ہماری زندگی کا دارو مدار جسمانی صحت پر ہے۔ صحت کے لیے اچھی غذا، کھلی اور تازہ ہوا ،صاف پانی اور صفائی نہایت ضروری ہے۔ گندگی سے طرح طرح کے کیڑے اور جراثیم پیدا ہوتے ہیں۔ مکھیوں اور مچھروں کو تو ہم سب دیکھتے ہیں اور یہ بھی جانتے ہیں کہ جہاں زیادہ گندگی ہوتی ہے، یہ وہیں زیادہ  پیدا ہوتے ہیں، لیکن ہزاروں جراثیم ایسے ہوتے ہیں جو ہم اپنی آنکھوں سے نہیں دیکھ سکتے۔ کیڑے مکوڑے اور جراثیم انسان کی صحت کے لیے نقصان دہ  ہیں۔ ان کو جیسے ہی موقع ملتا ہے، انسانی جسم پر حملہ آور ہوتے ہیں اور اُس سے مختلف بیماریاں پیدا ہوتی ہیں۔ بیماریوں سےمحفوظ رہنے کے لیے بستی، محلہ، گھر اور لباس کی صفائی کے ساتھ ساتھ جسم کی صفائی بھی ضروری ہے۔

انسانی جسم میں جِلد کی بڑی اہمیت ہے۔جِلد ہمارے جسم کا قدرتی لباس ہے۔ یہ ہمارے جسم کو باہر کی گندگی سے بچاتی ہے۔ جِلد کی دو پَرتیں ہوتی ہیں: ایک بیرونی پرت، یعنی وہ حصہ جو ہمیں نظر آتا ہے۔ اس میں رگیں نہیں ہوتیں۔ جب تک یہ صحیح و سالم رہتی ہے،جسم میں جراثیم داخل نہیں ہو پاتے۔ جلد کہیں موٹی ہوتی ہے،کہیں پتلی۔ جسم کے جو حصے زیادہ استعمال ہوتے ہیں، جیسے تلوے اور ہتھیلی، ان کی جلد موٹی بھی ہوتی ہے اور سخت بھی۔

مسلسل استعمال سے جلد کی بیرونی پرت گھِستی رہتی ہے اور نئی جلد اُس کی جگہ لیتی رہتی ہے۔ دوسری اندرونی پَرَت ہے، جو بیرونی پرت کے نیچے ہوتی ہے۔ یہ ریشوں سے بنی ہوتی ہے۔اس میں رگیں ہوتی ہیں،جن میں خون گردش کرتا رہتا ہے۔اسی پرت کے نیچے پسینے کے غدود ہوتے ہیں۔ 

جِلد ہمارے جسم پر غلاف کی طرح تنی ہوئی ہے اوربہ ظاہر سپاٹ معلوم ہوتی ہے، لیکن ایسا نہیں ہے۔ آپ نے کبھی سوچا کہ پسینہ جسم کے اندر سے کیسے نکل آتا ہے؟ بات یہ ہے کہ ہماری جلد کو قدرت نے چھلنی کی طرح بنایا ہے۔ اس میں باریک باریک سوراخ ہوتے ہیں، انھیں مسام کہتے ہیں۔ انھیں سے پسینہ خارج ہوتا ہے۔ یہ مسام اتنے باریک ہوتے ہیں کہ صرف خُوردبین کی مدد سے ان کو دیکھا جا سکتا ہے۔ ان کی تعداد اتنی زیادہ ہوتی ہے کہ شمار کرنا مشکل ہے۔بس یوں سمجھ لیجیے کہ ایک مربع سینٹی میٹر میں تقریباً ایک ہزار مسامات ہوتے ہیں۔

گرمی کے موسم میں ہمارے جسم سے پسینہ زیادہ خارج ہوتا ہے۔ جسمانی محنت کرنے،کھیلنے کودنے اور ورزش کرنے سے بھی پسینہ خوب نکلتا ہے۔ پسینے کے ذریعے جسم کے بہت سے گندے اور فاسد مادے خارج  ہوجاتے ہیں۔ پسینے میں پانی، نمک اور کسی قَدر چکنائی ہوتی ہے۔ آپ نے محسوس کیا ہوگا کہ گرمی اور برسات میں بعض لوگوں کے جسم سے بُو آتی رہتی ہے۔ یہ جسم سے نکلنے والے انھیں مادوں کی بُو ہوتی  ہے۔ نہانے سے یہ بُودور ہو جاتی ہے۔ اگر جلد کی صفائی نہ کی جائے، تو باہرکےگَرد و غبار اور اندر سے نکلنے والے یہ مادّے مسامات کو بند کر دیتے ہیں اور پسینہ نکلنا مشکل ہوجاتا ہے۔ بدن پرمَیل جم جاتا ہے ۔اس سے جسم پر پھوڑے پھنسیاں نکلنے لگتی ہیں اور خارش ہو جاتی ہے۔ جسم کے گندے مادے خارج نہ ہونے سے طبیعت میں سستی اور کاہلی پیدا ہوتی ہے۔

 جسم کو صاف رکھنے کے لیے نہانا ضروری ہے،تاکہ پسینے کے ذریعے نکلنے والے مادّے جِلد پرنہ جم جائیں اور مسامات کھلے رہیں۔جسم کے جو حصّے زیادہ کھلے رہتے ہیں، ان پر گردو غبار زیادہ جمتا ہے، اس لیے اُن کا بار بار دھونا مفید ہے۔ نہانے کا مطلب جسم پر صرف پانی ڈالنا نہیں ہے، بلکہ جسم کو اچھی طرح رگڑ کر نہانا چاہیے۔ اس سے جسم پر جما ہوا میل دور ہو جاتاہے، مسامات کھل جاتے ہیں اور جسم میں خون کی گردش تیز ہو جاتی ہے۔ جسم میں چستی پید اہوتی ہے، اور ہم فرحت اور تازگی محسوس کرتے ہیں۔

یوں تو نہانے کے لیے تازہ اور صاف پانی ہی اچھا ہوتا ہے،لیکن موسم کے اعتبار سے گرم یا ٹھنڈے پانی سے بھی نہایا جاسکتا ہے۔ صابن کے ذریعے میل آسانی سے دور ہوجاتا ہے۔ نہانے کے بعد جِلد اور بالوں کو تولیے سے اچھی طرح خشک کر لینا چاہیے۔

کھانا کھانے،ورزِش کرنے یا جسمانی محنت کرنے کے فوراً بعد نہانا ٹھیک نہیں ہوتا۔صبح سویرے نہانا سب سے اچھا ہے۔

کبھی کبھی بدن کی مالش بھی جِلد کے لیے مفید ہے۔ اِس سے دورانِ خون بھی ٹھیک رہتا ہے اور جِلد بھی نرم رہتی ہے۔

اچھی صحت کے لیے ضروری ہے کہ ہمارے آس پاس کا ماحول بھی صاف ستھرا ہو۔

لفظ و معنی

 غور کرنے کی بات

  سوچیے اور بتائیے

خالی جگہوں کو دیے ہوئے لفظوں سے بھریے

    مسام   دارومدار     جِلد     طبیعت     ماحول

دیے گئے لفظوں کوبلند آواز سے پڑھیے اور اپنے جملوں میں استعمال کیجیے

  پڑھیے ،سمجھیے اورلکھیے

الف 

 عملی کام

اُردو زباں ہماری