آج کل ہم رائے دہندوں کی ترجیحات کو ریکارڈ کرنے کے لیے الیکٹرونک ووٹنگ مشین (EVM)کا استعمال کرتے ہیں۔ لیکن ہم نے شروعات اس طرح نہیں کی تھی۔ پہلے عام الیکشن میں یہ فیصلہ کیا گیا کہ ہر پولنگ بوتھ میں ہر امیدوار کے لیے ایک ایک صندوق رکھا جائے جس پر امیدوار کا چناؤ نشان موجود ہو۔ ہر ووٹر کو ایک خالی بیلیٹ پیپر دیا جائے گا جس کو وہ اس امیدوار کے صندوق میں ڈالے گا جس کو وہ ووٹ دینا چاہتا ہے۔ تقریباً بیس لاکھ اسٹیل کے صندوقوں کا استعمال اس مقصد کے لیے ہوا تھا۔ پنجاب کے ایک پریزائیڈنگ آفیسر نے ان صندوقوں کی تیاری سے متعلق اپنا تجربہ بیان کیاہے۔’’ہر صندوق میں امیدوار کا نشان اندر اور باہر چاروں طرف‘‘اس کے نام کے ساتھ، جو ا ردو،ہندی اور پنجابی میں لکھا ہو، ظاہر ہونا چاہیے ۔اس کے علاوہ چناؤ کے حلقہ ، پولنگ اسٹیشن اور پولنگ بوتھ کا نمبر بھی ہونا چاہیے ۔ کاغذ کی مہر کو امیدوار کے نمبر شمارکے ساتھ جس پر پریزائیڈنگ افسر کے دستخط ہوں، نشان کے فریم میں داخل کرنا ضروری تھا اور اس کی کھڑکی کو اس کے دروازے سے بند کرنا تھا اور جسے اس کے دوسرے سرے پر تارسے باندھنا تھا۔ یہ سب کچھ چناؤ کی پولنگ سے ایک دن پہلے ہونا تھا۔ چناؤ کے نشانوں اور لیبل کو چپکانے کے لیے پہلے صندوق کو ریگ مال یا پتھر کے ٹکڑے سے رگڑنا پڑتا تھا۔ مجھے معلوم ہوا کہ اس کام میں چھ لوگوں کو، جن میں میری دوبیٹیاں بھی شامل ہیں ، پانچ گھنٹے کا وقت لگا۔ یہ سب کام میرے گھر ہی میں ہوا۔‘‘

اس الیکشن کو غیر معمولی بنانے میں صرف رقبہ اور ووٹروں کی تعداد کا ہی ہاتھ نہیں تھا۔ پہلا عام الیکشن ایک غریب اور ان پڑھ ملک میں جمہوریت کی پہلی آزمائش بھی تھا۔ اب تک جمہوریت صرف دولت مند ملکوں ہی میں پنپ سکی تھی خاص طور سے یوروپ اور امریکہ میں جہاں تقریباً ہر آدمی پڑھا لکھا تھا۔ اس وقت تک یوروپ کے کئی ملکوں میں عورتوں کو حق رائے دہندگی نہیں ملا تھا ۔اس حوالے سے ہندوستان کا عام حق رائے دہندگی کا فیصلہ ایک جرأت مندانہ اور جوکھم بھرا قدام تھا۔ ایک ہندوستانی ایڈ یٹر نے اس کو ’ تاریخ کا سب سے بڑا جوا‘ قرار دیا۔ ایک اور میگزین ’آرگنائزر‘ نے لکھا کہ جو اہرلعل نہرو کو ’’ اپنی زندگی ہی میں عام رائے دہندگی کے حق کی ناکامی کا اعتراف کرنا پڑے گا‘‘۔ انڈین سول سروس کے ایک برطانوی ممبر کا خیال تھا کہ’ ایک آنے والا اور زیادہ روشن خیال زمانہ‘ لاکھوں ناخواندہ عوام کے ووٹ کی ریکارڈنگ کے مضحکہ خیز ڈھونگ کو حیرت اور استعجاب کی نظر سے دیکھے گا۔

 ہمارے انتخابی نظام نے کانگریس کی کامیابیوں کو مصنوعی طریقے سے بڑھا چڑھا کر پیش کیا۔ حالاں کہ کانگریس نے ہر چار سیٹوں میں سے تین سیٹوں پر کامیابی حاصل کی لیکن وہ ڈالے گئے ووٹوں کا آدھا حصہ بھی نہ لے سکی۔ مثال کے طور پر1952میں کانگریس نے45فی صدووٹ حاصل کیے تھے لیکن اس کی سیٹوں کی تعداد 74فی صدتھی۔ حاصل کردہ ووٹوں کے اعتبار سے پورے ملک میں سوشلسٹ پارٹی دوسرے نمبر پر تھی جس کو  10فی صدسے زیادہ ووٹ ملے تھے لیکن وہ3فی صدسیٹ بھی حاصل نہیں کرسکی۔ یہ سب کیسے ہوا؟ اس کو سمجھنے کے لیے آپ کو پچھلے سال کی درسی کتاب میں ’دستور پر عمل ‘ کے زیرِ عنوان بحث کو دہرانا پڑے گا۔

 کانگریس بالادستی کی نوعیت

کانگریس پارٹی کی اس غیر معمولی کامیابی کی جڑیں دراصل آزادی کی جود جہد میں پنہاں تھیں۔ کانگریس کو قومی تحریک کا وارث سمجھا جاتا ہے۔ وہ رہنما جوآزادی کی جنگ میں پیش پیش تھے اب کانگریس کے امیدوار وں کی حیثیت سے الیکشن لڑرہے تھے۔ کانگریس پہلے ہی سے ایک منظم پارٹی تھی اور جس وقت دوسری سیاسی پارٹیاں اپنی حکمت عملی پر غور کرتیں،کانگریس اپنی مہم یا پرچار شروع کر دیتی تھی۔ حقیقت یہ ہے کہ اکثر پارٹیاں آزادی کے وقت یا پھر اس کے بعد وجود میں آئیں۔ تو کانگریس کو ’ خِشت اوّل‘ ہونے کا فائدہ حاصل تھا۔ جیسا کہ ہم دیکھ چکے ہیں کہ آزادی کے وقت ہی کانگریس پارٹی ملک کے طول و عرض میں پھیل چکی تھی اورساتھ ہی مقامی اور دیہی سطح پر بھی اپنے قدم جما چکی تھی۔ سب سے اہم بات یہ تھی کہ ابھی تک کانگریس قومی تحریک تھی اس کی نوعیت ہمہ گیر تھی۔ ان تمام عناصر نے کانگریس کی بالادستی میں اہم کردار ادا کیا۔

کانگریس مختلف مفادات فرقوں حتیٰ کہ سیاسی پارٹیوں کے لیے بھی ایک ’پلیٹ فارم ‘ کی طرح تھی جہاں سے وہ قومی تحریک میں حصہ لے سکتے تھے۔ آزادی سے قبل کے ہندوستان میں بہت سی تنظیموں کو اپنے دستور اور انتظامی ڈھانچے کے ساتھ کانگریس میں رہنے کی اجازت تھی۔ ان میں سے کچھ بعد میں کانگریس سے الگ ہوگئیں اور حزبِ مخالف بن گئیں جیسے کہ کانگریس سو شلسٹ پارٹی۔ طریقۂ کار، پروگرام اور پالیسیوں کے اختلاف کے باوجود پارٹی ایک رائے عامہ ہموار کرنے میں کامیاب رہی اور اگرچہ وہ اختلافات ختم نہ کرپائی لیکن ان کو بڑھنے بھی نہ دیا۔

دھڑوں کی برداشت اور ان کا بندو بست

بھارتیہ جن سنگھ