پہلاباب

یہ دستاویز یا آئین راتوں رات وجود میں نہیں آگئے! بلکہ ان کی تشکیل ان افکار اور اصولوں کی بنیاد پر ہوئی جن پر کوٹلیا، ارسطو سے لے کر جین جاکس روسو، کارل مارکس، مہاتما گاندھی اور ڈاکٹر بی آر امبیڈکرکے دور تک بحث و مباحثہ ہوتا آیا ہے۔ آج سے بہت پہلے یعنی پانچویں صدی قبل مسیح میں افلاطون اور ارسطو نے اپنے شاگردوں سے اس نکتے پر تبادلہ خیال کیا تھا کہ’ بادشاہت بہتر ہے یا جمہوریت۔‘ جدید دور میں سب سے پہلے روسوؔ نے یہ دلیل دی کہ آزادی انسان کا بنیادی حق ہے۔ کارل مارکسؔ نے یہ استدلال پیش کیا کہ جتنی آزادی کی یہ دستاویز یا آئین راتوں رات وجود میں نہیں آگئے! بلکہ ان کی تشکیل ان افکار اور اصولوں کی بنیاد پر ہوئی جن پر کوٹلیا، ارسطو سے لے کر جین جاکس روسو، کارل مارکس، مہاتما گاندھی اور ڈاکٹر بی آر امبیڈکرکے دور تک بحث و مباحثہ ہوتا آیا ہے۔ آج سے بہت پہلے یعنی پانچویں صدی قبل مسیح میں افلاطون اور ارسطو نے اپنے شاگردوں سے اس نکتے پر تبادلہ خیال کیا تھا کہ’ بادشاہت بہتر ہے یا جمہوریت۔‘ جدید دور میں سب سے پہلے روسوؔ نے یہ دلیل دی کہ آزادی انسان کا بنیادی حق ہے۔ کارل مارکسؔ نے یہ استدلال پیش کیا کہ جتنی آزادی کی اہمیت ہے اتنی ہی مساوات کی بھی اہمیت ہے۔ خود اپنے ملک میں مہاتما گاندھی نے اپنی کتاب ’ہند سوراج‘ میں اس امر پر بحث کی ہے کہ’ حقیقی آزادی ‘ یا’ سوراج ‘کا کیا مطلب ہے۔ ڈاکٹر امبیڈکر نے پوری قوت کے ساتھ یہ استدلال پیش کیا تھا کہ درج فہرست ذاتوں کو اقلیت تسلیم کیا جانا چاہیے اور انھیں خصوصی تحفظ ملنا چاہیے۔

یہ افکار و خیالات ہندوستان کے آئین میں شامل ہیں،ہمارے آئین کی تمہید میں آزادی اور مساوات کا ذکر آیا ہے جب کہ آئین میں حقوق کے باب میں ہرطرح کی چھوا چھوت کو ختم کرنے کا ذکر ہے نیز گاندھیائی افکار کو رہنما اصولوں میں شامل کیا گیا ہے۔

سیاسی نظریہ ان اصولوں اور خیالات سے بحث کرتا ہے جن سے ہمارا آئین، حکومتیں اورہماری سماجی زندگی  منظم انداز میں تشکیل پاتی ہے۔ یہ آزادی‘ مساوات‘ انصاف‘ جمہوریت‘ سیکولرزم وغیرہ کے تصورات کے معنی و مفہوم کی وضاحت کا احاطہ کرتا ہے، ساتھ ہی یہ قانون کی حکمرانی‘ اختیارات کی تقسیم‘ اور قانونی جائزہ وغیرہ کے اصولوں کی اہمیت و افادیت کا تجزیہ کرتا ہے۔یہ ان کا مختلف مفکرین اور دانشوروں  ان تصورات کے دفاع میں پیش کردہ دلائل کی روشنی میں تجزیہ کرتا ہے۔ ہر چند کہ روسو ‘ مارکس یا گاندھی سیاستداں نہیں بنے مگر ان کے خیالات وتصورات نے ہر جگہ سیاستدانوں کی ہر نسل کو متاثر کیا ہے۔ علاوہ ازیں معاصر مفکرین بھی آزادی یا جمہوریت کے دفاع کے لیے ان سے تحریک حاصل کرتے ہیں۔ سیاسی مفکرین دلائل اور افکار کا جائزہ لینے کے علاوہ موجودہ سیاسی تجربات کا بھی تجزیہ کرتے ہیں اور مستقبل کے رحجانات اور امکانات کی نشان دہی کرتے ہیں۔

لیکن کیا یہ سب اب ہمارے لیے کوئی معنی رکھتے ہیں؟ کیا ہمیں اب تک آزادی اور جمہوریت حاصل نہیں ہوئی ہے؟ اگرچہ ہندوستان ایک آزاد اور خود مختار ملک ہے لیکن آزادی اور مساوات کے حوالے سے سوالات اٹھنے کا سلسلہ بند نہیں ہوا ہے۔ اس کی اہم وجہ یہ ہے کہ سماجی زندگی کے مختلف شعبوں میں آزادی‘ مساوات اور جمہوریت سے متعلق مختلف معاملے سامنے آئے ہیں نیز مختلف میدانوں میں ان کے نفاذ کی رفتار بھی الگ الگ ہے۔ جیسے سیاسی شعبہ میں مساوی حقوق کی شکل میں’ مساوات‘ موجود ہے لیکن معاشی یا سماجی شعبوں میں یہ’ مساوات‘ اس حد تک موجود نہیں ہے۔اس میں شک نہیں کہ لوگوں کو سیاسی طور پر مساوی حقوق حاصل ہیں مگر اس کے باوجود انہیں ان کی سماجی حیثیت‘ یعنی غریبی یا ذات کی بنیاد پر‘ روز مرہ کی زندگی میں امتیازی سلوک کا سامنا کرنا پڑتا ہے۔ ہو سکتا ہے سماج میں کچھ لوگوں کو خصوصی مراعات حاصل ہوں جب کہ دیگر لوگ بنیادی ضروریات سے محروم رہ جاتے ہیں ۔ سماج کے کچھ لو گ اپنا مقررہ ہدف حاصل کر لیتے ہیں اس کے بر خلاف ‘ بہت سے ایسے لوگ ہیں جو اسکول بھی نہیں جا سکتے اور نہ ہی اپنے لیے ایک بہتر روزگار کا انتظام کر سکتے ہیں۔ ان لوگوں کے لیے آزادی اب بھی ایک ادھورا خواب ہے۔

دوم! گو کہ ہمارے آئین میں آزادی کے حق کی ـضمانت دی گئی ہے اس کے باوجود ہمیں ہر وقت اس کی نئی نئی تعبیروں سے سابقہ پڑتا ہے۔ یہ ایک طرح کا کھیل ہے ۔ جیسے کہ شطرنج یا کرکٹ اسی طرح ہم ان قوانین کی تعبیرکا طریقہ سیکھتے ہیں۔اس عمل کے دوران ہم اس کھیل کے نئے اور وسیع تر معنیٰ اخذ کرتے ہیں۔ اسی طرح آئین نے ہمیں جن بنیادی حقوق کی ضمانت دی ہے ان کی بھی نئے حالات اور تقاضوں کے پیش نظر نئی نئی تشریحات ہوتی ہیں۔ مثال کے طور پر عدالتوں نے ’زندہ رہنے کا حق ‘کی تشریح کرتے ہوئے اس میں ’روزگار کا حق ‘بھی شامل کیا ہے۔ اب ایک نئے قانون کے ذریعے ’سرکاری کام کاج کے بارے میں معلومات حاصل کرنے کا حق ‘دیا گیا ہے ۔سماج کو متواترنئے نئے چیلنجوں کا سامنا کرنا پڑتا ہے جس کے نتیجے میں نئی نئی تعبیریں سامنے آتی ہیں۔ ہمارے آئین میں جو بنیادی حقوق دیے گئے ہیں، ان میں وقت کے ساتھ ساتھ عدالتی فیصلوں کے ذریعہ اور حکومت کی ان پالیسیوں کے ذریعہ جن کا مقصد نئے مسائل کو حل کرنا ہوتا ہے‘ میں ترمیم کی گئی ہے اور ان کے دائرہ کو وسیع کیا گیا ہے۔

سوم! جیسے جیسے دنیا بدل رہی ہے ویسے ویسے آزادی کے بارے میں نئے نئے زاویہ فکر اور اس کے لئے نئے نئے خطرات سامنے آرہے ہیں۔ مثلاًعالمی مواصلاتی ٹیکنالوجی نے دنیا بھر کے ان کارکنوں کے درمیان تال میل کو آسان بنا دیا ہے جو قبائلی تہذیبوں یا جنگلات کے تحفظ کے لیے سرگرم عمل ہیں۔ لیکن اس سے دہشت گردوں اور جرائم پیشہ عناصر کو بھی اپنا نیٹ ورک بنانے میں مددمل رہی ہے مزید بر آں یہ کہ آنے والے دنوں میں انٹر نیٹ کے ذریعہ کاروبار اور تجارت میں اضافہ نا گزیر ہے۔ چنانچہ اس کے معنیٰ یہ ہوئے کہ ہم آن لائن یا انٹر نیٹ کے توسط سے اشیا کی خریداری یا خدمات کے بارے میں جو معلومات فراہم کرتے ہیں ان کا تحفظ کیا جانا ضروری ہے۔حالاں کہ انٹرنیٹ کا استعمال کرنے والے نے ٹی زنس (Netizens)حکومت کا کو ئی کنٹرول نہیں  چاہتے،تاہم وہ تسلیم کرتے ہیں کہ فرد کی نجی زندگی اور (پرائیویسی ) سلامتی کے تحفظ کے لیے کوئی نہ کوئی قانون ضروری ہے۔ اس احساس کے نتیجے میں یہ سوالات اٹھ رہے ہیں کہ انٹرنیٹ استعمال کرنے والوں کو کس حد تک آزادی ملنی چاہیے؟ 

مثلاً،کیا کسی اجنبی کو بغیر مانگے ای میل بھیجنے کی اجازت دی جانی چاہیے؟ کیا آپ چیٹ روم میں اپنے موضوعات کی تشہیر کر سکتے ہیں؟ کیا حکومت کو دہشت گردوں کا سراغ لگانے کے لیے ذاتی ای میل دیکھنے کا اختیار دیا جانا چاہیے؟ اور اس سلسلہ میں کس حد تک پابندیاں جائز ہیں نیز ان پابندیوں کے نفاذ کا اختیار حکومت کو یا نجی اداروں کو دیا جانا چاہیے؟ ان سوالات کے ممکنہ جوابات ہم سیاسی نظریہ کے مطالعے سے حاصل کر سکتے ہیں۔ اس لیے سیاسی نظریہ ہمارے لیے اہمیت کا حامل ہے۔

ہمارے پاس  مساوات کی کئی تعریفیں موجود ہیں کیوں کہ اس کے معنیٰ کسی سیاق پرمنحصر ہوتے ہیں۔ہم نے بات وہاں سے شروع کی تھی کہ مساوات ہمارے لیے کیا ہے پھر دوسروں (یعنی غریب، محروم اور لاچار و بزرگوں وغیرہ) کے معنیٰ مراد کا ذکرکیا گیا ہے ۔ ہم نے معنیٰ کی کئی پرتیں کھولیں۔ ہم سیاسی نظریہ کو پوری طرح سے سمجھے بغیر اس پر عمل کرتے رہے۔ 

سیاسی تصورات کے مفہوم کو سیاسی مفکرین نے اس معنیٰ میں واضح کیا کہ عام زبان میں اس کو کیسے سمجھا اور استعمال کیا جاتا ہے۔ وہ اس حوالے سے مختلف مفہوم اورنقطہ نظر کا منظم طریقے سے جائزہ لیتے ہیں اور اس پر غور و فکر کرتے ہیں۔ مساوی مواقع کب کافی ہوتے ہیں؟ کب لوگوں کی خصوصی مراعات کی ضرورت ہوتی ہے؟ اس طرح کی خصوصی مراعات کس حد تک اور کب دی جانی چاہیے؟ کیا غریب بچوں کو اسکول میں رکے رہنے کی ترغیب کے لیے انھیں دوپہر کا کھانا دیا جانا چاہیے؟ یہ چند سوالات ہیں جن کا جواب مفکرین تلاش کرنے کی کوششیں کرتے ہیں۔ آپ بھی دیکھ سکتے ہیں کہ یہ مسئلے با لکل عملی نوعیت کے ہیں اور یہ تعلیم اور روزگار کے متعلق سرکاری پالیسیاں بنانے میں رہنمائی فراہم کرتے ہیں۔

جیسا کہ مساوات کے معاملے میں ہے ویسا ہی دیگر تصورات کے معاملوں میں بھی ہے۔ سیاسی نظریہ ساز یا مفکرین روزانہ سامنے آنے والی آراء کا تجزیہ کرتے ہیں۔ ان کے مناسب مفہوم دریافت کرنے کے لیے بحث و مباحثہ کرتے ہیں اور پالیسی سازی کے لیے متبادل راہیں فراہم کرتے ہیں۔ ہم اگلے باب میں آزادی’ شہریت ‘ حقوق، ترقی، انصاف، مساوات، قومیت اور سیکولرزم وغیرہ کے تصورات کا مطالعہ کریں گے۔

اور جب کوئی انسان زخمی ہوتا ہے تو اس میں انسانی اوصاف کم نہیں ہوتے؟

بلا شبہ ۔

اور وہ انسانی وصف کیا انصاف ہے؟

یقینی طور پر۔ 

تو اس کے معنی یہ ہوئے کہ مجروح آدمی ظالم بن جاتا ہے۔

یہی اس کا نتیجہ ہے۔

لیکن کیا ایک موسیقار اپنے فن سے انسان کو موسیقی سے دور کر سکتا ہے۔

بالکل نہیں۔

یا کیا گھڑسوار اپنے فن سے دوسروں کو خراب خراب گھڑسوار بنا سکتا ہے۔

ناممکن؟

اور کیا ایک انصاف پسند شخص اپنے انصاف سے لوگوں کو ظالم بنا سکتا ہے یا عام زبان میں نیک آدمی نیکی کے ذریعے انہیں برا بناتا ہے؟

یقینی طور پر نہیں۔۔۔۔۔۔۔۔۔۔۔۔

ہمارے اپنے سیاسی اصول اور خیالات ہو تے ہیں لیکن کیا سیاسی نظریہ کا مطالعہ ضروری ہے؟ کیا یہ سیاسی نظریہ سیاسی میدان میں سرگرم سیا ستدانوں کے لیے ہے؟ پالیسی بنانے والے نوکرشاہوں کے لیے ہے؟ یا سیاسیات پڑھانے والے اساتذہ کے لیے زیادہ کارآمد نہیں ہے؟ اسی طرح ان وکلاء اور ججوں کے لیے ہے جو دستور اور قانون کی تعبیر و توضیح کرتے ہیں یا ان کارکنوں اور صحافیوں کے لیے ہے جو استحصال کا پردہ فاش کرتے ہیں اور نئے حقوق کے مطالبات پیش کرتے ہیں؟ ان کے لیے اس کا پڑھنا ضروری نہیں ہے؟ ہمیں(ہائی اسکول کے طلبا کو) آزادی یا مساوات کا مفہوم جاننے سے کیا حاصل ہوگا؟

سب سے پہلی بات تو یہ ہے کہ سیاسی نظریہ مذکورہ تمام طبقات و پیشوں کے لیے اپنی معنویت رکھتا ہے۔ اور ہم مستقبل میں ان میں سے کسی پیشہ کوا ختیار کر سکتے ہیں اس لیے بالواسطہ طور پر یہ (بحیثیت طالب علم) ہمارے لیے بھی معنویت رکھتاہے۔ کیا ہم ریاضی نہیں پڑھتے، اگرچہ ہم میں سے سب انجینئر یا ریاضی دان نہیں بنتے ؟ کیاعلم ہندسہ کی بنیادی باتیں ہماری روزمرہ کی زندگی میں کام نہیں آتیں؟  

دوسری بات یہ ہے کہ ہم سبھی ذمہ دار شہری بننے جا رہے ہیں جنھیں ووٹ دینے اور دیگر مسئلوں پر رائے دینے کا حق حاصل ہے۔ اس حق کو ذمہ داری سے استعمال کرنے کے لیے ضروری ہے کہ ہمیں ان سیاسی تصورات اور اداروں کے بارے میں بنیادی معلومات حاصل ہوں جو ہماری دنیا کی تشکیل کرتے ہیں۔ ہم ایک باخبر سماج میں رہتے ہیں اس لیے اگر ہمیں گرام سبھا میں حصہ لینا ہے یا ویب سائٹ اور انتخابات کے بارے میں اپنی رائے پیش کرنی ہے تو ہمیں باخبر ہونا اور استدلالی موقف اختیار کرنا انتہائی ضروری ہے۔اگر ہم بغیر سوچے سمجھے اپنی ترجیحات کا اظہار کرنے لگیں گے تو ہم موثر ثابت نہیں ہوں گے۔ اور اگر ہم غور و فکر اور مکمل تیاری کے ساتھ میدان میں آتے ہیں تو ہم اپنے مشترکہ مفادات کو فروغ دینے کے لیے نئے ذرائع ابلاغ کا استعمال کر سکتے ہیں۔

بحیثیت شہری، ہماری حقیقت موسیقی کے پروگرام کے ان سامعین کی طرح ہوتی ہے جن کا گیت اور موسیقی کی دھنوں کو پیش کرنے میں کوئی کردار نہیں ہوتا وہ اس کے اصل فنکار نہیں ہوتے۔ تاہم ہم پروگرام طے کرتے ہیں اور فنکاروں کو ان کے مظاہرے کی داد دیتے ہیں اور ان سے نئی نئی فرمائش کرتے ہیں۔ کیا آپ نے اس بات پر غور کیا ہے کہ موسیقار اس وقت تک اپنے فن کا بہتر مظاہرہ کرتے ہیں جب سامعین موسیقی کے رموز سے باخبر ہوتے ہیں اور اچھی کارکردگی پر داد سے نوازتے ہیں۔ اسی طرح تعلیم یافتہ اور باخبر شہری بھی سیاستدانوں کو ‘ اپنی سیاست  عوامی مفادات کے تابع کرنے پر مجبور کرتے ہیں۔

تیسری بات یہ ہے کہ آزادی‘ مساوات اور سیکولرزم وغیرہ ہماری زندگی سے الگ تھلگ مسئلے نہیں ہیں۔ روزمرہ کی زندگی میں ہمیں خاندانوں‘ اسکولوں‘ کالجوں‘ تجارتی مراکز(Malls) وغیرہ میں مختلف طرح کے امتیازات کا سامنا کرنا پڑتا ہے۔ اور ہم خود ان لوگوں کے تئیں عصبیت رکھتے ہیں جو ہم سے ذات یا مذہب‘ جنس یا کلاس کی بنیاد پر مختلف ہوتے ہیں۔ اگر ہم خود کو مظلوم محسوس کرتے ہیں تو اس ظلم و زیادتی سے چھٹکارا چاہتے ہیں اور اگر اس مسئلہ کے حل میں تاخیر ہوتی ہے تو ہم پرتشدد انقلاب کو جائز ٹھہراتے ہیں۔ اگر ہم مراعات یافتہ طبقہ سے تعلق رکھتے ہیں تو عزت و وقار کے لیے جدوجہد کرنے والے اپنے گھریلو خادماوں اور ملازموں کے خلاف کوئی بھی ظلم و ستم ڈھانے سے انکارنہیں کرتے ہیں ۔ کئی موقعوں پر ہم یہ محسوس کرتے ہیں کہ ہمارے ملازم ایسے ہی برتاو کےمستحق ہیں۔ سیاسی نظریہ ہمیں سیاسی چیزوں کے بارے میں اپنے خیالات و احساسات کو پرکھنے کی تحریک فراہم کرتا ہے۔ان پر غوروفکر کرنے کے نتیجے میں ہمارے خیالات اور احساسات میں اعتدال پیدا ہوجاتاہے۔ 

آخری بات یہ کہ ہم طلباکی حیثیت سے بحث ومباحثے اور تقریری مقابلوں میں حصہ لیتے ہیں۔ اور کیا صحیح ہے اور کیا غلط‘ کیا مناسب کیا نامناسب‘ اس بارے میں ہم اپنی آراء پیش کرتے ہیں لیکن ہمیں یہ نہیں معلوم ہوتا ہے کہ یہ باتیں عقلی اعتبار سے درست ہیں یا نہیں۔ جب ہم دوسروں سے بحث کرتے ہیں ہمیں اپنے خیالات کے دفاع کے لیے دلائل اورشواہد کی ضرورت ہوتی ہے۔ سیاسی نظریہ ہمیں انصاف یا مساوات کے بارے میں سائنٹفک انداز میں سوچنے اور غور و فکر کی دعوت دیتا ہے تاکہ ہم مشترکہ مفادات کے حصول کے لیے اپنے خیالات اور دلائل کو بہتر اور منجھے ہوئے انداز میں پیش کر سکیں۔ آج عالمی اطلاعاتی نظام میں دلائل وشواہد کے ساتھ بحث کرنے اور مؤثر انداز میں اپنی بات پہنچانے کی صلاحیت ایک قیمتی اثاثہ ثابت ہو سکتی ہے۔