سلفر (Sulphur): پودے سلفر کو سلفیٹ  کی صورت میں جذب کر لیتے ہیں۔ سلفر دو امینوں ایسڈز   سسٹین اور میتھائیونین میں پایا جاتا ہے۔ کافی سارے کوانزائم، وٹامنس (Thiamine, Biotin, Coenzyme A) اور فیرے ڈاکسین کااہم جزوہے۔  

جب بھی کسی لازمی عنصر کی مقدار کم ہو جاتی ہے تو پودے کا بڑھنا کم ہو جاتا ہے۔ لازمی عنصر کا وہ ارتکاز جس کے کم ہونے پر پودوں کی نشو ونما رک جاتی ہے اسے فاصل ارتکازCritical Concentration) (کہتے ہیں۔ اگرپودوں میں ان کی مقدار فاصل ارتکاز سے کم ہوجاتی ہے تو کہا جاتا ہے کہ پودے میں اس عنصر کی قلت ہے ۔چونکہ پودے میں ہر عنصر کا ایک یا ایک سے زیادہ ساختی یا فعلیاتی کردار ہیں، لہٰذا کسی ایک عنصر کی کمی ہونے سے پودے میں کچھ ساختی تبدیلیاں ظاہر ہوجاتی ہیں۔ یہ ساختی تبدیلیاں کسی عنصر کی کمی کی طرف اشارہ کرتی ہیں اور ان کوعلامات قلت(Deficiency Symptoms)کہتے ہیں۔ یہ علامات قلت مختلف عناصر کے لیے مختلف ہوتی ہیں۔ ان عناصر کی کمی کی علامت پودے میں صاف نظر آتی ہیں اور جیسے ہی اس عنصر کی مقدار بڑھائی جاتی ہے یہ علامات غائب ہو جاتی ہیں۔ لیکن اگر یہ کمی برقرار رہے تو پودا مرسکتا ہے۔ پودے کا کون سا حصہ علامت قلت کا اظہار کرے گا اس کا انحصار پودے میں عناصر کی حرکت پذیری پر ہوتا ہے۔ پودوں میں جہاں عناصر فعال طور پر حرکت پذیر رہتے ہیں اور جوان نمو پذیر بافتوں میں چلے جاتے ہیں وہاں کمی کی علامات پرانے بافتوں میں پہلے نظر آتی ہیں۔ مثال کے طور پر پوٹیشیم، نائٹروجن اور میگنیشیم کی کمی کی علامات پہلے پرانے پتوں میں نظر آتی ہیں۔ پرانے پتوں کے اندر ایسے حیاتی سالمات جن میں یہ عناصر موجود ہوتے ہیں، ٹوٹ کر انہیں نئے پتوں کو پہنچاتے ہیں۔  

پودوں میں لازمی عناصر کی کمی کی علامات یہ ہیں : کلوروسس، نیکروسس، نشوونما کا رک جانا، وقت سے پہلے پتوں اور کونپلوں کا جھڑ جانا اور خلیوں کی تقسیم میں رکاوٹ۔ کلوروسس کا مطلب ہے کلوروفل کا گھٹ جانا اور پتوں کا زرد ہو جانا۔یہ علامات ،Zn، Mn، Fe، S، Mg،K، N اور Mo کی کمی کی ہیں۔ اسی طرح سے  نیکروسس  کا  مطلب  بافتوں  کا  بے    جان  ہو جانا ہے اور یہ   K، Cu، Mg، Ca،کی کمی کی علامت ہے۔Mo،N،K،S کی کم مقدار یا عدم موجودگی کی وجہ سے خلیوں کی تقسیم رک  جاتی ہے۔مثلاً Mo،S،Nجیسے کچھ عناصر کے ارتکاز کی کمی سے پھول کافی دیر سے کھلتے ہیں ۔  

مندرجہ بالا بحث میں آپ نے دیکھا کہ کسی عنصر کی کمی کے باعث کئی علامات ظاہر ہو سکتی ہیں اور وہ   علامت ایک یا مختلف عناصر کی کمی کی وجہ سے ظاہر ہو سکتی ہے۔ لہٰذا جس عنصر کی قلت ہے اس کی پہچان کے لیے پودے کے مختلف حصوں میں ظاہر ہونے والی   تمام علامات کا مطالعہ کیا جاتا ہے اور اس کا موازنہ موجودہ معیاری جدول سے ہے۔ ہمیں یہ بھی معلوم ہونا چاہیے کہ ایک ہی عنصر کی کمی کے باعث مختلف پودوں کا رد عمل مختلف ہوتا ہے۔  

خرد مغذیات   کی ضرورت ہمیشہ کم مقدار میں ہوتی ہے۔ان کی تھوڑی سی کمی علامات قلت کی صورت میں ظاہر ہوتی ہے۔ اور ذراسی زیادتی ان میں سمیت پیدا کردیتی ہے۔ اس کا مطلب یہ ہے کہ یہ عناصر ایک چھوٹی رینج میں ہی مناسب طور پر کام کرتے ہیں۔ معدنی آئن کا وہ ارتکاز جو بافتوں کے خشک وزن میں دس فیصدی تک کی کمی کر دیتا ہے سمّی مانا جاتا ہے۔ یہ  فاصل ارتکاز مختلف خرد مغذیات میں مختلف ہوتا ہے۔ سمّی علامات کو پہچاننا بہت ہی مشکل ہے۔ کسی عنصر کی سمیت بھی ایک پودے سے دوسرے پودے میں بدلتی رہتی ہے۔ کئی بار ایسا ہوتا ہے کہ ایک عنصر کی زیادتی کی وجہ سے دوسرے عنصر کو جذب کرنے میں مشکل پیش آتی ہے۔ یہ جاننا بہت ضروری ہے کہ Mn کی کمی کی وجہ سے کلوروٹک ورید) (Chlorotic Viens کے آس پاس بھورے رنگ کے دھبے پڑ جاتے ہیں۔ Mn، Feاور Mg کے ساتھ جذب ہونے کے لیے اور Mg کے ساتھ خامروں سے جڑجانے کے لیے مقابلہ کرتا ہے۔ تنوں کے سروں میں Mn کیلشیم کے نقل وحمل کو بھی روکتا ہے۔ اس لیے Mn کی زیادتی سے لوہے Mg اور کیلشیم کی کمی ہو جاتی ہے۔ لہٰذا جو علامت ہمیں مینگنیز کی کمی کی وجہ سے نظر آتی ہے در اصل وہ لوہے، میگنیشیم اور کیلشیم کی کمی کی علامات ہیں۔ کیا یہ معلومات کسان، باغبان یا پھر خود آپ کو آپ کے اپنے باغ کے لیے کسی طور پر کام آسکتی ہے۔  

پودوں کے ذریعے عناصر کے انجذاب کی  طریقہ کار کا بیشتر مطالعہ علاحدہ خلیوں بافتوں اوراعضاپر کیا گیا ہے۔ ان مطالعوں سے معلوم ہوا کہ انجذاب کے عمل کو دو مرحلوں میں  تقسیم کر سکتے ہیں۔ پہلے مرحلے میں آین خلیوں کی خالی جگہ (ایپوپلاسٹ) میں تیزی سے داخل ہوتے ہیں، یہ عمل  غیر فعال طور پر (Passively) ہوتا ہے۔ دوسرے مرحلے میں آین سست رفتار سے خلیوں کے اندرون(Symplast) میں داخل ہوتے ہیں۔ ایپوپلاسٹ میں آینوں کی غیرفعال   حرکت عموماً آین چینلوں کے ذریعہ ہوتی ہے جوٹرانس جھلی پروٹیں ہیں اور انتخابی سوراخ کی طرح کام کرتے ہیں۔ دوسری طرف سمپلاسٹ میں آینوں کے داخل ہونے اور باہر آنے کے لیے تحویل توانائی کی ضرورت ہوتی ہے جو ایک فعال طریقہ کار ہے۔ آینوں کی حرکت کو فلکس کہتے ہیں، خلیوں کے اندر داخل ہونا انفلکس (Influx)کہلاتا ہے اور ان سے باہر نکلنا ایفلکس (Efflux)کہلاتا ہے۔ آپ پودوں میں معدنی مغذیات کے انجذاب اور ان کی پار منتقلی کے بارے میں باب 11 میں پڑھ چکے ہیں۔

معدنیاتی منحلوں کی پار منتقلی زائلم کے ذریعہ سے ہوتی ہے جو پانی کے ساتھ سریانی کھینچاؤ سے اوپر جاتے ہیں۔ اگر زائلم رس(مائع) کی جانچ کی جائے تو ان میں معدنیاتی نمک کی موجودگی ملے گی۔معدنی عناصر کے ریڈیو آئی سوٹوپس کا استعمال کرکے بھی زائیلم کے رس(مائع) میں معدنیاتی نمک کی موجودگی کا ثبوت مل جائے گا۔ آپ پہلے ہی باب11 میں زائلم میں پانی کی نقل وحمل کا ذکر کر چکے ہیں۔  

زیادہ تر معدنیات جو کہ پودے کی نشوونماکے لیے ضروری ہیں انہیں پودوں کی جڑیں چٹانوں کی فرسودگی سے حاصل کرتی ہیں۔ ان عملوں کی وجہ سے مٹی غیر نامیاتی نمکوں اور حل شدہ آینوں  سے مالا مال ہوجاتی ہے۔ چونکہ انھیں چٹانی   معدنیات سے حاصل کیا جاتا ہے لہٰذا پودوں کے تغذئیے میں ان کے رول کو معدنیاتی تغذیہ کہتے ہیں۔ مٹی میں متعدد اشیا ہوتی ہیں۔ مٹی میں صرف معدنیات ہی نہیں بلکہ نائٹروجن کو تثبیت کرنے والے بیکٹیریا بھی ہوتے ہیں۔ اس کے علاوہ مٹی میں دیگر جراثیم بھی پائے جاتے ہیں اور یہ پانی کوروک کر رکھتی ہے۔ جڑوں کو ہوا مہیا کرتی ہے اور پودے کو کھڑا رہنے میں مدد کرتی ہے۔ چونکہ لازمی معدنیات کی کمی فصل کی پیداوار کومتاثر کرتی ہے اس لیے مٹی میں فرٹیلائزر ملانے کی ضرورت پیش آ جاتی ہے۔ فرٹیلائزر میں میکرو مغذیات (N,P,K,S) اور مائکرو مغذیات(Cu,Zn,Fre,Mn) دونوں ہوتے ہیں اور انہیں حسب ضرورت استعمال کیا جاتا ہے۔

کاربن، ہائیڈروجن اور آکسیجن کے علاوہ،جانداراجسام میں نائٹروجن اہم ترین عنصر ہے۔ نائٹروجن، امینو ایسڈ، پروٹین، ہارمون، کلوروفل اور بہت سے وٹا منوں کا جز وترکیبی ہے۔ مٹی میں موجودمحدود نائٹروجن کے لیے پودے، خرد عضویوں سے مقابلہ کرتے ہیں۔ لہٰذا قدرتی اور ذراعتی ماحولیاتی نظام دونوں کے لیے نائٹروجن ایک تحدیدی مغذی ہے۔ نائٹروجن، دو نائٹروجن ایٹموں پرمشتمل ہوتی ہے جو قوی تہرے شریک گرفت بانڈ سے جڑے رہتے ہیں (N ≡ N)   نائٹروجن(N2) کا امونیا میں تبدیل ہونا کو نائٹروجنی تثبیت (Nitrogen Fixation) کہلاتاہے۔ قدرتی ماحول میں آسمانی بجلی اور الٹراوائلٹ اشعاع نائٹروجن کو نائٹروجن آکسائڈ (NO,NO2,N2O)میں تبدیل کرنے کے لیے کافی توانائی مہیا کرتے ہیں۔ نائٹروجن آکسائڈوں کے اور بھی ذرائع ہیں جیسے صنعتی احتراق جنگلوں میں لگنے والی آگ،موٹر گاڑیوں سے نکلنے والا دھواں اوربجلی گھر(پاور اسٹیشن)مردہ پودوں اور جانوروں میں موجود نامیاتی نائٹروجن کے امونیا میں تبدیل ہو جانے کو امونی فیکیشن(Ammonification)کہتےہیں۔اس میں سے کچھ امونیا بخارات کی شکل میں دوبارہ کرہ باد میں واپس لوٹ جاتی ہے لیکن زیادہ تر جراثیموں کی مدد سے نائٹریٹ میں تبدیل ہوجاتی ہے۔  

امونیاکی پہلے نائٹرائیٹ میں تکسید ہوتی ہے (Nitrococcus یا Nitrosomonas کی مدد سے) اس کے بعد پھر نائٹروبیکٹیر کی مدد سے نائٹرائٹ کی نائٹریٹ میں تکسید ہوتی ہے ۔ ان دو عملوں کو نائٹریفیکیشن کہتے ہیں۔ (شکل 12.3) ان (Nitrifying) بیکٹیریا کو کیموآٹوٹرافس کہتے ہیں۔  

اب نائٹریٹ کو پودے جذب کر لیتے ہیں اور یہ پتوں میں پہنچتاہے۔ پتوں میں اس کی امونیا میں تحویل ہوجاتی ہے جو آخر کار امینو ایسڈ کے امینوگروپ بناتے ہیں۔ مٹی میں موجود نائٹریٹ بھی ڈی نائٹریفیکیشن سے نائٹروجن میں تحویل ہوتا ہے۔ اس کام کو سوڈوموناس(Pseudomonas)اورتھایوبیسیلس (Thiobacillus) انجام دیتے   ہیں۔  

12.6.2 نائٹروجن کی حیاتیاتی تثبیت (Biological Nitrogen Fixation)