کرشن چندر وزیر آباد، ضلع گجراں والا،پنجاب میں پیدا ہوئے۔ ابتدائی تعلیم پونچھ،(جمّوں کشمیر) میں ہوئی۔ 1930  کے بعد اعلیٰ تعلیم کے لیے لا ہور گئے۔ 1934 میں پنجاب یونیورسٹی سے انگریزی میں ایم۔اے کیا۔ آل انڈیا ریڈیو سے وابستہ ہوئے پھر ممبئی کی فلمی دنیا سے منسلک ہو کر آخر وقت تک ممبئی ہی میں رہے اور وہیں انتقال ہوا۔ترقی پسند تحریک سے ان کا گہرا تعلق تھا۔ پریم چند کے بعد جن افسانہ نگاروں نے غیر معمولی شہرت حاصل کی، اُن میں ایک اہم نام کرشن چندر کا بھی ہے۔

کرشن چندر بنیادی طور پر افسانہ نگار تھے لیکن انھوں نے ناول، ڈرامے،رپورتاژ اور مضامین بھی لکھے ہیں۔

ان کی مقبولیت کا سبب ان کی حقیقت پسندی، رومانیت اور خوب صورت اندازِ بیان ہے۔’یوکلپٹس کی ڈالی‘ ، ’مہا لکشمی کا پُل‘ ’اَن داتا‘ ان کے اہم افسانوی مجموعے ہیں۔

ان کے ناولوں میں ’شکست‘،’جب کھیت جاگے‘  اور’آسمان روشن ہے‘کے علاوہ ’ایک گدھے کی سرگزشت‘کو خاص مقبولیت حاصل ہوئی۔

’’دوسری بات‘‘۔

’’راجا جی نے میرے سامنے ایک کسان سے کہا جا ہم تیرا لگان معاف کر دیتے ہیں۔‘‘

’’اس کے بعد جب وہ کسان چلا گیا تو انھوں نے منشی سے کہا ! جا اس کسان کی زمین قُرق کرالے۔‘‘

’’اس لیے محترم بزرگ میں سمجھتا ہوں کہ انسانوں کی دو زبانیں ہوتی ہیں اور وہ جو ایک زبان سے کہتے ہیں اسے دوسری زبان سے کاٹ دیتے ہیں اور پھر اس کا نام تہذیب رکھ دیتے ہیں۔‘‘

کالے سر نے کہا۔’’ شکر ہے ہم مینڈکوں کو صرف ایک زبان آتی ہے۔‘‘

’’خدا کا لاکھ لاکھ شکر ہے۔‘‘ بہت سے مینڈکوں نے ٹرّا کے کہا۔ دادا نے پوچھا۔ ’’اچھا یہ تو بتاؤ تم اس جہنم سے کیسے نکلے‘‘

زرد پوش نے مسکراکے کہا۔ ’’آہستہ آہستہ میں چھوٹے راج کمار سے مانوس ہوتا گیا کیونکہ وہ مجھے روز کھانے کھلاتا تھا۔ قدرتی بات تھی اس لیے اب مجھے اس کے جسم سے گِھن بھی نہ آنے لگی تھی۔نہ اب اس کے جسم کی بو مجھے ناگوار معلوم ہوتی تھی نہ اب مجھے اس کی ہتھیلی سے کراہت محسوس ہوتی تھی۔ میں اکثراب اس کے کمرے میں پھُدکتارہتا اور کمرے سے باہر نہ جاتا۔راج کمار مجھ سے باتیں کرتا رہتا اور میں ٹرّاکے یا کبھی خاموش رہ کے اس کی باتیں سُنتا رہتا۔پھر راج کمار مجھے اپنے ساتھ باہر بھی لانے لگا۔ ایک بار جب ہم دونوں ہی تالاب پر نہار ہے تھے تو رانی نے ہمیں دیکھ لیا اور وہ جو مجھے دیکھ کر چیخی ہے،جو چیخی ہے،جو چیخی ہے بس آسمان سر پر اٹھا لیا۔تو صاحب اس رانی نے میرے پیچھے دو چار نوکر لگا دیے اور میں جو تالاب سے اُچھل کر بھاگا ہوں تو محل کے صحن کو پھاند تا ہوا برآمدوں میں سے جست لگاتا ہوا باہر باغیچے میں آگیا۔آگے راستہ صاف تھا اور یہ تو تم جانتے ہو کہ دوڑنے میں، بھاگنے میں، چھلانگ لگانے میں، تیرنے میں انسان کبھی مینڈک کا مقابلہ نہیں کر سکتے۔‘‘

’’نہ گانے میں؟ گانے کے متعلق تمھارا کیا خیال ہے۔‘‘ زرافہ جو خود گانے کی بڑی ماہر تھی، سوال کرنے لگی۔

’’گانے کی بات چھوڑ دو۔ یہ آدمی تو ایسے بے سُرے ہوتے ہیں کہ ساز کے بغیر گاہی نہیں سکتے۔گانا تو اب صرف مینڈکوں تک رہ گیا۔اس آرٹ کے ہم ہی وارث رہ گئے ہیں۔‘‘

’’بے شک بے شک۔‘‘ بہت سے مینڈک یکدم بول اُٹھے اور گانے لگے۔

’’ہم مینڈک ہیں، ہم مینڈک ہیں، ہم مینڈک ہیں‘‘

جب یہ ٹرّاہٹ ختم ہوئی تو چند لمحوں کے لیے مجلس میں سنّاٹا رہا۔ آخر میں دادا نے سوال کیا۔

’’اور سب باتیں تو سُن چکے۔ اب ایک بات پوچھنی ہے۔ یہ امتیاز جو تم مینڈک اور انسان میں بھی دیکھ چکے ہو، تمھارا کیا خیال ہے انسان بڑا ہے یا مینڈک؟‘‘

چند لمحوں کی خاموشی کے بعد زرد پوش نے اپنا جُھکا ہوا سر اُٹھا کے کہا۔’’انسان‘‘

’’وہ کیسے؟‘‘

زرد پوش بولا۔ ’’میں نے اپنی حکایت کا آخری حصّہ تو سُنا یا ہی نہیں، جب میں باغیچے میں پہنچ گیا تب تک بہت سے نوکر دَم چھوڑ چکے تھے۔ مجھے پکڑنے کی آس چھوڑ چکے تھے۔ مگر ایک سب سے چھوٹا راج کمار جو مجھ سے اس قدر مانوس ہو گیا تھا اب بھی میرے پیچھے پیچھے بھاگتا آتا تھا۔ وہ باغیچے سے لے کے ڈھلوان تک اور پھر ڈھلوان سے لے کے کیچڑ تک اور کیچڑ سے نیچے جھیل کے کنارے میرے پیچھے پیچھے بھاگتا ہوا آیااور جب میں نے دھڑام سے جھیل میں چھلانگ لگائی اس وقت بھی وہ پانی کے کنارے اپنی دونوں باہیں پھیلائے مجھ سے ملتجیانہ انداز میں کہہ رہا تھا۔ آجاؤ،واپس آجاؤ، میرے پیارے مینڈک، میں اب تم کو کبھی ناراض نہیں کروں گا، میں تم کو بہت پیار کروں گا اور جس وقت وہ یہ کہہ رہا تھا اس وقت اس کی آنکھوں میں آنسو تھے اور اس لیے انسان مینڈک سے بڑا ہے کیونکہ انسان رو سکتا ہے اور مینڈک رو نہیں سکتا۔ انسان اپنی تمام بُری حرکتوں، بے وفائیوں ،بدلگامیوں کے باوجود رو سکتا ہے اور مینڈک رو نہیں سکتا۔اس لیے میں سمجھتا ہوں کہ انسان مینڈک سے بڑا ہے۔‘‘

(کرشن چندر)

مشق

معنی یاد کیجیے: