میر ببر علی نام، انیسؔ تخلص تھا۔ فیض آباد میں پیدا ہوئے۔ انیسؔ کے اجداد دہلی کے رہنے والے تھے۔ اُن کے پردادا میر غلام حسین ضاحکؔ دہلی کی تباہی کے بعد اپنے بیٹے میرحسنؔ کے ساتھ دہلی چھوڑ کر فیض آباد چلے آئے تھے۔ میر انیسؔ نے اپنے والد میر خلیقؔ کے زیر سایہ تعلیم و تربیت پائی۔ میر نجف علی فیض آبادی اور مولوی حیدر علی لکھنوی سے بھی تعلیم حاصل کی۔ انیسؔ کی والدہ بھی ایک تعلیم یافتہ خاتون تھیں اورفارسی زبان نیز مذہبی امور سے کافی واقفیت رکھتی تھیں۔ انیسؔ کی ابتدائی تعلیم وتربیت میں اُن کی والدہ کا بھی بڑا ہاتھ ہے۔

میر انیسؔ کا مطالعہ وسیع تھا۔ عربی اور فارسی میں اچھی دستگاہ رکھنے کے ساتھ ساتھ وہ اُن تما م علوم سے خاطر خواہ واقف تھے جو اُس زمانے میں رائج تھے۔قرآن و حدیث، عروض، منطق، فلسفہ، طب، رمل وغیرہ سب میںا نھوں نے اچھی استعداد بہم پہنچائی تھی۔ اِن کے علاوہ وہ فنِ سپہ گری اورفن شہ سواری سے بھی بہ خوبی واقف تھے۔ اِن فنون کی تعلیم انھوں نے باقاعدہ طور پر اُس زمانے کے مانے ہوئے استادوں سے حاصل کی تھی۔

 میر انیسؔ نہایت خوددار اور پابند وضع شخص تھے۔ وہ اپنے خاندان کی عزت اور اپنے بزرگوں کے علم وفضل پر بڑا فخر کرتے تھے۔ مرثیہ پڑھتے وقت وہ اپنی آواز کے اُتار چڑھاؤ اور چہرے کی حرکات وسکنات سے سارا منظر دل نشین کردیتے تھے اور مجلس میں سماں باندھ دیتے تھے۔میر انیسؔ کے والد آخری عمر میں لکھنؤ چلے آئے۔اُن کے ساتھ انیسؔ بھی آگئے اور یہیں مستقل سکونت اختیار کرلی۔ لکھنؤ ہی میں ان کی وفات ہوئی۔انیسؔ ایک قادر الکلام شاعر اور ماہر فن کار تھے۔ زبان پرانھیں بے پناہ قدرت حاصل تھی۔ لفظوں کے انتخاب اوراستعمال میں ان کا کوئی جواب نہیں تھا۔ وہ ایک بات کوکئی کئی ڈھنگ سے ادا کرنے میں ماہر تھے ۔مشکل الفاظ اور عربی فارسی تراکیب اور محاورات کو بھی بے حد لطیف پیرایے میں نظم کرنے میں انھیں ملکہ حاصل تھا ۔نازک خیالات اور لطیف سے لطیف کیفیات کی ترجمانی وہ نہایت مناسب الفاظ اور بے حد موثر انداز میں کرتے ہیں۔ 

مشق

لفظ ومعنی

غور کرنے کی بات

سوالات

عملی کام