غالب آگرے میں پیدا ہوئے۔دادا ،باپ اور پھرچچا کی موت کے بعد ان کے نانا نے ان کی پرورش کی۔تیرہ سال کی عمر میں غالب کی شادی دِلّی کے ایک معزز خاندان میں ہوگئی۔شادی کے کچھ عرصے بعدوہ دِلّی آگئے اور آخری دم تک یہیں رہے۔

غالب اُردو کے عظیم شاعر تھے۔انھوں نے پہلے اسدؔ اور بعد میں غالبؔ تخلص اختیار کیا اور اسی تخلص سے مشہور ہوئے۔اُردو کے ساتھ ساتھ فارسی شاعری میں بھی غالب کا مرتبہ بہت بلند ہے۔ان کا اُردو کلام ان کے فارسی کلام سے بہت کم ہے۔

غالب کی شاعری کے بارے میں دوباتیں مشہور ہیں۔ایک تو یہ کہ وہ فلسفی شاعرتھے اور دوسری یہ کہ ان کا کلام بہت مشکل ہے۔ان باتوں میں تھوڑی بہت سچائی ضرور ہے۔ غالب کی شاعری اس معنی میں فلسفیانہ ہے کہ ان کے کلام میں زندگی اور کائنات کی بہت سی نازک اورباریک باتوں کی طرف اشارے ملتے ہیں۔یہ بھی صحیح ہے کہ غالب کے کلام میں فکر کا عنصر زیادہ ہے۔

ان کی شاعری ہمیں نئی نئی دنیاؤں کی سیرکراتی ہے۔زندگی کا کوئی مرحلہ ایسا نہ ہوگا جس پر ہم ان کے کسی نہ کسی شعرکے ذریعے اظہار رائے نہ کرسکیں۔

غالب نے قصیدہ، رباعی اور قطعات وغیرہ بھی کہے۔لیکن غزل گو کے علاوہ قصیدہ گو کی حیثیت سے بھی ان کا مرتبہ بہت بلند ہے۔خطوط نگاری میں بھی غالبؔ نے بڑی شہرت حاصل کی ۔ان کے اُردو خطوط کے دو مجموعے ’’اُردوئے معلی ‘‘ اور ’’عودِ ہندی‘‘ بہت معروف ہیں۔

غزل

مشق

لفظ ومعنی

غورکرنے کی بات

سوالات