عربی میں قصیدہ کا مطلب ہے: ’’دل دار‘‘ یا ’’گاڑھا گودا‘‘ کچھ علما کے نزدیک قصیدہ ’’قصد‘‘ سے بنا ہے کیونکہ شاعر ارادہ کرکے ایک خاص موضوع پر پوری توجہ کے ساتھ فکر شعر کرتا ہے، اس لیے اس صنف شعر کا نام قصیدہ قرار پایا۔اُردو میں قصیدہ اُس صنف سخن کو کہتے ہیں جس میں کسی کی مدح یا مذمت کی جائے۔ لیکن کبھی کبھی قصیدوں میں اور بھی مضمون باندھے گئے ہیں۔ اُردو میں عام طور پر قصیدے کو کسی مربی یا بزرگ کی تعریف بیان کرنے کے لیے استعمال کیا گیا ہے۔

غزل کی طرح قصیدے کا پہلا شعر ہم قافیہ ہوتا ہے جو مطلع کہلاتا ہے۔باقی اشعار کے دوسرے مصرعے، مطلع کی مناسبت سے ہم قافیہ ہوتے ہیں۔ کبھی کبھی قصیدے میں ایک سے زیادہ مطلعے بھی ہوتے ہیں۔ غزل کے برعکس یہ زائد مطلعے عموماً اشعار کے بیچ میں ا ٓتے ہیں۔قصیدے میں اشعار کی تعداد مقرر نہیں۔ غزل کی طرح قصیدہ بھی ہر بحرمیں لکھا جاسکتا ہے۔ قصیدے کے بارے میں عام خیال ہے کہ اس کی زبان پر شکوہ علمی اور بلند آہنگ ہوتی ہے۔

قصیدے کے درج ذیل اجزائے ترکیبی ہیں۔

1. تشبیب: اصل موضوع یعنی مدح یا مذمت سے پہلے شاعر تمہید کے طور پرجو اشعار کہتا ہے، انھیں تشبیب کہا جاتا ہے۔ اس حصے میں بہار،شباب وشراب، حسن و عشق،  فلسفہ و حکمت اور وعظ ونصیحت یا اسی قسم کے کسی اور موضوع سے متعلق مضامین نظم کیے جاسکتے ہیں۔
2.  گریز:  جب شاعر تمہید سے آگے بڑھ کر مدح کی طرف آتا ہے تو وہ تشبیب اور مدح میں تعلق یا ربط پیدا کرنے کے لیے ایک شعریا چند اشعار کہتا ہے جن سے پہلے اور تیسرے حصے کے درمیان کسی اجنبیت کا احساس باقی نہیں رہتا۔اُس ربط وتعلق پر مبنی اشعار کواصطلاحاً ’’گریز‘‘ کہتے ہیں۔ موڑ کا اصطلاحی نام ’’گریز‘‘ ہے۔
3. مدح یا مذمت: یہ قصیدے کا اصل جز ہے۔ مدح میں عام طور پر ممدوح کے جاہ و جلال، عدل وانصاف، شجاعت وسخاوت اور علم وفضل وغیرہ کی تعریف، مبالغہ آمیز انداز میں کی جاتی ہے۔ ساتھ ہی ممدوح کے ہاتھی، گھوڑے اور تلوار وغیرہ کی تعریف میں بھی اشعار کہے جاتے ہیں۔ مذمت میں اس شخص کی ذات سے متعلق عیوب اور برائیاں بیان کی جاتی ہیں۔
4. حسن طلب یامدعا:  قصیدے کے اختتامی حصے سے پہلے، شاعر کبھی کبھی ایسے اشعار بھی کہتاہے جن کا مقصد ممدوح سے صلہ،بحشش اور اعزاز واکرام حاصل کرنا ہوتا ہے۔ اس جز کوحسن طلب یامدعا کہتے ہیں۔
5. دعا :یہ قصیدے کا آخری جز ہوتا ہے۔ اس میں شاعر اپنے ممدوح کی صحت وسلامتی اور درازی عمر کے لیے دعا کرتا ہے۔

اُردو قصیدہ نگاری میں سوداؔ کا مقام سب سے بلند قراردیا جاتا ہے۔ ان کے بعد ذوقؔ، غالبؔ اور مومنؔ کے نام آتے ہیں۔ ان کے بھی بعد کے لوگوں میں منیرؔ شکوہ آبادی، نسیمؔ دہلوی، محسنؔ کاکوروی اور امیرؔ مینائی مشہور قصیدہ گو ہیں۔ دکن میں نصرتیؔ اُردو کے عظیم ترین شاعروں اور قصیدہ نگاروں میں شمار کیے جاتے ہیں۔

شامل کتاب قصیدہ مرز ا غالب نے بہادر شاہ ظفر کی شان میں لکھا ہے۔

قصیدہ

مشق

لفظ ومعنی

غور کرنے کی بات

سوالات

عملی کام