غزل

ہے غلط گر گمان میں کچھ ہے

تجھ سوا بھی جہان میں کچھ ہے؟

دل بھی تیرے ہی ڈھنگ سیکھا ہے

آن میں کچھ ہے، آن میں کچھ ہے

ان دنوں کچھ عجب ہے میرا حال

دیکھتا کچھ ہوں، دھیان میں کچھ ہے

اور بھی چاہیے سو کہیے اگر

دلِ نامہربان میں کچھ ہے

دردؔ تو جو کرے ہے جی کا زیاں

فائدہ اس زیان میں کچھ ہے؟

مشق

گمان : خیال

آن : لمحہ،پل

زیاں : نقصان

درد کی یہ غزل سہل ممتنع کی بہترین مثال ہے۔ وہ شاعری سہل ممتنع کی شاعری کہلاتی ہے جس کو پڑھ کریہ احساس ہو کہ ایسا تو ہم بھی کہہ سکتے ہیں لیکن جب کہنے کی کوشش کی جائی تو کہنا دشوار ہوجائے۔
اس غزل کے مقطع کے پہلے مصرعے میں ’’زیاں‘‘ اور دوسرے مصرعے میں ’’زیان‘‘ لفظ آیا ہے۔ یہ ایک ہی لفظ ہے لیکن دوسرے مصرعے میں ’’گمان‘‘ اور’’جہان‘‘ کے قافیہ میں استعمال ہوا ہے اس لیے ’’ن‘‘ نقطہ کے ساتھ لکھا گیا ہے۔

1۔ مطلعے میں شاعر کس سے مخاطب ہے؟

2۔ دوسرے شعر میں ’’آن‘‘ سے کیا مراد ہے؟

3۔ مقطعے میں فائدہ اور زیان کے الفاظ کے استعمال میںکس صنعت کا لحاظ رکھاگیا ہے؟