا نے پوچھا، ’’کیا آپ کو اسکول جانا اچھا لگتا ہے؟‘‘

موہت خوشی سے مسکرایا اور کہا،’’مجھے اسکول بہت اچھا لگتا ہے! یہی وہ جگہ ہے، جہاں مجھے اپنے دوست ملتے ہیں، جہاں میں کھیلتا ہوں اور روز نئی چیزیں سیکھتا ہوں۔ میرے لیے یہ ایک خوش گوار مقام ہے۔‘‘

ہمارا اسکول ایسا مقام ہوتا ہے، جہاں ہم اپنے آپ کو محفوظ محسوس کرتے ہیں اور جہاں ہمارا خیال رکھا جاتا ہے۔ اس جگہ ہم بہت سی باتیں سیکھتے ہیں۔

آشا نے کہا ،’’میرا اسکول سکھاتا ہے کہ ہمیں پودوں، درختوں اور جانوروں کا خیال رکھنا چاہیے۔ میں اپنے اسکول کو زیادہ بہتر اور سرسبز اسکول بنانا چاہتی ہوں ۔‘‘

موہت نے پوچھا،‘‘یہ سر سبز اسکول کیا ہوتا ہے؟’’

آشا نے جواب دیتے ہوئے کہا، ’’ایک بار میرے بھائی نے مجھے بتایا تھا کہ سر سبز اسکول ایسا اسکول ہوتا ہے جہاں ہم اپنے کوڑے کچرے کا بندوبست کرتے ہیں، پانی بچاتے ہیں، بجلی کا استعمال احتیاط سے کرتے ہیں اور مزید پیڑ پود ے لگاکر اور ان کی دیکھ بھال کرکے اسکول کے احاطے کو ہرا بھرا بناتے ہیں۔‘‘

آشااور موہت نےاپنے خیال سے اپنے کمرۂ جماعت کےساتھیوں کو بھی واقف کرایا۔ سبھی کو تجسس تھا ۔ہمارے اسکول کے بارے میں کیا کہنا ہے؟ کیا ہم اس کو بھی ایک سر سبز اسکول بنا سکتے ہیں؟

ان کے ٹیچر انوپم نے، جو کہ انھیں ‘ہمارے ارد گرد کی دنیا ’پڑھاتے ہیں، کہا ، ’’مجھے آپ لوگوں کی بات چیت سن کر بہت اچھا لگا، میں یہ جاننا چاہتا ہوں کہ آپ یہ کام کس طرح شروع کریں گے؟‘‘

آشا نے اپنی جماعت کے ساتھیوں کے سامنے اپنی تجویز پیش کی،’’آئیے ہم اپنے اسکول کا تفصیلی جائزہ لیتے ہیں اور یہ فیصلہ کرتے ہیں کہ ہم اپنے اسکول کو ایک خوش گوار، محفوظ اور سر سبز اسکو ل بنانے کےلیے کیا کر سکتے ہیں۔‘‘

1. اپنے اسکول کے بارے میں درحقیقت مجھے کیا پسند ہے؟

   

   

2. میں اپنے اسکول کو زیادہ سرسبز کیسے بنا سکتا ہوں؟

   

   

3. اگر اسکول میں کوئی دشواری ہو تو میں کس سے بات کروں یا کس کو اطلاع دوں؟

   

   

اسکول کا جائزہ کار بنیے!

آپ اور آپ کی جماعت کے ساتھی ’اسکول کے جائزہ کاروں کی ٹیمیں‘تیار کر سکتے ہیں۔ نیچے گروپوں کے چند ناموں کی تجویز پیش کی جا رہی ہے، آپ اس میں سے انتخاب کر سکتے ہیں:

• پانی کا خیال رکھنے والے
• بجلی بچانے والے
• کچرے کے جائزہ کار
• ہریالی کے محافظ
• ٹریفک جائزہ کار

جائزے کا آغاز کرنے سے پہلے ہر ایک گروپ کو یہ فیصلہ کرنا ہوگا کہ وہ کس چیز کا مشاہدہ کرے گا۔

یہاں کچھ تجاویز پیش کی جا رہی ہیں :

بجلی بچانے والے اس بات کا خیال رکھیے کہ لائٹ اور پنکھے اس وقت ‘ کھلے ہوئے’تو نہیں ہیں، جب کوئی انھیں استعمال نہ کر رہا ہو۔ کیا کمرۂ جماعت میں قدرتی روشنی استعمال کی جاتی ہے؟ دن میں اسکول کی کن جگہوں پر سب سے زیادہ گرمی اور کہاں پر سب سے زیادہ ٹھنڈک ہوتی ہے؟	ہریالی کے محافظ کیا اسکول میں پیڑ پودےموجود ہیں؟ ان کا خیال کون رکھتا ہے؟ ہم کس جگہ مزید پودے لگا سکتے ہیں؟ کیا ان جگہوں پر پرندے اور تتلیاں آتی ہیں؟ کیا اسکول میں کوئی دیسی کھاد بنانے کا گڑھا ہے؟
پانی کا خیال رکھنے والے کیا کسی نل سے پانی ٹپک رہا ہے؟ کیا پانی ضائع کیا جا رہا ہے؟ کیا پانی کی ٹنکیاں صاف ستھری اور ڈھکی ہوئی ہیں؟ کیا کسی جگہ پر پانی جمع ہے، جس سے مچھر پنپ سکتے ہیں؟	ٹریفک جائزہ کار اسکول آنے اور اسکول سے جانے کے وقت پر اسکول کے دروازے کے باہر کیا ہوتا ہے؟ کیا بچوں کے سڑک کے پار جانے کے لیے پیدل چلنے والوں کی کوئی کراسنگ ہے؟ کیا اسکول کے سامنے گاڑیاں تیز رفتار سے گزرتی ہیں؟
کچرے کے جائزہ کار آپ کو کوڑا کرکٹ کہاں ملتا ہے؟ کس قسم کا کوڑا کرکٹ آپ کو نظر آتا ہے؟ کیا اسکول کے آس پاس کافی تعداد میں کوڑے دان رکھے ہیں؟ کیا طلبا ان کوڑے دان کو استعمال کرتے ہیں؟ کیوں یا کیوں نہیں؟ کیا کھانے کے کچرے اور دیگر کوڑے کے لیے الگ الگ کوڑے دان رکھے گئے ہیں؟

ایک بار جائزہ لینے کا کام مکمل ہونے پر آپ مل بیٹھ کر ان باتوں پر جماعت کے ساتھ بات چیت کیجیے، جن کا آپ کو پتا چلا ہو۔

1. آپ کو کیا معلوم ہوا؟
2. کیا کوئی ایسی بات تھی ، جس پر آ پ کو تشویش ہوئی ہو؟
3. کیا آپ کو کسی بات پر حیرت ہوئی؟ وہ کیا بات تھی؟
4. آپ کو کس بات پر فخر ہوا؟

ہم نے جن باتوں کا پتا لگانے کی کوشش کی ہے، آئیے ان کے بارے میں مزید معلومات حاصل کریں۔

کوڑے کرکٹ کا بندوبست

صرف ان ہی چیزوں کو استعمال کریں جنکی ضرورت ہے، چیزوں کو دوبارہ استعمال کرکے اور کار آمد اشیا کو پھینکنے سے گریز کرکے ہم کوڑے کرکٹ کو کم کر سکتے ہیں۔ اشیائے خوردنی کے چھلکے، بچا ہوا کھانا اور کاغذ جیسا کوڑا اب بھی باقی رہے گا۔ ہم نے پچھلی جماعتوں میں کوڑے کرکٹ کا بہتر بندوبست کرنے اور اپنے آس پاس کی جگہ کو صاف ستھرا بنانے کے لیےکچرے کو سوکھے اور گیلے کے زمرے میں علاحدہ علاحدہ کرنے کی اہمیت کے بارے میں پڑھا تھا ۔

کیا آپ اس کوڑے دان کا رنگ بتا سکتے ہیں، جو درج ذیل کے لیے استعمال کیا جاتا ہے؟

سوکھا کچرا:____________________ گیلا کچرا : _____________________

کیا آپ نے دیکھا ہے کہ پرانے اخبار جیسی چیزیں کبھی ان ڈبوّں میں نہیں پھینکی جاتیں؟ انھیں عام طور پر ایک طرف رکھ دیا جاتا ہے اور روایتی ری سائیکلر (چیزوں کو دوبارہ قابل استعمال بنانے والے)کو دے دیا جاتا ہے۔ مختلف قسم کے ری سائیکلرمختلف اشیا جمع کرتے ہیں۔ مختلف قسم کے ری سائیکلرکو آپ کے علاقے میں کیا کہا جاتا ہے؟ پتا لگائیے کہ ان میں ہر ایک کیا جمع کرتا ہے۔

1. آپ کا اسکول ری سائیکلر کو کیا کیا چیزیں دیتا ہے؟

   

2. اپنے والدین سے پوچھیے اور پتا لگائیے کیا انھوں نے کوئی چیز ری سائیکلر کو دینے کے لیے رکھی ہے۔ وہ کیا ہے؟

   

اپنے ٹیچر کی مدد سے کسی ری سائیکلرسے کہیے کہ وہ آپ کی جماعت میں آئیں اور طلبا کو بتائیں کہ وہ کیا کام کرتے ہیں۔یہ پتا لگانا دل چسپ ہوگا کہ یہ چیزیں کہا ں جاتی ہیں اور انھیں کیسے دوبارہ استعمال یا ری سائیکل کیا جاتا ہے۔

آئیے اب ، دیکھیں کہ گیلے کچرے کا کیا ہوتا ہے۔

گیلے کچرے کا بندوبست کس طرح کیا جاتا ہے؟

1. آپ کے اسکول میں

   

2. آپ کے گھر میں

   

1. اگر ہم اپنے کچرے کو الگ الگ نہیں کریں گے تو کیا ہوگا؟

2. صفائی ملازمین کے کام کو آسان اور محفوظ بنانے کے لیے ہم کیا کر سکتے ہیں؟ اپنے ٹیچر سے کہیے کہ وہ کسی صفائی ملازم کو آپ کے کمرۂ جماعت میں بلائیں ۔ ان سے پوچھیے کہ وہ کیا کرتے ہیں، انھیں کن مشکلات کا سامنا کرنا پڑتا ہے اور کیسے ہم کچرے کے بندوبست میں بہتر کردارادا کر سکتے ہیں، اس کے بارے میں بتائیں۔

ہمیں تحمل سے کام لینا چاہیے!

کیا آپ نے کبھی سوچا ہے کہ کچھ کمروں میں زیادہ گرمی کیوں محسوس ہوتی ہے؟ آئیے اس کی جانچ کرتے ہیں اور پتا لگاتے ہیں کہ کیا چیز ان کمروں کو ٹھنڈا رکھتی ہے۔

سائےدار درخت اور کھڑکیوں والے کمرۂ جماعت ، جہاں ٹھنڈی ہوا آتی ہے، مختلف ماحول فراہم کراتے ہیں۔ سفید رنگ کی چھت سے بھی فرق پڑتا ہے، کیوں کہ یہ سورج کی گرمی کو جذب نہیں کرتی، بلکہ اسے واپس لوٹا دیتی ہے۔ اس کے بر خلاف کالی سطح گرمی کو جذب کر لیتی ہے۔

اگرآپ کو اپنے اسکول یا گھر کی چھت پر سفید رنگ کرنا ہو، تو کیا ہوگا؟

اگر آپ کی جگہ گرم ہو رہی ہو ، تو اس کو ٹھنڈا کرنے کے لیے کیا کرنا چاہیے؟

ٹپکتا ہوا پانی

ہمیں بہت سے کاموں کے لیے روزانہ پانی کی ضرورت پڑتی ہے۔ پانی ایک قیمتی خزانہ ہے۔ لیکن کیا ہم اسے احتیاط کے ساتھ استعمال کرتے ہیں؟

آپ نے اپنے اسکول کا جائزہ لیا ہے اور اس بات کی جانچ کی ہے کہ کوئی نل ٹپک تو نہیں رہا ہے۔لیکن ، کیا آپ نے کبھی سوچا ہے کہ بوند بوند ٹپک کر کتنا پانی ضائع ہو جاتا ہے؟ معمولی سا پانی ٹپکنے سے بھی ایک مدت میں بہت سا پانی برباد ہو جاتا ہے۔ آئیے اس کا پتہ لگائیں کہ یہ کیسے ہوتا ہے!

1. پانی کی بربادی روکنے کے لیے ہم اپنے اسکول میں کون سے آسان کام کرسکتے ہیں؟

2. آپ اپنے گھر یا اسکول میں بارش کے پانی کو کس طرح جمع اور استعمال کر سکتے ہیں؟

ہمارے آس پاس ہریالی

1. اپنے اسکول کے احاطے میں یا اُس کے آس پاس نظر آنے والے درختوں کے نام تحریر کیجیے۔

2. آپ کے اسکول کے احاطے میں موجود پیڑ پودوں کے قریب کون کون سے پرندے اور کیڑے مکوڑے نظر آتے ہیں؟

درختوں پر بہت سے جان داروں کا بسیرا ہوتا ہے۔ درخت ہوا کو صاف ستھرا رکھتے ہیں، سایہ فراہم کرتے ہیں اور پرندوں اور کیڑوں مکوڑوں کو خوراک فراہم کرتے ہیں اور آس پاس کے علاقے کو ٹھنڈا رکھنے میں مدد کرتے ہیں۔

آئیے پتا لگائیں!

آشا، موہت اور دیگر بچے اپنے اسکول کے لیے کام کرکے بہت خوش ہوتے ہیں اور کوڑے کرکٹ کے بندوبست اور پانی بچانے کے بارے میں بھی سیکھتے ہیں۔ اسکول اسمبلی کے دوران ان کی جماعت کی تعریف کی گئی۔

اپنے اسکول کو ‘بہترین ہرا بھرا ا سکول ’بنانے کے اپنے خواب کی وجہ سے وہ اپنے سماج اور معاشرے کے مسائل کے بارے میں بھی سوچنے لگے۔ وہ سوچنے لگے کہ طلبا کے طور پر ایسے مسائل کے بارے میں بیداری پھیلا کر وہ ا یک اہم رول ادا کرسکتے ہیں، جو ہماری زندگی میں دشواریاں پیدا کر رہے ہیں۔

تھامس نے سڑک حادثات کے مسئلے کا ذکر کیا۔ کل ہی تو اسکول سے گھر جاتے وقت اس نے ایک حادثہ دیکھا تھا۔ موہت نے کہا،’’میر ا خیال ہے کہ لوگ ٹریفک کے قوانین پر عمل نہیں کرتے، جن کے بارے میں ہم نے اپنی پچھلی جماعت میں پڑھا تھا۔ ‘‘

موہت نے جو کہا ہے اس کے بارے میں آپ کیا سوچتے ہیں؟

---

ٹریفک کی علامات

بہت سے حادثات تو صرف اس وجہ سے ہوتے ہیں کہ لوگ صحیح طریقے سے ٹریفک قوانین پر عمل نہیں کرتے۔ اس لیے یہ بہت اہم ہے کہ ہم ٹریفک قوانین کے بارے میں معلومات حاصل کریں اور ان پر عمل کریں۔

اب،اسکول کے صدر دروازے کے لیے ایک سائن بورڈ ڈیزائن کرنے کے واسطے چھوٹی چھوٹی ٹیموں میں کام کیجیے۔ آپ کی علامات سے ڈرائیوروں، والدین یا طلبا کو واضح پیغام اورعلاقے کو محفوظ بنانے میں مدد ملنی چاہیے۔

آپ آسان الفاظ، ڈرائنگ یا علامتوں کو استعمال کر سکتے ہیں۔

اپنا ٹریفک سائن بورڈ یہاں تیار کیجیے۔

اسکول کے قریب ٹریفک کو بہتر بنانے کے لیے سائن بورڈ تیار کرنےکے علاوہ ہم اور کیا کر سکتے ہیں؟

موہت کے اسکول نے آگ سے تحفظ کے بارے میں ایک اجلاس کا اہتمام کیا۔ جماعت کے سبھی طلبا نے اس اجلاس میں شرکت کی۔

آگ سے تحفظ

یہ سمجھنا بہت اہم ہے کہ آگ جیسےخطرات سے کیسے محفوظ رہا جائے۔ اگرچہ ان خطرات کاسامنا عام طور پر نہیں کرنا پڑتا، لیکن ان کے لیے تیار رہ کر سبھی کو اپنے آپ کو محفوظ محسوس کرنے اور زیادہ پُر اعتماد ہونے میں مدد ملتی ہے۔

1. آپ کے اسکول میں آگ بجھانے والا آلہ کہا ں رکھا جاتا ہے؟

2. آگ لگ جانے کی صورت میں ، آپ کے اسکول میں سبھی کے جمع ہونے کا مقام کہاں ہے؟

3. آگ لگ جانے پر یا دھوئیں کی بو محسوس ہونے پر آپ کو کیا کرنا چاہیے؟

ٹیچر کی مدد سے آگ سے محفوظ رہنے کی مشق کیجیے۔

1. تیزی سے اور پُر سکون طریقے سے باہر نکلنے کے قریبی راستے تک پہنچیے گھبراہٹ میں مبتلا نہ ہوئیے۔ دوڑیے مت۔

2. جہاں دھواں ہو ، وہاں نیچے بیٹھ کر اور صاف ہوا میں سانس لینے کے لیے منھ کو ڈھک کر آہستہ آہستہ آگے بڑھیے۔

3. کسی چھوٹے کمرے یا الماری یا غسل خانے میں چھپنے کی کوشش نہ کیجیے۔

4. اگر کوئی خطرہ نہ ہو تو دوسروں کی مدد کیجیے،لیکن عمارت سے باہر نکلنے کے بعد دوبارہ واپس نہ جائیے۔

5. لوگوں کے جمع ہونے کے مقام پر جائیے اور اپنے گروپ کے ساتھ رہیے۔

6. جمع ہونے کے مقام پر پہنچنے کے بعد کسی کے غائب یا زخمی ہونے کی صورت میں فوراً اسکول کے عملے یا ٹیچر کو با خبر کیجیے ۔

ہم جو کچھ کرتے ہیں اس کی اہمیت ہوتی ہے!

چوں کہ ہم سبھی کو اچھا محسوس کرنے اور خوش رہنے کے لیے تحفظ، دیکھ بھال اور احترام کی ضرورت ہوتی ہے، اس لیے اسکول میں، گھر پر یا عام مقام پر ہم دوسروں کے ساتھ جوسلوک کرتے ہیں ، اس کی بہت اہمیت ہوتی ہے۔

ہمارا جو رویہ ہوتا ہے، اس سے یہ مقامات پُر سکون اور خوش گوار یا پریشان کن اور نا گوار بن سکتے ہیں۔ کیا صحیح ہے اور کیا صحیح نہیں ہے ،اس کے بارے میں سوچنے کے لیے آئیے ہم روزمرہ کی کچھ صورتوں کا جائزہ لیں۔

ہمارے سلوک سے یہ ظاہر ہوتا ہے کہ ہم کس قسم کے شخص ہیں۔ احترام اور ہمدردری محض الفاظ نہیں ہیں — بلکہ اپنی باری کا انتظار کرکے، نرم الفاظ استعمال کرکے، کسی کی مدد کرکے اور اپنی جگہ کو صاف ستھرا رکھ کے ہم ان کا اظہار کرتے ہیں۔ اگر ہم رحم دل اور نرم مزاج ہوں تو سبھی کو اچھا لگتا ہے۔

ہم نے پانی بچاکر، کچرے کا بندوبست کرکے، ماحول کو ٹھنڈا رکھ کر، اپنے آس پاس کے پیڑ پودوں، مقامات اور لوگوں کی دیکھ بھال کرکے اپنے اسکول کو ایک خوش گوار مقام بنانے کے بہت سے طریقوں کا پتا لگایا ہے۔ آئیے ہم سب مل کر اپنے اسکول کو ایک بہت ہی خوش گوار مقام بنائیں!

1. آپ کی رائے میں آپ کے اسکول کے تمام کمرۂ جماعت میں سب سے اچھا کمرۂ جماعت کون سا اور کیوں ہے؟

2. ایک خوشیوں کا درخت تیار کیجیے۔

کسی دیوار یا چارٹ پیپر پر بہت سی شاخوں والا ایک بڑا سا درخت بنائیے۔ہر ایک طالب علم اس درخت پر ایک پتّےکا اضافہ کرے، جس پر ایک ایسا چھوٹا کام لکھا ہو، جس سے اسکول ایک زیادہ خوش گوار مقام بن سکتا ہو (مثلاً کسی کا خیر مقدم کرنا، بتی بجھا دینا، دوسروں کو بیٹھنے کی جگہ دینا وغیرہ)۔

3. اپنے احساسات سے دوسروں کو واقف کرانا ایک خوش گوار عمل ہے۔’میرا اسکول—میرا خوش گوار مقام‘ کے موضوع پر اپنے ٹیچر کو ایک خط تحریر کیجیے۔

4. آپ اپنے گھر، آس پڑوس اور سماج کو سبھی کے واسطے ایک خوش گوار مقام بنانے کے لیے کیا کیا کام کریں گے؟ ان میں سے کسی ایک کا تفصیل کے ساتھ ذکر کیجیے۔

5. کسی دوسرے کے نقطہ ٔنظر سے اسکول میں ایک دن کا تصور کیجیے۔ درج ذیل میں سے کسی ایک کا انتخاب کیجیے:

• ایک ایسے طالب علم کے نقطہ ٔنظر سے جو ایک وہیل چیئر کا استعمال کرکے اسکول میں ایک جگہ سے دوسری جگہ جاتا ہے۔
• ایک ایسے طالب علم کے نقطہ ٔنظر سے جس کی مادری زبان مختلف ہے۔
• اسکول کے ایک صفائی ملازم کے نقطہ ٔنظر سے۔
• ان کے نقطہ ٔنظر سے ایک ڈائری میں اندراج کیجیے۔ وہ کیا محسوس کرتے ہیں؟ کیا آسان ہے اور کیا مشکل؟ کس بات سے وہ خوش ہوتے ہیں اور کس سے افسردہ؟

6. ایک دن پرنسپل کے طور پر آپ اپنے اسکول میں خوشی، تحفظ اور ہریالی میں اضافے کے لیے کون سی تین تبدیلیاں کریں گے؟

7. درج ذیل کے بارے میں 4 سے 5 طلبا کے گروپ میں ڈرامے کا انعقاد کیجیے!

• ایک طالب علم مشکل صورت حال میں رحم دلی ظاہر کرتا ہے۔
• طلبا کی ایک ٹیم اسکول میں پانی کی بربادی کے مسئلے کو حل کرتی ہے۔
• ایک طالب علم جماعت کے شرمیلے طالب علم کی جماعت کے دیگر بچوں کے ساتھ گھلنے ملنے میں مدد کرتا ہے۔
• ہر ایک رول پلے کے بعد جماعت سے پوچھیے:
• آپ نے کیا دیکھا؟ کو ن سی بات دوسروں کو تر غیب دینے والی تھی؟ کیا ایسا حقیقی زندگی میں بھی ہو سکتا ہے؟

8. ‘میرے خوابوں کا اسکول’ کے موضوع پر اپنی صبح کی اسمبلی کے لیے ایک منٹ کی تقریر تحریر کیجیے۔ بتائیے کہ کیا بات اس کو خاص بناتی ہے، جو اس کو اس طرح قائم رہنے میں مدد کرتی ہے اورجو ہر ایک طالب علم کر سکتا ہے۔

9. ایک فوری جائزہ لیجیے، پانچ طلبا اور ایک ٹیچر سے دریافت کیجیے:

(a) وہ کون سی ایک چیز ہے، جس سے انھیں اسکول میں خوشی ملتی ہے؟

(b) وہ ایک کون سی چیز ہے ، جس کو بہتربنایا جا سکتا ہے؟

(c) وہ ایسی کون سی خوش گوار بات ہے ، جو آج انھوں نے دیکھی ہے؟

جائزے کے نتائج کو درج کیجیے اور اپنی جماعت کے سامنے پیش کیجیے۔ آپ نے دوسروں سے کیا سیکھا ہے؟