آپ یہ تو جانتے ہی ہیں کہ ہندوستان کے آئین نے چھوت چھات کے رواج کو یکسر ختم اور منسوح کر دیا تھا۔ اس کے ضمن میں حکومت نے 1960اور1970کی دہائیوں میں قوانین بھی منظور کر لیے تھے ۔ لیکن پھربھی مختلف طریقوں سے سابق اچھوت گروپوں کے خلاف سماجی امتیاز اور تشدد جاری رہا۔ دیہات میں دلت بستیوں کو اصل گاؤں سے دور رکھا جاتا رہا۔ پینے کے پانی کے مشترکہ ماخذ تک دلتوں کی رسائی نہیں ہونے دی جاتی تھی۔ دلت عورتوں کی آبروریزی ہوتی تھی اور ان کے ساتھ بے عزتی کا سلوک جاری تھا اور بدترین بات یہ کہ دلتوں کو اونچی ذات والوں کے گھمنڈ کی وجہ سے معمولی باتوں پر احتجاجی  ظلم وستم  سہنے پڑتے تھے۔ 

دلتوں کو معاشی اور سماجی طور پر دبائے رکھنے اور ان پر زیادتیاں روکنے کے لیے قانونی طریقے ناکافی ثابت ہوئے ۔دوسری طرف وہ سیاسی پارٹیاں جن کو دلتوں کی حمایت حاصل تھی، جیسے ری پبلکن پارٹی آف انڈیا، انتخابی سیاست میں کامیاب نہیں تھیں۔ یہ پارٹیاں ہمیشہ حاشیے پررہیں۔ ان کو الیکشن جیتنے کے لیے کسی دوسری پارٹی کے ساتھ اتحاد کرنا پڑتا تھا اور اس کے علاوہ ان کو پارٹی میں تقسیم کے مسئلے کا سامنا بھی تھا۔ اس لیے دلت پینتھرس کو دلتوں کے حقوق پر زور شور سے مقابلہ کر نے کے لیے عوامی کاروائی کاسہا را لینا پڑتا تھا۔

دلت پنیتھرس کی سرگرمیاں زیادہ تر ان مظالم کے خلا ف لڑائی پر مرکوز تھیں جو ریاست کے مختلف حصوں میں دلتوں پر ڈھائے جارہے تھے۔ مظالم کے مسئلے پر دلت پنیتھرس اور ان کی ہم خیال تنظیموں کے لگاتار احتجاجی مظاہروں کے نتیجے میں حکومت نے 1989میں ایک جامع قانون پاس کیا جس میں ایسی حرکت کرنے پر قید با مشقت کی سزا رکھی گئی۔ پنیتھروں کاوسیع تر نظریاتی ایجنڈا ذات پات کے نظام کو جڑسے مٹا دینا اور تمام مظلوم اور دبے ہوئے طبقوں جیسے کہ بے زمین غریب کسانوں اور شہروں کے صنعتی مزدوروں کی ایک تنظیم دلتوں کے ساتھ مل کر بنانا تھا۔

اس تحریک نے پڑھے لکھے دلت نوجوان کے لیے اپنی تخلیقی صلاحیتوں کو احتجاجی سرگرمیوں میں استعما ل کرنے کے لیے ایک پلیٹ فارم مہیا کر ایا۔دلتِ مصنفین نے اپنی تصنیفات، متعدد سوانح حیات اور دیگر ادبی تخلیقوں میں ذات پات کے نظام میں ہونے والے مظالم کے خلاف صدائے احتجاج بلند کی۔ ان تحریروں اور کتابوں نے ،جن میں ہندوستانی سماج کے سب سے زیادہ پس ماندہ اور ستائے ہوئے طبقوں کی زندگی کے تجربات بیان کیے گئے تھے، مراٹھی کے ادبی حلقوں میں سنسنی پھیلا دی اور لوگ سکتے میں آگئے، ادبی دنیا کی بنیاد کو زیادہ وسیع اور مختلف سماجی طبقوں کی نمائندہ بنا دیا۔ اور ثقافتی دنیا میں بحث و مباحثہ اور دلائل کا آغاز کیا۔ ایمرجنسی کے بعد کے زمانے میں دلتِ پنیتھرس انتخابی سمجھوتوں میں ملوت ہوگئے۔ ان کا گروپ کئی بار پھوٹ کا شکار بھی ہوا جس کی وجہ سے اس کا زوال ہوگیا۔ اس کے بعد بی۔ اے ۔ایم ۔سی ۔ای۔ ایف(BAMCEF) یعنی پس ماندہ طبقوں اور اقلیتی فرقہ کے ملازمین کی فیڈریشن جیسی تنظیموں نے اس جگہ کو پُر کیا۔

1970کی دہائی سے ہندوستانی معاشرے کی بے اطمینانی کئی سطحوں پر ہوگئی تھی ۔ ایسے طبقوں کو بھی جنھیں ترقی کے عمل سے جزوی طور پر فائدہ پہنچا تھا، حکومت اور سیاسی

 پارٹیوں سے بہت سی شکایتیں تھیں۔1980کے عشرے کی زرعی تحریکیں اس کی نمایاں مثال ہیں جن کے ذریعہ خوش حال کسانوں نے حکومت کی پالیسیوں کے خلاف احتجاج کیا۔

جنوری1988میں تقریباً بیس ہزار کسان اترپردیش کے میرٹھ شہر میں اکٹھا ہوئے۔ وہ بجلی کی قیمت کی شرحوں میں اضافہ کے خلاف احتجاج کر رہے تھے۔ تقریباً تین ہفتوں تک ضلع کلکٹر کے دفتر کے باہر اس وقت تک دھرنا دیتے رہے جب تک کہ ان کی مانگیں مان نہ لی گئیں۔ یہ احتجاجی تحریک کسانوں کی بہت ہی منظم تحریک تھی اور ان تمام دنوں میں آس پاس کے دیہات سے ان کو برابر کھانا مہیا کیا جاتا رہا۔ میرٹھ کے اس مظاہرے کو دیہی قوت ،زرعی کا شت کاروں کی قوت اور طاقت کے ایک عظیم اظہار کے طور پر دیکھا گیا۔ اس میں شامل کسان بھارتیہ کسان یونین کے ممبر تھے۔ جو مغربی اتر دیش اور ہریانہ کے کسانوں کی ایک تنظیم تھی اور1980کی دہائی میں کسانوں کی تحریکوں کی اہم تنظیم مانی جاتی تھی۔

تیسرے باب میں ہم نے دیکھا کہ ہریانہ ، پنجاب اور مغربی اترپردیش کے کسانوں کو 1960کی دہائی کے آخری حصے میں حکومت کے سبزانقلاب کی پالیسوں سے فائدہ حاصل ہوا تھا۔ اس کے بعد سے گنااور گیہوں اس علاقے کی خاص نقدی فصلیں ہوگئیں۔ 1980کی دہائی کے وسط میں نقدی فصلوں کے بازار کو بحران کا سامنا کرنا پڑا جس کی وجہ ہندوستانی معیشت کو نرم بنانے اور پابندیوں سے آزاد کرنے کی ابتدا تھی۔ بھارتیہ کسان یونین نے گنا اور گیہوں کی کم ازکم بنیادی قیمتوں ،کھیتوں کی پیداوار کو ایک ریاست سے دوسری ریاست میں لے جانے پر پابندیوں کے خاتمے، معقول داموں پر بجلی کی یقینی سپلائی ، کسانوں کو دئیے قرضوں کی واپسی کی معافی اور کسانوں کو سرکاری پنشن کے مطالبات کیے۔

پنجاب میں بھارتیہ کسان یونین کی ایک ریلی

بشکریہ: ہندستان تائمز

ملک کی دوسری کسان تنظیموں نے بھی اسی طرح کے مطالبات رکھے۔ مہاراشٹر کے شیت کاری سنگھٹن (Shetkari Sanghatana of Maharashtra)نے کسا نوں کی تحریک کو ہندستان کی ایک جنگ کا نام دے دیا ( جو دیہی زرعی شعبہ کی علامت تھی) جو ہندوستانی قوتوں کے خلاف (شہری صنعتی شعبہ کی علامت) لڑی جائے گی۔ تیسرے باب میں آپ پڑھ چکے ہیں کہ ہندستان کے ترقی کے انداز سے متعلق مسائل کی بحث میں صنعت اور زراعت کے درمیان بحث ایک اہم مدا رہی ہے۔اسی طرح کی بحث میں اَسّی کی دہائی کے دوران ایک بار پھر جان آگئی جب نرم کاری کی معاشی پالیسوں کی وجہ سے زرعی شعبہ کے لیے خطرہ پیدا ہوگیا۔

کیا آپ جانتے ہیں کہ ہندوستانی مچھواروں کی تعداد دنیا میں دوسرے نمبر پر ہے؟ مشرقی اور مغربی دونوں طرف کے ساحلی علاقوں کے لاکھوں خاندان ، جن کا تعلق مقامی مچھواروں کی برادریوں سے ہے، ماہی گیری کے پیشہ میں لگے ہوئے ہیں۔ ان مچھواروں کو اس وقت بڑا خطرہ لاحق ہوگیا تھا جب حکومت نے مشین سے چلنے والی مچھلی پکڑنے کی کشتیوں کے داخلہ کی اجازت دے دی تھی اور جدید ٹکنالوجی جیسے سمندر کی تہہ سے بڑے پیمانے پر مچھلیا ں پکڑنا، استعمال کی جانے لگیں۔1970اور 1980کی دہائیوں کے دوران مچھواروں کی تنظیمیں اپنی گزر بسر کے مسائل پر ریاستی حکومت سے لڑتی رہیں۔ ماہی گیری چوں کہ ریاستوں کے دائرۂ اختیار میں آتی ہے، اس لیے ماہی گیروں کو علاقائی سطح پر منظم کیا گیا۔

1980کی دہائی کے وسط میں معاشی نرم کاری کی پالیسیاں آنے کے ساتھ ان تنظیموں کو قومی سطح کے پلیٹ فارم پر یک جاہونے کے لیے مجبور ہونا پڑا۔ یہ پلیٹ فارم تھا

 این۔ایف ۔ایف یا نیشنل فِش ورکر فورم یعنی مچھواروں کا قومی فیڈریشن۔ کیرالا کے مچھواروں نے اپنے ساتھی مچھواروں کو منظم کرنے کی ذمے داری لی۔ اس میں دوسری ریاستوں کی خاتون مزدوروں کو بھی شامل کیا گیا ۔این ایف ایف کی سرگرمیاں اُس وقت مستحکم ہوگئیں جب اس نے 1991میںمرکزی حکومت سے اپنی پہلی قانونی لڑائی جیتی۔ اس لڑائی کا تعلق حکومت کی گہرے سمندروں میں ماہی گیری کی اس پالیسی سے تھا جس کے مطابق ہندوستانی سمندر بڑے بڑے تجارتی جہازوں کے لیے کھول دئیے گئے ، جن میں بین الاقوامی ماہی گیر کمپنیوں کے جہاز بھی شامل تھے۔ 1990کے پورے عشرے کے دوران این۔ ایف۔ ایف حکومت کے ساتھ مختلف قانونی اور عوامی لڑائیوں میں لگی رہی۔ اس نے ایسے لوگوں کے حقوق کے تحفظ کے لیے کام کیا جن کی روزی روٹی کادارومدار ماہی گیری یعنی مچھلیاں پکڑنے پر تھا نہ کہ ان لوگوں کے حقوق کے تحفظ کے لیے جو منافع کے لیے پیسہ لگاتے ہیں۔ جولائی 2002میں این۔ ایف۔ ایف نے ایک ملک گیر ہڑتال کروائی جس کامقصد حکومت کی جانب سے غیر ملکی ماہی گیری جہازوں کو لائسنس جاری کرنے کی مخالفت کرنا تھا۔این۔ ایف۔ ایف نے پوری دنیا کی تنظیموں کے ساتھ ماحولیات کے تحفظ اور ماہی گیروں کی زندگیاں بچانے کے لیے مل کر کام کیا۔

1992 میں حیدرآباد میں خواتین ارّک کی فروخت کے خلاف ایک جلوس نکالتے ہوئے۔

بشکریہ؛ انڈیا ٹوڈے

ارّک مخالف تحریک کا سیدھا سادہ نعرہ تھا۔ ارّک کی فروخت کی ممانعت ،یعنی اس پرپابندی۔ لیکن اس سادہ مطالبے نے اُن وسیع تر سماجی، معاشی اور سیاسی مسائل کو بھی چھیڑا جو عورتوں کی زندگی کو متاثر کرتے تھے۔ ارّک کے کاوبار کے اردگرد جرم اور سیاست کا ایک ناپاک گٹھ جوڑ بن گیا تھا۔ حکومت کو ارّک کی فروخت پر عائد کر دہ ٹیکس سے بہت بڑی آمدنی حاصل ہوتی تھی اور اس وجہ سے وہ اس پر پابندی نہیں لگانا چاہتی تھی۔ اپنی ارّک مخالف تحریک کے دوران عورتوں نے اس طرح کے پیچیدہ مسائل کو اٹھانے کی کوششیں کیں۔ وہ گھریلو تشدد کے بارے میں بھی کھل کر گفتگو کرتی تھیں۔ ان کی تحریک نے پہلی بار ایسا پلیٹ فارم مہیا کیا جہاں سے وہ گھریلو تشدد جیسے نجی معاملات پربھی بحث کر سکتی تھیں۔ اس طرح ارّک مخالف تحریک خواتین کی تحریک کا بھی ایک حصہ بن گئی۔

اس سے پہلے خواتین کے وہ گروپ جو گھریلو تشدد، جہیزکے رواج ،کام کی جگہوں اور عوامی مقامات پر جنسی بدسلوکی جیسے مسائل پر کام کر رہے تھے، ملک کے مختلف حصوں میں زیادہ تر شہری متوسط طبقہ کی خواتین کے درمیان ہی سرگرم تھے ۔ ان کے کام سے یہ حقیقت آشکارا ہوئی کہ عورتوں کے ساتھ ناانصافی اورجنسی بنیاد پر موجود عدم مساوات کے مسائل نوعیت کے اعتبار سے الجھے ہوئے مسائل ہیں۔ 80کے عشرہ کے دوران عورتوں کی اس تحریک نے خاندان کے اندراور باہر خواتین پر ہونے والے جنسی تشدد پر توجہ مرکوز کی۔ان گروپوں نے جہیز کے رواج کے خلاف مہم چلائی اور شخصی اور جائداد سے متعلق ایسے قوانین بنائے جانے کا مطالبہ کیا جو مردوں اور عورتوں کے مساوات کے اصول پر مبنی ہوں۔

اب تک جن سماجی تحریکوں پر ہم نے گفتگو کی ہے ان سب کا مقصد ایسے مختلف مسائل کو اٹھانا تھا جو معاشی ترقی کے اس ماڈل سے متعلق تھے جس کو ہندوستان نے آزادی کے وقت اپنا یا تھا۔ چیکو تحریک ماحولیاتی انحطاط کے معاملے کو سامنے لائی جب کہ کسانوں کی شکایت تھی کہ زراعتی شعبے کی ان دیکھی کی جارہی ہے۔ دلتوں یعنی پس ماندہ ذات کے لوگوں کے معاشی اورمادی حالات عوامی جدوجہد کا سبب بنے جب کہ ارّک مخالف تحریک نے نام نہاد ترقی کے منفی اثرات پر اپنی توجہ مرکوز رکھی۔ ان سب تحریکوں میں جو مسئلہ پوشیدہ تھا اسے ان تحریکوں نے آشکارا کر دیا جو ایسے بڑے بڑے ترقیاتی منصوبوں کے خلاف کام کر رہی تھیں جن کی وجہ سے لوگوں کی خانہ بربادی ہورہی تھی۔

آرزؤوں سے بھرا ایک ترقیاتی پروجیکٹ وسطی ہندوستان کی نرمدا گھاٹی میں1980کی دہائی کے ا بتدائی سالوں میں شروع کیا گیا۔ یہ منصوبہ 30 بڑے ، 135درمیانہ سائز کے باندھوں اور تقریباً تین ہزار چھوٹے باندھوں پر مشتمل تھا، جنھیں دریائے نرمدا اور اس کی ان معاون ندیوں پر تعمیر کیا جانا تھا جو تین ریاستوں یعنی مدھیہ پردیش، گجرات اور مہاراشٹر سے گزرتی تھیں۔ گجرات میں سردار سروور پر وجیکٹ اور مدھیہ پردیش میں نرمدا ساگر پروجیکٹ ان میں سے دو اہم ترین اور سب سے بڑے کثیر المقاصد ڈیم یا باندھ تھے جن کی منصوبہ بندی اس پروجیکٹ کے لیے کی گئی تھی۔نرمدا بچاؤ آندولن نے ، جو دریائے نرمدا کو بچانے کی ایک تحریک تھی، ان باندھوں کی تعمیر کی مخالفت کی اور ملک میں جاری دیگر منصوبوں کی نوعیت پر بھی سوال اٹھائے۔

سردار سرو وَرپروجیکٹ ایک کثیر المقاصد اور بہت بڑے پیمانے کا باندھ ہے۔ اس پروجیکٹ کی وکالت اور موافقت کرنے والوں کا کہنا ہے کہ یہ گجرات اور اس سے ملحقہ تین ریاستوں کے بہت بڑے علاقے میں پینے کے پانی اور آب پاشی کے لیے پانی کی دست یابی، بجلی تیار کرنے اور زرعی پیداوار میں اضافہ کے تعلق سے بہت فائدہ مند ثابت ہوگا۔ ان کے علاوہ بہت سے ذیلی یا چھوٹے فوائد کو بھی اس باندھ کی کامیابی کے ساتھ جوڑا گیا، جیسے علاقے میں سیلابوں اور خشک سالی پر قابو -باندھ کی تعمیر کے دوران ان ریاستوں کے 245 گاؤں کے زیر آب آجانے یعنی ڈوب جانے کا خیال ظاہر کیاگیا۔ ان گاؤں کے تقریباً ڈھائی لاکھ لوگوں کو دوسرے مقامات پر آبادکرنے کی ضرورت تھی ۔ اس پروجیکٹ سے متاثر ہ لوگوں کو گاؤں سے اجاڑکر ان کی دوبارہ باز آبادکاری کے مسائل کو سب سے پہلے مقامی سرگرم گروپوں نے اٹھایا۔1988-89کے آس پاس یہ مسائل این ۔بی۔ اے (نرمدا بچاؤ آندولن) کے تحت صاف اور واضح ہوگئے ۔ یہ مقامی رضا کار تنظیموں کا ایک غیر رسمی اتحاد سا تھا۔

اپنے قیام کے وقت ہی سے این ۔بی۔اے(NBA) نے سردارسرووَر پروجیکٹ کی مخالفت ان وسیع تر معاملات اور مسائل کے ساتھ منسلک کر دی تھی جن کا تعلق ملک میں جاری ترقیاتی منصوبوں، ترقیاتی کاموں کے اختیار کردہ انداز کی اثر پذیر ی اور جمہوریت میں مفاد عامہ کی تشکیل سے تھا۔ این۔ بے۔ اے کا مطالبہ تھا کہ ملک میں اب تک کے تکمیل شدہ بڑے ترقیاتی پرو جیکٹوں کی لاگت اور ان کے فوائد کا تجزیہ کیا جائے ۔ سماجی لاگتوں میں پروجیکٹوں سے متاثرہ لوگوں کی جبراً دوبارہ آبادکاری ، ان کے ذرائع معاش اور ثقافت کا سنگین نقصان اور علاقہ کے ماحولیاتی وسائل کا انحطاط شامل کیے جائیں۔

شروع میں تو تحریک کا مطالبہ یہ تھا کہ ان تمام لوگوں کو، جوبالواسطہ یا بلاواسط طور پر پروجیکٹ سے متاثر ہوئے ہیں، پھر سے بسایا جائے۔ تحریک نے بہت بڑے پیمانہ کے پروجیکٹوں کے سلسلے میں فیصلہ سازی کے طریقوں پر بھی سوال اٹھائے جو ان کی تعمیر و تکمیل کے ضمن میں استعمال کیے جاتے ہیں۔ این۔ بی۔ اے کا اصرار تھا کہ ایسے فیصلوں میں مقامی لوگوں کی رائے بھی لی جانی چاہیے اور پانی ، زمین اور جنگلات جیسے قدرتی وسائل پر ان کا موثر اور حقیقی اختیار ہونا چاہیے ۔ تحریک چلانے والوں نے یہ بھی پوچھا کہ جمہوریت کے ہوتے ہوئے کچھ لوگوں کو دوسروں کے فائدے کے لیے قربان کیوں کیا جائے۔ان تمام باتوں کی وجہ سے این۔ بی۔ اے نے بازآبادکاری کے ابتدائی مطالبہ کو چھوڑ کر اب باندھ کی مکمل، مخالفت شروع کردی۔

 این بی اے رہنما میدھا پاٹکراور دوسرے سرگرم  2002میں جل سمادھی کے

 مقام پرامنڈتے پانی میں احتجاج کرتے ہوئے