نالندہ 

آج سے تقریباً ڈیڑھ ہزار سال پہلے ہندوستان میں اعلیٰ تعلیم کے تین خاص مرکز تھے– تکشلا، نالندہ اور وکرم شِلا۔ انھیں ’مہا وِہار‘ کہا جاتا تھا۔آج کی بڑی یونیورسٹیوں کی طرح ان اداروں میں بھی دوسرے ملکوں سے طالب علم   آیا کرتے تھے۔ یہاں بدھ مذہب اور فلسفے کی تعلیم کے لیے بڑے کام کیے گئے۔

ان تینوں مہا وِہاروں میں نالندہ سب سے زیادہ عرصے تک یعنی تقریباً آٹھ سو برس تک قائم رہا۔ اس میں تعلیم حاصل کرنے والوں میں چین کے مشہور سیاح ہیونگ سانگ کی شخصیت نمایاں ہے۔ اس کی طالب علمی کا دور  629 سے 645 عیسوی تک کا مانا جاتا ہے۔

نالندہ یونیورسٹی 450کے آس پاس قائم کی گئی۔اس زمانے میں مگدھ ریاست پرگپت خاندان کی حکومت تھی۔اس خاندان کے کئی راجاؤں نے نالندہ کی ترقی کے لیے خزانوں کے منھ کھول دیے تھے۔ وکرمادتیہ دوئم نے کئی وِہاروں کے علاوہ لائبریری بھی تعمیر کرائی تھی۔

نویں صدی تک اس ادارے نے بہت شہرت حاصل کرلی تھی۔یہاں دور دراز کے کئی ملکوں سے طلباآیا کرتے تھے۔ پال راجاؤں نے نالندہ یونیورسٹی کی ترقی میں خاصی دلچسپی لی۔مشہورچینی سیاح اِتسنگ نے بھی دس برس تک یہاں تعلیم حاصل کی تھی۔ اس وقت یہاں تقریباً 8,500طلبااور 1,510اساتذہ موجودتھے۔یہاں تعلیم کے اٹھارہ شعبے تھے۔ان میں بدھ فلسفہ،سنسکرت اورپالی زبان وادب،قواعد،طب،مصوری اورفنون لطیفہ وغیرہ کی تعلیم دی جاتی تھی۔نالندہ یونیورسٹی میں طلبا کی تعلیم اوران کے رہنے اورکھانے کامفت انتظام تھا۔

نالندہ یونیورسٹی میں داخلے کاقاعدہ یہ تھاکہ صدردروازے پر’’دوارپنڈت‘‘موجودہوتے تھے جوامیدوارکی تعلیمی لیاقت کاامتحان لیتے تھے۔اس کے بعدہی داخلے کی اجازت ملتی تھی۔