لفظ ومعنی

زرعی : کھیتی سے متعلق

عقائد : عقیدہ کی جمع، یقین

قدیم : پرانا

انعقادکرنا : کسی پروگرام کا ہونا

تقریبات : پروگرام

تیراندازی : تیرچلانے کا فن

 غورکرنے کی بات

ہندوستان ایک زرعی ملک ہے۔ کثیرآبادی کا ذریعۂ معاش زراعت ہی ہے۔ اس لیے کئی ایسے تہوار ہیں جو فصلوں کی کاشت سے تعلق رکھتے ہیں۔ ان تہواروں کا تعلق فصل کے بونے سے لے کر کٹنے تک ہوتا ہے۔ 

عام طور پر فصلوں کے بونے اور کاٹنے کے دو موسم ہوتے ہیں۔ ایک ربیع کی فصل کا اور دوسرا خریف کا۔  ربیع کی فصلوں کا موسم ماہ  اکتوبر    تا     ا پریل ہے۔ اس دوران گیہوں، جَو، چنا، مٹر، سرسوں، اور آلو وغیرہ کی کاشت کی جاتی ہے۔ خریف کی فصلوں کا موسم جون تا اکتوبرہے۔ اس دوران چاول، جوار، باجرا، مکئی، تِل، مونگ پھلی وغیرہ کی کاشت کی جاتی ہے۔ ربیع اور خریف کے درمیان تربوز، خربوزہ، ککڑی، کھیٖرا  اور کچھ سبزیاں  پیدا کی جاتی ہیں۔اسے زائد فصل کہتے ہیں۔

میٹھے بول

ہم سب بولتے ہیں، باتیں کرتے ہیں۔ باتیں کرنا کِسے اچھّا نہیں لگتا؟ اہم بات یہ نہیں ہے کہ ہم بول رہے ہیں، اہم بات یہ ہے کہ ہم جو کچھ بول رہے ہیں کیا وہ سُننے والوں کو اچھا بھی لگ رہا ہے؟اگر ہمارا بولنا دوسروں کو اچھّا نہیں لگ رہا ہے تو ہمارا بولنا فضول ہے۔ 

میٹھی بولی سے ہمیشہ فائدہ ہوتا ہے۔ اگر فائدہ نہ بھی ہو تو نقصان تو کبھی نہیں ہوتا۔لیکن سخت لہجہ ہمیشہ نقصان دہ  ہوتا ہے۔ میٹھی بولی خود اپنے کو بھی اچھی لگتی ہے، دوسروں کو بھی۔خدا نے یہ چھوٹی سی زبان جو ہمارے منہ میں دی ہے اس سے ہم دنیا کو اپنا دوست بھی بناسکتے ہیں اور دُشمن بھی۔دوستی اگر بہت اچھی چیز ہے تو دُشمنی بہت خراب۔ سوال یہ ہے کہ دشمن بنائے ہی کیوں جائیں؟دوست ہی کیوں نہ بنائے جائیں؟  بات سختی سے کیوں کی جائے؟ نرمی سے کیوں نہ کی جائے؟

میٹھی بولی انسان کا زیور ہے۔ میٹھی بولی سے انسان سماج کا بہترین فرد بن جاتا ہے۔ مُلک کا بہترین شہری بن جاتا ہے۔ دراصل بات چیت کرنے کا طریقہ ایسا ہونا چاہیے جس میں چھوٹے بڑے کا لحاظ رکھا گیا ہو۔ تہذیب اور تمیزداری کا خیال بھی رہے۔ عام طور پر ایسے الفاظ استعمال کیے جائیں جو سُننے والوں کو اچھّے لگیں، جن سے کسی کو بے عزّتی محسوس نہ ہو، جن سے کسی کا دل نہ دُکھے۔ اس کے ساتھ ساتھ یہ بھی ضروری ہے کہ بات چیت کرتے وقت لہجہ بھی نرم ہو۔ لہجے کی سختی اور اکھڑپن بھی کسی کو اچھّا نہیں لگتا۔ نرم لہجے میں کی گئی بُرائی بھی ناگوار نہیں گزرتی ۔ سخت لہجے میں کی گئی تعریف بھی پسند نہیں آتی۔ سخت لہجے میں بولنے والا، بھدّے اور بُرے الفاظ استعمال کرنے والا شخص سماج میں کبھی پسند نہیں کیا جاتا، چاہے اس میں دوسری کتنی ہی خوبیاں کیوں نہ ہوں۔ 

(پڑھنے کے لیے)