میزائل مین

عبدالکلام کا پورا نام ابو الفاخر زین العابدین عبدالکلام تھا۔تمل ناڈو کے شہر رامیشورم میں 15 اکتوبر 1931 کو پیدا ہوئے۔ان کے والد زین العابدین اور والدہ آشی اماں تھیں۔ والد ایک درویش صفت انسان تھے جو ماہی گیروں کو مچھلیاں پکڑنے کے لیے کرائے پر کشتیاں دیتے تھے۔ وہ تعلیم یافتہ نہ تھے لیکن تعلیم و تربیت کی ضرورت اور اہمیت سے واقف تھے۔ اس لیے انھوں نے عبدالکلام کی تعلیم میں کوئی رکاوٹ نہیں پیدا ہونے دی۔عبدالکلام کو خود اپنی تعلیم میں بے حد دل چسپی تھی۔ تنگ دستی کے باوجود انھوں نے تعلیم کا سلسلہ جاری رکھا۔تعلیم جاری رکھنے کے لیے انھوں نے اخبار بیچے اور ٹیوشن بھی پڑھائی۔ اسکولی تعلیم کے دوران کچھ  ایسے واقعات پیش آئے جن سے وہ بے حد متاثر ہوئے۔ایسے ہی ایک واقعہ کا ذکر کرتے ہوئے ڈاکٹر عبدالکلام نے لکھا ہے:’’بچپن میں میرے تین پکّے  دوست تھے۔ رامانند شاستری، اروندن اور شیو پرکاشن  جب میں  پرائمری اسکول کی پانچویں درجے میں تھا،   تب ایک نئے استاد ہماری  کلاس میں آئے۔  میں اس وقت ٹوپی پہنا کرتا تھا  جو میری مذہبی  شناخت کو ظاہر کرتا تھا۔ میں کلاس  میں ہمیشہ  آگے کی صف میں جنیو پہنے راما نند کے  ساتھ  بیٹھا کرتا تھا۔ نئے استاد کو ایک ہندو لڑکے کا  مسلمان لڑکے ساتھ بیٹھنا اچھا نہیں لگا۔  انھوں نے  مجھے پیچھے والی بینچ پر چلے جانے کو  کہا۔ راما نندبھی  مجھے پیچھے کی صف میں بٹھائے  جاتے دیکھ کر کافی  غم گین نظر آنے لگا۔  

اسکول کی چھُٹّی ہونے پر ہم گھر گئے اور ساراواقعہ اپنے گھر والوں کو بتایا۔ راما نندکے والدلکشمن شاستری جو رامیشورم مندر کے خاص پجاری تھے، انھوں نے استاد کو بلایا اور کہا کہ ان معصوم بچوں کے دماغ میں اس طرح کی سماجی نا برابری اور تعصب کا زہر نہیں گھولنا چاہیے۔ استاد کو اپنے برتاؤپر دکھ ہوا۔ لکشمن شاستری کے کڑے رخ اور سیکولر جذبے سے متاثر ہوکر ان کے رویہ میں بھی تبدیلی آگئی۔

ڈاکٹر عبدالکلام کو بچپن ہی سے آسمان کی بلندیوں میں پرواز کرنے کا شوق تھا۔ اپنے اس شوق کی تکمیل کے لیے انھوں نے ہر وہ قربانی پیش کی جسے ناممکن خیال کیا جاتا ہے۔ ان کے یہ الفاظ بڑی اہمیت رکھتے ہیں جوانھوں نے اپنی خودنوشت ‘پرواز’ (اردوترجمہ)میں لکھے ہیں :’’اگر کوئی انسان سورج کی طرح چمکنا چاہتا ہے تو اسے پہلے سورج کی طرح جلنا ہوگا‘‘ یعنی سخت امتحان سے گزرنا ہوگا۔

ڈاکٹر عبدالکلام نے 1957 میں تنظیم برائے دفاعی تحقیق اور ترقی(Defence             Research         and   Development     Organisation-DRDO )سے وابستہ ہوئے ۔اسی دوران حکومت ہند نے انھیں مزید ریسرچ کے لیے امریکہ کے مشہور سائنسی ادارے ’ناسا‘ National    Aeronautics     and      Space) Administration -NASA)        بھیجا۔ ناسا انتظامیہ عبدالکلام کی ذہانت اور لیاقت سے بہت متاثر ہوا۔ انھیں امریکا کی شہریت کی پیش کش کی گئی لیکن عبدالکلام نے اس پیش کش کو مسترد کردیا ۔وہ وطن واپس لوٹ آئے اور ہندوستانی تنظیم برائے خلائی تحقیق(Indian         Space                Research          Organisation-ISRO) میں خدمات انجام دینی شروع کردی۔اس وقت تک  ہمارے ملک کو دو جنگوں کا تلخ تجربہ ہوچکا تھا۔ لہٰذا جنگی ساز و سامان اور اسلحوں کے معاملے میں ملک کو خود مختار بنانے کی سخت ضرورت تھی۔

اس وقت تک ہمارا ملک دوسرے ملکوں سے بڑی تعداد میں مہنگے میزائل خریدتا تھا  اس لیے  اپنے ملک میں میزائل تیار کرنے کی جانب قدم بڑھایا گیااور اس مشن کی ذمے داری ڈاکٹر عبدالکلام کے سپرد کی گئی۔ ان کی انتھک محنت کے نتیجہ میں 1980 میں ہندوستان نے سیٹلائٹ لانچ وہیکل3- SLVیعنی خلائی طیارہ تیار کرنے میں کامیابی حاصل کرلی۔ اس کے ساتھ ہی ہمارا ملک ان ممالک کی صف میں شامل ہو گیا جو خلائی مشن میں کامیابی حاصل کر چکے تھے۔

 عبدالکلام کا تحقیقی سفر مسلسل جاری رہا۔انھوں نے پرتھوی،اگنی، آ     کاش، ناگ اور ترشول جیسی میزائلوں کے کامیاب تجربے کر کے دنیا کو حیرت میں ڈال دیا۔ غیر ملکی تعاون کے بغیر میزائل بنانے کا سہرا بھی عبدالکلام کے سر جا  تا ہے جس کے سبب وہ ’میزائل مین‘کے نام سے مشہور ہوئے۔

1998 میں راجستھان کے علاقے پوکھرن میں ’   آپریشن شکتی‘ کے تحت کامیاب ایٹمی تجربے کیے  گئے۔ اس غیر معمولی دفاعی مہم کی ذمہ داری بھی ڈاکٹر عبدالکلام کے کاندھوں پر تھی۔

تنظیم برائے دفاعی تحقیق  اور ترقی سے سبک دوش ہونے کے بعد وہ وزیرِدفاع اور وزیراعظم کے سائنسی مشیر بھی رہے۔ 

18 جولائی 2002  کو انھیں صدر جمہوریۂ ہند کے باوقار عہدے پر فائز کیا گیا ۔اس عہدے پر رہتے ہوئے بھی انھوں نے ہمیشہ ایک معلم کا فریضہ  ادا کرنے کی کوشش کی۔اس طرح وہ ملک کے عوام بالخصوص نوجوان نسل کی امیدوں اور آرزوؤں کی علامت بن گئے۔

ڈاکٹر عبدالکلام نہایت سادہ دل اور نیک طینت انسان تھے۔وہ بیک وقت عظیم ّمفکر، معروف سائنس داں، کامیاب استاد اور شاعر تھے۔ان کی علمی اور تحقیقی خدمات کے اعتراف میں کئی یونیورسٹیوں نے  اُنھیں پی ایچ ڈی کی اعزازی ڈگری سے سرفراز کیا۔ حکومت ہندنے انھیں پدم بھوشن،پدم وبھوشن اوربھارت رتن ایوارڈ سے نوازا۔  27 جولائی 2015 کو شیلانگ میں طلبا کے ایک جلسے سے خطاب کرتے ہوئے اس عظیم سائنس داں کا حرکتِ قلب بند ہو جانے سے انتقال ہو گیا۔

ان کے یومِ پیدائش کو عالمی یومِ طلبا (World         Students        Day)کے طور پر منایا جاتا ہے۔

 لفظ و معنی

 غورکرنے کی بات

سوچیے اور بتائیے

خالی جگہوں کو دیے ہوئے لفظوں سے بھریے

 نیچے دیے ہوئے لفظوں کو جملوں میں استعمال کیجیے

 بلند آواز سے پڑھیے اور خوش خط لکھیے

   پڑھیے، سمجھیے اور لکھیے

 عملی کام