ادبی تاریخ
تذکرہ عربی زبان کا لفظ ہے اوراس کے معنی ہیں ’’یاد کرنا،ذکر کرنا، بتانا‘‘، لیکن اردو فارسی میں اصطلاح کے طور پرتذکرہ اس کتاب کو کہتے ہیں جس میں شعرا کا حال اور اُن کے کلام کا کچھ نمونہ درج کیا جائے۔عربی، فارسی اور اُردو میں متعدد تذکرے لکھے گئے ہیں جن میں صرف شعرا و ادبا کا ہی نہیں انبیا، اولیا، علما اور بادشاہوں تک کا ذکر کیا گیا ہے۔فارسی اور اردو تذکروں میں ادیبوں اورشاعروں کے حالاتِ زندگی کے ساتھ ساتھ ان کی شعری و ادبی خدمات کا بھی مختصراً جائزہ لیا گیا ہے۔
اردو شعرا کے تذکرے بہت دنوں تک فارسی زبان میں لکھے جاتے رہے۔ اس سلسلے کی پہلی کڑی میرتقی میرؔ کا تذکرہ نِکات الشعرا (1752)ہے۔اردو زبان میں لکھا جانے والا پہلا تذکرہ مرزا علی لطفؔ کا’ گُلشنِ ہند‘( 1801) ہے۔
’’آبِ حیات‘‘ تذکرہ نگاری سے آگے کا قدم ہے۔یہ اُردو نثرکی پہلی کتاب ہے جس میں اردو شاعری کی ادبی تاریخ مرتّب انداز میں ملتی ہے۔
محمد حسین آزاد نے ’’آبِ حیات‘‘ میں شعرائے اردو کی تاریخ کو مختلف ادوار میں تقسیم کیا ہے، اور ہر دور کے کچھ مخصوص اوصاف متعّین کرنے کی کوشش کی ہے۔ اگرچہ اس کام میں انھیں کوئی کامیابی نہیں ہوئی لیکن اُنھوں نے اس بات کا احساس ضرور پیدا کردیا کہ زبان عہد بہ عہد بدلتی ہے اور آج کی ادبی زبان کل کے لیے بھی کارآمد ہو، یہ ضروری نہیں۔آزاد نے شعرا کے کلام کے تفصیلی نمونوں کے ساتھ ساتھ ان کی سوانح اور شخصیت کا خاکہ بھی پیش کیا ہے۔یہ خاکے بہت دلچسپ ہیں۔ ان کی مدد سے شاعروں کی جیتی جاگتی تصویریں ہماری نگاہوں کے سامنے آجاتی ہیں۔
’’آبِ حیات‘‘ کے ابتدائیے میں آزاد نے اردو زبان کے آغاز و ارتقا پر بھی کچھ روشنی ڈالی ہے۔ ’’آبِ حیات‘‘ ادبی تاریخ کا نقشِ اوّل ہے اور بہت محدود مآخذ اور وسائل کی مدد سے آزادنے یہ کہانی مرتب کی ہے۔ ’’آبِ حیات‘‘ کی مقبولیت کا ایک بہت بڑا سبب آزاد کی انشا پردازی اور علمی زبان ہے۔ آزاد کا اسلوبِ بیان کہیں کہیں علمی زبان سے مطابقت نہیں رکھتا۔ آبِ حیات کا شمار اردو نثر کے شاہ کاروں میں ہوتا ہے کیونکہ انھوں نے اردو شاعری کی پوری تہذیب کو اس میں زندہ کردیا ہے۔
محمد حسین آزاد
(1830 - 1910)
محمدحسین نام، آزاد تخلّص، دہلی کے رہنے والے تھے۔ان کے والد مولوی محمدباقراردو کے ایک اہم اخبار کے ایڈیٹر تھے۔اس اخبار کا نام ’’دہلی اردو اخبار‘‘ تھا۔جس میں 1857کی جنگ ِ آزادی کی حمایت کی گئی تھی۔لہٰذا جب انگریزوں نے دلّی پر دوبارہ قبضہ کیا تو انھوں نے مولوی محمدباقر کو موت کے گھاٹ اتار دیا اور محمد حسین نے دلّی چھوڑ کر کئی سال تک بھاگے ہوئے مجرم کی طرح بقیہ زندگی بسر کی۔
برسوں کی پریشانی کے بعد بالآخر محمدحسین آزاد لاہور پہنچ کر محکمۂ تعلیم میں ملازم ہوگئے۔وہ علمی وتعلیمی میدان میں بہت سرگرم رہے اور بہت سی نصابی کتابیں تیار کیں۔اسی ملازمت کے دوران انھوں نے نئے طرز کے مشاعروں کی بنیاد رکھی۔ان مشاعروں میں طرحی غزلوں کے بجائے موضوع دے کر نظمیں لکھوائی جاتی تھیں۔اسی طرح انگریزی طرز کی کتابیں بھی تیار کی گئیں۔ان میں آزاد کی نیرنگِ خیال خصوصاً قابلِ ذکر ہے۔
محمدحسین آزاد کی تصانیف میں سب سے زیادہ شہرت ’’آبِ حیات‘‘ کو ملی۔اسلوب کی دل کشی کے باعث ’’آبِ حیات‘‘ اُردو کی سب سے زیادہ پڑھی جانے والی کتابوں میں شامل ہے۔علمِ زبان پر ’’سُخندانِ فارس‘‘ بھی اُن کی ایک اہم تصنیف ہے۔
آزاد کرداروں اور واقعات کا اس طرح بیان کرتے ہیں کہ وہ چلتی پھرتی تصویریں بن جاتے ہیں۔ان کی تحریر مناسب الفاظ اور استعاروں کی دل کشی کے باعث بہت جلد یاد ہوجانے کی صفت رکھتی ہے ۔
مرزا مظہر جان جاناں
مرزا مظہرجانِ جاناں کے والد عالمگیر کے دربار میں صاحبِ منصب تھے۔ نسب ان کا باپ کی طرف سے محمد حَنیفہؓ سے ملتاہے جو کہ حضرت علیؓ کے بیٹے تھے۔ ماں بیجا پور کے شریف گھرانے سے تھیں۔ دادا بھی دربارِ شاہی میں صاحب ِ منصب تھے۔ دادی‘اسد خاں وزیرِ عالمگیر کی خالہ زاد بہن تھیں۔ پردادا سے اکبر بادشاہ کی بیٹی منسوب ہوئی تھیں۔ ان رشتوں سے تیموری خاندان کے نواسے تھے۔1111 ھ میں جب کہ عالمگیر دکن پر فوج لیے پڑا تھا ان کے والد نوکری چھوڑ کر دلّی کو پھرے۔ یہ کالا باغ علاقہ مالوہ میں 11 رمضان کو جُمعہ کے دن پیدا ہوئے۔ عالمگیر کو خبر گذری۔ آئینِ سلطنت تھا کہ اُمرا کے ہاں اولاد ہو تو حضور میں عرض کریں۔ بادشاہ خود نام رکھیں یا پیش کیے ہوئے ناموں میں سے پسند کردیں۔ کسی کو خود بھی بیٹا یا بیٹی کرلیتے تھے کہ یہ امور طرفین کے دِلوں میں اتّحاد اور محبت پیدا کرتے تھے، ان کے لیے ایک وقت پر سندِ ترقی ہوتے تھے اور بادشاہوں کو ا ن سے وفاداری اور جاں نثاری کی امّیدیں ہوتی تھیں۔ شادی بھی اجازت سے ہوتی تھی۔ کبھی ماں باپ کی تجویز کو پسند کرتے تھے، کبھی خود تجویز کردیتے تھے۔ غرض عالمگیر نے کہا کہ بیٹا باپ کی جان ہوتا ہے۔ باپ مرزا جان ہے۔ اس کا نام ہم نے جانِ جاناں رکھا۔ پھر اگر چہ باپ نے شمس الدّین نام رکھا مگر عالمگیری نام کے سامنے نہ چمکا۔ مظہرتخلّص انھوں نے آپ کیا کہ جانِ جاناں کے ساتھ مشہور چلا آتا ہے۔ مرزا جان بھی شاعر تھے اور جانی تخلّص کرتے تھے۔
16 برس کی عمر تھی کہ باپ مرگئے۔ اسی وقت سے مُشتِ خاک کو بزرگوں کے گوشۂ دامن میں باندھ دیا۔ 30 برس کی عمر تک مدرسوں اور خانقاہوں میں جھاڑوٗ دی اور جو دن بہارِ زندگی کے پھول ہوتے ہیں انھیں بزرگوں کے روضوں پر چڑھادیا۔ اس عہد میں تصوّف کے خیالات اَبر کی طرح ہندوستان پر چھائے ہوئے تھے۔ چنانچہ قطع نظر کمالِ شاعری کے ہزارہا مسلمان بلکہ ہندوٗ بھی ان کے مرید تھے اور دل سے اعتقاد رکھتے تھے۔
مرزا صاحب کی تحصیلِ علمی عالمانہ نہ تھی مگر علمِ حدیث کو با اصول پڑھا تھا۔ حنفی مذہب کے ساتھ نقشبندی طریقے کے پابند تھے اور احکامِ شریعت کو صدقِ دل سے ادا کرتے تھے۔ اوضاع و اطوار اور ادب آداب نہایت سنجیدہ اور برجستہ تھے کہ جو شخص ان کی صحبت میں بیٹھتا تھا ہُشیار ہوکر بیٹھتا تھا۔ لطافتِ مزاج اور سلامتیِ طبع کی نقلیں ایسی ہیں کہ آج سُن کر تعجّب آتا ہے۔ خلافِ وضع اور بے اسلوب حالت کو دیکھ نہ سکتے تھے۔
نقل :ایک دن درزی ٹوپی سی کر لایا۔ اُس کی تراش ٹیڑھی تھی۔ اس وقت دوسری ٹوپی موجود نہ تھی، اس لیے اسی کو پہننا پڑا۔ مگر سر میں درد ہونے لگا۔
نقل :جس چارپائی میں کان ہواس پر بیٹھا نہ جاتا تھا، گھبراکر اُٹھ کھڑے ہوتے تھے۔ چنانچہ دلّی دروازہ کے پاس ایک دن ہَوا دار میں سوار چلے جارہے تھے۔ راہ میں ایک بنیے کی چارپائی کے کان پر نظر جا پڑی ۔ وہیں ٹھیرگئے اور جب تک اس کا کان نہ نکلوالیا آگے نہ بڑھے۔
نقل :ایک دن ایک نواب صاحب کہ ان کے خاندان کے مرید تھے، ملاقات کو آئے اور خود صُراحی لے کر پانی پیا۔ اتفاقاً آب خورہ جو رکھا تو ٹیڑھا رکھا۔ مرزا کا مزاج اس قدر برہم ہوا کہ ہر گز ضبط نہ ہوسکا اور بِگڑ کر کہا کہ عجب بے وقوف احمق تھا جس نے تمھیں نواب بنادیا، آب خورہ بھی صراحی پر رکھنا نہیں آتا۔
نقل :ایک معتقد کا بیٹا حسنِ اعتقاد سے غزل لے کر آیا کہ شاگرد ہو اور اصلاح لے۔ انھوں نے کہا کہ اصلاح کے ہوش و حواس کِسے ہیں۔ اب عالم کچھ اور ہے۔ عرض کی کہ میں فقط بطورِ تبرّک سعادت حاصل کرنی چاہتاہوں۔فرمایا کہ اس وقت ایک شعر خیال میں آیا ہے، اسی کو تبرّک اور اسی کو اصلاح سمجھ لو ؎
لوگ کہتے ہیں مرگیا مظہر
فی الحقیقت تو گھرگیا مظہر
غرض ساتویں محرم کی تھی کہ رات کے وقت ایک شخص مٹھائی کی ٹوکری ہاتھ میں لیے آیا، دروازہ بند تھا۔ آواز دی اور ظاہر کیا کہ میں مرید ہوں۔ نذر لے کر آیا ہوں۔ وہ باہر نکلے تو ایک قرابین 1 ؎ ماری کہ گولی سینے کے پار ہوگئی۔ وہ تو بھاگ گیا۔ مگر انھیں زخم کاری آیا۔ تین دن تک زندہ رہے، اس عالمِ اضطراب میں لوٹتے تھے اور اپنا ہی شعر پڑھتے تھے ؎
بِنا کردند خوش رسمے بخون و خاک غلطیدن
خدا رحمت کُند ایں عاشقانِ پاک طینت را
یہ تین دن نہایت استقلال اور ثابت قدمی سے گزارے۔ جب شاہ عالم بادشاہ کو خبر پہنچی تو بعد تحقیقات کے کہلا بھیجا کہ قاتل نہیں ملتا ۔ نشان دو تو ہم اسے سزادیں ۔ جواب میں کہا کہ فقیر کشتۂ راہِ خدا ہیں اور مردہ کا مارنا قتل نہیں ۔ قاتل ملے تو آپ سزا نہ دیں۔ یہاں بھیج دیں۔ آخر دسویں کو شام کے وقت دنیا سے انتقال کیا۔ بہت لوگوں نے تاریخیں کہیں۔ مگر درجہ اول پر میرقمرالدّین منت کی تاریخ ہے، جس کا مادہ خاص الفاظ حدیث ہیں اور اتّفاق یہ کہ موزوں ہیں۔
عاَشَ حَمِیْداً، مَاتَ شَہِیْداً
مشق
لفظ ومعنی
صاحبِ منصب : عہدے دار
نسب : خاندانی سلسلہ
منسوب : نسبت کی گئی ، نسبت کیا گیا، لہٰذا جس شخص کی منگنی یا شادی ہو اسے ہی منسوب کہتے ہیں
آئینِ سلطنت : شاہی قاعدہ قانون، شاہی طورو طریق
اُمور : امرکی جمع، معاملات
طرفین : دونوں جانب، فریقین
سندِ ترقی : ترقی کی دستاویز
تجویز : رائے مشورہ
مشتِ خاک : مٹھی بھرخاک، انسان کا وجودِ خاکی
خانقاہ : بزرگوںاور درویشوں کے رہنے کی جگہ
روضہ : وہ مقبرہ جس پر گنبدبنا ہو، لغوی معنی باغیچہ
تصوّف : روحانی علم
قطعِ نظر : اس کے سوا، بجُز
اعتقاد : عقیدت، عزّت واحترام، دلی یقین، ایمان
نقشبندی طریقہ : صوفیہ کا ایک سلسلہ جو حضرت خواجہ بہاء الدینؒ نقشبندی سے شروع ہوا
احکامِ شریعت : مذہبی طورطریقوں اور دینی قانون سے متعلق احکام
اوضاع : وضع کی جمع،طریقے
اطوار : طور کی جمع ،طریقے
برجستہ : بے ساختہ، برمحل، حسبِ حال، مناسب
لطافتِ مزاج : نازک مزاجی، طبیعت کی نزاکت وپاکیزگی
سلامتی طبع : طبیعت کی درستی، سلامتی
خلافِ وضع اور
بے اسلوب حالت : نامناسب اوربے ڈھنگی حالت
تراش : کانٹ چھانٹ، بناوٹ، وضع
چارپائی کا کان : چارپائی کی پٹّی کا وہ حصّہ جو پائے کے باہر نکل آئے
ہوا دار : پالکی کی طرح کی ایک سواری جوچاروں طرف سے کھلی ہوتی ہے
آب خورہ : پانی پینے کا مٹی کا چھوٹا برتن
معتقد : اعتقاد رکھنے والے، عزت واحترام کرنے والے
سعادت : نیکی، بھلائی، خوش نصیبی
فی الحقیقت : حقیقت میں، واقعتاً
نَذْر : کسی کے سامنے عقیدت واحترام سے کوئی چیز پیش کرنا
قرابین : ولایتی بندوق، جورائفل کی پہلی شکل تھی۔اس کو انگریزی میں carbine کہتے ہیں
استقلال : مستقل مزاجی، مضبوطی، ثابت قدمی
دُگاڑہ : دونالی بندوق۔اس حاشیے میں جس ’’استادمرحوم‘‘ کا ذکر ہے وہ حضرت شیخ ابراہیم ذوق ہیں
کُشتہ : ماراہوا ، قتل کیا گیا
موزوں : مناسب، جچاتلا، پسندیدہ
غورکرنے کی بات
- ’آبِ حیات‘ کا یہ اقتباس محمدحسین آزاد کے اسلوبِ بیان کا عمدہ نمونہ ہے۔ مندرجہ ذیل فقروں پر غورکیجیے۔
(i) شمس الدین نام رکھا مگرعالم گیری نام کےسامنے نہ چمکا۔
(ii) مشتِ خاک کو بزرگوں کے گوشۂ دامن میں باندھ دیا۔
(iii) جودن بہارِزندگی کےپھول ہوتے ہیں انھیں بزرگوں کے روضوں پر چڑھا دیا۔
پہلے فقرے میں شمس الدین کی رعایت سے ’چمکا‘ کس قدر خوب صورت ہے۔
اورنگ زیب عالم گیر بادشاہ کے رکھے ہوئے نام کو ’عالم گیری نام‘ کہہ کر یہ اشارہ بھی کردیا کہ یہ نام تمام دنیا پر چھا جانے والا ثابت ہوا۔
’مشتِ خاک‘ کے معنی ہیں’’مٹھی بھر مٹی‘۔اس اعتبار سے گوشۂ دامن میں باندھنا بہت خوب ہے۔انسان کو یا انسان کے بدن کو مشتِ خاک کہتے ہیں۔لہٰذا مراد یہ ہوئی کہ مرزاصاحب نے اپنے آپ کو بزرگوں کی خدمت کے حوالے کردیا۔
نوجوانی کو’بہارِزندگی‘ اور نوجوانی کے دنوں کو’پھول‘ کہنا بہت عمدہ ہے۔روضہ کے ایک معنی باغ بھی ہوتے ہیں۔اس لحاظ سے بزرگوں کے مزارات پر نوجوانی کے دن گزارنا اور بھی عمدہ بات ہے۔محمد حسین آزاد کی تحریریں اس قسم کے خوبصورت فقروں سے بھری ہوئی ہیں۔
- اس اقتباس میں کچھ مذہبی اصطلاحات بھی استعمال ہوئی ہیں جن پر غورکیے بغیران کے معنی تک پہنچنا مشکل ہے۔
حدیث : لغت میں حدیث کے معنی ہیں قول، بات لیکن مذہبی اصطلاح میں حضرت محمد ؐ کی زبان مبارک سے جو باتیں نکلیں یا انھوں نے اپنی زندگی میں جو کام کیے انھیں حدیث کہتے ہیں۔
حنفی مذہب : اسلامی فقہ کے تعلق سے اِمام ابوحنیفہؒ کے نقطۂ نظراور ان کے بتائے ہوئے طورطریقوں کو حنفی مذہب یا حنفی مسلک کہتے ہیں۔
شریعت : دینِ اسلام کے مطابق زندگی گزارنے کے لیے اللہ اور اس کے رسول حضرت محمدؐ کے بتائے ہوئے احکام وقوانین کو ’شریعت‘ کہتے ہیں۔
نقشبندی طریقہ :صوفیوں کے چارمشہورطریقے یا سلسلے ہیں۔قادری، سُہروردی، چِشتی اور نقشبندی۔ہندوستان میں نقشبندی طریقے کے سب سے بڑے بزرگ شیخ احمد سرہندی ؒکہے جاتے ہیں۔ مرزا مظہرجانِ جاناں تین واسطوں سے شیخ احمدسرہندی ؒکے مرید تھے۔شیخ احمد سرہندیؒ مجدّدالف ثانی کے لقب سے بھی مشہور ہیں۔
مرید :مرید کے لغوی معنی ہیں، ارادت مند، ارادہ کرنے والا، پیروکار۔ اصطلاحاً وہ شخص جو کسی بزرگ یا پیر کا ارادت مند ہو اور اس سے تعلق واردات کے مطابق پیروی کرے اُسے مرید کہتے ہیں۔
فقیر :لفظ ’فقیر‘ فقرسے بنا ہے۔ فقرکے معنی ہیں درویشی۔ اصطلاحاً فقیر کے معنی ہیں وہ خدامست لوگ جو اللہ کی محبت میں فقروفاقہ اور درویشی وبے نیازی کی زندگی گذارتے ہیں۔
تاریخ کہنا : اس اقتباس میں مرزا مظہرجانِ جاناں کی تاریخِ وفات کو ایک حدیث کے الفاظ سے پیش کیا گیا ہے۔تاریخ سے مراد ہے کہ کوئی لفظ، فقرہ، مصرع یا شعر اس طرح ترتیب دینا جس کے حروف کے اعداد کو اگر جوڑا جائے تو تاریخ نکل آئے۔حروف کی گنتیاں مقرر ہیں اور انھیں ’اَبْجَدْ، ہَوّزْ، حُطِّی، کَلِمَنْ، سَعْفَصْ، قَرَشَتْ، ثَخَّذْ، ضَظَّغْکے ذریعے ظاہر کیا جاتا ہے۔
ا ب ج د ہ و ز ح ط ی
1 2 3 4 5 6 7 8 9 10
ک ل م ن س ع ف ص ق ر ش ت
20 30 40 50 60 70 80 90 100 200 300 400
ث خ ذ ض ظ غ
500 600 700 800 900 1000
مادّہ کے معنی ہیں ’اصل‘ ’جوہَر‘ وہ شے جس سے کوئی چیز بنائی جائے۔مادّۂ تاریخ یا مادّۂ خاص کے ذیل میں مادّہ سے مراد وہ لفظ یا فقرہ ہے جس سے تاریخ نکلتی ہے۔چونکہ اس پوری نظم یا شعر کو بھی ’تاریخ‘ کہتے ہیں جس میں تاریخ والا فقرہ ،مصرع یا لفظ نظم کیا جاتا ہے۔اس لیے خاص تاریخ کی گنتی رکھنے والے لفظ، فقرے یا مصرعے کو مادّہ یا مادّۂ تاریخ کہتے ہیں۔
عاَشَ حَمِیْداً مَاتَ شَھِیْداً : یہ عربی کا فقرہ ہے۔ اس کے معنی ہیں وہ زندہ تھا تو لوگ اس کی تعریف کرتے تھے۔اور مرنے پرشہادت کا درجہ پایا ۔
استادمرحوم : استاد مرحوم سے مراد یہاں شیخ محمد ابراہیم ذوقؔ ہیں جو محمدحسین آزاد کے استاد تھے۔
بناکردندخوش رسمے بخون و خاک غلطیدن
خدارحمت کُندایں عاشقانِ پاک طینت را
مرزا مظہرجانِ جاناں کا یہ ایک فارسی شعر ہے۔ اس کا مفہوم یہ ہے کہ خدا اُن پاک طبیعت والے عاشقوں پر رحمت کرے۔ انھوں نے خون اور خاک میں لوٹنے اور لتھڑنے کی اچھی رسم قائم کی۔
سوالات
1. مصنف نے مرزا مظہرجانِ جاناں کے نام ونسب سے متعلق کیا اظہارِ خیال کیا ہے؟
2. محمدحسین آزاد نے مرزامظہر جانِ جاناں کی شخصیت کے کن پہلوؤں کو اُجاگر کیا ہے؟
3. مرزا مظہرکا نام جانِ جاناں کس نے رکھا اور کیوں؟
4. مرزا جانِ جاناں بے ڈھنگی بات کو پسند نہ کرتے تھے۔ اس بیان کی دلیل میں کوئی مثال پیش کیجیے۔
5. مرزا مظہرجانِ جاناںپرچند جملے لکھیے اور ان کے انتقال کا واقعہ اپنے الفاظ میں لکھیے۔
عملی کام
- اپنے استاد اور لائبریری کی مدد سے ادبی تاریخ سے متعلق ’آبِ حیات‘ کے علاوہ دیگر کتابوں کے نام تلاش کرکے لکھیے ۔