سیر کو سوا سیر

ایک گاؤں میں مُفت مَل نامی تاجر رہتا تھا۔ وہ ایک ٹرانسپورٹ کمپنی کا مالک تھا لیکن تھا بہت کنجوس۔ خود کو ہوشیار  اور چالاک سمجھتا تھا۔ لیکن اس کی ہوشیا ری اور چالا کی دوسروں سے مفت کام لینے میں صَر ف ہوتی تھی۔ اسی لیے لوگ اسے مفت مَل  کہتے تھے۔

ٹرانسپورٹ کمپنی ہونے کی وجہ سے اُسے ہمیشہ نوکروں کی ضرور  ت رہتی تھی۔ غرض مند لوگوں کو اچھی تنخواہ کاسبزباغ دکھا کر اپنی کمپنی میں نوکر رکھ لیتا تھا۔ تم ہی بتاؤ چھوٹے چھوٹے کام کرنے کے لیے وہ دو سو روپے ماہانہ تنخواہ دے تو بھلا کون ایسا ہے جو اس کی نوکری کو قبول نہیں کرے گا؟ کئی لوگ اپنی مستقل ملازمت چھوڑ کر اس کی نوکری کو قبول کرتے تھے۔

 مفت مل نے نوکروں کے لیے ایک شرط رکھی تھی۔شرط یہ تھی کہ جو چیز بھی لانے کے لیے کہا جائے، نوکر کو چاہیے کہ وہ چیز بازار سے فوراً خرید کر لائے۔ یہ بہانہ کرنے کی ضرورت نہیں کہ بازار میں نہیں ملی یا ختم ہو گئی۔ جو چیز طلب کی جائے ،فوراً حاضر کرنا چاہیے۔ اگر نہ لائی گئی تو پھر تنخواہ بھی نہیں ملے گی اور  نوکری سے بھی ہاتھ دھونا پڑے گا۔ہر کوئی اس شرط کو معمولی سمجھ کر خوشی خوشی ملازمت قبول کر لیتا تھا۔  مفت مل نوکر سے 29  دن   تک    خوب کام لیتا اور تیسویں دن نوکر کو ہانک مار کر کہتا:

”یہ پانچ روپے لے اور بازار سے تھوڑی ہائے ہائے     خرید لا۔“

بے چارہ نو کرشش و پنج میں پڑ جاتا کہ یہ‘ ہائے ہائے ’   کیا چیز ہے۔ آج تک اس نے اس چیز کا نام بھی نہ سنا تھا۔ پھر وہ سوچتا، اس نام کی کوئی چیز بازار میں ہو گی تب ہی تو انھوں نے طلب کی ہے۔

 نوکر بازار جاتا اور نامراد واپس آ تا۔ پھر اس بے چارے کو طے شدہ شرط کے مطابق 

تنخواہ بھی نہ ملتی اور نوکری سے بھی ہاتھ دھونا پڑتا۔

اس طرح جو بھی نوکر آتا اس سے مفت مل انتیس دن تک خوب کام لیتا اور پھرتیسویں روز ’ہائے ہائے ‘ لانے بھیج دیتا۔ 

اب تک مُفت مَل دس بارہ نو کروں  سے اسی طرح مفت کام لے چکا تھا۔ وہ اپنی چالاکی پر بہت خوش تھا۔ لیکن سب دن ایک جیسے نہیں ہوتے ۔ دنیا میں سیر کو سوا سیر کبھی نہ کبھی مل ہی جاتا ہے۔

ایک دن ایسا ہی ہوا۔ ایک لڑکا جو بہت غریب تھا ،مفت مل کا اشتہار پڑھ کر نوکری کے لیے ٹرانسپورٹ کمپنی پہنچا۔

 مفت مل نے اُسے بھی وہی شرط بتائی۔ بے چارے غریب لڑکے نے اس شرط کو بغیر سوچے سمجھے قبول کر لیا۔ وہ نہایت ایمان داری سے کمپنی میں کام کرنے لگا۔ کام کرتے کرتے انتیس  دن گزر گئے۔ غریب لڑ کا خوش تھا کہ اب تنخواہ کے لیے صرف ایک دن رہ گیا ہے۔ 

اگر اس نے کل بھی کام کر لیا تو پھر اسے دو سو روپے ملیں گے۔ اس نے کبھی اتنے سارے روپے نہیں دیکھے تھے۔ وہ سوچنے لگا، اس تنخواہ میں سے ماں کو سو روپے روانہ کر دوں گا۔ پچاس روپے کے اپنے لیے کپڑے بنالوں گا اور باقی پیسے اپنے خرچ کے لیے رکھوں گا ۔  اس طرح سوچتے سوچتے اس کی آنکھ لگ گئی ۔

دوسرے روز وہ خوشی خوشی کام پر گیا۔ تھوڑی دیر چھوٹے موٹے کام کرنے کے بعد مفت مل نے اسے آواز دی۔ جب وہ آیا تو مفت مل نے اس کے ہاتھ میں پانچ کا نوٹ دے کر کہا: ”جلدی جا اور بازار سے’ ہائے ہائے ‘لے آ۔“

لڑکا چند  لمحےسوچتا ہی رہا کہ یہ  ہائے ہائے کیا بلا ہے ؟جب اس کی سمجھ میں کچھ نہ آیا تو اپنے دل کو یہ کہہ کر سمجھا لیا کہ اس نام کی کوئی چیز بازار میں ضرور ہو گی جسےوہ نہ جانتا ہوگا۔ پھر وہ بازار گیا ۔ اس نے    ’ہائے ہائے‘ ہردکان دارسےمانگی لیکن اسے کہیں نہ ملی۔ بے چارہ غریب لڑکا مایوس ہو گیا۔ گاؤں میں صرف ایک ہی دکان باقی رہ گئی تھی۔ اس نے سوچا شاید وہاں مل جائے ۔ اُمید بھرے لہجے میں اس نے دکان دار سے پوچھا:

“سیٹھ صاحب کیا آپ کے یہاں ہائے ہائے ملے گی؟”

‘ہائے ہائے ’  کا نام سنتے ہی دکان دار، زور زور سے ہنسنے لگا۔ لڑکا سمجھ نہ سکا کہ دکان دار کیوں ہنس ر ہا ہے۔

اس نے پوچھا “سیٹھ جی آپ کیوں ہنس رہے ہیں؟”

”اس لیے ہنسی آرہی ہے کہ تم بھی اس مفت مل کے دھوکے میں آگئے۔ تمھیں مفت مل ہی نے بھیجا ہے نا؟“

“جی ہاں!” لڑکے نے جواب دیا۔

دکان دار نے اپنی ہنسی پر قابو پاتے ہوئے کہا ”مفت مل کی یہ ہمیشہ کی عادت ہے کہ وہ نوکروں سے مفت کام لیتا ہے اور جب وہ ‘ہائے ہائے’ نہیں لاتے تو انھیں تنخواہ بھی نہیں دیتا۔ اتنا ہی نہیں، انھیں ملازمت سے بھی بر طرف کر دیتا ہے۔ اب تم ہی کہو کہ کیا’ہائے ہائے ‘نام کی کوئی چیز دنیا میں ہے؟“

دکان دار کے یہ الفاظ سن کر لڑکے نے حیرت کا بھی اظہار کیا اور پریشانی کا بھی۔ اسے اپنے خواب چکنا چور ہوتے نظر آئے۔ اس کی سمجھ میں نہیں آرہا تھا کہ اس پریشانی سے بچنے کے لیے کیا راستہ نکالا جائے۔

وہ مایوس ہوکر ایک باغ کے گوشے میں بیٹھ گیا اور سوچنے لگا۔ لیکن یہ معمّا حل ہوتا دکھائی نہ دیا۔ اچانک اس کی نظر درخت کے پاس ایک بچھّو پر پڑی۔ اسی وقت اس کے ذہن میں ایک ترکیب آئی ۔ وہ فوراً بازار گیا اور دکان سے خالی بوتل خرید لایا۔ بوتل کا رنگ ایسا تھا کہ اندر کی چیز صاف دکھائی نہ دے سکتی تھی۔

اُس نے بڑی خوبی سے اس بچھو کو پکڑا اور اسے بوتل میں بند کر کے ڈھکّن مضبوطی سے لگا دیا۔ یہ بوتل لے کر وہ مفت مل کے پاس گیا۔ اسے دیکھتے ہی مفت مل نے ہنستے ہوئے پوچھا:

“   کیا‘ہائے ہائے ’مل گئی ؟”

“کیسے نہ ملتی  سیٹھ صاحب! سارا گاؤں چھان  مارا۔ آخر ایک دکان پر بڑی مشکل سے ملی۔” لڑکے نے نہایت سنجیدگی سے جواب دیا۔

“کہاں ہے، کہاں ہے؟”مفت مل نے حیرت سے پوچھا۔ اس کے چہرے کی ساری ہنسی اچانک غائب ہو گئی تھی۔

“اس بوتل میں بند ہے۔ بڑی نازک اور قیمتی چیز ہے۔ذرا آہستہ سے بوتل میں ہاتھ ڈال کر نکال لیجیے ۔”

مفت مل نے لڑکے کے ہاتھ سے بوتل لی اور آہستہ سے اس کا ڈھکن کھولا اور جوں ہی اس نے بوتل میں ہاتھ ڈالا، بچھو نے کس کر ڈنک مارا اور اس کے بعد مفت مل واقعی ‘ہائے ہائے’کرنے لگا۔ اس وقت مفت مل کی  ‘ہائے ہائے’دیکھنے لائق تھی۔ دکان میں اِدھر اُدھر ناچ رہا تھا اور زبان سے’ہائے ہائے‘ کرتا جا   تا تھا۔

لڑکے نے مسکراتے ہوئے کہا:

“سیٹھ صاحب! اب تو ’ہائے ہائے‘ مل گئی ہے نا! کیسی لا جواب ہے یہ چیز!”

 لفظ و معنی

 غورکرنے کی بات

سوچیے اور بتائیے

خالی جگہوں کو دیے ہوئے لفظوں سے بھریے

 درج ذیل لفظوں کو دی ہوئی مثال کے مطابق بدل کرلکھیے۔

مندرجہ ذیل الفاظ کے متضاد لکھیے

 درج ذیل محاوروں کوجملوں میں استعمال کیجیے۔

 پڑھیے ،سمجھیے اور لکھیے

عملی کام