’’ امّاں! کھانے کو کچھ ہوگا ؟‘‘ 

یوں تو بڑھیا کے پاس بہت کچھ تھا مگر وہ تھی بہت کنجوس بلکہ مکّھی چوس۔ منہ بنا کر کہنے لگی ’’ اے بیٹے، میرے پاس کھانے کو کہاں…  میں تو خود کل سے بھوکی ہوں ۔‘‘ 

’’ اچھاامّاں کوئی بات نہیں ۔ میں کچھ دیر آرام ہی کرلوں گا ۔ ‘‘ سپاہی نے جواب دیا ۔ کہنے کواس نے ’ کوئی بات نہیں ‘ کہہ دیا تھا مگر وہ تاڑ چکا تھا کہ بڑھیا کے پاس کھانے کو بہت کچھ ہے ۔ وہ سوچنے لگا کہ اس کنجوس بڑھیا سے کھانا کیسے حاصل کیا جا ئے۔ مارے بھوک کے اس کے پیٹ میں چوہے دوڑرہے تھے ۔ آخر اس کی سمجھ میں ایک ترکیب آئی ۔ اسے کونے میں ایک بے دستے کی کلہاڑی دکھائی دی ۔ چالاک سپاہی بڑھیا سے کہنے لگا ’’آپ نے کبھی کھائی ہے کلہاڑی کی کھچڑی ؟ ‘ ‘

بڑھیا اسے گھور کر دیکھنے لگی ۔ پھر حیرت سے بولی ’’ کلہاڑ ی کی کھچڑی ؟‘‘ 

’’ ہاں ہاں کلہاڑی کی کھچڑی !‘‘ سپاہی بولا ’’ آپ نے کبھی نہیں کھائی ؟ بہت مزیدار ہوتی ہے ۔ لائیے ذرا پتیلی لے آئیے ۔ ابھی پکاتے ہیں ۔‘ ‘

بڑھیا جھٹ سے اُٹھی اور اس نے سپاہی کو ایک بڑی سی پتیلی لا کر د ی ۔ سپاہی نے کلہاڑی کو خوب دھو دھا کر پتیلی میں رکھا اور اُسے آگ پر چڑھا دیا جو بڑھیا نے سردی سے بچنے کے لیے جلارکھی تھی ۔ پھر اس میں کچھ پانی ڈالا۔ بڑھیا مارے حیرت کے آنکھیں پھاڑ پھاڑ کر یہ سب دیکھ رہی تھی ۔ اب سپاہی نے پتیلی میں چمچہ چلانا شروع کیا۔ کچھ دیر بعد اس نے پانی کو چکھ کر دیکھا اور بولا، ’’ تھوڑی دیر میں تیار ہوجائے گی ۔بس نمک کی کمی رہ گئی ۔ ‘‘ 

بڑھیا فوراً اٹھی اور اس نے سپاہی کو نمک لاکر دیا جو اس نے پانی میں ڈال دیا اور دوبارہ چمچہ چلانے لگا ۔ کچھ دیربعد اس نے پھر پانی کو چکھا اور بولا ، ’’ بس بس تیار ہونے والی ہے مگر دو مٹھی چاول ہوتے تو اورمزا آجاتا ۔‘‘ 

بڑھیا مارے شوق کے پٹارے میں سے چاول کی تھیلی نکال لائی اور بولی ’’ یہ لو چاول۔ ذرا جلدی سے پکاؤ ۔‘‘ 

’’ ہاں ہاں کیوں نہیں ‘‘ سپاہی نے جواب دیا اور دوبارہ چمچہ چلانے لگا ۔