کیوبا ریاست ہائے متحدہ امریکا (USA) کے ساحل سے ملا ہوا، کمیونسٹوں کے زیر حکومت ایک جزیرہ ہے۔ اپریل1961 میں یونین آف سوویت ریپبلک سوشلسٹ (USSR) کے حکمرانوں کو یہ خطرہ تھا کہ USA کیوبا پر حملہ کرکے صدر فیڈل کاسٹرو کی کمیونسٹ حکومت کا تختہ پلٹ دے گا۔ کیوبا سوویت یونین کا حلیف تھا اور اس سے مالی اور سفارتی امداد حاصل کرتا تھا۔ سوویت رہنما نکیتا خروشچیف نے فیصلہ کیا کہ کیوبا کو روسی بحریہ کا ایک مرکز بنایا جائے۔1962 میں اس نے نیوکلیائی میزائیل کیوبا میں نصب کردیے۔ ان ہتھیاروں کی تنصیب کے سبب امریکہ پہلی بار بہت ہی نزدیک سے حملے کی زد میں آگیا۔ اور سوویت خطرے کی زد میں آنے والے امریکی شہروں اور بحری اڈوں کی تعداد تقریباً دوگنی ہوگئی۔

تین ہفتوں بعد امریکہ کو کیوبا میں ان روسی تنصیبات کا علم ہوا۔ اگرچہ امریکی صدر جان ایف کینڈی اور ان کے صلاح کار کوئی ایسا قدم اٹھانے میں ہچکچاہٹ ہو رہی تھی جو دونوں ملکو ں کے درمیان ایک نیوکلیائی جنگ کا سبب بن جائے لیکن ان کا مصمم ارادہ تھا کہ وہ خروشچیف کو کیوبا سے میزائیل اور دوسرے نیوکلیائی ہتھیار ہٹانے پر مجبور کردیں گے۔ اپنی سنجیدگی کے اظہار اور تنبیہ کے لیے کینیڈی نے امریکی جنگی جہازوں کو حکم دیا کہ وہ کیوبا جانے والے ہر سوویت جہاز کا راستہ روک لیں۔ ایسا لگتا تھا کہ دونوں کا ٹکراؤ یقینی ہے اور یہی صورت حال بعد میں کیوبائی میزائیل بحران کے نام سے جانی گئی۔ اس ٹکرائو کے امکان کے باعث پوری دنیا گھبراہٹ کا شکا رہوگئی کیونکہ یہ ایک معمولی جنگ نہیں ہوتی۔آخر کار دنیا میں امن کی سلامتی کے لیے دونوں نے جنگ سے پرہیز کا فیصلہ کیا۔ سوویت جہازوں نے اپنی رفتار سست کی اور واپس چلے گئے۔

کیوبائی میزائیل بحران سرد جنگ کا نقطۂ عروج تھا۔ سرد جنگ کا مطلب امریکہ اور سوویت یونین کے درمیان مقابلہ ، تنائو اور دوسرے اختلافات و تضادات کا ایک سلسلہ تھا۔جس میں دونوں کو اپنے اپنے حلیفوں کی پشت پناہی حاصل تھی۔ خوش قسمتی سے یہ کبھی ایکحقیقی جنگ میں تبدیل نہیں ہوئی یعنی سوویت یونین اور امریکہ کے درمیان ایک مکمل جنگ نہیں ہوئی۔ اگرچہ دوسرے علاقوں میں لڑائیاں ہوئیں اور دونوں طاقتیں اور ان کے حلیف ان میں بر سر پیکار فریقوں کی مدد میں ملوث تھے لیکن پھر بھی کم سے کم دنیا ایک اور عالمی جنگ سے محفوظ رہی۔

 سرد جنگ محض طاقت کے لیے حریفانہ کشمکش ،  فوجی معاہدوں اور طاقت کے توازن کا معاملہ نہیں تھا بلکہ اس کے ہمراہ حقیقی نظریاتی اختلافات بھی تھے یعنی کشا کش تھی کہ کون سا نظریہ دنیا کی سیاسی، معاشی اور سماجی نظام کے لیے بہترین اور مناسب ہے۔ مغربی حلیفوں کی سربراہی امریکہ کررہا تھا جو ایک ایسے نظام کی نمائندگی کرتا تھا جس کا نظریہ آزاد جمہوریت اور سرمایہ داری پر مبنی تھا۔ اس کے برعکس مشرقی حلیفوں کی قیادت سوویت یونین کے ہاتھ میں تھی جو اشتراکی اور کمیونسٹ نظریہ رکھتے تھے۔ آپ ان نظریات کے بارے میں گیارھویں کلاس میں پڑھ چکے ہیں۔

موجودہ عالمی سیاست میں دوسری جنگ عظیم کا خاتمہ ایک سنگ میل کی حیثیت رکھتا ہے۔1945میں اتحادی فوجوں نے ریاست ہائے متحدہ امریکہ سوویت یونین، برطانیہ اور فرانس کی قیادت میں محوری طاقتوں یعنی جرمنی، اٹلی اور جاپان کو شکست دی اور دوسری عالمی جنگ (1939-1945) کا خاتمہ ہوا۔ دنیا کی تقریباً سبھی بڑی طاقتیں اس جنگ میں شامل تھیںیہ جنگ یوروپ سے باہر بھی پھیل گئی تھی بشمول جنوب مشرقی ایشیا، چین، برما (جس کو اب میانمار کہتے ہیں) اور ہندوستان کے کچھ شمال مشرقی علاقے بھی اس کی لپیٹ میں آگئے تھے۔ اس جنگ نے انسانی جانوں اور شہری املاک کو تباہ و برباد کردیاتھا۔اس سے قبل پہلی عالمی جنگ نے1914سے 1918 تک پوری دنیا کو ہلاکر رکھ دیا تھا۔

دوسری عالمی جنگ کا خاتمہ سرد جنگ کی ابتدا بھی تھی۔ عالمی جنگ اس وقت ختم ہوئی جب اگست 1945 میں امریکہ نے جاپانی شہروں ہیروشیما اور ناگاساکی پر دو ایٹم بم گرائے جس نے جاپان کو ہتھیار ڈالنے پر مجبور کردیا۔ بم گرانے کے امریکی فیصلے کے نکتہ چینوں کا خیال ہے کہ ریاست ہائے متحدہ امریکہ کو علم تھا کہ جاپان ہتھیار ڈالنے جارہا ہے لہٰذا بم گرانا بالکل غیر ضروری تھا۔ ان کی رائے ہے کہ یونائیٹڈ اسٹیٹس کا یہ عمل محض اس ارادہ سے کیا گیا تھا تاکہ سوویت یونین کو ایشیا میں سیاسی اور فوجی فائدے اٹھانے سے روکا جائے۔ مزید یہ کہ ماسکو کو معلوم ہوجائے کہ امریکہ ہی عظیم طاقت ہے۔ امریکہ کے حامیوں کا کہنا ہے کہ بم گرانا اس لیے ضروری تھا تاکہ جنگ جلدی ختم ہو اور امریکہ اور اس کے حلیفوں کا مزید جانی نقصان نہ ہو۔ جو بھی مقاصد رہے ہوں لیکن دوسری عالمی جنگ کے خاتمہ کے نتیجے کے طور پر عالمی سطح پر دو بڑی طاقتیں ابھر کر سامنے آئیں۔ جرمنی اور جاپان کی شکست،یوروپ اور دنیا کے دوسرے علاقوں میں تباہی و بربادی کے ساتھ یونائیٹڈ اسٹیٹس اور سوویت یونین دنیا کی دو بڑی طاقتیں بن گئیں اور ان میں یہ صلاحیت آگئی کہ کرّہ ارض پر ہونے والے ہر واقعے پر اثر انداز ہوسکیں۔

حالانکہ سرد جنگ امریکہ اور سوویت یونین کی حریفانہ کشمکش کا نتیجہ تھی، لیکن اس کی جڑیں اس یقین میں بھی پوشیدہ تھیں کہ ایٹم بم کے ذریعہ لائی گئی تباہی کی قیمت کسی بھی ملک کی برداشت سے باہر ہے۔ یہ دلیل بظاہر سادہ مگر وزن دار ہے۔ جب دونوں حریفوں کے پاس وہ نیوکلیائی ہتھیار ہوں جو ایسی اموات اور تباہی کا باعث ہوسکتے ہیں جن کو دونوں میں سے کوئی قبول کرنے کو تیار نہ ہوتو، ایک مکمل جنگ کے امکانات بہت کم ہوجاتے ہیں۔ اشتعال انگیزی کے باوجود کوئی بھی فریق جنگ کا خطرہ مول نہ لے گا کیونکہ کوئی بھی سیاسی منفعت  اپنے سماج کی تباہی و بربادی کوجائز نہیں قرار دے سکتی۔

ایک نیوکلیائی جنگ کی صورت میں دونوں فریقوں کا اتنا زبردست نقصان ہوگا کہ کسی کو بھی فاتح قرار دینا ناممکن ہوگا۔ اگر ان میںسے ایک اپنے دوسرے حریف کے نیوکلیائی ہتھیاروں کو نشانہ بناتا ہے اور ان کو بے اثر کردیتا ہے تب بھی اس کے پاس اتنے نیوکلیائی ہتھیار باقی رہیں گے کہ وہ پہلے حریف کوغیر یقینی نقصان پہنچاسکے۔ اس کو ’مزاحمت‘ (deterrence) کی منطق کہتے ہیں۔ دونوں فریقوں میںحملے کی صورت میں جواب دینے کی پوری صلاحیت ہے اور اتنی تباہی پھیلاسکتے ہیں کہ دونوں میں سے کوئی بھی جنگ شروع کرنے کی ہمت نہیں کرسکتا۔ اس طرح سے اگرچہ سرد جنگ دو نوںطاقتوں کے درمیان زبردست کشمکش تھی ،یہ ایک سرد جنگ ہی رہی اور حقیقی جنگ نہ بن سکی۔ مزاحمتی طریقۂ کار اگرچہ جنگ ٹالتا رہتا ہے لیکن طاقتوں کے درمیان رقابت کو نہیں روک سکتا۔

سرد جنگ کی فوجی خصوصیات پر غور کیجیے۔دونوں حریف اور ان کے حمایتیوں سے یہ توقع کی جاتی تھی کہ وہ ذمہ داری اور معقولیت پسندی سے کام لیں گے۔اس کا مطلب ہے کہ وہ ان خطرات سے آگاہ ہوں گے جو دونوں طاقتوں کے درمیان جنگ میں ظاہر ہوں گے۔ جب دونوں بڑی طاقتیں اور ان کی قیادت میں رہنے والے بلاک ’مزاحمت‘ کی حالت میں ہوں،ایسی حالت میں جنگ کی شروعات بہت تباہ کن ہوسکتی ہے۔

لہٰذا ذمہ داری کا تقاضہ یہ ہے کہ قوت برداشت سے کام لیا جائے اور ایک مزید عالمی جنگ کو ٹالا جائے۔ اس طرح سے سرد جنگ انسان کیبقا کے لیے ایک یقین دہانی تھی۔

مغربی اتحاد کے نام سے ایک تنظیم قائم کی گئی جواپریل 1949میںNorth Atlantic Treaty Organisation (NATO)کے نام سے وجود میں آئی۔ یہ بارہ ملکوں کی تنظیم تھی جس نے اعلان کیا کہ یوروپ یا شمالی امریکہ میں ان میں سے کسی پر بھی مسلح حملہ سب پر حملہ تصور کیا جائے گا۔ اور ایسی صورت میں ان میں سے ہر ملک دوسرے کی مددکرے گا۔ مشرقی اتحاد وارسا معاہدہ (Warsa Pact) کے نام سے جانا جاتا ہے جس کی رہنمائی سوویت یونین کے ہاتھوں میں تھی ۔ یہ 1955 میں قائم ہوئی اور اس کا خاص مقصد یوروپ میں NATO کی افواج کاتدارک کرنا تھا۔

سرد جنگ کے زمانے میں بین الاقوامی اتحاد عظیم طاقتوں کی اپنی ضروریات اور چھوٹی ریاستوں کے اپنے حالات کے جائزے پر مبنی تھا۔ جیسا کہ اوپر بیان کیا جاچکا ہے کہ عظیم طاقتوں کے اختلاف کا میدان یوروپ تھا۔ کبھی یوں بھی ہوا کہ کچھ ممالک کو اپنے اتحادمیں لانے کے لیے عظیم طاقتوں نے فوجی  طاقت کا استعمال کیا ۔ مشرقی یوروپ میں سوویت دخل اندازی اس کی ایک مثال ہے۔ مشرقی یوروپ میں اپنا دبدبہ قائم رکھنے کے لیے سوویت یونین نے وہاں پر اپنی افواج کی بڑی تعداد تعینات کی۔ اسی طرح امریکا نے مشرق اور جنوب مشرقی ایشیا، مغربی ایشیا (مشرقِ وسطیٰ ) میں ایک اتحاد (South East Asian Treaty Organisation) (SEATO)  اور Central  Treaty Organisation (CENTO) کی شکل میں قائم کیا۔ سوویت یونین اور کمیونسٹ چین نے اس کے جواب میں شمالی ویت نام ، شمالی کوریا اور عراق سے اپنے تعلقات بہتر بنائے۔

سرد جنگ کی و جہ سے دنیا کے دو فرقوں میں بٹ جانے کا خطرہ لاحق ہوگیا۔ ان حالات کے تحت بہت سے نوآزاد ممالک کو یہ خطرہ ہوا کہ وہ اپنے نوآبادیاتی آقائوں، جیسے برطانیہ اور فرانس سے آزادی پانے کے بعد فوراً ہی اپنی آزادی کھودیں گے۔ اسی و جہ سے اتحاد میں دراڑیں پڑنے لگیں۔ کمیونسٹ چین نے سوویت یونین سے 1950 کی  دہائی کے آخر میں قطع تعلق کرلیااور 1969 میں ان  کے درمیان ایک زمینی تنازعہ کے باعث ایک مختصر جنگ بھی ہوئی۔اس دوران ایک دوسری اہم تبدیلی ناوابستہ تحریک   Non-Aligned Movement (NAM)کا قیام ہوا، جس نے نو آزاد ریاستوں کو عظیم طاقتوں کے اتحاد سے الگ رہنے کی راہ دکھائی۔

آپ یہ سوال کرسکتے ہیں کہ آخرکار عظیم طاقتوں کو کسی حلیف کی کیا ضرورت تھی جب کہ ان کی اپنی طاقت باقاعدہ افواج اور نیوکلیائی ہتھیار کی تعداد کے باعث، بہت سے افریقی، ایشیائی بلکہ یوروپ کی بھی چھوٹی ریاستوں کی مجموعی طاقت سے کہیں زیادہ تھی۔ دراصل چھوٹی ریاستیں بڑی طاقتوں کو درج ذیل آسانیاں فراہم کرنے میں مددگار ہوئیں:

(i) اہم وسائل جیسے تیل اور دوسرے معدنیات۔

(ii) ایسا علاقہ جہاں سے عظیم طاقتیں اپنے نیوکلیائی ہتھیار چھوڑ سکیں اور فوجیں رکھ سکیں۔

(iii) ایسے مقام جہاں سے وہ ایک دوسرے کی جاسوسی کرسکیں۔

(iv) مالی مدد۔ بہت سی چھوٹی ریاستیں مل کر فوجی اخراجات کی ادائیگی کرسکیں۔

اس کے علاوہ وہ نظریاتی اعتبار سے بھی بہت اہم تھیں۔ حلیفوں کی وفاداری کا مطلب تھا کہ خیالات کی جنگ میں فتح حاصل ہو رہی تھی اور یہ کہ جمہوریت اور سرمایہ دارانہ نظام ، اشتراکیت اور کمیونسٹ نظام سے بہتر تھا یا اس کے برعکس ۔

کیوبائی میزائیل بحران ، جو اس باب کے شروع میں زیر بحث آیا تھا،دراصل ان بہت سے بحرانوں میں سے ایک تھا جو سرد جنگ کے زمانے میں ظاہر ہوئے۔   سرد جنگ کے درمیان کئی مسلح جھڑپیں بھی ہوئیں لیکن اہم بات یہ ہے کہ ان میں کوئی بھی تنازعہ عالمی جنگ کی سطح تک نہیں پہنچا۔ دونوں عظیم طاقتوں کے درمیان براہ راست تصادم کے کئی مواقع آئے جیسے کوریامیں (1950-53)، برلن (1958-62)، کانگو (1960کی ابتدائی دہائی)، اس کے علاوہ اور بھی کئی مقامات تھے۔ یہ بحران سنگین ہوتے چلے گئے کیونکہ کوئی بھی فریق اپنے موقف سے پیچھے ہٹنے کو تیار نہیں تھا۔ جب ہم سرد جنگ کے میدانوں کی بات کرتے ہیں تو ان سے ہمارا مطلب وہ مقامات ہوتے ہیں جہاں پر بحران پیش آیا،یا جنگ ہوئی یا ان کے ہونے کا خطرہ تھا لیکن اتحادی نظام نے مخصوص حدوں سے تجاوز نہیں کیا۔  حالانکہ دنیا ایک عالم گیرجنگی صورتِ حال سے محفوظ رہی لیکن سرد جنگ کے ان میدانوں جیسے کوریا، ویت نام اور افغانستان میں بہت سی جانیں تلف ہوئیں۔ کئی جگہوں پر بہت بڑے فوجی انتظامات کی خبریں بھی ملیں۔لیکن دنیا نیوکلیئر جنگ اور عالمی تنازعات سے محفوظ رہی۔ ان میں اکثر موقعوں پر عظیم طاقتوں کے درمیان سفارتی رابطہ برقرار نہ رہ سکا اور غلط فہمیوں میں اضافے کا سبب ہوا۔ بعض اوقات اتحادی نظام سے باہر کے ممالک ، مثال کے طور ناوابستہ تحریک کے ممالک نے بھی سرد جنگ کے کچھ تنازعات اور بحران کو حل کرنے میں کردار ادا کیا۔NAM کے سرکردہ رہنما جواہر لعل نہرو نے دونوں کوریاؤں کے درمیان مصالحت کرانے میں نمایاں کردار ادا کیا تھا۔ اقوام متحدہ کے سکریٹری جنرل نے بھی کانگو کے بحران میں مصالحتی کردار ادا کیا۔ایک عظیم طاقت کے اس ارادے نے کہ جنگ سے ہر حالت میں گریز کرنا چاہیے ،ان کو زیادہ قوت برداشت بخشی اور بین الاقوامی معاملات میں زیادہ ذمہ داری سے کام کرنے کا جذبہ دیا۔ جیسے جیسے سرد جنگ ایک میدان سے دوسرے کی جانب چلتی رہی برداشت کی منطق کی معقولیت زیادہ سے زیادہ ثابت ہونے لگی۔

ایسا کیوں ہے کہ دو کوریا اب بھی موجودہیں جب کہ سردجنگ کے ذریعے کی گئی دوسری تقسیم کاخاتمہ ہوچکا ہے؟کیا کوریائی عوام تقسیم کو جاری رکھناچاہتے ہیں؟

بہرحال ، کیونکہ سرد جنگ دو اتحادی فریقوں کے درمیان حریفانہ کشمکش ختم نہ کرسکی، باہمی شکوک و شبہات نے دونوں فریقوں کو ہر وقت جنگی حالت میں اور سر سے پائوں تک مسلح رہنے پر مجبور کیا۔ اسلحہ کے بڑے بڑے ذخیروں کو جنگ ختم کرنے کا ذریعہ سمجھا گیا۔

دونوں فریق یہ بھی سمجھتے تھے کہ ’برداشت‘ کے باوجود جنگ چھڑسکتی ہے ۔ کوئی بھی فریق دوسرے کے اسلحہ کے ذخیرہ کے بارے میں غلط اندازہ لگا سکتا ہے۔ دوسرے فریق کی نیت پر بھی شبہ کیا جاسکتا ہے۔ اس کے علاوہ کسی نیوکلیائی حادثہ کی صورت میں کیا ہوگا۔ یا اگر کوئی غلطی سے کسی نے نیوکلیائی ہتھیار کواستعمال کرلیا۔ یا اگر کوئی دھوکے باز فوجی دانستہ طور سے محض جنگ چھیڑنے کی خاطر نیوکلیائی ہتھیار چلادے؟ یا کسی نیوکلیائی ہتھیار کے ساتھ کوئی حادثہ ہوجائے۔ اس ملک کے رہنماؤں کو یہ کیسے معلوم ہوگا کہ یہ حادثہ تھا یا دشمن کی تخریب کاری کا عمل یا یہ کہ ’دوسری جانب‘ سے میزائیل نہیں آیا؟

اسی خیال کے پیش نظر سوویت یونین اور یونائیٹڈ اسٹیٹس نے نیوکلیائی اور غیر نیوکلیائی ہتھیاروں کی کچھ قسموں کو محدود کرنے یا ختم کرنے کے سلسلہ میں ایک دوسرے کے ساتھ تعاون کافیصلہ کیا۔انھوں نے طیکیا کہ ہتھیاروں کا توازن اورحدقائم رکھی جاسکتی ہے۔  1960کی دہائی سے شروعات کرتے ہوئے دونوں حریفوں نے ایک دہائی کے اندراندر تین اہم معاہدوں پر دستخط کیے اور یہ تینوں Limited Test Ban Treaty, اورNuclear Non-Proliferation Treaty, اور Anti-Ballistic Missile Treaty تھے۔ اس کے بعد عظیم طاقتوں نے کئی بار اسلحہ محدود کرنے کے موضوع پر گفتگو کی اور اس کو عمل میں لانے کے لیے کئی اور معاہدوں پر دستخط کیے۔