آج ہندوستان کا یومِ  آزادی ہے۔ ہندوستانی جمہوریت کی شمعیں بجھنے نہ دینا

15اگست  1975کے دی ٹائمز ، لندن میں’Free JP Campaign ‘کی جانب سے ایک اشتہار۔

اٹھارہ مہینوں کی ایمرجنسی کے بعد جنوری 1977میں حکومت نے الیکشن کرانے کا فیصلہ کیا۔ تمام کارکنوں اور لیڈروں کو جیل سے رہا کر دیا گیا۔ مارچ1977میں الیکشن منعقد ہوئے۔ اپوزیشن کے پاس وقت کم تھا سیاسی واقعات بڑی تیزی سے رونما ہوئے۔ ایمرجنسی سے پہلے ہی بڑی اپوزیشن پارٹیاں ایک دوسرے کے نزدیک آرہی تھیں۔ اب الیکشن کے موقعے پر ان سب نے مل کر ایک نئی پارٹی ، جنتا پارٹی کے نام سے بنائی۔ نئی پارٹی نے جے پرکاش نارائن کو اپنا لیڈر تسلیم کرلیا۔ کانگریس کے وہ لیڈر جو ایمرجنسی کے مخالف تھے جنتا پارٹی میں شامل ہوگئے۔ کچھ اور لیڈر بھی کانگریس سے الگ ہوگئے اور جگ جیون رام کی قیادت میں علاحدہ پارٹی بنالی۔ یہ پارٹی جس کا نام کانگریس فارڈیمو کر یسی ، تھا بعد میں جنتا پارٹی میں ضم ہوگئی۔

جنتا پارٹی نے اس الیکشن کو ایمرجنسی کے مسئلے پر ریفرنڈم کی شکل دے دی۔ اس کی الیکشن کی مہم میں زیادہ تر توجہ حکمرانی کے غیر جمہوری کردار اور ان زیادتیوں پر تھی جو اس عرصے میں پیش آئیں۔ پریس کی سنسرشپ اور ہزاروں لوگوں کی گرفتاری کے پس منظر میں رائے عامہ کانگریس کے خلاف تھی۔ جے پرکاش نارائن جمہوریت کی بحالی کی علامت بن گئے۔ جنتا پارٹی کی تشکیل سے یہ یقین بھی ہوگیا کہ غیر کانگریسی ووٹ آپس میں تقسیم نہیں ہوں گے۔ کانگریس کے لیے یہ وقت بلا شبہ بڑی مشکل کا وقت تھا۔ تا ہم الیکشن کے آخری نتائج سے سب حیران رہ گئے۔ آزادی کے بعد پہلی بار کانگریس پارٹی کو لوک سبھا کے الیکشن میں شکست ہوگئی۔ لوک سبھا میں کانگریس کو صرف 154سیٹیں حاصل ہوسکیں اور صرف 35فی صد ووٹ حاصل ہوسکے۔ جنتا پارٹی اور اس کے حلیفوں نے لوک سبھا کی 542سیٹوں میں سے 330سیٹوں پر قبضہ کیا۔ جب کہ جنتا پارٹی نے295سیٹیں جیت کر ایک واضح اکثر یت حاصل کر لی۔ شمالی ہندوستان میں کانگریس کے خلاف یہ زبردست انتخابی لہر تھی۔ کانگریس بہار، اترپردیش، دہلی ہریانہ اور پنجاب میں ایک سیٹ بھی حاصل نہیں کر سکی اور راجستھان اور مدھیہ پردیش میں اسے صرف ایک ایک سیٹ ملی۔ اندراگاندھی اور ان کا بیٹا سنجے گاندھی دونوں بالترتیب رائے بریلی اور امیٹھی سے ہار گئے۔

لیکن اگر آپ اس نقشے پر نظر ڈالیں جو نتائج کو بتاتا ہے تو آپ دیکھیں گے کہ کانگریس نے یہ الیکشن پورے ملک میں نہیں ہارا تھا۔ اس نے مہاراشٹر،گجرات اور اڑیسہ میں کئی سیٹیں حاصل کیں اور تقریباً تمام جنوبی ریاستوں میں فتح یاب ہوئی۔ اس کے کئی اسباب ہیں۔ اوّل تو یہ کہ ایمرجنسی کے اثرتمام ریاستوں میں یکساں طور پر محسوس نہیں کیے گئے تھے ۔جبری نس بندی اور جبری خانماں خرابی کامرکز زیادہ تر شمالی ریاستیں تھیں۔ اس سے زیادہ اہم بات یہ کہ شمالی ہندوستان سیاسی زور آزمائی کی نوعیت میں ایک طویل مدتی تبدیلی کا تجربہ کر چکا تھا۔ متوسط طبقہ اب کانگریس سے دور ہور ہاتھا اور اس کو جنتا پارٹی کی صورت میں ایک دوسرے سے قریب آنے کے لیے بہتر پلیٹ فارم ملا۔ یعنی یہ کہ 1977 کے الیکشن صرف ایمرجنسی سے متعلق ہی نہیں تھے۔

اس سے ہوشیار رہنا۔ اب دوبارہ وہ کوئی بکواس برداشت نہیں کرے گا!

ایمرجنسی    

کانگریس

 میسا   

بشکریہ: آر -کے-لکشمن ٹائمز آف انڈیا،29مارچ1977