باب 6

پارلیمانی نظام: مقننہ اور عاملہ
(The Parliamentary System:
Legislature and Executive)

آئین محض ایک قانون داں کا دستاویز نہیں ہے؛ یہ زندگی کا وسیلہ ہے اور اس کی روح ہمیشہ زمانے کی روح ہوتی ہے۔

—الّادی کرشن سوامی ا یّر

نومبر 1949، آئین ساز اسمبلی میں بحث

شکل6.1: پارلیمنٹ کی نئی عمارت کی خصوصیات

نالندہ ودیالیہ کے آٹھویں جماعت کے طلبا دہلی میں اسکول کے تفریحی دورہ پر تھے۔ اوشا، سکھ وندر، انجلی، جان اور فریدہ پارلیمنٹ کی نئی عمارت دیکھنے کے لیے بہت پُر جوش تھے۔

یہ نہ تو چوکور ہے اور نہ ہی گول ہے۔ اس کی شکل نرم مثلث جیسی ہے۔

یہ سہ رخی ڈیزائن توازن،شمولیت اور مقصدیت کی علامت ہے۔

اِس میں ماحول دوست طریقۂ تعمیر کا استعمال کیا گیا ہے جس سے بجلی کی کھپت میں 30 فیصد کی کمی ہوئی ہے۔

یہ ہندوستان کے عجائب گھر جیسا لگتا ہے۔

اشوک کا نشان!

تعارف

ہندوستان کو بہت سے لوگوں کی عظیم قربانیوں اور نوآبادیاتی نظام کے خلاف ایک طویل جد و جہد کے بعد آزادی حاصل ہوئی۔ آزاد ملک کی عوام اب اپنی حکومت کے متعلق خود فیصلہ کر سکتی تھی۔ ہمارے ملک کے اِ س نئے عہد کا اوّلین قدم آزاد ہندوستان کا آئین تیار کرنا تھا۔ اِس جامع دستاویز نے ملک کے لیے بنیادی اصول قائم کیے جس میں عام بالغ حق رائے دہی بھی شامل ہے، جو ملک کی تمام بالغ عوام کو ان کی سماجی یا معاشی پس منظر، صنف، ذات یا مذہب کے فرق کے بغیر رائے دہی کا حق دیتا ہے۔

شکل 6.2: ہماری پرانی پارلیمنٹ (جسے اب سمویدھان سدن کہا جاتا ہے) کی تعمیر 1920 کے عشرے میں ہوئی تھی۔ آئین ساز اسمبلی نے اپنے مذاکرات کے لیے یہیں میٹنگ کی تھی اور یہ سات دہائیوں سے بھی زیادہ تک پارلیمنٹ ہاؤس کے طور پر استعمال ہوتی رہی۔

ہندوستان کی عوام اپنے نمائندوں کو براہِ راست منتخب کرتی ہے جو لوک سبھا کے رکن بنتے ہیں۔ اِن منتخب نمائندوں میں اکثریتی گروپ حکومت تشکیل کرتا ہے۔ پارلیمنٹ، حکومت کا ا علی ترین قانون ساز ادارہ ہے (یہ ملک کے لیے قانون بناتا ہے)۔ اِس میں عوام کے سبھی منتخب نمائندے شامل ہوتے ہیں اور یہ حکومتی کاموں کی نگرانی اوررہنمائی کرتا ہے۔ اِ س لیے حکومت کو عوام کی رضا مندی سے کام کرتے ہوئے دیکھا جا سکتا ہے۔ 1952 میں پہلی لوک سبھا کےبعد اب تک 17 لوک سبھائیں تشکیل پا چکی ہیں۔ 18ویں لوک سبھا کی تشکیل جون 2024 میں عمل میں آئی۔

شکل 6.3: نئی دہلی میں پارلیمنٹ کی عمارت کی تعمیر بڑھتی ہوئی ضرورتوں کے لیے گنجائش، تکنیک، استحکام اور حفاظت کے مدِ نظر کی گئی ہے۔

ہندوستانی پارلیمنٹ کی ساخت

ہندوستانی پارلیمنٹ صدرِ جمہوریہ اور دو ایوانوں پر مشتمل ہے: لوک سبھا (عوامی ایوان یاایوانِ زیریں) اور راجیہ سبھا (ریاستوں کی کونسل یاایوان بالا)۔ دوایوانوں والی اِس ساخت کو’دو ایوانی‘ نظام (Bicameral)کہا جاتا ہے۔ (biکا مطلب ہے دو،اور Cameral کا مطلب چیمبر یا گھر ہوتا ہے)۔

شکل6.4: نئی پارلیمنٹ کی عمارت میں
لوک سبھا ہال

شکل6.5: پریس گیلری سے لیا گیا راجیہ سبھا
کا ایک منظر

یاد رکھیں

ہندوستانی عوام لوک سبھا کے لیے اپنے نمائندوں کا انتخاب براہِ راست الیکشن (عام بالغ رائے دہی پر مبنی) کے ذریعے کرتی ہے۔ آئین نے اِس ایوان کے اراکین کی زیادہ سے زیادہ تعداد 550 مقرر کی ہے۔ راجیہ سبھا کے اراکین (MPs)کا انتخاب الیکٹورل کالج کے ذریعے بالواسطہ طور پر کیا جاتا ہے۔ اِس کے متعلق آپ نے گذشتہ باب میں پڑھا تھا۔ راجیہ سبھا کی متعینہ سیٹوں کی تقسیم اور لوک سبھا میں نمائندگی کرنے والے اراکین کی تعداد کا انحصار ہر صوبے کی آبادی پر ہوتا ہے۔

اسے دیکھنا نہ بھولیں

ہمیں یہ بخوبی معلوم ہے کہ ہندوستانی آئین کے کئی پہلو دوسرے ممالک کے آئین سے اخذ کیے گئے تھے۔ برطانوی نظام نے ہمارے پارلیمانی جمہوریت کے نظام کو متاثر کیا۔ تاہم ہمارے مجاہدین آزادی اور آئین سازوں کو برطانوی نوآبادیاتی طرزحکمرانی کے ڈھانچے میں شرکت کے ذریعہ حاصل ہونے والے عملی تجربے نے، اگرچہ وہ بہت ہی محدود تھا، پارلیمانی طریقہ کار سے واقفیت فراہم کی تھی؛اس کے علاوہ وہ قدیم جمہوریاؤں ( مہاجن پدوں)؛گاؤں کی پنچایتوں کی معلومات بھی تھی جن میں بزرگ اجتماعی فیصلے کرتے تھے۔یہ ہم گذشتہ باب میں پڑھ چکے ہیں۔

شکل 6.6: آئین ہند

آئین سازی کے دوران اِس پر تفصیلی مباحثہ ہوا کہ کیا ہندوستان میں دو ایوانی نظام ہونا چاہیے یا نہیں۔ ایسا محسوس کیاگیا کہ براہِ راست طور پرمحض واحد منتخب ایوان آزاد ہندوستان کے سامنے پیش آنے والے چیلنج کا مقابلہ کرنے کے لیے کافی نہیں ہوگا۔ وفاقیت کے مزاج کے مطابق ریاستوں کی الگ کونسل یعنی راجیہ سبھا کی ضرورت محسوس ہوئی۔راجیہ سبھا کی ساخت اور اس کے لیے انتخاب کے طریقۂ کار کو بھی وضع کیاگیا۔ہندوستان وفاقی طرزِ حکومت کی پیروی کرتا ہے جو حکومت کی ایسی شکل کو کہتے ہیں جس میں اقتدار کو مرکزی ،ریاستی اور مقامی حکومتوں کے درمیان تقسیم کیا جاتا ہے۔ یہ نظام قومی اتحاد اور مقامی مفادات کے درمیان توازن براقرار رکھنے میں مددکرتا ہے۔

عمل (Function)

پارلیمنٹ کے ہر ایوان میں ایک صدر اجلاس (Presiding officer) افسر ہوتا ہے جو یہ طے کرتا ہے کہ بحث و مباحثہ اور مذاکرات منظم طور پر انجام دیے جائیں۔ لوک سبھا کے اراکین ایک اسپیکر منتخب کرتے ہیں جو ایوان کی کاروائی چلاتا ہے، اراکین کو بولنے کی اجازت دیتا ہے، نظم و ضبط قائم رکھتا ہے اوراصولوں پر عمل درآمد کو یقینی بناتا ہے۔ راجیہ سبھا کی صدارت ہندوستان کے نائب صدرِ جمہوریہ کرتے ہیں جو اِس کے صدر کے طور پر کام کرتے ہیں۔

اسے دیکھنا نہ بھولیں

’سینگول‘ جو ایک طلائی ملمّع شدہ چاندی کا عصا ہے،علامتی طور پر 14 اگست 1947کو بھارت کی آزادی کے موقع پر بھارت کے پہلے وزیراعظم پنڈت جواہر لال نہرو کو پیش کیا گیا۔ یہ اقتدار کی منتقلی کی ایک مؤثر علامت کے طور پر دیا گیا تھا۔ اب یہ نئی لوک سبھا میں اسپیکر کی کرسی کے قریب رکھا گیا ہے، اور یہ شفاف اور منصفانہ حکمرانی کی علامت ہے ۔چول دور سے تعلق رکھنے والا یہ سینگول نئے حکمرانوں کو یہ یاد دلانے کے لیے پیش کیا جاتا تھا کہ اقتدار کو دھرم اور راست بازی کے اصولوں کے تحت استعمال کرنا چاہیے۔ اس کے اوپر نندی کی شبیہ موجود ہے، جو انصاف کی علامت ہے۔

شکل6.7: سینگول

عصا (Sceptre) : ایک سجا ہوا چھڑی نما عصا جو بادشاہ یا ملکہ تقاریب میں اقتدار کی علامت کے طور پررکھتے ہیں۔

پارلیمانی مباحث کو سب کے لیے قابل رسائی بنانے کے لیے، متعدد ہندوستانی زبانوں میں ترجمہ کی خدمات فراہم کی جاتی ہیں۔ پہلے، بیک وقت ترجمانی 12 زبانوں میں دستیاب تھی، جن میں ہندی، انگریزی، اسامی، بنگالی، گجراتی، کنڑ، ملیالم، مراٹھی، اوڈیہ، تمل، پنجابی اور تیلگو شامل تھیں۔ حال ہی میں چھ مزید زبانیں شامل کی گئی ہیں: بوڈو، ڈوگری، میتھلی، منی پوری، اردو اور سنسکرت۔ مستقبل میں مزید زبانوں کے شامل ہونے کا امکان ہے۔

پارلیمنٹ کی عاملہ سے متعلق ذمہ داریاں (یعنی یہ یقینی بنانا کہ بنائے گئے قانون نافذ ہوں اور ان پر عمل درآمد بھی ہوں) اس کی قانون سازی(یعنی قانون بنانا) کے رول کی طرح ہی اہم ہیں۔ وفاقی عاملہ پارلیمنٹ کے اختیارات اور قانون سازی کےعوامل کو قوت عطا کرتی ہے۔ وفاقی عاملہ میں مندرجہ ذیل رکن ہوتے ہیں۔

• صدرِ جمہوریہ
• نائب صدرِ جمہوریہ
• وزیر اعظم کی صدارت میں وزرا کی کونسل

وزرا کی کونسل کا انتخاب پارلیمنٹ کے دونوں ایوانوں کے اراکین میں سے کیا جاتا ہے۔ یہ وزرا اجتماعی طور پر لوک سبھا کے لیےجواب دہ ہوتے ہیں۔

آیئے، اب ہم پارلیمنٹ کے مقننہ اور عاملہ کے کاموں پر گفتگو کرتے ہیں۔

پارلیمنٹ کی قانون سازی کےکام

آئین نے پارلیمنٹ کے ان بنیادی کاموں کا تعین کردیا ہے جن کی تکمیل پارلیمنٹ کو کرنی ہوتی ہے ۔ ا ن کاموں کو مجموعی طور پرمندرجہ ذیل عنوانات کے تحت ترتیب دیا جا سکتا ہے۔

1. آئینی امور

2. قانون سازی

3. عاملہ کی جواب دہی

4. مالیاتی جواب دہی

ان کا مختصر مطالعہ ہم مندجہ ذیل حصّوں میں کریں گے۔

1) آئینی امور (Constitutional Functions)

یاد رکھیں

جمہوریت اور ملک گیری کے موضوع پر اپنے گذشتہ اسباق سے پارلیمنٹ کے بعض آئینی امور کے نام بتایئے۔ کیا آپ نے صدرِ جمہوریہ اور نائب صدرِ جمہوریہ کے انتخاب کا ذکر کیا؟ آئین میں ترمیم کے بارے میں آپ کا کیا خیال ہے؟ دراصل یہ پارلیمنٹ کے نہایت اہم آئینی امور ہیں۔ اِن کے علاوہ بھی بعض دیگر اہم کام ہیں جن کا مطالعہ ہم اعلیٰ درجات میں کریں گے۔

پارلیمنٹ کو براہِ راست ہندوستانی آئین کی بنیادی اقدار کی حفاظت کی ذمہ داری عائد کی گئی ہے جن میں شامل ہیں:

(a) عام بالغ حق رائےدہی کےذریعے پارلیمانی جمہوریت کو برقرار رکھنا،

(b) مقننہ، عاملہ اور عدلیہ کے درمیان اختیارات کی علاحدگی پر عمل ،

(c) وفاقیت کو یقینی بنانااور

(d) قوانین اور پالیسیوں کی تشکیل کے ذریعے بنیادی حقوق اور ریاستی پالیسی کے رہنما اصولوں کو قائم رکھنا۔

2) قانون سازی

مقننہ کی اہم ذمہ داریوں میں سے ایک قانون بنانا ہے۔ آئین نےقانون سازی کے لیے ایک وسیع اور سخت معیار مقرّر کیا ہے۔ عموماً کسی قانون کو ایکٹ کے ذریعے نافذ کیا جاتا ہے۔ بل، اصلاً ایک مجوزہ قانون کا مسودہ ہوتا ہے۔اسے پارلیمنٹ میں پیش کیا جاتا ہے اور ایکٹ بننے سے پہلے طویل اور محنت طلب عمل سے گذرتا ہے۔ذیل میں مفت اور لازمی تعلیم کا حق برائے اطفال ایکٹ 2009 کی مثال سے ہم بل (Bill) کے ایکٹ (Act) بننے اور آخر میں قانون (Law) کی شکل لینے کے طویل اور محنت طلب سفر کوسمجھ سکتے ہیں۔

بل(Bill):

بل ایک مجوزہ قانون کا مسودہ ہوتا ہے جسے قانونی شکل دینے کے لیے پارلیمنٹ سے منظوری لینی ہوتی ہے۔

اسٹینڈنگ کمیٹی Standing)(Committee:

یہ پارلیمنٹ کے اراکین پر مشتمل ایک مستقل کمیٹی ہے (ارکان پارلیمنٹ بدل سکتے ہیں، لیکن کمیٹی کا ڈھانچہ وہی رہتا ہے) یہ حکومت کی کار کردگی کی جانچ کرتی ہے۔ مشورہ دیتی ہے اور حکومت کے کیے گئے کاموں کے متعلق سوال پوچھتی ہے۔

آیئے معلوم کریں

آرٹی ای کس طرح ایک ایکٹ بنا اِس عمل کو دکھانے کے لیے ایک چھوٹا سا چارٹ بنائیں۔ اگر آرٹی ای لوک سبھا میں پیش کیا گیا ہوتا تو آپ کے خیال سے اس کا طریقۂ کار کیا ہوتا ہے؟

اِسے دیکھنا نہ بھولیں

بعض اقسام کے بل صرف لوک سبھا میں ہی پیش کیے جاتے ہیں۔ اس کی ایک مثال مالیاتی بل (Money Bill)ہے،جو مالی معاملات ( بشمول ٹیکس اور سرکاری قرض وغیرہ) سے متعلق ہے۔ در حقیقت یہ قانون کا ایک مسودہ ہوتا ہے، جسے صرف لوک سبھا میں ہی پیش کیا جا سکتا ہے۔ البتہ اِس بل کو پیش کرنے سے پہلے صدرِ جمہوریہ کی سفارش لازمی ہوتی ہے۔

3) عاملہ کی جواب دہی

وزیرِ اعظم اور وزیروں کی کونسل وفاقی عاملہ کا حصہ ہوتے ہیں۔ یہ ہیں:

• بنیادی طور پر قوانین کے نفاذ اور ان پرعمل درآمد اور حکومت کی مؤثر کارکردگی کی نگرانی کےلیے ذمہ دار ہوتے ہیں؛
• آئین اور اس کے قوانین میں بتائے گئے اصولوں کی بنا پر حکومت کے روزمرہ کے کاموں سے متعلق فیصلہ لینا؛
• وقفہ سوال جیسے نظام کے ذریعے جس میں وزرا کو اپنے کاموں اور فیصلوں کی موزونیت کو ثابت کرنا ہوتا ہے لوک سبھا کے تئیں جواب دہ ہونا۔ لوک سبھا میں سوالات کا وقفہ ایک مخصوص وقفہ (عام طور پر پارلیمنٹ سیشن کا پہلا گھنٹہ) ہوتا ہے جس میں اراکین پارلیمنٹ وزیروں سے سرکاری پالیسیوں اور کارکردگی سے متعلق سوالات پوچھ سکتے ہیں، یہ پارلیمنٹ کا ایسا عمل ہے جو عاملہ کو جواب دہ بناتا ہے۔ (یعنی عاملہ کو اپنے سبھی کاموں اور فیصلوں کی موزونیت کو ثابت کرنا ہوتا ہے) خصوصی کمیٹیاں بھی میٹنگ کا انعقاد کرتی ہیں، جہاں وزارتوں کو اپنی پالیسیوں کے بارے میں سمجھانا اور سوالات کے جواب دینا ہوتا ہے۔ اِن کمیٹیوں میں مختلف سیاسی پارٹیوں کے اراکین شامل ہو سکتے ہیں۔

شکل 6.9: مستقل کمیٹی برائے صحت اور خاندانی بہبود کی رپورٹ سے اقتباس

آیئے معلوم کریں

یہاں صحت اور خاندانی بہبود سے متعلق مستقل کمیٹی اور وزارتِ صحت و خاندانی بہبود کے حکاّم کے درمیان ہوئی میٹنگوں کی رپورٹ کا ایک حصّہ دیا گیا ہے۔ اوپر دی گئی تصویر کو دیکھیں اور چھوٹے چھوٹے گروپوں میں مندرجہ ذیل پر گفتگو کریں۔کون کسے رپورٹ کر رہا ہے؟ کِس موضوع کا تجزیہ کیا گیا؟ کمیٹی کی سفارشات کی شناخت کیجیے۔ حکومت کا جواب کیا ہے؟

4) مالیاتی جواب دہی

پارلیمنٹ سالانہ بجٹ کے ذریعے حکومت کےاخراجات کو منظوری دیتی ہے اور اس کی نگرانی کرتی ہے۔ ساتھ ہی مختلف وزارتوں کے فنڈ کی تقسیم کی جانچ بھی کرتی ہے۔

آیئے معلوم کریں

آپ کے خیال میں پارلیمنٹ سرکاری اخراجات پر نظر کیوں رکھتی ہے؟ (اشارہ-حکومت کس کا پیسہ خرچ کرتی ہے؟)

حکومت سے توقع کی جاتی ہے کہ وہ پارلیمنٹ کو ضروری معلومات بروقت اوردرست طور پر فراہم کرائے۔

پارلیمنٹ کا عا ملہ سے متعلق کام

گذشتہ اوراق میں ہم نے عاملہ کے کردار کے بعض پہلوؤں پر روشنی ڈالی ہے۔ اب ہم اس پر تھوڑا اور غور کرتے ہیں۔

اِسے دیکھنا نہ بھولیں

ہندوستانی آئین کا حصّہ 5باب اوّل عاملہ سے شروع ہوتا ہے۔ اِس میں صدرِ جمہوریہ، نائب صدرِ جمہوریہ اور وزیروں کی کونسل کے کرداروں اور ذمہ داریوں کا بیان ہے۔ باب دوم میں پارلیمنٹ کے رول اور کاموں کا ذکر ہے۔ ایسا کیوں ہوسکتا ہے؟

1) صدرِ جمہوریہ (The President)

صدرِ جمہوریہ ملک کا سربراہ اورعاملہ کابرائےنام صدر ہوتاہے۔ وزیر اعظم اور کابینہ حکومت چلانے کےلیے ذمہ دار ہوتے ہیں۔ صدرِ جمہوریہ بشمول دیگر فرائض منصبی کے وزیرِ اعظم اور دیگر وزرا کی تقرّری بھی کرتا ہے، پارلیمنٹ کا اجلاس طلب کرتا ہے اور بِلوں کو منظور کرتا ہے۔ وزرا کی کونسل صدر کو مشورے اور تعاون دیتی ہے، تاہم ، مخصوص حالات میں، صدراپنی صواب دید کے مطابق فیصلہ کرسکتا ہے، خصوصاً سیاسی بحران کے دوران، مثلاً جب کسی بھی پارٹی کو لوک سبھا کے انتخابات میں واضح اکثریت حاصل نہ ہو۔

2) وزیر اعظم اور وزرا کی کونسل

ہندوستان کے پارلیمانی نظام میں وزیر اعظم عملی طورپر عاملہ کا سربراہ ہوتا ہے۔ صدرِ جمہوریہ لوک سبھا میں اکثریت حاصل کرنے والی پارٹی یا اتحاد کے لیڈر کو وزیر اعظم مقرر کرتا ہے۔ وزیرِاعظم لوک سبھا میں اراکین کی اکثریت اور حمایت سے کام کرتے ہیں۔

وزیرِ اعظم کے اہم کاموں میں شامل ہیں:

� وزراکے کونسل کی قیادت کرنا � مختلف وزارتوں کے درمیان ہم آہنگی پیداکرنا

� صدر جمہوریہ کو مشورہ دینا � قومی پالیسیوں کی تشکیل کرنا

وزیرِ اعظم اور کابینہ فیصلے لیتے ہیں اور حکومت چلاتے ہیں۔وہ اجتماعی طور پر لوک سبھا کو جواب دہ ہوتے ہیں۔ پارلیمنٹ میں بحث کے لیے پیش کیے جانے والے زیادہ تر بِل کو سرکار تجویز کرتی ہے۔ سرکاری پالیسیوں اور قوانین کے نفاذ کے لیے حکاّم کے ایک مستقل گروپ کا تعاون لیا جاتا ہے، جنھیں سول سرونٹ، کہا جاتاہے، یہ حکام جنھیں عام طور پر منتظم یا نوکرشاہ بھی کہا جاتا ہے، وزرا کی ہدایت پر کام کرتے ہیں اور اِس بات کو یقینی بناتے ہیں کہ مختلف سرکاری شعبے بہتر طور پر کام کریں۔

آیئے معلوم کریں

اگر عاملہ ،مقننہ کا حصہ ہے، توہم یہ کیسے کہہ سکتے ہیں کہ یہ اختیارات کی تقسیم ہے؟

(اشارہ: اوپر دیے گئے مقننہ والے حصّے کو دوبارہ پڑھیں)

اِسے دیکھنا نہ بھولیں

• سال 1956 میں ریلوے کے وزیر لال بہادر شاستری نے ایک ریل حادثے کے بعد استعفیٰ دے دیا تھا۔ اگرچہ انھیں حادثے کے لیے ملزم نہیں ٹھہرایا گیا لیکن ان کا ماننا تھا کہ ایک وزیر کو اپنی وزارت میں ہونے والے کسی بھی واقعے یا حادثے کی اخلاقی ذمہ داری لینی چاہیے۔ انھوں نے اس وقت کے وزیر اعظم جواہر لعل نہرو کو استعفیٰ سونپ دیا ۔ شروع میں نہرو نے اِسے منظور نہیں کیا۔ لیکن لال بہادر شاستری نےاصرار کیا، بالآخر ان کا استعفیٰ منظور کر لیا گیا۔

شکل 6.10: لال بہادر شاستری کی تصویر (وزیر ریلوے اور بعد میں ملک کے وزیر اعظم)

عدلیہ— ضبط و توازن کا کردار

عدلیہ، حکومت کی وہ شاخ ہے جو تنازع کے مخصوص معلاملات سمیت ملکی قوانین کی ترجمانی اور نفاذ کے لیے ذمہ دار ہے ۔عدلیہ ایک عدالتی نظام کے ذریعہ کام کرتی ہے۔ یہ معاشرے اور حکمرانی کی جمہوری نوعیت کو برقرار رکھنے میں اہم رول ادا کرتی ہے۔عدلیہ آئین کے محافظ کے طور پر کام کرتے ہوئے اِس بات کو یقینی بناتی ہے کہ حکومت کی تمام شاخیں آئینی اصولوں اور معیار کے مطابق کام کریں۔ یہ قوانین کی تشریح ، تنازع کا حل اور بنیادی حقوق کی حفاظت کرکے معاشرے اور سرکاری اداروں کی کار کردگی پر نظر رکھتی ہے۔

آئین نہ صرف یہ بتاتا ہے کہ مقننہ اورعاملہ کو ملک پر حکومت کرنے کا اختیار کیسے حاصل ہوا بلکہ ان کے سامنے ذمہ داریوں کی فہرست بھی بیان کرتا ہے۔ اس کو یقینی بنانے کے لیے کہ مقننہ کے اختیارات کا صحیح استعمال کیا جائے اور ذمہ داریوں کو نبھایا جائے، عدلیہ کو جانچنے کی خصوصی اور نازک ذمہ داری دی گئی ہے کہ پارلیمنٹ کے منظور کردہ قوانین نے آئینی ڈھانچے کی خلاف ورزی تو نہیں کی ہے۔ اسی طرح اگر آئین کی خلاف ورزی ، عاملہ کے ذریعے اس کے نفاذ کے وقت ہوتی ہے تو اس صورت میں بھی عدلیہ کے پاس قدم اٹھانے کا اختیار ہوتا ہے۔ جس طرح پارلیمنٹ اپنی مقننہ اور عاملہ کے ذریعہ کام کرتی ہے ،اسی طرح عدلیہ اپنی عدالتوں کے ذریعہ کام کرتی ہے۔

اِس باب میں، ہم نے اس بات کا پتہ لگایا کہ کس طرح پارلیمنٹ کےمختلف ادارے(Organs) قانون بنانے اور اس کے نفاذ میں توازن رکھتے ہیں اور عدلیہ ان اقدامات کی کس طرح نگرانی کرتی ہے۔ یہ سب اختیارات کی تقسیم مقننہ، عاملہ اور عدلیہ کے درمیان ضبط و توازن (Checks and Balances)کے نظام کی مثالیں ہیں ،جو اس کو یقینی بناتی ہیں کہ کوئی بھی ادارہ زیادہ طاقت ور نہ ہو۔

آئیے معلوم کریں

� اگر تینوں اداروں (Organs) میں سے کسی ایک— مقننہ ، عاملہ یا عدلیہ کے پاس تمام طاقت آ جائے تو کیا ہو سکتا ہے؟ یہ عوام کے حقوق کو کس طرح متاثر کر سکتا ہے؟ اِس موضوع پر اپنے ہم جماعت کے ساتھ تبادلۂ خیال کیجیے کہ ہرادارےکس طرح سے دوسرےادارے کا توازن برقرار رکھتا ہے۔ مثال کے طور پر—مقننہ کس طرح عاملہ کی کارروائی پر سوال اٹھاتی ہے۔ عدلیہ کس طرح یہ یقینی بناتی ہے کہ بنائے گئے قانون اور حکومتی اقدامات آئین کے مطابق ہوں۔ آپ سمجھتے ہیں کہ کچھ ایسے طریقے بھی ہونے چاہییں جس سے خود عدلیہ کی کارروائیوں کا بھی جائزہ لیا جاسکے؟

• کیا آپ ایسی مثالیں تلاش کر سکتے ہیں جہاں عدلیہ نے قانون سازوں سے کسی قانون پرنظر ثانی کےلیےکہا ہو؟ کیا آپ ایسی مثالیں بھی تلاش کر سکتے ہیں جہاں کسی قانون کے نفاذ پر عدلیہ نے سوال اٹھائے ہوں؟

ہم اگلے باب میں عدلیہ کے متعلق مزید جانیں گے۔

ریاستی سطح پر مقننہ اورعاملہ کے کام

جیسا کہ بیان کیا گیا ہے،مرکزی حکومت کے پاس ایک پارلیمنٹ ہے جس کےفرائض منصبی میں قانون سازی اور انتظامی ذمہ داریاں ہیں۔ اسی طرح ہر ریاست کی اپنی مقننہ اور عاملہ ہوتی ہے جسے ریاستی اسمبلی کہتے ہیں۔ جس طرح پارلیمنٹ کے ارکان(ایم پی) ہوتے ہیں جو قانون سازی کا عمل انجام دیتے ہیں، اسی طرح قانون سازاسمبلی (Legislative Assembly)کے ارکان(ایم ایل اے) ہوتے ہیں جو ریاستی فہرست اور متوازی فہرست پر قانون بناتے ہیں۔

ریاستی مقننہ کی ساخت

مرکز کے برخلاف ریاستی مقننہ ’ایک ایوانی‘ (صرف ایک ایوان والا) یا دو ایوانی (دو ایوانوں والا) ہو سکتی ہے۔ مجلس قانون ساز (Legislative Assembly)کو ودھان سبھا اور ایوانِ بالا
(Legislative Council)کوودھان پریشد کہتے ہیں۔ دو ایوانی نظام والی ریاستیں یہ ہیں۔ آندھرا پردیش، بہار، کرناٹک، مہاراشٹر، تلنگانہ اور اتر پردیش۔ بقیہ ریاستوں میں ایک ایوانی نظام ہے۔

شکل 6.12: ودھان سودھ، کرناٹک اسمبلی کی عمارت۔ یہ عمارت کینگل ہنومنتیا کے خوابوں کی تعبیر تھی جو ایک مجاہدِ آزادی، مجلسِ آئین کے رکن اور کرناٹک کے وزیرِ اعلیٰ تھے بعد میں رکن پارلیمنٹ بنے۔

آیئے معلوم کریں

آپ کی ریاست میں کس طرح کی مقننہ ہے؟

مقننہ کے موثرطریقۂ کار کے لیے چیلنج

جیسا کہ ہم نے پڑھا، ہندوستانی مقننہ (جس میں مرکز میں پارلیمنٹ اور ریاستوں میں اسمبلی شامل ہیں) کا رول بہت اہم ہے۔ یہ قانون بنانے، انتظامی امور کی نگرانی کرنے اور بجٹ کو منظور کرنے کا کام کرتی ہے۔ یہ قومی پالیسیوں، ترقی کے منصوبوں بین الا قوامی تعلقات اور عوامی مسائل کے حل کے لیے اسٹیج بھی فراہم کرتی ہے۔ تاہم اِن ذمہ داریوں کو مؤثر تکمیل میں مقننہ کو بعض چیلنج سے ہم کنار ہونا پڑتا ہے۔

اِن میں سے بعض چیلنج یہ ہو سکتے ہیں: اراکین کی مسلسل غیر حاضری، ان کا عدم تعاون کا رویہ، اہم مباحثوں کے معیار میں کمی اور سوالات کے وقفے میں رکاوٹ وغیرہ۔

پارلیمنٹ کی میٹنگ عموماً سال میں تین بار ہو تی ہے۔ اِن میٹنگوں کو اجلاس کہا جاتا ہے۔ بجٹ اجلاس،
مان سون اجلاس اور سرمائی اجلاس۔ ہر اجلاس میں کئی نشستیں ہوتی ہیں جہاں پارلیمنٹ مجوزہ بلوں پر تبالۂ خیال کرتی ہے۔ عاملہ کے اہم موضوعات پر بحث کرتی ہے اور عاملہ سے اس کے فیصلوں اور کار کردگی پر وضاحت مانگتی ہے۔ عموماً پارلیمنٹ کا اجلاس چھ گھنٹے کا ہوتاہے۔ حسبِ ضرورت، مخصوص موقعوں پر یا اہم اور ضروری کاموں کو پورا کرنے کے لیے یہ وقت بڑھایا جا سکتا ہے۔ ریاستی اسمبلیوں کا طریقہ کار بھی اِسی طرح کا ہوتا ہے۔

آیئے معلوم کریں

کارکردگی

:(Productivity)

پارلیمانی سیاق و سباق میں کارکردگی کو ان گھنٹوں کی تعداد سے ناپا جاتا ہے جس میں لوک سبھا یا راجیہ سبھا میں کام ہو ان کے مقرر کردہ گھنٹوں کے مقابلے میں۔

پارلیمنٹ اور ریاستی اسمبلیوں کا تصور ایسے مقام کے طورپر کیا گیا ہے جہاں فکر انگیز مباحثے اور گفتگو ہو اور عوام کے مفاد میں قانون بنائے جائیں۔ البتہ جب ان مباحثوں میں خلل واقع ہوتاہے تو اجلاس کی مدت کم کر دی جاتی ہے۔کئی بلوں پر مباحثہ کرنے اور پاس ہونے میں سالوں لگ جاتے ہیں تو یہ ایک تشویش کا معاملہ بن جاتا ہے۔

آیئے معلوم کریں

 ایک چھوٹا گروپ پروجیکٹ لیجیے۔اپنی ریاست یا مرکز کے زیرِانتظام علاقوں میں مقننہ کے طریقۂ کار سے متعلق ڈاٹا مرتب کیجیے۔

 کسی ایم ایل اے سے ملاقات کیجیے اور ریاستی اسمبلی سے متعلق چیلنج کے بارے میں معلومات حاصل کیجیے۔

سماج کے کچھ طبقوں نے اس حقیقت پر تشویش ظاہر کی ہے کہ لوک سبھا کے نمائندوں کی ایک بڑی تعداد پر فوجداری کے مقدمات درج ہوتے ہیں۔اس کے علاوہ بہت سے اجلاس غصہ اورتعصب پر مبنی مباحثوں کی نذرہوجاتے ہیں اور اس وجہ سے عوامی مسائل پر سنجیدہ گفتگو نہیں ہوتی ہے۔

میڈیا بھی رائے دہندگان (Electorate)کے تحفظات کی ترسیل میں اہم کردار ادا کرتا ہے ۔یہ کارٹون مزاح کے ساتھ ان کا اظہار کرتے ہیں۔ یہ عمل صحت مند جمہوریت میں عام ہے۔

شکل 6.13: (A) مان سون اجلاس۔ گرج، بجلی، آندھی، طوفان وغیرہ کی امید کیجیے۔ یہ مان سون اجلاس ہے۔

شکل 6.13: (B) امیدواروں کے پرچوں کی جانچ

پھر بھی جب عوام جتنی بیدار اور فعال ہوتی ہے ہمارا جمہوری نظام اتنا ہی مضبوط ہوتا ہے۔ عوام سوال پوچھ کر اپنے خیالات کے اشتراک اور عوامی مباحثوں میں حصّہ لے کر بہتر پالیسیاں بنانے میں مدد کرتی ہے۔ لہٰذا ، ہندوستان کو اپنی مقننہ کے حوالے سے درپیش چیلنجوں پر قابو پانے کا ایک بہترین طریقہ ہے کہ اس بات کو یقینی بنایا جائے کہ زیادہ سے زیادہ شہری معاشرے کے لیے اہمیت کے حامل معاملات سے باخبر رہیں، ڈیجیٹل اسپیس پر عوامی مباحثوں میں حصہ لیں ،جومختلف سرکاری محکمے پالیسی سازی کے عمل کے دوران پیش کیے جاتے ہیں۔ مزید پالیسیوں پرسیاسی نمائندوں کے ساتھ تعمیری طور پر مشغول ہوں۔

اب بہت سےنوجوان لیڈر اور الگ الگ فکر کے لوگ بھی سیاست میں آ رہے ہیں۔ ٹیکنالوجی کی مدد سے اب مربوط رہنا اور حکمرانی میں شرکت کرنا پہلے کی نسبت آسان ہو گیا ہے۔ مستقبل کے رائے دہندگان کے طور پر آپ کی پسند اور آپ کی حصہ داری پارلیمنٹ اور آپ کی ریاستی اسمبلی کو مستحکم بنانے میں اہم رول ادا کرے گی اور ان کے ذریعہ عوام کی حقیقی خدمت کو یقینی بنایا جاسکے گا۔

اِسے دیکھنا نہ بھولیں

• ہندوستان کے سابق وزیرِ اعظم اٹل بہاری واجپئی نے لوک سبھا میں اپنی ایک تقریر میں کہا تھا۔

”سرکاریں آئیں گی، جائیں گی۔ پارٹیاں بنیں گی، بگڑیں گی لیکن یہ دیش(دیس) رہنا چاہیے ۔ اس دیش (دیس)کا لوک تنتر امر(زندہ) رہنا چاہیے۔“

• آپ کے خیال میں یہ بیان جمہوریت میں پارلیمنٹ اور لیڈروں کے رول کے بارے میں کیا پیغام دیتا ہے؟ جب سیاسی اقتدار میں تبدیلی ہوتی ہے تب بھی جمہوری اقدار کی حفاظت کیوں ضروری ہے؟

شکل6.14: اٹل بہاری واجپئی

اس سے پہلے کہ ہم آگےبڑھیں...

• ہندوستان کا پارلیمانی نظام یہ یقینی بناتا ہے کہ اقتدار میں اشتراک ہو، فیصلوں پر بحث ومباحثہ ہو اور رہنماؤں کو جواب دہ بنایا جائے۔
• مقننہ قانون بناتی ہے، عاملہ ان کا نفاذ کرتی ہے اور عدلیہ یہ یقینی بناتی ہے کہ سبھی آئین کی پیروی کریں ۔
• پارلیمنٹ عوام کی نمائندگی کرتی ہے اور ہماری جمہوریت کی وفاقی روح کی عکاسی کرتی ہے۔
• مرکز اور ریاستی دونوں سطح پر ا یسی ساخت بنائی گئی ہیں جو نمائندگی، جواب دہی اور یک جہتی میں توازن قائم کرتی ہیں۔
• اداروں کے درمیان ضبط وتوازن شہریوں کے حقوق کےتحفظ اور جمہوری اقدار کو برقرار رکھنےمیں مدد کرتے ہیں۔
• پارلیمنٹ کے کام کاج کو زیادہ مؤثر اور بارآور بنانے کی ضرورت ہے۔ تاکہ ملک کی ترقی میں خلل نہ پڑے۔