باب 4

مقناطیسوں کی چھان بین

(Exploring Magnets)

ریشما کیرالہ کے ایک ساحلی قصبے میں رہتی ہے اور اسے مختصر کہانیاں لکھنے کا بہت شوق ہے ۔اس کی دادی کو اس کی کہانیاں سننا اچھا لگتا ہے،تو ریشما اپنی دادی کی ساٹھویں سالگرہ پر انہیں سنانے کے لیے ایک نئی کہانی لکھ رہی تھی۔

یہ کہانی قدیم زمانے میں تجارت کے لیے مسالے لانے والے جہاز پر مبنی تھی۔ ریشما اس سے واقف تھی کہ اُس زمانے میں جہازراں لوگ سمت معلوم کرنے کے لیے ستاروں کی مدد لیتے تھے۔ لیکن اس کی کہانی میں ایک ایسی صورتِ حال پیدا ہوگئی کہ جہاز راں طوفان میں گھر گئے، آسمان میں اندھیرا چھا گیا اور ستارے نظر نہیں آرہے تھے۔ ریشما اپنی کہانی کو آگے نہیں بڑھا سکی کیوں کہ وہ سمتیں تلاش کرنے کا کوئی طریقہ نہیں سوچ سکتی تھی۔

اس نے انٹرنیٹ پر اور اپنے اسکول کی لائبریری میں معلومات تلاش کیں۔ اُسے معلوم ہوا کہ سیّاح لوگ ایک آلے کی مدد سے سمت تلاش کر تے تھے جسے مقناطیسی کمپاس کہا جاتا ہے۔

ریشما نے مقناطیس کی مدد سے بندہونے والا پنسل باکس اورپرس دیکھا تھا۔ اُس کی کلاس کے لکھائی بورڈ میں مقناطیس والا ڈسٹر تھا لیکن اس نے کبھی ان پر غور نہیں کیا تھا۔ اب اس میں مقناطیسوں اور مقناطیسی کمپاس کے بارے میں مزید جاننے کا تجسس پیدا ہوا۔

ماضی میں بادبانی جہاز میں استعمال کیے جانے والے مقناطیس ،قدرتی مقناطیسوں کا استعمال کرتے تھے، جنھیں’لوڈاسٹون‘کہا جاتا تھا اور جن کی دریافت قدیم زمانےمیں ہوئی تھی۔ بعد میں لوگوں کو یہ معلوم ہوا کہ مقناطیس لوہے کے ٹکڑوں سے بھی بنائے جاسکتے ہیں۔اب ہمارے پاس مختلف اجزا سے بنے ہوئے مقناطیس ہیں۔ جو مقناطیس آپ اپنے اسکول کی تجربہ گاہ میں دیکھتے ہیں اور جو پنسل باکس / اسٹیکر/ کھلونوں میں استعمال ہوتے ہیں وہ سب مصنوعی مقناطیس ہیں (شکل4.1)۔ مقناطیس مختلف شکلوں کے ہوسکتے ہیں جن میں سے بعض شکل 4.2 میں دکھائے گئے ہیں۔

4.1 مقناطیسی اور غیر مقناطیسی مواد

سرگرمی 4.1: آیئے چھان بین کریں

• مختلف مواد سے بنی چند اشیا اور مقناطیس بھی جمع کریں۔
• قیاس کیجیے کہ کون سی اشیا مقناطیس سے چپکیں گی۔جدول 4.1 میں اپنا قیاس لکھیں۔
• اب اپنے ہاتھ میں ایک مقناطیس پکڑ کر اُسے ایک ایک کرکے تمام اشیا کے قریب لایئے (شکل 4.3)۔ یہ مشاہدہ کیجیے کہ کون سی چیز مقناطیس سے چپکتی ہے۔

• جدول 4.1 میں اپنے مشاہدات درج کیجیے۔

جدول 4.1 : مقناطیس کی طرف کشش رکھنے والے موادکی نشان دہی

کیا آپ کا قیاس تمام اشیا کے لیے درست تھا؟ کون سے اجزا مقناطیس سے چپکتے ہیں؟ آپ اس سے کیا نتیجہ نکال سکتے ہیں؟

اس سرگرمی سے ہمیں یہ معلوم ہوتا ہے کہ بعض اشیا مقناطیس کی طرف کھنچ کر اُس سے چپک گئیں جبکہ دوسری نہیں چپکیں۔ مقناطیس کی طرف کشش رکھنے والے مواد مقناطیسی مواد کہلاتے ہیں۔ لوہے کی دھات ایک مقناطیسی مواد ہے۔نکل اور کو بالٹ دوسری دھاتیں ہیں جو مقناطیسی ہیں۔ دیگر دھاتوں کے ساتھ اُن کے بعض ا متزاجات بھی مقناطیسوں کی طرف کشش رکھتے ہیں۔ مقناطیس کی طرف کشش نہ رکھنے والے اجزا غیر مقناطیسی مواد کہلاتے ہیں۔

جدول 4.1 میں درج مواد میں سے کون سے غیر مقناطیسی نظر آئے؟

4.2 مقناطیس کے قطب

سرگرمی 4.2: آیئے تفتیش کریں

• کچھ لوہے کی چھیلن (لوہے کے مختصر ٹکڑے) کاغذ کے کسی ورق پر پھیلایئے۔
• اُن کے اوپر ایک چھڑ مقناطیس رکھ کر بغور مشاہدہ کریں کہ لوہے کی چھیلن میں کیا ہوتا ہے۔

کیا آپ ان کے مقناطیس سے چپکنے کے عمل میں کسی خاص بات کا مشاہدہ کرتے ہیں؟ کیا لوہے کی چھیلن مقناطیس پر یکساں طور پر چپک جاتی ہیں؟ یا وہ بعض جگہوں پر زیادہ چپک جاتا ہے؟

ہمیں معلوم ہوتا ہے کہ زیادہ تر لوہے کی چھیلن مقناطیس کے سروں پر چپکتی ہیں جیسا کہ شکل 4.4 میں دکھایا گیا ہے جبکہ لوہے کی چند ہی چھیلن مقناطیس کے باقی حصے پر چپکتی ہیں۔

مقناطیس کے یہ سرے مقناطیس کے دو قطب کہلاتے ہیں، شمالی قطب اور جنوبی قطب۔ زیادہ تر لوہے کی چھیلن کسی بھی شکل کے مقناطیس کے قطبین سے چپک جاتی ہیں۔

واحد قطب تک رسائی ممکن نہیں ہے۔ یہاں تک کہ ا گر کوئی مقناطیس زیادہ مختصر ٹکڑوں میں ٹوٹ جائے تو شمالی اور جنوبی دونوں قطب ہمیشہ مختصر ترین ٹکڑوں میں بھی باقی رہیں گے۔ مقناطیس ہمیشہ جوڑے کی شکل میں واقع ہوتے ہیں۔ ایک شمالی قطب اور دوسرا جنوبی قطب۔ کوئی واحد شمالی قطب اور جنوبی قطب وجود میں نہیں رہ سکتے۔

4.3 سمتیں ڈھونڈھنا

سرگرمی 4.3: آیئے تجربہ کریں

• جیسا کہ شکل 4.5 میں دکھایا گیا ہے، مقناطیس کے درمیانی حصے سے بندھے ہوئے دھاگے سے ایک چھڑ مقناطیس لٹکائیں۔ آپ کو مقناطیس کے افقی طور پر متوازن ہوجانے تک دھاگے کی حالت میں رد وبدل کرنے کی ضرورت ہوسکتی ہے۔
• اب مقناطیس کو آہستہ سے افقی سمت میں گھمائیں اور اسے ساکن حالت میں آنے دیں۔
• زمین پر یا زمین سے چپکے ہوئے کاغذ کے ٹکڑے پر مقناطیس کے سروں سے مطابقت رکھنے والی حالت پر نشان لگایئے۔ ایک لکیر سے زمین پر ان دونوں نقطوں کو جوڑ دیجیے۔ یہ لکیر اس سمت کو ظاہر کرتی ہے جس طرف ساکن رہنے کی حالت میں مقناطیس اشارہ کر رہا تھا۔
• مقناطیس کے سرے کو ہلکے سے کھینچتے ہوئے اُسے دوبارہ گھمائیں اور اُس کے ساکن حالت میں آنے کا انتظار کریں۔ کیا مقناطیس اُسی لکیر کی طرف اشارہ کرتا ہے؟

ایک آزادی سے لٹکتا ہوا مقناطیس شمال-جنوب کی سمت میں ساکن حالت میں آجاتا ہے۔شمال کی طرف اشارہ کرنے والا مقناطیس کا سرا شمال مرکوز مقناطیس یا مقناطیس کا شمالی قطب کہلاتا ہے۔ جنوب کی طرف اشارہ کرنے والا سرا جنوب مرکوز مقناطیس یا مقناطیس کا جنوبی قطب کہلاتا ہے۔ آزادی سے لٹکتا ہوا مقناطیس ہمیشہ شمال-جنوب سمت میں ٹھہرتا ہے کیوں کہ خود ہماری زمین ایک بہت بڑے مقناطیس کی طرح کام کرتی ہے۔

چھڑ مقناطیس کے بجائے لوہے کی چھوٹی چھڑ کی مدد سے یہی سرگرمی دہرائیں۔ آپ کیا دیکھتے ہیں؟ کیا وہ ہر بار شمال-جنوب سمت میں ٹھہرتی ہے؟ ایسا نہیں ہوتا۔ وہ کسی بھی سمت میں ٹھہر سکتی ہے۔ اس کا مطلب یہ ہے کہ صرف مقناطیس ہی شمال-جنوب سمت میں ٹھہرتے ہیں۔ یہ سرگرمی ہمیں اس کی جانچ کرنے کا ایک طریقہ بتاتی ہے کہ دھات کا کوئی ٹکڑا مقناطیس ہے یا نہیں۔

ہمیشہ شمال -جنوب سمت میں ٹھہرنے کی آزادی سے لٹکے مقناطیس کی خصوصیت سے سمتوں کے تعین میں کام لیا جاتا ہے۔ اس کی بنیاد پر پرانے وقتوں میں سمت معلوم کرنے کے لیے ایک مختصر آلہ بنایا گیاجسے مقناطیسی کمپاس(قطب نما) کہتے ہیں۔ اس میں سوئی کی شکل کا مقناطیس ہوتا ہے جو آزادانہ طور پر گھوم سکتا ہے
(شکل 4.6)۔ مقناطیسی کمپاس کی سوئی شمال-جنوب سمت کو بتاتی ہے۔

کمپاس اُس جگہ پر رکھا جاتا ہے جہاں ہم سمتیں معلوم کرنا چاہتے ہوں۔ کچھ دیر بعد سوئی شمال جنوب سمت میں ٹھہر جاتی ہے۔ اس کے بعد کمپاس کی ڈبیہ کو آہستہ سے گھماتے ہیں، یہاں تک کہ ڈائل پر نشان زد شمال اور جنوب سوئی کی سیدھ میں آجائیں۔ اب اس جگہ کی تمام سمتیں اُسی طرح ہوں گی جیسا کہ دکھائی گئی ہیں۔

سرگرمی 4.4: آیئے مقناطیس کمپاس بنائیں

• چند چیزیں جمع کیجیے جیسے کارک کا ٹکڑا، لوہے کی سلائی والی سوئی، مستقل چھڑمقناطیس، شیشے کا پیالہ اور پانی۔
• لوہے کی سلائی والی سوئی کو لکڑی کی میز پر رکھیے۔ پھر ایک مضبوط چھڑ مقناطیس کے ایک قطب کو سوئی کے ایک سرے پر رکھیں۔ مقناطیس کو سوئی کے اوپر لمبائی میں حرکت دیں۔جیسا کہ شکل 4.7aمیں دکھایا گیا ہے۔جب وہ دوسرے سرے پر پہنچ جائے تو اسے اوپر اٹھایئے۔

• مقناطیس کے جس قطب سے آپ نے شروعات کی تھی سلائی کی سوئی کے اُسی سرے پر لائیں جہاں سے آپ نے شروع کیا تھا اور اس عمل کو کم از کم 30 سے 40 بار دہرائیں۔
• لوہے کی کچھ چھیلن یا اسٹیل کی پنوں کو سوئی کے قریب لایئے۔ اگر پنیں یا لوہے کی چھیلن سوئی کی طرف کشش رکھتی ہیں تو اس کا مطلب یہ ہے کہ سوئی مقناطیس بن چکی ہے۔
• اس سوئی کو افقی حالت میں کارک میں سے گزارکر کارک کو پانی سے بھرے ہوئے پیالے میں تیرایئے اس طرح کہ سوئی جیسا کہ شکل 4.7bمیں دکھایا گیا ہے ہر وقت پانی کی سطح کے اوپر ہی رہے۔
• جب سوئی ٹھہر جائے تو آپ کا مقناطیس کمپاس استعمال کے لیے تیار ہے۔ اس سمت پر غور کیجیے جس کی طرف سوئی کے دونوں کنارے اشارہ کرتے ہیں۔
• کارک کو آہستہ سے گھمایئے اور گھومنا بند ہونے تک انتظار کریں۔ اس عمل کو مزید چند بار دہرایئے۔ کیا سوئی کے سرے ہر وقت ایک ہی سمت میں اشارہ کرتے ہیں؟

4.4 : مقناطیسوں کے درمیان کشش اور دفاع

سرگرمی 4.5 : آیئے تجربہ کریں

• دو چھڑ مقناطیس لیجیے جن پر شمالی اور جنوبی قطب کے نشان لگے ہوں۔ دونوں چھڑ مقناطیس پر Aاور Bکا نشان لگالیجیے۔
• مقناطیس Aکے نسبتاً لمبے کنارے کو 6-5گول شکل کی پنسلوں کے اوپر رکھیے جیسا کہ شکل 4.8aمیں دکھایا گیا ہے۔
• اب مقناطیس Bکے ایک سرے کو پنسلوں پر رکھے گئے مقناطیس کے قریب لایئے۔ یہ یقینی بنائیں کہ دونوں مقناطیس ایک دوسرے کو چھو نہیں رہے ہیں۔ غور سے دیکھیے کہ کیا ہوتا ہے۔
• اس کے بعد مقناطیس Bکے دوسرے سرے کو مقناطیس Aکے اسی سرے پر لائیں(شکل 4.8b)۔کیا پنسلوں پر رکھا ہوا مقناطیس حرکت کرنے لگتا ہے؟ کیا وہ ہر بار قریب آئے ہوئے مقناطیس کی سمت میں حرکت کرتا ہے؟ ان مشاہدات سے کیا ظاہر ہوتا ہے؟

آپ دیکھیں گے کہ غیر یکساں قطب (شمال-جنوب) ایک دوسرے کو کھینچتے ہیں۔ جب کہ یکساں قطب (شمال، جنوب) ایک دوسرے کو دفع کرتے ہیں

• اس سرگرمی کو کسی ایک مقناطیس کے بجائے لوہے کی چھڑ کی مدد سے دہرایئے۔ اس بار آپ کے مشاہدے میں کیا آتا ہے؟

آپ دیکھیں گے کہ لوہے کی چھڑ کے دونوں سرے مقناطیس کے شمالی اور جنوبی دونوں قطبوں کی طرف کھنچیں گے۔ اس سرگرمی سے ہم یہ نتیجہ نکالتے ہیں کہ کسی مقناطیس کو اُس کی دفع کی صلاحیت سے پہچانا جاسکتا ہے۔

سرگرمی 4.6: آیئے تجربہ کریں

• ایک مقناطیسی کمپاس اور ایک چھڑ مقناطیس لیجیے۔
• مقناطیسی کمپاس کسی افقی سطح پر رکھیے اور اُس کی سوئی کے ٹھہرنے کا انتظار کیجیے۔

کمپاس کی سوئی بھی ایک مقناطیس ہے اگر اس کے قریب کوئی مقناطیس لایا جائے تو کیا وہ بھی کام کرے گی؟

• اب آہستہ سے چھڑ مقناطیس کے شمالی قطب کو کمپاس کی سوئی کے شمالی قطب کے قریب لائیں جیسا کہ شکل6.9aمیں دکھایا گیا ہے۔ کمپاس کی سوئی کو غور سے دیکھیے۔ آپ کے مشاہدے میں کیا آتا ہے؟ کیا سوئی منحرف ہوجاتی ہے؟ اگر ہاں، تو کس سمت میں؟
• اب مندرجہ بالا طریقے کو چھڑ مقناطیس کے جنوبی قطب کی مدد سے دہرائیں۔ کیا اس بار آپ کو کوئی فرق نظر آتا ہے؟ (a)

  شکل 4.9: کمپاس کی سوئی اور مقناطیس

جب مقناطیس کے شمالی قطب کو کمپاس سوئی کے جنوبی قطب کے قریب لاتے ہیں تو وہ دور ہٹ جاتا ہے جیسا کہ شکل 4.9a میں دکھایا گیا ہے۔ جب مقناطیس کے جنوبی قطب کو کمپاس سوئی کے شمالی قطب کے قریب لاتے ہیں تو وہ اس کے قریب آجاتی ہے۔(شکل 4.9b)

سرگرمی4.7: آیئے تفتیش کریں

• سرگرمی 4.6کا پہلا یا دوسراحصہ دہرائیں
• چھڑ مقناطیس اور مقناطیسی کمپاس کی حالت میں خلل ڈالے بغیر اُن کے درمیان میز کے عمود میں لکڑی کا ایک ٹکڑا رکھیے جیسا کہ شکل 4.10 میں دکھایا گیا ہے۔ کمپاس سوئی کو غور سے دیکھیے۔
• کیا لکڑی کا ٹکڑا رکھ دیئے جانے کی وجہ سے کمپاس سوئی کے انحراف پر کوئی اثر پڑتا ہے؟ جدول 4.2 میں اپنا مشاہدہ درج کیجیے۔
• لکڑی کے ٹکڑے کی جگہ گتے کی شیٹ، پتلی پلاسٹک شیٹ اور پتلی شیشے کی شیٹ رکھ کر اس عمل کو دہرائیں۔

جدول 4.2 : غیر مقناطیسی اجزا کے ذریعے مقناطیس کے اثر کا مشاہدہ

نمبر شمار	مقناطیس اور کمپاس سوئی کے درمیان رکھی گئی چیز	مشاہدات
1.	لکڑی
2.	گتّا
3.	پلاسٹک
4.	شیشہ

مقناطیس اور کمپاس سوئی کے درمیان مندرجہ بالا اشیا میں سے کسی کی بھی شیٹ رکھی جانے پر ہمیں سوئی کے انحراف میں کوئی قابل ذکر تبدیلی نظر نہیں آتی۔ اس سے ہم اس نتیجے پر پہنچ سکتے ہیں کہ مقناطیسی اثر غیر مقناطیسی اشیا کے ذریعے بھی کام کرسکتا ہے۔

4.5 مقناطیس کا کھیل

مقناطیسوں کے بارے میں جاننے کے بعد ریشما بہت پُرجوش تھی اور اُس نے اپنے اسکول کے میلے میں مقناطیسوں کی مدد سے کچھ تفریحی سرگرمیوں کے انتظام کا فیصلہ کیا۔ آپ خود اُنھیں بنانے کی کوشش کرسکتے ہیں اور مزید تفریحی خیالات کے بارے میں سوچ سکتے ہیں۔

کیا ہم کوئی ہار بنا سکتے ہیں ؟(شکل 4.11)۔

کیا ہم گتے کی ٹرے کے نیچے کسی مقناطیس کو حرکت دے کر اسٹیل کی گولیوں کو بھول بھلیاں سے نکال سکتے ہیں ؟(شکل 4.12)۔

کیا ہم اپنی انگلیوں یا مقناطیس کو بھگوئے بغیر مقناطیس کی مدد سے پانی میں گری ہوئی پیپر کلپ کو باہر نکال سکتے ہیں؟(شکل 4.13)۔

کیا دو کاریں ایک دوسرے کی طرف تیز رفتاری سے جاسکتی ہیں یا ایک دوسرے سے دور جاسکتی ہیں؟ (شکل 4.14)۔

خلاصہ

کلیدی نکات

• مقناطیس میں دو قطب ہوتے ہیں۔ شمالی قطب اور جنوبی قطب
• مقناطیسی قطب ہمیشہ جوڑوں میں پائے جاتے ہیں۔ کوئی تنہا شمالی یا جنوبی قطب نہیں ہوسکتا۔
• مقناطیسی اجزا وہ اجزا ہوتے ہیں جو مقناطیس کی طرف کشش رکھتے ہیں۔
• غیر مقناطیسی اجزا، وہ اجزا ہیں جو مقناطیس کی طرف کشش نہیں رکھتے۔
• آزادی سے لٹکا ہوا مقناطیس شمال-جنوب سمت میں ٹکا رہتا ہے۔
• مقناطیس کمپاس کی سوئی شمال-جنوب سمت کو ظاہر کرتی ہے۔
• جب دو مقناطیس ایک دوسرے کے قریب لائے جاتے ہیں تو یکساں قطب (شمال-شمال، جنوب-جنوب) ایک دوسرے کو دفع کرتے ہیں جب کہ غیر یکساں قطب (شمال-جنوب) ایک دوسرے کو کھینچتے ہیں۔

  آیئے اپنی آموزش میں اضافہ کریں

  1. مندرجہ ذیل میں خالی جگہیں بھریئے

  (i) کسی مقناطیس کے غیر یکساں قطب ایک دوسرے کو ........... جب کہ یکساں قطب ایک دوسرے کو ..........

  (ii) مقناطیس کی طرف کشش رکھنے والے اجزا کو .............. کہتے ہیں۔

  (iii) ............. کی سوئی شمال- جنوب سمت میں ٹکی ہوتی ہے۔

  (iv) کسی مقناطیس کے ہمیشہ .......... قطب ہوتے ہیں۔

2. بتایئے کہ مندرجہ ذیل بیانات صحیح () ہیں یا غلط ()

(i) واحد قطب حاصل کرنے کے لیے مقناطیس کو ٹکڑوں میں توڑا جاسکتا ہے ( )

(ii) مقناطیس کے یکساں قطب ایک دوسرے کو دفع کرتے ہیں۔ ( )

(iii) جب چھڑ مقناطیس کو لوہے کی چھیلنوں کے قریب لاتے ہیں تو زیادہ سے زیادہ

چھیلنیں اس کے بیچ میں چپک جاتی ہیں۔ ( )

(iv) آزاد انہ معلق چھڑ مقناطیس ہمیشہ شمال-جنوب سمت کی طرف اشارہ کرتی ہے۔ ( )

3. کا لم I میں ایسی مختلف حالتیں دکھائی گئی ہیں جن میں مقناطیس کا ایک قطب دوسرے کے قریب رکھا جاتا ہے۔ کا لم II مختلف حالات کے لیے اُن کے درمیان واقع ہونے والے تعامل کو ظاہر کرتا ہے۔ خالی جگہیں بھریے۔

4. اتھرو نے ایک تجربہ کیا جس میں اُس نے ایک چھڑ مقناطیس لےکر اسٹیل پنوں کے ڈھیر کے اوپر پھیر دیا (شکل 4.15)۔

آپ کے مطابق، جدول 4.3 میں دیے گئے متبادلات میں سے کون سا متبادل اُس کا ہوسکتا ہے۔

جدول 4.3 : پنوں کی تعداد جنھیں مقناطیس اپنی مختلف حالتوں میں کھینچتا ہے

	حالت A	حالت B	حالت C
(i)	10	2	10
(ii)	10	10	2
(iii)	2	10	10
(iv)	10	10	10

5. ریشما نے بازار سے دھات کی ایک جیسی تین چھڑیں خریدیں۔ ان چھڑوں میں سے دو مقناطیس کی تھیں اور ایک بس لوہے کا ٹکڑا تھی۔ کوئی دوسری چیز استعمال کے بغیر وہ کیسے پہچانے گی کہ تینوں میں سے کونسی دو چھڑ مقناطیس ہوسکتی ہیں؟
6. آپ کو ایک ایسا مقناطیس دیا گیا ہے جس کے قطبوں پر نشان نہیں لگا ہے۔ دوسرے مقناطیس کی مدد سے جس پر اُس کے قطبوں کے نشان پڑے ہیں آپ اس کے قطبوں کو کیسے معلوم کرسکتے ہیں؟
7. کسی چھڑ مقناطیس پر اُس کے قطب ظاہر کرنے کے لیے کوئی نشان نہیں ہوتا۔ کسی دوسرے مقناطیس کی مدد لیے بغیر آپ کیسے جانیں گے کہ کس سرے کے قریب اس کا شمالی قطب واقع ہے؟
8. اگر زمین خود ایک مقناطیس ہے تو کیا آپ مقناطیسی کمپاس کی سمت دیکھ کر زمین کے مقناطیس کے قطبوں کا قیاس لگاسکتے ہیں؟
9. ایک مستری پیچکس کی مدد سے کسی گیجٹ کی مرمت کر رہا تھا تو اسٹیل کے پیچ گرتے جارہے تھے۔ اس باب میں آپ نے جو کچھ سیکھا ہے اس کی مدد سے مستری کے مسئلے کے حل کا طریقہ تجویز کریں۔

10. دو مقناطیس XاورYکو شکل 4.16 میں دکھائی گئی ترتیب میں رکھا گیا ہے۔ مشاہدے میں یہ آتا ہے کہ مقناطیس Xمزید نیچے کی طرف حرکت نہیں کرتا۔ اس کی ممکن وجہ کیا ہوسکتی ہے؟ دونوں میں سے کسی بھی مقناطیس کو پیچھے کھینچے بغیر مقناطیس Xکو Yمقناطیس کے رابطے میں لانے کا طریقہ تجویز کیجیے۔
11. تین مقناطیس شکل 4.17 میں دکھائی گئی ترتیب میں ایک میز پر رکھے ہوئے ہیں۔ مقناطیسوں کے 1، 2، 3، 4 اور 6 سروں پر قطبیت کیا ہے N یا S؟ ایک سرے (5)کی قطبیت آپ کے لیے دی گئی ہے۔

• تین یا چار مختلف مقناطیسوں کی مدد سے اسٹیل کی پنوں یاUکلپس کو اٹھانے کی کوشش کریں۔ اور یہ جانچیں کہ کون سا مقناطیس سب سے زیادہ تعداد میں پنیں اٹھاتا ہے۔ اپنے دوستوں کے ساتھ اس پر تبادلہ خیال کریں کہ کیوں مختلف مقناطیسوں نے مختلف مقدار میں پنوں کو اٹھایا ہوگا۔
• اپنے ٹیچر کی مدد سے کلاس کی مشترک سرگرمی کے طو رپر ایک کھلونا ‘پھُدکتا ہوا مینڈک’ بنایئے۔ اس کھلونا کو بنانے
  کے لیے،ایک اسکیل لیجیے اور گوند کی مدد سے ایک اسکیل کی لمبائی میں شکل (4.18a) متبادل شمال-جنوب انداز سے حلقہ نما مقناطیسوں کو جوڑیے۔ کاغد پر ایک مینڈک کی تصویر بنایئے۔کناروں پر سے کاٹ کر تلی میں ایک چھلے دار مقناطیس چپکائیں۔ مختصر سائز کی ایک شفاف، لچکدار، (شکل4.18a)پلاسٹک کی پٹی لے کر اُس حلقہ نما مقناطیس سے چپکائیں جو مینڈک سے جڑا ہوا ہے۔

جب آپ پیمانے کے اوپر (شکل 6.18b) پلاسٹک کی پٹی (مینڈک والی)کو سرکاتے ہیں تو آپ مینڈک کو پھدکتے ہوئے دیکھ سکتے ہیں۔

• میگلیو(Maglev) ٹرین کے بارے میں جانیے اور اس کا ماڈل بنانے کی کوشش کیجیے۔
• یہ جاننے کی کوشش کیجیے کہ مختلف شکلوں کے مقناطیس بنانے کی ضرورت کیوں ہوتی ہے۔
• طب کے میدان میں مقناطیسوں کے استعمال سے متعلق معلومات جمع کیجیے۔