’’ایک طرح سے دیوار پر چسپاں اثتہار گاؤں والوں کے مسائل اور ان کے حل کو صحیح صیحح متعا رف کراتا تھا۔ مثال کے طور پر مسئلہ یہ تھا کہ اگرچہ ہندوستان ایک زراعتی ملک تھا لیکن کسانوں نے محض کج روی کی بنا پر زیادہ غلہ اگانے سے انکار کر دیا تھا ۔حل یہ تھا کہ اس بارے میں کسانوں کے سامنے تقریریں کی جائیں اور ان کو ہر قسم کی دل کش تصویریں دکھائی جائیں۔ان سے کہا جائے کہ اگر وہ اپنے لیے نہیں تو کم سے کم قوم کے لیے ہی زیادہ اناج اگائیں۔تقریروں اور تصویروں کے سلسلے سے کسان کافی متاثر ہوئے۔ حتی کہ سب سے بھولا بھالاکسان بھی یہ سوچنے لگاکہ اس پوری مہم کے پیچھے کسی نہ کسی خفیہ مقصد کی موجودگی ہوسکتی ہے۔

ایسا ہی ایک اثتہار شوپال گنج میں کافی مشہور ہوا۔ اس میں سرپرپگڑی باندھے ہوئے ، کان میں بالیاں پہنے اور روئی بھری ہوئی بنڈی پہنے ایک تنومند کسان کو دکھایا تھاجو درانتی لیے ہوئے گیہوں کی لمبی لمبی بالیاں کاٹ رہا تھا ۔ اس کے پیچھے ایک عورت کھڑی تھی جو کافی خوش دکھائی دے رہی تھی اور وہ محکمۂ زراعت کے کسی افسر کی طرح ہنس رہی تھی ۔تصویر کے اوپر اور نیچے انگریزی میں لکھا تھا ’ زیادہ اناج اگاؤ ۔روئی کی صدریاں اور بالیاں پہننے والے کسان جو انگریزی بھی جانتے تھے انگریزی نعروں سے ان کو جیتا جا سکتا تھا اور وہ جو ہندی جانتے تھے ہندی ترجمہ سے بات سمجھ سکتے تھے۔اور جو لکھنا پڑھنا نہیں جانتے تھے کم سے کم کسان اور ہنستی ہوئی عورت کی تصویر سے شناخت کر سکتے ہیں۔ حکومت کو توقع تھی کے لوگ جیسے ہی کسان اور ہنستی ہوئی عورت کو دیکھیں گے سب کچھ چھوڑچھاڑ کر زیادہ اناج اگانے میں مصروف ہو جائیں گے جیسے کہ ان پر جادو کر دیا گیا ہو‘‘

شر ی لال شکلاکے ’’راگ درباری ‘‘ کے ترجمہ سے ایک اقتباس ۔یہ 1960کے اتر پردیش کے ایک گاؤ ں شو پال گنج کی صورت حال پر طنز ہے۔

ساٹھ کی دہائی میں زراعت کی صورت حال بدسے بدتر ہوگئی۔ چالیس اور پچاس کی دہائیوں میں پہلے ہی سے غلّے کی پیداوار کاتناسب آبادی میں اضافے سے زراساہی زیادہ تھا۔ 1965 اور1967کے درمیان ملک کے کئی علاقوں میں بھاری قحط پڑا۔ اور جیساکہ ہم اگلے باب میں دیکھیں گے یہی وہ زمانہ تھا جب ہندوستان کو دو جنگوں اور زرِ مبادلہ کے بحران کا سامنا کرنا پڑا۔ ان سب نے مل کر ملک میں خطرناک حد تک خوراک کی کمی اور قحط جیسے حالات پیدا کردئیے۔

خوراک کے بحران کا سب سے شدید احساس بہار میں ہوا، جہاں ریاست کو تقریباً قحط سالی کا سامنا کرنا پڑ رہا تھا۔ بہار کے تمام اضلاع میں خوراک کی کمی نمایاں تھی اور ان میں سے 9اضلاع تو اپنی عام پیداوار کے آدھے حصے سے بھی کم پیدا کررہے تھے اورپانچ تو ایسے تھے جو اپنی معمول کے مطابق پیداوار کی ایک تہائی سے بھی کم اگارہے تھے۔ غذا سے محرومی کا نتیجہ غذائیت کی کمی کی صورت میں ظاہر ہوا۔ یہ اندازہ لگایا جاتا ہے کہ ریاست کے کئی علاقوں میں فی شخص فی روز کیلوری کا حصول2200 سے گھٹ کر 1200رہ گیا (جب کہ ایک عام آدمی کو 2450کیلوری ایک دن میں چاہیے)۔ 1967میں بہارمیں شرح پچھلے اگلے سال کی شرح اموات سے34فی صدزیادہ تھی۔شمالی ہندوستان کی دوسری ریاستوں کے مقابلے میں اشیا خوردنی کی قیمتیں بھی بہار میں بہت بڑھ گئی تھیں۔ خوش حا ل پنجاب کے مقابلہ میں گیہوں اور چاول کی قیمت بہار میں دوگنی سے زیادہ تھی۔ حکومت کی خطہ وار تقسیم(Zoning)پالیسی کی وجہ سے ریاستوں کے درمیان اناج کی تجارت ممنوع تھی۔ اس نے بہار میں غلہّ کی موجودگی پر ڈرامائی طور سے کمی کی۔ ایسی صورت حا ل میں سماج کے سب سے غریب طبقے نے سب سے زیادہ دکھ جھیلا۔

غذائی بحران کے کئی نتائج سامنے آئے۔ اب حکومت کو گندم درآمد کرنا پڑا اوربیرونی امداد خصوصاً (US)سے قبول کرنی پڑی۔ اب منصوبہ بندی کرنے والوں کی پہلی ترجیح کسی نہ کسی طرح خوراک میں خود کفیل ہونا تھا۔ منصوبہ بندی کاپورا عمل اور اس سے وابستہ احساس فخرو امید کو بھی شدید دھکا لگا۔

چھٹی دہائی کے خاتمے پر ہندوستان کی ترقی کی داستان نے ایک نیا موڑ لیا۔ پانچویں باب میں آپ دیکھیں گے کہ کس طرح نہرو کی موت کے بعد کانگریس سسٹم کو مشکلات کا سامنا کرنا پڑا۔ اندراگاندھی ایک عوامی رہنما کی صورت میں ابھریں۔ انھوں نے معیشت کو چلانے اور قابو میں رکھنے کے لیے ریاست کے کردار کومزید مضبوط بنانے کا فیصلہ کیا۔1967کے بعد والے زمانے میں نجی صنعتوں پر کئی نئی پابندیاں عائد ہوئیں ۔ چودہ نجی بینکوں کو قومی بینک بنا لیاگیا۔ حکومت نے غریبوں کے حق میں کئی پروگراموں کا اعلان کیا ۔ یہ تبدیلیاں دراصل سماجوادی پالیسیوں کی طرف ایک نظریاتی جھکاؤ کے ساتھ ساتھ آئیں اور اس نے ملک میں گرمی اور جوش سے بھر پور بحث و مباحثے کی ایک لہر سیاسی پارٹیوں اور ماہرین کے درمیان پیدا کردی۔

بہرحال ریاست کی سرابرا ہی میں اقتصادی ترقی پر اتفاق رائے ہمیشہ کے لیے قائم نہیں رہ سکا، منصوبہ بندی جاری رہی لیکن اس کی اوّلیت بہت حد تک کم ہوگئی۔1950سے 1980کے درمیان ہندوستانی معیشت بہت سست رفتاری یعنی سالانہ تین سے ساڑھے تین فی صد سے بڑھی۔ عوامی شعبہ کی کچھ کمپنیوں میں جاری بدعنوانیوں اور نااہلتیوں اور نوکر شاہی کی اکڑفوں کے پیش نظر ملک کا وہ اعتماد متزلزل ہوگیا جو ابتدا میں ان اداروں پر کیا گیا تھا۔ عوام کے عدم اعتماد کی وجہ سے پالیسی بنانے والوں نے 1980کے بعد سے معیشت پر سے ریاست کادخل کم سے کم کر دیا۔ کہانی کے اس حصّہ کی تفصیل ہم کتاب کے آخر میں دیکھیں گے۔

ہم اوپر جارہے ہیں۔ جلدہی ہم بھوک اور محرومی سے اوپر ہوجائیں گے۔

فی الحال یہ تھوڑا سا ناشتہ کر لیجیے بشکریہ: شنکر

تیسرا منصوبہ