انسانی جغرافیہ

نوعیت اور دائرہ کار

آپ درسی کتاب ’طبیعی جغرافیہ کے مبادیات‘ (این سی ای آر ٹی2006)کے پہلے باب میں آپ ایک مضمون کی حیثیت سے جغرافیہ کا مطالعہ کر چکے ہیں۔کیا آپ کو اس کا کچھ مواد یاد ہے؟ اس باب میں آپ کو مجموعی طور پر جغرافیہ کی نوعیت سے متعارف کرایا گیا تھا۔آپ جغرافیہ کی اہم شاخوں سے بھی واقف ہو چکے ہیں۔ اگر آپ اس باب کو دوبارہ پڑھیں گے تو آپ انسانی جغرافیہ کے تعلق کو اصل مضمون یعنی جغرافیہ سے بخوبی سمجھ پائیں گے۔جیسا کہ آپ جانتے ہیں مطالعاتی حیثیت سے جغرافیہ ایک تکمیلی،تجرباتی اورعملی مضمون ہے۔اس طرح جغرافیہ کی رسائی وسیع ہے اور ہر وہ واقعہ یا مظہرجس میں تغیر زمان و مکان کی حیثیت سے ہوتا ہے اس کا  جغرافیائی مطالعہ کیا جا سکتا ہے۔آپ سطح زمین کو کس طرح دیکھتے ہیں؟ کیا آپ محسوس کرتے ہیں کہ زمین کے دو اجزائے ترکیبی ہیں:فطرت (طبیعی ماحول) اور زندگی کی شکلیں جس میں انسان بھی شامل ہے؟ اپنے گردوپیش کی طبیعی اور انسانی اجزاکی فہرست تیار کیجیے۔طبیعی جغرافیہ طبیعی ماحول اور انسانی جغرافیہ کا مطالعہ کرتا ہے اور’’انسانی جغرافیہ  طبیعی؍فطری اور انسانی دنیا کے درمیان ربط،انسانی مظاہر کی مکانی تقسیم اور یہ کیسے وجود میں آئے اور دنیا کے مختلف حصوں کے درمیان سماجی و معاشی تفریق کا مطالعہ کرتا ہے۔‘‘1

آپ اس حقیقت سے واقف ہیں کہ ایک مضمون کی حیثیت سے جغرافیہ کا بنیادی تعلق زمین کو بنی نوع انسان کے لیے گھر کی حیثیت سے سمجھنا ہے اور ان تمام عناصر کا مطالعہ کرنا ہے جن پر انسانی بقا کا دارومدار ہے۔ اس طرح مطالعے کا سارا زور فطرت؍قدرت اور بنی نوع انسان پر ہے۔آپ محسوس کریں گے کہ جغرافیہ ثنویت (dualism) کا شکار ہو گیا اور ایک لمبی بحث اس بات پر چھڑ گئی کہ جغرافیہ کو ایک مضمون کی حیثیت سے قانون ساز؍اصول ساز(کلیاتی یعنی nomothetic) ہونا چاہیے یا بیانیہ(نوعی مطالعہ یعنی idiographic) ہونا چاہیے۔کیا اس کے مواد مضمون کو منظم کرنا چاہیے اور اس کے مطالعے کا طریقہ علاقائی (regional) ہویا نظامی (systematic)؟ آیا جغرافیائی مظاہر کی تشریح نظریاتی طور پر کی جانی چاہیے یا تاریخی ادارہ جاتی رسائی کا استعمال کیا جانا چاہیے۔ یہ ذہنی مشق کے مسائل رہے ہیں لیکن آخر میں آپ اس بات کی تائید کریں گے کہ طبیعی اور انسانی کے مابین تضاد کوئی بہت زیادہ قابل اعتنا نہیں ہے کیوں کہ فطرت اور بنی نوع انسان لاینفک عناصر ہیں اور انھیں مجموعی طور پر دیکھنا چاہیے۔قابل توجہ امر یہ ہے کہ طبیعی اور انسانی مظاہردونوں کے بیان میں استعارے کے طور پر اعضائے انسانی کی علامات کا استعمال کیا جاتا ہے۔

ہم اکثر ’روئے‘زمین،طوفان کی ’آنکھ‘، ندی کا’دہانہ‘، گلیشیئر کی ’ناک‘،  خاکنائے کی ’گردن‘  مٹی کا ’نیم رخ‘ کی بات کرتے ہیں۔ اسی طرح علاقے، گاؤں،قصبات کو عضویہ (organism) کے طور پر بیان کیا جاتا ہے۔سڑکوں، ریلوں اورآبی راستوں کے جال کو اکثر ’شریانی گردش‘(arteries of circulation) کہا جاتا ہے۔کیا آپ اس طرح کی اصطلاحات اور تعبیروں کو اپنی زبان میں تلاش کر سکتے ہیں؟ اب بنیادی سوال یہ پیدا ہوتا ہے کہ کیا ہم فطرت اور انسان کو الگ کر سکتے ہیں جب کہ وہ اندرونی طور پر ایک دوسرے میں گندھے ہوئے ہیں؟