شارک میں سونگھنے کی قوت بہت زیادہ ہوتی ہے۔ وہ پانی کی لہروں سے سمجھ جاتی ہیں کہ ان کے آس پاس کیا ہے۔ اگر کسی سمندر ی جانور کے جسم سے خون بہہ رہا ہو اور وہ صحیح ڈھنگ سے تیر نہ رہا ہو تو یقیناً شارک اس پر حملہ  کر دے گی چاہے وہ وھیل جیسی بڑی مچھلی ہی کیوں نہ ہو۔ اسی طرح شارک زخمی انسانوں پر بھی حملہ کردیتی ہے۔

شارک سے محفوظ رہنے کے لیے کئی تدبیریں نکالی گئی ہیں۔ ان میں سے ایک ہے شارک کو بھگانے والا کمپاؤنڈجس کی بو‘ اُسے بہت بُری لگتی ہے۔ آسٹر یلیا اور جنوبی افریقہ میں جہاں سمندر کے ساحل پر لوگ جا کر نہاتے ہیں وہاں سمندر میں لوہے کے جال لگا دیے گئے ہیں تا کہ شارک مچھلی انھیں پار کرکے اندر نہ گھسنے پائے۔

یاد رکھنا چاہیے کہ شارک انسانی خوراک کا ایک اہم حصہ ہے۔ اس میں حیاتین، پروٹین، تیل اور دیگر کارآمدچیزوں کی کوئی کمی نہیں ۔ پہلے زمانے میں شارک کا شکار محض تفریح کے طور پر کیا جاتا تھا۔آج کل اس مچھلی کا شکار بڑے منظّم طریقے سے کیا جاتا ہے اور دنیا بھر میں تقریباً چار لاکھ ٹن سے زیادہ شارک مچھلی ہر سال پکڑی جاتی ہے۔ ہندوستان میں تازہ ترین اندازے کے مطابق ہر سال   ٨٥ ہزارٹن شارک مچھلی کا شکار کیا جاتا ہے۔ ہندوستان میں سمندرکے ساحل پر واقع صوبوں میں سے تمل ناڈو، گجرات اور مہاراشٹر ایسے صوبے ہیں جہاں سب سے زیادہ شارک مچھلی پکڑی جاتی ہے۔منگلور، سورتکل، کوپ اور گنگولی بھی ایسے مرکز ہیں جہاں شارک اچھی خاصی تعداد میں پکڑی جاتی ہیں۔

دنیا کے بہت سے ملکوں میں شارک کی بطورغذا بہت مانگ ہے۔ اس مچھلی کا ہر حصّہ استعمال میں آتا ہے۔ شارک کے چمڑے سے نہایت عمدہ قسم کے جوتے، ہینڈ بیگ، بٹوے، گھڑیوں کے فیتے اور پٹّیاں بنتی ہیں۔ ان کے علاوہ ریتی اور لکڑی کا پالش بھی تیار ہوتا ہے۔ اس کے دانت اور ریڑھ کی ہڈی کے حصّے آرائشی اشیا کے طور پر استعمال میں آتے ہیں۔ شارک کے جگر میں تیل بہت ہوتا ہے جو وٹامن- اے کا بڑا ذخیرہ ہے۔       (ماخوذ)

(جاوید اختر)

مشق

1 معنی یاد کیجیے: