عملی کام 1

کیا آپ کو معلوم ہے کہ دہلی کے پہاڑی جنگل (Ridge forest) اس علاقہ کی قدرتی نباتات نہیں ہیں بلکہ اسے انگریزوں نے 1915کے آس پاس لگایا تھا ؟ اس جنگل کا خاص اور نمایاں درخت ولایتی کیکر یا ولایتی ببول ہے جو جنوبی امریکا سے ہندوستان لایا گیا تھا،جو اب پورے شمالی ہند میں یہیں کا قدرتی درخت بن گیا ہے ۔

کیاآپ جانتے ہیں کہ اتر آنچل کے کاربیٹ نیشنل پارک کے وسیع وعریض مرغزار ،جنھیں چَورز کے نام سے جانا جاتا ہے، ایک زمانے میں زرعی کھیت تھے ؟ اس علاقہ کے گائوں کو یہاں سے منتقل کر کے دوسری جگہ بسایا گیاتھا، جو اب ایک قدیمی بیاباں معلوم ہوتا ہے۔ کیاایسی جگہوں کی کچھ اور مثالیں سوچ سکتے ہیں ۔جہاں اب قدرتی نظر آنے والا منظر در اصل ثقافتی اختراعات کی وجہ سے بدل چکا ہے ۔  

برطانیہ کے صنعتی انقلاب کے ماحولیاتی اثرات پوری دنیا میں محسوس کیے گیے تھے۔شمالی امریکاکے جنوبی حصے اور جزائر کیریبیّن کو لنکا شائر کے روئی کے کارخانوں کی ضرورتوں کو پورا کرنے کی غرض سے باغات میں بدل دیا گیا ۔مغربی افریقہ کے نوجوانوں کو روئی کے باغات میں مزدوروں کی حیثیت سے کام کرنے کے لیے زبردستی لے جایا گیا ۔مغربی افریقہ کی آبادی میں کمی کی وجہ سے وہاں کی زراعت زوال پذیر ہوئی اور کھیت بنجر خالی زمین میں تبدیلی ہوگئے۔ برطانیہ میں کوئلہ جلانے والے کارخانوں کے دھوئیں نے فضا کو آلودہ کر دیا ۔دیہات سے اجڑے ہوئے کسان اور مزدور کام کے لیے شہروں کی طر ف آئے اور خستہ حالت میں زندگی بسر کرنے لگے ۔روئی کی صنعت کے ماحولیاتی قدموں کے نشان تمام شہری اور دیہی ماحولوں میں نظر آنے لگے ۔

بھوپال کا صنعتی حادثہ : مورد ِاِلزام کون تھا ؟  

3دسمبر 1984کی رات کو بھوپال میں ایک جان لیوا گیس پھیلی جس سے تقریباً 4,000 لوگ مارے گئے اور دیگر 2لاکھ لوگ اپاہج ہو گئے تھے ۔بعد میں پتہ چلا کہ یہ گیس میتھائل آئی سو سائینیٹ (ایم آئی سی ) تھی جو شہر میں یونین کاربائیڈ کی کیڑے مار دوائیں بناے والے کارخانے سے حادثتاً خارج ہوگئی تھی ۔سائنس اور ماحول کے مرکز نے اپنی دوسری رپورٹ میں اس تباہی کے اسباب کا تجزیہ کرتے ہوئے لکھا:  

1977میں یونین کاربائیڈ کی بھوپال میں آمد کا سب نے خیر مقدم کیا تھا کیونکہ اس کا مطلب تھا بھوپال کے لیے روزگار اور پیسہ سبز انقلاب کے بعد اور کیڑے مار دوائوں کی بڑھتی ہوئی مانگ کے پیشِ نظر
ملک کے لیے زرِ مبادلہ کی بچت ۔ایم ۔آئی۔سی پلانٹ شروع ہی سے گڑ بڑ کر رہا تھا اور اس میں رساؤ تھے ،جن میں ایک وہ بھی شامل تھا جس کے سبب پلانٹ کو چلانے والے ایک شخص کی موت واقع ہو چکی تھی ۔یہ بڑے حادثہ سے پہلے ہوا تھا ۔تاہم حکومت لگاتار تنبیہوں کی ان دیکھی کر تی رہی ۔خاص طور پر بھوپال میونسپل کارپوریشن کے افسر اعلیٰ کی تنبیہ کہ جس نے 1975میں یونین کاربائیڈ کو نوٹس جاری کر کے بھوپال سے باہر جانے کو کہا تھا ۔اس افسر کا تبادلہ کر دیا گیا اور کمپنی نے کارپوریشن کو ایک پارک کے لیے 25ہزار روپے کا چندہ دیا ۔

تنبیہیں لگاتار آتی رہیں ۔مئی 1982میں یونین کاربائیڈ ،امریکا کے تین ماہروں نے حفاظتی اقدامات کا جائزہ لیا او رچونکا دینے والی غلطیوں کی نشان دہی کی ۔ان خدشات کی خبر ایک مقامی ہفتہ وار ’’رپٹ‘‘ میں چھپی جو بعد میں 1982میں پیغمبرانہ پیشین گوئیوں کے سلسلۂ مضامین میں شکل میں سامنے آئی۔ اسی وقت فیکٹری کے ملازمین کی یونین نے مرکزی وزراء اور وزیر اعلیٰ کو بھی لکھا اور صورت حال سے متنبہ کیا۔ ریاست کے وزیر محنت نے کئی بار قانون ساز اسمبلی کے گیس کے رسنے کا صرف چند ہفتوں میں فیکٹری کو ریاست کے آلودگی کنٹرول بورڈ نے اعتراض نہ ہونے کا سرٹیفکٹ دے دیا تھا ۔ مرکزی حکومت لاپرواہی کے لیے ریاستی حکومت سے بھی آگے تھی ۔اس نے کارخانے کو اجازت نامہ دیتے وقت اس کے حفاظتی ریکارڈ کو نظر انداز کر دیا اور محکمۂ ما حولیات کی خطرناک مشینوں کے لگانے سے متعلق ہدایات اور ضوابط کی بھی ان دیکھی کی ۔

رہ نما اصولوں اور تنبیہوں کو نظر انداز کئے جانے کی وجہ صاف ہے ۔کمپنی میں طاقتور سیاست دانوں اور سرکاری افسران اعلیٰ کے رشتہ دار ملازم ہیں ۔اس کا قانونی مشیر ایک اہم سیاسی لیڈر ہے اور اس کا افسر تعلقات عامہّ کے ایک سابق وزیر کا بھتیجہ ہے۔کمپنی کا شاندار مہمان خانہ سیاست دانوں کے لیے ہر وقت حاضر تھا ۔وزیر اعلیٰ کی بیوی کے بارے میں کہا گیا کہ امریکا کے دورے کے دوران ان کی شاندار مہمان نوازی کی گئی اور کمپنی نے وزیر اعلیٰ کے وطن میں ایک فلاحی تنظیم کو 1.5لاکھ(ڈیڑھ لاکھ روپے) کا چندہ دیا تھا ۔

یونین کاربائیڈ نے بھی اس المیہ کے بعد اپنا پورا کردار ادا کیا ۔بھوپال پلانٹ کا ڈیزائن نا مکمل تھا اور اس میں بہت سی حفاظتی خصوصیات موجود نہیں تھیں ۔اس میں جلد آگاہ کرنے کا کمپیوٹری نظام موجود نہ تھا جو کہ امریکامیں اس طرح کی کمپنی کی فیکٹریوں میں ایک لازمی آلہ ہوتا ہے ۔کمپنی نے مقامی بستیوں کے ساتھ مل کر ہنگامی صورت حال میں لوگوں کو باہر نکالنے کے طور طریقے بھی تیار نہیں کئے تھے ۔پلانٹ کی دیکھ بھال بھی نہیں ہوتی تھی اور وہ مطلوبہ کار گزاری کی سطح پر کام نہیں کر رہا تھا ۔حوصلہ پست تھا کیونکہ فروخت کم ہوتی جارہی تھی اور پلانٹ اپنی استعداد کے ایک تہائی حصہ پر کام کررہا تھا ۔عملہ کی تعداد کم کردی گئی تھی اور بہت سے انجینٔیراور مشین چلانے والے کاریگر کام چھوڑ کر چلے گئے تھے۔ جس کی وجہ سے موجود عملہ کے لیے تمام کام کرنا نا ممکن ہو گیا تھا۔بہت سے اوزار بے کار ہو چکے تھے ۔

صحیح معنوں میں سماجی ماحولیات کو جو چیز ’’سماجی ‘‘ بناتی ہے وہ اِس حقیقت کو، جو اکثر نظر انداز کر دی جاتی ہے ،تسلیم کرنا ہے کہ   تقریباً ہمارے سب ہی ماحولیاتی مسائل مضبوط اور گہرے سماجی مسائل پیدا کرتے ہیں۔اس کے بر عکس موجودہ ماحولیات کو صاف طورپر سمجھا نہیں جا سکتا جب تک کہ سوسائٹی کے اندر کے مسئلوں کے ساتھ پختہ ارادے کے ساتھ نپٹا نہیں جاتا ۔ان کا حل تودور کی بات ہے ۔اس نکتہ کو مزید مادی شکل دیں تو یہ کہا جا سکتا ہے کہ معاشی ،نسلی ، ثقافتی اور جنس پر مبنی ٹکرائو اور کچھ دوسری کشاکش سنگین ترین ماحولیاتی اکھاڑ پچھاڑ کی جڑیں ہیں ۔یہ یقینا قدرتی تباہ کاریوں کے علاوہ ہیں ۔

Murray Bookchin سیاسی فلسفی اور ادارہ سماجی ماحولیات کے بانی ہیں ۔

خدا نہ کرے ہندوستان کبھی ایسے صنعتی نظام کو اختیا کرے جیسا مغربی ملکوں میں ہے ۔ایک چھوٹے سے جزیرے (انگلینڈ) کی بادشاہت کی معاشی شہنشاہیت نے آج دنیا کو زنجیروں میں جکڑ رکھا ہے ۔اگر 300ملین لوگوں کی پوری قوم اسی قسم کا معاشی استحصال کرنے پر اترآئے تو دنیا کو اس طرح ننگا کردے گی جیسے ٹڈی دل ۔                                           (مہاتما گاندھی)                  

عملی کام   2

معلوم کیجیے کہ آپ کے گھر میں روزانہ کتنا پانی استعمال کیا جاتا ہے ۔یہ جاننے کی کوشش بھی کیجیے کہ مختلف آمدنیوں والے اتنے ہی بڑے گھرانوں میں کتنا پانی استعمال ہوتا ہے ۔مختلف خاندان پانی حاصل کرنے کے لیے کتنا وقت اور روپیہ صرف کرتے ہیں ؟ گھر میں پانی لانے کی ذمہ داری کس کی ہے ۔ لوگوں کے مختلف طبقوں کو حکومت کتنا پانی مہیا کرتی ہے ؟  

عملی کام   3

تصور کیجیے کہ آپ ایک لڑکا یا لڑکی ہیں او رجھگی جھونپڑی میں رہتے ہیں۔ آپ کے گھر کے لوگ کیا کریں گے اور آپ کس طرح رہیں گے؟ ایک مختصر مضمون میں آپ ’اپنی زندگی کے ایک روز ‘کا بیان کیجیے ۔