پیامِ عمل

گر قوم کی خدمت کرتا ہے احسان تو کس پر دھرتا ہے

کیوں غیروں کا دَم بھرتا ہے کیوں خوف کے مارے مرتا ہے

اُٹھ باندھ کمر، کیا  ڈرتا ہے!

پھر دیکھ، خدا کیا کرتا ہے!

جو عمریں مفت گنوائے گا وہ آخر کو پچھتائے گا

کچھ بیٹھے ہاتھ نہ آئے گا جو ڈھونڈے گا، وہ پائے گا

تو کب تک دیر لگائے گا یہ وقت بھی آخر جائے گا

اُٹھ باندھ کمر، کیا ڈرتا ہے!

پھر دیکھ، خدا کیا کرتا ہے!

جو موقع پاکر کھوئے گا وہ اشکوں سے منہ دھوئے گا

جو سوئے گا، وہ روئے گا اور کاٹے گا جو بوئے گا

تو غافل کب تک سوئے گا جو ہونا ہوگا، ہوئے گا

اُٹھ باندھ کمر، کیا ڈرتا ہے!

پھر دیکھ، خدا کیا کرتا ہے!

یہ دنیا آخر فانی ہے پھر تجھ کو کیوں حیرانی ہے

جب ہمت کی جولانی ہے اور جان بھی اک دن جانی ہے

کر ڈال جو دل میں ٹھانی ہے تو پتھر بھی پھر پانی ہے

اُٹھ باندھ کمر، کیا ڈرتا ہے!

پھر دیکھ، خدا کیا کرتا ہے!

 —    محمد فاروق دیوانہ

پیام : پیغام

اشک : آنسو

غافل : غفلت کرنے والا

فانی : ختم ہونے والا، فنا ہونے والا

جَولانی : جوش، طبیعت کی روانی

اس نظم میں وقت کی قدر کرنے، حوصلہ مند رہنے اور نیک عمل کرنے کی ترغیب دی گئی ہے۔ انسان جو کچھ حاصل کرنا چاہتا ہے وہ اسے اپنی محنت، کوشش اور لگن سے حاصل کرسکتا ہے۔

قوم کی خدمت کیوں کرنی چاہیے؟ 

اشکوں سے منہ دھونے کا کیامطلب ہے؟

‘ہمت کی جَولانی’ سے آپ کیاسمجھتے ہیں؟

پتھر کے پانی ہونے سے کیا مراد ہے؟

نظم میں ‘اٹھ باندھ کمرکیاڈرتاہے’کی تکرارسے ہمیں کیاسبق ملتاہے؟

ذیل کے الفاظ سبق سے لیے گئے ہیں،انھیں سبق میں تلاش کرکے اپنے جملوں میں اس طرح استعمال کیجیے کہ ان کامذکریامؤنث ہوناواضح ہوجائے۔

قوم     ____________________________________

احسان ____________________________________

 وقت ____________________________________

موقع ____________________________________

 دنیا     ____________________________________

جان   ____________________________________

   کالم میں دیےگئے عنوان پر پانچ پانچ جملےلکھیے

وقت پر کام کرنے کے فائدے وقت پر کام نہ کرنے کے نقصانات

1.             ____________________ ____________________

2.             ____________________ ____________________

3.             ____________________ ____________________

4.             ____________________ ____________________

5.             ____________________ ____________________

جب کسی بات کوشاعری میں کہا جاتا  ہے توجملوں کے لفظوں کی ترتیب میں تبدیلی آجاتی ہے جیسے”احسان توکس پردھرتاہے“     کونثرمیں لکھاجاسکتاہے۔“کس پرتواحسان دھرتاہے۔”   اس طرح نیچے دیے گئے مصرعوں کونثرکے لفظوں کی ترتیب سے لکھیے۔

جو عمریں مفت گنوائے گا __________________

اورکاٹے گاجوبوئے گا __________________

توغافل کب تک سوئے گا __________________

اورجان بھی اِک دن جانی ہے __________________

اپنے گھریاخاندان کے کسی ایسے شخص کے بارے میں لکھیے جس نے اپنی محنت اورلگن سے نمایاں کامیابی حاصل کی ہواورنام پیداکیاہو۔

اپنی زندگی کوکامیاب بنانے کے لیے آپ کاکیامنصوبہ ہے؟ایک پیراگراف میں لکھیے۔

اس نظم کاکوئی دوسراعنوان آپ کے ذہن میں آرہاہوتواسے لکھیے۔