اس وادی کا اکلوتا مکان ایک چھوٹی سی چٹان کے اوپر بنا ہوا تھا۔ وہاں کھڑے ہوکر بہتے ہوئے دریا، مٹر او رچنے کے کھیتوں کو بہ خوبی دیکھا جا سکتا تھا۔ یہ کھیت بڑی عمدہ فصل دیتے تھے ۔ اور انھیں جس چیز کی بے حد ضرورت تھی وہ بارش تھی۔

لین شو اپنی زمین او رکھیتوں کے چپّے چپّے سے واقف تھا۔ وہ آج صبح سے بار بارآسمان دیکھے جا رہا تھا ۔ اس نے تشویش ناک لہجے میں کہا:

’’بی بی! میرا قیاس ہے کہ آج بارش ہوگی‘‘

بی بی! نے جو اس وقت کھانا تیار کررہی تھی ،یہ سن کر جواب دیا:

’’ہاں، آج کسی بھی وقت بارش ہوسکتی ہے اگر رَب چاہے تو ………‘‘

اُس وقت بڑی عمر کے لڑکے کھیتوں میں کام کررہے تھے اور چھوٹے بچّے مکان کے نزدیک کھیل رہے تھے ۔تھوڑی دیر بعد بی بی نے انھیں آوازدی:

’’آجاؤ، سب آجاؤ، کھانا تیار ہے۔‘‘

جب سب مل کر کھانا کھارہے تھے توجیسا کہ لین شو نے قیاس آرائی کی تھی، بارش ہونے لگی۔ بارش کے شفاف قطرے زمین پر برس رہے تھے اور آسمان پر شمال کی جانب سے بادلوں کے پہاڑ چلے آرہے تھے۔ ہوا بھی تیز تھی۔لین شو باہر کھیتوں میں نکل گیا۔ اس کا مقصد اس کے سوا کچھ اور نہ تھا کہ بارش سے پیدا ہونے والی ترنگ کو اپنے تن من میں رواں دواں دیکھے۔ جب وہ گھر میں واپس آیا تو جذباتی اور جوشیلی آواز میں بولا:

’’جو کچھ اس وقت آسمان سے برس رہا ہے وہ بارش کے قطرے نہیں بلکہ سکّے ہیں، بڑے اور چھوٹے ‘‘

پھر اس نے بڑے اطمینان سے یہ بھی کہاکہ غلّے کے کھیت اور مٹر کے نئے نئے کھلے ہوئے پھول بارش کی چادریں اوڑھ کر بہت خوش ہیں۔ ابھی اس نے یہ کہا ہی تھا کہ یک بارگی تندو تیز آندھی اُٹھی پھر بارش کے ساتھ ژالہ باری ہونے لگی۔ اولے واقعی چاندی کے گول گول ڈلوں سے مشابہ تھے۔ بچّوں نے یہ دیکھا تو لپک کر اندرسے باہر آگئے اور  انھیں چُننے میں جُٹ گئے ۔ بچّے خوش تھے لیکن ان کا باپ فکرمند ہوکر خود سے کہنے لگا ’’ اب تو معاملہ بگڑنے لگا ہے ، لیکن پھر بھی مجھے امیدہے کہ سب کچھ بہت جلد ٹھیک ہوجائے گا۔‘‘

لیکن سب کچھ ٹھیک نہیں ہوا اور بہت دیر تک اولے گرتے رہے ۔ زمین ایسے سفید ہوگئی ، جیسے اس پر نمک کی چادر بچھادی گئی ہو ۔ درختوں پرایک پتّہ بھی نہ رہا۔ غلّے کے کھیتوں کا ستّیاناس ہوگیا، مٹر کی بیلیں اور پودوں کے تازہ پھول ٹوٹ کر بکھر گئے۔  لین شو پریشان ہوگیا۔ اس نے اپنے بیٹوں سے کہا:

’’ اگران کھیتوں پر ٹڈّی دل نے حملہ کیا ہوتا تو بھی ہمارے پاس اس سے زیادہ بچ رہا ہوتا لیکن اس ژالہ باری نے تو ہمیں مفلس اور قلاش بنا دیا ہے۔ اب ہمارے پاس نہ غلّہ ہے اور نہ سبزی ہے۔ اس سال تو ہمیں فاقے پہ فاقے کرنا ہوں گے۔

وہ تمام لوگ جو وادی کے اس  اکلوتے مکان میں رہتے تھے اپنے دِلوں میں ایک ناقابلِ شکست امیدلیے بیٹھے تھے اور ایک اَن دیکھی قوّت پر تکیہ کیے ہوئے تھے۔وہ اپنے آپ سے کہہ رہا تھا:

’’ دل چھوٹا مت کرو، ہمّت مت ہارو۔‘‘

’’اس میں کوئی شک نہیں کہ سب کچھ تباہ ہوگیاہے ۔ لیکن یاد رکھو کہ بھوک سے کوئی نہیں مرتا۔‘‘

لین شو کے تمام خیالات اپنی آخری امید یعنی آسمانی امداد کے گردگھومتے رہے۔ اس کو بچپن ہی سے یہ تعلیم دی گئی تھی کہ سب کا پالن ہار بڑا رحیم اور کریم ہے۔ انسان کے دل کی گہرائیوں کی بات جانتا ہے۔

لین شو اپنے کھیتوں میں بیل کی طرح کام کرتا تھا۔ وہ کچھ لکھنا پڑھنا بھی جانتا تھا۔آئندہ اتوار تک اس نے اپنے آپ کو اس بات کا یہ پختہ یقین دلادیا کہ ایک ان دیکھی محافظ ہستی موجود ہے۔ اس یقین کے بعد اس نے خدا کے نام ایک خط لکھنا شروع کیا ۔