آپ نقشوں سے واقف ہوں گے جنہیں آپ نے سماجی علوم کی اپنی بیشتر کتابوں میں زمین یا اس کے کسی حصے کی نمائندگی کرتے ہوئے دیکھا ہے۔آپ یہ بھی جانتے ہیں کہ زمین کی شکل ارض نما(geoid) (ابعاد ثلاثہ) ہے اور گلوب اس کی نمائندگی بہتر طور پر کر سکتا ہے(شکل 1.1)۔دوسری طرف ایک نقشہ پوری زمین یا اس کے کسی حصے کا کاغذ کے ٹکڑے پر ایک آسان سی نقل ہے۔دوسرے لفظوں میں یہ سہ ابعادی(Three   dimensionals) زمین کی دو ابعادی(Two dimensionals) شکل ہے۔ اس طرح نقشہ ، اظلال نقشہ(Map Projections) کے طریقوں کو استعمال کرکے بنایا جا سکتا ہے(دیکھیں باب4) ۔ چونکہ زمین کے تمام خطہ وخال کو ان کے صحیح سائز اورشکل میں پیش کرنا ناممکن ہے اس لئے نقشے کو پیمانہ کم کر کے بنایا جاتا ہے۔ آپ اپنے اسکول کے احاطے کا تصور کریں۔ اگر آپ کے اسکول کا کوئی پلان یا نقشہ اس کے حقیقی سائز پر بنایا جائے تو یہ اتنا ہی بڑا ہوگا جتنا کہ اسکول کا احاطہ۔اس لیے نقشوں کوایسے پیمانے اور پروجیکشن کو استعمال کر کے بنایا جاتا ہے جس سے کہ کاغذ پر بنا ہر نقطہ زمین کی اصلی حالت کے مطابق ہو۔ اس کے علاوہ مختلف خط وخال کی نمائندگی کو بھی علامات، رنگوں اورعکسوں(Shades) کا استعمال کر کے آسان بنایا جاتا ہے۔اس لیے نقشے کی تعریف یوں کی جا سکتی ہے کہ ’’نقشہ پوری روئے زمین یا اس کے کسی حصے کی ہموار سطح پر کم کئے گئے پیمانے کے مطابق انتخابی، علامتی اور عمومی نمائندگی ہے‘‘۔یہ بھی سمجھ لینا چاہئے  کہ پیمانے کے بغیر، خطوط اور کثیرالاضلاع کے سادہ جال کو نقشہ نہیں کہا جا سکتا۔اسے صرف خاکہ کہہ سکتے ہیں(شکل 1.2 )۔ موجودہ باب میں ہم نقشوں کے ضروری لوازمات، ان کی اقسام اور استعمال کا مطالعہ کریں گے۔

نقشہ بنانے کے ضروری لوازمات