باب   2

تخلیقیت اور تحریر -II   

تحریر کی دو صورتیں ہیں۔ ایک ادبی، دوسری علمی یا وہ تحریر جس کا تعلق غیرادبی اصناف سے ہے۔ اس کا مطلب یہ ہے کہ ہر تحریر ادبی نہیں ہوتی۔لیکن جب ہم یہ کہتے ہیں کہ قدرت نے ہر انسان کو کچھ نہ کچھ تخلیقیت کے جوہر سے نوازا ہے تو اس کے معنی یہ بھی ہوئے کہ ہماری تخلیقیت کا اظہار محض ادبی تحریر تک ہی محدود نہیں ہوتا۔ ہم اپنی عملی زندگی کے مختلف شعبوں میں بھی اس جوہر سے کام لیتے رہتے ہیں۔ تخلیقیت ہمارے طرز اِحساس اور طرزِ زندگی کو انفرادیت بخشتی ہے اور یہی وہ جوہر ہے جو تحریر کو دل کش اور منفرد بناتا ہے۔ اس طرح کی تحریر کو ادبی تحریر کہا جاتا ہے۔

ادبی تحریر کی تشکیل میں درجِ ذیل امور کی بنیادی اہمیت ہے:

› تخیل کی سرگرمی     › احساس کا عمل

› جذبات کی نمائندگی › الفاظ کو برتنے کا سلیقہ

 › صنائع وبدائع کا استعمال

› تخیل کی سرگرمی

قدرت نے تخیل کی صلاحیت سے کم و بیش ہر انسان کونوازا ہے۔ کسی میں یہ صلاحیت زیادہ ہوتی ہے کسی میں کم۔ زندگی کے رنگا رنگ تجربات ومشاہدات سے تخیل کی صلاحیت کو  جِلاملتی ہے۔ جس کا مشاہدہ بسیط اور مطالعہ وسیع ہوتا ہے، اس کے تخیل کا دائرہ بھی وسیع ہوتا ہے۔ بچّے کے علم و تجربے کی دنیا محدود ہوتی ہے اس لیے اس کے تخیل کی سرگرمی کی بھی  ایک حد ہے۔ وہ محض نقل کرتا ہے لیکن کسی بھی نقل کے عمل کو تخیل کے عمل سے عاری نہیں کہا جاسکتا۔نقل کرنے والا یہی چاہتا ہے کہ نقل، اصل کی جگہ لے لے ۔یعنی نقل و اصل میں  کوئی فرق نہ ہو۔ جب کہ شعوری یا غیر شعوری طور پر ہر نقل کے عمل کے پہلو بہ پہلو تخیل کا خاموش عمل بھی جاری رہتا ہے۔ جس کی بنا پر نقل کردہ شے اصل کا درجہ تو نہیں پاتی لیکن ایک نئی حقیقت کی شکل ضرور اختیار کر لیتی ہے۔ تخلیقی فن کار بھی اپنے تجربات کوکئی طرح کی تبدیلیوں سے گزارتا اور انھیں ایک نئی ترتیب و تنظیم بخشتا ہے۔ اسی کو مختلف حقائق سے ایک نئی حقیقت کے خلق کرنے کا عمل کہتے ہیں۔دوسرے لفظوں میں یہی باز تخلیق یا Recreation  کا عمل کہلاتا ہے۔ مثال کے طور پر علامہ اقبال کا یہ شعر دیکھیے : 

ستاروں سے آگے جہاں اور بھی ہیں

ابھی عشق کے امتحاں اور بھی ہیں

آسمان پر چمکنے والے ستارے معمول کا مظہر ہیں یہ وہ نظارہ ہے جسے ہم اور آپ روزانہ رات کو آسمان پر دیکھتے ہیں۔ ہم یہ بھی جانتے ہیں کہ آسماں سے پرے بھی کئی دنیائیں آباد ہیں۔ ہماری بینائی کی رسائی صرف ان تاروں تک محدود ہے لیکن اس کے آگے بھی بہت کچھ ہے۔ اقبال نے اس حقیقت کو اپنے تخیل کی پرواز سے ایک نیا رنگ دیا اور اس خیال کو بہت خوب صورتی کے ساتھ اس مصرعے میں بیان کردیا کہ ستاروں سے آگے جہاں اور بھی ہیں۔ جیسا کہ اوپر ذکر آیا کہ تجربات ومشاہدات سے تخیل کی صلاحیت کو جلا ملتی ہے، اقبال نے ایک عام مشاہدے کو اپنے تخیل کی بلند پروازی سے ایک نیا مشاہدہ بنا دیا۔ گویا یہ عام مشاہدے کی باز تخلیق ہے۔

بہت پہلے سے ان قدموں کی آہٹ جان لیتے ہیں

تجھے اے زندگی ہم دور سے پہچان لیتے ہیں

آپ جانتے ہیں شاعری جذبات واحساسات کے اظہار کا نام ہے۔ جن لوگوں سے ہمیں زیادہ محبت ہوتی ہے ان سے وابستہ ہر چیز ہمیں پسند ہوتی ہے۔ ہم ان کے اٹھنے بیٹھنے، چلنے پھرنے، بولنے اور خاموش رہنے کے ہر انداز کو پسند کرتے ہیں۔ یہاں تک کہ ہمارے احساسات ہماری پسندیدہ شخصیت کی آہٹ کو بھی محسوس کرتے ہیں۔ فراق نے اسی احساس کی ترجمانی کرتے ہوئے اپنے محبوب کی آہٹ کا بیان کیا ہے۔ انھوں نے محبوب کو ’زندگی‘ سے استعارہ کیا اور اسے دور سے ہی پہچان لینے کے احساس کو خوب صورتی کے ساتھ لفظوں میں ادا کردیا ہے۔

آرٹ اور جمالیات (Art and Aesthetics) میں بہت سے الفاظ مشترک ہوتے ہیں جیسے نغمگی، آہنگ، سُرتال، اظہار (Expression) اور توازن اگرچہ انھیں نئے مفہوم و احساس یا استعمال و اطلاق کی نت نئی شکلوں میں پیش کیا جاتا ہے۔ اگرچہ آرٹ میں موضوعی فیصلے کرنے کی بڑی گنجائش ہوتی ہے۔ تاہم تنقیدی طور پر یہ جاننے کے لیے کہ کیا اچھا ہے کیا برا۔ فن کارانہ تخیل کی تعلیم و تربیت کی جا سکتی ہے۔

قومی درسیات کا خاکہ— 2005

نیاز فتح پوری (1884-1966)

فنون لطیفہ میں نقاشی و موسیقی سے بھی جمالیاتی لطف اٹھایا جاتا ہے لیکن اس کاتعلق حواس ظاہری سے ہے۔یعنی حواس کی بیرونی تحریک ختم ہوجاتی ہے تو لطف بھی زائل ہوجاتاہے۔برخلاف اس کے، ادبیات کا جمالیاتی لطف کسی بیرونی تحریک سے وابستہ نہیں ہے اور وہ اپنے اثرات بغیر کسی مادی وساطت کے بھی انسان کے ذہن و دماغ پر چھوڑجاتاہے۔

نیاز فتح پوری

› الفاظ کو برتنے کا سلیقہ

جذبات واحساسات کے اظہار کے لیے الفاظ کا انتخاب بڑی اہمیت رکھتا ہے۔ لکھنے والے کو اس بات کا خیال رکھنا ہوتا ہے کہ وہ اپنے مافی الضمیر کے اظہار کے لیے جن الفاظ کا انتخاب کرے، ان میں ادبی حسن پایا جائے، ساتھ ہی جو بات وہ کہنا چاہتا ہے وہ پوری طرح ادا ہوجائے۔ الفاظ اپنی انفرادی حیثیت میں کوئی خاص اہمیت نہیں رکھتے۔ انھیں استعمال کرنے یا برتنے سے ان کی اہمیت قائم ہوتی ہے۔ لکھنے والا اپنے کسی جملے یا مصرعے کے لیے جو لفظ یا الفاظ منتخب کرتا ہے۔ ان سے لفظ کے معنی اور ان کے تاثر میں اضافہ ہوتا ہے۔ جیسے غالب کا یہ شعر دیکھیے:

دلِ ناداں تجھے ہوا کیا ہے

آخر اس درد کی دوا کیا ہے

اس شعر میں غالبؔ نے ’دلِ ناداں‘ کی جو ترکیب استعمال کی ہے وہ کوئی بالکل نئی ترکیب نہیں ہے۔ اس سے پہلے بھی غزل کے اشعار میں نادان دل یا دلِ ناداں کی ترکیب استعمال کی جاتی رہی ہے۔ غالب نے اس ترکیب کو اس سلیقے سے برتا ہے کہ اس کے معنی میں اضافہ ہوا ہے اور یہ شعر ہر مرتبہ نیا احساس اور نیا تاثر قائم کرتا ہے۔ چوں کہ یہ ترکیب مصرعے یا شعر میں استعمال کی گئی ہے اس لیے اس میں ترنم اور آہنگ کو بھی ذہن میں رکھا گیا ہے۔ اس طرح یہ شعر مجموعی اعتبار سے ہمارے احساسِ جمال کو بھی طمانیت بخشتا ہے۔

›صنائع و بدائع کا استعمال

تخلیقی تحریر عام مروّجہ زبان کو کم ہی قبول کرتی ہے بلکہ تخلیقی تحریر (جیسے شاعری) میں عام بول چال کی زبان سے انحراف کیا جاتا ہے۔ تخلیقی زبان کو مجازی زبان بھی کہتے ہیں۔ یعنی وہ ایسی زبان ہوتی ہے جوعموماً لُغوی معنی کو رد کرتی ہے۔ بحرووزن کی پابندی کی وجہ سے شاعری میں جملوں یا مصرعوں کی ساخت نحوی قواعد کی پابند نہیں ہوتی۔ فعل، فاعل، مفعول کی ترتیب بھی اُلٹ پلٹ جاتی ہے۔ایسی شاعری کی خاص اہمیت ہے جس میں تشبیہات و استعارات میں جدّت و ندرت پائی جائے اور جو مانوس زبان اور جذبوں کو نامانوس بنا کر پیش کرنے کی اہلیت رکھتی ہو۔شعر کو زیادہ معنی خیز بنانے کے لیے استعاروں کے علاوہ تلمیح، حُسنِ تعلیل ، مراعات النظیر وغیرہ کا بھی استعمال کیا جاتا ہے۔استعارے کی تفہیم کے لیے یہ مثال دیکھیے :

روشن جمالِ یار سے ہے انجمن تمام

دہکا ہوا ہے آتشِ گُل سے چمن تمام

دوسرے مصرعے میں آتشِ گُل استعمال ہوا ہے۔ آتشِ گُل سے مراد ہے ’دہکتا ہوا پھول‘ یا بہت خوب صورت پھول۔ شاعر نے اس مصرعے میں یہ نہیں کہا کہ اس کے محبوب کا حسن آتشِ گُل کے مانند ہے۔ اس نے صرف آتشِ گُل کہا اور ہم نے سمجھ لیا کہ اس کا مطلب دہکتا ہوا پھول نہیں بلکہ جمالِ یار یعنی محبوب کا حسن ہے۔ یہاں لفظ کو اپنے اصل معنی کے بجائے مجازی معنی میں استعمال کیا گیا ہے۔

آپ جانتے ہیں کہ ’وہ لفظ جو اپنے اصلی معنی کے بجائے مجازی معنی میں استعمال کیا جائے اور دونوں معنوں میں تشبیہ کا تعلق ہو، اُسے استعارہ کہتے ہیں۔‘

استعارہ لفظ ’مستعار‘ سے بنا ہے جس کے معنی ’ادھار لینا‘ ہے۔ اسی لیے استعارے میں لفظ اپنے لغوی معنی کے بجائے کسی اور معنی میں استعمال ہوتا ہے۔ البتہ دونوں لفظوں کے مابین کسی خصوصیت کی بنا پر تشبیہ کا تعلق ضرور پایا جاتا ہے۔ تلمیح کی مثال :

ابنِ مریم ہوا کرے کوئی

میرے دکھ کی دوا کرے کوئی

اس شعر میں ابنِ مریمؑ یعنی حضرت عیسیٰؑ کی تلمیح استعمال کی گئی ہے۔ خدا نے حضرت عیسیٰؑ کو یہ معجزہ عطا کیا تھا کہ وہ مُردوں کو زندہ کر دیا کرتے تھے اور بیمار ان کی دعا سے اچھے ہو جاتے تھے۔ 

ہمیں یہ بھی یاد رکھنے کی ضرورت ہے کہ تخلیقیت محض ادبی فن پارے کے ساتھ ہی مخصوص نہیں ہے۔ مختلف علوم کی تحریروں میں بھی تخلیقیت کا جوہر کہیں کہیں اپنا اثر دکھا ہی جاتا ہے۔ ادبی ہو یا غیرادبی، ہر تحریر ایک خاص نظم و ضبط اورہیئت کی تشکیل کا تقاضا کرتی ہے۔ علمی تحریر کا ذریعۂ اظہار زبان ہے اور زبان کی اندرونی قوت کا نام تخلیقی جوہر ہے۔استعارے کو زبان کے جوہر سے بھی تعبیر کیا گیا ہے۔ جہاں اس قسم کی زبان سے سابقہ پڑتا ہے وہاں بڑی چمک سی پیدا ہو جاتی ہے۔ سوانحی تحریروں، مکتوبات، تنقیدی مقالات، روزنامچوں اور مختلف نوعیت کے مضامین میں جزوی طور پر اس قسم کی اتفاقی صورتیں واقع ہوتی رہتی ہیں۔ لیکن مجموعی طور پر ایسی 

تحریروں کا شمار غیرافسانوی اصناف میں کیا جاتا ہے۔

سرگرمی 5.9  

 اپنی فائل میں کچھ ایسے اشعار کا انتخاب کیجیے جو تشبیہ، استعارہ اور صنائع بدائع سے مرصع ہوں۔

شاعری کی سب سے پہلی علامت موزونی طبع سمجھی جاتی ہے۔ اکثر دیکھا گیا ہے کہ جو اشعار بعضے فاضلوں سے موزوں نہیں پڑھے جاتے ان کو بعض ان پڑھ اور صغیر سن بچے بلا تکلف موزوں پڑھ دیتے ہیں۔ اس سے ظاہر ہے کہ شاعری کوئی اکتسابی چیز نہیں ہے۔ بلکہ بعضی طبیعتوں میں اس کی استعداد خدا داد ہوتی ہے۔

 الطاف حسین حالیؔ (1837-1914)

2.1  شا عری

 موسیقی، مصوّری، مجسمہ سازی، رقص وغیرہ دیگر فنونِ لطیفہ کی طرح شاعری بھی ایک فنِ لطیف ہے۔ یہ انسانی جذبات کالفظی اظہار ہے۔ اس کا  بنیادی مقصد لطف اندوزی ہے۔ چوں کہ شاعری میں جذبے اور احساس کو فوقیت حاصل ہوتی ہے۔ اس لیے اسے دو اور دو،چار کے اصول پر نہیں پرکھا جا سکتا ہے۔جذبات اور احساسات کا اظہار ہم نثر میں بھی کرتے ہیں۔ لیکن نثر اور شعر میں اظہار کی سطح مختلف ہوتی ہے۔ مثلاً ہمارا کوئی دوست ہم سے رخصت ہو رہا ہو تو ہم اس سے کہتے ہیں خدا کرے، آپ سے دوبارہ جلد ملاقات ہو۔ ہماری دلی خواہش کا یہ نثری اظہار ہے۔ لیکن اسی بات کو اگر ہم اس طرح کہیں کہ خدا کرے آپ ایک بار جائیں اور ہزار بار آئیں تویہ ہماری خواہش کا شعری اظہار ہوا۔ اسی طرح اگر کوئی یہ کہے کہ آپ کی عمر دراز ہو تو یہ نثری اظہار ہوا لیکن اسی بات کو اگر یوں کہا جائے کہ آپ قیامت تک سلامت رہیں اور خدا کرے قیامت کبھی نہ آئے تو ہمارا یہ بیان شعری بیان ہوگا۔ کسی آدمی کا قیامت تک زندہ رہنا ممکن نہیں اور یہ بھی ممکن نہیں کہ قیامت کبھی نہ آئے۔ لیکن دل سے پوچھیے تو وہ یہی کہتا ہے۔ اسے ہم شاعرانہ خیال کہیں گے۔ ہمارا یہی خیال جب موزوں الفاظ کے سہارے ایک خاص طریقے سے ادا ہوتا ہے تو ہم اسے شاعری کہتے ہیں۔ وہ خاص طریقہ کیا ہے؟ کیسے ہمارا شاعرانہ خیال شعر یا شاعری بن جاتا ہے؟ اس سوال کا جواب یہ ہے کہ جب ہم اپنے خیالات، تجربات اور مشاہدات کومنتخب الفاظ میں وزن، بحر یا آہنگ کا خیال رکھتے ہوئے تخلیقی انداز میں اس طرح پیش کرتے ہیں کہ جذبات و احساسات کا غلبہ ہو تو اسے شاعری کہتے ہیں۔ تخیل، مشاہدے اور مناسب ذخیرۂ الفاظ کے بغیر شاعری ممکن نہیں۔ اپنے تاثرات اور احساسات کو ابھارنے کے لیے شاعر تشبیہ، استعارے، تلمیح، رمز و کنایے اور مبالغے سے حسبِ ضرورت کام لیتا ہے۔

اردو میں شاعری کی بہت سی اصناف ہیں مثلاً قصیدہ، غزل، مثنوی، مرثیہ، نظم، گیت، رباعی وغیرہ۔ اس باب میں غزل اور گیت پر روشنی ڈالی جائے گی۔

شاعری صرف محسوسات کی تصویر نہیں کھینچتی بلکہ جذبات اور احساسات کو بھی پیشِ نظر کر دیتی ہے۔ دھندلی چیزیں چمک اٹھتی ہیں، مٹا ہوا نقش اجاگر ہو جاتا ہے، کھوئی ہوئی چیز ہاتھ آجاتی ہے۔ خود ہماری روحانی تصویر جو کسی آئینے کے ذریعے سے ہم نہیں دیکھ سکتے، شعر ہم کو دکھا دیتا ہے۔

-  شبلی نعمانی

سرگرمی 5.10

اپنی پسند کی پانچ غزلوں کو خوش خط لکھ کر اُن کے نیچے قافیہ، ردیف، مطلع، حسنِ مطلع اور مقطع کی نشان دہی کیجیے۔ تراکیب اور اس کے معنی بھی لکھیے۔

• غزل

’’غزل‘‘ اردو شاعری کی خاص صنف ہے۔ لغت کے اعتبار سے یہ عربی لفظ ہے جس کے معنی عشق و محبت کی باتیں کرنا ہے۔ ابتدائی دور کی غزلوں میں عام طور پر حسن و عشق، تصوف ، رندی و سرمستی اور فلسفہ وغیرہ کے مضامین بیان کیے گئے ہیں۔ تاہم بعد کے شعرا نے غزل کو انھیں مضامین تک محدود نہیں رکھا بلکہ اس میں حیات و کائنات کے مختلف مضامین کو موضوع بنایا ۔ اس سے ظاہر ہوتا ہے کہ غزل میں زندگی کے ہر رنگ کو سمونے کی گنجائش موجود ہے۔اس لیے رشید احمد صدیقی نے کہا تھا کہ : ’’غزل اردو شاعری کی آبرو ہے۔ ہماری تہذیب غزل میں اور غزل ہماری تہذیب میں ڈھلی ہے۔‘‘

•  ہیئت 

غزل کا پہلا شعر مطلع کہلاتا ہے اور اس کے دونوں مصرعے ہم قافیہ ہوتے ہیں۔ اگر دوسرے شعر کے دونوں مصرعے بھی ہم قافیہ ہوں تو اُسے مطلعِ ثانی کہتے ہیں۔ تیسرا شعر بھی مطلع کی طرح کہا گیا ہو، یعنی دونوں مصرعوں میں قافیے کی پابندی کی گئی ہو، تو اسے مطلعِ ثالث کہتے ہیں۔ مطلعے کے بعد آنے والا شعر ’حسنِ مطلع‘ کہلاتا ہے۔ غزل کا آخری شعر جس میں شاعر اپنا تخلص استعمال کرتا ہے مقطع کہلاتا ہے۔ لیکن غزل میں تخلص کا ہونا لازمی نہیں۔ غزل کے تمام اشعار ہم وزن ہوتے ہیں۔

غزل کے اشعار معنوی اعتبار سے باہم مربوط نہیں ہوتے بلکہ اس کا ہر شعر مضمون کے لحاظ سے مختلف اور اپنی جگہ مکمل ہوتا ہے۔ غزل کے تمام اشعار ہم قافیہ ہوتے ہیں۔  عام طور پر غزل میں ردیف بھی ہوتی ہے۔ لیکن ہر غزل میں ردیف کا ہونا ضروری نہیں ۔ جن غزلوں میں ردیف نہیں ہوتی، انھیں ’غیرمردّف‘ غزل کہتے ہیں۔ غزل کی ایک مخصوص ہیئت ہوتی ہے جس میں مطلع، حسنِ مطلع، قافیہ اور ردیف وغیرہ کی خاص اہمیت ہے۔ 

غزل میں اشعار کی تعداد مقرر نہیں ہے۔ البتہ کلاسیکی شعرا نے کم از کم پانچ اشعار کی پابندی کی ہے ۔ اگر ایک ہی زمین میں دو یا تین غزلیں کہی جائیں تو انھیں ’دوغزلہ ‘ اور ’سہ غزلہ ‘کہتے ہیں۔ غزل کے سب سے اچھے شعر کو بیت الغزل، شاہ بیت یا حاصلِ غزل کہا جاتا ہے۔ غزل کی مقبولیت میں اس کی ہیئت اور مضامین کی رنگارنگی کا بڑا دخل ہے۔ 

سرگرمی 5.11  

اپنی پسند کی کوئی غزل لیجیے اور اس کے اشعار میں تخیل ، احساس اور جذبات کا جائزہ لیجیے۔

اختر شیرانیؔ  (1905-1948)

اے عشق! کہیں لے چل!

اِ ن چاند ستاروں کے بکھرے ہوئے شہروں میں

ان نوٗر کی کِرنوں کی ٹھہری ہوئی نہروں میں

ٹھہری ہوئی نہروں میں، سوئی ہوئی لہروں میں

اے خِضرِ حسیں! لے چل، اے عشق! کہیں لے چل!

آنکھوں میں سمائی ہے اِک خواب نُما دُنیا

تاروں کی طرح رَوشن مہتاب نُما دُنیا

جنّت کی طرح رنگیں، شاداب نُما دنیا

!لِلّٰہ ! وہیں لے چل! اے عِشق کہیں لے چل

یہ درد بھری دُنیا بستی ہے گُناہوں کی

دِل چاک اُمیدوں کی، سفّاک نِگاہوں کی

ظُلموں کی، جفاؤں کی، آہوں کی، کراہوں کی

ہَیں غم سے حزیں، لے چل! اے عِشق کہیں لے چل!

قُدرت ہو حمایت پر، ہمدرد ہو قِسمت بھی

سلمٰی بھی ہو پہلوٗ میں، سلمٰی کی محبّت بھی

ہر شے سے فراغت ہو، اَور تیری عِنایت بھی

اے طِفل حسیں لے چل، اے عِشق! کہیں لے چل!

ہم پریم پُجاری ہیں، تو پریم کنھیّا ہَے

ہم پریم کنھیّا ہیں، یہ پریم کی نیّا ہَے

یہ پریم کی نیّا ہے، تو اِس کا کھِویّا ہَے

کُچھ فِکر نہیں، لے چل! اے عِشق! کہیں لے چل!

•   غزل کی روایت 

 غزل کی تاریخ بہت پرانی ہے۔ اس کی ابتدا عربی قصیدے سے ہوئی۔ قصیدے کا ابتدائی حصّہ جسے تشبیب کہا جاتا ہے اس میں عام طور پر حسن و شباب اور بہار کا ذکر ہوتا تھا۔ عربی قصیدہ ایران پہنچا تو فارسی میں اسی طرز پر قصیدے کہے جانے لگے اور قصیدے کا یہ ابتدائی حصّہ الگ سے شاعری کی ایک صنف بن گیا جو ’غزل‘ کہلایا۔ جب یہ غزل فارسی سے اردو میں آئی تو ہمارے شعرا نے بہت جلد اسے اپنے ماحول میں ڈھال کر ایک مقبول صنف کا درجہ عطا کردیا۔ اردو شعرا نے اسے اپنے جذبات، حالات اور کیفیات کا ترجمان بنایا۔ اس کو خوب صورت اور دل کش لہجہ دیا۔ نرمی، شیرینی، بے ساختگی، لطافت اور نغمگی غزل کی خصوصیات ٹھہریں۔ 

جنوبی ہند میں سولھویں صدی کے آخر اور سترھویں صدی کی ابتدا میں غزل کو ترقی ملی۔ محمد قلی قطب شاہ اردو کا پہلا صاحبِ دیوان شاعر تھا۔ ولیؔ دکنی نے غزل کی روایت کو مستحکم کیا۔ ان کے اثر سے شمالی ہند میں اردو شاعری کا باقاعدہ آغاز ہوا۔ 

اٹھارھویں صدی اردو شاعری کا سنہرا دور ہے۔ اس عہد میں میرؔ، سوداؔ اور دردؔجیسے باکمال شعرا نے غزل کی روایت کو فروغ دیا۔ مصحفیؔ، آتشؔ اور ناسخؔ نے غزل کو نئے رنگ و آہنگ سے آشنا کیا۔بعد میں غالبؔ نے غزل کو فکروفن کی بلندیاں عطا کیں اور اقبالؔ نے اسے فکروفلسفے سے متعارف کرایا۔ بیسویں صدی میں شادؔ، اصغرؔ، فانیؔ، حسرتؔ، یگانہؔ، فراقؔ اور جگرؔنے غزل کو جدید رنگ دیا۔ 

ترقی پسند شعرا میں جذبیؔ، فیضؔ، مجروحؔ اور ساحرؔ نے غزل پر خاص توجہ کی۔ اس زمانے کے نمائندہ غزل گو شعرا میں ناصرؔکاظمی، خلیل الرحمن اعظمی، ابنِ انشا، شادعارفی اور منیر نیازی کے نام اہمیت کے حامل ہیں۔ ان کے بعد احمد مشتاق، شہزاد احمد، ظفراقبال، محمد علوی، بانیؔ، شہریارؔ، حسن نعیم اور عرفان ؔ صدیقی وغیرہ کی غزلیں کئی اعتبار سے متوجہ کرتی ہیں۔ اردو غزل کا سفر آج بھی کامیابی کے ساتھ جاری ہے۔ 

• غزل کیسے لکھیں 

شاعرکے لیے کہا جاتا ہے کہ موزوں طبع ہونا ضروری ہے۔ موزوں طبع ہونے کے معنی ہیں ’شاعری کے لیے طبیعت کا موافق ہونا۔‘ یعنی شعر گوئی کی وہ صلاحیت جو فطرت کی طرف سے بخشی جاتی ہے۔ جس کے باعث وہ تخلیقیت کی طرف مائل ہوتا ہے یا طبیعت، تخلیق کی طرف خود بخود مائل ہوتی ہے۔ لیکن محض موزوں طبع ہونا ہی شرط نہیں ہے، اپنی فطری تخلیقی صلاحیت کو مسلسل مشق کے ذریعے قائم رکھنا اور جلا بخشنا بھی ضروری ہے۔ یہ بھی یاد رکھنا لازمی ہے کہ اگر آپ شعر کہنا چاہتے ہیں تو یہ نہ سوچیں کہ آپ موزوں طبع ہیں کہ نہیں کیوں کہ موزوں طبع ہونے یا نہ ہونے کا کوئی حتمی پیمانہ نہیں ہے۔ آپ کے اندر شعر کہنے کی خواہش اگر پیدا ہوئی ہے تو اس کا ایک مطلب یہ بھی ہے کہ آپ کے اندر سے کوئی آواز اٹھی ہے اور وہ کچھ نہ کچھ تخلیق کرنے کا تقاضا کر رہی ہے۔ گویا آپ میں تخلیقی حِس پہلے سے موجود تھی اسے ابھرنے کا موقع ہی نہیں مل رہا تھا۔

مثلاً آپ غزل کہنا چاہتے ہیں۔ اس کا ایک مطلب یہ بھی ہوا کہ غزل آپ کی پسندیدہ صنف ہے۔ آپ نے بہت سی غزلیں سنی اور پڑھی ہوں گی، جن سے آپ لطف اندوز ہوئے ہوں گے۔ آپ شاید بعض غزلوں کو گنگناتے بھی ہوں گے۔ گنگناتے ہوئے آپ نے محسوس کیا ہوگا کہ غزل کا ہر مصرعہ ایک خاص صوتی توازن اور خوش آہنگی کے ساتھ مربوط ہے، جو پڑھنے، سننے اور گنگنانے میں بھی ایک خاص لطف عطا کرتا ہے۔ جو غزلیں اپنے ترنُّم کی کیفیت کے باعث آپ کو مرغوب ہیں، انھیں آپ بار بار پڑھیں، سُنیں اور گنگنائیں تو کچھ عرصے کے بعد آپ محسوس کریں گے کہ آپ کے اندر آہنگ کا ایسا شعور پیدا ہو گیا ہے جسے عام معنی میں وزن شناسی سے تعبیر کیا جاتا ہے۔

ایک بات یہ بھی یاد رکھنے کی ہے کہ عروض، شعر کا وزن جانچنے کا علم ہے۔ ہر شاعر اس علم سے واقف نہیں ہوتا کیوں کہ یہ ایک مشکل فن ہے۔ جنھیں علمِ عروض پر پوری دسترس ہوتی ہے انھیں عام طور پر ’استاد‘ کہا جاتا ہے۔ اکثر شعرا اُن سے یہ فن سیکھتے ہیں یا اپنی شعری تخلیق میں صحیح و غلط کی نشان دہی کے لیے ان سے مشورہ لیتے ہیں۔ اردو میں شروع ہی سے استادی شاگردی کی یہ روایت چلی آرہی ہے۔ جس نے ایک مکتب کی شکل اختیار کر لی تھی۔

سرگرمی 5.12 

اپنی پسند کی کسی ایک غزل کے سب سے اچھے شعر (بیت الغزل، شاہ بیت) کو جلی حروف میں خوش خط لکھ کر بلیک بورڈ پر ٹانگیے۔ اس شعر کے مختلف معنوی اور فنّی پہلووں پر غور کیجیے۔ اس سلسلے میں ہم جماعتوں، اساتذہ اور والدین سے بھی مدد لیجیے۔ کلاس میں استاد کی جگہ کھڑے ہوکر اس شعر کی تشریح کیجیے۔

سرگرمی 5.13  

غزل کی صنف سے متعلق کچھ معروف ادیبوں اور شاعروں کے اقوال چارٹ میں پیش کیجیے۔

سرگرمی 5.14  

غزل کی تخلیق کے ضمن میں کچھ ممکنہ نکات کو ذہن میں رکھتے ہوئے غزل کہنے کی کوشش کیجیے۔

غالب ؔ  (1797-1869)

سرگرمی 5.15 

آہنگ، موزونیت، اختصار، جامعیت، دل کشی، تاثیر وغیرہ غزل کے اشعار کی اہم خصوصیات ہیں۔ قافیہ ، ردیف، مطلع، مقطع وغیرہ غزل کی شناخت ہیں۔ ان پہلوؤں کو دھیان میں رکھتے ہوئے ہر طالب علم کم ازکم پانچ اشعار کی غزل کہے۔ کسی روز کلاس میں مشاعرے کا اہتمام کیا جائے اور کلاس کا ہی کوئی طالب علم مشاعرے کی نظامت کرے۔ مہمان کے طور پر پرنسپل، اردو کے سبھی اساتذہ اور چند مقامی شاعروں کو بھی مدعو کیا جاسکتا ہے۔

آپ کو پہلے ہی سے یہ علم ہے کہ غزل کسے کہتے ہیں۔ اس کے لُغوی معنی کیا ہیں۔ قافیہ اور ردیف کسے کہتے ہیں۔ غزل میں مطلع اور مقطع کی کیا حیثیت ہوتی ہے۔ ہم یہاں صرف یہ بتائیں گے کہ غزل کہنے سے پہلے آپ کو کس طرح کی مشق کرنی ہے۔ مثال کے لیے ہم غالبؔ کی غزل کا انتخاب کرتے ہیں۔ اس کے چند اشعار درج ہیں :

دلِ ناداں تجھے ہوا کیا ہے؟

آخر اِس درد کی دوا کیا ہے؟

ہم ہیں مشتاق اور وہ بیزار

یا اِلٰہی! یہ ماجرا کیا ہے؟

میں بھی مُنہ میں زبان رکھتا ہوں

کاش! پوچھو کہ ’’مُدّعا کیا ہے؟‘‘

ہم کو اُن سے وفا کی ہے اُمیّد

جو نہیں جانتے وفا کیا ہے؟

میں نے مانا کہ کچھ نہیں غالبؔ

مُفت ہاتھ آئے تو، بُرا کیا ہے؟

—   غالبؔ

مشق کے طور پر آپ اس غزل کو تنہائی میں بہ آواز بلند بار بار پڑھیں، ممکن ہو تو ترنُّم کے ساتھ گائیں۔ فلم غالب میں بھی اِسے اس دور کی ایک بے حد ممتاز اداکارہ ثریّا نے نہایت دل کش آواز میں پیش کیا تھا۔ اگر اسی کی نقل کی جائے تو غزل سے ملنے والا لطف دوبالا ہو جائے گا اور آپ کو بار بار دُہرانے میں اُکتاہٹ محسوس نہیں ہوگی۔ چوں کہ آپ مشق کر رہے ہیں اس لیے ان اشعار کے معنی و مفہوم پر غور کرنے کی ضرورت نہیں ہے۔

جب آپ اس غزل کو کئی مرتبہ دُہرائیں تو اسی بحر اور اسی وزن میں غالب کی دوسری درجِ ذیل مشہور غزل کو ترنُّم سے بار بار گانے کی کوشش کریں۔

کوئی امید بر نہیں آتی             کوئی صورت نظر نہیں آتی

موت کا ایک دن معین ہے          نیند کیوں رات بھر نہیں آتی

آگے آتی تھی حالِ دل پہ ہنسی           اب کسی بات پر نہیں آتی

ہے کچھ ایسی ہی بات جو چپ ہوں           ورنہ کیا بات کر نہیں آتی

ہم وہاں ہیں جہاں سے ہم کو بھی            کچھ ہماری خبر نہیں آتی

کعبہ کس مُنہ سے جاؤگے غالب               شرم تم کو مگر نہیں آتی

  غالب

اوپر دی ہوئی غزل کو جب آپ کئی مرتبہ بہ آواز بلند پڑھ لیں اور ترنُّم سے ادا کر لیں تو آپ یہ کوشش کریں کہ اسی ترنُّم میں کچھ الگ

 الگ مصرعے لکھ سکیں۔ ممکن ہے پہلی کوشش میں آپ کو کامیابی نہ ملے۔ لیکن جب آپ بار بار کوشش کرتے رہیں گے تو ضرور کامیاب ہوں گے۔ اور اسی وزن پر کوئی نہ کوئی مصرعہ کہنے میں کامیاب ہوجائیں گے۔ آپ یہ نہ سوچیے کہ یہ مصرعے کتنے بے معنی، پُھسپھُسے یا بے وزن ہیں۔ ہر فن ، صبر، استقلال اور مشق کا تقاضا کرتا ہے۔ یہاں ہم اسی بحر و وزن میں چند مصرعے درج کرتے ہیں جن کے پیچھے کسی خاص کوشش کا دخل نہیں ہے۔ ہمارے لیے شاید یہ آسان تھا۔ آپ کو بس یہ دیکھنا ہے کہ یہ مصرعے بامعنی ہیں لیکن دوسرے مصرعے کے بغیر ادھورے بھی ہیں۔ ہم نے آپ کی تربیت کے لیے اور نمونے کے طور پر یہ مصرعے کہے ہیں۔ اسی طرح آپ بھی کہنے کی کوشش کریں:

ہم نے اپنی زباں نہیں کھولی

زندگی کا یہی تماشا ہے

آخرِ کار یہ تو ہونا تھا

تیری نظروں میں ہم نے دیکھا ہے

تیری یادوں کی فصل آئی ہے

ہم نے دیکھی ہے دوستی تیری

دل ہی دل میں خیال آیا تھا

روشنی کس طرف سے آئی تھی

یہ تمام مصرعے ایک ہی بحر و وزن میں ہیں۔ آپ اسی طرح بہت سے مصرعے کہنے میں کامیاب ہو جائیں تو غالبؔ کی زمین میں یعنی اسی

 قافیے اور ردیف میں شعر کہنے کی کوشش کریں جس کا استعمال غالبؔ نے کیا ہے۔ اپنی غزل کلاس ٹیچر کو دکھائیں یا انھیں سنائیں۔ اپنے دوستوں کو بھی سنا سکتے ہیں جس سے آپ کو حوصلہ ملے۔ اگر کچھ غلطیاں واقع ہو گئی ہیں تو آئندہ ان سے بچنے کی کوشش کر سکیں گے۔

اس بحر و وزن پر قدرت حاصل کرنے کے بعد پھر کسی دوسرے شاعر کی غزل کی زمین میں شعر کہنے کی کوشش کریں۔اپنے نصاب میں شامل غزلوں کو بھی بنیاد بنا سکتے ہیں۔ اس طرح الگ الگ بحروں اور اوزان سے آپ واقف ہو سکیں گے۔ اس بات کا خیال رہے کہ آپ ابھی مشق کے مرحلے میں ہیں اس لیے ایسی غزلوں کو چُنیں جو رواں اور مترنّم ہوں اور قافیہ و ردیف کے لحاظ سے بھی سہولت بخش ہوں۔

ادب کی تخلیق ایک شعوری، منظم، فن کارانہ جمالیاتی عمل ہے جس میں ذہن اور جذبے کی ساری قوتیں بہ یک وقت کام کرتی ہیں۔ بہتر

 نظامِ زندگی کے لیے لڑائی صرف سیاسی، اقتصادی اور معاشی میدانوں میں نہیں لڑی جاتی، خیالات اور افکار جذبات اور احساسات کے دائرے میں بھی لڑی جاسکتی ہے۔ اسی طرح ادب، قدروں کے تخلیقی عمل میں شریک ہوتا ہے۔ ادیب اور شاعر بہ راہ راست قدریں نہ پیدا کر سکیں لیکن اُن کو اپنے خوب صورت اظہار سے، زیادہ بامعنی، زیادہ قابل قبول، زیادہ حسین بنا سکتے ہیں۔

-  احتشام حسین

احتشام حسین  (1912-1972)

سرگرمی 5.16

گیارھویں جماعت کی اردو کی معاون درسی کتاب ’خیابانِ اردو‘ میں متعدد گیت شامل کیے گئے ہیں۔ یہ گیت مختلف موڈ، موسم، مواقع، تقریبات کے موقع پر گائے 

جاتے ہیں۔ ہر موڈ اور موقع کی مناسبت سے کم از کم دو گیت تلاش کرکے ایک پورٹ فولیو تیار کیجیے۔

سرگرمی 5.17 

اپنے اسکول کی کرکٹ ٹیم کا حوصلہ بڑھانے کے لیے ایک گیت تیار کیجیے اور اس کی لَے اور دُھن بھی تیار کیجیے۔ مثلاً آپ نے وہ گیت ضرور سنا ہوگا۔

’’من میں ہے وشواس، پورا ہے وشواس

’’ہم ہوں گے کامیاب ایک دن، ہو ہو ہو‘‘

اس سے ملتا جلتا کوئی بھی گیت آپ تیار کرسکتے ہیں۔

جاں نثار اخترؔ (1914-1976)

جب لگیں زخم تو قاتل کو دعا دی جائے

ہے یہی رسم تو یہ رسم اٹھا دی جائے

دل کا وہ حال ہوا ہے غمِ دوراں کے تلے

جیسے اک لاش چٹانوں میں دبا دی جائے

ہم نے انسانوں کے دکھ درد کا حل ڈھونڈ لیا

کیا بُرا ہے جو یہ افواہ اڑا دی جائے

ہم کو گزری ہوئی صدیاں تو نہ پہچانیں گی

آنے والے کسی لمحے کو صدا دی جائے

انھی گل رنگ دریچوں سے سحر جھانکے گی

کیوں نہ کھِلتے ہوئے زخموں کو دعا دی جائے

ہم سے پوچھوکہ غزل کیا ہے، غزل کا فن کیا

چند لفظوں میں کوئی آگ چھپا دی جائے

—  جاں نثار اختر

گیت کیسے لکھیں•

اگر آپ گیت لکھنا چاہتے ہیں تو پہلے اس بات کو اچھی طرح سمجھ لیجیے کہ گیت کہتے کسے ہیں۔ پچھلے صفحات میں آپ پڑھ چکے ہیں کہ گیت کے موضوعات کیا ہیں اور ان کا گیت میں کس طرح اظہار کیا جاتا ہے۔ اگر آپ نے ان باتوں کو اچھی طرح ذہن نشین کرلیا ہے تو اب آپ کچھ اچھے گیت کاروں کے گیت سامنے رکھ کر انھیں بار بار پڑھیں اور دیکھیں کہ انھوں نے اپنی بات کس طرح کہی ہے۔ ان گیتوں کو بار بار پڑھتے ہوئے آپ محسوس کریں گے کہ خود آپ کے لیے گیت کہنا آسان ہوگیا ہے۔ جب آپ محسوس کریں کہ گیت کہنے کی طرف طبیعت مائل ہونے لگی ہے تو اب آپ کو کاغذ قلم لے کر بیٹھ جانا چاہیے۔ چوں کہ ابھی آپ کو گیت لکھنے کی مشق نہیں ہے اس لیے آپ کو گیت کے بول لکھنے سے قبل تھوڑی سی تیاری کرنی ہوگی۔

پہلے یہ طے کیجیے کہ آپ کا موضوع کیا ہوگا۔ آپ جانتے ہیں کہ گیت کی فضا عام طور سے رومانی ہوتی ہے۔ اس میں کبھی تو محبوب کی ملاقات سے حاصل ہونے والی خوشی کا ذکر ہوتا ہے اور کبھی محبوب سے جدائی کا غم بیان ہوتا ہے۔موسم، مناظرِ فطرت، حب الوطنی اور تہواروں کے حوالے سے بھی گیت لکھے گئے ہیں۔ آپ کو کس موضوع پر گیت لکھنا ہے، اس کا فیصلہ کیجیے اور کاغذ پر اپنے موضوع سے متعلق خیالات قلم بند کرلیجیے۔

آپ جانتے ہیں کہ گیت میں بہت ساری باتیں نہیں ہوتیں، بالعموم چند باتوں کو ہی پھیلا کر بیان کیا جاتا ہے۔ بعض مصرعے یا بول دہرائے بھی جاتے ہیں۔ گیت لکھتے وقت آپ کو بھی یہی کرنا ہے۔ ایک کام اور کیجیے۔ اپنے موضوع سے ملتا جلتا کوئی گیت نمونے کے طور پر سامنے رکھ لیجیے۔ اور اسے دیکھ کر خود بھی لکھنے کی کوشش کیجیے۔ گویا الفاظ اور خیالات آپ کے ہوں گے لیکن نمونے کے بول کسی پختہ مشق گیت کار کے۔ مثلاً آپ کو عشقیہ موضوع پر کوئی گیت لکھنا ہے۔ اس کے لیے آپ احسان دانش کے درج ذیل گیت ’پریت ہے من کا روگ‘ کو سامنے رکھ کر غور کریں کہ گیت کار نے کس طرح اپنی بات کہی ہے: 

 پریت ہے من کا روگ

پریت ہے من کا روگ

سکھی ری

پریت ہے من کا روگ

انگ ہے اگنی، نین پانی

بولت ہیں سب وِش کی بانی

ویوگ میں بیتی جات جوانی

اَتی کٹھن سنجوگ

 سکھی ری

پریت ہے من کا روگ

دھرتی چپ آکاش اندھیرا

روٹھ گیو، رَتین سے سویرا

برہن کا من، دکھ کا ڈیرا

چھایو جگ میں سوگسکھی ری

پریت ہے من کا روگ

چھب دِکھلا جا کرشن مراری

درس کے پیاسے ہیں نر ناری

کھائی ہے ایسی پریم کٹاری

ویاکُل ہیں سب لوگ

سکھی ری

پریت ہے من کا روگ

—   احسان دانشؔ

احسان دانشؔ  (1914-1982)

سرگرمی 5.18 

گیت سے متعلق ممکنہ نکات کی روشنی میں کوئی گیت تحریر کیجیے۔

اس گیت کو پڑھتے ہوئے آپ محسوس کریں گے کہ یہاں شدّت جذبات کو فوقیت حاصل ہے۔ یعنی جذبہ بھی ہے اور جذبے کے بیان میں

 شدّت بھی ہے۔ آپ کو بھی اسی طرح لکھنا ہے۔

جذبے کی شدّت کو ظاہر کرنے کے لیے شاعر نے بعض بول دُہرائے بھی ہیں اور انداز ایسا اختیار کیا ہے کہ اسے دو تین لوگ مل کر گا بھی سکیں۔ آپ جانتے ہیں کہ غنائیت گیت کا ایک اہم عنصر ہے۔ شاعر نے اس پہلو کا بھی خیال رکھا ہے۔ آپ کو بھی گیت لکھتے وقت جذبے اور غنائیت کا خیال رکھنا ہوگا۔

یہ بھی دیکھیے کہ گیت کار نے ہلکے پھلکے اور شیریں الفاظ کا انتخاب کیا ہے۔ چوں کہ گیت ہندی صنف ہے اس لیے آپ چاہیں تو حسب ضرورت بول چال کے ہندی الفاظ بھی استعمال کرسکتے ہیں۔

گیت کے بارے میں یہ بات آپ کو معلوم ہے کہ یہ ایک قدیم صنف ہے۔ شادی بیاہ کے موقعوں پر مل جل کر گیت گانے کا رواج رہا ہے۔ اسی طرح برسات کے موسم میں یا کسی کام کو کرتے وقت بھی عورتیں ایک ساتھ مل کر گیت گاتی ہیں۔ اس کا مطلب یہ ہوا کہ گیت میں ’ہم احساسی‘ ضروری ہے۔ یعنی گیت میں جذبے کا ’مشترکہ اظہار‘ ہوتا ہے۔ نمونے کے طور پر آپ نے جو گیت سامنے رکھا ہے، اس میں بھی یہ کیفیت موجود ہے۔ آپ کو بھی اس کا خیال رکھنا ہوگا۔

اب آپ نے گیت لکھنے کے لیے ساری ضروری تیاریاں کرلی ہیں۔ لکھیے اور دیکھیے کہ آپ کے گیت میں جذبہ شدت کے ساتھ ظاہر ہوا ہے یا نہیں؟ ہم احساسی کی کیفیت موجود ہے یا نہیں؟ زبان مشکل تو نہیں ہوگئی ہے؟ یہ بھی دیکھیے کہ آپ نے جو گیت لکھا ہے اسے گیت کے انداز میں گایا جاسکتا ہے یا نہیں؟ اگر آپ کے گیت میں یہ تمام خوبیاں موجود ہیں تو سمجھ لیجیے آپ کامیاب ہوگئے۔ لیکن یہ آپ کی پہلی کوشش ہے۔ ابھی اس میں مزید نکھار لانا ہے۔ جب آپ بار بار گیت لکھیں گے، اساتذہ اور دوسرے اہل علم کو اپنے گیت دکھا کر ان سے رہنمائی حاصل کریں گے تو آہستہ آہستہ آپ کے گیتوں میں بھی پختگی پیدا ہوجائے گی۔ اور آپ کا شمار مشہور گیت کاروں میں ہونے لگے گا۔

مختصر افسانہ ناول ہی کا اختصار ہے، فرق صرف یہ ہے کہ ناول اس قدر مرکوز اور گتھا ہوا نہیں ہوتا بلکہ کسی تاثر پر ٹھہر جانے کی بجائے وہ

 اس تاثر کے محرکات اور پھر کسی قدر ان کے متعلقات سے بھی بحث کرتا ہے اور انھیں اس طرح پیش کرتا ہے کہ ساری باتیں ایک سلسلے کی کڑیاں معلوم ہونے لگتی ہیں، جب کہ مختصر افسانہ ان میں سے کسی ایک کڑی ہی کو چن لیتا ہے اور اسی پر اپنی توجہ مرکوز کرتا ہے۔

-  محمد حسن

محمد حسن  (1926-2010)

»تخلیقی نثر

  غیر تخلیقی نثر

غیر تخلیقی نثر کو علمی نثر بھی کہتے ہیں۔ ایسی نثر جس میں وضاحت اور قطعیت کے ساتھ جچے تلے الفاظ میں کسی موضوع پر اس طرح اظہارِخیال کیا جاتا ہے کہ جو بات لکھنے والے کے ذہن میں ہے وہی قاری تک پہنچے۔ اس لیے غیر تخلیقی نثر کی زبان سادہ ہوتی ہے۔ اس میں تشبیہ، استعارے یا تخیل سے کام نہیں لیا جاتا۔ ترسیلِ خیال اس کا بنیادی مقصد ہے۔ عام طور سے علمی موضوعات کے بیان میں غیر تخلیقی نثر کا استعمال کیا جاتا ہے۔

غیر تخلیقی نثر اور تخلیقی نثر میں جو فرق ہے وہ دونوں کے مقاصد کی بنیاد پر ہے۔تخلیقی نثر  کا مقصد انبساط آفرینی ہے یہی وجہ ہے کہ تخلیقی نثرلطیف ہونے کے ساتھ ہماری بصیرت کو بھی جلا بخشتی ہے۔ ہمیں یہ بھی یاد رکھنا چاہیے کہ نتیجہ خیزی تخلیقی نثر کا منصب نہیں ہے۔    اس لیے اس سے مکمل ابلاغ کی توقع بھی نہیں کرنا چاہیے۔ غیرتخلیقی تحریروں کی نثر کا مقصد ہی علم و معلومات فراہم کرناہے۔ اس لیے اس قسم کی نثر میں وضاحت و صراحت سے کام لیا جاتا ہے۔ اور دلائل کی بنیاد پر کوئی نتیجہ اخذ کیا جاتا ہے۔گویا مکمل ابلاغ اس کی پہلی شرط ہے۔

2.2.1  افسانوی نثر

وہ نثر جس کا استعمال قصہ، کہانی بیان کرنے کے لیے کیا جاتا ہے افسانوی نثر کہلاتی ہے۔ یعنی کہانی پن یا افسانویت کی صفت رکھنے والی نثر افسانوی نثر کے زمرے میں آتی ہے۔ افسانہ اپنے اندر تحیّر، تجسّس اور ڈرامائی عناصرلیے ہوتا ہے۔ ان عناصر کو تخلیقی پیکر عطا کرنے کے لیے ان کے مطابق اسلوب اور زبان درکار ہوتی ہے۔

افسانوی اصناف میں موضوع کی پیش کش کے لیے پلاٹ، کرداراور منظر کشی کے علاوہ موزوں زبان و بیان کو بھی لازمی جزو تسلیم کیا جاتا ہے۔تخلیق کار اپنے تجربے، مشاہدے اور قوتِ متخیّلہ کو بروئے کار لاتے ہوئے گرد وپیش میں بکھرے ہوئے حادثات و واقعات سے مواد لے کر انھیں پر کشش اسلوبِ بیان سے دلچسپ قصے  کہانی کا روپ عطا کرتا ہے۔ اس ضمن میں حقیقت کی افسانوی رنگ آمیزی قاری کی ذہنی و جمالیاتی تسکین کا سبب بنتی ہے۔

نثرکی افسانوی اصناف میں داستان ، ناول اور مختصر افسانہ کو خاص اہمیت حاصل ہے۔ ان اصناف کے اپنے صنفی تقاضے اور خصوصیتیں ہوتی ہیں۔ صنفی تقاضے کے لحاظ سے ہرافسانوی صنف کی پیش کش کے طریقے اور تکنیکیں بھی مختلف ہوتی ہیں۔

سرگرمی  5.20

چار طلبا کے ایک گروپ کو کوئی معروف افسانہ (ممکن ہو تو دسویں جماعت میں شامل کوئی افسانہ یا کہانی) پڑھنے کو دیا جائے۔ اُن میں سے ایک طالب علم افسانے کے پلاٹ، دوسرا کردار، تیسرا منظر نگاری اور جزئیات نگاری اور چوتھا وحدتِ تاثر یا وحدتِ عمل کے بارے میں کلاس کے سامنے اپنے خیالات پیش کرے۔ اس کے لیے گروپ کو دوتین روز کا وقت دیا جائے۔

» مختصر افسانہ/کہانی 

افسانہ یا کہانی ایک ایسی صنف ہے جسے دنیا کی ہر زبان میں کم و بیش یکساں مقبولیت حاصل ہے۔کہانی کہنا اور سننا ہمیشہ سے انسان کا دلچسپ مشغلہ رہا ہے۔ایک وقت تھا کہ رات میں سونے سے پہلے یا فرصت کے اوقات میں گھر کے تمام بچّے دادا،دادی، نانا، نانی، ماں،باپ یا کسی اور بزرگ کے پاس بیٹھ جاتے تھے اور ان سے کہانیاں سنا کرتے تھے۔اس عمل میں وہ نئی نئی باتیں سیکھتے تھے اور اَن دیکھی دنیاوں کی سیر کرتے تھے۔ یہ کہانیاں صرف تفریح کا ذریعہ نہ تھیں بلکہ ان کے ذریعے بچے انسانیت کی اعلیٰ قدروں اور اخلاقی اصولوں سے بھی واقف ہوتے تھے۔کہانی سننے کے بہانے خاندان کے سبھی افراد کا ایک ساتھ بیٹھنا بھی تربیت کا ایک بہتر ذریعہ ہوتا تھا۔ بچّے نہ صرف آدابِ نشست و برخاست سے واقف ہوتے تھے بلکہ ان کی زبان اور ذخیرۂ الفاظ میں بھی مسلسل اضافہ ہوتا رہتا تھا۔ریڈیو، فلم اور ٹیلی ویژن اور اب انٹر نیٹ کے زمانے میں بھی کہانی کی اہمیت و معنویت میں کوئی کمی نہیں آئی ہے۔ البتہ کہانی کہنے اور سننے کے انداز ضرور بدل گئے ہیں۔یہاں آپ کو افسانے کے فن اور افسانہ لکھنے کے بارے میں بتا یاجارہا ہے۔افسانہ اردو کی ایک اہم اور مقبول صنف ہے۔یہ ایک مختصر نثری قصّہ ہے۔ اردو میں داستان اور ناول کے بعد افسانے کاباقاعدہ آغاز ہوا۔افسانے میں زندگی کے   کسی خاص واقعے ، تجربے یا پہلو کی عکاسی کی جاتی ہے یا کسی مخصوص نفسیاتی یا جذباتی صورتِ حال کو موضوع بنایا جاتا ہے۔ افسانے کا ذکر آتے ہی ہمارے ذہن میں کہانی اور کرداروں کا تصور ابھرتا ہے۔کسی بھی افسانے میں کہانی اور کردار بنیادی حیثیت رکھتے ہیں۔ان کے علاوہ پلاٹ، مرکزی خیال، زبان واسلوب اورتکنیک بھی اس کے اہم اجزا ہیں۔ ان اجزا کو افسانے کے اجزائے ترکیبی کہا جاتا ہے۔جن کا تعارف درج ذیل ہے:

» پلاٹ 

واقعات کی ترتیب کا نام پلاٹ ہے۔ یعنی کہانی کا تابانا بنتے وقت کون سا واقعہ کب اور کہاں بیان کرنا ہے۔ سب سے پہلے افسانہ نگار موضوع کا انتخاب کرتا ہے، پھر وہ اس کے پلاٹ کا خاکہ ترتیب دیتا ہے، اس کے بعد اس کے ذہن میں اس سے متعلق کردار آتے ہیں اور وہ انھیں پلاٹ کے تقاضے کے مطابق ڈھالتا ہے۔ایک اچھا افسانہ نگار پلاٹ کی فنی ترتیب و تعمیر پرخاص توجہ دیتا ہے۔اسی طرح کہانی کے تمام واقعات اس کے مرکزی موضوع سے مربوط ہوتے ہیں۔ 

پلاٹ کئی طرح کے ہوتے ہیں۔ سادہ پلاٹ، پیچیدہ پلاٹ،غیر منظم پلاٹ،   ضمنی پلاٹ وغیرہ۔سادہ پلاٹ میں تسلسل کے ساتھ واقعات بیان کیے جاتے ہیں۔ ایسے پلاٹ میں کہانی کے آغاز ، وسط اور انجام میں ربط پایا جاتا ہے۔اس میں قصّہ بتدریج آگے بڑھتا ہے اور اختتام پذیر ہوتا ہے۔پیچیدہ پلاٹ میں افسانے کے واقعات میں ایک دوسرے سے ربط تو ہوتا ہے لیکن ان میں قصہ اس تسلسل کے ساتھ بیان نہیں کیا جاتا جس طرح سادہ پلاٹ میں کیا جاتا ہے۔ ا س میں کبھی افسانے کا آغاز اس کے انجام سے کیا جاتا ہے اور کبھی وسط سے اس کے واقعات بیان کیے جاتے ہیں۔ایسے افسانوں میں تجسس اور حیرت کی کیفیت شروع سے آخر تک برقرار رہتی ہے۔ کچھ افسانوں میں غیر منظم پلاٹ بھی ہوتا ہے۔ 

موضوع اور عنوان دونوں میں نیا پن ہونا ضروری ہے۔ یہ نیا پن ہی ہے جو قاری کو افسانہ پڑھنے کی طرف مائل کرتا ہے۔اسی طرح اختصار اور جامعیت بھی پلاٹ کی ایک اہم خوبی تسلیم کی جاتی ہے۔واقعات کے بیان میں غیر ضروری تفصیل اور بے جا طوالت کی وجہ سے افسانے میں قاری کی دلچسپی ختم ہو جاتی ہے۔ 

کردار

افسانہ نگار قصہ بیان کرنے کے لیے جن افراد کو اپنی کہانی میں استعمال کرتا ہے انھیں کردار کہتے ہیں۔ مختصراً یوں کہہ سکتے ہیں کہ افسانے میں موجود افراد کردار کہلاتے ہیں۔ جو کردار جس طبقے، عمر،نسل،جنس یا علاقے کا ہو اسی کی مناسبت سے اس کے اعمال،زبان اور مکالمے پیش کیے جاتے ہیں۔ کردار کا فطری ہونا ضروری ہے۔اس میں بناوٹ یا دکھاوا نہیں ہونا چاہیے۔ پریم چند کے افسانے ’کفن‘ (گھیسو،مادھو)، سعادت حسن منٹو کے افسانے ’نیاقانون‘ (منگو کوچوان)وغیرہ میں ایسے جاندار اور توانا کردار پیش کیے گئے ہیں کہ انھیں قاری بھول نہیں سکتا۔کردارکی تشکیل وتعمیر میں یہ کوشش کی جاتی ہے کہ یہ حقیقی معلوم ہوں اور قاری ان سے بہت زیادہ اجنبیت نہ محسوس کرے۔

»مکالمہ

دو کرداروں کے درمیان گفتگو یا بات چیت کو مکالمہ کہتے ہیں۔مکالمے کے لیے ضروری ہے کہ یہ کرداروں کی شخصیت کے عین مطابق اور ان کے حسب حال ہوں۔ افسانے میں مکالمے کرداروں کی جنس، ان کی عمر ، ان کے طبقے، ماحول اور ان کی لیاقت کے اعتبار سے ہی ادا کروائے جاتے ہیں۔کردار اگر پڑھا لکھا ہے تو اس کی زبان صاف ستھری اور علمی ہوگی۔ ان پڑھ ہے تو اس کا تلفظ بہت درست اور گفتگو عالمانہ نہ ہوگی۔بچہ ہے تو بچوں کی زبان بولے گا اور اگر عورت کردار ہے تومکالمے میں عورت کا لب و لہجہ ، روز مرہ اور محاورہ استعمال کیا جائیگا۔جس طرح حلیے اور چال ڈھال کے بیان سے کردار کی ظاہری شخصیت کو ابھارا جاتا ہے، ویسے ہی کسی بھی کردار کی باطنی شخصیت کو نمایاں کرنے میں مکالمے کا اہم رول ہوتاہے۔ مکالمے سے کرداروں کی نفسیات، ان کے جذبات و احساسات اور ان کے فکر و خیال کے اظہار میں بھی مدد لی جا تی ہے۔ 

» تکنیک

افسانہ میں واقعہ یا قصّہ بیان کرنے کے طریقے کو تکنیک کہا جاتا ہے۔ افسانہ نگار آزاد ہے کہ وہ جس انداز میں چاہے کہانی بیان کرے۔ چنانچہ وہ کبھی راوی یا تماشائی کی حیثیت سے کہانی بیان کرتا ہے ، کبھی وہ خود افسانے کا ایک کردار بن کر تمام واقعات اپنی ہی زبانی سناتا ہے۔ اسی طرح وہ کبھی ڈائری کی صورت میں کہانی لکھتا ہے، کبھی سفرنامے کی اور کبھی سیدھے سادے بیانیہ انداز میں واقعات لکھتا جاتا ہے۔ کسی افسانے میں وہ بچے کی زبان سے کہانی بیان کرواتا ہے ، کسی میں بوڑھے مرد ، بوڑھی عورت یا پھر نوجوان لڑکے یا لڑکی کے ذریعے کہانی سنواتا ہے۔ کبھی وہ یہ طریقہ اختیار کرتا ہے کہ افسانے کی ابتدا واقعے کے درمیان سے کرتا ہے، کبھی واقعے کی ابتدا سے ہی افسانہ شروع کر دیتا ہے ۔کسی افسانے میں وہ ماضی کے واقعات بیان کرتا ہوا زمانۂ حال میں آجاتا ہے،تو حال کے واقعات سناتے سناتے ماضی میں چلا جاتا ہے۔ افسانہ لکھنے کے اِن سارے طریقوں کو تکنیک کہا جاتا ہے۔ ان کے نام بھی الگ الگ ہیں۔ جیسے بیانیہ تکنیک، ڈائری کی تکنیک، سفرنامے کی تکنیک اور شعور کی رو کی تکنیک وغیرہ۔

 وحدتِ تاثر 

افسانے کے اجزائے ترکیبی میں وحدتِ تاثر کو خاص اہمیت حاصل ہے۔ افسانہ اپنے آپ میں ایک اکائی ہے۔ اس میں شروع سے آخر تک ایک ماحول، ایک فضا اور ایک کیفیت کی ترجمانی کی جاتی ہے۔ چوں کہ افسانے میں کردار کی زندگی کے ایک گوشے یا ایک واقعے کو مرکزیت حاصل ہوتی ہے لہٰذا اس میں متفرق حالات وکیفیات کے بیان کی گنجائش نہیں ہوتی ہے۔

 افسانے میں کبھی ایک ہی واقعہ بیان کیا جاتا ہے، کبھی ایک واقعے کے مختلف پہلوؤں کوبیان کیا جاتا ہے اور بعض افسانوں میں ایک سے زائد واقعات بھی بیان کیے جاتے ہیں۔لیکن افسانہ نگار ابتدا سے آخر تک کسی ایک واقعے یا واقعے کے کسی ایک پہلو کوتوجہ کا مرکز بناتا ہے۔ تاکہ وہ قاری کے ذہن پر کوئی خاص تاثر قائم کر سکے۔ اسی تاثر کے لیے وہ کہانی کے سارے تانے بانے بُنتا ہے ، کرداروں کے اعمال و افعال طے کرتا ہے اور کہانی بیان کرنے کے لیے کوئی مخصوص اسلوب اپناتا ہے۔ یوں کہانی کا پلاٹ، اس کے کردار، مکالمے اور طرز نگارش سے کہانی پڑھنے والوں پر اُس مرکزی واقعے یا خیال کی وجہ سے ایک خاص کیفیت طاری ہوتی ہے ۔ پورے افسانے کی قرأت سے بر آمد ہونے والی اسی کیفیت کو وحدتِ تاثر کہتے ہیں۔   

»مرکزی خیال

مرکزی خیال کو افسانے کی تھیم بھی کہتے ہیں۔ آپ جانتے ہیں کہ ہر افسانہ نگار اپنے افسانے میں کوئی پیغام، کوئی تصور، کوئی نظریہ یا خیال پوشیدہ رکھتا ہے جسے وہ اپنے پڑھنے والوں تک پہنچانا چاہتا ہے۔ لیکن یہ پیغام یا خیال افسانے کے تانے بانے میں اس طرح شامل ہوتا ہے کہ افسانہ پڑھتے ہوئے یہ احساس تک نہیں ہوتا کہ افسانہ نگار نے آپ کے دل و دماغ میں بہت ہی سلیقے سے اپنی بات ڈال دی ہے۔ عام طور سے یہ خیال افسانے کے مرکزی واقعے، کردار یا کہانی کے تاثر کے ذریعے قائم کیا جاتا ہے۔جیسے پریم چند کے افسانے ’پوس کی رات ‘ کا مرکزی خیال زمینداروں کے استحصال کے خلاف ایک طرح کی بغاوت ہے، رتن سنگھ کی کہانی’ہزاروں سال لمبی رات‘ کا مرکزی خیال بھوک کی حقیقت ہے، جیلانی بانو کے افسانے ’دوشالہ‘ کا مرکزی خیال اپنے اسلاف کی یادگار سے شدید محبت ہے۔ 

»نقطۂ نظر

افسانے کے دوسرے اجزائے ترکیبی مثلاً پلاٹ، کرداراور مکالمے کی طرح اس کا ایک اہم جز نقطۂ نظر بھی ہوتا ہے۔ نقطۂ نظر کا مطلب یہ ہے کہ افسانہ کے ذریعے افسانہ نگار اپنے پڑھنے والوں کو کوئی نہ کوئی پیغام دینا چاہتا ہے، انھیں اپنے تجربات و احساسات میں شامل کرنا چاہتا ہے، یا ان پر کوئی تاثر یا کیفیت طاری کرنا چاہتا ہے۔ لیکن افسانہ نگار اپنے اس مقصدیا نظریے کوافسانے میں کھلے عام بیان نہیں کرتا اور نہ ہی وہ براہ راست اپنے خیال یا نظریے کی تبلیغ کرتاہے ۔بلکہ وہ اسے طرز نگارش اور بیانِ واقعہ کے پردے میں اس طرح شامل کر دیتا ہے کہ پڑھنے والے کو یہ احساس تک نہیں ہوتا کہ افسانہ نگار اسے کوئی پیغام دے رہا ہے یا اپنا خیال یانظریہ منوانے کی کوشش کر رہا ہے۔ افسانے میں درپردہ بیان کی گئی افسانہ نگار کی اسی رائے، نظریے یا پیغام کو نقطۂ نظر کہتے ہیں۔ 

’فن کار مواد کو اسلوب سے ہم آہنگ کر کے اسے ایک مخصوص طریقے سے متشکل کرتا ہے۔ افسانے کی تعمیر میں جس طریقے سے مواد ڈھلتا جاتا ہے وہی ’تکنیک‘ ہے ۔ مثلا ً ایک برتن بنانے کے لیے سب سے پہلے مٹی کی ضرورت ہے ۔ اسے ’خام مواد‘ سمجھ لیجیے ۔ پھر اس میں رنگ ملایا جائے گا ۔ یہ ’اسلوب ‘ ہے۔ پھر کاری گر مٹی اور رنگ کے اس مرکب کو اچھی طرح گوندھتا ، توڑتا مروڑتا، دباتا، کھینچتا، کسی حصے کو گول کسی کو چوکور، کہیں سے لمبا، کہیں سے گہرا اور مخصوص شکل پیدا ہونے تک اسی طرح ڈھالتا چلا جاتا ہے اور آخر میں جو شکل پیدا ہوتی ہے اسے ’ہئیت‘کہتے ہیں اور جو چیز بنتی ہے وہ ’افسانہ ‘  ہے۔

—  ممتاز شیریں

ممتاز شیریں  (1924-1973)

سرگرمی 5.22

افسانے کی تخلیق کے ضمن میں جو اہم نکات بتائے گئے ہیں ان کی روشنی میں کوئی افسانہ تخلیق کیجیے۔

 زبان اور اسلوب

» زبان

زبان اور اسلوب کی افسانے میں بڑی اہمیت ہوتی ہے۔ کوئی بھی افسانہ اپنی زبان اور اپنے اسلوب کی وجہ سے ہی اہم ، اثر انگیز اور معیاری ہوتا ہے ۔لیکن افسانے میں زبان کا معاملہ شاعری سے مختلف ہوتا ہے۔شاعری میں زبان عام طور پر تشبیہ و استعارے اور مختلف شعری صنعتوں سے معمور فصیح و بلیغ ہوتی ہے۔ چوں کہ شاعری میں تما م باتیں محض شاعر کی زبان سے ادا ہوتی ہیں اس لیے یہ ایک جیسی ہوتی ہے۔افسانے میں طرح طرح کے کردار ہوتے ہیں اور سب اپنی اپنی بولیاں بولتے ہیں اس لیے سب کی زبان بھی مختلف ہوتی ہے۔ کسان اور مزدور کی زبان الگ ہوتی ہے، پڑھے لکھوں کی الگ۔ پھر اس میں افسانہ نگار کی بھی زبان ہوتی ہے جو اِن سب سے مختلف ہوتی ہے۔ افسانے میں اچھی زبان کا مطلب ہوتا ہے کرداروں کے حسب حال ہونا ۔

»  اُسلوب

اسلوب کو طرزِ نگارش، طرزِ تحریر، لکھنے کاطریقہ اور مصنف کا اسٹائل بھی کہتے ہیں۔ ہراچھے افسانہ نگار کے لکھنے کا اپنا ایک خاص طریقہ ہوتا ہے جس پر اس کی شخصیت کی چھاپ ہوتی ہے۔ افسانہ نگار کے سوچنے کے طریقے، اس کے ماحول اور اس کی لفظیات سے اس کے لکھنے کا ایک الگ انداز بنتاہے جس کی وجہ سے اس کی تمام تحریریں ایک خاص رنگ میں ڈھلی ہوئی معلوم ہوتی ہیں۔ لکھنے کا یہی الگ انداز یا تحریرکا خاص رنگ افسانہ نگار کا اُسلوب کہلاتا ہے۔ افسانہ نگاروں کے پسندیدہ موضوعات بھی ان کے اُسلوب کی تعمیر میں اہم رول ادا کرتے ہیں۔ یہی وجہ ہے کہ ہر افسانہ نگار کے لکھنے کاانداز اور اس کی زبان ایک دوسرے سے مختلف ہوتی ہے۔ مثلاً کرشن چندر کا اندازِبیان شاعرانہ ہے، منٹو کے افسانوں میں جنسی اور نفسیاتی تجزیے خاص اہمیت رکھتے ہیں، عصمت چغتائی کے افسانوں کی زبان مسلم متوسط طبقے کی گھریلو عورتوں کی زبان ہے، بیدی اور احمد ندیم قاسمی کے اسلوب پر پنجاب کی تہذیب کا رنگ ہے، قرۃ العین حیدر کے افسانوں میں تعلیم یافتہ  اعلیٰ طبقے کی گفتگو کا انداز ہے۔ اسی طرح تمام بڑے افسانہ نگاروں کا اپنا ایک خاص اسلوب ہوتا ہے جس سے ان کی شناخت قائم ہوتی ہے۔ 

قرۃ العین حیدر (1926/27-2007)

انتظار حسین (1922/25-2016)

»   افسانہ کیسے لکھیں

 افسانہ نگاری کے لیے یہ ضروری ہے کہ آپ میں غورو فکر کی عادت اور صلاحیت ہو، اپنے آس پاس کی چیزوں اور ماحول پر گہری نگا ہ ہو۔ آپ اپنے گردوپیش کے واقعات و حالات سے اپنے افسانوں کے موضوعات منتخب کرسکتے ہیں۔آپ اپنی زندگی کے گزرے ہوئے دنوں پر غور کیجیے۔ ان میں ایسے بہت سارے واقعات یا ایسی بہت سی باتیں ہوں گی جنھیں افسانے کا روپ دیا جاسکتا ہے۔ان گزرے دنوں میں خوشی اور غم دونوں کے مواقع آئے ہوں گے۔آپ ان میں سے کوئی ایک واقعہ منتخب کرسکتے ہیں۔اس کے بعد یہ طے کیجیے کہ اس میں کتنے کردار ہوں گے،ان سے کیا کام لینا ہے یعنی وہ افسانے میںکس نوعیت کا رول ادا کریں گے۔افسانے میں انھیں کس طرح متعارف کرانا ہے،کہانی کا آغاز کیسے کرنا ہے،اسے کیسے آگے بڑھانا ہے۔ ان تمام امور پر غور کرنا ضروری ہے۔ کہانی میں کرداربہت اہم ہوتے ہیں۔ اس لیے ان کی تخلیق کرتے وقت احتیاط سے کام لینا ضروری ہے۔مرکزی کردار کون ہوگا، اس کا نام کیا ہوگا،وہ کس طرح کا انسان ہے،اس کی شخصیت کیسی ہے، کیا کرتا ہے،اس کا حلیہ کیا ہے ، کہاں رہتا ہے، کس طبقے سے تعلق رکھتا ہے، اس کی سوچ کیسی ہے، رویّہ کیسا ہے، اس کی پسند و ناپسند کیا ہے۔دوسرے کردار کون سے ہوں گے، ان کا نام کیا ہوگا،کہانی میں ان کا کیا رول ہوگا،مرکزی کردار سے ان کے رشتے کیسے ہوں گے وغیرہ امور پر بھی توجہ دینا ضروری ہے۔

افسانے میں عموماً کم ہی کردار ہوتے ہیں۔ابتدا میں آپ خود کو بھی ایک کردار کی شکل میں پیش کرسکتے ہیں۔ افسانے کو واحد متکلم کے صیغے میں لکھیے۔اس سے آپ کو محسوس ہوگا کہ آپ بھی کہانی کا ایک حصہ ہیں۔جب آپ کہانی لکھنے کے فن سے اچھی طرح واقف ہو جائیں تو واحد غائب کے صیغے میں لکھناشروع کیجیے۔

کہانی کی ابتداکسی بنیادی مسئلے سے ہوتی ہے جس کے گرد تمام واقعات گردش کرتے ہیں۔ یہ مسئلہ جب بہت شدت اختیار کر جاتا ہے اور کسی فیصلہ کن موڑ پر پہنچ جاتا ہے تو اسے کہانی کا کلائمیکس یا نقطئہ عروج کہتے ہیں ۔جب یہ مسئلہ حل ہوجاتا ہے تو کہانی اپنے انجام کو پہنچتی ہے۔

افسانہ نگار کو موضوع، ماحول اور مقام کے اعتبار سے کہانی کے لیے کردارچننے ہوتے ہیں۔کرداروں کے سماجی اور تہذیبی پس منظر،ذہنیت و نفسیات، علاقہ، عمر،جنس اور تعلیمی لیاقت کے اعتبارسے ان کی زبان،لباس، کھانے پینے ، حرکت و عمل وغیرہ کی پیش کش کی جانی چاہیے۔اچھے مکالمے کہانی کو آگے بڑھانے اور کرداروں کی صفات اور ان کے منصوبوں کو اجاگر کرنے میں معاون ہوتے ہیں۔اس لیے کوشش کرنی چاہیے کہ کہانی میں کچھ مکالمے بھی دیے جائیں ۔ اس کے لیے آپ اپنے آس پاس کے لوگوں کی گفتگو دھیان سے سنیے، مختلف طبقے اور پیشے کے لوگوں کی زبان پر غور کیجیے اور انھیں مکالموں میں استعمال کیجیے۔اس سے آپ کے مکالموں میں فطری پن پیدا ہوگا۔

عموماًہرکہانی میں آغاز، وسط اورانجام ہوتا ہے۔آپ ایک خاکہ تیار کیجیے کہ کہانی میں کون کون سے واقعات بیان کرنے ہیں اور ان کی ترتیب کیا ہوگی۔واقعات یا واقعہ کے انتخاب میں بھی بہت احتیاط سے کام لینے کی ضرورت ہے۔صرف ان ہی واقعات کو کہانی میں شامل کیجیے جن سے کہانی کو آگے بڑھانے اور ایک منطقی انجام تک پہنچانے میں مدد ملے۔یاد رکھیے کہ افسانے میں اختصار سے کام لینا ضروری ہے ورنہ اس میں قاری کی دلچسپی برقرار نہیں رہے گی۔اس لیے افسانہ لکھتے وقت غیر ضروری تفصیل سے گریز لازمی ہے ۔ اختصار کا مطلب یہ نہیں ہے کہ جہاں تفصیل کی ضرورت ہو وہاں بھی اختصار ہی سے کام لیا جائے۔افسانہ نگار کو اعتدال اورتوازن سے کام لینا چاہیے۔ افسانے کا آغاز ایسا ہونا چاہیے کہ شروع سے ہی قاری اس میں دلچسپی لینے لگے۔قصے کو اس طور پر آگے بڑھائیے کہ قاری کو بوریت کا احساس نہ ہواور ’ آگے کیا ہوگا‘کا تجسس برقرار رہے۔آہستہ آہستہ اسے اختتام کی طرف لے جائیے ۔ افسانے کا انجام نہ بعید از قیاس ہوناچاہیے اور نہ ایسا کہ جس کے بارے میں پہلے سے ہی قاری اندازہ لگالے ۔

 افسانے میں تمام اجزا کا ایک دوسرے کے ساتھ مربوط ہونا بھی ضروری ہے ۔ایسا نہ ہو کہ کوئی جز زائد یا بھرتی کا تصور دے ۔اگر کسی حصّے کو نکال دیا جائے تو افسانے کی فنّی تنظیم پر کوئی اثر ہی نہ پڑے۔ہم وضاحت کے ساتھ یہ بھی کہہ سکتے ہیں کہ افسانے میں واقعہ اور کردار ،کردار اور زبان، واقعہ اور اس کے پس منظر میں گہرا رشتہ ہوتا ہے۔پریم چند کے افسانوں کے جغرافیائی اور تہذیبی تناظر کا تعلق دیہاتی زندگی سے ہے۔ان کے دیہی کرداروں کے عادات واطوار میں عموماً سادہ لوحی اور بے ریائی ہوتی ہے۔ان کے لباس، رہن سہن کے طریقوں اور بات چیت کے انداز میں بھی بے تکلفی کا رنگ حاوی ہوتا ہے۔ان کی زبان بھی شہری زبان کی طرح نفیس و مہذب نہیں ہوتی کیوں کہ وہ مقامی کچّی پکّی زبان کے عادی ہوتے ہیں۔پریم چند اپنے کرداروں کو وہ پس منظر مہیا نہیں کر سکتے تھے ِجیساکہ قرۃ العین حیدر اپنے افسانوں میں مہیا کرتی ہیں اور قرۃ العین کے شہری کردار اس زبان میں گفتگو نہیں کرسکتے جو پریم چند کے کرداروں کی ہے۔ اگر افسانہ نگار نے کوئی واقعہ تاریخ سے اخذ کیا ہے تو اُس عہد کے تہذیبی پس منظر کا لحاظ رکھنا بھی ضروری ہے، ورنہ عدم مناسبت کو افسانہ نگار کی لا علمی سے تعبیر کیا جا سکتا ہے۔ 

سعادت حسن منٹو(1912-1955)

راجندر سنگھ بیدی (1915-1984)

عصمت چغتائی (1915-1991)

میر امّن (1750-1837)

باغ و بہار

اب آغاز قصّے کا کرتا ہوں۔ ذرا کان دھر کر سنو اورمنصفی کرو۔ سیر میں چار درویش کی یوں لکھا ہے اور کہنے والے نے اس طرح کہا ہے کہ آگے روم کے ملک میں کوئی شہنشاہ تھا کہ نوشیرواں کی سی عدالت اور حاتم کی سی سخاوت اس کی ذات میں تھی۔ نام اس کا آزاد بخت تھا۔ اس کے وقت میں رعیت آباد، خزانہ معمور، لشکر مرفہ، غریب غربا آسودہ ،ایسے چین سے گزران کرتے اور خوشی سے رہتے کہ ہر ایک گھر میں دن عید، رات شب برات تھی اور جتنے چورچکار ، جیب کترے، صبح خیزے، اٹھائی گیرے، دغا باز تھے سب کو نیست و نابود کرکرنام و نشان ان کا ملک بھر میں نہ رکھا تھا۔ ساری رات دروازے گھروں کے بند نہ ہوتے اور دکانیں بازاروں کی کھلی رہتیں۔ راہی مسافر جنگل میں سونا اچھالتے چلے جاتے، کوئی نہ پوچھتا کہ تمھارے منہ میں کے دانت ہیں اور کہاں جاتے ہو۔ 

–  میرامّن

مُنّی نے کہا’’ گالی کیوں دے گا؟ کیا اس کا راج ہے؟‘‘مگر یہ کہنے کے ساتھ ہی اس کی تنی ہوئی بھویں ڈھیلی پڑ گئیں۔ہلکو کی بات میں جو دِل ہلا دینے والی صداقت تھی، معلوم ہوتا تھا کہ وہ اس کی جانب ٹکٹکی باندھے ہوئے دیکھ رہی تھی۔اُس نے طاق پر سے روپیے اُٹھائے اور لاکر ہلکو کے ہاتھ پر رکھ دیے۔ پھر بولی’’تم اب کھیتی چھوڑ دو۔ مزدوری میں سُکھ سے ایک روٹی تو کھانے کو ملے گی۔ کسی کی دھونس تو نہ رہے گی۔ اچھّی کھیتی ہے، مزدوری کرکے لاؤ وہ بھی اس میں جھونک دو۔ اس پر سے دھونس !‘‘

ہلکو نے روپیے لیے اور اس طرح باہر چلا کہ معلوم ہوتا تھا کہ وہ اپنا کلیجہ نکال کر دینے جا رہا ہے۔اس نے ایک ایک پیسہ کاٹ کر تین روپیے کمبل کے لیے جمع کیے تھے، وہ آج نکلے جا رہے ہیں۔ایک ایک قدم کے  ساتھ اس کا دماغ اپنی ناداری کے بوجھ سے دبا جا رہا تھا۔

پوٗس کی اندھیری رات۔آسمان پر تارے بھی ٹھِٹُھرتے ہوئے معلوم ہو تے تھے۔ ہلکواپنے کھیت کے کنارے اُوکھ کے پتّوں کی ایک چھتری کے نیچے بانس کے کھٹولے پر اپنی پُرانی گاڑھے کی چادر اوڑھے ہوئے کانپ رہا تھا۔ کھٹولے کے نیچے اُس کا ساتھی کُتّا’جبرا‘ پیٹ میں مُنہ ڈالے سردی سے کوٗں کوٗں کر رہا تھا۔ دو میں سے ایک کو بھی نیند نہ آتی تھی۔

ہلکو نے گُھٹنوں کوگردن میں چِمٹاتے ہوئے کہا’’کیوں جبرا، جاڑا لگتا ہے؟کہا تو تھا کہ گھر میں پَیال پر لیٹ رہ۔ تو یہاں کیا لینے آیا تھا؟اب کھا سردی،مَیں کیا کروں؟ جانتا تھا — میں حلوہ پوری کھانے جا رہا ہوں۔ دوڑتے ہوئے آگے چلے آئے ۔اب روؤ اپنی نانی کے نام کو۔‘‘ جبرا نے لیٹے ہوئے دُم ہلائی اور ایک انگڑائی لے کر چُپ ہو گیا۔ شاید وہ یہ سمجھ گیا تھا کہ اس کی کوٗں کوٗں کی آواز سے اس کے مالک کو نیند نہیں آرہی ہے۔

ہلکو نے ہاتھ نکال کر جبرا کی ٹھنڈی پیٹھ سہلاتے ہوئے کہا’’کَل سے میرے ساتھ نہ آنا نہیں تو ٹھنڈے ہو جاؤگے ۔یہ پچَھوا ہَوا نہ جانے کہاں سے برف لیے آرہی ہے۔یہ کھیتی کا مزہ ہے۔ اور ایک ایک بھاگوان ایسے پڑے ہیں جن کے پاس اگر جاڑا جائے تو گرمی سے گھبرا کر بھاگے۔ موٹے گدّے، لحاف، کمبل، مجال ہے کہ جاڑے کا گُزر ہو جائے۔ تقدیر کی خُوبی ہے مزدوری ہم کریں، مزہ دوسرے لوٹیں۔‘‘

جبرا نے اُس کی جانب محبت بھری نگاہوں سے دیکھا۔ ہلکو نے کہا ’’آج اور جاڑا کھا لے۔ کل سے مَیں یہاں پیال بچھا دوں گا۔ اس میں گھُس کر بیٹھنا، جاڑا نہ لگے گا۔‘‘

جبرا نے اگلے پنجے اس کے گھٹنوں پر رکھ دیے اور اس کے مُنہ کے پاس اپنا مُنہ لے گیا۔ ہلکو کو اس کی گرم سانس لگی۔ ہلکو پھر لیٹا اور یہ طے کر لیا کہ چاہے جو کچھ ہو، اب کی سوجاؤں گا لیکن ایک لمحے میں اُس کا کلیجہ کانپنے لگا۔ کبھی اِس کروٹ لیٹا، کبھی اُس کروٹ۔ جاڑا کسی بھوت کی مانند اِس کی چھاتی کو دبائے ہوئے تھا۔

جب کسی طرح نہ رہا گیا تو اس نے جبرا کو دھیرے سے اٹھایا اور اس کے سر کو تھپ تھپا کر اسے اپنی گود میں سُلالیا۔کُتّے کے جسم سے معلوم نہیں کیسی بدبو آرہی تھی، پر اسے اپنی گود سے چمٹاتے ہوئے ایسا سُکھ معلوم ہوتا تھا جو اِدھر مہینوں سے اسے نہ ملا تھا۔جبر ا شاید یہ خیال کر رہا تھا کہ بہشت یہی ہے اور ہلکو کی رُوح اِتنی پاک تھی کہ اُس کو کُتّے سے بالکل نفرت نہ تھی۔ وہ اپنی غریبی سے پریشان تھا جس کی وجہ سے وہ اس حالت کو پہنچ گیا تھا۔ ایسی انوکھی دوستی نے اُس کی روح کے سب دروازے کھول دیے تھے اور اس کا ایک ایک ذرّہ حقیقی روشنی سے منّور ہو گیا تھا۔اسی اثنا میں جبرا نے کسی جانور کی آہٹ پائی۔اس کے مالک کی اس خاص روحانیت نے اس کے دِل میں ایک جدید طاقت پیدا کر دی تھی جو ہوا کے ٹھنڈے جھونکوں کو بھی ناچیز سمجھ رہی تھی۔وہ جھپٹ کر اٹھا اور چھپّر سے باہر آکر بھونکنے لگا۔ ہلکو نے اسے کئی بار پُچکار کر بُلایا پر وہ اس کے پاس نہ آیا ۔ کھیت میں چاروں طرف دوڑ دوڑ کر بھونکتا رہا۔ایک لمحہ کے لیے آبھی جاتا تو فوراً ہی پھر دوڑتا۔فرض کی ادائیگی نے اسے بے چین کر رکھا تھا۔

کرشن چندر (1914-1977)

پودے

دوپہر کو پریم سوسائٹی کا افتتاح تھا۔ حسین ساگر میں جو کلب ہے وہاں دعوت بھی تھی۔ ادیبوں کو کشتیوں میں سوار کر کے کلب میں پہنچایا گیا۔ درحالیکہ ایک راستہ خشکی سے بھی جاتا تھا۔ غالباً موٹربوٹ کی نمائش مقصود تھی۔ کلب کی عمارت جھیل میں تعمیر کی گئی ہے۔ کوئی پچاس کے قریب ملازم ہوں گے۔ آٹھ کورس کا کھانا۔ اس دعوت پر اتنا صرف کیا گیا تھا کہ غالباً پریم چند کو اپنی زندگی میں اتنی رائلٹی نہ ملی ہوگی۔ یورپ میں جب ادیب زندہ ہوتا ہے تو اس کی قدر ہوتی ہے۔ ہندوستان میں مرنے کے بعد اسے پوچھا جاتا ہے۔ چنانچہ آج پریم چند سوسائٹی کا افتتاح تھا۔ قاضی عبدالغفّار تقریر کر رہے تھے۔ اور مرغن کھانے دعوت میں شامل تھے۔ جھیل کے منظر سے ادیب لطف اندوز ہو رہے تھے۔

— کرشن چندر

قمر رئیس (1932-2009)

بہ ظاہر یہ داستانیں زمان و مکان کی قید سے آزاد ہوتی ہیں، لیکن فی الحقیقت ان کے کردار اپنی تہذیبی وضع قطع اور تمدنی حوالوں سے ہندوستان یا پھر ہند ایرانی کلچر کی نمائندگی کرتے ہیں، انشا کی ’رانی کیتکی کی کہانی، تو خالص ہندوستانی رنگ میں ڈوبی ہے، اس کے علاوہ پرانوں سے ماخوذ قصّے جیسے نل د من یا لوک کہانیاں گلِ بکاؤلی یا راجہ گوپی چند میں فطری طور پر ہندوستان کی تہذیب و معاشرت کا گہرا رنگ جھلکتا ہے۔ اس سلسلے میں رجب علی بیگ سرور کی فسانۂ عجائب میں لکھنؤ کی زوال آمادہ تہذیب و معاشرت کی جو مرقع کشی کی گئی ہے وہ اپنی مثال آپ ہے۔ 

—  قمر رئیس

ایک گھنٹہ گُزر گیا۔سردی بڑھنے لگی۔ہلکو اُٹھ بیٹھا اور دونوں گُھٹنوں کو چھاتی سے ملا کر سر کو چھُپالیا۔ پھر بھی سردی کم نہ ہوئی۔ ایسا معلوم ہوتا تھا کہ سارا خون مُنجمد ہو گیاہے۔اس نے اُٹھ کر آسمان کی جانب دیکھا۔ ابھی کتنی رات باقی ہے۔وہ سات ستارے جو قُطب کے گِرد گھومتے ہیں، ابھی اپنا نِصف دَورہ بھی ختم نہیں کرچکے۔ جب وہ اُوپر آجائیں گے تو کہیں سویرا ہوگا۔ ابھی ایک پہر سے زیادہ رات باقی ہے۔

ہلکو کے کھیت سے تھوڑی دور کے فاصلے پر ایک باغ تھا۔ پت جھڑ شروع ہو گئی تھی۔ باغ میں پتّوں کا ڈھیر لگا ہُوا تھا۔ ہلکو نے سو چا چل کر پتّیاں بٹوروٗں اور اُن کو جلا کر خوب تاپوٗں۔ رات کو کوئی پتّیاں بٹورتے دیکھے تو سمجھے گا کہ کوئی بھوت ہے۔کون جانے کوئی جانور ہی چھُپا بیٹھا ہو مگر اب تو بیٹھے نہیں رہا جاتا۔

اس نے پاس کے ارہر کے کھیت میں جا کر کئی پودے اکھاڑے اور اس کا ایک جھاڑو بناکر ہاتھ میں سُلگتا ہوا اُپلا لیے باغ کی طرف چلا ۔جبرا نے اسے جاتے دیکھا تو پاس آیا اور دُم ہلا نے لگا۔

ہلکو نے کہا’’اب تو نہیں رہا جاتا۔جبروٗ چلو، باغ میں پتّیاں بٹور کر تاپیں ۔ٹاٹھے ہو جائیں گے تو پھر آکر سوئیں گے۔ابھی تو رات بہت ہے۔‘‘

جبرا نے کوٗں کوٗں کرتے ہوئے اپنے مالک کی رائے سے موافقت ظاہر کی اور آگے آگے باغ کی جانب چلا۔باغ میں گھٹا ٹوپ اندھیرا چھایا ہوا تھا۔درختوں سے شبنم کی بوندیں ٹَپ ٹَپ ٹپک رہی تھیں۔ یکایک ایک جھونکا مہندی کے پھولوں کی خوشبو لیے ہوئے آیا۔ 

ہلکو نے کہا’’کیسی اچھی مہک آئی جبرا!تمھاری ناک میں بھی کچھ خوشبو آرہی ہے؟‘‘

 جبرا کو کہیں زمین پر ایک ہڈّی پڑی مل گئی تھی وہ اسے چُوس رہاتھا۔ہلکو نے آگ زمین پر رکھ دی اور پتّیاں بٹورنے لگا۔ تھوڑی دیر میں پتّیوں کا ایک ڈھیر لگ گیا ۔ہاتھ ٹھِٹھرتے جا تے تھے۔ ننگے پاوں گَلے جاتے تھے۔ اور وہ پتّیوں کا پہاڑ کھڑا کر رہا تھا۔اسی الاو میں وہ سردی کو جلا کر خاک کردے گا۔

تھوڑی دیر میں الاو جل اٹھا۔اس کی لَو اُوپر والے درخت کی پتّیوں کو چُھو چُھو کر بھاگنے لگی۔ اس متزلزل  روشنی میں باغ کے عالی شان درخت ایسے معلوم ہوتے تھے کہ وہ اس لا انتہا اندھیرے کو اپنی گردن پر سنبھالے ہوں۔ تاریکی کے اِس اتھاہ سمندر میں یہ روشنی ایک ناؤ کے مانند معلوم ہوتی تھی۔

ہلکو الاو کے سامنے بیٹھا ہُوا آگ تاپ رہا تھا۔

 ایک منٹ میں اُس نے اپنی چادر بغل میں دبالی اور دونوں پاؤں پھیلادیے، گویا وہ سردی کو للکار کر کہہ رہا تھا۔’’تیرے جی میں جو آئے وہ کر‘‘۔سردی کی اس بے پایاں طاقت پر فتح پاکر وہ خوشی کو چُھپا نہ سکتا تھا۔

اُس نے جبرا سے کہا’’کیوں جبرے !اب تو ٹھنڈ نہیں لگ رہی؟‘‘

جبرا نے کوٗ ں کوٗں کرکے گویا کہا’’اب کیا ٹھنڈ لگتی ہی رہے گی۔‘‘

’’پہلے یہ تدبیر نہیں سُوجھی۔ نہیں اتنی ٹھنڈ کیوں کھاتے۔‘‘

جبرا نے دُم ہلائی ۔

’’اچھّا آو اِس الاو کو کوٗد کر پار کریں۔دیکھیں کون نکل جاتا ہے۔‘‘

’’اگر جل گئے بچّہ تو مَیں دوا نہ کروں گا۔‘‘

جبرا نے خوف زدہ نگاہوں سے الاو کی جانب دیکھا۔

’’مُنّی سے کَل نہ جَڑ دینا کہ رات خوب ٹھنڈ لگی اور تاپ تاپ کر رات کاٹی۔ ورنہ لڑائی کرے گی۔‘‘

یہ کہتا ہُوا وہ اُچھلا اَور اُس الاو کے اُوپر سے صاف نکل گیا۔پیروں میں ذرا سی لَپَٹ لگی پر وہ کوئی بات نہ تھی۔جبرا الاو کے گِرد گھوم کر اُس کے پس آکھڑا ہُوا۔

ہلکو نے کہا ’’چلو چلو اُس کی سہی نہیں ۔اُوپر سے کود کر آو۔‘‘

وہ پھر کو دا اور الاو کے اس پار آگیا۔

پتّیاں جل چُکی تھیں۔باغیچے میں پھر اندھیرا چھا گیا تھا۔ راکھ کے نیچے ابھی کچھ کچھ آگ باقی تھی جو ہَوا کا جھونکا آنے پر ذرا جاگ اٹھتی تھی پر ایک لمحہ میں پھر آنکھیں بند کر لیتی تھی۔

ہلکونے پھر چادر اوڑھ لی اور گرم راکھ کے پاس بیٹھا ہُو ا گیت گُنگُنانے لگا۔ اُس کے جسم میں گرمی آگئی تھی پرجوٗں جوٗں سردی بڑھتی جاتی تھی اسے سُستی دبائے لیتی تھی۔ 

دفعتاًجبرا زور سے بھونک کر کھیت کی طرف بھاگا ۔

ہلکو کو ایسا معلوم ہُوا کہ جانوروں کا ایک غول اس کے کھیت میں آیا۔شاید نیل گایوں کا جھُنڈ تھا۔ اُن کے کوٗدنے اور دوڑنے کی آوازیں صاف کان میں آرہی تھیں۔ پھر ایسا معلوم ہوا کہ وہ کھیت میں چررہی ہیں۔

اُس نے دل میں کہا’’نہیں، جبرا کے ہوتے ہوئے کوئی جانور کھیت میں نہیں آ سکتا۔نوچ ہی ڈالے۔مجھے وہم ہورہا ہے!اب تو کچھ سُنائی نہیں دیتا۔ مجھے بھی کیسا دھوکا ہُوا!‘‘

اُس نے زور سے آواز لگائی۔’’ جبرا !جبرا!‘‘

جانوروں کے چرنے کی آواز چَرچَر سنائی دینے لگی۔ ہلکو اب اپنے کو فریب نہ دے سکا۔ مگر اُسے اِس وقت اپنی جگہ سے ہلنا زہر معلوم ہوتا تھا۔کیسا گرمایاہُوا مزے سے بیٹھا تھا۔اِس جاڑے پالے میں کھیت میں جانا ،جانوروں کو بھگانا،ان کا تعاقب کرنا اُسے پہاڑ معلوم ہوتاتھا۔ اپنی جگہ سے نہ ہلا ۔بیٹھے بیٹھے جانوروں کو بھگانے کے لیے چلّانے لگا۔

’’لِہو،لِہو،ہو،ہو،ہاہا-‘‘

مگر جبرا پھر بھونک اُٹھا۔اگر جانور بھاگ جاتے تو وہ اب تک لَوٹ آیا ہوتا۔ نہیں بھاگے۔ ابھی تک چر رہے ہیں۔ شاید وہ سب بھی سمجھ رہے ہیں کہ اس سردی میں کون بیدھا ہے جو اُن کے پیچھے دوڑے گا۔ فصل تیار ہے۔ کیسی اچھّی کھیتی تھی۔ سارا گاؤں دیکھ دیکھ کر جلتا تھا۔ اُسے یہ ابھاگے تباہ کیے ڈالتے ہیں!

اب ہلکو سے نہ رہا گیا۔ وہ پکّا ارادہ کر کے اُٹھا اور دو تین قدم چلا۔ پھر یکایک ہَوا کا ایسا ٹھنڈا، چبھنے والا، بچّھو کے ڈنک کا سا جھونکا لگا کہ وہ پھر بُجھتے ہوئے الاؤ کے پاس آبیٹھا اور راکھ کو کُرید کُرید کر اپنے ٹھنڈے جسم کو گرمانے لگا۔

جبرا اپنا گلا پھاڑے ڈالتا تھا، نیل گائیں صفایا کیے ڈالتی تھیں اور ہلکو گرم راکھ کے پاس بے حِس بیٹھا ہُوا۔ افسردگی نے اُسے چاروں طرف سے رسّی کی طرح جکڑ رکھا تھا۔ 

آخر وہیں چادر اوڑھ کر سو گیا۔

سویرے جب اُس کی نیند کھلی تو دیکھا چاروں طرف دھوپ پھیل گئی ہے اور مُنّی کھڑی کہہ رہی ہے۔ ’’کیا آج سوتے ہی رہو گے۔ تم یہاں میٹھی نیند سو رہے ہو اور اُدھر سارا کھیت چَوپٹ ہو گیا۔‘‘ سارے کھیت کا ستیاناس ہو گیا۔ بھَلا کوئی ایسا بھی سوتا ہے۔ تمھارے یہاں مَنڈیا ڈالنے سے کیا ہُوا؟

ہلکو نے بات بنائی ’’مَیں مرتے مرتے بچا،تجھے اپنے کھیت کی پڑی ہے۔پیٹ میں ایسا درد اٹھا تھا کہ میں ہی جانتا ہوں۔‘‘

کلیم الدین احمد (1908/09-1983)

داستان کہانی کی طویل، پیچیدہ، بھاری بھرکم صورت ہے ۔۔۔ لیکن داستان اپنی طوالت، پیچیدگی، بوجھل پن کے باوجود بنیادی طور پر دل بہلانے کی ایک صورت ہے۔ اس میں بھی حقیقت و واقعیت سے کوئی واسطہ نہیں۔ یہاں بھی جانور بولتے چالتے، چلتے پھرتے نظر آتے ہیں، یہاں بھی ناقابلِ یقین واقعات و مناظر ملتے ہیں اور یہاں بھی فوق فطرت ہئیتوں کے کرشموں سے سابقہ پڑتا ہے۔ الغرض داستانوں کی فضا کہانیوں کی فضا سے مختلف نہیں ہوتی اور یہ فضا اجنبی، حیرت انگیز ہوتی ہے۔ اس میں اور انسانی دنیا کی فضا میں صاف فرق نظر آتا ہے۔ 

— کلیم الدین احمد

سرگرمی 5.23

آپ کے اسکول میں مختلف ادبی اور ثقافتی پروگرام منعقد کیے جاتے ہیں۔ ان میں سے کسی ایک کی رپورتاژ لکھیے۔ لکھتے وقت زبان کو پُر کشش اور واقعات کو دلچسپ بنانے کی کوشش کیجیے۔

اسلوب احمد انصاری (2016-1924)

ناول

دوسری اصنافِ ادب کی طرح ناول بھی انسانی تجربے یا تجربات کے اظہار پر اپنی اساس رکھتا ہے۔ افسانے کے برعکس یہ صرف زندگی کی ایک قاش یا تجربے کے Sheds پر منحصر نہیں، بلکہ تجربات کی گوناگونی اور واقعات کی فراوانی اور بہتات سے کام نکالنا جانتا ہے۔ 

—اسلوب احمد انصاری

رشید احمد صدیقی (1892-1977)

ہم سب کی زندگی میں مرحوم کے گھل مل جانے کا راز یہ تھا کہ ان میں بہ ظاہر کوئی بات غیر معمولی نہ تھی۔ وہ کچھ عالم فاضل نہ تھے، ایسے طباع اور ذہین بھی نہ تھے نہ انھیں توڑ جوڑ آتا تھا، نہ خوش پوشاک نہ خوش گفتار، نہ خوش باش نہ رنگین ورعنا۔ وہ معمولی آدمیوں سے بھی کچھ زیادہ معمولی تھے۔ پھر بھی شاید ایسے تھے کہ اب ہم میں ویسا کوئی نہیں اور نہ اب ڈھونڈے سے بھی شاید کوئی ایسا ملے۔

سیاہ فام،چیچک رو، پستہ قد، نحیف الجثہ۔ پہلے پہل کوئی دیکھے تو منھ پھیر لے۔ برت لے تو غلام بن جائے۔ بتا نہیں سکتا کہ ایوب کی خوبیوں نے ان کی بد ہیئتی کو کس درجہ دل کش بنا دیا تھا۔ فطرت اپنی چوک کی بسا اوقات کسی بے دریغ بخشش سے تلافی کرتی ہے۔ ۔۔۔خدا ہی بہتر جانتا ہے کہ اس پیکر حقیر میں دل سوزی وخود سپاری کا کیسا بے کراں و بیش قیمت خزانہ ودیعت تھا۔     — رشید احمد صدیقی

وارث علوی(1928/36-2014)

وقت گزرنے کے ساتھ ناولوں کی دُنیائیں پرانی ہو جاتی ہیں لیکن آپ وقت کے کسی بھی مرحلے میں ہوں جب آپ ناول کی دُنیا میں داخل ہوتے ہیں تو وہ آپ کے لیے زندہ ہو جاتی ہیں اور آپ محسوس کرتے ہیں کہ اس دُنیا میں، اس دُنیا کے لوگوں میں، ان کے دُکھ درد، المیوں اور طربیوں میں زندہ رہنا مجھے اچّھالگا۔ کم از کم آپ یہ محسوس نہیں کرتے کہ چلو اچّھا ہوا تاریخ کا یہ دور بھی ختم ہوا۔ جو کچھ بھی تھا اپنی دھوپ چھاؤں لیے ایک خوشگوار دِن تھا جس میں تاریک واقعات نے بھی جنم لیا۔

 —  وارث علوی

» خاکہ کیسے لکھیں

خاکہ لکھنے سے پہلے آپ کو چند باتوں پر توجہ دینے کی ضرورت ہے۔ پہلی بات تو یہ کہ آپ اہم لوگوں کے لکھے ہوئے بہت سارے خاکے پڑھیے اور غور کیجیے کہ ان لوگوں نے کیسے لکھاہے ، صاحب خاکہ کی سیرت و صورت کے کِن کِن پہلوؤں کوکس طرح پیش کیا ہے، آپ کو کون سا خاکہ زیادہ پسند آیا ہے اور کس خاکہ نگار کی طرزِ نگارش آپ کو اچھی لگی ہے۔

 پہلے سیدھا سادہ خاکہ لکھیے، مثلاً جس آدمی کا آپ خاکہ لکھ رہے ہیں؛ اس کا حلیہ بیان کیجیے ، پھر اس کی بات چیت کا انداز بیان ، اس کی کوئی مخصوص یا دلچسپ عادت ہو تو اس کا ذکر کیجیے، وغیرہ۔ اس کے بعد اس کی سیرت یا شخصیت بیان کیجیے۔

اب آپ نے جو خاکہ لکھا ہے اسے دوستوں کو سنائیے ،وہ جو مشورہ دیں اس کے مطابق خاکے میں ردّوبدل کیجیے اور پھراسے اپنے کسی استاد کو دکھائیے۔

» روزنامچہ/ڈائری

ڈائری کواردو میں روزنامچہ کہتے ہیں۔ ڈائری انتہائی ذاتی نوعیت کی تحریر ہوتی ہے۔ ڈائری نگار کی دلچسپی، اس کے خیالات، تصورات اور شخصیت کا عکس اس کے ہر صفحے پر محسوس کیا جا سکتا ہے۔ ڈائری ہر آدمی لکھ سکتا ہے۔ ڈائری نگار کو کسی موضوع و مسئلے پر گھنٹوں غوروفکر کی ضرورت نہیں ہوتی۔ لیکن ڈائری اسی وقت ڈائری کہلائے گی جب کہ ڈائری لکھنے والے کے تجربے میں کچھ ایسی باتیں بھی ہوں جو دوسروں کے لیے دلچسپ ہوں اور ان سے زندگی کی تفہیم میں مدد ملے۔

ڈائری کی دو قسمیں ہیں۔ ایک ذاتی اور دوسری محاضراتی۔ذاتی سے مراد وہ ڈائری ہے جس کا موضوع ابتدا سے انتہا تک لکھنے والے کی اپنی شخصیت ہوتی ہے۔ یہ ضرور ہے کہ وہ اپنی ذات سے وابستہ دیگر مظاہر اور اشخاص کا ذکر بھی کرتا ہے لیکن دوسری چیزوں کے مقابلے میں اس کی توجہ اپنی ذات پر زیادہ ہوتی ہے۔

محاضراتی سے مراد وہ ڈائری ہے جس میں مصنف اپنی ذات پر توجہ کم دیتا ہے اور حالاتِ حاضرہ اور دیگر قسم کی سرگرمیوں پر اس کی نگاہ زیادہ ہوتی ہے۔ خواجہ حسن نظامی کی یاد داشتیں یا روزنامچے ا س کی عمدہ مثالیں ہیں جن میں انھوں نے اپنی ذات سے زیادہ سیاسی، سماجی اور تہذیبی سرگرمیوں کو اپنی ڈائری کا موضوع بنایاہے۔

سرگرمی 5.28

 اپنے کسی سفر سے متعلق اہم اور دلچسپ معلومات، واقعات اور تجربات کو سفرنامے کی شکل میں پیش کیجیے۔

 

سرگرمی  5.29

اپنے شب وروز کے واقعات اور تجربات کو ڈائری میں لکھیے۔ ایک ہفتہ کے اندراجات کو اپنے استاد اور دوستوں کو دکھایئے اور اُن کی رائے معلوم کیجیے۔

روزنامچہ/ ڈائری کیسے لکھیں؟

ڈائری یا روزنامچہ کوئی بھی لکھ سکتا ہے، شرط یہ ہے کہ اس میں دوسروں کے لیے دلچسپی کا سامان ہو۔ ڈائری لکھنے والا روزانہ کے اہم مشاغل، واقعات، تجربات یا محسوسات تحریر کرتا ہے۔ اس ضمن میں یہ خیال رکھنا ضروری ہوتا ہے کہ عام قسم کی باتیں یا روزمرہ کے مشاغل کا ذکر اس میں نہیں کیا جاتا ۔ اس میں وہ باتیں تحریر کی جاتی ہیں جومعمول سے ہٹ کر ہوں۔ ڈائری نگار اپنے گھریلو حالات، گردوپیش کے اہم واقعات، کسی اہم علاقائی، قومی یا بین الاقوامی واقعے یا حادثے سے متعلق تفصیل اور اپنے ذاتی تاثرات بھی بیان کر سکتا ہے۔ کوئی شاعر یا ادیب اپنے تخلیقی تجربے کے بارے میں بھی ڈائری لکھ سکتا ہے۔ ڈائری میں سیاسی، سماجی اور ثقافتی اہمیت کے واقعات بھی بیان کیے جاسکتے ہیں۔ غرض اس کے لیے موضوعات کی کوئی قید نہیں ہے۔ یہ ضرور ہے کہ خارجی واقعات میں داخلی محسوسات و تاثرات کی آمیزش ڈائری کو اہم بنا دیتی ہے۔ ڈائری لکھنے میں مصنف کی اپنی پسند و نا پسند کو کلیدی حیثیت حاصل ہوتی ہے۔ ڈائری نگار جس پیشے سے تعلق رکھتا ہے اس کے موضوعات بھی زیادہ تر اسی سے متعلق ہوتے ہیں۔ مثلا ً  شعر و ادب سے تعلق رکھنے والے افراد کی ڈائری میں ادبی مباحث یا اس سے متعلق دیگر باتوں کا ذکر زیادہ ملتا ہے۔ 

ڈائری میں درج تفصیلات سے حوالے اور سند کا کام بھی لیا جاسکتا ہے۔ مثال کے طور پر غالب نے 1857  کے حالات فارسی میں ’’دستنبو‘‘ نامی روزنامچے میں لکھے۔ اس سے پتا چلتا ہے کہ اس دور میں دہلی اور دہلی والوں پر کیا بیتی۔روزنامچہ نگاری کے لیے صداقت، حقیقت بیانی، معروضیت، اختصار اور دل کش اسلوب بیان ضروری ہے۔ آپ ڈائری لکھنے کا آغاز  اپنے اسکول کے کسی پروگرام سے متعلق تفصیلات سے کر سکتے ہیں۔ مثال کے طور پر آپ کے اسکول میں یوم آزادی یا یوم جمہوریہ یا یومِ تعلیم یا یومِ اساتذہ کا پروگرام منعقد ہوا۔ وہ پروگرام آپ کو کیسا لگا، اس کی خاص باتیں کیا تھیں، آپ نے اس میں کیا کردار ادا کیا، آپ کے پرنسپل نے اس میں کیا پیغام دیا وغیرہ۔ یہ تمام باتیں اپنی ڈائری میں لکھیے۔ ڈائری لکھنے کے بعد اس پر نظرثانی کیجیے اور پھر اپنے کسی دوست یا استاد کو دکھایئے۔

سرگرمی 5.30  

خط/مکتوب میں آپ کن خصوصیات کو ضروری سمجھتے ہیں۔ ان کی روشنی میں اپنے دوست کے نام خط کا ایک نمونہ پیش کیجیے۔

غور کرنے کی بات 

• ادبی تحریر کی تشکیل میں تخیّل، احساس، جذبات کی نمائندگی، الفاظ کا انتخاب اور انھیں برتنے کا سلیقہ اور صنائع بدائع وغیرہ کی بنیادی اہمیت ہے۔

• تخلیقی اظہار کی دو صورتیں ہیں، نثر اور شعر۔ نثر میں بھی ایک ہے تخلیقی نثر اور دوسری غیرتخلیقی نثر۔ 

• تخلیقی اظہار کے بہت سے وسیلے ہیں جیسے ناول ، افسانہ، غزل وغیرہ ۔ ان کے تقاضوں کے موافق ہی فن کار زبان، اسلوب یا فنی تدابیر کا استعمال کرتا ہے۔ کسی بھی ادبی اظہار میں اثر آفرینی کی قدر بنیادی حیثیت رکھتی ہے۔

• شاعری ایک لطیف فن اور انسانی جذبات کا نہایت خوب صورت اظہار ہے۔ شاعری کے لیے عام طور پر تخیّل، مشاہدے، مطالعے، وزن، قافیے اور ذخیرۂ الفاظ کی ضرورت ہوتی ہے۔

• غزل میں قافیے کی خاص اہمیت ہے۔ غزل میں تخیّل تخلیق کی جان ہوتا ہے۔ لفظی آہنگ، او زان و بحر وغیرہ سے واقفیت ضروری ہے۔

• گیت کا موسیقی سے خاص رشتہ ہے۔ نغمگی گیت کا خاص وصف ہے۔ 

• افسانہ ایک بیانیہ تخلیق ہے جس میں ایک یا ایک سے زائد کرداروں کے حوالے سے کوئی واقعہ یا واقعات بیان کیے جاتے ہیں۔

• افسانے میں چار اجزا کی خاص اہمیت ہے۔ پلاٹ، کردار، اطراف و ماحول اور اسلوب -پلاٹ کی عمارت کسی کہانی کی بنیاد پر قائم ہوتی ہے۔ 

• غیرافسانوی نثر اپنی تخلیقیت کی وجہ سے ایک الگ تاثر فراہم کرتی ہے۔ رپورتاژ، مضمون، انشائیہ، خاکہ، خودنوشت (آپ بیتی)، روزنامچہ (ڈائری)،مکتوب نگاری، غیر افسانوی نثر کی مختلف اصناف ہیں۔

مشق Exercise