7.1 قومیت کا تعا رف    Introducing Nationalis

عالمگیریت کے اس دور میں دنیا سکڑ رہی ہے۔ آج ہم ایک عالمی گاوں میں رہ رہے ہیں۔ قومیت آج بے معنی ہو گئی ہے۔

نہیں یہ معاملہ نہیں ہے۔ قومیت کا نظریہ آج بھی معنویت رکھتا ہے ۔ اس کا نظارہ آپ اس وقت کر سکتے ہیں جب ہندوستانی کرکٹ ٹیم کرکٹ کھیلنے باہر جاتی ہے۔ یا جب آپ کو یہ معلوم  ہوتا ہے کہ غیر ملکوں میں آباد ہندوستانی باشندے اب بھی بالی ووڈ کی فلمیں دیکھتے ہیں۔

اسے کیجیے

اپنی زبان میں حب الوطنی کے نغمہ کو منتخب کریں۔ اس نغمہ میں وطن پرستی کو کس طرح پیش کیا گیا ہے؟ 

اسی طرح اپنی زبان میں حب الوطنی پر مبنی کوئی فلم منتخب کر کے اسے دیکھیں کہ اس میں قومیت اور اس کی تہہ داریوں کو کس انداز میں پیش کیا گیا ہے۔

آپ ہماری ٹیم کی ہمت افزائی! کیوں نہیں کرتے؟ کیا آپ کے اندر قومیت کا جذبہ موجزن نہیں ہے۔

میں بھی اتنی ہی قوم پرست ہوں جتنا کوئی دوسرا۔ میں اپنے حق رائے دہی کا استعمال ووٹ ڈال کر کرتی ہوں، میں اپنا ٹیکس ادا کرتی ہوں اور ملک کے قوانین کا احترام کرتی ہوں۔ مجھے اس بات  پر فخر ہے کہ میں اس ملک کی باشندہ ہوں۔

باسق میں حق خود داریت کا مطالبہ

دنیا کے مختلف حصوں میں قومی خود مختاری یا حق خود داریت دیے جانے کے مطالبات کیے جا رہے ہیں۔ آئیے ہم ایک ایسے ہی معاملہ کا جائزہ لیتے ہیں۔

باسق ،اسپین کا ایک خوش حال اور پہاڑی صوبہ ہے۔ اس صوبہ کو اسپینی وفاق کے اندر حکومت اسپین نے ایک خود مختار صوبہ کی حیثیت سے تسلیم کیا ہے۔ مگر باسق نشلسٹ مومنٹ (باسق قوم پرست تحریک) کے قائدین اس خود مختاری سے مطمئن نہیں ہیں۔ اس تحریک کے حامیوں اور کارکنوں نے اپنے مطالبہ کو منوانے کے لیے آئینی سہارے کے علاوہ حال ہی میں پر تشدد ذرائع کا استعمال بھی شروع کیا ہے۔

باسق قوم پرستوں کا کہنا ہے کہ ان کی تہذیب ، اسپینی تہذیب سے بالکل مختلف ہے۔ اس کی اپنی زبان ہے جو اسپینی زبان سے کوئی میل نہیں کھاتی۔ اور باسق علاقہ کی محض ایک تہائی آبادی ہی اسپینی  زبان  بولتی اور سمجھتی ہے۔

باسق کا پہاڑوں اور نشیب و فراز والا علاقہ ملک کے بقیہ حصوں کے مقابلے میں ایک جداگانہ جغرافیائی حیثیت رکھتا ہے۔ 

رومی سلطنت کے زمانے سے باسق کبھی اپنی خود مختاری سے دستبردار نہیں ہوا نہ ہی اس نے یہ حق اسپینی حکمرانوں کے حوالے کیا۔ باسق کا اپنا منفرد نظام عدل، انتظامیہ اور مالیات کا نظام ہے جو وہ خود چلاتے ہیں۔ موجودہ باسق نشلسٹ تحریک کا آغاز اس وقت ہوا جب 19 ویں صدی کے اختتام پر اسپینی حکمرانوں نے اس کے منفرد سیاسی نظام کو ختم کرنے کی کوشش کی۔ 20ویں صدی میں اسپینی ڈکٹیٹر (آمر) فرانکو نے اس خود مختاری کو مزید کمزور کرنے کی کوشش کی۔ وہ اس حد تک آگے بڑھا کہ اس نے عوامی مقامات کے ساتھ ساتھ گھروں میں بھی باسق زبان کے استعمال پر پابندی عائد کردی۔ بہر حال اب ان جابرانہ اقدامات کو واپس لے لیا گیا ہے۔ مگرباسق تحریک کے قائدین، اسپینی حکومت کے اقدامات کو شبہ کی نظر سے دیکھتے ہیں اور انھیں اس بات کا بھی خدشہ ہے کہ ان کے صوبہ میں باہری لوگوں کو بسایا جا رہا ہے۔ لیکن ان کے مخالفین کہتے ہیں کہ باسق کے علیحدگی پسند عناصر اس مسئلہ کے ذریعہ جو پہلے ہی طے کر دیا گیا ہے، سیاسی فائدہ اٹھانا چاہتے ہیں۔ کیا آپ سمجھتے ہیں کہ باسق قوم پرستوں کا ایک علیحدہ ریاست کا مطالبہ جائز ہے؟ کیا باسق ایک قوم ہیں؟ اس سوال کاجواب دینے سے پہلے مزید آپ کیا جاننا چاہیں گے؟ کیا آپ کو دنیا کے مختلف حصوں سے اس طرح کی تحریکوں کی مثالیں مل سکتی ہیں؟ کیا آپ سمجھتے ہیں کہ ہمارے ملک کے اندر بھی کچھ خطوں اور طبقوں نے اس طرح کے مطالبات پیش کیے ہیں؟

ماخوذ: www.wikipedia.org

7.4 قومیت اورتکثیریت (مذہبی و تہذیبی رنگا رنگی)

              NATIONALISM AND PLURALISM   

جیسے ہی ہم ایک کلچر ۔ ایک ریاست کے تصور کو ترک کر دیں گے تو یہ امر ضروری ہو جائے گا کہ ایک ہی ملک کے اندر مختلف ثقافتوں اور طبقوں کی بقا اور ترقی کے لیے نئے طریقے اپنائے جائیں۔ اسی مقصد کے پیش نظر کئی جمہوری معاشروں نے آج اپنے یہاں موجودہ اقلیتی گروہوں کی ثقافتی شناخت کو تسلیم کرنے اور ان کے حقوق کے تحفظ کے لیے کئی اقدامات کرنے کا جواز پیش کیا ہے۔ ہندوستان کے آئین میں بھی مذہبی، لسانی،اور ثقافتی اقلیتوں کے حقوق کے تحفظ کے لیے کئی اقدامات کیے ہیں۔ مختلف ملکوں میں اقلیتی فرقوں اور ان کے افراد کے لیے جو دستوری حقوق فراہم کیے گئے ہیں ان میں زبان، ثقافت اور مذہب کے تحفظ کا قانون شامل ہے۔ بعض ملکوں میں مسلمہ اقلیتی گروہوں کو قانون ساز اور ریاست کے دیگر اداروں میں نمائندگی کا بھی حق دیا گیا ہے۔ ان حقوق کو اس لیے درست اور جائز قرار دیا جا سکتا ہے کہ یہ اقلیتی گروہوں کو یکساں سلوک اور تحفظ فراہم کرنے کے ساتھ ساتھ ان کی ثقافتی و تہذیبی شناخت کا بھی تحفظ فراہم کرتی ہیں۔ اسی سمت میں مختلف اقلیتی گروہوں کو بھی قومیت کا حصہ تسلیم کیا جانا چاہیے۔ اس کے معنیٰ یہ ہوئے کہ قومی شناخت کی تشکیل میں سب کو شامل کرنے کاایسا طریقہ کار اپنایا جائے جو ریاست کے اندر تمام ثقافتی گروہوں کی اہمیت اور ملک کی تعمیر میں ان کی منفرد خدمات کے اعتراف کا قائل ہو۔

اسے کیجیے

ہندوستان اور بیرون ملکوں میں مختلف گروہوں کی طرف حق خودداریت کے بارے میں جو مطالبات کیے جارہے ہیں‘ ان کے بارے میں اخبارات اور رسائل میں چھپنے والے مواد کو یکجا کیجیے۔ اور اس حوالے سے مندرجہ ذیل نکات کی روشنی میں رائے قائم کیجیے۔

◊   ان مطالبات کی پشت پر کون سے عوامل کار فرما ہیں؟

◊   انہوں نے اپنے مطالبات کو منوانے کے لیے کون سی حکمت عملی اور طریقہ اختیار کیے ہیں؟

◊   کیا ان کے مطالبات برحق ہیں؟ 

◊   آپ کے خیال میں ان کا کیا معقول حل ہو سکتا ہے؟ 

ٹیگور کا قومیت پر تبصرہ

’’حب الوطنی ہماری آخری روحانی پناہ گاہ نہیں ہو سکتی ہے : انسانیت میری پناہ گاہ ہے میں ہیروں کی قیمت کے عوض گلاس نہیں خریدوںگا اور میں جب تک زندہ ہوں تب تک حب الوطنی کو انسانیت پر غالب آنے نہیں دوں گا۔‘‘

یہ قول ربندرناتھ ٹیگور کا ہے۔ وہ سامراجی اقتدار کے خلاف تھے اور ہندوستان کی آزادی چاہتے تھے۔ ان کا ماننا تھا کہ برطانوی سامراجی اقتدار میں ’’انسانی رشتوں کے تقدس و عظمت کے لیے کوئی جگہ نہیں ہے۔ حالانکہ یہی چیز برطانوی تہذیب میں متاع عزیز سمجھی جاتی ہے۔ ٹیگور نے مغربی سامراجیت کی مخالفت اور مغربی تہذیب کو مسترد کیے جانے کے درمیان ایک خطِ فاصل کھینچا تھا۔ ٹیگور کا خیال تھا کہ ہندوستانیوں کو اپنی تہذیبی اور ثقافتی جڑوں سے وابستہ رہنا چاہیے وہیں انھیں بیرون ملک سے اچھی باتیں سیکھنے میں کوئی تامل و تردد نہیں ہونا چاہیے۔

ان کی تحریروں میں حب الوطنی مستقل ایک موضوع رہا ہے۔ وہ قومیت کی کوتاہ اور تنگ نظری پر مبنی تعبیروں کے سخت ناقد تھے جس کا مشاہدہ انہوں نے ملک کے مختلف حصوں میں چل رہی تحریک آزادی کے دوران کیا تھا۔ خصوصاً، انھیں اس بات کا اندیشہ تھا کہ مغرب کوہندوستانی جیسی لگنے والی روایات کے حق میں مسترد کر دینے کے نتیجے میں نہ صرف ہم اپنے آپ کومحدود کر دیں گے بلکہ یہ چیزیں بیرونی اثرات کے تئیں مخالفت کے جذبے میں تبدیل ہو جائیں گی، ان اثرات میں عیسائیت، یہودیت،زرتشت مذہب اور اسلام شامل ہیں جو اب ہمارے ملک کا حصہ ہیں۔

اگرچہ یہ توقع کی جاتی ہے کہ اقلیتی گروہوں کی حیثیت تسلیم کرکے اور انھیں تحفظ فراہم کرکے ان کی خواہشات کی تکمیل ہو گی لیکن اس کے باوجود بعض گروہ اب بھی علیحدہ یاست کامطالبہ کر سکتے ہیں۔ ایک ایسے دور میں، جب کہ عالمگیریت کی لہر تیزی سے پھیل رہی ہےیہ بات بڑی عجیب و غریب نظر آتی ہے لیکن آج بھی قوم پرستانہ جذبات گروہوں اور طبقوں کو متحرک کر رہے ہیں اور علیحدہ ریاست کے قیام کے لیے تحریکیں چلارہے ہیں۔ اس طرح کے مطالبات کو جمہوری انداز میں حل کرنے کے لیے آج ان ملکوں کو حکمت و تدبر اور کشادہ دلی سے کام لینے کی ضرورت ہے۔

خلاصہ کلام یہ ہے کہ اکثر حق خودداریت سے یہ مراد لی جاتی ہے کہ قوموں کو ایک آزاد علیحدہ ریاست قائم کرنے کا حق ہے۔ ہر ایک گروہ کو جو خود ایک مختلف کلچرل گروپ یا قوم گردانتا ہے، آزاد ریاست فراہم کرنا نہ صرف ناقابل عمل ہے بلکہ یہ ایک نا پسندیدہ چیز بھی ہے۔ اگر ایسا ہوتا ہے تو اس کے نتیجے میں ایسی چھوٹی چھوٹی ریاستیں معرض وجود میں آجائیں گی جو اقتصادی اور سیاسی لحاظ سے پائدار نہیں ہوں گی اور اس سے اقلیتوں کے مسائل میں کئی گنا اضافہ ہو جائے گا۔ اب اس حق کی نئی تعبیر و تشریح کی جا رہی ہے کہ اس سے مراد ایک ریاست کے اندر موجود کسی قومی فرقہ کو بعض جمہوری حقوق عطا کرنا ہے۔ 

آج ہم جس دنیا میں رہ رہے ہیں اس میں شناختوں کو تسلیم کیے جانے کی اہمیت کا گہرا شعور پایا جاتا ہے۔ آج آپ دیکھ رہے ہیں کہ کئی گروپ اپنی شناخت کو تسلیم کرانے کے لیے جدوجہد کر رہے ہیں اور وہ اپنے اس ادعا کے لیے قومیت کی زبان استعمال کررہے ہیں۔ بہر حال ہمیں شناخت کے حوالے سے ان مطالبات کی پزیرائی کرنی چاہیے لیکن اس معاملہ میں بڑی احتیاط برتنے کی ضرورت ہے کہ کہیں یہ مطالبات معاشرے میں تشدد اور انتشار کا سبب نہ بن جائیں۔ ہمیں یہ بات بھی ذہن میں رکھنی چاہیے کہ ہر فرد کی ایک سے زاید شناختیں ہوتی ہیں۔ مثال کے طور پر ایک شخص کی شناخت کی بنیاد جنس،ذات، مذہب، زبان یا علاقہ پر ہو سکتی ہے اور ممکن ہے وہ ان سب پر فخر کرے۔ جب کسی شخص کو یہ احساس ہو کہ وہ اپنی شخصیت کے مختلف پہلوئوں کو پوری آزادی کے ساتھ بیان کر سکتا ہے تو اسے یہ محسوس کرنے کی ضرورت ہے کہ وہ اپنی کسی ایک شناخت کے لیے رعایت اور سیاسی حیثیت منوانے کا مطالبہ کرے۔ جمہوریت میں فرد کی سیاسی شناخت میں مختلف شناختوں کو جو اس کی ہیں، شامل کیا جانا چاہیے۔ یہ بات خطرناک ثابت ہوگی اگر رواداری ،یکسانیت اور یک رنگی کی شکل میں شناخت اور قومیت کی تشکیل کو پروان چڑھنے کا موقع دیا گیا۔

مشقیں

1۔ ایک قوم کس معنی میں دوسری اجتماعی شکلوں سے مختلف ہوتی ہے؟

2۔ قومی خودداریت کے حق سے آپ کیا مراد لیتے ہیں؟یہ تصور قوم۔ریاست کی تشکیل میں کس طرح سے کارفرما رہا اور اس نے کون سے چیلنج کھڑے کیے ہیں؟

3۔  ہم نے دیکھا کہ قومیت لوگوں کو جوڑتی بھی ہے اور توڑتی بھی ۔ آزادی بھی دلاتی ہے اور ساتھ ساتھ تلخیاں اور تنازعا ت بھی پیدا کرتی ہے۔مثالوں سے جواب دیں؟ 

4۔  حسب نسب، زبان، مذہب اور نہ نسل یورپی دنیا میں قومیت کا مشترکہ عنصر ہونے کا دعویٰ کرسکتا ہے۔

5۔   ان عوامل کی وضاحت مثالوں کے ساتھ کیجیے جن کے نتیجے میں قوم پرستی کے جذبات و احساسات کا ظہور ہوا۔

6۔  قوم پرستانہ مطالبات سے نمٹنے میں کس طرح آمرانہ حکومتوں کے مقابلے میں جمہوری حکومتیں زیادہ موثر ثابت ہو سکتی ہیں؟

7۔  آپ کی رائے میں قومیت کی مجبوریاں کیا ہیں؟