کیلاش کی لاری پتھورا گڑھ کے خشک بنجر اور تپتے ہوئے پہاڑوں کے ایک درے سے پار کرکے موتی نگر کی وادی میں داخل ہوئی اور داخل ہوتے ہی منظر اور موسم اور مسافروں کامزاج سب کچھ بدل گیا ۔سامنے ایک طرف نندا دیوی اور ترشول کی برف پوش چوٹیاں چمک رہی تھیں اور دوسری طرف ڈھلواں پہاڑوں پر سیب ، ناشپاتی اور آلوچوں کے باغوں کی ہر یالی تھی جو پہاڑوں کے سلسلوں سے زینہ بزینہ اُترتی ہوئی نیچے جاکر گھنے درختوں اور نامعلوم تاریکیوں میں گم ہوجاتی تھی۔

جب لاری اسٹینڈ پر پہنچی کیلاش اپنی بہنوں سمیت اترا تو اسے ایسا محسوس ہورہا تھاجیسے آج کوئی بہت بڑا تہوار ہے جسے پہاڑ اور ان کی چوٹیاں ،درخت اور چڑیاں آسمان اور سورج یہ سب کے سب انسانوں کے ساتھ مل جل کر منا رہے ہیں۔اس خوش گوار منظر میں کیلاش ایسا کھویا کہ اسے اپنی سخت بیماری کی وجہ سے زندگی کی طرف سے جو مایوسی تھی وہ بالکل دور ہوگئی اور ایسا محسوس ہونے لگا جیسے آسمان کو چومنے والے پہاڑ اشاروں میں کہہ رہے ہیں کہ ہماری شاندار، صاف و شفاف اور دل کش دنیا میں بیماری اور مصیبتوں کا کیا کام۔لاری اسٹینڈ سے ایک سڑک پر بل کھاتی ہوئی جھومتی جھامتی آبادی کی طرف جاتی تھی۔اس نے کیلاش کو ایسا لبھایا کہ وہ نوکر سے جو اسباب کو اٹھوانے میں لگا ہوا تھا یہ کہہ کر کہ میں ڈاک بنگلے کی طرف چلتا ہوں، روانہ ہوگیا ۔راستہ بہت دل کش تھا اور ہر موڑ قدرت کی نت نئی فیا ضیوں سے مالامال تھا۔

کچھ دور نکل کر کیلاش ایک پتھر پر بیٹھ گیا۔ایک پیالی چائے پی،کچھ دیر سامنے کے منظر سے لطف اٹھایا اور پھر آگے کی طرف چل کھڑا ہوا ۔راستے میں ایک باغ میں ایک آدمی تازے سیبوں کو چیڑ کے بکس میں بند کر رہا تھا ۔اس کے پاس دو مسافر کھڑے تھے جن میں ایک دس گیارہ برس کی خوب صورت سی لڑکی تھی۔ وہ دونوں پھل والے سے ہنس ہنس کر باتیں کر رہے تھے۔

کیلاش ادھر دیکھ رہا تھا کہ اتنے میں پاس سے ایک آواز آئی ۔’’بابوجی۔تھر ماس میں لے چلوں ؟‘‘ کیلاش نے مڑ کر دیکھا ۔بارہ تیرہ برس کی دبلی پتلی لڑکی کھڑی تھی اور بڑی بڑی ، مظلوم اور مایوس آنکھوں سے دیکھ رہی تھی ۔

تھرماس واقعی کیلاش کو بھاری معلوم ہورہا تھا۔اس نے وہ لڑکی کے حوالے کردیا اور پھر اس فیاضی سے جو قدرت نے اس وادی کے ساتھ دکھلائی تھی پوچھنے لگا۔

’’کہاں رہتی ہو ؟‘‘

لڑکی نے نیچے کی گھنی تاریکیوں کی طرف اشارہ کر کے کہا :

’’وہاں بہت نیچے ۔‘‘

’’ماں باپ کیا کرتے ہیں؟‘‘

’’مرگئے ۔‘‘

’’تم کیا کرتی ہو؟‘‘

’’کچھ نہیں۔‘‘

’’کیوں؟‘‘

’’بچہ کچھ نہیں کرنے دیتا ۔‘‘

’’بچہ ؟ کیا تمھارا بچہ بھی ہے ؟‘‘

لڑکی اس بد گمانی پر ہنس پڑی اور کہنے لگی ۔

’’میر ا دو برس کا بھائی ہے جو بہت دِق کرتا ہے ۔ہر وقت کھانا مانگتا ہے — رات کو نہ وہ سونے دیتا ہے اور نہ ڈر  — ‘‘

ڈر !! اس وادی میں کس چیز سے؟‘‘

’’میری کٹھریا کا دروازہ ٹوٹا ہوا ہے ۔رات بھر میں ڈرتی رہتی ہوں کہ کوئی آکر ہم کو کھا نہ جائے ۔‘‘ 

کیلاش کے دل میں دَیا اُبل پڑی۔

’’نوکری کرے گی؟‘‘

’’کوئی رکھے تو کیوں نہ کروں۔میں تو بہت محنت سے اس کی سیوا کروں گی۔‘‘

’’اچھا میں رکھوں گا تجھے بھی اور تیرے چھوٹے بھائی کو بھی۔‘‘

لڑکی حیرت زدہ ہوکر کیلاش کو دیکھنے لگی ۔

’’بابو جی — سچ!‘‘

’’ہاں سچ — بالکل سچ۔‘‘

لڑکی تھوڑی دیر تک حیرت زدہ رہی ۔پھر اس کی آنکھوں میں آنسو آگئے۔اور وہ کیلاش کے پاؤں پر گر پڑی۔اور شکر گزاری سے بابوجی بابوجی کرنے لگی۔اس کے منھ سے اور کچھ نہ نکلا۔

رجنی خوشی کے مارے رات کو سو نہ سکی۔ذرا ذرا دیر کے بعد اس کی آنکھ کھل جاتی تھی اور ہر بار وہ کروٹ لے کر ٹوٹے کواڑوں کی درزوں سے جھانکتی تھی کہ پہاڑوں کے اوپر آسمان پر صبح کی سفیدی تو نہیں نظرآرہی ۔آج اس کا روزانہ والا خوف کہ کہیں رات کو کوئی بھیانک شکل والی چیز اس کی کوٹھڑی کے ٹوٹے پھوٹے دروازے سے گھس کر اس کو اس کے سب بھائی بہنوں کو سوتے میں کھا نہ جائے دور پہاڑوں میں چھپ گیا تھا۔اس کے سامنے سکھ سے بھری ہوئی صبح تھی اور پھر عیش وآرام سے بھرے ہوئے دن اور رات۔

رجنی نے اپنے پانچوں بھائی بہنوں پر نظرڈالی۔جو کمبلوں کے گودڑ کے نیچے ایک دوسرے سے چمٹے ہوئے بے خبرسورہے تھے۔ رجنی سوچ رہی تھی کہ ذرا دیر میں صبح ہوجائے گی۔اور پھر اپنے بھائی بہنوں کو لے کر پانچ سو فٹ کی چڑھائی چڑھ کر بابوجی کے پاس پہنچ جاؤں گی۔پھر کیا ؟روٹیاں ملیں گی، پہننے کو بھی ملے گا اور رات کو اوڑھنے کو بھی اور ڈر سے بہت دور کسی کوٹھری میں سونے کو جگہ ملے گی۔

آخر صبح قریب آہی گئی اور اس کے دوسال کے دبلے پتلے سوکھے ساکھے بھائی للّونے چیخ مارکر رونا شروع کردیا۔آج رجنی نے سستی نہیں دکھلائی اور جلدی سے اسے پیشاب کرالیا۔ ورنہ ہوتا تو یہ تھا کہ وہ یوں ہی دن چڑھے تک پڑا رہتا تھا اور پھرجب اس کا بستررجنی کو بھیگا ہوا ملتا تھا تو وہ للّوکو دھنک کر رکھ دیتی تھی۔آج رجنی نے صرف اتنا ہی نہیں کیا کہ اسے پیشاب کرالیا بلکہ اسے پیار بھی کیا اور بہلایا بھی۔یہ چیز للّوکے لیے کچھ اتنی عجیب سی خوشی لے کر آئی کہ وہ رات بھر کی بھوک کو بھول گیا۔اور اپنی ٹوٹی پھوٹی بولی میں باتیں کرنے لگا۔

جس وقت موتی نگرکی پچھم کی چوٹیوں پر دھوپ کی پہلی چمک نظرآئی ہے، اس وقت تک چھ بچوں کا یہ قافلہ سوفٹ پہاڑ پر چڑھ چکا تھا۔اور بہت تھک چکا تھا۔ہوا ٹھنڈی تھی۔تیز تھی اور مخالف تھی اس وجہ سے بچوں کو خالی پیٹ اوپر چڑھنے میں بہت دشواری ہورہی تھی۔للّوکئی مرتبہ روچکا تھا اور رجنی کے ہاتھ سے اس پر پٹ بھی چکا تھا۔رجنی نے ذرا دیر اسے گود میں بھی لیا تھا لیکن بارہ برس کی لڑکی جسے پیٹ بھر کھانا نہ ملتا ہو کیسے دوسال کے بچے کو لے کر دور تک جاسکتی تھی اس لیے للّو چل سکے یا نہ چل سکے اسے چلنا تو پڑے گا ورنہ رجنی مار مارکر راستے ہی میں ختم کردے گی۔اس وقت تو وہ کچلی ہوئی ناگن کی طرح بپھری ہوئی تھی۔اسے سخت کوفت تھی کہ یہ دوسال کا ہڈیوں کا ڈھانچہ، میں جہاں جاؤں یا جو کام کروں میری راہ میں حائل رہتا ہے۔اب دیکھو اس وقت عیش وآرام کی دنیا صرف چار سوفٹ اوپر ہے۔اگر یہ نہ ہوتا تو میں کب کی وہاں پہنچ چکی ہوتی۔

رجنی کاغصہ دیکھ کر کلّوجو للّو سے دوسال بڑا تھا اور منّی جو چار سال بڑی تھی سہمے ہوئے تھے اور ہانپ ہانپ کر ایک ایک قدم آگے بڑھ رہے تھے۔البتہ تلسی اور رامو رجنی کی طرح تازہ دم تھے بلکہ ان دونوں نے بھی للّو کو باری باری گود میں ذرا ذرا دیر کے لیے اٹھا لیا تھا۔

اس طرح چھوٹے چھوٹے انسانوں کا یہ چھوٹا قافلہ ڈانٹ اور مار، خوف اور آنسو، تھکاوٹ اور ہانپنے، امیدوں اور تمناؤں کے ساتھ پچاس فٹ اوپر چڑھ گیا۔اس جگہ رامو کو ایک چشمے کے پاس پڑا ہوا ایک داغی سیب مل گیا۔لیکن وہ ابھی منھ تک نہیں لے جانے پایا تھا کہ رجنی نے جھپٹ کر اسے چھین لیا اور دانت سے اس کا ایک بڑا سا ٹکڑا کاٹ کر للّو کو دیا۔اور پھر باقی کے دوٹکڑے کرکے کلو اور منی کو۔

کلو اور منی سیب کا ٹکڑا کھاکر، چشمے کا پانی پی کر تازہ دم ہوگئے اور باتیں کرنے لگے۔

کلّو  :  ’’ اوپر پتا اور ماں ملیں گی۔‘‘

منی  :  ’’ نہیں  —  الّو — وہ نہیں— وہ تو مرگئے۔‘‘