غزلیات

غزل

’’ غزل‘‘ کا رویاتی مفہوم ہے محبوب سے باتیں کرنا یا عورتوں سے باتیں کرنا۔ عام طورپر غزل میں حسن وعشق کے مضامین بیان کے جاتے ہیں، لیکن اس میں شروع سے ہی دوسرے مضامین بھی داخل ہوتے گئے۔ اب غزل میں تقریباً ہر طرح کی باتیں بیان ہوتی ہیں۔ فلسفیانہ باتیں، سیاسی واقعات ، مسائل ، عام انسان کی زندگی کے درپیش تجربے، تصوف کے مضامین ، یہ سب غزل کے اشعار میں جگہ پاسکتے ہیں۔ غزل آج بھی اردو کی مقبول صنفِ سخن ہے اور اس کے شائقین میں عام لوگوں کی اکثریت ہے۔ اِ س کا ہر شعر مفہوم کے اعتبار سے اپنے آپ میں مکمل ہوتا ہے ۔ 

اپنی ہیئت کے لحاظ سے یہ ایک انوکھی صنف ہے ۔ اردو کے پہلے فارسی میں غزل کی صنف نے غیر معمولی مقبولیت حاصل کی تھی۔ قدیم عربی شاعری میں قصیدے کے ابتدائی اشعار میں بعض شعر عشقیہ یا بہاریہ ہوتے تھے۔ قصیدے کا پہلا حصہ ’’ تشبیب‘‘کہلاتا ہے۔ رفتہ رفتہ تشبیب کے اشعار آزادانہ بھی کہے جانے لگے ۔ اس طرح ایک نئی صنف غزل وجود میں آئی ۔ 

جس طرح غزل میں مضامین کی قید نہیں ہے اسی طرح اشعار کی تعداد بھی مقرّر نہیں ۔ عام طور پر غزل میں پانچ یاسات شعر ہوتے ہیں ۔ لیکن بعض غزلوں میں اس سے زیادہ اشعار بھی ملتے ہیں۔ کبھی کبھی ایک ہی ردیف وقافیے میں شاعر ایک سے زیادہ غزلیں کہہ دیتا ہے۔ ایسی غزلوں کو ’دوغزلہ‘، ’سہ غزلہ‘ وغیرہ کہا جاتا ہے ۔ 

غزل کا پہلا شعر’’مطلع‘‘ کہلاتا ہے۔ جس کے دونوں مصرعے ہم قافیہ ہوتے ہیں۔ مطلعے کے بعد دوسرا مطلع بھی ہوسکتاہے۔ اس کو ’’ حسن مطلع‘‘ کہتے ہیں۔ غزل کے آخری شعر میں شاعر اپنا تخلّص استعمال کرتا ہے۔ اس شعر کو ’’مقطع‘‘ کہتے ہیں۔ غزل کا سب سے اچھا شعر ’’بیت الغزل‘‘ یا ’’شا ہ بیت ‘‘ کہلاتاہے۔ جس غزل میں ردیف نہ ہو اور صرف قافیے ہوں وہ غیر ’’مردّف‘‘ کہلاتی ہے۔ جس بحر ، ردیف اور قافیہ کے تحت غزل کہی جاتی ہے، اسے غزل کی ’’ زمین‘‘ سے تعبیر کرتے ہیں۔ 

(1722-1810)

میر تقی میرؔآگرہ ( اکبر آباد) میں پیدا ہوئے۔ وہ دس برس کے تھے جب ان کے والد محمد علی عرف علی متّقی کا انتقال ہوگیا۔ لہذا وہ آگرہ سے دہلی منتقل ہوگئے۔ اپنے سوتیلے ماموں اور اُردو فارسی کے معروف عالم سراج الدین علی خانِ آرزو کے ساتھ قیام رہا اور اُن سے علمی وادبی فیض اٹھایا ۔ دہلی میں ہی ان کی ملاقات سید سعادت علی امروہوی سے ہوئی جنھوں نے میر کو اردو میں شعر گوئی کی طرف راغب کیا۔ 1782میں نواب آصف الدولہ کی دعوت پر وہ لکھنؤ چلے گئے اور وہیں ان کا انتقال ہوا۔ 

غزل

                                             (میر تقی میر )