ڈراما
ڈراما ادب کی ایک اہم صنف ہے۔اس کی مختلف تعریفیں کی گئی ہیں مگر اس کی ایک سادہ سی تعریف یہ ہے کہ ’’ڈراما کسی قصّے یا واقعے کو ادا کاروں کے ذریعے ،ناظرین کے روبرو عملاً پیش کرنے کا نام ہے۔‘‘ اس سے واضح ہوا کہ ڈراما ناول یا افسانے کی طرح صرف لکھنے یا پڑھے جانے تک محدود نہیں ہوتا اس کے لیے پیش کش ضروری ہے۔یہ مکمل تب ہوتا ہے جب اسے عملاً اسٹیج پر پیش کر دیا جائے۔ناول اور افسانے کی طرح ڈرامے میں بھی پلاٹ،کردار، مکالمہ اور کوئی نہ کوئی مرکزی خیال ہوتا ہے۔
ڈرامے کو دو حصّوں میں تقسیم کیا گیا ہے۔1۔المیہ2(Tragedy)۔طربیہ(Comedy)۔ ان دونوں عناصر یعنی الم و طرب کے امتزاج سے بھی ڈرامے لکھے گئے ہیں۔
اردو ڈرامے کی ابتدا 1844سے1855 کے دوران واجد علی شاہ کی ڈرامائی پیش کش اور امانت ومداری لال کی اندر سبھاؤں سے لکھنؤ میں ہوئی۔مگر اسے عروج حاصل ہوا پارسی تھیٹرکے ڈراموں سے۔ جس زمانے میں لکھنؤ اور اس کے گرِد ونواح میں اندر سبھاؤں کی دھوم مچی ہوئی تھی،اسی زمانے میں ممبئی میں مغربی اثرات کے تحت ایک نئے قسم کا ڈراما وجود میں آرہا تھا جسے پارسی تھیٹر کا نام دیا گیا۔
پارسی تھیٹر کے ڈرامے ابتدائی اردو ڈراموں کی طرح منظوم ہوتے تھے۔ ان میں رقص، موسیقی اور گانوں کا استعمال بھی ویسا ہی تھامگر پیش کش کا انداز ابتدائی ڈراموں سے مختلف تھا۔اب اسٹیج کی پچھلی دیوار پرسینریوں والے پردے لگائے جانے لگے۔ہر ذیلی سین پر بھی پردہ گرنے اور اٹھنے لگا۔ اسٹیج پر طرح طرح کی مشینوں کا استعمال ہونے لگا۔ مکالموں میں دھیرے دھیرے نثر کا استعمال بڑھا،گانے کم ہو گئے۔فوق فطری واقعات اور کرداروں کے بجائے روز مرّہ زندگی کے واقعات اورمسائل ڈرامے کا موضوع بننے لگے۔
ابراہیم یوسفؔ
(1925 — 2001)
ابراہیم یوسف کی پیدائش بھوپال میں ہوئی۔ انھوں نے اُردو اور سیاسیات میں وکرم یونیورسٹی سے ایم اے اور علی گڑھ مسلم یونیورسٹی سے بی ایڈ کیا۔ ہائر سیکنڈری اسکول بھوپال کے پرنسپل کے عہدے سے سبک دوش ہوئے ۔
’سو کھے درخت‘ ’طنزیہ ڈرامے ‘، ’دھوئیں کے آنچل‘ اور’پانچ چھے ڈرامے ‘ان کے ڈراموں کے مجموعے ہیں۔ انھوں نے ایک قدیم ڈراما ’’ صولتِ عالم گیری‘‘ بھی ترتیب دیا ہے۔ ان کا ایک ناول ’’ آبلے اور منزلیں‘‘ بھی شائع ہوچکا ہے۔ ادبی خدمات کے اعتراف میں ان کو اقبال سمّان، مدھیہ پردیش اردو اکیڈمی کا میر تقی میرایورڈ اور غالب ایورڈ سے نوازا گیا۔
’ہندی ادب کی تاریخ‘ اور ’اندرسبھا اور اندرسبھائیں‘ بھی ابراہیم یوسف کی مشہور تصانیف ہیں۔
مرزاغالبؔ
کردار:
اُمراؤ بیگم ………… مرزاغالبؔ کی بیوی
کلّو .………… مرزاغالبؔ کانوکر
وفادار ………… مرزاغالبؔ کی نوکرانی
کلیان ………… مرزاغالبؔ کا ملازم
(دوگورے اور ایک ہندوستانی، دوچار پڑوسی)
مرزاغالبؔ دالان میں ایک گاؤ تکیے سے ٹیک لگا ئے بیٹھے ہیں۔ سامنے پیچوان رکھا ہے۔ چہرے سے پریشانی اور فکرمندی ظاہر ہورہی ہے ۔ کبھی کبھی پیچوان سے کش لیتے ہیں۔ کچھ دیر بعد اُمراؤ بیگم دالان میں آتی ہیں۔ ان کے چہرے پر پریشانی کے ساتھ غصّہ بھی ہے۔ مرزاغالبؔ نظر اٹھا کراُمراؤ بیگم کو دیکھتے ہیں۔
اُمراؤ بیگم : (جھنجھلاہٹ سے) ان صاحب زادوں نے تو ناک میں دم کر رکھا ہے۔ ایسی ضد کر تے ہیں کہ ۔۔۔۔۔۔
مرزاغالبؔ : (بات کاٹ کر) کیا مقدمہ درپیش ہے بیگم جویوں آپے سے باہر ہوئی جارہی ہیں؟
اُمراؤ بیگم : کیا مقدمہ درپیش ہوگا، بس بہ ضد ہیں کہ میٹھا پانی پئیں گے کل بارش کے وقت ایک گھڑا پانی جمع کیا تھا سووہ آپ کے لیے رکھ چھوڑا ہے ۔
مرزاغالبؔ : (مُسکرا کر) بیگم! وہ بارش ہی کا تو پانی ہے، آبِ زمزم تو نہیں۔
اُمراؤ بیگم : بس آپ کی انھیں ناز برداریوں نے تو انھیں ضدّی بنا دیا ہے۔
مرزاغالبؔ : اب وہ ہم سے ضد نہیں کریں گے تو اور کس سے کریں گے؟
اُمراؤ بیگم : لیکن ضد کی بھی ایک حد ہوتی ہے ۔
مرزاغالبؔ : (بات ٹالنے کے انداز میں) ارے ہاں بیگم! نواب ضیاالدین احمد خاں نے آپ کے وظیفے کے روپے بھیجے کہ نہیں؟
اُمراؤ بیگم : جی ابھی تک نہیں ۔
مرزاغالبؔ : ویسے تو وہ ہمیشہ روپے مقررّہ وقت پر بھیجتے ہیں۔
اُمراؤ بیگم : جی ہاں اس بار جانے کیوں تاخیر ہوگئی ۔
مرزاغالبؔ : وہ خود مجبور ہوں گے۔ شہر تو دوزخ کا نمونہ بنا ہوا ہے۔ اگر ایک دوروز میں روپیہ نہیں آیا تو بس اللہ ہی اللہ ہے۔
اُمراؤ بیگم : توشہ خانے میں بھی اب کچھ نہیں ہے۔ شام کی فکر الگ کھائے جارہی ہے۔
مرزاغالبؔ : (مُسکراکر) بیگم! آپ تو نفلی روزے ہی شروع کردیں گی مگر میرا کیا ہوگا اور پھر صاحب زادے ہیں، ابھی تو اُن پر روز ے بھی فرض نہیں ہیں۔
اُمراؤ بیگم : خدا کے لیے اس وقت تو تمسخر نہ کیجیے ۔
مرزاغالبؔ : واللہ ، بیگم سچ کہتا ہوں ۔ خیر مجھے بھی جانے دیجیے ، آخر گھر میں کلّو ہے، کلیان ہے، نیاز علی اور ایاز ہیں اور وفادار ہیں، یہ کس پاداش میں بھوکے رہیں گے؟
اُمراؤ بیگم : اب یہ لوگ بچیّ نہیں کہ حالات نہ دیکھ رہے ہوں۔ (کلّو آتا ہے ، امراؤ بیگم اسے دیکھ کر) یہ لیجیے وہ کلّو آگیا ۔
مرزاغالبؔ : (کلّوکی طرف دیکھ کر) کیوں میاں کلّو! کیا خبر لائے ، شہر کا کیا حال ہے؟
کلّو : دھائیں دھائیں گولیاں چل رہی ہیں سرکار۔
مرزاغالبؔ : کچھ مرزا یوسف کی بھی خبر پائی؟
کلّو : سرکار! شہر میں تو ایک قیامتِ صغریٰ بپا ہے۔ میں نے بہت کوشش کی مگر مہاراجہ پٹیا لہ کے آدمیوں نے دیوار کے دوسری جانب جانے ہی نہیں دیا۔
مرزاغالبؔ : مجھے اس کی فکر کھائے جارہی ہے۔
اُمراؤ بیگم : جانے بے چار ے کس حال میں ہیں۔
مرزاغالبؔ : (گھبرا کر) میاں کلّو! جاکر خبرلاؤ، آخر کیا ماجرا ہے؟
کلّو : سرکار! کچھ گورے دیوار پھاند کر اندر گھس آئے ہیں۔
مرزاغالبؔ : لاحول ولاقوۃ اِلا ّباللہ (امراؤبیگم سے) آپ اندر جایئے، جانے کم بخت کیا فساد پیدا کریں۔ (مرزاغالبؔ برابر دالان میں ٹہلتے رہتے ہیں۔ کچھ دیر بعد دوتین گورے اور دوتین ہندوستانی سپاہی اندر آتے ہیں ، ایک گورا مرزاغالبؔ کو دیکھ کر)
پہلا گورا : وِل! تم ہی مرزا نوشہ ہے؟
مرزاغالبؔ : ہاں میں ہی مرزانوشہ ہوں۔
پہلا گورا : تم ہی بادشاہ کی غزلیں بناتا تھا؟
مرزاغالبؔ : ہاں، میں ہی یہ مزدوری کرتا تھا۔
دوسرا گورا : مزدوری کرتا تھا یا اس کا نوکر تھا؟
مرزاغالبؔ : اسے مزدوری سمجھو یا نوکری مگر اس فتنۂ آشوب میں، میں نے کسی مصلحت میں دخل نہیں دیا۔
دوسرا گورا : ہم کیسے جانیں کہ تم بادشاہِ دہلی کا وفادار نہیں؟
مرزاغالبؔ : نہ میں کالوں کے زمانے میں کہیں گیااور نہ گوروں کے زمانے میں گھر سے باہر نکلا۔ کرنل برون صاحب کے زبانی حکم پر میری یہاں اقامت کا مدار ہے۔
پہلا گورا : پھر تم کو کرنل برون کے سامنے اپنی صفائی دینا ہوگی۔
(مرزاغالبؔ کچھ سوچتے ہوئے) کیا سوچتا ہے؟ تمھیں ضرور کرنل برون کے سامنے چلنا ہوگا۔
مرزا غالبؔ : خیر بھائی! چلتا ہوں۔ (آگے بڑھتے ہیں) چلیے۔
(کلیان داخل ہوتا ہے۔ سرپر ایک بڑی سی چوٹی ہے اور دھوتی باندھے ہے ۔بغل میں کپڑے میں لپٹی ایک بوتل اورکاندھے پر ایک وزنی تھیلا ہے۔ تھیلا زمین پر رکھ کر کپڑے میں لپٹی بوتل اُس پر رکھتا ہے اور امراؤ بیگم کودیکھ کر آنکھوں میں آنسو بھر کر)
کلیان : بیگم صاحبہ! ابھی میں نے دیکھا کہ سرکار کچھ گورے سپاہیوں کے ساتھ…(آواز نڈھال ہوجاتی ہے۔ وہ خاموش ہوکر آستین سے آنسو پونچھتا ہے، امراؤ بیگم اس کی طرف دیکھ کر پریشانی کے لہجے میں)
اُمراؤ بیگم : بھئی تم لوگ مجھے دیوانہ بنا کردم لوگے (چند سیکنڈ خاموش رہ کر)کدھر جارہے تھے وہ لوگ؟
کلیان : حاجی قطب الدین سوداگر کے مکان کی طرف۔ وہیں کچھ گوروں کا کیمپ ہے۔
(اُمراؤ بیگم خاموش رہتی ہیں۔ تھوڑی دیر بعد مرزا غالبؔ چہر ے پر پریشانی مگر ہونٹوں پر مُسکراہٹ لیے داخل ہوتے ہیں ۔ مرزاؔ کو دیکھ امراؤبیگم کی آنکھوں میں آنسو آجا تے ہیں اور بے اختیار زبان سے نکلتا ہے۔)
اُمراؤ بیگم : میں پہلے شکرانے کا دوگانہ اداکرلوں، پھر حاضر ہوتی ہوں۔
مرزاغالبؔ : دوگانہ بھی اداکرلیجیے گا، اب سُنیے جب میں کرنل برون کے سامنے پیش ہوا تو اس نے کہا’’ ول تم مسلمان ہے۔‘‘ میں نے کہا آدھا ۔ وہ مسکرایااور با عزّت رہائی کا حکم دے دیا ۔ اب فرمائیے پورے مسلمان کو یہ سعادت نصیب ہوتی ؟‘‘
اُمراؤ بیگم : (مُسکر اکر) آپ بھی کیسی باتیں کرتے ہیں۔ (امراؤ بیگم کچھ دیر خاموش رہ کر)۔ کلیان خبر لایا ہے کہ میاں کالے صاحب کی حویلی کو گوروں نے ڈھا ڈالا۔
مرزاغالبؔ : (ٹھنڈی سانس بھرکر) ایک میاں کالے صاحب کی حویلی کا کیا رونا بیگم، سارا شہر کھنڈرہے۔ اگر کوئی سیّا ح آئے تو دریبہ، چاوڑی، اجمیری دروازے کا بازار، اردو بازار، بُلاقی بیگم کا کوچہ، خان دروازے کا بازار، گنتا پھرے اور کہے کہ اسی شہر کودلّی والے ’’ عالم میں انتخاب ‘‘ کہتے تھے۔
اُمراؤ بیگم : مگر میاں کالے کی حویلی میں میں نے اپنے زیورات اور قمیتی پوشاکیں منتقل کردی تھیں۔
مرزاغالبؔ : (امراؤ بیگم کا چہر ہ غور سے دیکھ کر پریشانی کے لہجے میں) واللہ بیگم! آپ نے اس امرکی ہمیں اطلاع تک نہیں دی۔
اُمراؤ بیگم : میں نے سوچا کہ میاں کالے صاحب مذہبی آدمی ہیں، نہ ان سے باز پرس ہوگی اور نہ کسی قسم کی داروگیر۔
(مرزاغالبؔ پریشان اور فکرمند بیٹھ جاتے ہیں۔ امراؤبیگم اور وفادار آہستہ آہستہ چلی جاتی ہیں۔ کچھ دیر بعد کلّو آتا ہے)
مرزاغالبؔ : (بے چینی سے) مرزایوسف کی کچھ خبر لائے؟
کلّو : ماما اور ملازم کو پریشان کررکھا ہے ۔ جب گولیوں کی آواز سنتے ہیں گھر سے باہر تشریف لے آتے ہیں۔ کل رات کچھ گورے گھر میں گُھس آئے تھے۔
مرزاغالبؔ : خدا اس دیوانے کے حال پر رحم فرمائے۔ کوئی ناخوشگوار واقعہ تو پیش نہیں آیا؟
کلّو : ماما اور ملازم کے گڑگڑانے پر اور تو کچھ نہیں کیا مگر کچھ سامان ضرور اُٹھا لے گئے۔
مرزاغالبؔ : اس لوٹ کھسوٹ میں نہ بڑا بھائی بچا نہ چھوٹا۔
(مرزایوسف کا نوکر گھبرایا ہوا آتا ہے ۔ چہر ے سے پریشانی اور وحشت طاری ہورہی ہے مرزاغالبؔ کو دیکھ کر)
نوکر : حضور، سرکار ایک گورے کی گولی سے…
مرزاغالبؔ : (ٹھنڈی سانس بھر کر) شہید ہوگئے۔ اِناّللہ واِناّ الیہ راجعون ( کچھ دیر بالکل خاموش کھڑے رہتے ہیں پھر نوکر کی طرف دیکھ کر)……میاں! یہ واقعہ کیوں کر ہوا؟
نوکر : چند گورے گلی میں گھس آئے تھے۔ دھنا دھن گولیاں چلارہے تھے۔ سرکار باہر جانے لگے۔ میں نے ہر چند روکا مگر مجھ بڈھے سے بے قابو ہوکر باہر نکل ہی گئے اور پھر ان کم بخت گوروں نے یہ نہ سوچا کہ دیوانے آدمی ہیں۔ دھائیں دھائیں گولیاں چلادیں۔
(مرزاغالبؔ پریشانی کے عالم میں دالان میں ٹہلنے لگتے ہیں۔ کلّو کچھ دیر بعد)۔
کلّو : میں جاکر کچھ محلے والوں کو جمع کرتا ہوں کہ۔۔۔۔۔۔
مرزاغالبؔ : مگر آئے گا کون۔ واقعہ سخت ہے اورجان عزیز۔
(ایک سپاہی اور چند لوگ آتے ہیں)
پہلا شخص : مرزاغالبؔ ! ہمیں افسوس ہے کہ …خدا اس شہید کو جنت الفردوس عطا فرمائے۔
مرزاغالبؔ : میاں! آپ حضرات تشریف لائے۔ میری عزّت بڑھائی، یہ بہت ہے مگر۔۔۔۔۔۔
دوسراشخص : آپ فکر نہ فرمائیں، ہم سے جو کچھ بن سکے گا، حتی المقدور اس میں کوتا ہی نہ کریں گے۔
مرزاغالبؔ : خداآپ کو اس کا اجر دے گا۔ مرزایوسف تو دیوانہ تھا مگر میں تو ہو ش وحواس میں ہوں۔ یہ کیوں کر ممکن ہے کہ میں آپ کے ساتھ نہ چلوں۔
دوسراشخص : آپ کا گھر سے نکلنا مصلحت ِوقت نہیں ہے۔ آپ تشریف رکھیے اور ہمیں اجازت دیجیے۔
مرزاغالبؔ : مگر یہاں اس وقت غسّال اور گورکن کا کہاں سے انتظام ہوگا۔
پہلا شخص : یہ فرائض تو ہم خودہی انجام دے لیں گے، مگر بزاز کا اس وقت ملنا واقعی امرِمحال ہے۔
مرزاغالبؔ : (کلّو کی طرف دیکھ کر) میاں کلّو! بیگم سے کہو گھر سے سفید چادریں دے دیں۔
(کلوّ گھر کے اندرچلا جاتا ہے۔ مرزاغالبؔ سب کی طرف دیکھ کر ) واللہ حضرات! آپ مجھ پروہ احسانِ عظیم فرما رہے ہیں کہ تازندگی میں فراموش نہ کرسکوں گا۔
پہلا شخص : حضرت آپ کیا فرمارہے ہیں۔کیا ہم آپ کے مرتبے سے واقف نہیں اور پھر حق ہمسائگی بھی کوئی چیز ہے۔ ہم آپ کے ان احسانوں کوکیوں کر فراموش کرسکتے ہیں جو آپ ہم پر فرماتے رہے ہیں۔
(کلّو چادریں لے کر آتا ہے۔ مرزاغالبؔ چادروں کو دیکھ کر۔)
مرزا غالبؔ : مرزایوسف سے کہنا کہ تیرا بھی کوئی بھائی تھا۔ جب موت آئے گی تو تیرے پاس آرہوں گا۔ اپنی بے کسی اور مجبوری کی تجھ سے داد چاہوں گا۔ (سب کی طرف دیکھ کر)
حضرات خدا حافظ۔
(سب لوگ آہستہ آہستہ گردن جھکائے چلے جاتے ہیں ۔ مرزاغالبؔ تنہا کھڑے رہ جاتے ہیں ۔ کچھ دیر بعد امراؤبیگم آہستہ آہستہ آتی ہیں۔ ان کی آنکھوں میں آنسو ہیں۔ مرزاغالبؔ اُنھیں دیکھ کر)آپ کی آنکھوں میں آنسو!بیگم نہ یہ شکر کا مقام نہ شکایت کا۔ غالبؔ رحمتہ اللہ علیہ کا یہ شعر کس قدر حسبِ حال ہے۔
ہوچکیں غالبؔ بلائیں سب تمام
ایک مرگِ ناگہانی اور ہے
(گاؤ تکیے سے لگ کر بیٹھ جاتے ہیں اور خلا، میں گھورتے ہوئے)
’’ اے مرگِ ناگہاں تجھے کیا انتظار ہے‘‘۔
(پردہ)
(ابراہیم یوسفؔ)
مشق
سوالات:
1. کلّونے شہر کا کیاحال بیان کیا؟
2. نوکر نے مرزا یوسف کے حالات کس طرح بیان کیے؟
3. دلّی کو عالم میں انتخاب کہنے پر غالب نے مذاق کیوں اڑایا تھا؟
4. مرزایوسف کی موت پرغالب کو کن کن پریشانیوں کا سامناکرنا پڑا؟