باب 2

خود کو سمجھنا

(Understanding the Self)

A۔   مجھے کیا چیز’میں‘ بناتی ہے(What makes me"I")

2A.1  تعارف

ہماری بہت سی باتیں ہمارے ماںباپ، بھائی بہن اور دیگر رشتے داروں اور دوستوں میں مشترک ہوتی ہیں۔ پھر بھی ہم میں سے ہر شخص دوسروں سے بالکل مختلف اور الگ شخصیت کا حامل ہوتا ہے۔ اپنے منفرد ہونے کا احساس ہمیں اپنی ذات کا احساس یعنی’میں‘ کا احساس دلاتا ہے۔ یہ ’میں‘(I)،تم،’وہ‘اور ’دوسروں‘ سے مختلف ہوتا ہے ۔ ذات کا یہ احساس ہمارے اندر کیسے نشو و نما پاتاہے؟ ہم اپنے بارے میں کیا سوچتے ہیں اور کس طرح اظہار ذات کرتے ہیں۔ اور کیا یہ چیز وقت کے ساتھ بدلتی بھی ہے؟ذات(Self) کے عناصر کیا ہیں؟ ہم ذات کا مطالعہ کیوں کریں؟ کیا ہماری ذات لوگوں کے  ساتھ رسم و راہ پر اثر انداز ہوتی ہے؟اس اکائی میں ہم ذات سے متعلق اس طرح کے اور اس کے علاوہ دیگر دل چسپ پہلوؤں کا مطالعہ کریں گے۔

ذات کے تصور سے وابستہ دو اور تصورات شناخت اور شخصیت(Identity and personality) بھی ہیں۔ ماہرین نفسیات اور ان تینوں تصورات کے درمیان امتیاز کرتے ہوئے ان کی الگ الگ تعریف بیان کرتے ہیں۔ لیکن یہ تصورات پیچیدہ ہو کر بھی ایک دوسرے سے مربوط ہیں اور عام طور پر ہم ان اصطلاحات کو ایک دوسرے کے متبادل کے طور پر استعمال کرلیتے ہیں۔

2A.2  ذات کیا ہے؟(?What is Self)

ویبسٹر کی تھرڈ نیو انٹر نیشنل ڈکشنری میں Self(ذات) کے معنی کے تحت500الفاظ دیئے گئے ہیں۔’ذات‘ کے مفہوم میں یہ پہلو پوشیدہ ہے کہ ہم کون ہیں اور کیا چیز ہمیں دوسروں سے الگ کرتی ہے۔ نو بلوغت کے دور میں یعنی عمر کا وہ حصہ جس سے آپ گزر رہے ہیں آپ ہمیشہ سے زیادہ یہ سوچنا شروع کر دیتے ہیں کہ میں کون ہوں اور کیا چیز ہے جو ’مجھے‘ دوسروں ‘ سے الگ کرتی ہے۔ ہم اپنے آُ پ کو سمجھنے کی کوشش عمر کے کسی اور حصے سے زیادہ اس حصے میں کرتے ہیں ۔ ہو سکتا ہے آُ پ میں سے کچھ لوگوں نے اس سوال پر بہت غور کیا ہو اور ایسے بھی لوگ ہو سکتے ہیں جو اس سے واقف ہی نہ ہوں کہ وہ ان پہلوؤں پر غو کر رہے تھے۔

سر گرمی1:

اپنی ذات کا بیان کرنے کے لئے آپ نے جو باتیں لکھی ہیں ان کا دوبارہ جائزہ لیں۔ ان میں سے کچھ جملوں میں آپ نے اپنے جسمانی پہلوؤں کو اجاگر کیا اور اپنے جسمانی وجود کو بیان کیا ہے۔ کچھ جملوں میں آپ نے اپنے احساسات اور جذبات کا اظہار کیا، کچھ میں آپ نے اپنی ذہنی صلاحیتوں کو بیان کیا اور کچھ جملوں میں ہو سکتا ہے آپ نے دوسروں کے حوالے سے اپنی ذات کا بیان کیا ہو، یعنی اس حوالے سے کہ آپ کون کون سے کردار نبھاتے ہیں اور روز مرہ زندگی میں بیٹے ،بیٹی،بیوی،بہن ،طالب علم وغیرہ رشتوں کی ذمے داری پوری کرتے ہیں یا یوں کہئے کہ آپ نے خاندان اور سماج میں اپنے رشتوں کے حوالے سے اپنی ذات کو بیان کیا ہے۔ آپ میں سے بعض لوگوں نے خود کا اپنی اہمیت(Potential) یا صلاحیتوں(Capabilities) کے حوالے سے اور بعض نے اپنے عقائد کے  حوالے سے بیان کیا ہوگا۔ 

بعض پہلوؤں سے آ پ نے خود کوئی کام کرنے والا یعنی عامل بتایا ہوگا، ایسا شخص جو کوی کام انجام دیتا ہو۔جبکہ بعض دیگر پہلوؤں سے آپ نے خود کو غور وفکر کر نے والے شخص کے طور پر پیش کیا ہوگا۔اس طرح آپ دیکھ سکتے ہیں کہ ذات کے کئی پہلو ہیں۔ مجموعی طور پر یہ کہا جا سکتا ہے کہ ذات کی یہ مختلف جہتیں انفرادی بھی ہیں اور اجتماعی بھی۔انفرادی ذات کے پہلوؤں کا تعلق صرف آپ کی ذات سے ہے جب کہ اجتماعی ذات کا تعلق ان پہلوؤں سے ہے جس میں آپ کے ساتھ دوسرے لوگ بھی شریک ہوں۔مثلاً اشتراک عمل یا حصے داری، تعاون ، حمایت اور اتحاد وغیرہ۔

ہم کہہ سکتے ہیں کہ لفظ ذات کسی شخص کے تجربات ،نظریات، خیالات اور احساسات کے مجموعے کانام ہے ، یہ ایک ایسا امتیازی طریقہ ہے جس کے ذریعے ہم اپنی ذات کا اظہار کر سکتے ہیں۔ ہم اپنے بارے میں جو کچھ سوچتے ہیں وہی ہماری ذات کا تصور ہے۔

آپ نے اپنے اور دوسروں کے حوالے سے تصور ذات(Self -Concept) اور عزت نفس(Self -esteem) کے بارے میں سنا بھی ہوگا اور ان اصطلاحات کا استعمال بھی کیا ہوگا۔ جب آپ ان اصطلاحوں کو استعمال کرتے ہیں تو آپ کی مراد کیا  ہوتی ہے؟ ذیل کے خانے میں اپنے خیالات لکھئے اور خانے ک نیچے ان اصطلاحات کی تشریح پڑھ کر ان سے بحث کیجئے ۔

تصور ذات اور عزت نفس، یہ دونوں’شناخت‘(Identity) کے عناصر ہیں۔ تصور ذات اپنی ذات کے بیان پر مبنی ہوتا ہے ۔ تصور ذات اس سوال کا جواب دیتا ہے کہ ’میں کون ہوں؟ ہمارے تصور ذات میں ہماری خوبیاں، احساسات اور خیالات اور ہماری صلاحیتیں(یعنی یہ کہ ہم کیا کرنے کے اہل ہیں) شامل ہیں۔

تصور ذات کا ایک اہم پہلو عزت نفس ہے۔ عزت نفس در اصل خود اپنے اندازہ قدر یااپنے اعمال کے جائزے کی طرف اشارہ کرتا ہے جو ہم ان معیاروں کے مطابق کرتے ہیں جو ہم نے اپنے لئے اختیار کئے ہیں اور جو کافی حد تک معاشرے سے متاثر ہوتے ہیں۔ یہی انسان کا خود اپنا اندازۂ قدر(Self- evaluation) کرنا ہے۔

سرگرمی2

کیا آپ وہی شخص ہیں جو پانچ سال پہلے تھے؟ اس بات پر غور کیجئے اور پھر اپنے خیالات کو ذیل میں لکھئے۔ اپنے خیالات کی حمایت میں دلائل بھی دیجئے۔

2A.3   شناخت کیا ہے؟

   (What is Identity)

 سر گرمی 2پر نظر ڈالئے ۔آپ کس نتیجے پر پہنچے؟ ہاں، آپ وہی شخص ہیں ، یا نہیں۔آپ وہی شخص نہیں ہیں! یا پھر آپ کا جواب ہاں اور نہیں دونوں میں ہے۔زیادہ امکان یہ ہے کہ آپ کا جواب ہاں اور نہیں دونوں میں ہو۔ وقت گزرنے کے ساتھ ساتھ آپ کے جسم میں بہت سی تبدیلیاں آ گئی ہیں۔ گزرے ہوئے زمانے کے مقابلے میں اب آپ زیادہ لوگوں کو جانتے ہیں اور ان سے کسی حد تک آپ کے تعلقات بھی ہو گئے ہیں۔حالات و واقعات کو سمجھنے میں اور ان کی جانب اپنے رد عمل کے اظہار میں بھی آپ میں فرق آیا ہے ، آپ کے عقائد ، آپ کی اقدار اور آپ کی پسند نا پسند میں بھی تبدیلیاں آئی ہوں گی۔ اس طرح حقیقتاً آپ اس کا یقینی شعور رکھتے ہیں کہ جہاں تک آپ کی یاد داشت کام کرتی ہے آپ وہی شخص ہیں جو ایک سال پہلے تھے ۔ پھر بھی کئی برسوں تک ہماری زندگی کو متاثر کرنے والی کئی تبدیلیوں اور نا ہمواریوں کے باوجود اپنی ذات کے بارے میں ہم میں بیشتر لوگوں کا احساس زندگی بھر یکساں رہتا ہے۔ دوسرے لفظوں میں ہم سب اپنی شناخت کا ایک شعور رکھتے ہیں۔ یعنی یہ شعور کہ ہم کون ہیں، تمام زندگی ہمارے ساتھ رہتا ہے۔ اپنی ذات ہی کی طرح ہم انفرادی شناخت اور اجتماعی شناخت کی بھی بات کر سکتے ہیں۔ انفرادی شناخت میں کسی شخص کی یہ خصوصیات اور صفات شامل ہیں اور جو اس کو دوسروں سے مختلف بناتی ہیں۔ اجتماعی شناخت کسی شخص کی زندگی کے ان پہلوؤں پر مبنی ہوتی ہے جن کا تعلق اس کے پیشہ ورانہ،معاشرتی یا ثقافتی دائروں سے ہوتاہے۔ اس طرح جب آپ اپنے کو ایک ہندوستانی کی حیثیت سے دیکھیں گے تو آ پ خود بخود اس ملک کے باشندوں کے حلقے سے خود کو وابستہ کر لیں گے۔ ایسے ہی جب آپ اپنے آپ کو ایک گجراتی یا میزو کی حیثیت سے متعارف کرائیں گے تو آپ اپنے اندر ہندوستان کی دیگر ریاستوں کے لوگوں کی خصوصیات سے مختلف قسم کے خصوصیات پا رہے ہوں گے اور ان کا اظہار بھی کریں گے۔ اس طرح گجراتی ہونا آپ کی اجتماعی شناخت کی ایک ایسی ہی جہت ہے جیسے ہندو، مسلمان، سکھ یا عیسائی یا اسی طرح استاد، کسان یا وکیل ہونا۔

اس طرح ذات اپنی نوعیت کے اعتبار سے کئی پہلو رکھتی ہے۔ انسان جیسے جیسے بڑا ہوتا جاتا ہے اور شیر خوار(Infant) سے بالغ(Adolescent) ہو جاتا ہے تو اس میں تبدیلیاں رونما ہوتی ہیں۔ اگلے باب میں ہم شیر خوارگی(Infancy)، بچپن(Childhood) اور نو بلوغت کے دوران’ذات‘ کی کچھ خصوصیات کو بیان کریں گے ۔

کلیدی اصطلاحات

ذات(Self)، تصور ذات(Sefl-concept)، عزت نفس(Sefl-esteem)، شناخت(Identity)

•   سوالات برائے نظر ثانی

1۔    وضاحت کیجئے کہ آپ اصطلاح’ذات‘(Self) سے کیا سمجھتے ہیں؟ سے کیا سمجھتے ہیں؟ اس کی مختلف پہلوؤں سے بحث کیجئے اور مثالیں بھی دیجئے۔

2۔    ’ذات‘ کو سمجھنا کیوں اہم ہے؟

                                                         باب - 2

B۔  ذات کی نشو و نما اور خصوصیات

ّ(Development and Characteristics of  the Self)

 ’ذات‘ کوئی ایسی چیز نہیں ہے جو پیدائشی ہو بلکہ اسے آپ خو د تشکیل دیتے ہیں اور جوں جوں بڑے ہوتے ہیں اس کا بھی ارتقا ہوتا رہتا ہے۔ اس سیکشن میں آپ شیر خوارگی(Infancy) ، ابتدائی بچپن(Early Childhood)، درمیانی بچپن(Middle.childhood) اور نو بلوغت کے دوران’ذات‘ کی نشو و نما اور خصوصیات کے بارے میں پڑھیں گے۔

2B.1 شیر خوارگی کے دوران ذات(Self During Infancy)

پیدائش کے وقت ہم اپنے منفرد وجود(Unique Existence) سے واقف نہیں ہوتے۔ کیا آپ کو اس بات پر تعجب ہوتاہے؟ اس کا مطلب یہ ہے کہ کسی شیر خوار میں یہ شعور نہیں ہوتا کہ وہ اپنے سے باہر کی تمام دنیا سے الگ اور مختلف ہے۔ یعنی اس کے اندر خود آگاہی(Self .awareness) یا خود فہمی(Self-understanding) یا خود شناسی(Self-recongnition) نہیں ہوتی۔ ان تینوں اصطلاحوں سے مراد ذات کی ذہنی نمائندگی(Mental representation) یا ذہنی تصویر(Mental Picture) ہے۔ کوئی شیر خوار جب اپنا ہاتھ اپنے چہرے کے سامنے لاتا ہے تواسے اس کا علم نہیں ہوتا کہ یہ اسی کا ہاتھ ہے اور یہ کہ وہ آس پاس کی چیزوں اور لوگوں سے جدا ہے۔ ذات کا احساس شیر خوارگی کے دوران بتدریج بڑھتا ہے اور ہم تقریباً18 ماہ کی عمر میں اپنے آپ کو پہچاننے لگتے ہیں۔ذیل میں ایک  دلچسپ تجربہ پیش کیا جا رہا ہے جو 14سے 24ماہ کی عمر والے بچوں پر کیا گیا ہے ۔ آپ خود بھی آزما کر دیکھئے۔

سرگرمی1

شیر خوار بچے دوسرے سال کے نصف آخر میں شخصی ضمیروں-’میں‘،’میرا‘،’مجھے‘۔ کا استعمال شروع کر دیتے ہیں۔ وہ ان ضمائر کا استعمال یا تو لوگوں اور چیزوں سے متعلق ملکیت کے اپنے احساس کو ظاہر کرنے کے لئے کرتے ہیں۔ جیسے’’میرا کھلونا‘‘ یا ’’میری ماں‘‘۔ یا پھر خود کو یا اپنے ان کاموں کو جو وہ کر رہے ہیں یا اپنے تجربات کو بیان کرنے کے لئے کرتے ہیں۔ جیسے’’میں کھانا‘‘۔ اسی زمانے میں شیر خوار بچے تصویر میں خود کو پہچاننا بھی شروع کر دیتے ہیں۔

2B.2 ابتدائی بچپن کے دوران ذات

(Self During Early Childhood)

بچے جب تین سال کے ہو جاتے ہیں تو وہ بڑی روانی سے بولنے لگتے ہیں۔ اب ہمیں بچوں کی ’’خود فہمی‘‘ کو سمجھنے کے لئے صرف ان کی خود شناسی پر ہی بھروسہ کرنے کی ضرورت نہیں ہوتی۔ اب ہم بچوں سے خود ان کے بارے میں گفتگو کرکے زبان کے وسائل بھی استعمال کر سکتے ہیں۔محققین نے پتا لگایا ہے کہ چھوٹے بچوں میں خود کو سمجھ لینے کی درج ذیل پانچ اہم صورتیں ہوتی ہیں۔

1۔    ابتدائی بچپن میں بچے خود کو دوسروں سے ممتاز کرنے کے لئے اپنی ذات یا ان چیزوں کو جو ان کی ملکیت میں ہوتی ہیں بیان کرنے لگتے ہیں۔ مثلاً وہ وضاحتی الفاظ جیسے ’لمبا‘ یا’بڑا‘ وغیرہ کا استعمال کرتے ہیں ، یا اپنے کپڑوں یا کھلونوں اور اپنے دیگر چیزوں سے متعلق الفاظ ادا کرتے ہیں۔ اس بارے میں ان کے بیانات مطلق(Absolute) نوعیت کے ہوتے ہیں ۔ اس کا               مطلب یہ ہے کہ وہ دوسروں سے اپنا مقابلہ نہیں کرتے۔ مثال کے طور پر ’’میں کرن سے لمبا ہوں‘‘ کہنے کے بجائے بچہ کہے گا’’میں لمباہوں‘‘۔

2۔     بچے اپنے بارے میں وہی سب کہتے ہیں جو وہ کہہ سکتے ہیں۔ مثال کے طور پر بچے جو کھیل کھیلتے ہیں ان ہی کے بارے میں بات کرتے ہیں۔ جیسے’’میں سائیکل چلا سکتا ہوں‘‘۔’’میں گھر بنا سکتا ہوں‘‘یا’’میں گن سکتا ہوں‘‘۔ اس طرح ان کی ’خود فہمی‘‘ خود ان کی سرگرمیوں کے بیانات پرمشتمل ہوتی ہے۔

3۔    اپنے بارے میں بچوں کے بیانات’ٹھوس‘الفاظ میں ہوتے ہیں یعنی وہ خوداپنی وضاحت، ان باتوں کے حوالے سے کرتے ہیں جنہیں وہ  انجام دے سکتے ہیں یا ان چیزوں کے حوالے سے جنہیں وہ دیکھ سکتے ہیں مثلاً وہ کہیں گے’’ میرے پاس ایک ٹی وی ہے‘‘۔

4۔    وہ اکثر اپنے بارے میں اندازہ لگانے میں مبالغہ کرتے ہیں۔ مثلاً کوئی بچہ کہہ سکتا ہے ’’میں کبھی نہیں ڈرتا‘‘ یا’’ میں نظمیں جانتا ہوں‘‘ جب کہ ممکن ہے اس کو وہ نظمیں پوری یاد نہ ہوں۔

5۔     چھوٹے بچے یہ سمجھنے سے قاصر ہوتے ہیں کہ ان میں مختلف خصوصیات ہو سکتی ہیں۔ یعنی یہ کہ وہ مختلف موقعوں پر ’اچھے‘، یا ’برے‘،’خراب‘اور ’عمدہ‘ ہو سکتے ہیں۔

ذیل میں ایک بالغ شخص اور تین سا ل آٹھ ماہ کی ایک لڑکی رادھا کے درمیان بات چیت پیش کی جا رہی ہے ۔ اس بات چیت سے خود اپنے بارے میں بچی کے خیالات کا علم ہوتا ہے ۔ یہ گفتگو اس بالغ شخص اور بچی کے درمیان سوال و جواب کی شکل میں دی جا رہی ہے۔

 بالغ شخص اپنے بارے میں کچھ بتاؤ

رادھا   میں کھانا کھاتی ہوں،میں گاجر کھاتی ہوں، روٹی بھی کھاتی ہوں، میں گیند ۔ بلا کھیلتی ہوں،تین دن بعد میری سالگرہ ہوگی کیوں کہ میں جنوری میں پیدا ہوئی، میں قطار میں کھڑی ہوتی ہوں، میں ممی کے ساتھ پڑھتی ہوں۔

بالغ  شخص اگر کوئی تم سے پوچھے کہ ’رادھا کیسی بچی ہے ، تو تم کیا کہو گی؟

رادھا   میں اچھی ہوں کیوں کہ میں لکھتی بھی ہوں( بالغ شخص نے کچھ اور بتانے کو کہا لیکن بچی نے کچھ نہیں کہا)

بالغ   شخص تمہاے ممی پاپا کو تمہاری کون سی بات اچھی لگتی ہے؟

رادھا   میں اچھی باتیں کرتی ہوں اوراچھی اچھی کہانیاں سناتی ہوں۔

بالغ  شخص تمہیں اپنے بارے میں کیا اچھا لگتاہے؟

رادھا  مجھے اپنے گلابی جوتے اچھے لگتے ہیں، بے بی اچھا لگتا ہے، اپنی سہیلیاں اچھی لگتی ہیں۔

بالغ   شخص کچھ اور بتاؤ؟

رادھا   میری سمجھ میں  کچھ نہیں آ رہا ۔۔۔۔۔۔مجھے اپنے بارے میں کچھ نہیں معلوم۔

2B.3   درمیانی بچپن کے دوران ’ذات‘

(Self During Middle Childhood)

اس دور میں اپنے بارے میں بچوں کے اندازے یا تخمینے زیادہ پیچیدہ (Complex) ہو جاتے ہیں۔ ایسی پانچ کلیدی تبدیلیاں ہیں جن سے اس بڑھتی ہوئی پیچیدگی کا پتہ چلتا ہے۔

1۔   اب بچہ اپنی داخلی خصوصیات(Internal Characteristics) بیان کرنا شروع کر دیتا ہے۔اگر بچہ اپنے بارے میں کچھ بتاتا ہے تو زیادہ تر اپنی نفسیاتی خصوصیات مثلاً اپنی ترجیحات یا ذاتی اوصاف(Personality Traits) کا اظہار کرتا ہے۔ اب اس سے یہ توقع نہیں ہوتی کہ وہ اپنی جسمانی خصوصیات کا بیان کرے۔ اس طرح بچہ کہہ سکتا ہے’’میں دوستی کرنے میں اچھا ہوں‘‘، ’’میں محنت کر سکتا ہوں اور اپنا ہوم ورک وقت پر پورا کر لیتا ہوں‘‘۔

2۔   بچوں کےبیانات میں سماجی بیانات اور سماجی شناخت(Social descriptions and identity) شامل ہو جاتے ہیں۔ بچے اب اپنے بارے میں ان حلقوں کے حوالے سے وضاحت کر سکتے ہیں جن سے ان کا تعلق ہو مثلا’’میں اسکول کے اندر میوزک پارٹی میں ہوں‘‘۔

3۔    اب بچے سماجی موازنے(Social Comparisons) کرنے لگتے ہیں اور مطلق الفاظ کے استعمال کے بجائے موازنہ کر کے خود کو دوسروں سے ممتاز کرتے ہیں۔ اب وہ جو کچھ کرتے ہیں اس کا موازنہ دوسروں کے کاموں سے کرنے لگتے ہیں۔ مثلا’’ میں کرن سے تیز دوڑ سکتا ؍ سکتی ہوں‘‘۔

4۔    اب بچے حقیقی ذات (Real Self) اور مثالی ذات(Ideal Self) میں امتیاز کرنے لگتے ہیں۔ وہ اپنی حقیقی صلاحیتوں اور ان صلاحیتوں میں فرق کرنے لگتے ہیں جن کو وہ حاصل کرنا چاہتےہیں یا جن کو وہ زیادہ اہم سمجھتے ہیں۔

5۔   اسکول جانے سے پہلے کے بیانا ت کے مقابلے میں اب ان کے بیان زیادہ حقیقت پسندانہ (Realistic) ہوتے ہیں۔ ایسا اس لئے ہو سکتا ہے کیوں کہ ان میں چیزوں اور حالات کو دوسروں کے نقطہ نظر سے دیکھنے کی صلاحیت پیدا ہو جاتی ہے۔

2B.4   نو بلوغت کے دوران ذات(Self during Adolescence)

 نو بلوغت کے دوران ’ذات‘ کی فہم مسلسل پیچیدہ ہوتی جاتی ہے۔ نو بلوغت کا زمانہ پہچان کی نشو و نما(Identity Development) کے لئے بہت اہم ہوتا ہے۔ پیچیدہ تر ہوتی جانے والی اس ’خود فہمی‘ کی خصوصیات کیا ہیں؟ ہم پہلے دو پہلوؤں کا ذکر کرتے ہیں اور پھر نو بالغوں کی ’’ذات‘ کی خصوصیات سے بحث کریں گے۔

سرگرمی2

ایک 5سال، ایک 9سال اور ایک13سال کے بچے سے دوستی کیجئے۔ ان سے کہیئے کہ وہ اپنے بارے میں کچھ بتائیں اور جو کچھ وہ کہیں اس کو لکھتے جائیے۔ کیا آپ کو لگتا ہے کہ ان کے خود کے بارے میں بیانات ان ہی بیانات جیسے ہیں جو آپ نے سبق کے اس حصے میں پڑھا ہے؟

نو بلوغت پہچان کی نشو و نما کے لئے اہم زمانہ کیوں ہے؟

ایک مشہور ماہر نفسیات ایرک ایچ ایرکسن(Erik H. Erickson) کے مطابق شیر خوارگی سے لے کر بڑھاپے تک کی نشو و نما کے چاروں مرحلوں میں ہمیں کچھ اہم کام انجام دینے ہوتے ہیں جن کے نتیجے میں ہم نشو و نما کے اگلے مرحلے میں قدم رکھتے ہیں۔ مثال کے طور پر شیر خوارگی کے اواخر اور ابتدائی بچپن کے اوائل میں (دو سے چار سال کی عمر کے درمیان) سب سے اہم کام اجابت اور مثانے (bowl and bladder) پر ضبط رکھنا ہوتا ہے۔ اس کے بغیر بچے کے لئے سماجی سر گرمیوں میں حصہ لینا نا ممکن ہے۔ ایرکسن کے مطابق نوجوانی کے دور کا اہم کام شناخت(Identity) کے احساس کی نشو و نما ہے یعنی احساس ذات کا اطمینان بخش اظہار۔

نو بلوغت کا دور شناخت کی نشو و نما کے لئے بہت اہم ہے ۔ اس کی وجہ یہ ہے کہ اس دور میں’’ذات ‘‘ کی نشو و نما پر زیادہ توجہ ہوتی ہے ۔ یہ خیال کیا جاتاہے کہ نو بالغوں کو شناخت کے بحران(Identity Crisis) کا سامنا رہتا ہے۔ اس کے تین اسباب ہیں:

1۔   یہ زندگی کا وہ دور ہے جب کسی شخص کی توجہ گزشتہ کسی بھی دور زندگی سے زیادہ اپنی ’ذات‘ کو جاننے پر ہوتی ہے ۔ اس کا مطلب یہ  ہے کہ وہ اپنے آپ کو پوری شدت سے جاننا سمجھناچاہتی ہے۔

2۔    نو بلوغت کے آخری زما نے میں فرد کے اندر ’ذاتی تشخص‘(Selfhood) کا نسبتاً دیر پا شعور پیدا ہو جاتا ہے او ر وہ کہہ سکتا ہے۔’’یہ میں ہوں‘‘۔

3۔   یہی وہ زمانہ ہوتاہے جب تیزی سے رونما ہونے ولای حیاتیاتی تبدیلیاں(Biological Changes ) اور بدلتے ہوئے سماجی تقاضے فرد کی شناخت پر اثر انداز ہوتے ہیں۔

آئیے ان باتوں کو مزید تفصیل سے سمجھتے ہیں۔

اب نو بالغوں سے یہ توقع کی جاتی ہے کہ وہ بالغ افراد کی طرح برتاؤ کریں گے اور خاندان ،پیشے اور شادی جیسے امور سے متعلق ذمے داریوں کو قبول کرنے لگیں گے۔ دوسروں پر منحصر بچے سے لے کر یہ غیر منحصر شخص(Independent Person) بننے تک کی سماجی تبدیلی مختلف تہذیبوں میں مختلف طور پر رونما ہوتی ہے۔ مغربی تہذیبوں میں، والدین سے (جسمانی اور نفسیاتی دونوں علاحدگی کے لحاظ سے عام طور پر آزادی(Inddependence) پر زور دیا جاتا ہے۔ اس کے بر خلاف، غیر مغربی تہذیبوں۔ جیسے ہندوستان میں۔ خاندان کے اندر رہ کر ہی آزاد رہنے پر زور دیا جاتا ہے۔ کم و بیش ، تمام تہذیبوں میں ، نو بالغوں کو الجھنوں اور اتفاقیوں کا سامنا رہتا ہے۔ مثلاً عام طور پر یہ دیکھا گیا ہے کہ کوئی نو بالغ شخص اس بات کے خلاف بغاوت کرتاہے کہ میرے ساتھ ایک ’’بچے جیسا‘‘ سلوک کیا جا رہا ہے لیکن ساتھ ہی ساتھ یہ بھی ممکن ہے کہ وہ اپنے ساتھ بچوں جیسے برتاؤ کے ماحول میں سکون محسوس کرے۔ ماں باپ بھی بڑا نہیں سمجھتے۔ بہر حال مخصوص تہذیب میں خاندان کی توقعات کی روشنی میں لڑکوں اور لڑکیوں کے معاملات مختلف ہو سکتے ہیں۔اس طرح نو بالغوں کو متضاد احساسات سے دو چار ہونا پڑتا ہے اور ان کے آس پاس کے لوگ بھی ان سے متضاد سماجی توقعات قائم کر لیتے ہیں۔ آپ نے خود بھی ایسا محسوس کیا ہوگا۔ مثلاً خاندان کے افراد کی یہ توقع ہو سکتی ہے کہ آپ سماجی موقعوں پر گفتگو اور لباس وغیرہ میں بالغ لوگوں جیسا رویہ اپنائیں لیکن خاندان کے بجٹ جیسے معاملات میں وہ یہ کہہ کر کہ’’ابھی تم بہت چھوٹے ہو‘‘ آپ کی رائے نہیں لیں گے۔

چوں کہ افراد ایک دوسرے سے مختلف ہوتے ہیں ، اس لئے مختلف حالات میں ان کے رد عمل بھی الگ الگ ہوتے ہیں۔ سماجی اور خاندان کےا فراد کی متضاد توقعات ، خود فرد کی بدلتی ہوئی ضروریات اور ایک دوسرے سے متصادم جذبات نو بلوغت کے دوران ابھرتی ہوئی شخصیت کو مربوط رکھنے میں رکاوٹ ڈال سکتے ہیں اور نو بالغوں کوایک ایسے تجربے کا سامنا ہو سکتا ہے جسے رول انتشار(Role Confusion) یا شناخت کی الجھن(Identity Confusion) کہا جاتا ہے۔ ایسی صورتوں میں وہ کچھ اس طرح کے رویے ظاہر کرتے ہیں جیسے وہ اپنے کام پر توجہ مرکوز نہیں کر پا رہے ہیں، ان کو وقت پر کام شروع کرنے یا ختم کرنے میں  دشواری کا سامنا ہے یا اپنے معمولات کو انجام دینا ان کے لئے دشوار ہے۔ یہ بات خاص طور پر دھیان دینے کی ہے کہ شناخت کی نشو و نما کے عمل میں نو بالغوں کو جو مشکلات پیش آتی ہیں وہ اس عمل کا عام  حصہ ہیں۔ اس زمانے میں جن متضاد احساسات اور جذبات سے دو چار ہونا پڑت اہے وہ کوئی بے محل اور ان ہونی بات نہیں ہے۔ شناخت کا بحران یا رو ل انتشار اس وقت پیدا ہوتا ہے جب نو بالغوں کو یہ محسوس ہوتا ہے کہ ان سے جن کاموں کے کرنے اور جن رویوں کے ظاہر کرنے کی توقع کی جا رہی ہے ان میں اور ا س سے پہلے کے کاموں اور رویوں میں کتنا فرق ہے۔ بہر حال ، بہت سے نو بالغوں اور خاص طور پر ان نو بالغوں میں جو اپنے خاندانی پیشوں میں لگ جاتے ہیں اس رکاوٹ کا احساس زیادہ نمایاں نہیں ہوتا اور نہ ہی یہ کسی بڑی معاشرتی تبدیلی کا سبب بنتا ہے۔ مثلاً گاوں کا بچہ کھیتی باڑی میں اپنے باپ کی مدد کرتا ہے تو 12سال یا 16کا ہونے پر اس کا رول زیادہ نہیں بدلے گا البتہ اتنا ضرور ہوگا کہ اس کی ذمے داریاں کچھ اور بڑھ جائیں گی۔

نو بالغوں کے ’’احساس ذات‘‘ کی خصوصیات حسب ذیل ہیں:

1۔   نو بلوغت کے زمانے میں’’ذات‘‘ کے بارے میں بیانات تجریدی( Abstract) ہوتے ہیں۔ اس زمانے میں نو بالغ شخص ’ذات‘ کو بیان کرنے کے لئے نو بلوغت جسمانی خصوصیات جیسے’لمبا‘،بڑا، پر زور کم دیتے ہیں۔ اس کے بر عکس وہ اپنی شخصیت کے داخلی پہلوؤں پر زیادہ زور دیتے ہیں۔ اس طرح وہ اپنی’ذات‘ کے اظہار کے لئے سکون پسند،’حساس،نرم مزاج‘،بہادر، جذباتی او           راست گو جیسے الفاظ استعمال کرتے ہیں۔

2۔   اس نو بلوغت کے دوران’ذات‘ کئی تضادات کی حامل ہوتی ہے۔ اس طرح نوجوان اپنے بارے میں’’سکون پسند ہوں لیکن آسانی سے پریشان ہو جاتا ہوں‘‘ یا ’’میں خاموشی پسند ہوں اور باتونی بھی ہوں‘‘ جیسے بیانات دیتا ہے۔

3۔    نو بالغوں کو اپنی شناخت کے لمحہ بہ لمحہ بدلتے ہوئے تجربے سے بھی گزرنا ہوتا ہے۔ نوجوانوں کو چوں کہ مختلف حالات کا سامنا ہوتا ہے اور وہ مختلف تجربات و حالا ت کے تئیں اپنا رد عمل بھی ظاہر کرتے ہیں اسی لئے جوں جوں وہ متنوع حالات کا تجربہ کرتے ہیں اور مختلف تجربوں پر رد عمل ظاہر کرتے ہیں، حالات اور وقت کے ساتھ ان کی خود اپنی ذات کے بارے میں             تفہیم میں تبدیلی آتی رہتی ہے۔

4۔    نو بالغوں کی ذات’مثالی ذات‘ اور’’حقیقی ذات‘ پر مشتمل ہوتی ہے۔ اب’مثالی ذات زیادہ نمایاں ہو جاتی ہے۔ میں مثالی طور پر کیا اور یسے ہوں یہ خیال ہم میں سے ہر شخص کے ذہن میں ہوتا ہے ۔ یہ وہ مثالی ذات ہے جسے ہم حاصل کرنا چاہتے ہیں۔ مثال کے لئے کوئی لڑکی لمبا ہونا چاہتی ہے جب کہ اس کا قد کافی چھوٹا ہے۔

5۔   نو بالغوں کو اپنی ’’ذات‘‘ کے بارے میں بچوں سے زیادہ شعور ہوتا ہے اور خود میں محو رہتے ہیں۔ اس سے انہیں ہمیشہ یہ احساس رہتا ہے جیسے وہ توجہ کا مرکز ہوں یعنی ان کو ہمیشہ یہ احساس رہتاہے کہ لوگوں کی ان پر نظر ہے۔یہی وجہ ہے کہ نوجوان اپنی ظاہری صورت کے بارے میں زیادہ فکر مند رہتے ہیں۔

اب ہم نے زندگی کے مختلف مراحل کے دوران’ذات ‘ کی مختلف خصوصیات کو جان لیا ہے ۔ لیکن یہ احساس ’ذات‘ پیدا کس طرح ہوتا ہے؟ کسی شخص کی شناخت کی نشو و نمامیں کیاچیز اثر انداز ہوتی ہے۔ اگلے باب میں اسی پہلو پر ہماری توجہ مبذو ل رہے گی۔

سر گرمی3

کیا آپ محسوس کرتے ہیں کہ ہم نے جو خیالات اور احساسات اوپر بیان کئے ہیں آُ پ بھی ان میں سے کسی خیال یا احساس سے دو چار ہیں۔ کیا آپ محسوس کرتے ہیں کہ آپ ان احساسات سے نمٹنے کی صلاحیت رکھتے ہیں یا پھر آپ کسی الجھن کا شکار ہو جاتے ہیں؟ کیا آپ نے کبھی اپنے دوستوں اوراپنے خاندان کے افراد کے ساتھ ان پہلوؤں پر گفتگو کی ہے؟ اس بارے میں اپنے دوستوں سے بات کیجئے۔

کلیدی اصطلاحات

 شیر خوارگی(Infancy)،ابتدائی بچپن(Early Childhood)،درمیانی بچپن(Middle Childhood)، نو بلوغت(Adolescence)شناخت کی نشو و نما(Identity of Development) ، حقیقی بہ مقابلہ’مثالی ذات‘‘(Real vs Ideal Self)۔

• سوالات برائے نظر ثانی

1۔   مندرجہ ذیل مراحل کے دوران’ذات‘ کی خصوصیات مع مثالوں کے لکھئے:

شیر خوارگی

ابتدائی بچپن

درمیانی بچپن

نو بلوغت

2۔   ’نو بلوغت زندگی کا ایسادور ہے جس میں تمام نو بالغوں کو شناخت کے بحران کا سامنا ہوتا ہے‘‘۔ کیا آپ اس بیان سے متفق ہیں۔ اپنے جواب کے لئے دلائل بھی دیجئے۔

باب 2

C۔   شناخت پر پڑنے والے اثرات

  ذات کا احساس کیسے پیدا ہوتا ہے؟

( Influences on Identity How do we develop a Sense of Self?)

آپ پڑھ چکے ہیں کہ ہم شناخت یا ذاتی تشخص کا احساس لے کر پیدا نہیں ہوتے۔ پھر یہ احساس پیدا کیسے ہوتاہے؟وقت کے ساتھ ساتھ یہ کس طرح نشو و نما پاتا اور بدلتا رہتا ہے۔آپ اپنے تجربات سے جو کچھ سیکھتے ہیں اورآپ کے بارے میں دوسرے لوگ جو کچھ کہتے ہیں ان سب کے نتیجے میں آپ کی ذات نشو و نما پاتی ہے۔ ہر شخص رشتوں کے ایک نظام میں زندگی گزارتا ہے۔ یہ رشتے خاندان ،اسکول ،برادری اور کام کی جگہ کے ہو سکتے ہیں۔آپ کے آس پاس جو لوگ ہیں ان کے ساتھ تعامل ( Interaction) اور آپ کے خود اپنے عمل کے نتیجے میں ذات کا احساس نشو و نما پاتاہے۔ اس طرح بہت سے لوگ آپ کی ذات کی نشوو نما میں شریک رہتے ہیں۔’ذات‘ کی تشکیل ایک مسلسل عمل ہے۔ لفظ’تشکیل ‘ میں  یہ بات بھی مضمر ہے کہ’ذات‘ کوئی ایسی چیز نہیں جو پیدائشی ہو بلکہ ایسی چیز ہے جس کی آپ خود تخلیق کرتے ہیں او جوں جوں آپ بڑے ہوتے ہیں اور اس کا فروغ بھی ہوتا جاتا ہے۔

سر گرمی1

 آئیے اب ہم یہ پتا لگائیں کہ ذات کا احساس ابتدائی برسوں سے کس طرح فروغ پاتا ہے۔ ماں باپ شروع سے ہی بچے کومختلف موقعوں پر کسی خاص نام یا ناموں سے بلاتے ہیں۔ بچے ایسے نام یا ناموں کو خود سے وابستہ کر لیتے ہیں۔اس کے علاوہ وہ آئینے اور تصویروں میں اسی نام سے اپنے آپ کو پہچاننے کی کوشش کرتے ہیں۔وہ’’تم ‘ اور ’’تمہارا‘ جیسے الفاظ دوسروں کی زبان سے ادا کرتے ہیں اور جب وہ بولنے کے قابل ہو جاتے ہیں تو’میں‘ اور میرا‘ جیسے الفاظ کا استعمال کرنے لگتے ہیں۔ بچہ سمجھ لیتا ہے کہ ’تم‘ اور ’تمہارا‘ کسی اور کے لئے ہیں۔ والدین جسمانی کھیل بھی کھیلتے ہیں جن میں وہ بچوں کے مختلف اعضائے بدن کو اشاروں سے یا چھو کر بتاتے ہیں اور بچوں سے کہتے ہیں کہ وہ بھی بدن کے حصوں کو پہچان کر بتائیں۔ان تمام چیزوں سے آہستہ آہستہ بچوں کو اپنے بارے میں یہ احساس ہونے لگتا ہے کہ ان کا ایک الگ اور مختلف وجود ہے۔

دوسرے یہ کہ شیر خوارگی کے دوران نشو و نما پاتے ہوئے بچے کو یہ محسوس ہونے لگتا ہے کہ وہ جو کچھ کرتاہے اس کا اثر ماحول پر پڑتا ہے۔ مثلاً جب وہ کسی کھلونے کو چھوتا ہے تو وہ کھلونا ہلتا ہے۔ اس طرح اس کے تجربات اس کو یہ احساس دلاتے ہیں کہ وہ اپنے آس پاس کے دوسرے لوگوں اور چیزوں سے مختلف ہے۔ اگر آپ کو پچھلا سبق یاد ہو تو اسی عمر(تقریباً 18مہینے) میں بچہ جان لیتا ہے کہ اس کے چہرے پر لال داغ ہے اور وہ آئینے میں اپنے عکس کو دوسرا بچہ نہیں سمجھتا ۔

تیسرے یہ کہ جب بچہ اور بڑا ہوتا ہے اور بولنے لگتا ہے تو ماں باپ بچے کو یہ حوصلہ دلاتے ہیں کہ وہ خود اپنے بارے میں کچھ بولے اور اس کی وجہ بھی بتائے ۔ وہ بچے سے پوچھتے ہیں’’تم نے یہ کیوں کیا؟‘‘ یا ’’تمہیں کیسا لگ رہا ہے؟‘‘ ان سوالوں سے بچے کویہ سمجھنے میں مدد ملتی ہے کہ وہ کیسامحسوس کر رہا ہے یاکسی کام کا کیا سبب ہے ۔ اس طرح والدین خود بچے کے ’اظہار ذات‘ میں مدد گار ہوتے ہیں۔

چوتھے یہ کہ دن کے دوران بچے کااپنے آس پاس کے لوگوں اور چیزوں سے واسطہ پڑتا ہے۔اس سے اس کے اندر اپنی اہلیتوں کے بارے میں ایک تصور پیدا ہوتا ہے۔ بچے کو اپنے رویے اور اہلیتوں کے بارے میں لوگوں سے جوابی تاثر(Feed back) بھی ملتا ہے۔ کسی چھے سال کے بچے سے جو کھانا کھانے کے بعد دستر خوان کی صفائی کر دیتاہے باپ یہ کہتا ہے’’تم نے یہ بہت اچھا کام کیا، تم بہت اچھے لڑکے ہو‘‘ تو ان باتوں سے اپنی ’ذات ‘ کے بارے میں بچوں کے خیالات کو تقویت ملتی ہے۔اس طرح بچے میں اپنے نگہ داروں اور بعض دوسرے افراد کے ساتھ بات چیت اور سماجی تفاعل کے ذریعے تشخص اور احساس ذات کی نشو و نما کا عمل مسلسل جاری رہتا ہے۔

ذات اور شناخت کے شعور کی نشو و نما(Developin a sense of self and identity)

ہم میں سے ہر شخص کی اپنی ایک الگ شناخت ہوتی ہے، کیوں کہ

•   ہم میں سے ہر شخص(یکساں جڑواں بچوں کو چھوڑ کر)جینز(genes) کے ایک غیر معمولی امتزاج(Unique combination) پرمشتمل ہوتا ہے۔

•   ہر شخص کے تجربات مختلف ہوتے ہیں۔

•   اور اگر ہمارے تجربا ت یکساں بھی ہوں تو ان تجربات پر ہمارا رد عمل مختلف ہوتا ہے۔

اس سیکشن میں ہم شناخت کی تشکیل پر ہونے والے اثرات کا جائزہ لیں گے۔ ان اثرات کی زمرہ بندی حسب ذیل ہے۔

•   حیاتیاتی اور جسمانی تبدیلیاں(Biological and Physical Changes)

•   معاشرتی اور تہذیبی پس منظر(بہ شمول خاندان اور ہم سروںPeers) کے ساتھ تعلقات

•   جذباتی تبدیلیاں(Emotional Changes)

•   ادراکی تبدیلیاں(Cognitive Changes)

2C.1 حیاتیاتی اور جسمانی تبدیلیاں(Biological and Physical Changes)

انسانی جسم میں عمومی طو رپر رونما ہونے والی بعض عام حیاتیاتی اور جسمانی تبدیلیاں نو بلوغت کے زمانے کی علامت ہوتی ہیں۔یہ تبدیلیاں ایک خاص ترتیب میں رونما ہوتی ہیں اور جنسی پختگی کی طرف لے جاتی ہیں۔جب جنسی پختگی آجاتی ہے تو اسے بلوغت (Puberty) کہتے ہیں۔لڑکیوں میں عام طور پر پہلی ماہواری کو جنسی پختگی(Sexual Maturity) کا اہم نقطہ مانا جاتا ہے۔البتہ لڑکوں میں بلوغت کی علامت مانی جانے والی ایسی کوئی خاص صورت حال ظاہر نہیں ہوتی۔ کبھی کبھی اسپرمیٹو زوا (Spermatozoa) پیدا ہونے کی شروعات کو بلوغت کا معیار مانا جاتا ہے۔ مختلف تہذیبوں میں بلوغت کی اوسط عمر مختلف ہوتی ہے ۔ قد میں زیادہ سے زیادہ سالانہ اضافہ لڑکوں اور لڑکیوں دونوں میں بلوغت کا موزوں معیار مانا گیا ہے۔ تیز ترین نشو و نما کی عمر لڑکیوں میں پہلی ماہواری سے ذرا پہلے اور لڑکوں میں بعض بالغانہ خصوصیات ظاہر ہونے سے پہلے آتی ہے۔ یہ زمانہ جس میں جسمانی اور حیاتیاتی تبدیلیاں رونما ہوتی ہیں اور جو بلوغت کی طرف لے جاتا ہے، اسے سن بلوغ(Pubescense) کہتے ہیں۔اکثر لڑکیوں میں یہ زمانہ 11سے 13سال اور لڑکوں میں 13سے 15سال کی عمر کے دوران ہوتاہے۔ ذیل میں ان تبدیلیوں کی ایک فہرست دی جا رہی ہے جو لڑکوں اور لڑکیوں میں رونما ہوتی ہیں۔اس سے سن بلوغ کے دوران نشو و نما کی عمومی ترتیب(Normal Sequence) معلوم ہوگی۔

      لڑکیاں لڑکے

پستانوں کا ابتدائی ابھار                           فوطوں(Testes) کے بڑھنے کی ابتدا

بھورے رنگ کے سیدھے زیر ناف بال           بھورے رنگ کے سیدھے زیر ناف بال

زیر ناف گتھی دار بال                              آواز میں تبدیلی کا آغاز

زیادہ سے زیادہ جسمانی نشو و نما کی عمر منی کا پہلا اخراج

ماہواری کی ابتدا                                      زیر ناف گتھی دار بال

بغلوں میں بالوں کا آنا                           زیادہ سے زیادہ جسمانی نشو و نما کی عمر

    بغلوں کے بال 

        آواز میں نمایاں تبدیلیاں

            داڑھی آنا

بلوغت کے آنے پر جسم کے اندر جو تبدیلیاں آتی ہیں وہ اگر چہ عمومی (Uiversal) ہوتی ہیں لیکن ان تبدیلیوں کا نفسیاتی اور معاشرتی اثر ہر معاشرے میں مختلف ہوتا ہے اور ایک ہی معاشرے سے متعلق افراد میں بھی ایک دوسرے سے الگ ہو سکتاہے۔ ہم ان پہلوؤں پر اگلے دو عنوانات۔معاشرتی تہذیبی پس منظر اور جذباتی تبدیلیاں کے تحت گفتگو کریں گے۔

2C.2 معاشرتی و تہذیبی پس منظر(Sociao-Cultureal Contexts)

ہم یہ پہلے بیان کر چکے ہیں کہ نو بلوغت کے زمانے میں جسمانی تبدیلیاں اور بدلتی ہوئی سماجی توقعات ایسے دو خاص پہلو ہیں جو شناخت کی تشکیل کے عمل کو متاثر کرتے ہیں۔ لیکن یہ جسمانی اور معاشرتی تبدیلیاں شناخت کی تشکیل کے عمل کو کس حد تک متاثر کرتی ہیں ، اس کی صورت الگ الگ معاشرتی تہذیبی اور خاندای پس منظروں میں الگ الگ ہوتی ہے۔ اس سیکشن میں ہم پہلے یہ دیکھیں گے کہ تہذیبی اور معاشرتی پس منظر کسی نو بالغوں کی نشو و نما کو کس طرح متاثر کرتے ہیں ۔ اس کے بعد ہم خاندان کے اثرات پر گفتگو کریں گے۔

نو بلوغت کے دوران جو جسمانی تبدیلیاں رونما ہوتی ہیں ان پر معاشرے کے مختلف طبقات کے رد عمل مختلف ہوتے ہیں۔ ہندوستان کے روایتی معاشرے میں بالغ ہو جانے پر لڑکیوں پر بہت سی پابندیاں لگ جاتی ہیں جبکہ لڑکوں کو کہیں بھی آنے جانے کی آزادی حاصل ہوتی ہے۔ کچھ تفریحات ،نوکریاں اور کام لڑکیوں کے لئے نا مناسب سمجھے جاتے ہیں۔ کسی روایتی سماج کی لڑکی میں اپنی ذات اور شناخت کے عناصر کسی شہری علاقے میں رہنے والی لڑکی سے مختلف ہوں گے۔

اب ہم اپنے ملک کی تہذیب کا موازنہ مغربی تہذیبوں سے کرتے ہیں۔ اکثر مغربی تہذیبوں(مثلا امریکہ اور برطانیہ) میں نو بالغوں کو عموماً کافی آزادی حاصل ہوتی ہے۔ اکثر یہ ہوتا ہے کہ وہ خاندان سے الگ ہو کر خود اپنا گھر بسا لیتے ہیں۔اس کے بر خلاف ہندوستانی معاشرے میں نو بالغوں کی بڑی تعداد ماں باپ پر ہی منحصر ہوتی ہے جیسا کہ ان سے توقع کی جاتی ہے اور ان پر خاندان کاہی مستقل کنٹرول رہتا ہے۔ ہندوستان میں بہت سے نو بالغ خاص طور پر دیہی علاقوں یا قبائلی بستیوں میں اپنے خاندان کی آمدنی میں ہاتھ بٹانے لگتے ہیں اور اس طرح وہ بالغ افراد کا کردار ادا کرنا شروع کر دیتے ہیں لیکن خاندان سے اپنا رشتہ نہیں توڑتے۔ اس کے بجائے ان کی معاشی کوششوں کا مقصد اکثر خاندان کے افراد کی فلاح و بہبود ہوتا ہے۔ لہذا ان دونوں تہذیبی حالات میں نوجوانوں کی ذات کی نشو و نما بالکل مختلف ہوتی ہے۔ خود ہندوستان میں ہی مختلف برادریوں میں نوجوانوں کے تجربات بالکل مختلف ہوتے ہیں۔روایتی سماجوں اور علاقوں میں جہاں ٹکنا لوجی کی ترقی نہیں ہوئی ہے اور جہاں زندگی گزارنے کے متنوع طور طریقوں کے لئے پیشہ ورانہ مواقع محدود ہیں وہاں بچوں کو خاندان کے روایتی پیشوں-جیسے کپڑے کی بنائی وغیرہ-کی تربیت دی جاتی ہے۔یہ تربیت انہیں نو بلوغت کے آغاز تک دی جاتی ہے۔ اس طرح یہ نو بالغ لوگ گھر کے بڑوں کا کردار ادا کرنے کے لئے تیار ہو جاتے ہیں۔ اس کا یہ مطلب ہے کہ اب ان کو ایسا فرد تصور کیا جاتاہے جو بالغوں کی طرح کام کرنے، شادی کرنے اور بچے پالنے کی ذمے داریاں قبول کر سکتے ہیں۔ اس طرح ان معاشروں میں کسی نو بالغ کی شناخت اس کی مخصوص خاندانی بنیادوں سے طے ہوگی۔ ان نوبالغوں سے توقع یہ ہوتی ہے کہ وہ بالغوں یا بڑوں کی مرضی کے مطابق کام کریں گے ۔ اس لئے بڑوں کے ساتھ ان کا ٹکراؤ نہیں ہوتا۔ نتیجے کے طور پر ایسے معاشرے میں احساس ذات کے فروغ کے معاملے میں الجھنیں اور شکوک کم سے کم رہتے ہیں۔اس کے بر خلاف ، ایسے معاشرے اور خاندانوں میں ،جہاں نو بالغوں کے لئے اپنی پسند کے پیشے اختیار کرنے کے مختلف راستے کھلے ہوں اور ٹکنا لوجی کے آجانے سے بہت سے مواقع دستیاب ہوں، اپنی پسند کے پیشوں کے لئے تیاری کی غرض سے لمبی مدت تک ٹریننگ در کار ہوتی ہے۔ ٹریننگ کی اس مدت میں بھی نو بالغوں کو اپنے ماں باپ پر ہی منحصر رہنا پڑتاہے۔ اس طرح نو بلوغت کی مدت بڑھ جاتی ہے جس سے بلوغت کی زندگی کا دور بھی دیر میں شروع ہوتا ہے۔ اس کے علاوہ ، اپنی پسند کے مواقع میں اضافہ اور زندگی گزارنے کے نئے نئے طریقوں سے آگاہی کے نتیجے میں ماں باپ اور معاشر کے دیگر لوگوں کے ساتھ نو بالغوں کا ٹکراؤ بھی ہو سکتا ہے۔

روایتی تہذیبوں اور مغربی تہذیبوں کے درمیان شناخت کی تشکیل کے معاملے میں فرق کی ایک وجہ اور بھی ہے ۔ روایتی ہندوستانی معاشرے میں اپنے بارے میں غور و فکر اور اپنے بارے میں گفتگو نو بالغوں کے درمیان عام نہیں ہے ۔ در حقیقت اس قسم کے رویے کو نہ عام طور پر پسند کیا جاتاہے اور نہ برداشت کیا جاتاہے۔ اکثر ہندوستانی بنیادی طور پر اپنی ذات کا اظہار کسی دوسرے رول یا کردار میں کرتے ہیں۔ مثلاً بیٹے ،بیٹی،ماں ،باپ،بہن یا بھائی کی حیثیت میں- بہ الفاظ دیگر جب وہ اپنے بارے میں کچھ کہتے ہیں تو خاندان یا برادری کا سہارا لیتے ہیں۔ جیسے’’میں‘‘ کے بجائے’’ہم‘‘ کا استعمال کرتے ہیں۔ مثال کے طور پر شادی کے بارے میں اپنے خیالات کا اظہار کرتے ہوئے ایک نا بالغ لڑکی یہ کہے گی ’’ہمارے خاندان میں شادیاں ماں باپ طے کرتے ہیں‘‘،یہ نہیں ’’میں یہ پسند کروں گی کہ میرے والدین شادی طے کرادیں‘‘۔ اس طرح ہم دیکھ سکتے ہیں کہ احساس ذات کی تشکیل میں معاشرتی اور تہذیبی پس منظر کتنا اہم ہوتا ہے۔ یہ تہذیبی اثرات ایک فرد سے دوسرے فرد اور ایک خاندان سے دوسرے خاندان کے درمیان مختلف ہوتے ہیں۔

اس پر گفتگو کرنے کے بعدکہ نوجوانوں کی شناخت کی نشو و نما پر تہذیب اور معاشرے کے کیا اثرات ہوتے ہیں، اب ہم یہ گفتگو کریں گے کہ شناخت کے احساس کی نشو و نما پر خاندان کے کیا اثرا ت ہوتے ہیں ۔ جن خاندانوں میں نوبالغوں کو اپنے نقطہ نظر کے اظہار کا موقع ملتا ہے اور جہاں افراد خاندان کے درمیان ایسے سازگار تعلقات ہوں جن کو بنیاد بنا کر نو بالغوں کو اپنی وسیع معاشرتی دنیا کو تلاش کرنے کا موقع ملتا ہے وہاں نو بلوغت کے دوران خاندانی تعلقات شناخت کی تشکیل میں مدد گار ثابت ہوتے ہیں۔ یہ بھی دیکھاگیا ہے کہ اگر والدین کا برتاؤمشفقانہ ہوتا ہے تو اس سے شناخت کے صحت مند فروغ میں مدد ملتی ہے۔ مشفقانہ برتاؤ کا مطلب یہ ہے کہ ان کے برتاؤ میں گرم جوشی اورمحبت ہو اور وہ بچے کی کوششوں او ر کاوشوں میں مدد گار ہوں۔ ایسے والدین بچے کی ستائش کرتے ہیں ، ان کی سر گرمیوں پر دلی خوشی کا اظہار کرتے ہیں، ان کے خیالات پر سوچ سمجھ کر اپنا رد عمل ظاہر کرتے ہیں اور بچوں کی شخصیت اور ان کے نقطہ نظر کو سمجھتے ہیں۔ مگر ایسے والدین اپنے نظم و ضبط میں بھی مضبوط ہوتے ہیں۔والدین کا یہ طرز عمل بچوں میں خود اعتمادی اور خود انحصاری پیدا کرتا ہے۔

نو بلوغت وہ دور ہے جس میں نو بالغوں کو اپنے ہم سروں(Peers)کی حمایت اور ان کی طرف سے پسندیدگی کے اظہارکی شدید ضرورت ہوتی ہے۔ کبھی کبھی والدین اور ہم سروں کی اقدار ایک دوسرے سے متصادم ہو جاتی ہیں۔ایسے میں نو بالغوں کا جھکاؤ دوستوں کی طرف زیادہ ہوتا ہے۔ اس سے بچے اور والدین کے درمیان تعلقات میں خرابی آجاتی ہے۔ دوستوں کے زیر اثر آنا مثبت بھی ہو سکتا ہے اور منفی بھی۔اس کے منفی اثرات اس وقت نمایاں ہوتے ہیں جب نو بالغ شخص حرکتوں۔ جیسے سگریٹ  نوشی، شراب نوشی، نشیلی دواؤ ں کا استعمال یا شراب یا غنڈہ گردی وغیرہ۔ میں ملوث ہو جاتا ہے۔ بہر حال والدین اور دوست دونوں ایک دوسرے کے کاموں کی تکمیل بھی کرتے ہیں اور نو بالغوں کی مختلف ضرورتوں کو پورا کرتے ہیں۔ یہ دیکھا گیا ہے کہ نو بالغوں کی شناخت کے فروغ کے لئے خاندان کا ایسا ماحول بہت اہمیت رکھتا ہے جو انفرادیت (Individuality) اور باہمی ربط(Connectedness)دونوں کو فروغ دے سکے۔ ’انفرادیت‘ کے مفہوم میں یہ بات  بھی شامل ہے کہ نو بالغوں کو اپنے نقطہ نظر کے اظہار کے وسیع تر مواقع حاصل ہوں اور ’’باہمی ربط‘‘ کا مطلب یہ ہے کہ دوسروں کے خیالات کے لئے احترام اور کھلا پن ہو۔

 2C.3 جذباتی تبدیلیاں(Emotional Changes)

نو بالغوں کو اپنی نشو و نما کے دوران کئی جذباتی تبدیلیوں(Emotional Changes) سے گزرنا ہوتا ہے۔ ان میں سے بعض تبدیلیاں تو ان حیاتیاتی اور جسمانی تبدیلیوں کا نتیجہ ہوتی ہیں جو نو بلوغت کے دوران رونما ہوتی ہیں۔ نو بالغوں کو اپنے جسم سے گہری دل چسپی اور لگاؤ ہوتاہے۔ وہ سوچتے ہیں کہ لوگ ان کے جسم اور ان کی حرکات و سکنات کے ہر پہلو کو دیکھ رہے ہیں۔ ایک نو بالغ کو جس کے چہرے پر مہاسے ہوں یہ لگتا ہے کہ ہر شخص سب سے پہلے اس کے مہاسے کودیکھتا ہے۔نو بالغ اپنی جسمانی تبدیلیوں پر کس طرح اپنے رد عمل ظاہر کرتے ہیں،  وہ مختلف افراد میں مختلف ہوتا ہے۔ کوئی ایسا لڑکا جس کے چہرے پر اپنے ہم عمر لڑکوں کے مقابلے میں روئیں نہیں آئے ہیں، اس بارے میں ممکن ہے زیادہ فکر مند ہو۔ لیکن یہ بھی ہو سکتا ہے کہ کوئی دوسرا لڑکا چہرے پر روئیں نہ آنے سے فکر مند نہ ہو۔ جس نہج پر کسی نوبالغ کی جسمانی نشو و نما ہوتی ہے اس پر اطمینان اور فخر اس کے احساس ذات کے فروغ میں مثبت طور پر معاون ثابت ہوتا ہے۔اس کے بر خلاف اگ کوئی نابالغ اپنی شکل و صورت سے ایک خاص حد سے زیادہ غیر مطمئن ہے تو یہ چیز اس کی توجہ کو شخصیت،کام اور پڑھائی وغیرہ پر مرکوز ہونے سے روکے گی۔ اس سے اسکول میں اس کی کار کردگی کم ہو سکتی ہے اور اس کی شبیہ ذات( Self -image) یا عزت نفس(Self-Esteem) کی سطح بھی پست ہو سکتی ہے۔ اپنی ذات کی منفی شبیہہ سے یہ نقصان ہوتاہے کہ فرد خود کو غیر محفوظ محسوس کرتا ہے اور اپنے جسم کے بارے میں منفی احساسات قائم کر لیتا ہے۔ ممکن ہے کہ کوئی جسمانی طور پر معذور نو بالغ خود کو دوسروں سے کسی طرح کم تر نہ سمجھے جب کہ ممکن ہے کہ کوئی مضبوط جسم والا نو بالغ لڑکا صرف یہ سوچ کر کہ اس کا ’’جسم اچھا‘‘ نہیں ہے اپنے آپ کو بے کار محسوس کر سکتا ہے۔

نو بالغوں کی مزاجی کیفیات میں اتار چڑھاؤ بھی آتا رہتا ہے- مثلا کبھی تووہ گھر کے افراد اور دوستوں کی صحبت پسند کرتا ہے اور کبھی تنہائی چاہتا ہے۔ کبھی اس کو شدید غصہ آ سکتا ہے۔ ایسا اس وقت زیادہ ہوتاہے جب کوئی نو بالغ ان مختلف تبدیلیوں کو جو الگ الگ سطحوں پر رونما ہوتی ہیں سمجھنے کی کوشش کرتا ہے۔

2C.4 ادراکی تبدیلیاں(Cognitive Changes )

ادراکی تبدیلیوں کے بارے میں جو شیر خوارگی سے نوبلوغت کے زمانے تک رونما ہوتی ہیں آپ تیسری اکائی میں پڑھیں گے جس کا عنوان’’بچپن‘‘ ہے۔ فی الحال ہم ان ادراکی تبدیلیوں کا مختصر بیان کریں گے جو شناخت کے شعور کے فروغ پر اثر انداز ہوتی ہیں۔

بچہ ایک ایسے ’شخص‘ سے نشو و نما پا کر جسے نہ اپنی منفرد شناخت کا کوئی احساس ہوتا ہے اور نہ اپنی انفرادی ذات کا، ایسا شخص بنتا ہے جو بچپن کے ابتدائی برسوں میں قطعی اور مطلق الفاظ میں اپنی’ذات‘ کا اظہار کرنے لگتا ہے۔ اگر چہ بچپن کے درمیانی زمانے میں بھی’ذات‘ کا اظہار ٹھوس(Concrete) ہوتاہے لیکن فرق یہ ہے کہ اب ’ذات‘ کے بارے میں اظہار مواز نے کے الفاظ میں ہوتا ہے۔ جب بچہ 11سال کاہو جاتا ہے تو اپنی ’ذات‘ کے اظہار میں اس کے ہاں خاصی حقیقت پسندی آ جاتی ہے اور بچہ ’’حقیقی ذات‘‘ اور ’’مثالی ذات‘‘ کے درمیان فرق کرنا شرع کر دیتا ہے۔

نو بلوغت کے زمانے میں جو بڑی تبدیلی آتی ہے وہ یہ ہے کہ نو بالغوں کی سوچ تجریدی(Abstract) ہو جاتی ہے یعنی وہ جو کچھ موجود ہے اور جو کچھ وہ دیکھتے ہیں یا جس کا وہ تجربہ کرتے ہیں ان سب سے اوپر اٹھ کر سوچتے ہیں۔ اس کے بعد جوں جوں سوچ میں لچک آتی جاتی ہے وہ فرضی صورت حال کے بارے میں بھی سوچنے لگتے ہیں۔دوسرے لفظوں میں وہ مختلف امکانات اور ان کے نتائج کا تصور کر لیتے ہیں جبکہ ایسی صورت حال سے ان کا واسطہ پڑتا ہے اور نہ ہی انہوں نے کوئی ایسا کام کیا ہوتا ہے جس کانتیجہ حاصل ہو۔ شناخت کی تشکیل کا مفہوم یہ بھی ہے کہ نو بالغ لڑکے لڑکیاں اپنے حال کو تصوراتی طور پر اپنی ’’ذات‘ کے اس مستقبل سے جوڑ دیتے ہیں جو ان کے تخیل میں ہے۔ مثلاً کوئی نو بالغ ایسے امکانی پیشے(Career) کے بارے میں سوچ سکتا ہے جسے وہ بڑا ہو کر اختیار کرنا چاہتا ہے اور جو اس کے مزاج اور اس کے حالات کے لئے موزوں بھی ہو اور اس کے مطابق وہ اپنی موجودہ پڑھائی کے لئے بھی منصوبہ بندی کرنا چاہے گا۔

اس طرح شناخت کی نشو و نما کے لئے نو بلوغت کا زمانہ بہت اہم مرحلہ ہے۔ حقیقت میں نو بلوغت نشو و نما کا اہم زمانہ ہے جس میں مختلف تبدیلیاں رونما ہوتی ہیں اور بہت سے مواقع حاصل ہوتے ہیں۔اگر کوئی نا بالغ لڑکا یا لڑکی  صحت مند ہے  تو وہ بہترین انداز میں ان تبدیلیوں کا سامنا کرے گا اور اپنی تمام صلاحیتوں سے واقف ہو جائے گا۔ اچھی صحت کے لئے مناسب غذا اور تغذیہ کلیدی عناصر ہیں۔ اگلے باب میں ہم نو بلوغت کے زمانے میں مناسب  غذا، تغذیہ، صحت اور جسمانی چستی(Fitness) کے معاملات پر گفتگو کریں گے۔

 کلیدی اصطلاحات

بلوغت(Puberty)،سن بلوغ(Pubescence)،پہلی ماہواری(Menarche)،شخصیت(Personality) ہم سروں کا دباؤ(Peer Pressure)

• سوالات برائے نظر ثانی

1۔   بلوغت اور سن بلوغ کے تصورات کی وضاحت کیجئے۔بلوغت کے زمانے میں لڑکوں اور لڑکیوں میں رونماہونے والی جسمانی اور حیاتیاتی تبدیلیوں کی وضاحت کیجئے۔

2۔   کسی نوبالغ شخص کی شخصیت کی تشکیل میں خاندان کا کیا کردار ہوتا ہے؟

3۔   تہذیبی معاملات کس حد تک نو بالغوں کی شناخت کی تشکیل کرتے ہیں؟

4۔   نو بلوغت کے دوران اہم جذباتی اور ادراکی تبدیلیوں کی فہرست تیار کیجئے۔

•   عملی کام 1

ذات کی نشو و نما اور خصوصیات(Development and Characteristics of the Self)

موضوع کسی شخص کی جسمانی بناوٹ کا مطالعہ

کام 1۔ قد،وزن،کولہے کے سائز،کمر کے گھیر، اور سینے کے گھیر کو ناپ کر لکھئے

2۔  پہلی ماہواری کے وقت (لڑکیوں کی) عمر اور (لڑکوں میں) داڑھی آنے اور آواز میں تبدیلی کی عمر لکھئے۔

3۔   آنکھوں اور بالوں کا رنگ درج کیجیے ۔

عملی کام کا مقصد: آپ نے بلوغت کے دور میں جسمانی نشو و نما کے بارے میں پڑھا ہے۔ اس پر عملی کام کے ذریعے آپ کو اپنی جسمانی بناوٹ کو زیادہ بہتر طور پر سمجھنے میں مدد ملے گی۔ اس کے علاوہ آپ کو دوسرے علاقے کے لوگوں کے بارے میں معلومات سے موازنہ کر کے اپنے علاقے کے نوجوانوں کی نشو و نما اور فروغ کی اوسط شرح معلوم کرنے میں بھی بڑ ی مدد ملے گی۔ اوپر عملی کام1میں بیان کردہ ناپ آپ کے لباس کا سائز جاننے میں بھی مدد گار ثابت ہوگا۔

عملی کام انجام دینا:اوپر کام1کے تحت بیان شدہ ناپ لیجئے۔آپ اپنے دوستوں کی ناپ لے سکتے ہیں اور دوست آپ کی ناپ لے سکتے ہیں۔ناپ اس طرح لیجئے۔

•   کولہے کا گھیر:کولہے کے سب سے چوڑے حصے کے گرد انچ ٹیپ اس طرح گھمائیے کہ آپ کی دو انگلیاں ٹیپ اور جسم کے د رمیان رہیں۔

•   بالائی دھڑسینے کا گھیر:بالائی دھڑ ؍ سینے کے بھر پور حصے کا ناپ لیجئے ۔ ٹیپ کو مضبوطی سے پکڑئیے  لیکن کس کر نہیں۔

•   کمر کا گھیر:ٹیپ کو کمر کے چاروں طرف لے جائیے اور اس کو جسم کے سب سے پتلے حصے پر لگا دیجئے ۔ اب اس طرح ناپ لیجئے کہ آُپ کی ایک انگلی ٹیپ اور جسم کے درمیان ہو۔

•   گردن کا گھیر: گردن کے گرد ٹیپ کو کس کر رکھئیے اور اس کو نیچے کی طرف کھسکائیے یہاں تک کہ اس کا نچلا کنارہ گردن کے نچلے حصے تک آجائے جہاں کی ناپ آپ کو لینی ہے۔

•   کمر کا دور: یہ ماپ دونوں کاندھوں کے آخری سروں کے درمیان لے جائے گی۔ اس کے علاوہ کمر کی ناپ کے 10-12سینٹی میٹر نیچے پشت کے بھر پور حصے کے اوپر ایک ناپ اور لی جائے گی۔

 اب کام 2,1اور 3کے مطابق مطلوبہ معلومات کو ذیل کی جدول میں قلم بند کیجئے۔

آپ کا نام.......................                                         عمر.......................

جنس.......................                                                 بالوں کا رنگ.......................

آنکھوں کا رنگ.......................                                      پہلی ماہواری کے وقت عمر.......................

داڑھی آنے اور آواز میں تبدیلی آنے کی عمر...................             وزن.......................

قد.......................                                                    کولہے کا سائز.......................

بالائی دھڑ؍سینے کا گھیر.......................                                 کمر کا گھیر.......................

کمر کا دور.......................                                              پشت کی ناپ.......................

دس دس طلبا کے حلقوں میں خود کو بانٹ لیجئے اور اپنی انفرادی معلومات کے ساتھ مباحثے میں حصہ لیجئے۔

1۔   آپ کے حلقے میں تمام مذکورہ ناپوں کی حدود کیا ہیں۔ان سب کو قلم بند کیجئے۔ مثلاً آپ کے حلقے میں وزن ..............کلو گرام سے .................. کلو گرام تک ہے۔

2۔   پہلی ماہواری شروع ہونے کی عمر اور داڑھی آنے اور آواز میں تبدیلی کی عمر کی حدود لکھئے۔

3۔   آپ نے جو ناپ لی ہیں ان کو اپنے لباس سے ملائیے۔ بازار سے جو سلے سلائے کپڑے آپ نے خریدے ہیں ان کی ناپ سے اپنی ناپ کو ملائیے۔

• عملی کام 2

شناخت پر اثرات(Influences on Identity)

موضوع اپنے اندر پیدا ہونے والے جذبات

 کام 1۔ دن کے دوران پیدا ہونے والے جذبات کو قلم بند کرنا

2۔   جذبات کے پیش آنے کی وجوہات پر غور و فکر کرنا

3۔   ان جذبات کو قابو میں رکھنے کے طریقوں کی پہچان کرنا

عملی کام کا مقصد: ہم ہر روز مختلف جذبات سے دو چار ہوتے ہیں اور یہ جذبات مختلف حالات میں ہمارے رد عمل کے انداز کو متاثر بھی کرتے ہیں اپنے جذبات اور احساسات کے بارے میں آگاہی کے ذریعے ہم ان کا بہتر استعمال کر سکتے ہیں اور مختلف صورتوں میں صحیح ردعمل کا اظہار بھی کر سکتے ہیں۔ یہ عملی کام اسی مقصد کو ذہن میں رکھ کر طے کیا گیا ہے۔

عملی کام پر عمل در آمد: ایک دن مقرر کر لیجئے اورر اس دن صبح سے جن جذبات سے آپ گزرے ان سے آگاہی حاصل کیجیے۔ قلم اور نوٹ بک اپنے ساتھ رکھئے اور جیسے ہی آپ کو کوئی جذبہ محسوس ہو تو اسکو ، ان کے پس منظر اور اسباب کو قلم بندکیجئے۔ آپ ان جذبات کا بیان کرنے کے لئے درج ذیل جدول کا استعمال کر سکتے ہیں۔

دن کا وقت

جذبہ

پس منظرجذبہ پیدا ہونے کا موقع

جذبے سے گزرجانے پر آپ کا رد عمل

خصوصی اظہار رائے یا جو بھی آپ کا مشاہدہ ہو

 چار چار یا پانچ پانچ طلبہ کے گروپ بنائیے اور اپنے خیالات و مشاہدات کا دوسرے حلقوں کے خیالات سے موازنہ کیجئے۔ درج ذیل امور پر بحث کیجئے:

1۔   کیا دوسرے حلقے کے افراد بھی یہی جذبات رکھتے ہیں؟

2۔   ان مختلف پس منظروں کی مشترکہ خصوصیات جن کے نتیجے میں حلقے کے افراد کو ایسے جذبات سے گزرنا پڑا۔

3۔   کیا ہر شخص نے جذبات کو مناسب طور پر قابو میں رکھا؟

4۔   کیا جذبات پر قابو پانے کے کچھ اور طریقے بھی ہو سکتے تھے؟