اس اکائی میں تخلیقیت کی تعریف کا تعین کیا گیا ہے، تخلیقیت کے عمل اور زندگی میں اس کے مختلف مظاہر پر بحث کی گئی ہے، اس تخلیقی جوہر کو موضوع بنایا گیا ہے جسے خدا نے ہر انسان کو ودیعت  کیا ہے۔ اس جوہرکو قائم رکھنے کے لیے مسلسل مشق اور ریاضت کی ضرورت کیوں ہوتی ہے؟    ہم اسے کس طرح مزید نکھار اور سنوارسکتے ہیں؟ ان سوالات کے جواب بھی اس اکائی میں فراہم کیے گئے ہیں۔

زمین کی تہوں میں بیج سے انکُر کا پھوٹنا کیا ہے؟ زمین کے سینے کو پھاڑ کر پیڑ کے تنے کا سر باہر نکالنا کیا کہلائے گا؟ تنے کے اندر سے شاخوں اور شاخوں سے ننھی ننھی ٹہنیوں کے پھوٹنے کو کیا نام دیا جائے گا؟ پھر انھیں نرم ونازک ٹہنیوں سے کونپلوں کا برآمد ہونا، کلیوں کا چٹکنا اور پھر ان کا پھول اور پھل کا روپ اختیار کرنا کیاہے؟ یہی تو تخلیقیت ہے۔ فطرت کا ہر ایک جزو، ہر ایک گوشہ تخلیقیت سے سرشار ہے۔ انسان خود اس خالق عظیم کا تخلیق کردہ شاہ کار ہے جس نے اسے گراں قدرتخلیقیت کا اہل بنایا ہے۔

تخلیقیت ایک داخلی رَو کا نام ہے جسے جِبِلّت سے بھی موسوم کیا جاتاہے۔ یعنی وہ صلاحیت جو خداداد کہلاتی ہے اور جسے کم یا زیادہ ہر ایک کو ودیعت کیا گیاہے۔ بہت سی جبلّتوں میں سے ایک نقل ہے۔ نقل کا عمل شعوری بھی ہوتا ہے اور غیر شعوری بھی۔ بچے میں ایک خاص عمر تک نقل کا عمل غیر شعوری ہوتا ہے۔ اسے نقل سے گہری طمانیت ملتی ہے۔ وہ نقل اس لیے کرتا ہے کہ جلد از جلد ویسا ہی بننا چاہتا ہے جیسا وہ اصل کو دیکھ رہا ہے۔ پہلے پہل اس کی نقل کی کوششوں میں ناپختگی ہوتی ہے۔ وہ مسلسل اس ادھ کچرے پن کو دور کرنے کی سعی بھی کرتا ہے۔ کبھی وہ بہت جلد کامیابی حاصل کرلیتا ہے، کبھی اسے بارہا ناکامیوں کا سامنا کرنا پڑتا ہے۔ 

اسے ہر نقل کی کوشش میں تھوڑی اکتاہٹ ہوتی ہے تو تھوڑا لطف بھی آتا ہے۔ نقل کی یہی کوشش تخلیقیت کا پہلا مرحلہ ہے۔ ہمیں یاد رکھنا چاہیے کہ کوئی بھی نقل کردہ چیز یا فن پارہ اپنے اصل سے ملتا جلتا تو ہوسکتا ہے لیکن مکمل طور پر اصل کے مطابق نہیں ہوتا۔ سوال یہ اٹھتا ہے کہ اس کے اصل کے مطابق نہ ہونے کی کیا وجہ ہے؟ اس کا ایک بڑا سبب یہ ہے کہ نقل کرنے والا خواہ بچہ ہو کہ بڑا محض عقل و شعور ہی سے کام نہیں لیتا، تخیّل سے بھی کام لیتا ہے۔ جہاں تخیل کی سرگرمی ہوگی وہاں ترکیب کا عمل بھی ہوگا۔ جہاں ترکیب کا عمل ہوگا وہاں نقل میں کچھ نہ کچھ نیا ضرور شامل ہوجاتا ہے۔ جس کے باعث وہ چیز جس کی نقل کی جاتی ہے وہ ہو بہو رنگوں یا لفظوں میں منتقل نہیں ہوتی، اسے کچھ بدلنا ضرور پڑتا ہے ۔ترکیب کے عمل کی خصوصیت ہی یہ ہے کہ اس میں بہ یک وقت کئی قوتیں کام کرتی ہیں۔ جیسے تجربہ، تخیل اور وجدان۔ یہ صلاحیتیں جن کا تعلق تخلیقیت سے ہے، کبھی سلسلہ وار واقع نہیں ہوتیں۔نقل کی وہ کوشش جو شعوری طور پر شروع ہوتی ہے، آگے چل کر غیر شعوری بن جاتی ہے۔ کبھی یہی کوشش غیر شعوری طور پر شروع ہو کر شعور کے عمل میں بدل جاتی ہے۔ کوئی پیدائش سے مصور یا موسیقار نہیں ہوتا اور نہ کوئی پیدائشی شاعر یا افسانہ نگار ہوتا ہے۔اس میں صرف تخلیقیت کا جوہر ہوتا ہے اسے پہلے پہل نقل کے عمل سے گزرنا پڑتا ہے اور نقل کے عمل کا وقفہ مشق کا وقفہ ہوتا ہے۔ جب سُر اور تال پر گرفت مضبوط ہوجاتی ہے تو ہم موسیقار بن جاتے ہیں اور جب رنگوں اور خطوط کی تمیز پیدا ہوجاتی ہے تو ہم ایک مصور کا درجہ اختیار کرلیتے ہیں۔ لفظوں کو سلیقے اور موزونیت سے جمانا آجاتا ہے تو پھر شاعر بننے میں دیر نہیں لگتی۔

تخلیقیت جب زبان میں ڈھلتی ہے تو کہانی بن جاتی ہے ، شاعری ہوجاتی ہے، ناول کا روپ لے لیتی ہے، ڈرامے کی شکل اختیار کرلیتی ہے اور زبان فکر و خیال کے اظہار میں جادو بھر دیتی ہے ، اس کی معنویت کووسعت و گہرائی عطا کردیتی ہے اور اس طرح   ایک معمولی خیال بھی زبان میں ڈھل کر کہا ں سے کہاں پہنچ جاتا ہے۔ تخلیقی زبان اور عام زبان میں یہی فرق ہوتا ہے کہ عام زبان میں صرف معلومات بہم پہنچائی جاتی ہیں جبکہ تخلیقی زبان میں لطف وانبساط بھی فراہم کیا جاتا ہے۔مثلاً جب یہ کہا جائے کہ’’میں ایک ایسی خبر لایا ہوں جسے سن کر تم چونک پڑو گے۔‘‘ تو یہ ایک عام زبان کی مثال ہوگی اور اسی بات کو جب سعادت حسن منٹو اپنی کہانی ’’نیا قانون‘‘ میں کہتا ہے ’’لا ہاتھ دے، ایسی خبر سناؤں کہ تری گنجی کھوپڑی پر بال اُگ آئیں۔‘‘تو یہ تخلیقی زبان کی مثال بن جائے گی۔