غزل

کیا مج عشق نے ظالم کوں آب آہستہ آہستہ

کہ آتش گل کوں کرتی ہے گلاب آہستہ آہستہ

وفا داری نے دلبر کی بجھایا آتش غم کوں

کہ گرمی دفع کرتا ہے گلاب آہستہ آہستہ

مرے دل کوں کیا بے خود تری انکھیاں نے آخر کوں

کہ جیوں بے ہوش کرتی ہے شراب آہستہ آہستہ

ادا و ناز سوں آتا ہے وہ روشن جبیں گھر سوں

کہ جیوں مشرق سوں نکلے آفتاب آہستہ آہستہ

ولیؔ مُج دل میں آتا ہے خیال یار بے پروا

کہ جیوں انکھیاں منیں آتا ہے خواب آہستہ آہستہ

مشق

دفع کرنا : دور کرنا

ادا : انداز، اشارہ

ناز : نخرہ، غمزہ

روشن جبیں : چمکتی ہوئی پیشانی والا، مراد معشوق

مج دل میں : میرے دل میں

جیوں : جیسے

منیں : میں

اس غزل کا ایک امتیاز یہ ہے کہ پوری غزل کو پڑھ کر غم یا مایوسی کی کیفیت پیدا نہیںہوتی بلکہ شگفتگی کا احساس ہوتا ہے۔
اس غزل کا ایک امتیاز یہ بھی ہے کہ اس کے ہر شعر کا مصرع ثانی لفظ ’’کہ‘‘ سے شروع ہوتا ہے جو کہیں استعارہ اور کہیں تشبیہہ کی بنیاد بنتا ہے۔ یہ کہا جائے تو غلط نہ ہوگا کہ ولی کی شاعری (غزل) میں حسن اور لطف کا ایک بڑا ذریعہ ان کی تشبیہات ہیں۔

1۔ مطلعے میں ’’ظالم‘‘ کس کے لیے استعمال کیا گیا ہے؟

2۔ غزل کے تیسرے شعر میں ’’انکھیاں‘‘ اور ’’شراب‘‘ میں شاعر نے کیا تعلق پیدا کیا ہے؟

3۔ مقطعے کے دوسرے مصرع میں لفظ ’’میں‘‘ کی جگہ ’’منیں‘‘ کیوں استعمال کیا گیا ہے؟

مطلعے میں آتش، آب،گل اور گلاب کے باہمی تعلق پر اظہار خیال کیجیے۔
مقطعے میں ’’خیال یار بے پروا‘‘ کی ترکیب تین الفاظ پر مشتمل ہے۔ اسی طرح کیدو تراکیب بنائیے۔