3 نوآبادیوں میں صنعتیت

آئیے اب ہندوستان کی طرف چلتے ہیں اور یہ دیکھتے ہیں ایک نوآبادی صنعت کیسے بنتی ہے۔ یہاں بھی ہم ایک بار پھر محض فیکٹریوں اور کارخانوں والی صنعتوں پر ہی نہیں بلکہ غیر میکانکی شعبہ پر بھی نظر رکھیں گے مگر ہم اپنی بحث کو ٹکسٹائل صنعتوں تک محدود رکھیں گے۔

3.1  ہندوستانی ٹکسٹائل کا زمانہ

مشینوں والی صنعت کے زمانے سے قبل ، ٹکسٹائل کی بین الاقوامی منڈیوں میں ہندوستان کے سلک اور سوتی سامان کی دھاک جمی ہوئی تھی۔ موٹی جھوٹی اور نفاست سے عاری کپاس ، تو بہت سے ملکوں میں پیدا کی جاتی تھی مگر نفیس قسمیں عموماً ہندوستان سے آتی تھیں۔ امریکی اور ایرانی تاجر یہ سامان پنجاب سے پہاڑوں کے دروں اور ریگستانوں کو پار کرکے افغانستان ، مشرقی ایران اور سنٹرل ایشیا لے گئے۔ نوآبادیاتی عہد سے پہلے کی اہم بندرگاہوں سے بڑی فعال بحری تجارت ہوتی تھی۔ گجرات کے ساحل پر سورت نے خلیجی اور بحر احمر کی بندرگاہوں کو ملارکھا تھا، کورومنڈیل ساحل پر مسولی پٹنم اور بنگال میں ہگلی کے جنوب مشرقی ایشیا کی بندرگاہوں سے تجارتی رشتے تھے۔

ہندوستان کے بہت سے مختلف تاجر اور بینکرس برآمد کے اس کاروبار میں تھے۔ پیدا وار کے لیے سرمایہ فراہم کرنا، سامان کی نقل و حمل اور اسے برآمد کرنے والوں تک پہنچانا وغیرہ۔ سپلائی کرنے والے ان تاجروں نے بندرگاہوں والے شہروں کو اندرونی علاقوں سے ملایا۔ ان لوگوں نے بنکروں کو پیشگی سرمایہ دیا،گائووں سے بُنا ہوا کپڑا اٹھایا اور اسے بندرگاہوںتک پہنچایا۔ بندرگاہوں پر بڑے جہازوں کے مالک اور اکسپورٹ مرچنٹس اپنے دلال رکھتے تھے جو بات چیت کرکے قیمتیں طے کرتے تھے اور سامان سپلائی کرنے والوں سے خریدلیتے تھے۔

1750 آتے آتے کاروبار کا وہ نٹ ورک جِسے ہندوستانی کنٹرول کرتے تھے، ٹوٹنا شروع ہوگیا۔

یورپ کی کمپنیوں نے آہستہ آہستہ قوت و اختیار حاصل کرنا شروع کیا۔ پہلے تو مقامی عدالتوں سے بہت سی رعائتیں حاصل کرکے ،اس کے بعد تجارت پر اجارہ داری کے حقوق حاصل کرکے۔ اس کا نتیجہ سورت اور ہگلی کی بندرگاہوں کی تباہی کی شکل میں نکلا جہاں سے متاثر تاجر کاروبار کیا کرتے تھے۔ ان بندرگاہوں سے ہونے والی برآمدات میں اچانک شدید کمی آئی ، جمع پونجی جو شروع شروع میں تجارتی کاروبار کے لیے سرمایہ فراہم کرتی تھی ختم ہونا شروع ہوئی اور مقامی بینکرس آہستہ آہستہ دیوالیے ہوگئے۔ سترھویں صدی کے آخری برسوں میں سورت سے ہونے والی تجارت کی مجموعی قیمت 16 ملین روپیے تھی 1740 میں یہ محض 3 ملین رہ گئی۔

شکل —13. سورت میں انگلش فیکٹری۔ سترھویں صدی کی ایک ڈرائنگ

ایک طرف سورت اور ہگلی پر زوال آیا دوسری طرف بمبئی اور کلکتہ نے فروغ پایا پرانی بندرگاہوں سے نئی بندرگاہوں کو یہ منتقلی ، نوآبادیاتی پاور کے فروغ و نشو نما کی طرف اشارہ کرتی ہے۔نئی بندرگاہوں سے ہونے والی تجارت پر یورپین کمپنیوں کا کنٹرول ہوا، سامان یورپین جہاز لاتے لے جاتے تھے۔ جہاں بہت سے پرانے تجارتی ادارے انحطاط کا شکار ہوئے وہیں ان اداروں کو جو زندہ رہنا چاہتے تھے اب یورپ کی تجارتی کمپنیوں کے بنائے ہوئے کاروباری نظام میں رہ کر کام کرنا پڑا۔

بُنکروں اور دوسرے دست کاروں کی زندگیوں پر ان تبدیلیوں نے کیوں کر اثر ڈالا؟ 

شکل 14 ایک بنکر کام کرتا ہوا۔ گجرات

3.2 بُنکروں پر کیا گزری؟

1760 میں ایسٹ انڈیا کمپنی کے استحکام کا اثر ابتدامیں تو ہندوستان سے ہونے والی ٹکسٹائل کی برآمدات پر نہیں پڑا۔ اس وقت تک برطانوی کاٹن انڈسٹری میں توسیع نہیں ہوئی تھی اور ہندوستانی نفیس ٹکسٹائل کی یورپ میں مانگ بہت تھی۔ اسی لیے کمپنی کو ہندوستان سے ٹکسٹائل کی برآمد کی توسیع میں بہت دل چسپی تھی۔ بنگال (1760) اور کرناٹک (1770) میں سیاسی اختیارات حاصل کرنے سے قبل ، ایسٹ انڈیا کمپنی کو برآمد کے لیے باقاعدہ سپلائی کو یقینی بنانا مشکل معلوم ہوا۔ بازار میں بنے ہوئے کپڑے کے حصول کے لیے فرانسیسیوں ، ڈچوں ، پرتگالیوں اور ساتھ ہی مقامی تاجروں نے مقابلہ کیا۔ اس صورت حال میں بُنکر اور سپلائی کرنے والے اپنی پیداوار کو سب سے اچھے خریدار کے ہاتھ بیچنے کی کوشش اور سودے بازی کرسکے۔ کمپنی کے حکام نے لندن بھیجے جانے والے اپنے خطوں میں، سپلائی اور زیادہ قیمتوں کی مسلسل شکایت کی ہے۔

بہرحال جب ایک بار ایسٹ انڈیا کمپنی نے سیاسی اختیار مستحکم کرلیا تو وہ تجارت پر اجارہ داری کے حقوق پر اصرار کرسکی۔ اس نے مینجمنٹ اور کنٹرول کے ایک ایسے نظام کے بنانے کی طرف قدم بڑھایا جو مقابلے کو ختم کردے، قیمتوں پر قابو رکھے اور سلک اور روئی کی باقاعدہ سپلائی کو یقینی بنائے۔ ہر کام اس نے متعدد اقدام کے ذریعے کیا۔

پہلا قدم: کمپنی نے کپڑے کے کارو بار سے متعلق موجودہ تاجروں اور دلالوں کو ختم کرنے اور بنکر پر ایک زیادہ راست کنٹرول حاصل کرنے کی کوشش کی۔ اس نے بنکروں پر نگرانی رکھنے، سپلائی جمع کرنے اور کپڑے کی کوالٹی کی جانچ پڑتال کرنے کے لیے ایک تنخواہ دار ملازم رکھا، جسے گماشتہ کہا جاتا تھا۔

دوم: اس نے کمپنی کے بنکروں کو دوسرے خریداروں سے گفت و شنید کرنے پر روک لگادی۔ ایسا کرنے کا ایک طریقہ پیشگی دینے کے نظام کے ذریعے تھا۔جب ایک آرڈر دے دیا جاتا تھا تو بنکروں کو اپنی مصنوعات کے لیے خام مال خریدنے کے لیے قرض دیے جاتے تھے۔ جو لوگ قرض لے لیتے تھے انھیں اپنے بنائے ہوئے کپڑے کو گماشتوں کے حوالے کرنا پڑتا تھا، وہ اس سامان کو کسی دوسرے تاجر کو نہیں دے سکتے تھے۔

جیسے جیسے قرض ملنے لگے اور نفیس ٹکسٹائل کی مانگ بڑھی، بنکروں نے بڑے شوق سے اور زیادہ کمانے کی توقع کے ساتھ قرض لینا شروع کردیا۔ بہت سے بنکر ایسے تھے جن کے پاس زمین کے چھوٹے چھوٹے اپنے ذاتی پلاٹ تھے، جن پر بُنائی کے کام کے ساتھ وہ کھیتی باری کرلیتے تھے اور اس کی پیداوار سے ان کے خاندان کی کچھ ضرورتیں پوری ہوجایا کرتی تھیں۔ اب وہ اپنی زمین کو ٹھیکے یا کرائے پر دینے اور اپنا سارا وقت بننے کے کام میں لگانے پر مجبور تھے۔ بننے کا کام حقیقتاً سارے خاندان کی محنت کا مطالبہ کرتا تھا۔ اور عورتیں اور بچے کام کی مختلف منزلوں پر اس میں لگے رہتے تھے۔

بہرحال، جلدی ہی بنکروں کے گاؤوں سے گماشتوں اور بنکروں کے درمیان جھگڑوں کی خبریں آنے لگیں۔ ابتدامیں سپلائی کرنے والے تاجر عموماً بنکروں کے گائوں میں ہی رہتے تھے ، بنکروں سے ان کے قریبی تعلقات ہوتے تھے اور یہ لوگ ان کی بہت سی ضرورتوں کو پورا کرتے تھے اور پریشانی کے زمانے میں ان کی مدد کرتے تھے۔ نئے گماشے باہر کے لوگ ہوتے تھے، گائوں سے ان کے کوئی سماجی رشتے بھی نہیں ہوتے تھے۔ ان کے کام کے روّیوں میں بددماغی ہوتی تھی، وہ گاؤں میں Sepoys (سپاہیوں) اور چپراسیوں کے ساتھ آتے تھے، اور سپلائی میں تاخیر ہوجانے پر بنکروں کو مارتے پیٹتے بھی تھے۔ بنکر قیمتوں کے بارے میں گفت و شنید اور دوسرے مختلف خریداروں سے بات کرنے کے موقوں سے محروم ہوگئے ۔ کمپنی سے ان کو جو قیمتیں ملتی تھیں وہ بہت کم ہوتی تھیں اور لیے ہوئے قرضے انھیں کمپنی سے باندھے رکھتے تھے۔ کرناٹک اور بنگال میں بہت سی جگہوں پر بنکروں نے اپنے گاؤں چھوڑے اور دوسرے ایسے گاوؤں میں کرگھے لگائے جہاں ان کے کچھ خاندانی تعلقات تھے۔ بہت سی جگہوں پر بنکروں نے گاؤں کے تاجروں کے ساتھ مل کر ، کمپنی اور اس کے حکام سے جھگڑا کیا۔ بہت سے بنکروں نے قرض لینے سے انکار کرنا شروع کیا، اپنا کاروبار بند کردیا اور کھیتوں پر مزدوری کرنے لگے۔

انیسویں صدی کے اختتام پر بنکروں کے سامنے نئے نئے مسائل تھے۔

3.3  مانچسٹر ہندوستان آتا ہے

1772 میں کمپنی کے افسر ہنری پٹولو (Henry Patullo) نے یہ کہنے کی ہمت دکھائی کہ ہندوستانی ٹکسٹائل کی مانگ کبھی کم نہیں ہوسکتی کیوں کہ کوئی دوسرا ملک اس کی جیسی کوالٹی کا سامان پیدا نہیں کرتا ہے۔ پھر بھی 19ویں صدی کے آغاز میں ہم ہندوستان سے ہونے والی ٹکسٹائل کی برآمدات میں ایک طویل زوال کی شروعات دیکھتے ہیں۔ 12-1811 میں ہندوستان کی برآمدات میں کٹ پیس کپڑا 33 فی صدتھا جو51 -1850تک 3 فی صد سے زیادہ نہیں تھا۔

ایسا کیوں ہوا؟ اس کے عواقب کیا تھے؟ انگلستان میں کاٹن انڈسٹری میں ترقی ہوئی اور صنعتی گروہ دوسرے ملکوں سے ہونے والی درآمدات سے پریشان ہونے لگے۔انھوں نے سوتی کپڑے پر محصول لگانے کے لیے حکومت پر دباؤ ڈالنا شروع کیا تاکہ باہر والوں سے کسی مقابلے کے بغیر مانچسٹر کا سامان برطانیہ میں بیچا جاسکے۔ اسی کے ساتھ صنعت کاروں نے ایسٹ انڈیا کمپنی پر برطانوی مصنوعات کو ہندوستانی مارکٹ میں بیچنے پر زور ڈالا۔ اوائل 19 ویں صدی میں برطانوی سوتی سامان کی برآمدات میں حیرت انگیز اضافہ ہوا۔ 18 ویں صدی کے آخر میں حقیقتاً ہندوستان میں کٹ پیس سوتی سامان کی درآمد تھی ہی نہیں۔ مگر 1850 تک کٹ پیس سامان کی درآمد ہندوستانی درآمد کی 31 فی صدسے زیادہ مقدار میں تھی۔ 1870 میں یہ مقدار 50       فی صد سے زیادہ ہوگئی تھی۔

1860 تک بنکروں نے ایک نئی دشواری کا سامنا کیا۔ وہ اچھے قسم کی خام کپاس مناسب مقدار میں حاصل نہیں کرسکے۔ جب امریکن سول وار شروع ہوئی اور امریکہ سے روئی کی سپلائی بند ہوگئی تو برطانیہ نے ہندوستان کی طرف رخ کیا۔ ہندوستان سے خام کپاس کی برآمدات میں اضافہ ہوا اور خام کپاس کی قیمتیں بڑھ گئیں۔

ہندوستان میں بنکر سپلائی کے بھوکے تھے اور خام کپاس انتہائی اونچی قیمتوں پر خریدنے پر مجبور ۔ ایسی صورت حال میں بنائی کا کام یہ قیمتیں نہیں دے سکا۔

پھر 19 ویں صدی کے اختتام پر بنکروں اور دستکاروں کو ایک دشواری کا سامنا کرنا پڑا۔ ہندوستان میں فیکٹریوں اور کارخانوں نے مال بنانا شروع کردیا۔ اور بازار میں مشین سے بنے ہوئے سامان کی بہتات ہوگئی۔ اب بُنائی کی صنعتیں زندہ کیوں کر رہ سکتی تھیں؟

4۔ فیکٹریاں بنتی ہیں

پہلا کاٹن مل بمبئی میں 1854 میں بنا اور دوسال بعد اس نے سامان بنانا شروع کیا۔ 1862 تک چار مل کام کرنے لگے تھے جن میں 94,000 تکلے (spindles) اور 2,150 کرگھے لگے ہوئے تھے۔ تقریباً اسی زمانے میں کلکتے میں جوٹ مل قائم ہوئے۔ پہلا 1855 میں مکمل ہوا دوسرا سات سال بعد 1862 میں بن کر تیار ہوا۔ شمالی ہندوستان میں کانپور میں ایلگن مل 1860 میں شروع ہوا۔ اور ایک سال بعد احمدآباد کا پہلا کاٹن مل بنا۔ مدراس میں وہاں کے اسپننگ اینڈ ویونگ مل نے 1874 میں پیداوار شروع کی۔

ان صنعتوں کو شروع کس نے کیا؟ اس کے لیے سرمایہ کہاں سے آیا؟ ان ملوں میں کام کرنے کون آیا؟

4.1 اولین مہم جو کاروباری 

مختلف علاقوںمیں مختلف قسم کے لوگوں نے انڈسٹریز شروع کیں۔ آئیے ہم دیکھیں کہ یہ کون لوگ تھے۔ بہت سے بزنس گروپوں کی تاریخ چین سے ہونے والی تجارت تک جاتی ہے۔ جیسا کہ پچھلے سال آپ نے اپنی کتاب میں پڑھا تھا کہ آخر 18 ویں صدی سے انگریزوں نے ہندوستان سے افیون ، چین برآمد کرنے اور چین سے چائے انگلستان لے جانے کا کام شروع کیا۔ بہت سے ہندوستانی اس کاروبار میں جو نیر پارٹنر کی حیثیت سے شریک ہوئے۔ انھوں نے سرمایہ فراہم کیا، سپلائی کا انتظام کرنے اور مال کو جہازوں سے روانہ کرنے میں مدد کی۔ تجارت سے کمانے کے بعد ، ان کاروباریوں میں سے چند کو ہندوستان میں کچھ صنعتی منصوبے شروع کرنے کا خیال آیا۔ بنگال میں دوارکا ناتھ ٹیگور نے تجارت میں سرمایہ کاری کی طرف رخ کرنے سے قبل چین کی تجارت سے بڑا پیسہ کمایا تھا۔ انھوں نے 1830 اور 1840 میں چھے جوائنٹ اسٹاک کمپنیاں قائم کیں۔ 1840 کے بزنس بحران میں دوسروں کے ساتھ ٹیگور کے منصوبے بھی ڈوب گئے۔ مگر بعد کو 19 ویں صدی میں چین سے تجارت کرنے والے وہ کامیاب صنعت کار بن گئے۔ بمبئی میں دنشاہ پیتت اور جمشید جی نوشیرواں ٹاٹا نے جنھوں نے ہندوستان میں بڑے بڑے صنعتی منصوبے شروع کیے تھے شروع میں اپنی کچھ دولت چین کی برآمدات سے اور کچھ خام کپاس انگلستان بھیج کر جمع کی تھی۔ ایک مارواڑی بزنس مین سیٹھ حکم چند جنھوں نے بھی1917 میں کلکتے میں پہلا جوٹ مل لگایا تھا، چین سے تجارتی کاروبار کیا تھا۔ یہی کچھ مشہور صنعت کار جی ڈی برلا کے والد ور ان کے دادا نے بھی کیا تھا۔

سرمایہ تجارت کے دوسرے سلسلوں سے بھی اکٹھا کیا گیا۔ مدراس کے کچھ تاجروں نے برما سے تجارتی کاروبار کیا، کچھ دوسرے تھے جنھوں نے مڈل ایسٹ اور مشرقی افریقہ سے رابطے استوار کیے ۔ کمرشل گروپ اور بھی تھے مگر یہ بیرونی تجارت سے براہ راست منسلک نہیں تھے۔ یہ گروپ ہندوستان کے اندر ہی کام کرتے تھے۔ سامان ایک جگہ سے دوسری جگہ لے جاتے تھے۔ رقموں سے سرمایہ کاری (Banking money) کرتے تھے ۔ شہروں کے درمیان پیسہ منتقل کرتے تھے اور تاجروں کو سرمایہ فراہم کرتے تھے۔ جب صنعتوں میں سرمایہ کاری کے مواقع فراہم ہوئے تو ان میں سے بہتوں نے فیکٹریاں لگالیں۔

ہندوستانی تجارت پر نوآبادیاتیکنٹرول زیادہ ہوتا گیا تو وہ مواقع جن میں ہندوستانی تاجر کام کرسکتے تھے روز بروز محدود ہوتے گئے۔ یورپ میں بنی ہوئی مصنوعات کی تجارت سے انھیں الگ کردیا گیا تھا۔ انھیں زیادہ تر ان چیزوں کی برآمد کرنا ہوتی تھی جن کی برطانیہ کو ضرورت ہوتی تھی۔ مثلاً خام اشیا اور اجناس ، خام روئی، افیون گیہوں اور نیل ، انھیں آہستہ آہستہ شپنگ کے کاروبار سے بھی نکال باہر کیا گیا۔

پہلی جنگ عظیم تک حقیقت یہ ہے کہ ہندوستانی تجارت کے ایک بڑے حصے پر یوروپین مینیجنگ ایجنسیوں کا کنٹرول تھا۔تین بڑی ایجنسیاں تھیں برڈہیگلر اینڈ کو، اینڈریول اور جارڈین اسکز اینڈ کو۔ ان ایجنسیوں نے سرمایہ جمع کیا، جوائنٹ اکسچینج کمپنیاں قائم کیں اور ان کا انتظام کیا۔ اکثر موقوں پر ہندوستانی سرمایہ کاروں نے سرمایہ فراہم کیا جب کہ ساری سرمایہ کاری یورپین ایجنسیوں نے کی اور سارے کاروباری فیصلے بھی انھوں نے ہی لیے۔ یورپین تاجر صنعت کار اپنے اپنے چمبرس آف کامرس رکھتے تھے ، جن میں شریک ہونے کی اجازت ہندوستانی کارباریوں کو نہیں تھی۔

4.2 کام کرنے والے کہاں سے آئے؟

فیکٹریوں کو کام کرنے والوں کی ضرورت تھی۔ فیکٹریوں کی تعداد بڑھنے سے یہ مانگ بھی بڑھی۔ 1901 میں ہندوستانی فیکٹریوں میں مزدوروں کی تعداد 5,84,000 تھی۔ 1946 تک یہی تعداد 24,36,000 ہوگئی۔ یہ مزدور آئے کہاں سے؟ 

زیادہ تر صنعتی علاقوں میں مزدور قرب و جوار کے شہروں سے آئے۔ جن کسانوں اور دستکاروں کو گاؤوں میں کوئی کام نہ مل سکا وہ کام کی تلاش میں صنعتی مراکز کی طرف گئے۔ 1911 میں بمبئی کی کاٹن انڈسٹریز میں پچاس فی صدسے زیادہ مزدور پڑوس کے شہر رتناگری سے آئے تھے۔ جب کہ کان پور کے ملوں کو کپڑے کی صنعت میں کام کرنے والے مزدور کان پور ضلعے کے گاؤں سے ملے۔ ملوں میں کام کرنے والے مزدور گاؤں اور شہر کے بیچ میں آتے جاتے رہتے تھے۔ تہواروں اور فصلوں کی کٹائی کے وقت وہ اپنے گاؤوں میں اپنے گھر آجاتے تھے۔

ملازمت کی خبرجیسے جیسے پھیلتی تھی، مزدور ملوں میں کام ملنے کی توقع میں دور دراز کی مسافتیں طے کرتے تھے۔مثال کے طور پر یونائیٹڈ پراونسز سے یہ لوگ بمبئی کے کاٹن ملوں اور کلکتے  کے جوٹ ملوں میں گئے۔ کام ملنا ہمیشہ سے مشکل تھا حتیٰ کہ اس وقت بھی جب مل بے شمار ہوئے اور مزدوروں کی ضرورت اور مانگ میں بھی اضافہ ہوا۔ کام تلاش کرنے والوں کی تعداد ملنے والے کاموں کے مقابلے میں ہمیشہ زیادہ رہتی تھی۔ ملوں میں داخلہ بھی محدود تھا صنعت کار عموماً نئی بھرتی کے لیے ایک دلال (Jobbar) ملازم رکھتے تھے۔ عام طور پر یہ کام کرنے والا کوئی پرانا اور قابل اعتماد ملازم ہوتا تھا۔ وہ اپنے گائوں سے آدمی لاتا تھا، ان کو کام دلاتا تھا شہر میں قیام میں ان کی مدد کرتا تھا اور ضرورت پڑنے پر ان کے لیے روپیے پیسے کا انتظام بھی کردیتا تھا۔ اسی لیے یہ دلال (Jobber) ایک نہایت بااختیار اور اثر و رسوخ والا آدمی ہوجاتا تھا۔ اس نے بھی اپنے احسانوں اور مزدوروں کی دیکھ بھال کے لیے روپیے اور تحفے تحائف کا مطالبہ شروع کیا۔

وقت کے ساتھ ساتھ فیکٹریوں میں کام کرنے والوں کی تعداد بڑھی ۔ مگر بہرحال جیسا کہ آپ دیکھیں گے، کہ یہ مزدور بحیثیت مجموعی کل صنعتی کارکنوں کے تناسب میں کم ہی تھے۔

جزوی طور پر تو اس کا سبب ٹکنالوجی کی تبدیلیاں تھیں۔ دستکار نئی ٹکنالوجی کو اپناتے ہیں اگر وہ قیمتوں کو بہت زیادہ بڑھائے بغیر پیداوار کو بہتر کرتی ہے۔ اسی لیے ہم بیسویں صدی کی دوسری دہائی میں بنکروں کو فلائی شٹل استعمال کرتے ہوئے دیکھتے ہیں۔ اس طریقے نے فی مزدور پیداوار کی رفتار بھی بڑھائی اور مزدوروں کی ضرورت کم ہوجانے کی وجہ سے ان کی مانگ بھی کم کردی۔ 1941 تک ہندوستان میں 35فی صدسے زیادہ کرگھوں میں فلائی شٹل لگ چکے تھے۔ٹراونکور، مدراس ، میسور، کوچین اور بنگال جیسے علاقوں میں یہ تناسب 70 اور 80 فی صدتک تھا۔ اس کے علاوہ دوسری اور چھوٹی چھوٹی اختراعات تھیں جنھوں نے اپنی پیداوار کو بہتر کرنے اور ملوں سے مقابلہ کرنے میں بنکروں کی بڑی مدد کی۔

بنکروں کے کچھ گروپ دوسرے گروپوں کے مقابلے میں مل انڈسٹری کے مقابلے سے زندہ بچ نکلنے کے لیے زیادہ اچھی پوزیشن میں تھے۔ بنکروں میں سے کچھ موٹا کپڑا بناتے تھے اور کچھ نفیس قسمیں تیار کرتے تھے۔ موٹا کپڑا غریب غربا خریدتے تھے اور اس کی مانگ میں زبردست اتار چڑھاؤ آتے تھے۔ خراب فصلوں اور قحط کے زمانے میں جب دیہی علاقوں کے غریبوں کے پاس کھانے تک کے لیے کچھ نہیں ہوتا تھا اور ان کی نقد آمدنیاں ختم ہوجاتی تھیں تب ان کے لیے کپڑا خریدنا ممکن ہی نہیں ہوتا تھا۔ اس کے مقابلے میں نفیس کپڑے کی مانگ ، جسے کھاتے پیتے لوگ خریدتے تھے نسبتاً زیادہ مستحکم رہتی تھی۔ یہ لوگ اس وقت بھی خریداری کرسکتے تھے جب غریب روٹی کو ترس رہا ہوتا تھا۔ قحط اور ناکامی نے ، بنارسی اور بلوچاری ساریوں کی خریدو فروخت پر کبھی کوئی اثر نہیں ڈالا۔ مزید یہ کہ، جیسا کہ آپ نے دیکھا ہے کہ مل مخصوص بُنائی اور خصوصی ڈیزائن کے کپڑوں کی نقل نہیں کرسکے، بُنے ہوئے کناروں والی ساریوں ، مدراس کی مشہور لنگیوں اور رومالوں کی جگہ ملوں کی مصنوعات نہیں لے سکیں۔

بنکر اور دستکار جنھوں نے بیسویں صدی کے دوران اپنی مصنوعات کی پیداوار کے سلسلے کو جاری رکھا تھا وہ یقینی طور پر خوشحال نہیں ہوئے۔ انھوں نے بڑی سخت زندگی گزاری اور بڑی مشقت کی۔ خاندان کے ہر فرد کو ، بشمول عورتیں اور بچے۔ مصنوعات کی تکمیل کے عمل کے مختلف مرحلوں میں اکثر کام کرنا پڑا۔ مگر پھر بھی یہ لوگ فیکٹریوں اور کارخانوں کے عہد میں محض ماضی کی باقیات  نہیں تھے ، ان کی زندگی اور ان کی محنت ، صنعتیت کے عمل کا ایک جزولاینفک تھی۔

شکل—24.ہندوستان میں وہ مقامات جہاں بڑے پیمانے کی انڈسٹریز تھیں،1931 

ہم نے دیکھا ہے کہ برطانوی کارخانہ داروں نے ہندوستانی منڈی پر قبضہ جمانے کی کوشش کیسے کی۔ ہندوستانی بنکروں دستکاروں تاجروں اور صنعت کاروں نے نوآبادیاتی کنٹرول اور تسلط کی مزاحمت کی، محصولی کے تحفظ کا مطالبہ کیا اپنے لیے خود اپنی جگہیں پیدا کیں اور اپنی مصنوعات کے لیے مارکٹ کو وسعت دینے کی کوشش کی۔

مگر جب نئی مصنوعات بنتی ہیں تو انھیں خریدنے کے لیے لوگوں کو اکسانا ہوتا ہے انھیں ترغیب دینے کی ضرورت ہوتی ہے۔ یہ سب کیسے کیا گیا؟

شکل —25. گرائپ واٹر کیلنڈر 1928 ایم وی دھرندر ۔بچوں کے لیے بننے والی چیزوں کے اشتہار کے لیے بے بی کرشنا کی شبیہ

 کا استعمال بہت عام تھا۔

نئے خریدار پیدا کرنے کا ایک طریقہ تو اشتہارات ہیں۔ جیسا کہ آپ جانتے ہیں کہ اشتہارات مصنوعات کو پسندیدہ اور ضروری بناتے ہیں۔ یہ لوگوں کے ذہنوں کو تیار کرتے ہیں اور مصنوعات کی ضرورت کا احساس دلاتے ہیں۔ آج ہم ایک ایسی دنیا میں رہ رہے ہیں جہاں ہمارے چاروں طرف اشتہارہی اشتہار ہیں۔ یہ اخباروں اور رسالوں میں چھپتے ہیں، اشتہاری تختوں پر ہوتے ہیں، سڑکوں پر دیواروں پر لکھے ہوئے ہوتے ہیں۔ ٹیلی وژن میں دکھائے جاتے ہیں۔ لیکن اگر ہم مڑکر تاریخ پر نظر ڈالیں تو ہم دیکھیں گی کہ صنعتی عہد کے آغاز ہی سے اشتہارات نے مصنوعات کے بازار کو وسعت دینے اور نئے صارفی کلچر کی تشکیل میں ایک کردار ادا کیا ہے۔

جب مانچسٹر کے صنعت کاروں نے اپنا کپڑا ہندوستان میں بیچنا شروع کیا تو انھوں نے بنڈلوں پر لیبل چسپاں کیے۔ یہ ان لیبلوں کی ضرورت سامان بننے کے مقام اور کمپنی کو خریدار کے لیے مانوس بنانے کے لیے ہوتی تھی۔ لیبل سامان کی کوالٹی ، کی علامت بھی ہوتے تھے۔ خریدار جب لیبل پر موٹے موٹے حروف میں 'Made in Manchester' لکھا ہوا دیکھتا تھا تو توقع کی جاتی تھی کہ کپڑا خریدنے میں اسے زیادہ بھروسہ ہوگا۔

شکل—(a)26). مانچسٹر لیبل، اوائل 20 ویں صدی۔ منڈی میں آنے والے سامان کی کوالٹی کی تصدیق کرتے ہوئے ۔ درآمد کیے ہونے کپڑے پر کارتک، لکشمی اور سرسوتی جیسی ہندوستانی دیوی دیوتاؤں کی تصویریں لیبل پر ہوتی تھیں۔  

شکل  —(b)26).مانچسٹرکے ایک لیبل پرمہاراجہ رنجیت سنگھ۔

مصنوعات کا وقار اوراحترام بڑھانے کے لیے تاریخی شبیہیں بھی لیبل پر ہوا کرتی تھیں۔

لیبلوں پر صرف الفاظ یا کوئی عبارت ہی نہیں ہوتی تھی ان میں تصویریں بھی ہوتی تھیں اور اچھی بنی ہوئی تصویر یں ہوتی تھیں۔ اگر ہم ان لیبلوں کو غور سے دیکھیں تو ہمیں، کارخانے داروں کی سوچ ان کے منصوبوں اور لوگوں کو اپیل کرنے کے ان کے طریقوں کا وافر علم ہوسکتا ہے۔

ان لیبلوں پر ہندوستانی دیوی دیوتاؤں کی شبیہیں بڑی پابندی سے ہوا کرتی تھیں۔ انھیں دیکھ کر کچھ ایسا لگتا تھا کہ جیسے دیوی دیوتاؤں سے یہ تعلق، فروخت کیے جانے والے سامان کی مقدس تصدیق کردیتا تھا۔ کرشنا یا سرسوتی کی ان چھپی ہوئی شبیہوں کا مقصد ایک بیرونی ملک کے  کارخانہ دار کو ہندوستانیوں کے لیے مانوس ظاہر کرنا بھی ہوتا تھا۔

آخر 19 ویں صدی میں کارخانے دار، اپنے سامان کو مقبول بنانے کے لیے کیلنڈر بھی چھاپنے لگے تھے۔ اخباروں اور رسالوں کے برعکس کیلنڈر وہ لوگ بھی استعمال کرتے تھے جو پڑھ نہیں سکتے تھے۔ یہ کیلنڈر، چائے خانوں اور غریبوں کے گھروں میں بھی ہوتے تھے دفتروں اور متوسط طبقے کے لوگوں کے مکانوں میں بھی۔ جو لوگ ان کیلنڈروں کو اپنے یہاں لٹکاتے تھے انھیں سارے سال روز ہی یہ اشتہارات دیکھنے پڑتے تھے ان کیلنڈروں میں بھی ہم نئی مصنوعات بیچنے کے لیے دیوی دیوتاؤں کی شبیہوں کو استعمال ہوتا ہوا دیکھتے ہیں۔

دیوی دیوتائوں کی شبیہوں کی طرح اہم شخصیتوں ، بادشاہوں اور نوابوں کی تصویریں بھی اشتہارات اور کیلنڈروں کو زینت بخشتی تھیں۔ پیغام عموماً یہ ہوتا تھا ’’اگر آپ شاہانہ شخصیت کا احترام کرتے ہیں تو اس چیز کی بھی عزت کیجیے۔‘‘ جب مصنوعات کو بادشاہ استعمال کررہے ہوں یا وہ شاہی حکم پر بنائی جارہی ہوں تو ان کی کوالٹی پر سوال نہیں اٹھائے جاسکتے۔

جب ہندوستانی کارخانہ داروں نے اشتہارات دیے تو نیشنلسٹ پیغام صاف اور واضح تھا۔ یعنی اگر آپ کو ملک کی پرواہ ہے تو ان چیزوں کو خریدیے جو ہندوستانی بناتے ہیں۔ اشتہارات سودیشی کے قوم پرستانہ پیغام کو پھیلانے کا ایک ذریعہ بن گئے۔