1اولین مطبوعہ کتابیں

1.1طباعت جاپان میں

2۔ یورپ  میں پرنٹ کی آمد

گٹنبرگ ایک مرچنٹ کالڑکاتھااور ایک بڑی زرعی ریاست پر اس کی پرورش ہوئی تھی۔بچپن سے اس نے واتن بناتے ہوئے اور زیتون کا تیل نکالتے ہوئے دیکھاتھا۔نتیجتاًاس نے پتھروں پر پالش کرتے کا فن سیکھ لیاایک ماہر سنار بنا اور چھوٹے چھوٹے زیوروں کے لیے شیشے کے سانچے بنانے میں بھی مہارت حاصل کرلی۔اپنے اس علم سے فائدہ اٹھاتے ہوئے گٹنبرگ نے موجودہ ٹکنالوجی کو اپنی ایجاد کو ڈیزائن کرنے میں اپنایا۔زیتون کی گھانی(olive psess)نے پرنٹنگ پریس کا نومنہ اسے فراہم کردیااور سانچے دھات کے حروف ڈھالنے میں استعمال کیے گئے۔1448تک گٹنبرگ نے پورا نظام مکمل کرلیا۔پہلی کتاب جواس نے چھاپی وہ بائبل تھی۔تقریباً180جلدیں چھاپی گئیں اور اس کام میں تین سال لگے۔اس زمانے کے معیاروں کے لحاظ سے یہ رفتارتیزتھی۔

نئی ٹکنالوجی نے ہاتھ سے کتابیں تیارکرنے کے موجودہ فن کو ہٹایانہیں۔

حقیقت یہ ہے کہ چھپی ہوئی کتابیں اپنی ظاہری شکل اور اپنی ترتیب وتنظیم میں ہاتھ سے لکھے ہوئے مسودوں سے بڑی قریبی مشابہت رکھتی تھیں۔دھات کے حرفوں نے ہاتھ سے لکھے ہوئے حروف کے آرائشی انداز کی پیروی کی۔صفحات کے حاشیے بیل بوٹوں اور دوسرے نمونوں سے سجائے گئے۔اور تصویروں میں رنگ بھرے گئے۔

امیروں کے چھپنے والی کتابوں میں چھپے ہوئے ورق پر جگہ خالی چھوڑدی جاتی تھی۔ہر خریدار اس پر ہنسنے ولاے ڈیزائنوںکا انتخاب کرسکتا تھااور یہ فیصلہ بھی وہی کرسکتا تھا کہ کتاب پر تصویریں پینٹنگ کا کون سا اسکول بنائے گا۔

1450اور1550کے درمیانی سوبرسوں میں پرنٹنگ پریس یورپ کے اکثر ملکوں میں لگ گئے۔کام کی تلاش اورنئے پریس لگانے میں مدد کرنے کے لیے پرنٹرس جرمنی سے دوسرے ملکوں میں گئے۔پرنٹنگ پریس بڑھے ساتھ ہی کتابوں کی پیداوار میں اضافہ ہوا۔پندرہویں صدی کے نصف آخر میں چھپی ہوئی کتابوں کی دوکروڑجلدیں یورپ کے بازاروں میں تھیں16ویں صدی میں یہ تعداد بڑھ کر200ملین کے قریب ہوگئی۔ہاتھ سے چھپائی مگر میکانکی چھپائی کے طریقے طباعت میں انقلاب پیدا کردیا۔

شکل6۔گٹنبرگ پرنٹنگ پریس

بائبل کے ان صفحات کو غورسے دیکھیے یہ محض نئی ٹکنالوجی کی پیداوار نہیں تھے متن نئے گٹنبرگ پریس میں دھات کے ٹائپ سے چھاپا تھا مگر حاشیے بڑی احتیاط سے ڈیزائن کیے گئے تھے اور رنگ وغیرہ ،آرٹسٹ نے ہاتھ سے لگا ئے تھے۔کوئی دوکاپیاں یکساں نہیں تھیں۔ہر کاپی کا ہر صفحہ مختلف تھا۔بظاہراگر دوکاپیاں ایک جیسی نظرآئیں تب بھی غورسے دیکھنے سے فرق کا پتہ چل جائے گا۔رئوسااورامرا یکسانیت کی اس کمی کو پسند کرتے تھے۔ان کے پاس اس وقت جو چیز ہوتی تھی اسے آپ انوکھا کہنے کا دعویٰ کرسکتے تھے کیوں کہ کسی دوسرے کے پاس ہوبہوایسی ہی کاپی دوسری نہیں ہوسکتی تھی—متن میں بہت سی جگہوں پر آپ حروف کے اندررنگ کا استعمال دیکھیں گے۔اس کے دوفائدے تھے۔یہ صفحے کی رنگینی میں اضافہ کرنا تھا اور تمام مقدس الفاظ پر ان کی اہمیت بتانے کے لیے زوردیتا تھامگر متن کے ہر صفحے پر رنگ ہاتھ سے لگتاتھا۔گٹنبرگ نے متن سیاہی میں چھاپاتھا،جگہیں چھوڑدی تھیں تاکہ رنگ بھراجاسکے۔

3    طباعت کا انقلاب اور اس کا اثر

3.1مطالعہ کرنے والی عوام

3.2مذہبی بحثیں اور طباعت کا خوف

3.3پرنٹ اور اختلاف رائے

سترہویں اور اٹھارہویں صدی میں یورپ کے اکثرحصوں میں خواندگی کی شرح میں بڑا اضافہ ہوا۔مختلف مسالک کے چرچوں نے گاؤوں میں اسکول کھولے اور خواندگی کو کسانوں اور دستکاروں تک پہنچادیا۔18ویں صدی کے اختتام پر یورپ کے بعض حصوں میں خواندگی کی شرح ساٹھ سے اسی فی صد تک ہوگئی تھی۔یورپی ملکوں میں خواندگی اور اسکولوں کی تعداد میںا ضافے کی وجہ سے مطالعے کا ایک جنون ساہوگیا۔لوگوں نے کتابیں پڑھناچاہیں اور پرنٹرس نے روزافزوں بڑھتی ہوئی تعداد میں کتابیں تیار کرنا شروع کردیں۔

مقبول ادب کی مختلف اصناف طبع شدہ شکلوں میں سامنے آئیں جن کا ہدف نئے پڑھنے والے تھے۔کتب فروشوں نے پھیری والے ملازم رکھے جو چھوٹی چھوٹی کتابیں بیچنے کے لیے گاؤں گاؤں گھومے۔ان کتابوں میں لوک کہانیاں تھیں داستانیں اورجنتریاں  تھیں۔مگر مطالعاتی مواد کی دوسری قسمیں،محض تفریح کے لیے،عام پڑھنے والے تک پہنچنا شروع ہوگئیں۔انگلستان میں ایک پینی قیمت والیChapbooks پھیری والے بیچتے پھرتے تھے۔یہ پھیری والے Chapman کے نام سے جانے جاتے ہیں۔کتاب کی قیمت ایک پینی ہوتی تھی اس لیے ہر کس و ناکس اسے خریدسکتا تھا۔فرانس میں’Biliotheque Bleue‘تھیں۔ان کتابوں کی قیمت بہت کم ہوتی تھی،خراب کاغذ پر چھپی ہوئی ہوتی تھیں اور ان کا کورَ سستے نیلے رنگ کے کاغذ کا ہوتا تھا۔پھر چار سے چھ صفحات پر چھپی ہوئی عشقیہ کہانیاں ہوتی تھیں۔کچھ بہتر صورت میں تاریخ کی کتابیں ہوتی تھیں جو عام طورپر ماضی کی کہانیوں پر مشتمل ہوتی تھیں۔کتاب کے سائز مختلف ہوتے تھے اور یہ بہت سے مختلف مقاصد کو پورا کرتی تھیں اور مختلف ذوق شوق کو تسکین دیتی تھیں۔

حالات حاضرہ کی معلومات کو تفریح سے ملاتے ہوئے پریس اوائل 18ویں صدی سے فروغ پذیر ہوا۔اخباراور رسالے جنگ اور تجارت کی خبریں لائے ساتھ ہی دوسرے مقامات پر ہونے والی ترقیوں کی خبروں سے بھی آگاہ کیا۔

اسی طرح سائنس دانوں اور فلسفیوں کے نظریات اب عام لوگوں تک آسانی سے پہنچنے لگے۔قدیم اور قرون وسطیٰ کے سائنسی متون کی ترتیب وتدوین ہوئی اور انھیں شائع کیا گیا۔نقشے اور سائنس کے ڈائی گرام چھپے۔جب اسحاق نیوٹن جیسے سائنس دانوں نے اپنی دریافتوں کو شائع کرنا شروع کیا تو وہ سائنسی سوچ رکھنے والے قاریوں کے ایک بڑے حلقے کو متاثر کرسکے۔تھامس پین،والٹیر اور زان ژاک روسو جیسے مفکرین بھی زیادہ چھپے اور زیادہ پڑھے گئے۔اور اس طرح سائنس ،استدلال اور تعقل کے بارے میں ان کے خیالات نے عام لٹریچر میں راہ پائی۔

18ویں صدی کے وسط تک ایک عام یقین یہ پیدا ہوگیاتھا کہ کتابیں ترقی اور روشن خیالی پھیلانے کا ایک ذریعہ ہیں۔بہت سے لوگ ماننے لگے تھے کہ کتابیں دنیا کو بدل سکتی ہیں۔سماج کو آمریت اورظلم وجبر سے نجات دلاسکتی ہیں اور ایک ایسے عہد کی خوش خبری سنا سکتی ہیں جب تعقل اور استدلال کی حکمرانی ہوگی۔18ویں صدی میں ایک فرانسیسی ناول نگار لوئی سباستین مرسیر نے کہاتھا’’پرنٹنگ پریس،ترقی کا توانا ترین انجن ہے اور رائے عامہ وہ قوت ہے جو آمریت اور مطلق العنانی کو بہالے جائے گی۔‘‘مرسیر کے بہت سے ناولوں میں ہیرو کتابیں پڑھ پڑھ کر بدل جاتے ہیں۔وہ کتابوں کو حریصانہ دیکھتے ہیں کتابوں کی پیدا کی ہوئی دنیا میں گم ہوجاتے ہیں اور اس سارے عمل سے وہ روشن خیال ہوکر نکلتے ہیں۔روشن خیالی لانے اورمطلق العنانی کی بنیادوں کو تباہ کردینے کی کتابوں کی طاقت پر کامل یقین کے بعد مرسیر نے اعلان کیا

"!Termble,therefore, tyrants of the world! Tremble the virtual writer!"

بہت سے مورخین کا کہنا ہے کہ پرنٹ کلچر نے ایسے حالات پیدا کیے جن میں فرانس کا انقلاب رونما ہوا۔کیا ہم ان دونوں کے درمیان کوئی ایسا رشتہ قائم کرسکتے ہیں؟

عموماً تین قسم کے دلائل پیش کیے گئے:

اول:طباعت نے روشن خیال مفکرین کے خیالات کو مقبول بنادیا۔اجتماعی طورپر ان کی تحریروں نے روایت، توہم پرستی اور مطلق العنانی پر تنقیدی رائے فراہم کی۔انھوں نے رسوم ورواج کے بجائے تعقل کی حکمرانی کے حق میں رائے دی۔اور مطالبہ کیا کہ ہر چیز کو عقلیت اور استدلال کی کسوٹی پر پرکھا جانا چاہیے۔انھوں نے چرچ کے مقدس تحکم و اختیار پر اور ریاست کی جابرانہ قوت پر حملہ کیا اور اس طرح روایت پر مبنی ایک سماجی نظام کے جواز کو رفتہ رفتہ ختم کردیا۔والسیٹراور روسو کی تحریریں بڑے پیمانے پر پڑھی گئیں اور جن لوگوں نے انھیں پڑھا انھوں نے دنیا کو نئی آنکھوں سے دیکھا،آنکھیں جو سوال کرتی تھیں،جو نکتہ چیں تھیں اور جو عقلیت پسندتھیں۔

دوم:پرنٹ نے بات چیت اور بحث وتمحیص کا ایک نیاکلچر پیدا کیا۔تمام قدروں،معیاروں اور اداروں کی قدروقیمت کا پھرسے جائزہ لیاگیا اور ایسے عوام نے ان پر بحث ومباحثہ کیا جو استدلال کی قوت سے آگاہ ہوچکے تھے اور مروجہ نظریات وعقائد پر سوال اٹھانے کی ضرورت کو تسلیم کرچکے تھے۔اس عوامی کلچر میں سماجی انقلاب کے نئے خیالات وجود میں آئے۔

سوم:1780تک ایسے ادب کی بھرمار ہوچکی تھی جس نے شاہانہ مناصب کا مذاق اڑایا اور ان کی اخلاقیات پر تنقیدکی۔اس عمل کے دوران اس نے سماجی نظام کے بارے میں بھی سوالا ت اٹھائے۔کارٹونوں اور خاکوں میں دکھایا گیا کہ بادشاہت صرف جنسی عیاشیوں میں ڈوبی رہی جب کہ عام آدمی شدید مصائب اور دشواریوں کا شکار رہا۔یہ ادب خفیہ طورپر تقسیم ہوااور اس نے بادشاہت کے خلاف معاندانہ جذبات کے فروغ کی طرف رہنمائی۔ کی ان دلائل کے بارے میں ہمارا کیا خیال ہے؟اس باب میں کوئی شبہ نہیں کہ پرنٹ خیالات ونظریات کی ترسیل میں مدد کرتا ہے۔مگر ہمیں یہ یادرکھنا چاہیے کہ لوگوں نے صرف ایک قسم کا ادب ہی نہیں پڑھا انھوں اگر والٹیر اور روسو کے خیالات پڑھے تو دوسری طرف بادشاہی اور چرچ کے پروپیگنڈے کے روبرو بھی ہوئے۔ہر اس چیز سے جو انھوں نے دیکھی یا سنی وہ براہِ راست متاثر نہیں ہوئے۔کچھ خیالات کوانھوں نے قبول کیا اور کچھ کورد …انھوں نے چیزوں کی تاویل اپنے اندازسے کی۔پرنٹ نے براہِ راست ان کے ذہنوں کو نہیں بنایامگرہاں مختلف انداز میں سوچنے کے امکانات ضرور پیدا کیے۔

5.1  بچے، عورتیں اور کامگار

سترھویں صدی سے کتابیں دینے والی لائبریریاں وجود میں آچکی تھیں۔ 19 ویں صدی میں انگلستان میں کتابیں دینے والی یہ لائبریریاں ذہنی کام کرنے والے کامگاروں، دستکاروں اور نچلے متوسط طبقے کے لوگوں کی تعلیم کا ایک ذریعہ بن چکی تھیں۔ کبھی کبھی ورکنگ کلاس کے خود تعلیم حاصل کرنے والے ان لوگوں نے خود اپنے لیے لکھا۔وسط 19 ویں صدی کے بعد جب کام کے گھنٹوں میں بتدریج کچھ کمی ہوئی تو کام کرنے والوں کو ذاتی ترقی اور اظہار ذات کے لیے کچھ وقت ملنے لگا۔ ان لوگوں نے بڑی تعداد میں سیاسی مضامین اور خود نوشت سوانح لکھیں۔

5.2   مزید اختراعات

آئیے اب ہم یہ دیکھیں کہ ہندوستان میں طباعت یعنی پرنٹنگ کب شروع ہوئی اور طباعت کے زمانے سے قبل خیالات و معلومات کیوں کر ضبط تحریر میں آتی تھیں۔

سنسکرت، عربی، فارسی اور دوسری دیسی زبانوں کے قلمی یعنی ہاتھ سے لکھے ہوئے مسودات کی ہندوستان میں بڑی معقول اور قدیم روایت ہے۔ مسودات تاڑ کے پتوں پریا ہاتھ سے بنائے ہوئے کاغذ پر نقل کیے جاتے تھے۔ کبھی کبھی صفحات کی بڑی خوبصورت آرائش ہوتی تھی۔ محفوظ رکھنے کے لیے انہیں یا تو لکڑی کے کورَ میں دباکر رکھا جاتا تھا یا پھر کئی صفحات کو ملاکر سی دیا جاتا تھا۔ 19 ویں صدی کے آخر تک، طباعت  کے متعارف ہونے کے کافی بعد تک مسودات بدستور تیار ہوتے تھے۔

مسودات بہر حال بڑے قیمتی اور انتہائی نازک ہوتے تھے، انہیں بڑی احتیاط کے ساتھ استعمال کرناہوتا تھا، ان کا پڑھنا بھی آسان نہیں ہوتا تھا کیوں کہ رسم الخط مختلف انداز کا ہوتا تھا اسی لیے روز مرہ کی زندگی میں ان کا استعمال کچھ بہت نہیں ہوتا تھا۔ نوآبادیاتی عہد سے قبل کے بنگال نے اگرچہ دیہی پرائمری اسکولوں کا ایک خاصا بڑا جال پھیلا رکھا تھا مگر بچے عموماً متن پڑھتے نہیں تھے۔ وہ صرف لکھنا سیکھتے تھے۔ استاد متن کے کچھ حصے اپنی یاد داشت سے املا کرادیتے تھے اور طالب علم اسے لکھ لیتے تھے۔ اس طرح بہت سے لوگ کسی قسم کا کوئی بھی متن پڑھے بغیر خواندہ ہوجاتے تھے۔

ہندوستان میں پرنٹنگ پریس 16 ویں صدی کے وسط میں گوا میں پرتگالی مشنریوں کے ساتھ آیا۔ جیسوئٹ پادریوں نے کونکی زبان سیکھی اور متعدد چھوٹے چھوٹے رسالے چھاپے۔ 1674 تک کونکنی اور کنارا (Kanara) زبانوں میں تقریباً 50 کتابچے چھپ چکے تھے۔ کیتھولک پادریوں نے پہلی تامل کتاب کوچین میں 1579 میں چھاپی اور 1713 میں پہلی ملیالم کتاب بھی ان ہی لوگوں نے طبع کی۔ 1710 تک پروٹسٹنٹ مشنریوں نے 32 تامل متون شائع کردیے تھے ۔ ان میں بہت سے پرانی کتابوں کے ترجمے تھے۔

ہندوستان میں انگریزی پریس بہت بعد تک بھی کچھ بہت ترقی نہیں کرسکا حالانکہ ایسٹ انڈیا کمپنی نے 17ویں صدی کے آخر سے پریس کی مشینیں درآمد کرنا شروع کردی تھیں۔

1780 سے جیمس آگسٹس ہِکے نے ایک ہفتہ وار اخبار’’بنگال گزٹ‘‘ کی ادارت سنبھالی۔   ہفتہ وار نے اپنے بارے میں اعلان کیا ’’ایک کمرشیل پیپر سب کے لیے مگر کسی کے اثر میں نہیں‘‘ یہ ایک نجی انگلش مہم تھی، نوآبادیاتی اثرات سے اپنی آزادی پر مفتخر یہ آغاز تھا ہندوستان میں انگلش پرنٹنگکے لیے۔ ہِکے نے بے شمار اشتہارات شائع کیے۔ ان میں وہ اشتہارات بھی ہوتے تھے جن کا تعلق غلاموں کی خریدو فروخت سے تھا۔ مگر اُس نے ہندوستان میں کمپنی کے اعلیٰ افسروں کے بارے میں بھی بڑی بے سروپا باتیں چھاپیں۔ اس سے ناراض ہوکر گورنر جنرل وارن ہیسٹنگس نے اسے بہت پریشان کیا اور سرکاری منظوری سے نکلنے والے اخباروں کی اشاعت کی ہمت افزائی کی جو ایسی خبروں کے سیلاب پر بند باندھ سکیں جو نوآبادیاتی حکومت کی شبیہ کو داغ دار کرتی تھیں۔ 18 ویں صدی کے اختتام تک متعدد اخبار اور رسالے چھپ کر سامنے آئے۔ ہندوستانی لوگ بھی تھے جنہوں نے ہندوستانی اخبار نکالے۔ اس طرح نکلنے والوں میں پہلا اخبار گنگادھر بھٹاچاریہ کا بنگال گزٹ، تھا۔ بھٹا چاریہ رام موہن رائے کے بہت قریب تھے۔

18 ویں صدی کے اوائل سے، جیسا کہ آپ جانتے ہیں مذہبی مسائل پر شدید بحثیں چل رہی تھیں۔ مختلف گروپوں نے اُن تبدیلیوں کو چیلنج کیا جو مختلف انداز میں نوآبادیاتی سماج کے اندر ہورہی تھیں اور مختلف مذاہب کے عقائد کی نئی نئی متنوع تاویلات کیں۔ کچھ لوگوں نے موجودہ رسوم و رواج پر تنقید کی اور اصلاح کی مہم چلائی۔ جب کہ کچھ اور لوگ تھے جنہوں نے ان مصلحین کے دلائل کی مخالفت کی۔ یہ بحثیں عوامی اجتماعات میں بھی ہوئیں اور اخباروں میں بھی۔ مطبوعہ رسالوں اور اخباروں نے نہ صرف یہ کہ نئے خیالات کو پھیلایا بلکہ انہوں نے بحث کی نوعیت کو ایک شکل دی۔اب ان مباحثوں میں عوام کی بڑی تعداد شریک ہوسکتی تھی اور اپنے خیالات کا اظہار کرسکتی تھی۔ آراکے اس ٹکراؤ سے نئے نظریات اور نئے خیالات سامنے آئے۔

یہ وقت سماجی اور مذہبی مصلحین اور ستی کی رسم، توحید، برہمنوں کی Priesthood اور بت پرستی جیسے مسائل پر ہندو قدامت پرستی کے درمیان زبردست تنازعات کا تھا۔ بنگال میں، جوں جوں بحث آگے بڑھی متنوع دلیلوں اور توجیہوں کی ترویج و تبلیغ کرنے والے رسالوں اور اخباروں کا انبار لگ گیا۔ زیادہ سے زیادہ لوگوں تک پہنچنے کے لیے خیالات کا اظہار عام آدمی کی بول چال کی زبان اور اس کے روز مرہ میں ہوا۔ رام موہن رائے نے 1821میں’’سمباد کو مدی‘‘ شائع کی اور ہندوقدامت پرستی نے ’’سماچار چندریکا‘‘ سے ان کے خیالات کا توڑ کرنے کا کام لیا۔ 1822 سے دوفارسی اخبار ’’جام جہاں نما‘ اور’ شمس الاخبار‘ شائع ہوئے۔ اسی سال ایک گجراتی اخبار ’بمبئی سماچار‘ سامنے آیا۔

شمالی ہندوستان میں، مسلم پشتینی سلطنتوں کی مسماری پر علمابہت پریشان تھے۔ انہیں خوف تھا کہ نوآبادیاتی حکمراں تبدیل مذہب کی ہمت افزائی کریں گے اور مسلم پرسنل لاکو تبدیل کریں گے۔ اس کے تدارک کے لیے ان لوگوں نے سستے لیتھو گراف پریسوں کو استعمال کیا اور مقدس کتابوں کے اردو اور فارسی ترجمے شائع کیے، مذہبی اخبارات اور رسالے نکالے۔ دیوبند مدرسے نے جو 1867  میں ہزاروں فتوے شائع کیے جن میں مسلمان قاری کو بتایا گیا تھا کہ اسے اپنی قائم روزانہ زندگی کس طرح گزارنا چاہیے۔ ساتھ ہی اسلامی ہدایات کے مطالب کی وضاحت بھی ہوا تھا کی 19 ویں صدی کے پورے عرصے میں بہت سے مذہبی مسالک اور مدرسے قائم ہوگئے۔ ہر عقیدہ ایک نئی تاویل کے ساتھ اپنے پیروؤں کی تعداد کو بڑھانے کے لیے کوشاں اور مخالفین کے اثر کی تکذیب میں لگا ہوا تھا۔ اس لڑائی کو عوام کے بیچ لڑنے میں اردو پریس نے  بڑی مدد کی۔

ہندوؤں میں بھی پریس نے مذہبی متون کے مطالعہ کی ہمت افزائی کی خصوصاً مقامی زبانوں میں۔ تلسی داس کا رام چرترمانس‘ 16 ویں صدی کا ایک متن، 1810 میں کلکتے سے شائع ہوا۔ 19 ویں صدی کے وسط تک ہندوستانی بازار سستے لیتھوگرافک اڈیشنوں سے اٹا پڑا تھا۔ 1880 سے لکھنؤ میں نولکشور پریس اور بمبئی میں شری وینکٹیشورپریس نے مقامی زبانوں میں بے شمار مذہبی متون چھاپے۔ ہلکے اور چھپے ہوئے ہونے کی وجہ سے عقیدت مند ان کو آسانی سے اور ہر جگہ اور ہر وقت پڑھ سکتے تھے۔ انھیں مردوں اور عورتوں کے بڑے گروپوں کے سامنے بہ آواز بلند بھی پڑھا جاسکتا تھا۔

اس لیے مذہبی متون لوگوں کے ایک بہت بڑے حلقے تک پہنچے انھوں نے مذہب کے اندر اور مذاہب کے مابین تبادلہ خیال اور بحث مباحثے کے مواقع فراہم کیے ساتھ ہی تنازعات بھی پیدا کیے۔

طباعت نے سماجکے درمیان محض آراکے اختلاف کی اشاعت نہیں کی بلکہ اس نے ہندوستان کے مختلف حصوں میں فرقوں اور لوگوں کو باہم ملایا بھی۔ اخبار ایک جگہ سے دوسری جگہ خبریں لے گئے اور اس طرح انھوں نے ایک کل ہندشناخت پیدا کی۔

پرنٹنگ نے تحریر کی نئی نئی قسموں کے لیے بھوک بڑھادی۔ اب زیادہ سے زیادہ لوگ پڑھنے کے قابل تھے۔ ان کی خواہش تھی کہ وہ ان تحریروں میں اپنی زندگی، اپنے تجربات اپنے جذبات اور اپنے رشتوں کی عکاسی دیکھیں۔ ناول، ادب کی ایک صنف ، جس نے یورپ میں فروغ پایا تھا لوگوں کی اس ضرورت کی تکمیل بڑی حسن و خوبی سے کرتا تھا۔ ناول نے جلدی ہی خالص ہندوستانی ہیئتوں اور ہندوستانی اسٹائل کو حاصل کرلیا۔ پڑھنے والوں کے لیے اس نے تجربات کی ایک دنیا دکھائی اور ان میں حیات انسانی کے تنوعات کا واضح احساس پیدا کیا۔

مطالعے کی دنیا میں اور بھی ادبی اصناف داخل ہوئیں۔ شاعری، مختصر افسانہ، سماجی اور سیاسی مسائل سے متعلق مضامین۔ ان سب نے ، ایک مختلف انداز میں انسانی زندگی،سماج اور سیاست کی صورت گری کرنے والے اصولوں کے بارے میں نجی اور ذاتی احساسات کی نئی اہمیت کو مزید توانا کردیا۔

19 ویں صدی کے اختتام تک ایک نیا بصری کلچر معرض وجود میں آرہا تھا۔ بڑی تعداد میں پریسوں کے لگنے کی وجہ سے بصری شبیہوں کی بے شمار نقلیں بنانا ممکن ہوگیاتھا۔ راجا روی ورما جیسے آرٹسٹوں نے بڑے پیمانے پر نشر و اشاعت کے لیے تصویریں بنائیں۔ ووڈبلاکس بنانے والے غریب نقش نگاروں نے پریسوں کے قریب اپنی دوکانیں لگائیں۔ پرنٹرز نے انھیں اپنے یہاں ملازم بھی رکھا۔ سستی نقلوں اور کیلنڈروں کی بازاروں میں فراوانی ہوگئی۔ حتیٰ کہ غریب بھی، ان سے اپنے گھر اور اپنے کام کی جگہوں کی دیواروں کو سجانے کے لائق ہوگئے۔ ان پرنٹس نے روایت اور جدیدیت ، مذہب اور سیاست ،سماج اور کلچر کے بارے میں عوامی تصورات کو ایک شکل عطا کرنا شروع کردیا۔

1870 شروع ہوتے ہوتے رسالوں اور اخباروں میں، سماجی اور سیاسی مسائل پر رائے زنی کرنے والے خاکے اور کارٹون چھپنے لگے تھے۔ بعض خاکوں نے مغربی ذوق اور مغربی کپڑوں پر شیفتہ تعلیم یافتہ ہندوستانیوں کا مضحکہ اڑایا۔ بعض دوسرے خاکے تھے جن میں سماجی تبدیلیوں کے خوف کا اظہار کیا گیا تھا۔ امپیریل خاکے تھے جن میں قوم پرستوں کا مذاق اڑایا گیا تھا اور نیشنلسٹ کارٹون تھے جن میں امپیریل حکومت پر تنقید تھی۔

عورتوں کی زندگی اور ان کے احساسات کے بارے میں خصوصی شدت اور وضاحت کے ساتھ لکھا جانے لگا۔ عورتوں میں مطالعے کے رواج میں خصوصاً متوسط طبقے کے گھرانوں میں بے پناہ اضافہ ہوا۔روشن خیال شوہروں اور والدین نے اپنی خواتین کو پڑھانا شروع کیا اور انیسویں صدی کے وسط کے بعد جب شہروں اور قصبوں میں لڑکیوں کے اسکول کھلے تو ان لوگوں نے اپنی بچیوں کو اسکولوں میں بھیجا۔ بہت سے رسالوں نے خواتین کی لکھی ہوئی چیزوں کو شائع کرنا شروع کیا اور یہ بتانے کی کوشش کہ عورتوں کو تعلیم کیوں دی جانی چاہیے۔ ان رسالوں میں ایک نصاب اور اس سے متعلق مطالعے کے لیے مناسب مواد بھی دیا جانے لگا جو گھر میں ہونے والی تعلیم کے لیے مفید تھا۔

مگر تمام گھرانے روشن خیال نہیں تھے۔ ہندوقدامت پرست سمجھتے تھے کہ پڑھی لکھی لڑکی بیوہ ہوجائے گی، مسلمانوں کو ڈر تھا کہ لڑکیاں اردو رومانی چیزیں پڑھ کر بدچلن ہوجائیں گی۔ کبھی کبھی سرکش خواتین نے ان پابندیوں کی خلاف ورزی بھی کی۔ ہم شمالی ہندوستان کی ایک مسلم گھرانے کی ایسی لڑکی کا قصہ جانتے ہیں جس نے چھپ چھپ کر اردو پڑھنا اور لکھنا سیکھا تھا۔ اس کے خاندان والے چاہتے تھے کہ وہ صرف عربی قرآن پڑھے،جو وہ بالکل نہیں سمجھتی تھی۔ اس نے ایسی زبان پڑھنے پر اصرار کیا جو اس کی اپنی تھی۔ اوائل 19ویں صدی میں بنگال میں، ایک انتہائی قدامت پرست گھرانے میں بیاہی ہوئی راشندری دیوی نے گھر کے باورچی خانے کی تنہائی میں پڑھنا سیکھا۔ بعد کو اس نے اپنی خود نوشت سوانح عمری Amar Jiban لکھی جو 1876 میں شائع ہوئی۔ یہ پہلی طویل خود نوشت سوانح عمری تھی جو بنگالی زبان میں چھپی۔ 

سماجی اصلاحات اور ناولوں نے عورتوں کی زندگیوں اور ان کے احساسات و جذبات میں ایک عام دل چسپی پیدا کرہی دی تھی، ایک دل چسپی اس بات میں پیدا ہوئی کہ خود عورتیں اپنی زندگیوں کے بارے میں کیا کہنا چاہیں گی۔ 1860 کے بعد سے کیلاش بھاشنی دیوی جیسی بنگالی خواتین نے کتابیں لکھیں جن میں عورتوں کے تجربات کو سامنے لایا گیا تھا۔ تجربات، عورتیں گھروں میں کیسے قید تھیں، انھیں کس طرح جہالت کی تاریکی میں رکھا جاتا تھا۔ سخت گھریلو کاموں کے کرنے پر مجبور کیا جاتا تھا اور کس طرح وہی لوگ ان کے ساتھ بُرا سلوک کرتے تھے جن کی وہ خدمت کرتی تھیں۔ 1880 میں آج کے مہاراشٹر میں تارابائی شنڈے اور پنڈتارامابائی نے اونچے طبقے کی ہندوعورتوں خصوصاً بیواؤں کی بدحالی اور قابل نفرت زندگیوں کے بارے میں شدید غم و غصے کے ساتھ لکھا۔ تامل ناول میں ایک عورت نے بتایا کہ اُن عورتوں کے لیے جو سماجی رسوم و رواج اور قاعدے قانون کے بندھنوں میں جکڑی رہتی ہیں پڑھنے کا کیا مطلب ہوتا ہے۔ ’’مختلف اسباب کی بناپر میری دنیا بہت چھوٹی ہے … میری زندگی کی آدھی سے زیادہ خوشیاں کتابوں سے آتی ہیں …‘‘

19 ویں صدی میں مدراس کے شہروں کے بازاروں میں چھوٹی چھوٹی سستی کتابیں لائی گئیں جنھیں شہر کے چوراہوں پر بیچ کر بازار میں آنے والے غریب لوگوں کو انھیں خرید نے کا موقع فراہم کیا گیا۔ 20 ویں صدی کے شروع میں پبلک لائبریریاں قائم ہوئی جنھوں نے کتابو ںتک لوگوں کی رسائی کو بڑھادیا۔ اکثر لائبریریاں شہروں اور قصبوں میں تھیں اور کبھی کبھی خوش حال گاؤں میں مقامی متمول سرپرستوں کے لیے لائبریری قائم کرنا وقار حاصل کرنے کا ذریعہ تھا۔

19ویں صدی کے آخری زمانے سے چھپنے والے بہت سے رسالوں اور مضامین میں ذات پات کے امتیازات کے مسائل پر لکھنے کا سلسلہ شروع ہوا۔ نیچی ذات والوں کی اجتماعی تحریکوں کے مراٹھا سرخیل جیوتی باپھولے نے اپنے رسالے ’غلام گیری‘ (1871) میں ذات پات کے نظام کی ناانصافیوں کے بارے میں لکھا۔ 20 ویں صدی میں مہاراشٹر میں بی آر امبیڈ کر اور مدراس میں ای وی راماسوامی نائیکر (جو پیرییار کے نام سے زیادہ مشہور ہیں) نے ذات کے مسائل پر بڑے زور دار طریقے پر لکھا ۔ ان کی تحریروں کو ہندوستان بھر کے لوگوں نے پڑھا۔ مقامی احتجاجی تحریکیوں اور مختلف فرقوں نے بھی قدیم کتابوں پر تنقید کرنے والے بہت سے مقبول رسالے نکالے اور مضامین لکھے، اور ایک نئے اور منصفانہ مستقبل کا خواب دیکھا۔

فیکٹری مزدوروں پر کام کا بڑا بوجھ تھا اور اپنے تجربات کے بارے میں کچھ لکھنے کے لیے ان کے پاس تعلیم بھی کم تھی اور وقت بھی کم تھا مگر کانپور کے ایک مل مزدور کاشی بابا نے ذات اور طبقاتی استحصال کے مابین رشتوں کی نشاندہی کرنے کے لیے 1938 میں ایک کتاب ’’چھوٹے اور بڑے کا سوال‘‘ لکھی اور شائع کرائی۔ کانپور ہی کے ایک مل ورکر کی جو سدرشن چکر، کے قلمی نام سے لکھتے تھے، 1935 اور 1955 کے درمیان لکھی ہوئی نظموں کو ایک جگہ جمع کیا گیا اور ایک مجموعے ’’ساچی کو یتائیں‘‘ میں شائع کیا گیا۔ 1930 میں بنگلور کے مل مزدوروں نے بمبئی کے مزدوروں کی پیروی کرتے ہوئے خود اپنی تعلیم کے لیے لائبریریاں قائم کیں۔ اس کام میں ان کی سرپرستی سماجی کا رکنوں نے کی جو خواندگی لانے کبھی کبھی قوم پرستی کا پیغام سنانے اورحد سے گزری ہوئی شراب نوشی پر روک لگانے کی کوشش کر رہے تھے۔

1798 سے قبل ، ایسٹ انڈیا کمپنی کے ماتحت نوآبادیاتی ریاست کو سنسرشپ سے کوئی بہت سروکار نہیں تھا۔ دلچسپ بات یہ ہے کہ مطبوعہ مواد پر کنٹرول کرنے کے لیے ابتدامیں جو اقدامات کیے گئے وہ ہندوستان میں ان انگریزوں کے خلاف تھے جو کمپنی کی بدانتظامیوں پر نکتہ چینی کرتے تھے اور کمپنی کے بعض خاص افسروں کی کارگزاریوں کو ناپسند کرتے تھے۔ کمپنی کو پریشانی یہ تھی کہ ایسی تنقیدوں کو انگلستان میں ان کے ناقد ہندوستان میں تجارت پر ان کے تسلط پر حملہ کرنے کے لیے استعمال کرسکتے ہیں۔

1820 میں کلکتہ سپریم کورٹ نے پریس کی آزادی پر کنٹرول کرنے کے لیے کچھ ضوابط بنائے اور کمپنی نے ان اخباروں کی ہمت افزائی شروع کی جو برطانوی حکومت کے گن گائیں۔ 1938 میں انگریزی اور مقامی زبان کے اخباروں کے اڈیٹروں کی فوری عرضیوں کے پیش نظر گورنر جنرل بینٹک نے پریس سے متعلق قوانین پر نظر ثانی کو منظور کیا۔ ایک لبرل نوآبادیاتی افسر تھامس میکالے نے نئے قاعدے بنائے جنھوں نے پچھلی آزادیاں بحال کردیں۔

1857 کی سرکشی کے بعد پریس کی آزادی کی طرف رویہ بدلا۔ تلملائے ہوئے انگریزوں نے دیسی پریس پر شکنجہ مزید کسے جانے کا مطالبہ کیا۔ مقامی زبانوں کے اخبار چونکہ زیادہ اصرار کے ساتھ نیشنلسٹ ہوئے اس لیے نوآبادیاتی حکومت نے کنٹرول کے زیادہ سخت اقدامات پر بحث شروع کی۔ 1878 میں ورناکیولر پریس ایکٹ آئرشن پریس لاز کے نمونے پر پاس ہواتھا۔ اس نے حکومت کو ورناکیولر پریس میں خبروں اور اداریوں کو سنسر کرنے کے وسیع اختیارات دے دیے۔ اس کے بعد سے حکومت نے مختلف صوبوں سے شائع ہونے والے ورناکیولر اخباروں پر باقاعدہ نظر رکھنا شروع کردیا۔ جب کسی خبر کو باغیانہ قرار دے دیا جاتا تو اخبار کو خبردار کیا جاتا اگر یہ تنبیہ نظر انداز کی جاتی تو پریس پر قبضہ کیا جاسکتا تھا اور وہاں کی مشینوں کو ضبط کیا جاسکتا تھا۔

ان جبری اقدامات کے باوجود ، نیشنلسٹ اخبارات کی تعداد میں ملک کے تمام حصوں میں اضافہ ہوا۔ ان اخباروں نے نوآبادیاتی بدانتظامیوں کی خبریں چھاپیں اور قوم پرستانہ سرگرمیوں کی ہمت افزائی کی۔ نیشنلسٹ نکتہ چینی کا گلاگھونٹنے کی کوششوں نے عسکری احتجاج اکسایا۔ اس کے رد عمل کے طور پر آزار پہنچانے اور احتجاج کرنے کا ایک سلسلہ شروع ہو گیا۔ جب 1907 میں پنجاب کے انقلابیوں کو ملک بدر کیا گیا تو بال گنگا دھر تلک نے اپنے اخبار کیسری میں ان کے بارے میں بڑے ہمدردانہ انداز میں لکھا۔ اس تحریر کی پاداش میں انھیں1908 میں جیل میں ڈال دیا گیا جس کے جواب میں سارے ملک میں احتجاج ہوئے۔

اختصار کے ساتھ لکھیے