مرزا صاحب کے کپڑے پہننے کاعمل اس قدر طویل ہے کہ اگر میرا اختیار ہوتا تو قانون کی روٗ سے انھیں کبھی کپڑے اتارنے ہی نہ دیتا۔ آدھے گھنٹے کے بعد وہ کپڑے پہنے ہوئے تشریف لاتے ہیں۔ ایک پان مُنہ میں، دوسرا ہاتھ میں ۔ میں بھی اٹھ کھڑا ہوتاہوں۔ دروازے تک پہنچ کر مڑکے جو دیکھتا ہوں تو مرزا صاحب غائب۔ پھر اندرآجاتاہوں۔ مرزا صاحب کسی کونے میں کھڑے کچھ کُرید کر رہے ہوتے ہیں۔

’’ارے بھئی چلو۔‘‘

’’چل تو رہاہوںیار۔ آخر اتنی بھی کیا آفت ہے؟‘‘

’’اور یہ تم کرکیا رہے ہو؟‘‘

’’پان کے لیے ذرا تمباکو لے رہاتھا۔‘‘

تمام راستے مرزا صاحب چہل قدمی فرماتے جاتے ہیں۔ میں ہردو تین لمحے کے بعد اپنے آپ کو ان سے چار پانچ قدم آگے پاتاہوں۔ کچھ دیر ٹھہر جاتاہوں۔ وہ ساتھ آملتے ہیں تو پھر چلنا شروع کردیتا ہوں۔ پھرآگے نکل جاتا ہوں۔ پھر ٹھہر جاتاہوں۔غرض یہ کہ گو چلتا دُگنی تِگنی رفتار سے ہوں لیکن پہنچتا ان کے ساتھ ہی ہوں۔

ٹکٹ لے کر اندر داخل ہوتے ہیں تو اندھیرا گُھپ۔ بہتیر ا آنکھیں جھپکتاہوں، کچھ سُجھائی نہیں دیتا۔ ادھر سے کوئی آواز دیتا ہے، ’’یہ دروازہ بند کردوجی۔‘‘یا اللہ اب کہاں جاؤں؟ رستہ، کرسی، دیوار، آدمی کچھ بھی تو نظر نہیں آتا۔ ایک قدم بڑھاتا ہوں تو سر اُن بالٹیوں سے جا ٹکراتا ہے جو آگ بجھانے کے لیے دیوار پر لٹکی رہتی ہیں۔ تھوڑی دیر کے بعد

  تاریکی میں کچھ دُھندلے سے نقش دکھائی دینے لگتے ہیں۔ جہاں ذرا سا تاریک سا دھبّا دکھائی دے جائے وہاں سمجھتا ہوں کرسی خالی ہوگی۔خمیدہ پُشت ہوکر اس کارُخ کرتاہوں۔ اِس کے پاؤں کو پھاند ، اُس کے ٹخنوں کو ٹھکرا، خواتین کے گھٹنوں سے دامن بچاکر، آخرکار کسی کی گود میں جابیٹھتا ہوں۔ وہاں سے نکال دیا جاتاہوں اور لوگوں کے دھکّوں کی مدد سے کسی خالی کرسی تک جا پہنچتا ہوں۔ مرزا صاحب سے کہتا ہوں ’’میں نہ بَکتا تھا کہ جلدی چلو۔خواہ مخواہ میں ہم کو رسوا کروایانا۔ گدھا کہیں کا!‘‘اس شگفتہ بیانی کے بعد معلوم ہوتا ہے کہ ساتھ کی کرسی پر جوحضرت بیٹھے ہیں اور جن کو میں مخاطب کررہا ہوں وہ مرزا نہیں کوئی بزرگ ہیں۔

اب تماشے کی طرف متوجّہ ہوتا ہوں اور سمجھنے کی کوشش کرتا ہوں کہ فلم کون سی ہے؟ اس کی کہانی کیا ہے؟ اور کہاں تک پہنچ چکی ہے؟اس انتظار میں رہتا ہوں کہ کچھ لکھا ہوا سامنے آئے ، تومعاملہ کھُلے کہ اتنی دیر میں سامنے کی کرسی پر بیٹھے ہوئے حضرت ایک وسیع اور فراخ انگڑائی لیتے ہیں جس کے دوران میں کم ازکم دو تین سو فٹ فلم گزرجاتی ہے۔ جب انگڑائی کو لپیٹ لیتے ہیں تو پھر سر کھُجانا شروع کرتے ہیں اور اس عمل کے بعد ہاتھ کو سر سے نہیں ہٹاتے بلکہ بازو کوویسے ہی خَمیدہ رکھے رہتے ہیں۔ میں مجبوراً سر کو نیچا کرکے چا ئے دانی کے اس دستے کے بیچ میں سے اپنی نظر کے لیے راستہ نکال لیتا ہوں اور اپنے بیٹھنے کے انداز سے بالکل ایسا معلوم ہوتا ہوں کہ جیسے ٹکٹ خریدے بغیر اندر گھس آیاہوں اور چوروں کی طرح بیٹھا ہواہوں۔ تھوڑی دیر بعد انھیں کرسی کی نَشِست پر کوئی مچھّر یا پسِّو محسوس ہوتاہے۔ چنانچہ وہ دائیں طرف سے ذرا اونچے ہوکربائیں طرف کو جھک جاتے ہیں۔ میں مصیبت کا مارادوسری طرف جُھک جاتاہوں۔ ایک دو لمحے کے بعد وہی مچھّر دوسری طرف ہجرت کرجاتا ہے۔ چنانچہ ہم دونوں پھر سے پینترا بدل لیتے ہیں۔ غرض یہ کہ یہ دل لگی یوں ہی جاری رہتی ہے۔ وہ دائیں تو میں بائیں، وہ بائیں تو میں دائیں۔ ان کو کیا معلوم کہ اندھیرے میں کیا کھیل کھیلا جارہا ہے۔ دل یہی چاہتا ہے کہ اگلے درجے کا ٹکٹ لے کر ان کے آگے جا بیٹھوں اور کہوں کہ لے بیٹا! دیکھوں تو اَب توٗ کیسے فلم دیکھتاہے؟

پیچھے سے مرزا صاحب کی آواز آتی ہے ’’یار! تم سے نچلا نہیں بیٹھا جاتا۔ اب جو ہمیں ساتھ لائے ہو تو فلم تو دیکھنے دو۔‘‘اس کے بعد غُصّے میں آکر آنکھیں بند کرلیتاہوں ۔ دل میں کہتاہوں ایسی کی تیسی اس فلم کی ۔ سوسو قسمیں کھاتا ہوں کہ پھر کبھی نہ آؤں گا اور اگرآیا بھی تو اس کمبخت مرزا سے ذکر تک نہ کروں گا۔ پانچ چھے گھنٹے پہلے سے آجاؤں گا۔ اوپر کے درجے میں سب سے اگلی قطار میں بیٹھوں گا۔ تمام وقت اپنی نَشِست پر اُچھلتا رہوں گا۔ بہت بڑے طُرّے والی پگڑی پہن کر آئوں گا۔ اپنے اوور کوٹ کو دو چھڑیوں پر پھیلاکر لٹکادوں گا۔ بہر حال مرزا کے پاس تک نہ پھٹکوں گا۔

لیکن اس کمبخت دل کو کیاکروں؟ اگلے ہفتے پھر کسی اچھی فلم کا اشتہار دیکھ پاتا ہوں تو سب سے پہلے مرزا کے ہاں جاتا ہوں اور گفتگو پھروہیں سے شروع ہوتی ہے کہ ’’کیوں بھئی مرزا!اگلی جمعرات سنیما چلوگے نا؟‘‘

(پطرس بخاری)