پہلا جملہ یہ بتاتا ہے کہ کسی نے کوئی بات کہی تھی جو اسے یاد دلائی جا رہی ہے۔ دوسرے جملے سے یہ ظاہر ہوتا ہے کہ کسی اور نے نہیں، ایک خاص آدمی نے یہ بات کہی تھی اور اسے یاد دلایا جارہا ہے کہ آپ نے ہی یہ بات کہی تھی۔ تیسرے جملے سے یہ ظاہر ہوتا ہے کہ کہنے والے نے کوئی اور بات نہیں کہی، یہی بات کہی تھی۔

کسی بھی جملے کو مؤثر بنانے کے لیے چند باتوں کا خیال رکھنا ضروری ہے۔

خیال کی وحدت

لفظوں کی مناسب ترتیب

لفظوں کی مناسب ترتیب سے پیدا ہونے والا تاثر/زورِ بیان

ایک جملے میں کوئی ایک بات کہی جاتی ہے۔ کبھی کبھی ایک جملے میں دو باتیں بھی آجاتی ہیں۔ لیکن بنیادی طور پر وہ مرکزی نقطے سے جڑی ہوتی ہیں۔ مثلاً درجِ ذیل جملے دیکھیے:

میں گھر جاؤں گا۔

میں ٹیکسی سے گھر جاؤں گا۔

میں گھرجانے کے لیے ٹیکسی ہی لوں گا۔

پہلے جملے میں گھر جانے کی بات کہی گئی ہے۔ یہاں ایک ہی بات کا ذکر ہے۔ دوسرے جملے میں ٹیکسی سے گھر جانے کا ارادہ ظاہر کیا گیا ہے۔ تیسرے جملے میں گھر جانے کے لیے ٹیکسی لینے کا عزم ظاہر کیا گیا ہے۔

کبھی کبھی کسی جملے میں خیال کی وحدت مجروح بھی ہوجاتی ہے۔ ایسے جملے مکمل ہونے کے باوجود اچھے جملے نہیں کہے جاسکتے، مثلاً:

’’سرسید احمد خاں1817میں پیدا ہو کر اردو کے نامور ادیب کی حیثیت سے مشہور ہوئے۔‘‘

مندرجہ بالا جملہ قواعد کے مطابق ہونے کے باوجود خیال کی وحدت نہیں رکھتا۔1817میں سرسید کا پیدا ہونا ایک بات ہے اوراردو کے نامور ادیب کی حیثیت سے ان کا مشہور ہونا دوسری بات ہے۔ دونوں باتوں کو ایک جملے میں بغیر کسی معنوی ربط کے بیان کردیا گیا ہے۔ اس کی وجہ سے جملہ ناقص ہوگیاہے۔ لکھتے وقت اس بات کا خیال رکھنا ضروری ہے کہ جملے میں کسی ایک بات پر ہی توجہ مرکوز رکھی جائے۔

 یہ آپ کی کتاب ہے۔ 

 یہ کتاب آپ کی ہے۔

آپ کی یہ کتاب ہے۔

پہلے جملے میں یہ کہا جارہا ہے کہ یہ کتاب فلاں شخص کی ہے۔ دوسرے جملے میں کتاب پر زور ہے اور بتایا جارہا ہے کہ کس کی ہے۔ تیسرے جملے میں یہ بتایا جارہا ہے کہ کوئی اور کتاب نہیں، بلکہ ’’ یہ کتاب‘‘ آپ کی ہے۔

لفظوں کی مناسب ترتیب نہ ہونے سے اور لہجے کے اتار چڑھاؤ سے معنی خبط ہوجاتے ہیں بلکہ کبھی کبھی معنی کچھ کے کچھ ہوجاتے ہیں۔مندرجہ ذیل جملہ دیکھیے:

بینک میں اپنی محنت سے اس نے جو کچھ کمایا جمع کردیا۔

اس جملے سے یہ معلوم نہیں ہوتا کہ اس نے بینک میں جو رقم جمع کی وہ بینک کی ملازمت کے دوران کمائی گئی تھی یا کہیں اور سے کمائی ہوئی رقم بینک میں جمع کی گئی ہے۔ یہ مغالطہ جملے میں لفظوں کی نامناسب ترتیب کی وجہ سے پیدا ہوا ہے۔ اس جملے کو اس طرح بھی لکھا جاسکتا ہے۔

اس نے اپنی محنت سے کمائی ہوئی رقم بینک میں جمع کردی۔

آوازوں کے مجموعے کا نام ’لفظ‘ ہے۔ ہر لفظ کے کوئی ایک یا ایک سے زیادہ معنی ہوتے ہیں۔ معنی بھی دو قسم کے ہوتے ہیں۔ ایک لغوی معنی یعنی وہ معنی جو لغت میں درج ہیں۔ دوسرے وہ جو مجازی کہلاتے ہیں جنھیں ہم استعاراتی معنی بھی کہتے ہیں۔ لفظ کو استعاراتی یا مجازی معنی میں شاعری میں استعمال کیا جاتا ہے۔ لفظ سے بڑا ’’فقرہ‘‘ ہوتا ہے جسے دو چار لفظوں پر مشتمل نامکمل جملہ بھی کہہ سکتے ہیں جیسے ’صحن کے بیچوں بیچ‘ ۔یہ ایک فقرہ ہے جو کہ ادھورا ہے۔ ادھورا اس لیے ہے کہ اس میں نہ تو اسم ہے نہ ضمیر ہے۔ جیسے میں،وہ، یہ یا احمد وغیرہ۔ اس میں ’فعل‘ بھی نہیں ہے۔ جس سے کسی کام کا ہونا ظاہر ہو،نہ یہ پتہ چلتا ہے کہ اس کام کا کس پراثر ہوا ہے۔ یعنی مفعول نہیں ہے اور نہ امدادی فعل ہے۔ ہمیں یہ بھی پتہ نہیں چلتا کہ یہ فعل کس زمانے میں واقع ہوا ہے۔ فاعل، فعل اور مفعول بھی اسی ترتیب کے ساتھ جب کسی کلام میں واقع ہوتے ہیں تو جملہ مکمل ہوجاتا ہے۔ جیسے ’صحن کے بیچوں بیچ‘ کے بجائے اگر الفاظ کی ترتیب اس طرح ہوتو اسے ہم مکمل جملہ کہیں گے:

اب یہ جملہ پورے معنی دے رہا ہے کیونکہ جملے کے اجزا ایک دوسرے کے ساتھ مربوط ہیں۔ لیکن اگر یہی جملہ اس طرح ادا کیا گیا ہو:

تو قواعد کی رو سے اسے تعقیدِ لفظی کہیں گے یعنی اجزائے کلام کا جگہ سے بے جگہ ہونا۔ تعقید کے لغوی معنی صاف بات نہ کہنے کے ہیں۔ کیفیؔ چِرَیّا کوٹی نے ایک بڑی اچھی مثال دی ہے۔ وہ کہتے ہیں ’مثلاً قاعدہ یہ ہے کہ حرفِ نافیہ (یعنی نہ) فعل سے پہلے آئے۔ ایک جملہ ہے ’’تم نہ جاؤ‘‘ معنی ظاہر ہیں کہ متکلّم( بات کرنے والا) چاہتا ہے کہ مخاطب نہ جائے۔ اب اگر اسی کو الٹ کر کہا جائے ’’ تم جاؤنہ‘‘ تویہ جملہ متکلّم کی طرف سے فوراً چلے جانے پر دلالت کرے گا۔ یعنی ’’تم جاتے کیوں نہیں۔‘‘ گویا صرف ’’ نہ‘‘ کی جگہ بدلنے سے معنی بالکل اُلٹ گئے۔ ہمیں یہ بھی یاد رکھنا چاہیے کہ جملہ دو تین لفظوں پر بھی مشتمل ہوسکتا ہے۔ جیسے ’’ تمھیں آنا تھا ‘‘یا ’’ابھی کون آیا‘‘ وغیرہ۔ ان جملوں میں بات ادھوری نہیں ہے، پوری ہوگئی ہے۔ اکثر یہ دیکھا گیا ہے کہ تعقید کے باعث بات کو سمجھنے میں دشواری ہوتی ہے یا دیر لگتی ہے۔ جیسے غالبؔ کا شعر ہے:

اس شعر کا اصل مفہوم یوں ہے کہ اگرتمھیں دل نہ دیتا تو کوئی دَم اور چین لیتا اور جو نہ مرتا تو کوئی دن اور آہ وفغاں کرتا۔

شاعری میں تعقید کی مثالیں زیادہ واقع ہوتی ہیں کیونکہ بحر کی پابندی کی وجہ سے مصرعے میں اجزائے کلام کی ترتیب کو نثری جملے کی طرح قائم رکھنا مشکل ہوتا ہے۔شعرا نے ایسے شعر بھی کہے ہیں جن میں اجزائے کلام کی ترتیب نثری جملے کی طرح قائم ہوتی ہے۔ اس طرح کی صورت ان اشعار میں زیادہ ہوتی ہے جو سہلِ ممتنع کے ذیل میں آتے ہیں، جیسے :

سہلِ ممتنع کے اشعار بظاہر سادہ ہوتے ہیں لیکن بغور پڑھنے پر پتہ چلتا ہے کہ ان کے باطن میں گہرے معنی چھپے ہیں۔

تعقید لفظی کے علاوہ تعقید معنوی کی مثالوں سے بھی اکثر سابقہ پڑتا ہے۔ اس طرح کے جملوں یا مصرعوں میں معنی ومفہوم کے اعتبار سے جو پیچیدگی یا ابہام پیدا ہوتا ہے اس کی ایک وجہ تعقید معنوی بھی ہوتی ہے جیسے غالب کے اس شعر میں تعقید معنوی کا ایک خاص سبب یہ ہے کہ شعر کا مصرعۂ اولیٰ خود مکتفی نہیں ہے۔ یعنی معنی و مفہوم کے اعتبار سے مکمل نہیں ہے۔ درمیان میں شاعر کے تخلص اسدؔنے دونوں مصرعوں میں اور دوری پیدا کردی ہے جس کی وجہ سے تعقید معنوی پیدا ہوگئی ہے اور اسی باعث شعر میں ا بہام بھی واقع ہوا ہے۔

شعر کا مطلب ہے اے اسدؔ، ہم اس قدر وصالِ یار کی فکر اور ہجر کے غم میں گرفتار ہیں کہ اب تو ہم دنیا کے غم کے لائق بھی نہیں رہے۔ یعنی نہ تو وصل کی فکر کام آئی اور نہ ہجر کا غم اور بد نصیبی کا یہ عالم ہے کہ دنیا کا غم بھی ہمیں خاطر میں لانے کے لیے تیار نہیں ہے۔

زورِ بیان سے مراد یہ ہے کہ مصنف جس کیفیت کو ظاہر کرنا چاہتا ہے، وہ پورے طور پر بیان ہو جائے، جو تصویر وہ کھینچنا چاہتا ہے، وہ واضح طور پر نظروں کے سامنے آجائے، جو کچھ بیان کرنا چاہتا ہے اس میں کوئی کمی نہ رہ جائے۔

بعض لوگ یہ سمجھتے ہیں کہ صرف اپنی تحریروں میں رعب، خوف یا شان و شوکت پیدا کرنے سے بیان میں زور پیدا ہوتا ہے، جب کہ ایسا نہیں ہے۔ اصل بات یہ ہے کہ جس تحریر میں کوئی کیفیت یا کوئی جذبہ شدّت کے ساتھ دکھایا جائے، اسے زوردار کہا جا سکتا ہے۔

ہم اپنی گفتگو یا تحریر میں لفظوں کو مختلف طریقے سے استعمال کرتے ہیں اور بعض لفظوں پر خصوصی طور پر ہمارا زیادہ زور ہوتا ہے۔ ایسا اس لیے ہوتا ہے کہ ہم اپنی بات میں زیادہ سے زیادہ اثر پیدا کرنا چاہتے ہیں یا دوسرے کو زیادہ سے زیادہ اپنی طرف متوجہ کرنا چاہتے ہیں اور اگر ہمارا مقصود تحکّم ہوتا ہے تو محض مقصد کے تحت ہمارا لہجہ بھی بدل جاتا ہے۔ یعنی جملوں ، شعروں یا بعض لفظوں کی ادائیگی میں محض مقصد کے تحت ہمارے لہجے میں بھی تبدیلی واقع ہوجاتی ہے جس سے بیان میں زیادہ زور اور اثر پیدا ہوتا ہے۔ بعض تاکیدی الفاظ کی شمولیت سے بھی جملے میں زور اور اثر پیدا ہوتا ہے۔ جیسے ہی، بھی،  ضرور، لازمی وغیرہ الفاظ سے بھی بیان میں زور پیدا کیا جاسکتا ہے۔

 کسی بات پر ہم اپنے لب ولہجے سے زور دیتے ہیں، لیکن لکھتے وقت جملے میں جو کچھ کہنا ہے لفظوں کے سہارے ہی کہنا ہے۔ اس لیے یہ جاننا ضروری ہے کہ بات کس طرح کہی جائے کہ مناسب پہلو پر قاری کی توجہ مبذول ہوجائے۔ مثلاً اگر کسی کو بہ اصرار بلانا ہے تو ایسے لفظوں کا انتخاب کرنا ہوگا کہ اصل مقصد واضح ہو جائے۔ مندرجہ ذیل جملے دیکھیے:

آپ کل تشریف لائیں۔

آپ کل ضرور تشریف لائیں۔

آپ کو کل آناہی پڑے گا۔

آپ کو کل آناہی ہے۔

یہاں الگ الگ جملے سے الگ الگ تاثر پیدا ہورہا ہے۔ مصنف یا مضمون نگار کے لیے ضروری ہے کہ اس کے سامنے اپنا مقصد واضح ہو۔ اسے معلوم ہوکہ کیا کہنا ہے اور کس طرح کا تاثر پیدا کرنا ہے۔

زور پیدا کرنے کے لیے نثر نگار بعض اوقات لفظوں کی تکرار سے بھی کام لیتا ہے۔مثلاً

اندھیرا، گہرا اندھیرا ، ہر چیز اندھیرے میں ڈوبی ہوئی تھی۔

سناٹا — ایک بیکراں سناٹا ہر سمت پھیلا ہوا تھا۔

آئیے، آئیے، تشریف لائیے۔

جائیے، جایئے، بے وفا ہوجائیے۔

کبھی کبھی زور پیدا کرنے کے لیے ہم اس طرح کے جملے بھی کہتے ہیں:

اس کا کون ہے ، کوئی بھی تو نہیں۔

وہ تنہا چلا آرہا تھا، تھکن سے نڈھال، بھوکا پیاسا!

جب ہم اپنے خیالات کا اظہار کرتے ہیں تو ایک کے بعد دوسرے جملے آتے چلے جاتے ہیں۔ یہ جملے آپس میں مربوط ہوتے ہیں اور ہمارے سلسلۂ خیال کو آگے بڑھانے کا کام کرتے ہیں۔ لکھتے وقت بھی یہی صورت ہوتی ہے۔

مصنف یا مضمون نگار جس طرح اپنی بات جملوں میں مکمل کرتا ہے، اسی طرح وہ اپنے خیالات کو بھی مختلف حصوں میں بانٹ کر ادا کرتا ہے۔ وہ ساری باتیں ایک ساتھ نہیں کہتا یا تمام باتیں بغیر کسی ترتیب کے نہیں کہتا بلکہ اسے معلوم ہوتا ہے کہ کون سی بات پہلے کہنی ہے اور کون سی بعد میں۔ اسی طرح اسے یہ بھی معلوم ہوتا ہے کہ تحریر کا کون سا حصہ دوسرے حصّے سے الگ کیا جاسکتا ہے۔ یعنی مضمون نگار حسبِ ضرورت اپنے مضمون کو کئی حصّوں میں تقسیم کرلیتا ہے۔ ایک سلسلے کے جملے وہ ایک ساتھ لکھ کر ایک پیراگراف مکمل کرتا ہے۔ پھر اسی سلسلۂ کلام کی دوسری باتیں الگ پیراگراف سے شروع کرتا ہے۔ اس سے پڑھنے والے کو بھی سہولت ہوتی ہے اور لکھنے والے کو بھی۔ اس طرح ہم کہہ سکتے ہیں کہ :

 یہ خیالات کو ترتیب وار پیش کرنے کا ایک ذریعہ بھی ہے۔ اس کے ذریعے قاری تفہیم کے مراحل آسانی سے طے کرلیتا ہے۔

مصنف کے لیے ضروری ہے کہ اسے پیراگراف کی مناسب تقسیم کا ہنر آتا ہو۔ یہ نہیں کہ جب چاہا، نیا پیراگراف شروع کردیا اور جہاں چاہا ختم کردیا۔

تکمیلِ خیال

مربوط اور مرتب جملے

مناسب تاثر

تنّوع

تکمیلِ خیال

ہر پیراگراف میں موضوع کے کسی ایک پہلو سے متعلق خیالات کا اظہار کیا جاتا ہے۔ خیال کی تکمیل کے ساتھ ہی پیراگراف مکمل ہوجاتا ہے۔

مربوط اور مرتّب جملے

پیراگراف کے جملوں کا باہم مربوط ہونا ضروری ہے۔ ایک پیراگراف ختم ہو تو دوسرے پیراگراف سے خیال کا ربط بھی ظاہر ہونا ضروری ہے۔ یعنی یہ معلوم ہو کہ ایک بات مکمل ہوگئی ۔اب اس سلسلے کی دوسری بات دوسرے پیراگراف سے شروع ہورہی ہے۔

ہر پیراگراف سے ایک تاثر پیدا کرنا مقصود ہوتا ہے۔ یہ تمام تاثرات مل کر مجموعی تاثر کی تکمیل کرتے ہیں۔

مختلف پیراگراف سے مضمون میں ایک طرح کا تنوع پیدا ہوتا ہے۔ یہ اندازہ ہوتاہے کہ پورے مضمون میں ایک ہی بات نہیں کہی گئی ہے بلکہ موضوع کے دائرے میں رہ کر مصنف نے مختلف پہلوؤں کا جائزہ لیا ہے۔

ایک ہی بات کئی طرح سے کہی جاسکتی ہے۔ کہنے کا یہ ڈھنگ جس حد تک متاثر کن یا دل کش ہوگا، سننے والے پر اس کا اتنا ہی اچھا اثر پڑے گا۔ بعض لوگ باتیں کرتے ہیں تو جی چاہتا ہے بس ان کی گفتگو سنتے ہی رہیے۔ بعض اساتذہ اپنے اندازِ بیان سے سبق کو اس قدر دلچسپ بنادیتے ہیں کہ طلبا کو ان کی کلاس کا انتظار رہتا ہے۔

اسالیبِ بیان کے حوالے سے یہ بات بھی یاد رکھنے کی ہے کہ ایک موقع پر جو اسلوبِ بیان نہایت مناسب ہے، بہت ممکن ہے کہ دوسرے موقع کے لیے وہ اتنا مناسب نہ ہو۔ اس لیے کہتے ہیں کہ موقع و محل کے لحاظ سے طرزِ بیان اختیار کرنا چاہیے۔ مصنف کے لیے تو یہ جاننا اوربھی ضروری ہے کہ کون سی بات کس ڈھنگ سے لکھی جائے۔ بعض اہم اسالیبِ بیان یہ ہیں:

اسے عام استعمال کی زبان بھی کہہ سکتے ہیں۔ ہم عام طور پر اپنے معمولات کا اظہار اسی سادہ اسلوب میں کرتے ہیں۔ عام خیالات اور ضرورتوں کے اظہار کے لیے جب عام فہم زبان اور سیدھاسادہ اندازِ بیان اختیار کیا جائے تو اسے سادہ اسلوب کہیں گے۔ اس اسلوب میں مشکل الفاظ، تراکیب، تشبیہات واستعارات کا استعمال کم سے کم کیا جاتا ہے۔ بات  گھما پھرا کر یا اشارے کنایے میں نہیں کہی جاتی۔ اس میں نہایت وضاحت اور قطعیت کے ساتھ خیالات پیش کیے جاتے ہیں۔ اس طرح کی نثر واضح، سادہ اور آسانی سے سمجھ میں آنے والی ہوتی ہے۔ یہ اندازِ بیان عموماً کاروباری معاملات یا عام قارئین تک خیالات کی ترسیل کے لیے اختیار کیا جاتا ہے۔ سادہ اسلوب کی مثال کے طور پر درجِ ذیل عبارت پیش کی جاسکتی ہے:

بعض اوقات مصنف قاری کو متاثر یا مرعوب کرکے اسے اپنا ہم خیال بنانا چاہتا ہے۔ ایسے موقعوں پر وہ عام طور سے خطیبانہ اسلوبِ بیان اختیار کرتا ہے۔ اس اسلوب میں سادہ زبان استعمال نہیں کی جاتی۔ اس کے لیے پُر زور اندازِبیان اور بھاری بھرکم الفاظ و تراکیب کاانتخاب کیا جاتا ہے۔ قارئین کے جذبات واحساسات کو ابھارنے کی بھی کوشش کی جاتی ہے اور حسبِ ضرورت قاری کو براہ ِراست مخاطب کرکے بات کہی جاتی ہے۔ ابوالکلام آزاد کی نثر اس طرزِ بیان کی عمدہ مثال ہے: