چوتھے عام انتخابات،1967

انتخابات کا پس منظر 

ایک عام بے زاری اور سیاسی طاقتوں کی دھڑے بندی کے پس منظر میں فروری 1967 میں لوک سبھا کا چوتھا جنرل الیکشن اور اسمبلیوں کے الیکشن ہوئے۔پہلی بار کانگریس عوام کا سامنا بغیر نہروکے کر رہی تھی۔ 

قومی اور ریاستی سطح پر الیکشن کے نتائج نے کانگریس کو ہلاکررکھ دیا۔اکثر سیاسی مبصر ین نے الیکشن کے نتائج کو ’سیاسی زلزلہ ‘ قرار دیا۔اگر چہ 1952 کے بعد کانگریس کی حمایت میں پڑنے والے ووٹوں اور جیتی ہوئی نشستوں کی تعداد سب سے کم تھی پھر بھی اس نے لوک سبھا میں اکثریت حاصل کر ہی لی۔اندرا گاندھی کابینہ کے آدھے سے زیادہ  وزیر ہار گئے۔ہارے ہوئے دیوقامت لیڈروںمیں تامل ناڈو میں کا مراج ، مہاراشٹر میں ایس۔کے۔پاٹل، مغربی بنگال میں اتولیہ گھوش اور بہار میں کے۔بی۔سہائے شامل تھے۔  

آپ کو سیاسی تبدیلیوں کی ڈرامائی نوعیت ریاستی سطح پر زیادہ صاف نظر آئے گی۔کم سے کم سات ریاستوں میں اکثریت کانگریس کے ہاتھ سے چلی گئی ۔ دوسری دو ریاستوں میں کچھ ممبروں کے علاحدہ ہو جانے کی وجہ سے یہ حکومت نہ بنا سکی ۔وہ نوریاستیں جہاں کانگریس کے ہاتھ سے حکومت نکل گئی ملک کے چاروں طرف پھیلی ہوئی تھیں جیسے پنجاب،ہریانہ،اترپردیش ،مدھیہ پردیش، بہار،مغربی بنگال،اڑیسہ ،مدارس اور کیرالہ۔مدراس ریاست (اب تامل ناڈو) میں ایک علاقائی پارٹی دراوڑ منیترا کڑ گھم یعنی ڈی ایم کے(DMK)واضح اکثریت کے ساتھ طاقت میں آئی ۔  ڈی ایم کے، کے اقتدار میں آنے کی وجہ دراصل ہندی کو سرکاری زبان کی حیثیت سے نافذ کرنے کی مرکزی سرکار کی پالیسی کے خلاف طلباکے زبردست مظاہرے تھے۔یہ پہلاموقع تھا کہ کسی ریاست میں ایک غیر کانگریسی پارٹی نے اپنے بل بوتے پر اکثریت حاصل کی ہو ۔ بقیہ آٹھ ریاستوں میں مختلف غیر کانگریس پارٹیوں کی گٹھ جوڑ کی حکومت بنی۔اس وقت ایک عام کہاوت تھی کہ اگر آپ ہاوڑہ سے دہلی تک کا سفر کریں تو کسی بھی کانگریسی حکومت کی ریاست سے نہ گزریں گے۔ جو لوگ کانگریس کو حکومت میں دیکھنے کے عادی تھے ان کے لیے یہ احساس عجیب تھا۔ تو کیا کانگریس کی بالادستی ختم ہو گئی تھی؟

کیا غیر کانگریسیت آج بھی بامعنی اور اہم  ہے؟ اور کیا یہی اصول آج کے مغربی بنگال میں بائیں بازو کے خلاف استعمال کیا جا سکتا ہے ؟

نوٹ : یہ   نقشہ پیمانے کے مطابق نہیں ہے- لہٰذا اس کو ہندستان کی بین الا قوامی سرحدوں کے لیے سند نہیں ماننا چاہیے۔

معلق اسمبلیوں اور گٹھ بندھن کی حکومتوں میں ایسی کیا غیرمعمولی بات ہے؟ ہم تو ان کو ہروقت دیکھتے رہتے ہیں۔