مری پیاری چڑیو ! ابھی اور گاؤ
مہکتے ہوئے پھول کے پاس آؤ
لچکتی ہوئی شاخ پر بیٹھ جاؤ
ہوا میں کبھی اُڑ کے بازو ہلاؤ
کبھی صاف چشموں میں غوطہ لگاؤ
یوں ہی پیاری چڑیو ابھی اور گاؤ
پھُدک کر اِدھر سے اُدھر دور جاؤ
چہک کر اِدھر سے اُدھر پر ہلاؤ
چمک کر کبھی شاخ پر چہچہاؤ
اُچھل کر کبھی نہر پر گنگناؤ
یوں ہی پیاری چڑیو ابھی اور گاؤ
کبھی برگِ تازہ کو منہ میں دباؤ
کبھی کُنج میں بیٹھ کر پھڑپھڑاؤ
کبھی گھاس پر لوٹ کر دل لبھاؤ
کبھی جاکے بیلوں کو جھولا جھلاؤ
یوں ہی پیاری چڑیو ابھی اور گاؤ
( جوشؔ ملیح آبادی )
مشق
1. معنی یاد کیجیے:
شاخ : ٹہنی، ڈالی
چشمہ : پانی کا سوتا
بازو : پنکھ
غوطہ : ڈُبکی
برگ : پتّا
کُنج : کونا، گوشہ
2. سوچیے اور بتائیے:
(i) شاعر چڑیوں کو کیوں بلارہاہے؟
(ii) دوسرے بند میں شاعر چڑیوں سے کیاکہہ رہا ہے؟
(iii) بیلوں کو جھولا جُھلانے سے کیامراد ہے؟
(iv) شاعرنے ہربند کے آخر میں چڑیوں کو کس کام کے لیے باربار کہاہے؟
3. شعر مکمل کیجیے:
(i) ہوامیں کبھی اُڑ کے بازو ہلاؤ __________
(ii) چمک کر کبھی شاخ پر چہچہاؤ __________
(iii) کبھی برگِ تازہ کو منہ میں دباؤ __________
4. نیچے دیے ہوئے لفظوں میں مذکر اور مؤنث کی نشاندہی کیجیے:
چشمہ نہر گھاس پھول شاخ ہوا
5. نیچے لکھے ہوئے لفظوں کو جملوں میں استعمال کیجیے:
غوطہ لگانا پھڑ پھڑانا چہچہانا اُچھلنا دل لبھانا
6. عملی کام:
نظم کو زبانی یاد کیجیے اوربلند آواز سے پڑھیے۔