آزادی کے وقت ہندوستانی معیشت

اس کتاب ’’ہندوستان کی معاشی ترقی‘‘ کا ابتدائی مقصد ہندوستانی معیشت کی بنیادی خصوصیات اور آزادی کے نتیجے میں اس کی موجودہ ترقی کے بارے میں آپ کو واقفیت فراہم کرنا ہے۔ تاہم، ملک کے ماضی کے معاشی حالات کے بارے میں کچھ جاننا اتنا ہی اہم ہے جتنا کہ اس کی موجودہ حالت اور مستقبل کے امکانات کے بارے میں مطالعہ کرنا۔ لہٰذا ، آئیے پہلے ہم ملک کی آزادی سے قبل ہندوستان کی معیشت کی حالت پر ایک نظر ڈالیں اوران  مختلف زیر غور لائی جانے والی باتوں کے ایک تصور کو تشکیل دیں جن کی بنیاد پر ہندوستان کی آزادی کے بعد کی ترقیاتی حکمت عملی تیار کی گئی۔

ہندوستان کی موجودہ معیشت کی ساخت محض حال میں ہی نہیں تیار ہوئی ہے۔ اس کی جڑیں تاریخ سے وابستہ اور اس سے پیوست ہیں، خاص طور پر اس دَور سے جب ہندوستان برطانوی حکمرانی کے تحت تھا، جو کہ آخرکار 15؍اگست 1947ء کو اپنی آزادی حاصل کرنے سے قبل ہندوستان میں تقریباً دو صدیوں تک جاری رہی۔ ہندوستان میں برطانوی نوآبادیاتی راج کا واحد مقصد عظیم برطانیہ کی اپنی تیزی سے پھیلتی جدید صنعتی بنیاد کے لیے ایک معاون معیشت کی حیثیت سے اس کا استحصال کرنا تھا۔ اس رشتے کی استحصالی نوعیت کو سمجھنا ترقی کی اس قسم اور سطح کی جو کہ ہندوستانی معیشت پچھلی چھ دہائیوں میں حاصل کرنے کی اہل ہوئی ہے،جائزہ لینے کے لیے لازمی ہے۔

برطانوی راج سے پہلے ہندستان میں ایک آزاد معیشت تھی۔ اگرچہ زراعت اکثر لوگوں کا ذریعۂ معاش تھا لیکن پھر بھی ملک کی معیشت کی خصوصیت کا تعین مختلف قسم کی سامان تیار کرنے کی سرگرمیوں سے ہوتا ہے۔ ہندوستان اپنے سوتی اور ریشم کے کپڑے، دھات اور قیمتی پتھروں کے کاموں وغیرہ کے میدان میں دستکاری صنعتوں کے لیے خاص طور پر جانا جاتا تھا۔ ان مصنوعات کی   عالمی بازار میں دھوم تھی کیونکہ یہ مصنوعات ان میں استعمال کیے جانے والے سامان کی عمدہ کوالٹی کی ساکھ اور ہنرمندی کے ان اعلیٰ معیارات پر مبنی تھیں جو کہ ہندوستان سے ہونے والی سبھی درآمدات میں جھلکتی تھی۔( دیکھیے باکس 11۔)

ہندوستان میں نوآبادیاتی حکومت کے ذریعہ اختیار کی گئی معاشی پالیسیاں ہندوستانی معیشت کی ترقی کی بہ نسبت ان کے اپنے ملک کے معاشی مفاد کے تحفظ اور فروغ سے وابستہ تھیں۔ اس طرح کی پالیسیوں کے سبب ہندوستانی معیشت میں بنیادی تبدیلی پیدا ہوگئی اور اس سے ملک محض خام مال کا خالص فراہم کاراور برطانیہ میں تیار کی گئی، صنعتی اشیاء کا صارف بن گیا۔ ظاہر ہے نوآبادیاتی حکومت نے ہندوستان کی قومی اور فی کس آمدنی کا تخمینہ لگانے کی کوئی مخلصانہ کوشش نہیں کی۔ ایسی آمدنیوں کے تخمینے کے لیے کچھ انفرادی کوششیں کی گئیں تھیں جن سے متضاد اور بے ربط نتائج سامنے آئے۔ کچھ ممتازتخمینہ کار تھے۔ جیسے دادا بھائی نورجی، ولیم ڈگبی، فنڈے شیراسی، وی۔کے۔ آ۔ وی۔ راؤ اور آر۔سی۔ ڈیسائی۔ یہ راؤ ہی تھے جنہوں نے قومی اور فی کس آمدنیوں کے تخمینے نوآبادیاتی دَور میں تیار کیے تھے اور جنہیں نہایت اہم سمجھا گیا۔ تاہم اکثر مطالعات سے پتہ چلتا ہے کہ بیسویں صدی کے پہلے نصف میں ملک کی مجموعی حقیقی پیداوار کااوسط دو فیصد سے کم تھا جبکہ فی کس پیداوار آدھا فیصد سالانہ تھی۔

برطانوی نوآبادیاتی راج میں ہندستان کی معیشت بنیادی طور پر زراعتی یا دیہی تھی ملک کی تقریباً 85 فیصد آبادی زیادہ ترزو دیہاتوں میں رہا کرتی تھی اور اس کا ذریعہ معاش بالواسطہ یا بلاواسطہ طور پر زراعت تھی۔(باکس 2۔1۔) تاہم، اتنی بڑی آبادی کا پیشہ ہونے کے باوجود زراعتی سیکٹر جمود کا شکار رہا اور اس میں اکثر وبیشتر تنزلی جاری رہی۔ فی کس زراعتی پیداوار، پست سے پست تر ہو تی گئی اگرچہ اس سیکٹر میں حقیقی معنی میں کاشت کے تحت مجموعی رقبے میں اضافے کے سبب کچھ نمو یا افزائش کا بھی مشاہدہ کیا گیا۔ زراعتی سیکٹر میں اس جمود کی وجہ بالخصوص اراضی بندوبست کے مختلف نظاموں  کے سبب پیدا ہوئی جو کہ نوآبادیاتی حکومت کے ذریعہ شروع کیے گئے تھے۔ خاص طور پرزمینداری نظام جو کہ اُس وقت کے بنگال کی پریزیڈنسی میں جو آج کے ہندوستان کی مشرقی ریاستوں کے کچھ حصوں پر مشتمل تھا، نافذ کیا گیا تھا، زراعتی سیکٹر سے کمایا جانے والا منافع کاشتکاروں کی بجائے زمینداروں کو جاتا تھا۔ تاہم صرف نوآبادیاتی حکومت ہی نے نہیں بلکہ زمینداروں کی خاصی تعداد نے بھی زراعت کی صورتحال میں بہتری پیدا کرنے کی کوشش نہیں کی۔ زمینداروں کی خاص دلچسپی کسانوں کے معاشی حالات کا لحاظ کیے بغیر صرف اپنے مفاد میں  لگان وصول کرنا تھا۔ اس سے کسانوں میں شدید خستہ حالی اور سماجی تناؤ  پیدا ہوا۔ زمینداروں کے اس طرح کے رویے اپنائے جانے کی بنیادی وجہ کافی بڑی حد تک محاصل بندوبست (Revenue Settlement) تھی، جس کے تحت محاصل کی مخصوص رقم جمع کرنے کے لیے تاریخیں مقرر ہوتی تھیں، جس میں ناکام ہونے کی صورت میں زمیندار اپنے حقوق سے محروم ہو جاتے تھے، اس کے علاوہ غیر معیاری ٹکنالوجی، آبپاشی کی سہولتوں کی کمی اور کیمیائی کھادکے برائے نام استعمال نے بھی مجموعی طور پر کسانوں کی حالت زار میں اضافہ کیا اور زرعی پیداواریت کی کمزور سطح کو مزید کمزور بنایا۔ اس میں کوئی شک نہیں کہ زراعت کو تجارتی بنانے کے سبب ملک کے بعض حصوں میں نسبتاً نقدی فصلوں کی زیادہ پیداواربھی ہوئی تھی لیکن نقدی فصلوں کو پیدا کرنے کے بدلے میں ان کے معاشی حالات کو بہتر بنانے میں بھی کسانوں کو شاید ہی مدد مل سکی ہو، اب نقدی فصلیں جو وہ پیدا کر رہے تھے وہ آخرکار برطانوی صنعتوں کے ذریعہ ان کے اپنے ملک میں استعمال کے لیے ہوتی تھیں۔ آبپاشی میں کچھ ترقی کے باوجود ہندوستانی زراعت میں کیاری بنانے سیلاب کی روک تھام، پانی کی نکاسی اور مٹی سے نمک ختم کرنے جیسے معاملات میں سرمایہ کاری کا فقدان تھا۔ اگرچہ کسانوں کے ایک چھوٹے سے طبقے نے اپنے فصل اگانے کے طریقوں میں تبدیلی کی تھی اور خوردنی اشیا کی فصل کی بجائے تجارتی فصلیں بونی شروع کی تھیں لیکن کرائے پر کھیتی کرنے والوں، چھوٹے کسانوں اور بٹائی داروں کے ایک بڑے طبقے کے پاس نہ تو وسائل تھے اور نہ ہی زراعت میں سرمایہ کاری کرنے کے لیے کوئی مراعات ملتی تھیں۔

زراعت کے سیکٹر جیسا معاملہ سامان تیار کرنے والے سیکٹر کا بھی ہے۔ نوآبادیاتی راج کے تحت ہندوستان بہتر صنعتی بنیادکو فروغ نہیں دے سکا۔ حتیٰ کہ ملک کی عالمی شہرت یافتہ دستکاری صنعتیں زوال پذیر ہوئیں۔ اس لحاظ سے کوئی جدید صنعتی بنیاد بھی کوئی ایسا نمایاں مقام نہیں حاصل کر سکی جیسا کہ ایک لمبے عرصے تک دستکاری صنعتوں کو حاصل تھا۔ ہندوستان کو منظم طور پر صنعتی اعتبار سے ترقی نہ کرنے دینے کی اس پالیسی کے پیچھے نو آبادیاتی حکومت کا دوہرا مقصد تھا۔ پہلایہ کہ برطانیہ میں بڑھتی ہوئی جدید صنعتوں کے لیے ہندوستان کو ضروری خام مواد کے محض برآمد کنندہ ملک کی حیثیت تک محدود کیا جائے اور دوسرے ان صنعتوںکی تیار اشیاء کے لئے ہندوستان کو ایک وسیع بازار کی شکل میں بدلا جائے تاکہ ان کا مسلسل ہونے والا پھیلاؤ  ان کے اپنے ملک برطانیہ کے زیادہ سے زیادہ مفاد کو یقینی بنایا جا سکے۔ اس طرح کے معاشی منظر نامے میں دیسی دستکاری صنعتوں کے زوال کے سبب ہندوستان میں نہ صرف یہ کہ بڑے پیمانے پر بے روزگاری پیدا ہوئی بلکہ ہندوستانی صارف بازار میں نئی مانگ بھی پیدا ہوئی جو کہ مقامی طور پر بنی ہوئی اشیاء کی فراہمی سے محروم ہو چکا تھا۔ اس مانگ کو برطانیہ سے سستی تیار اشیا کی درآمدات بڑھاکر منافع بخش طور پر پورا کیا گیا۔

انیسویں صدی کے دوسرے نصف کے دوران جدید صنعت کی بنیاد جڑ تو پکڑنے لگی لیکن اس کی پیش رفت بہت دھیمی تھی۔ ابتدائی طور پر پٹ سن اور سوتی کپڑا بنانے والی ملوں کے قائم کرنے تک ہی اس کی ترقی محدود رہی۔ سوتی کپڑے کی ملوں پر باالخصوص ہندوستانیوں کا غلبہ تھا اور یہ ملک کے مغربی حصوں یعنی مہاراشٹر اور گجرات  میں  واقع تھیں، جبکہ جوٹ ملوں  پر غیر ملکیوں کا غلبہ تھا جو کہ خاص طور پر بنگال میں مرتکز تھیں۔ اس کے بعد بیسویں صدی کی ابتداء میں لوہے اور فولاد کی صنعتوں کی آمد شرع ہوئی۔ ٹاٹا آئرن اینڈ اسٹیل کمپنی(TISCO) 1907ء میں قائم ہوئی تھی۔ شکر، سیمنٹ، کاغذ وغیرہ کی بعض دیگر صنعتیں دوسری جنگ عظیم کے بعدلگائی گئیں۔

تاہم، شاید ہی کوئی مشین سازی کی صنعت (Capital Goods Industry)  رہی ہو جو ہندوستان میں مزید صنعت کاری کو فروغ دینے میں مدد دے سکے۔ مشین سازی کی صنعت وہ ہوتی ہے جس میں دیگر مصنوعات تیارکرنے کے لیے درکار مشین اور دیگر آلات تیار کیے جاتے ہیں۔ یہاں وہاں کچھ مصنوعاتی اکائیاں قائم کرنے سے ملک کی روایتی دستکاری صنعتوں کے تقریباً خاتمے کا متبادل حاصل نہیں ہو سکتا۔ مزید برآں، نئے صنعتی سیکٹر کی شرح نمو اور مجموعی گھریلو پیداوار  (GDP) میں اس کا تعاون اب بھی بہت کم تھا۔ نئے، صنعتی سیکٹر کی ایک اور خامی پبلک سیکٹر کے دائرہ عمل کا نہایت محدود تھا۔ یہ سیکٹر صرف ریلوے، بجلی پیدا کرنے، مواسلات، بندرگاہ اور دیگر محکمہ جاتی ذمہ داریوں تک محدود تھا۔

قدیم زمانے سے ہی ہندوستان ایک اہم تجارتی ملک رہا ہے۔ لیکن نوآبادیاتی حکومت کے ذریعہ اپنائی جانے والی اشیا کی پیداوار ، تجارت اور محصول سے متعلق بندشی پالیسیوں کے سبب ہندوستان کی غیر ملکی تجارت کے ڈھانچے، ترکیب اور حجم پر بہت خراب اثر پڑا۔ نتیجتاً ہندوستان خام مال جیسے کچا ریشم، سوتی، اون، شکر، نیل، جوٹ وغیرہ کا برآمد کنندہ (فروخت کے لیے ملک سے باہر بھیجنے والا) اور تیار شدہ اشیا جیسے سوت، ریشم اور اونی کپڑوں اورکیپٹل گڈس جیسے ہلکی مشینری جو کہ برطانیہ کی فیکٹریوں میں بنائی جاتی تھیں، کا درآمد کنندہ بن گیا۔ سبھی عملی مقاصد کے لیے برطانیہ نے ہندوستان کی برآمدات اور درآمدات پر اجارہ دارانہ کنٹرول برقرار رکھا۔ نتیجے کے طور پر ہندوستان کی غیر ملکی تجارت کا نصف سے زیادہ برطانیہ تک محدود تھا جبکہ باقی میں کچھ دیگر ممالک جیسے چین، سیلون (سری لنکا)، فارس (ایران) ہی شامل ہو سکے۔سویز نہرکے کھلنے سے ہندوستان کی غیر ملکی تجارت پر برطانوی کنٹرول اور بھی زیادہ مستحکم ہو گیا۔ (باکس 1.3 دیکھیں)

پورے نوآبادیاتی دَور میں ہندوستان کی غیر ملکی تجارت کی سب سے اہم خصوصیت برآمداتی اشیا کی بہت زیادہ اضافی پیداوار تھی۔ لیکن یہ فاضل اشیا ملک کی معیشت کے لیے کافی مہنگی ثابت ہوئیں۔ متعدد ضروری اشیاء اناج، کپڑے، مٹی کے تیل وغیرہ کی گھریلو بازار میں شدید قلت نمایاں طور پر سامنے آگئی ۔ مزید یہ کہ ان فاضل برآمداتی اشیا کا ہندوستان میں سونے یا چاندی کی آمد کی صورت میں کوئی نتیجہ نہیں ظاہر ہوا بلکہ کسی قدر اس کا استعمال برطانیہ میں نوآبادیاتی حکومت کے قائم کیے ہوئے دفترکے اخراجات کی ادائیگوں  کے لیے کیا جاتا تھا۔ اس کے علاوہ برطانوی حکومت کے ذریعہ لڑی جانے والی جنگوں  پر ہونے والے اخراجات اور غیرمرئی یعنی نظر نہ آنے والے سامان کی درآمد وغیرہ کے سبب ہندوستان کی دولت کی نکاسی ہوتی رہی۔

برطانوی ہندوستان کی آبادی کے بارے میں مختلف تفصیلات سے پہلے 1881ء میں مردم شماری کے ذریعہ جمع کی گئی تھیں۔ اگرچہ اس کی بعض حدود تھیں تاہم اس سے ہندوستان کی افزائش آبادی کے بارے میں غیر یکسانیت کا پتہ چلا۔ اس کے بعد ہر دس سال یہ اسی طرح کی مردم شماری کا کام انجام دیا جانے لگا۔ 1921ء سے قبل ہندوستان آبادیاتی عبور کے پہلے مرحلے میں تھا۔ عبور کا دوسرا مرحلہ 1921ء کے بعد شروع ہوا۔ تاہم اس مرحلے پر نہ تو ہندوستان کی کل آبادی اور نہ ہی افزائش آبادی کی شرح بہت زیادہ تھی۔

 سماجی ترقی پرمختلف اشار یے  (indicators) بھی کافی حوصلہ افزا نہیں تھے۔ مجموعی سطح خواندگی 16؍فیصد سے بھی کم تھی۔ اس میں خواتین کی شرح خواندگی نہایت معمولی تقریباً سات فیصد تھی۔ عوامی صحت سے متعلق سہولیات یا تو آبادی کے بہت بڑے حصے کے لیے دستیاب نہیں تھیں یا اگر دستیاب بھی تھیں تو وہ انتہائی ناکافی تھیں۔ نتیجتاً پانی اورہوا کے ذریعے پھیلنے والی بیماریاں زوروں پر تھیں اور بہت بڑے پیمانے پر ہلاکت خیزی کا سبب بنیں۔یہ تعجب کی بات نہیں کہ مجموعی شرح اموات بہت زیادہ تھی اور اس میں بھی بچوں کی شرح اموات خبردار کرنے والی تھی—یعنی اس وقت بچوں کی فی ہزار شرح اموات 218 جبکہ آج یہ 40 فی ہزار ہے۔ متوقع عمر 44 برس تھی جبکہ موجودہ اوسط متوقع عمر68 برس ہے۔ بھروسے مند اعداد وشمار نہ ہونے کی وجہ سے اس وقت غریبی کا تعین مشکل ہے لیکن اس میں کوئی شک نہیں کہ نوآبادیاتی دور میں ہندوستان میں بہت زیادہ غریبی تھی جس سے اس وقت ہندوستانی آبادی کو صورتحال ابتر ہوئی۔

نوآبادیاتی دَور میں ہندوستان کے پیشہ وارانہ ڈھانچے یعنی مختلف صنعتوں اور سیکڑوں میں کام کرنے والے افراد کی تقسیم میں تبدیلی کی کوئی خاص علامت نہیں دکھائی دیتی۔ زراعتی سیکٹر کے لیے افرادی قوت کا حصہ کافی بڑا تھا، جو کہ عام طور پر 70 تا 75 فیصد پر برقرار رہا، جبکہ سامان تیار کرنے اور خدمات کے سیکٹروں کا حصہ علی الترتیب صرف 10 اور 15 تا 20 فیصد تھا، دیگر لائق ذکر پہلو بڑھتا ہوا علاقائی تنوع تھا۔ تب کی مدراس پریزیڈنسی (موجودہ ریاستوں تمل ناڈو، آندھرا پردیش، کیرل اور کرناٹک کے علاقوں پر مشتمل) کے علاقے، مہاراشٹر اور مغربی بنگال میں زراعتی سیکٹر پر انحصار میں زوال اور سامان تیار کرنے (مینوفیکچرنگ) اور خدماتی سیکٹروں میں اس کے تناسب میں اضافہ دیکھا گیا۔ تاہم اُڑیسہ، راجستھان او رپنجاب جیسی ریاستوں میں اسی زمانے میں زراعت میں ورک فورس کے حصے میں اضافہ ہوا تھا۔

نوآبادیاتی راج کے تحت بنیادی ڈھانچے جیسے ریلوے، بندرگاہیں، آبی ٹرانسپورٹ، ڈاک اور ٹیلی گراف میں ترقی ہوئی، تاہم اس ترقی کے پس پردہ مقصد لوگوں کو بنیادی سہولتیں فراہم کرنا نہیں تھا بلکہ مختلف نوآبادیاتی مفادات کا ذریعہ بنانا تھا۔ برطانوی حکومت کے قیام سے پہلے ہندوستان میں جو سڑکیں تعمیر ہوئی تھیں وہ جدید ٹرانسپورٹ کے لیے موزوں نہیں تھیں۔ لیکن نوآبادیاتی انتظامیہ بھی فنڈ میں قلت کے سبب اس میدان میں زیادہ کچھ نہ کر سکی۔ جو سڑکیں تعمیر کی گئیں  وہ بنیادی طور پر ہندوستان کے اندر فوج کی نقل و حرکت اور دیہی علاقوں سے قریب ترین ریلوے اسٹیشن یا بندرگاہ تک خام مال کو پہنچانے کے مقاصد کی تعمیل کرتی تھیں۔ یہ خام مال ریلوے اسٹیشن یا بندرگاہ سے دور دراز انگلینڈ اور دیگر مالی فائدہ پہنچانے والے غیر ملکی مقامات پر بھیجے جاتے تھے۔ بارش کے موسم میں دیہی علاقوں تک پہنچنے کے لیے ہمیشہ سبھی موسموں کے لیے موزوں سڑک کی بھاری کمی بنی رہتی تھی، ظاہر ہے، اس لیے ان علاقوں میں رہنے والے اکثر لوگ قدرتی آفات اور قحط سالی کے زمانے میں انتہائی تکلیف دہ حالات سے گزرتے تھے۔

برطانیہ نے 1850 میں ہندوستان میں ریلوے کی شروعات کی جسے ان کی ایک نہایت اہم دین سمجھا جاتا تھا۔ ریلوے ہندوستانی معیشت کے ڈھانچے پر دو اہم طرح سے اثر انداز ہوئی۔ ایک طرف اس نے لوگوں کو  طویل دوری کے سفر کے قابل بنایاجس سبب جغرافیائی اور ثقافتی رکاوٹیں ختم ہوئیں اور دوسری طرف اس سے ہندوستانی زراعت کی تجارت کاری پروان چڑھی جس کا ہندوستانی دیہی معیشتوں کی خود کفالت پرخراب اثر پڑا۔ اس میں کوئی شبہ نہیں کہ ہندوستان کی برآمداتی تجارت میں وسعت پیدا ہوئی لیکن اس کے فائدے شاید ہی ہندوستان کے عوام کو مل پائے ہوں۔ سماجی فائدے جو کہ ہندوستان کے لوگوں نے ریلوے کے شروع ہونے سے حاصل کیے وہ ملک کے بھاری معاشی نقصان کے مقابلے بہت کم تھے۔

سڑکوں اور ریلوے کی ترقی کے ساتھ ساتھ نوآبادیاتی نظام نے داخلی تجارت اور سمندری راستوںکی ترقی کے لیے بھی اقدامات کیے۔ تاہم، یہ اقدامات بہت زیادہ اطمینان بخش نہیں تھے۔ کبھی کبھی داخلی آبی راستے بھی غیر منفعت بخش ثابت ہوئے جیسا کہ اُڑیسہ ساحل پر ساحلی نہر کے معاملے میں ہوا۔ اگرچہ نہر سرکاری خزانے سے بھاری لاگت سے تعمیر ہوئی تھی پھر بھی یہ ریلوے کے ساتھ مسابقت میں ناکام رہی۔ جو کہ جلد ہی خطے سے نہر کے متوازی گزرنے لگی اور آخرکار اسے چھوڑ دیا گیا۔ ہندوستان میں برقی ٹیلی گراف کا مہنگا نظام شروع ہوا جو اسی طرح نظم و ضبط کو قائم رکھنے کے مقاصد کی تعمیل کے لیے شروع کیا گیا تھا۔ دوسری طرف ڈاک خدمات ایک مفید عوامی مقصد کی تعمیل کے باوجود پوری طرح ناکافی تھی۔ آپ باب 8 میں مختلف بنیادی ڈھانچوں کی موجودہ حیثیت کے بارے میں مزید پڑھیں گے۔