میرتقی میرؔ
(1810 — 1722-23)
غزل
جس سر کو غرور آج ہے یاں تاجوری کا
کل اس پہ یہیں شور ہے پھر نوحہ گری کا
آفاق کی منزل سے گیا کون سلامت؟
اسباب لٹا راہ میں یاں ہر سفری کا
زنداں میں بھی شورش نہ گئی اپنے جنوں کی
اب سنگ مداوا ہے اس آشفتہ سری کا
لے سانس بھی آہستہ کہ نازک ہے بہت کام
آفاق کی اس کارگہ شیشہ گری کا
ٹک میرؔ جگر سوختہ کی جلد خبر لے
کیا یار بھروسا ہے چراغ سحری کا
مشق
لفظ ومعنی
تاجوری : بادشاہت، صاحب تاج ہونا
نوحہ گری : رونا، ماتم کرنا
سفری : مسافر
زنداں : قیدخانہ، جیل
شورش : ہنگامہ خیزی
جنوں : دیوانگی، کسی چیزکی دُھن
مداوا : علاج
آشفتہ سری : وحشت
کارگہ شیشہ گری : شیشے کی چیزیں بنانے کا کارخانہ
ٹک : ذرا
جگرسوختہ : کلیجہ پھنکا ہوا، غم زدہ
چراغ سحری : صبح کا چراغ جو بجھنے کے قریب ہو، قریب المرگ
غورکرنے کی بات
- غزل کے مطلعے میں اگرچہ کوئی اچھوتا مضمون بیان نہیں ہوا ہے لیکن انداز بیان کی خوبی سے انکار نہیں کیا جاسکتا۔ظاہری عظمت کے المناک انجام کو ناصحانہ انداز میں بیان کرنے کے بجائے شاعرنے صرف تاجوری، غرور، اور نوحہ گری یعنی دوانتہاؤں کا ذکر کرکے مضمون کو پراثربنادیا ہے۔دراصل یہی برجستگی اس شعر کا حسن ہے۔
- تیسرے شعر میں شورش اور آشفتہ سری میں جومناسبت ہے اور جنون اور شورش میں جو رعایت معنی ہے اُس نے شعر کے حسن کو دوبالا کردیا ہے۔مزید یہ کہ آشفتہ سری کے علاج کے لیے پتھرسے سرکو ٹکرانا خود جنون کی شدت کو ظاہر کرتا ہے۔
چوتھے شعر میں شیشہ گری کی مناسبت سے ’’لے سانس بھی آہستہ‘‘ کا ٹکڑا نہایت موزوں ہے، کیونکہ پگھلے ہوئے شیشے کو مختلف شکلیں دینے والی نلکی میں اگرزورسے پھونک ماردی جائے تو اس کا بکھرجانا یقینی ہے۔
سوالات
1. میرؔکے زمانے میں آگرہ شہرکا نام کیا تھا؟
2. غزل کے مطلعے میں آج اور کل سے کیا مراد ہے؟
3. ’’آفاق کی منزل سے گیا کون سلامت‘‘ میں آفاق کی منزل کے کیا معنی ہیں؟
4. مقطعے میں لفظ ’’ٹک‘‘ استعمال ہوا ہے۔آج کل اس لفظ کے بجائے کون سا لفظ استعمال ہوتا ہے؟