معالجاتی نظریات
5
اس باب کو پڑھنے کے بعد آپ اس قابل ہو جائیں گے کہ :
◊ نفسیاتی علاج کی بنیادی نوعیت اور طرز عمل سے واقف ہو سکیں۔
◊ لوگوں کی مدد کے لیے مختلف قسم کے طریقہ ٔ علاج سے واقف ہوسکیں۔
◊ نفسیاتی شکلوں کے استعمال کو سمجھ سکیں ۔
◊ یہ سمجھ سکیں کہ کس طرح ذہنی انتشار کے شکار لوگوں کو بحال کیاجاسکتا ہے۔
تعارف
نفسیاتی علاج کی نوعیت اور طریقہ
معالجاتی تعلقات
علاج کی قسمیں
مریض کے مسائل کو وضع کرنے کے اقدامات(باکس 5.1)
نفسی حرکی علاج
کرداری علاج
طریقۂ استراحت یا استرخا(باکس5:2)
وقوفی علاج
انسان مرکز ی وجودی علاج
حیاتی طبّی علاج
متبادل صورتی علاج
ذہنی طور پر بیمار لوگوں کی بحالی
کلیدی اصطلاحات
خلاصہ
اعادہ سوالات
پروجیکٹ کی تجاویز
ویب لنکس
تعلیماتی اشارات
تعارف
گزشتہ باب میں آپ نے مختلف اہم نفسیاتی امراض اور ان سے مریضوں کو ہونے والی تکلیفوں کے بارے میں مطالعہ کیاہے۔ اس باب میں آپ مختلف معالجاتی طریقے جن کا استعمال ماہرین نفسیاتی علاج، مریضوں کی مدد کرنے کے لیے کرتے ہیں، کے بارے میں معلومات حاصل کریں گے۔ نفسیاتی علاج مختلف قسم کے ہوتے ہیں۔ ان میں سے کچھ ذاتی مفاہمت کو حاصل کرنے پر زور دیتے ہیں۔ جب کہ دیگر نظریہ علاج کار کردگی سے متعلق ہیں۔ ان سارے نظریات کا بنیادی مقصد مریضوں کے کمزور حالات سے ابھرنے میں ان کی مدد کرنا ہے۔ کسی مریض کے لیے معالجاتی نظریہ کی اثرپذیری کئی عوامل پر مبنی ہے ۔ مثلاً مرض کی شدّت ، دوسروں کو پہنچنے والی تکلیفوں کی مقدار اور لوگوں کے پاس وقت ، محنت اور رقم کی فراہمی وغیرہ ۔
سبھی علاجی نظریات کی نوعیت بنیادی طور پر ٹھیک کرنا اور مدد کرنا ہے۔ ان سبھی میں مریض و معالج کے درمیان آپسی تعلقات شامل ہوتے ہیں۔ ان میں سے کچھ میں تو یہ بلا واسطہ ہوتے ہیں۔ جیسے نفسیاتی حرکی، جب کہ دیگر بالواسطہ ہوتے ہیں جیسے انسان مرتکز (person-centred) ۔ اس باب میں ہم نفسیاتی علاج کی کچھ اہم اقسام کا مختصرطور پر ذکر کریں گے۔
نفسیاتی علاج کی نوعیت اورطریقہ
نفسی علاج رضاکارانہ طور پر علاج چاہنے والے یعنی مریض اورمعالج کے درمیان آپسی تعلق ہے۔ اس تعلق کا مقصد مریض کو ان کے نفسیاتی مسائل حل کرنے میں ان کی مدد کرنا ہے۔ یہ تعلق مریض میں اعتماد قائم کرتا ہے اس طرح وہ اپنے مسائل کا ذکر کھل کر کرسکتے ہیں۔ نفسیاتی علاج کا مقصدغیر موافق کار کردگی کو بدلنا ، ذاتی تکالیف کے احساس کو کم کرنا اور مریض کو ماحول کے ساتھ بہتر مطابقت میں مدد کرنا ہوتا ہے۔ازدواجی ناکامی، پیشہ جاتی اور سماجی تطبیق میں بھی اہم تبدیلیوں کی ضرورت ہوتی ہے جو انسان کے ذاتی ماحول میں ضروری ہوتی ہیں۔
سبھی نفسیاتی معالجاتی نظریات میں مندرجہ ذیل خصوصیات ہوتی ہیں ۔ (I) علاج کے متعلق نظریات میں اصولوں کامنظم اطلاق ہوتا ہے ۔ (II) وہی لوگ جنھوں نے کسی ماہر کے زیر نگرانی تربیت لی ہے نفسیاتی علاج کرسکتے ہیں۔ ایک ناتجربہ کار انسان بھلائی سے زیادہ غیر ارادی طور پر نقصان پہنچاسکتا ہے ۔ (III) معالجاتی ماحول میں ایک معالج اور ایک مریض شامل ہوتا ہے جو اپنے جذباتی مسائل کو حل کرنے میں مددچاہتااور مددحاصل کرتا ہے۔ (اس شخص پر پورے معالجاتی عمل کے دوران توجہ مرکوز ہوتی ہے) اور (IV) ان دونوں افراد یعنی مریض اور معالج کے درمیان تعامل یا آپسی بات چیت کے بنا پر معالجاتی تعلقات قائم و مضبوط ہوتے ہیں۔ یہ ایک رازدارانہ،بین شخصی اور حرکی تعلقات ہوتے ہیں۔ یہ انسانی تعلقات کسی بھی طرح کے نفسی علاج کا مرکز ہوتے ہیں اور یہ تبدیلیوں کے لیے ذریعہ فراہم کرتے ہیں۔
سبھی نفسیاتی معالجات کا مقصد مندرجہ ذیل میں سے کچھ یا سبھی مقاصد کو حاصل کرنا ہوتا ہے۔
(i) مریض کے بہتر ہونے کے عزم کو مضبوط بنانا۔
(ii) جذباتی دباو کو کم کرنا۔
(iii) ایجابی نمو کے لیے موجود قوت کا انکشاف کرنا۔
(iv) خصلتوں میں تبدیلی لانا۔
(v) سوچنے کے انداز کو بدلنا۔
(vi) اپنی واقفیت کو بڑھانا۔
(vii) آپسی تعلقات و ترسیل کو بہتر بنانا۔
(viii) فیصلہ لینے میں سہولت فراہم کرنا۔
(ix) زندگی میں اپنی پسندیدگی کے بارے میں باخبر ہونا۔
(x) اپنے سماجی ماحول کو زیادہ خود شناسی اور تخلیقی انداز میں دیکھنا۔
معالجاتی تعلقات
مریض اور معالج کے بیچ خاص قسم کے تعلقات کو معالجاتی تعلقات یا معاہدہ کہا جاتا ہے۔ یہ نہ تو ایک ختم ہوجانے والی شناسائی ہے اور نہ ہی ایک مستقل قائم رہنے والا تعلق ہے۔ کسی معالجاتی معاہدے کے دو اہم اجزاہوتے ہیں۔ اس کا پہلاجز تعلقات کے معاہدے کی نوعیت کاہے جس میں دو لوگ مریض اور معالج مرض سے ایک ساجھا معاہدہ کرتے ہیں۔ جس کا مقصد مریض کے مسائل کو حل کرنے میں اس کی مدد کرنا ہوتا ہے۔اتحاد کا دوسراجزوعلاج کی محدودمدت ہے۔ یہ معاہدہ تب تک قائم رہتا ہے جب تک کہ مریض خود کو بہتر بنالے اور اپنی زندگی پرپورااختیارنہ حاصل کرلے۔ اس طرح کے تعلقات کی کئی منفرد خصوصیات ہیں۔ یہ ایک بھروسہ مند اور رازدار انہ تعلق ہے۔ یہ اعلیٰ سطحی بھروسہ معالج کے سامنے مریض کے اپنے دل کا بار ہلکا کرنے میںاور اس کے ذاتی و نفسیاتی مسائل کی رازداری برتنے میں مدد کرتا ہے ۔ معالج ایسے مریض کے تئیں قبولیت،پر جوش ومعقول ہمدردانہ رخ اختیار کرنے کے ذریعہ اسے بڑھاوا دیتا ہے۔ معالج اپنا یہ پیغام کہ وہ مریض کے بارے میں کوئی رائے قائم نہیں کررہا ہے اپنے الفاظ اور کردار سے مریض تک پہنچا ئے گااور مریض کی جانب اپنامثبت رجحان جاری رکھے گا اگرچہ مریض گستاخ ہو یا اپنی تمام غلط چیزیں جو اس نے کبھی کی ہوں یا اس کے بارے میں سوچا ہو، کو چھپاتا ہی کیوں نہ ہو۔ یہ معالج کی جانب بلا شرط ایجابی رجحان ہوتا ہے۔ معالج مریض کے تئیں ہم احساس ہوتا ہے۔ یہ ہم احساس ہونا ہمدردی و دوسرے فرد کے حالات کی ذہنی سوجھ بوجھ سے مختلف ہوتا ہے۔ ہمدردی میں دوسرے متاثر لوگوں کے لیے درد اورمحبت ہوتی ہے۔ لیکن اس کے احساس کو سمجھ نہیں پاتا۔ عقلی سوجھ بوجھ اس معنی میں کم بااثرہے کیونکہ ایک شخص نہ تو دوسروں کے احساس کو سمجھ پاتا ہے اور نہ ہی اس کے لیے کوئی ہمدردی رکھتا ہے۔ دوسری طرف ہم احساس ہونا وہاں ہوتاہے جہاں ایک شخص دوسرے کے دکھ کو سمجھ پاتا ہے اس کا مطلب دوسروں کے پس منظر میں چیزوں کو سمجھنا یعنی خود کو دوسروں کے رنگ میں ڈھالنا۔ہم احساس معالجاتی تعلقات کو بہتر بناتاہے اور اسے صحت مند تعلقات میں تبدیل کردیتا ہے۔
معالجاتی معاہدہ میں بھی معالج کو مریض کے تمام حالات، سوچ و فکر تجربات وغیرہ کو نہایت ہی پوشیدہ رکھنے کی ضرورت ہوتی ہے۔ معالج کو کسی بھی حالت میں مریض کے بھروسہ ، اعتماد ،احساسات اورفکر کا استعمال نہیں کرنا چاہیے۔ آخر میں یہ ایک پیشہ ورانہ تعلق ہوتا ہے جو کہ قائم رکھنا چاہیے۔
سرگرمی
آپ کے کسی ساتھی یا دوست یا ٹیلی ویژن سیریل میں آپ کے کسی چہیتے کردار کو حال ہی میں کسی افسوسناک حالات کا سامنا کرنا پڑا ہو۔ (جیسے کسی چاہنے والے کا انتقال، کسی اہم دوستی کا ٹوٹنا)جس سے آپ واقف ہوں۔ آپ خود کو دوسرے لوگ کی جگہ پر رکھنے کی کوشش کریں۔ یہ محسوس کرنے کی کوشش کریں کہ دوسرے کو کیسا لگتا ہوگا۔ وہ کیا سوچتا ہوگا اس کے پورے پس منظر پر غور کرنے کی کوشش کریں۔ یہ آپ کو دوسروں کے احساس کو سمجھنے میں مددگار ہوگا ۔
(نوٹ: یہ مشق کلاس میں بھی کی جاسکتی ہے تاکہ اساتذہ طلباکی پریشانیوں کو دور کرنے میں ان کی مدد کرسکیں)
علاج کی قسمیں
گرچہ سبھی نفسیاتی معالجات کا مقصد انسانی تکالیف کو دور کرنا اور مؤثر کردار کو بڑھاوا دینا ہے۔ پھر بھی ان کے ذہنی خیالات، طریقۂ کار اور اصولوں میں کافی فرق ہوتاہے۔ نفسیاتی علاج تین بڑے گروپ میں درجہ بند کیے جاسکتے ہیں۔ یعنی نفسی حرکیات (Psychodynamics)،برتاو(behaviour) اور وجودی (existential)نفسی معالجات بالترتیب نفسی حرکی علاج سب سے پہلے ظہورمیں آیا اس کے بعد کرداری جب کہ وجودی علاج جسے تیسری قوت کہاجاتا ہے آخر میں سامنے آیا ۔ ان علاج کی درجہ بندی مندرجہ ذیل پیمانہ پر ہوتی ہے۔
(1) وہ کون سا سبب ہے جو آگے چل کر مسئلہ بن گیا؟
نفسی حرکی علاج کے نظریہ کے مطابق درون نفسی تصادم یعنی تصادم جو کسی انسان کے نفس میں موجود ہوتے ہیں، نفسیاتی مسائل کا ذریعہ بن جاتا ہے کرداری علاج کے مطابق نفسیاتی مسائل کا ظہور وقوف و کردار کی غلط تربیت کی و جہ سے ہوتاہے ۔ جب کہ وجودی علاج کے مطابق کسی انسان کی زندگی کے مقصد سے جڑے سوال ہی ان کے نفسیاتی مسائل کے اسباب ہیں۔
(2) کس طرح سبب وجود میں آتاہے؟
نفسی حرکی علاج کے مطابق بچپن کی ادھوری خواہشات اور حل نہ ہوئے خطرات کی و جہ سے درون نفسی تصادم واقع ہوتے ہیں۔ کرداری علاج کے مطابق التزامی وضع ناقص تربیت اور غلط سوچ اورناقص تطبیقی کردارکی و جہ بنتے ہیں جو بعد میں نفسی مسائل میں تبدیل ہوجاتے ہیں۔ جب کہ وجودی علاج موجودہ حالات کو اہمیت دیتا ہے۔ اور تنہائی اور اکیلا پن (بیگانگی) اپنے بیکار وجود وغیرہ کا احساس ہی نفسیاتی مسائل کی و جہ ہے۔
(3) علاج کا اہم طریقہ کیا ہے؟
نفسی حرکی طریقۂ علاج آزادانہ ایتلاف کا طریقہ استعمال کرتاہے اور خواب کے بیان کے ذریعہ مریض کی سوچ ،فکراوراحساسات کوسامنے لایا جاتا ہے۔ ان چیزوں کا مریض کے سامنے ذکر کیا جاتا ہے تاکہ وہ اپنے تصادم کا سامنا کرسکے اور اس طرح اپنے مسائل پر قابو پا سکے۔ کرداری علاج میں ناقص التزامی وضع کی پہچان کی جاتی ہے اورکردار کو بہتر بنانے کے لیے متبادل کرداری عدم لزوم یا اتفاقیت کو بہترکیاجاتا ہے۔ اس طرح کے علاج میں وقوفی طریقہ کا استعمال کیا جاتا ہے جو مریض کی غلط سوچ اورفکر کو چیلنج کرتی ہے تاکہ وہ اپنے نفسیاتی مسائل کو حل کرسکیں۔ جب کہ وجودی علاج میں ایک معالجاتی ماحول فراہم کیاجاتا ہے جو کہ ایجابی، قابل قبول وغیرہ فیصلہ کن ہوتا ہے۔ اس میں مریض اپنے مسائل کے بارے میں بات چیت کرنے کے لائق ہوتا ہے اور اس میں معالج سہولت فراہم کرنے کا کام کرتا ہے۔ مریض کسی مسئلہ کا حل ذاتی نمو عمل کے ذریعہ کرتا ہے۔
(4) مریض و معالج کے بیچ معالجاتی تعلقات کی نوعیت کیا ہے؟
نفسی حرکی علاج کے مطابق معالج کودرون نفسی تصادم کے بارے میں سمجھ مریض سے بہتر ہوتی ہے اور اس لیے معالج ہی مریض کی سوچ اور احساس کی وضاحت ان کے سامنے کرتا ہے تاکہ اس کے بارے میں مناسب سوجھ بوجھ قائم ہوسکے۔کرداری علاج کے مطابق معالج مریض کی غلط سوچ و سمجھ کو بدلنے کا کام کرسکتا ہے۔ اس میں مزید یہ بھی ماناگیا ہے کہ معالج صحیح طرز عمل اور سوچ کو پانے کی صلاحیت رکھتا ہے جو مریض کے لیے تطبیقی ہوتا ہے۔نفسی حرکی اورکرداری علاج دونوں میںہی یہ ماناگیاہے کہ معالج مریض کے مسائل کو حل کرنے کی صلاحیت رکھتا ہے۔اس معالجہ کے ٹھیک برعکس وجودی علاج میں اس بات پر زور دیا جاتاہے کہ معالج صرف ایک پر جوش اورہم احساس رشتہ فراہم کرتا ہے جس میں مریض اپنے مسائل کی نوعیت کا اندازہ لگانے کے لیے خود کو محفوظ محسوس کرتا ہے۔
(5) مریض کا اہم فائدہ کیا ہے؟
نفسی حرکی علاج جذباتی بصیرت کی قدر کرتا ہے جو کہ ایک اہم فائدہ ہے جسے مریض علاج کے دوران حاصل کرتا ہے۔ جذباتی بصیرت اس وقت موجود ہوتی ہے جب مریض اپنے تصادم (conflicts) کو عقل کے بنا پر سمجھتا ہے ،اسے جذباتی طور پر اپنانے کی حالت میں ہوتاہے ، اپنے جذبات کو تصادم کی جانب تبدیل کرنے کی حالت میں نہیں ہوتا ہے۔ مریض کی علامت اور تکلیفوں میں جذباتی سوجھ کی و جہ سے کمی آجاتی ہے۔ بدلتے ہوئے ناقص کردار اور موافق سوچ کے طریقے کو علاج کے اہم فائدہ کے طور پر مانا جاتا ہے مطابق یاصحت مند کار گزاری اور سوچ کے طریقہ کو قائم کرنے سے مریض کی تکلیفوں و غیرہ موافق علامتوں میں کمی آتی ہے انسان مرکزی علاج ذاتی نمو کو اہم فائدہ کے طور پر مانتی ہے۔ ذاتی نمو اپنے بارے میں سوجھ بوجھ اور اپنی خواہشات، جذبات اور ضرورت میں اضافہ کرنے کا طریقہ ہے۔
(6) علاج کی مدّت کیا ہے؟
کلاسیکی نفسیاتی تجزیہ کی مدت کئی سالوں تک جاری رہ سکتی ہے۔ بہر حال نفسی حرکی معالجات کی متعدد حالیہ اشاعت میں اسے 10 یا 15 میقات میں مکمل کرنے کی بات کہی گئی ہے۔ کردار اور وقوفی کردار معالجہ کے ساتھ ساتھ وجودی علاج کی مدت کم ہوتی ہے اور یہ کچھ مہینہ میں ہی مکمل ہوجاتی ہے۔
اس طرح سے مختلف قسم کے نفسی معالجات کئی پیمانہ پر ایک دوسرے سے مختلف ہیں۔ بہرحال یہ سبھی منطقی ذرائع سے نفسیاتی پریشانیوں کے علاج کا ایک عام طریقہ فراہم کرتے ہیں۔ معالج ،معالجاتی رشتہ اوراوسط طریقۂ علاج مریض میں تبدیلی کے عواملبن جاتے ہیں جس کی و جہ سے نفسیاتی پریشانیوں سے چھٹکارا پایا جاتا ہے۔ نفسیاتی علاج کے عمل کی شروعات مریض کے مسائل کو وضع کرنے سے ہوتا ہے۔ اس سلسلے میں اٹھائے جانے والے اقدام کا ذکر باکس 5.1 میں کیاگیا ہے۔
باکس 1.5
مریض کے مسائل کووضع کرنے کے اقدامات
طبی وضع سے مرادمسائل کی اس وضع سے ہے جو علاج کے لیے معالجاتی طریقے کے دوران استعمال کیے جاتے ہیں ۔کلینکی وضع کے مندرجہ ذیل فوائد ہیں:
1۔ مسئلہ کی سمجھ: معالج مریض کو ہورہی تکلیف کے تاثرات کو سمجھ پاسکتا ہے۔
2۔ ان حلقوں کی شناخت کرنا جن کا علاج اس نفسیاتی علاج کے ذریعہ ہوتا ہے۔ نظریاتی وضع علاج کیے جانے والے حلقوں کے مسئلہ کی پہچان صاف طور پر کرتی ہے۔ اس طرح اگر کوئی مریض کسی نوکری کو حاصل کرنے میں اہل نہ ہونے کی معذرت میں مدد چاہتا ہے اوراعلیٰ عہدیداروں کا سامنا کرنے میں اپنی نا اہلی کا اظہار کرتا ہے تب کرداری علاج میں کلینکی وضع وثوقی مہارت میں کمی اورتشویش کو بیان کرے گی ۔اس طرح حلقۂ مقاصد کی پہچان خود میں وثوق کی کمی اور بڑھے ہوئے اندیشہ کے ذریعہ ہوتی ہے۔
3۔ علاج کے طریقہ کا انتخاب : علاج کے طریقہ کا انتخاب معالجاتی نظام پر منحصر کرتا ہے جس میں معالج کو تربیت دی جاتی ہے۔ بہرحال یہاں تک کہ ایک بڑے علاقہ میں بھی معالجاتی طریقہ کا انتخاب ، طریقہ کے اوقات اور علاج سے حاصل ہونے والے نتیجوں کا اندازہ کلینکی وضع پر منحصر ہوتا ہے۔
کلینکی وضع جاری رہنے والا ایک عمل ہے۔ وضع میں دوبارہ وضع کی ضرورت پڑسکتی ہے کیوں کہ علاج کے عمل کے دوران طبی سوجھ بوجھ حاصل ہوتی ہے۔ عام طور سے پہلے ایک یا دومیقات میں شروعاتی کلینکی ترتیب کے لیے کافی طبی مواد حاصل ہوتے ہیں۔ بغیر طبی ترتیب کے نفسیاتی علاج کو شروع کرنا مناسب نہیں ہوتا ہے۔
سرگرمی 5.2
ان اداروں کے بارے میں معلومات حاصل کریں جنہیں آپ جانتے ہیں اور جو معالجاتی امداد فراہم کرتے ہیں۔
مندرجہ ذیل حصہ میں تینوں اہم نظام اورنفسیاتی علاج میں استعمال کیے جانے والے ہر ایک طریقہ علاج کے نمونہ کی تشریح کی گئی ہے۔
نفسی حرکی علاج
جیسا کہ آپ پڑھ چکے ہیں کہ نفسی حرکی علاج جس کانظریہ سب سے پہلے سگمنڈ فرائڈ نے دیا تھاسب سے پرانا طریقہ ہے۔ ان کے قریبی ساتھی کارل جُنگ نے اس میں ترمیم کی جسے آج تجزیاتی نفسی علاج کے طورپر جانا جاتاہے۔اس کے بعد فرائڈ کے جانشین جو نیفریڈین کے نام سے جانے جاتے ہیں کلاسیکی نفسی حرکی علاج کا اپنا نقطۂ نظرپیش کیا۔ موٹے طورپرنفسی حرکی علاج میں سائیکی کی ساخت،سائیکی کے مختلف اجزا کے درمیان حرکیات اور نفسیاتی پریشانیوں کے ذرائع کو تصوراتی شکل فراہم ہوئی۔ آپ پہلے ہی ان نظریوں کا مطالعہ خودّاری ،شخصیت اورنفسیاتی انتشار کے ابواب میں کرچکے ہیں۔ طریقۂ علاج سے متعلق اقدام ، معالجاتی تعلقاتی نوعیت اور نفسی حرکی علاج سے اخذنتائج کا ذکر نیچے کیا گیا ہے۔
درون نفسی کشاکش کو ظاہر کرنے والے طریقے کی نوعیت۔
چونکہ نفسی تجزیاتی نظریہ درون نفسی کشاکش کو نفسیاتی بیماریوں کی و جہ مانتا ہے۔ اس لیے اس علاج کا پہلا قدم اس دورن نفسی کشاکش یاتصادم کو ظاہر کرتا ہے۔نفسیاتی تجزیہ نے اس درون نفسی کشاکش کو ظاہر کرنے کے لیے آزادانہ ایتلاف اورتعبیرخواب جیسے دو اہم طریقے ایجاد کیے۔آزادانہ ایتلاف مریض کے مسائل کو سمجھنے کا سب سے اہم طریقہ ہے۔ ایک بار جب معالجاتی تعلقات قائم ہوجاتے ہیں اور مریض آرام محسوس کرتا ہے تو معالج اسے بسترپر آرام کرنے کے لیے کہتا ہے اور کہتا ہے کہ جو بات ذہن میں ہے اسے بغیرکسی رکاوٹ کے بولتاجائے۔ اس طرح مریض کو ایک دوسرے کے ساتھ کھل کر تعلق بنانے کے لیے حوصلہ افزائی کی جاتی ہے اور اس لیے اس طریقہ کو آزادانہ ایتلاف طریقہ کہا جاتا ہے احتسابی (رکاوٹ کرنے والے) فوق انا اور چوکس انا کو مریض کے بولتے وقت تعمیل میں رکھا جاتا ہے تاکہ مریض ایک پرسکون اور بھروسہ مند ماحول میں جو بھی ذہن میں آئے بولتا جائے۔ چونکہ معالج روک ٹوک نہیں کرتااس لیے وہ خیالات،خواہشات اور تصادم جو لاشعور (unconsious) میں دبے ہوتے ہیں آسانی سے شعوری ذہن میں ابھر کر آجاتے ہیں۔ مریض کا یہ آزادانہ بغیر کسی رکاوٹ والا بیان اس کے لاشعور تک کی کھڑکی ہے جو معالج کے پہنچ میں ہوتی ہے۔ اس طریقہ کے ساتھ ساتھ مریض کو یہ بھی کہا جاتا ہے کہ وہ اپنے خواب کو لکھیں جو انھوں نے دیکھا ہے۔ ماہر نفسی تحلیل (Psychoanalysis) ان خوابوں کوایسے خواہشات کی نشاندہی مانتے ہیں جو لاشعور میں موجود ہوتا ہے۔ خوابوں کی تشبیہات درون نفسی قوتوں کی نشاندہی کرتی ہیں۔ خواب میں علامتوں کا استعمال ہوتا ہے کیونکہ یہ بالواسطہ اظہارہے اور یہ انا کو چوکس نہیں کرتے۔ اگر غیر تکمیلی خواہشات کا اظہار براہ راست ہو تو ہمیشہ چوکس رہنے والی انا اسے دبا دے گی اور وہ اندیشہ (تشویش)کو پیدا کرے گی۔ ان علامتوں کی وضاحت ترجمے کی تسلیم شدہ روایت کے مطابق کی جاتی ہے،غیر تکمیل شدہ خواہشات اور تصادم کے اظہار کے طورپرکی جاتی ہے۔
علاج کاطریقۂ عمل
منتقلی اورتعبیر مریض کے علاج کے طریقۂ عمل ہیں جیسے ہی آزادانہ ایتلاف اور خواب کی وضاحت جس کا بیان اوپر کیا جاچکا ہے، کے ذریعہ لاشعور میں دبی خواہشات کو شعور میں لایا جاتا ہے مریض معالج کو ماضی ،خاص طور سے بچپن کے حاکم کی حیثیت سے پہچاننا شروع کردیتا ہے۔معالج کو سزا دینے والے کی طرح بھی دیکھ سکتا ہے یا لاپرواہ ماں کی طرح بھی دیکھ سکتا ہے۔ معالج خود کو کسی طرح کی رائے قائم نہ کرنے والا بلکہ وہ رواداری کا رویہ بنائے رکھتا ہے اور مریض کو اس طرح کی جذباتی پہچان کے عمل کو بنائے رکھنے کی اجازت دیتاہے۔ اس عمل کو عمل منتقلی (Transference) کہا جاتا ہے۔ معالج اس عمل کو بڑھاوا دیتا ہے کیونکہ اس سے مریض کو لاشعوری تصادم کو سمجھنے میں مدد ملتی ہے۔ مریض اپنے غصہ ، مایوسی ، ڈر اور اداسی کا اظہار کرتا ہے جو ماضی میں کسی شخص کے ساتھ ہوا ہوتاہے اوراس کا اظہار وہ اس وقت نہیں کرپاتا ہے۔ معالج اس شخص کی جگہ لے لیتا ہے۔ اسی مرحلہ کومنتقلی خلل اعصاب (Tranference neurosis) کہا جاتا ہے۔ ایک مکمل منتقلی خلل اعصاب مریض کے درون نفسی کشاکش کی نوعیت کی واقفیت کرانے میں معالج کی مدد کرتا ہے۔ ایک مثبت منتقلی ہوتی ہے جس میں مریض معالج کے ساتھ محبت میں مبتلا ہوجاتا ہے اور معالج سے اس کی منظوری چاہتا ہے۔منفی منتقلی تب موجود ہوتی ہے جب مریض میں معالج کے تئیں غم، غصہ اور دشمنی کا احساس ہوتا ہے۔
منتقلی کے عمل میں رکاوٹ بھی رہتی ہے جسے مزاحمت کہا جاتا ہے۔ چونکہ منتقلی کا عمل لاشعور میں دبی خواہشات اور تصادم کو ظاہر کرتا ہے اس سے تکلیفیں بڑھتی ہیں اس لیے مریض منتقلی کی مزاحمت کرتا ہے۔ اس مزاحمت کی و جہ سے مریض علاج کو آگے بڑھنے سے روکتا ہے تاکہ لاشعور میں دبی ہوئی تکلیف دہ باتوں کو یاد کرنے سے بچ سکے۔ رکاوٹ شعوری اور لا شعوری دونوں ہوسکتی ہیں۔شعوری رکاوٹ (conscious resistance) اس وقت سامنے آتی ہے جب مریض جان بوجھ کر کچھ معلومات چھپاتا ہے۔ لاشعوری رکاوٹ اس وقت موجود ہوتی ہے جب مریض علاج کے درمیان خاموش ہوجاتا ہے، غیر جذباتی اورفضولیات کی تفصیل کو یاد کرتا ہے، اہم تاریخوں کو بھولتا ہے اور علاج کے لیے دیر سے آتا ہے۔ معالج مریض سے ان کے بارے میں بار بار تکرار کرکے ان رکاوٹوں سے ابھرتا ہے اور کبھی ان کے اندیشہ ، خوف یاشر م جیسے جذبات جن کی و جہ سے رکاوٹ پیداہوتی ہے کو بھول کر ان سے ابھرتا ہے۔
نفسیاتی ترجمانی ایک بنیادی ترکیب ہے جس کی و جہ سے تبدیلی آتی ہے۔ ٹکراؤ اور وضاحت ترجمانی کی دوتخلیقی ترکیب ہیں۔ ٹکراؤ میں معالج مریض کو اس کی نفسیات کے اسی شعبہ کے بارے میں بتاتا ہے جس کا سامناکرنا مریض کے لیے ضروری ہوتا ہے۔ وضاحت ایک عمل ہے جس کے ذریعہ معالج کسی غیر واضح اورالجھے ہوئے حالات کو سامنے لاتا ہے۔ یہ کام ضروری تفصیلات کو غیر ضروری تفصیلات اور حالات سے الگ کرکے اور ابھار کر کیا جاتا ہے۔ ترجمانی ایک باریک اور مختصر عمل ہے۔ اسے نفسی تحلیل (Psychoanalysis) کا نقطۂ کمال (Pinnacle) کہا جاتاہے۔ معالج لاشعوری مادے کا استعمال کرتا ہے جس کا انکشاف آزادانہ ایتلاف، خواب کی تعبیر،اور مزاحمت کے عمل کے دوران ہوتا ہے۔اس سے مریض ان نفسیاتی مواد اور تصادم یا کشاکش سے آگاہ ہوتا ہے جن کے نتیجے میںمخصوص واقعات،علامات اورتصادم واقع ہوئے تھے۔ ترجمانی درون نفسی تصادم یا محرومیت جو کہ بچپن میں ہوگئی تھی پر زور دے سکتی ہے۔محاذآرائیکے استعمال، وضاحت اور ترجمانی کے عمل کو بار بار دہرانے کومکمل کارکردگی کہا جاتا ہے۔مکمل کارکردگی مریض کو خود کو سمجھنے ،مسئلہ کی وجہ کو جاننے اور سامنے لائی گئی باتوں کو اس کی انا سے جوڑنے کے کام میں مدد کرتی ہے۔
مکمل کارکردگی کے نتیجہ میں بصیرت حاصل ہوتی ہے۔ بصیرت اچانک نہیں پیداہوتی بلکہ یہ رفتہ رفتہ ہونے والا عمل ہے جس میں لاشعوری یاد داشت بار بار علم و شعور میں آتی ہے۔ان لاشعوری واقعات اور یاد داشت کامنتقلی میں دوبارہ تجربہ ہوتا ہے اور یہ مکمل کارکردگی ہیں۔ چونکہ یہ عمل لگاتار چلتا رہتا ہے اس لیے مریض اپنے آپ کو جذباتی و عقلی طور پر بہتر ڈھنگ سے سمجھنا شروع کردیتا ہے اور اسے اپنے مسائل و تصادم کی بصیرت حاصل ہونے لگتی ہے۔ عقلی سمجھ اورذہنی بصیرت کہتے ہیں جذباتوں کو سمجھنا ، اپنے غیر موافق رد عمل کو تسلیم کرنا جو ماضی میں ناخوشگوار واقعات کے طورپر ہوئے ہوں اور اپنے جذبات کو بدلنے کی خواہش کے ساتھ ساتھ ان میں تبدیلی لانا ہی جذباتی سوجھ بوجھ کہلاتی ہے۔بصیرت کسی علاج کی آخری منزل ہوتی ہے کیونکہ مریض اس میں اپنے بارے میں ایک نئی سمجھ قائم کرلیتا ہے اس کے بعدماضی کے تصادم دفاعی میکانیت اور جسمانی علامتیں اب باقی نہیں رہتیں اور مریض نفسیاتی طور پر ایک صحت مند انسان ہو جاتا ہے۔ اس مرحلہ میں تحلیل نفس (Psychoanalysis) کا کام پورا ہوجاتا ہے۔
علاج کی مدّت
تحلیل نفسی کئی سالوں تک جاری رہتی ہے ایک گھنٹے کی میقات کے ساتھ ہر ہفتے میں4—5 دن کے لیے۔ یہ ایک گہرا علاج ہے۔پہلا مرحلہ شروعاتی دور کا ہوتا ہے۔ اس میں مریض کو معمول کی واقفیت ہوتی ہے، وہ ماہر تحلیل کارکے ساتھ معالجاتی تعلقات قائم کرتا ہے ،ماضی اور موجودہ تکلیف دہ حالات کے بارے میں شعور سے حاصل سطحی موادکو حافظے میں لانے کے عمل سے کچھ سکون محسوس کرتا ہے۔دوسرا مرحلہ بیچ کا دور ہوتا ہے جو ایک طویل عمل ہے۔اس میں مریض کی طرف سے منتقلی،مزاحمت ،محاذآرائی اور صراحت یعنی معالج کی طرف سے پوری کارکردگی کی اہمیت ہوتی ہے۔ یہ سارے عمل آخر کار مریض میں سوجھ بوجھ پیدا کرتے ہیں۔ تیسرا مرحلہ اختتام کا مرحلہ ہوتا ہے جس میں تحلیل کارکے ساتھ تعلقات ختم ہوجاتے ہیں اور مریض علاج چھوڑنے کے لیے تیار ہوتا ہے۔
کرداری علاج
کرداری معالجے کی اولین شرط ہے کہ نفسی تکالیف غیر مناسب کرداری وضع یا سوچنے سے ہوتی ہے۔ لہٰذاحال میں مریض کے کردار اور افکار پر زور دیتا ہے۔ ماضی صرف غیر مناسب سوچ وطرز عمل کے بناؤ کو سمجھنے کے لیے کارگر ہوتا ہے۔ اس میں ماضی کو سرگرم یافعال نہیں کیا جاتا ہے صرف ناقص وضع کو موجودہ طورپردرست کیا جاتا ہے ۔
سیکھنے کے نظریاتی اصول کا کلینکی اطلاق ہی کرداری علاج پرہوتاہے کرداری علاج میں مخصوص تکنیک کا ایک بڑا سیٹ ہے جو مداخلت کرتا ہے۔ یہ کوئی متحدہ نظریہ نہیں ہے، جس کا اطلاق تشخیص اورموجود علامتوں سے پرے ہو۔ کسی خاص تکنیک یااطلاقی مداخلت کے انتخاب میں مریض کی علامتیں اور ان کی طبی جانچ رہبری کا کام کرتی ہے۔ خوف کی زیادتی کے علاج میں کسی تکنیک کے ایک سیٹ کی ضرورت ہوگی جب کہ غصہ کی حالت میں دیگر سیٹ کی ضرورت ہوگی ایک اُداس مریض کا ،تشویش میں مبتلامریض سے بہتر طریقہ سے علاج ہوگا۔ طرز علاج کی بنیاد غیر مناسب طرز عمل کی وضع اوروہ بات جو غیر مناسب طرز عمل کو جاری و مستحکم رکھتی ہیں پر ہوتا ہے۔ اور وہ طریقہ جو انھیں بدل سکتاہے ان پر بھی ہوتا ہے۔
علاج کا طریقہ
ایسے مریض جن میں نفسیاتی پریشانیاں اور جسمانی علامتیں پائی جاتی ہیں جو جسمانی بیماری نہیں کہی جا سکتی،اس کے کرداری وضع کے تجزیے کے لیے انٹرویو لیا جاتا ہے ۔کرداری تجزیے گذشتہ ناقص سیکھ اور عوامل ناقص سیکھ کو برقرار اور جاری رکھتے ہیں کو جاننے کے لیے کیا جاتا ہے۔ناقص کردار ایسے طرز عمل ہیں جو مریض میں تکلیفیں پیدا کرتے ہیں۔سابقہ عوامل وجوہاتی عناصرہیں جو مریض کو اس طرح کے برتاؤ کے لیے تیار کرتے ہیں۔ اسے قائم رکھنے والے عوامل وہ ہیں جس کی و جہ سے موجودہ طرز عمل قائم رہتا ہے۔ مثال کے طور پر ایک جوان آدمی جو سگریٹ پینے کی بری عادت کا شکار ہے،وہ سگریٹ چھوڑنے میں مدد چاہتا ہے۔کرداری تجزیے کا اہتمام مریض اور اس کی فیملی کے ممبران سے انٹرویو لینے کے ذریعہ کیا جاتا ہے جس سے، یہ پتا چلتا ہے کہ اس شخص نے سالانہ امتحان کی تیاری کے وقت سگریٹ پینا شروع کیا۔ اس نے سگریٹ پینے سے تشویش کی شدت میں کمی کا ذکر کیا۔ اس طرح تشویش بڑھانے والے جزو اس کا سبب بن جاتے ہیں۔راحت کا احساس اس کے لیے سگریٹ جاری رکھنے کا سبب بن جاتا ہے۔ اور مریض سگریٹ کو ایک عادت کے طورپر جاری رکھنے کا سبب بن جاتا ہے۔ مریض سگریٹ کو ایک عادت کی طرح سیکھ لیتا ہے جو اندیشہ سے آرام پانے کی و جہ سے مستحکم ہوجاتا ہے۔
ایک بار جب تکلیف دینے والے غیر مناسب طرز عمل کی شناخت ہو جاتی ہے تو اس کے علاج کے لیے ایک خاص منصوبہ کا انتخاب کرلیاجاتا ہے۔ اس علاج کا مقصد غیر مناسب طرزعمل کو بھلا کر یا ختم کر کے اس کی جگہ ایک مناسب طرز عمل کی وضع کو قائم کرنا ہوتا ہے۔ معالج اسے مقدم عمل اور مؤخر عمل قائمکرکے پورا کرتا ہے۔مقدم عمل کسی ایسی چیز کو تبدیلی کرنے کے ذریعہ جو ایسے برتاؤ میں پہلے سے موجود ہوتی ہے،اس کے کردار پر قابو پاتا ہے۔ اس طرح کی تبدیلی کسی خاص نتیجہ کو مضبوطی دینے والے اسباب کی قدر کو بڑھایا گھٹاکرکی جاسکتی ہے۔ اسے عملیہ قائم کرنا کہا جاتا ہے۔ مثال کے طور پر اگر کوئی بچہ رات کا کھانا کھانے میں پریشان کرتا ہے توعملیہ انجام دینے کے طور پر اسے چائے کے وقت دیے جانے والے کھانے کی مقدار میں کمی کرنی ہوگی اسی سے اس کے رات کے کھانے کی بھوک بڑھے گی اور اس کے لیے رات کے کھانے کی قدر میں اضافہ ہوگا۔ مزید بچہ کے ڈھنگ سے کھالینے پر اس کی تعریف کرنے سے اس کے اس طرز عمل کی حوصلہ افزائی ہوتی ہے۔ چائے کے وقت کھانے میں کمی اسبابی وضاحت ہے اور اس کے کھالینے پر تعریف کرنا نتیجہ کی وضاحت ہے۔ اس سے رات کے کھانے کی عادت بچہ میں پیدا ہوجاتی ہے۔
کرداری تکنیک
طرز عمل میں تبدیلی کے لیے کئی تکنیک موجود ہیں۔ ان سبھی تکنیک کے اصول مریض کے ابھرنے کی سطح میں کمی لانے، طرز عمل کوکلاسیکی التزام کے ذریعہ بدلنے ساتھ ہی
ساتھ ضرورت پڑنے پرخیالی آموزشی طریقہ عمل کا استعمال کرنا شامل ہے۔
منفی تقویت (Negative reinforcement) اوراکراہی التزام (Aversive conditioning) طرز عملکو تبدیل کرنے کی دو اہم تکنیک ہے۔ جیسا کہ آپ گیارھویں درجہ میں مطالعہ کرچکے ہیں کہ منفی تقویت (Negative reinforcement) کا مطلب ایسی خواہشات کو اپنانا ہے جس کا نتیجہ تکلیف دہ اور جو ناپسند ہوتا ہے۔ مثال کے طور پر ایک استاد کسی ایسے بچہ کو ڈانٹتا ہے جو کلاس میں شور مچاتا ہے اسے ہی منفی اکراہی التزام کہا جاتا ہے۔
اکراہی التزام کا مطلب ایسے ناپسندیدہ عمل کو دہراناہے جس کا نتیجہ بھی تکلیف دینے والا ہے مثلاً ایک الکوحل پینے والے کو بجلی کا ایک جھٹکا دیا جاتا ہے۔ اور اسے الکوحل کو سونگھنے کے لیے کہا جاتا ہے۔ ان دونوں چیزوں کو بار بار ساتھ میں کرنے پر الکوحل کی مہک اسی طرح بیزاری پیدا کرتی ہے جس طرح سے بجلی کے جھٹکے جو اس سے منسلک ہے۔اورفردالکوحل ترک کردے گا۔ اگر معقول طرزعمل کبھی کبھی ہوتاہے تو اسے ایجابی یامثبت تقویت فراہم کی جاتی ہے تاکہ اس گھاٹے کو کم کیا جاسکے۔ مثال کے طور پر اگر کوئی بچہ ہوم ورکروزانہ نہیں کرتا ہے تو اس کی ماں اثباتی تقویت کا استعمال کرسکتی ہے جس کے تحت وہ بچے کو ہوم ورک وقت پر پورا کردینے پر اچھا اچھا کھانا فراہم کرے۔ کھانے کی شکل میں ایجابی تقویت بچہ میں وقت پر ہوم ورک کرنے کے طرز عمل کو بڑھائے گی۔ جن لوگوں میں کرداری مسائل پائے جاتے ہیں انہیں ٹوکن کی شکل میں انعام معقول طرز عمل کے ہونے پر دیا جاسکتا ہے۔ ان ٹوکنوں کو جمع کرکے ان کے بدلے مریض کے گھومنے یا بچہ کو کھلانے پلانے جیسے انعام دیے جاسکتے ہیں۔ اسے ٹوکن اکونومی (Token Economy) کے نام سے جانا جاتا ہے۔
باکس 2.5
طریقۂ استراحت یا استرخا
تشویش کسی نفسیاتی پریشانی کے اظہار کا طریقہ ہے جس کے لیے مریض علاج چاہتا ہے۔کرداری معالج تشویش ابھارنے کی سطح میں اضافہ کے طورپردیکھتے ہیں اس بناپر یہ ناقص برتاؤ کے سبب کی حیثیت سے کام مقدم عامل کے طورپرکرتا ہے۔ کوئی مریض اسے کم کرنے کے لیے سگریٹ کا استعمال کرسکتا ہے وہ اس کے سبب دیگر سرگرمیوں میں بھی الجھ سکتا ہے جیسے کھانے میں یا اپنی پڑھائی پر زیادہ دیر تک دھیان نہیں دے پائے۔ اس لیے اندیشہ میں کمی سے دوسرے طرز عمل جیسے زیادہ کھانا، سگریٹ کے استعمال وغیرہ میں بھی کمی ہوگی۔ طریقہ استراحت کا استعمال اندیشہ میں کمی لانے کے لیے کیا جاتا ہے۔ مثال کے طور پرتدریجی عضلاتی استراحت اورمراقبہ آرام کی کیفیت لاتا ہے۔ تدریجی عضلاتی استراحت میں مریض کو یہ سکھایا جاتا ہے کہ عضلاتی تناؤ سے واقف ہونے کے لیے اپنے عضلات کو کھینچیں ۔ مریض کے عضلات کے کھینچاؤ کے طریقہ سیکھ لینے کے بعدآپ سے کہا جاتا ہے کہ آپ تناؤ کو جانے دیں۔ مریض کو یہ کہا جاتا ہے کہ کھینچاؤ وہ ہے جو اس میں ابھی موجود ہے اور اسے اس کے برخلاف کرنا ہے۔ ایسا بار بار کرنے سے مریض جسم کے سبھی عضلات کو آرام دینا سیکھ لیتا ہے۔ اب اس باب کے بعد والے حصہ میں مراقبہ کے بارے میں پڑھیں گے۔
غیر مناسب طرز عمل میں کمی اور معقول طرز عمل میں اضافہ ساتھ ساتھ مختلف تفرقی تقویت (Differential reinforcement) کے ذریعہ کیا جاسکتا ہے۔ مناسب طرز عمل کے لیے اثباتی اور غیر مناسب طرز عمل کے لیے منفی تقویت کو ساتھ ساتھ استعمال میں لانا بھی ایک طریقہ ہے۔ دوسرا طریقہ یہ ہے کہ مناسب طرز عمل کو ایجابی مضبوطی فراہم کی جائے اور غیر مناسب طرز عمل کو نظر انداز کردیا جائے دوسرا طریقہ کار کم تکلیف دینے والا اور زیادہ اثردار ہوتا ہے۔ مثال کے طور پر ایک لڑکی جب اس کے کہنے پر فلم نہیں دکھائی جاتی ہے۔تووہ روٹھ جاتی ہے اور روتی ہے۔ والدین کو یہ کہا جاتا ہے کہ جب وہ نہ روئے اور نہ روٹھے تو اسے فلم دکھائیں اور جب وہ روئے اور روٹھے تو نہ دکھائیں۔ مریض کے والدین کو یہ بھی ہدایت دی جاتی ہے کہ لڑکی کے رونے و روٹھنے کو نظر انداز کردیں ۔ اسے فلم دکھانے کے لیے کہنا جو ایک مناسب طرز عمل ہے اس میں اضافہ ہوتا ہے اور رونے و روٹھنے کا طرز عمل جوغیر مناسب ہے اس میں کمی آتی ہے۔
آپ بے وجہ خوف کے بارے میں پچھلے باب میں پڑھ چکے ہیں۔ منظم ازالہ تحسس ایک طریقہ کار ہے جسے wolpe نے متعارف کیاتھا۔ بے وجہ خوف کے علاج کے لیے دیا۔ اس میں مریض کا انٹرویو اس کے اندر خوف بڑھانے والے حالات کی معلومات کے لیے کیا جاتا ہے معالج اندیشہ پیدا کرنے والے محرک (stimulies) کی ایک فہرست اس طرح تیار کرتا ہے کہ کم اندیشہ دینے والے محرک فہرست کے پیچھے میں ہوا کرتے ہیں۔ معالج پہلے مریض کو آرام کراتا ہے اور کہتا ہے کہ وہ سب سے کم اندیشہ دینے والے حالات کے بارے میں سوچیں ۔ باکس 5.2 میں آرام کرانے کے طریقہ کی تفصیل بتائی گئی ہے۔ مریض کو یہ کہا جاتا ہے کہ کسی طرح کے کھینچاؤ کے احساس ہونے پر اندیشہ دینے والے حالات کے بارے میں سوچنا بند کردیں۔ میقات کے آخر میں مریض آرام کرتے ہوئے زیادہ سے زیادہ خوفناک حالات کے بارے میں سوچنے لگتا ہے۔ اس طرح مریض کامنظم سب حساسیت (Systematic desensitization) ہوجاتی ہے۔
یہاں دوطرفہ اظہاربستگی (reciprocal inhibition) کے اصول کام کرتے ہیں اس اصول کے مطابق دو مخالف قوتوں کی ایک ساتھ موجودگی سے کمزور طاقت میں رکاوٹ آتی ہے۔ اس طرح آرام کرنے کا ردِ عمل پہلے قائم ہوتا ہے اور کم اندیشہ دینے والے حالات کا تصور اور اندیشہ سے آرام کے ذریعہ چھٹکارا ہوتا ہے۔ آگے مریض زیادہ اندیشہ دینے والے حالات کا تصور بھی آرام کی حالت میں ہونے کی وجہ سے کرسکتا ہے۔ ماڈلنگ ایک طریقۂ کار ہے جس میں مریض ایک خاص انداز میں طرز عمل کرنا سیکھتا ہے جسے وہ کسی نمونہ یا معالج کو دیکھ کر جو شروع میں ایک رول ماڈل کی حیثیت سے کام کرتے ہیں۔ اکراہی آموزش یعنی دوسروں کو دیکھ کر سیکھنا ،کا استعمال اور طرز عمل میں چھوٹی چھوٹی تبدیلیوں پر نوازنا بھی ایک طریقۂ کار ہے۔
کرداری کی متعدد مختلف تکنیکیں ۔کرداری تجزیہ پختگی معالج کے ہنر پر منحصر ہوتی ہے۔ ساتھ ہی ساتھ مناسب تکنیکیں بھی معالج کے ہنرپرہی منحصر ہوتی ہیں۔
وقوفی علاج
وقوفی معالجات میں غیرمعقول افکاروعقائد میں نفسیاتی پریشانیوں کے اسباب تلاش کیے جاتے ہیں۔ البرٹ ایلیس نے معقول جذباتی علاج (Rational Emotive therapy) (RET) وضع کیا۔ اس علاج کا بنیادی نظریہ یہ ہےکہ نامعقول عقیدہ سابقہ حالات اور ان کے نتائج کے بیچ ثالث کا کردارنبھاتی ہے۔ RET کا پہلا قدم اسبابِ عقیدۂ نتائج کی تحلیل کرناہے جونفسیاتی دباؤ کا سبب بنتے ہیں انھیں نوٹ کیا جاتا ہے۔اس میں مریض کا انٹرویو بھی لیا جاتا ہے تاکہ غیرمعقول عقیدہ کا پتہ لگایا جاسکے جو موجودہ حقیقت کو توڑ مروڑ دیتی ہیں۔ نامعقول عقیدہ کو ہوسکتا ہے کہ کسی ماحول میں تجرباتی شہادت کا سہارانہ ملے۔ان عقائد کی خصوصیت کی وضاحت ہونی چاہیے ،پر مشتمل طرزفکر کے ساتھ۔ یعنی اعتماد ہے یا کوئی چیز ضروری طور پرہونی چاہیے،کے ایک مخصوص انداز میں ہونی چاہیے۔غیر معقول عقائد کی مثالیں ہیں، ’’کسی شخص کو ہمیشہ سبھی لوگوںکو پیار کرناچاہیے۔‘‘ ’’ انسان کی پریشانی کی و جہ بیرونی واقعات ہیں جن پر کسی کو کوئی اختیار نہیں ہوتا‘‘ وغیرہ نامعقول عقیدہ کی مثالیں ہیں مقدم حالات کی مسخ ادراک جو نامعقول عقیدہ کی وجہ سے ہوتی ہیں،میں نتیجہ کے طور پر منفی جذبات و طرز عمل دیکھنے کو ملتا ہے۔ نامعقول عقیدہ کا اندازۂ قدر انٹرویو اور سوال نامے کے ذریعہ لگایا جاسکتا ہے۔ RET کے طریقہ عمل میں معالج نامعقول عقیدہ کی غیرہدایتی سوال نامے کے عملکے ذریعہ تردید کردیتا ہے سوال کی نوعیت براہ راست نہ ہوکر سیدھی سادی ہوتی ہے۔ سوالات مریض کو اپنی زندگی اور اس کے مسائل کے بارے میں تہہ تک سوچنے کے لیے آمادہ کرتے ہیں۔ رفتہ رفتہ مریض اپنی زندگی کے فلسفہ میں تبدیلی لاکر اپنے نامعقول عقیدہ میں تبدیلی لانے کے قابل ہوجاتا ہے۔ اس طرح معقول نظام عقیدہ نامعقول نظام عقیدہ کی جگہ لے لیتا ہے اور نفسی دباؤ میں کمی آجاتی ہے۔
سرگرمی5.3
آپ کا دوست امتحان سے پہلے بہت تذبذب اورگھبراہٹ کا شکار ہوجاتا ہے وہ ادھرسے ادھرٹہلتارہتا ہے،پڑھائی نہیں کرپاتا اور اسے ایسا محسوس ہوتا ہے کہ جو بھی پڑھا تھا وہ اسے بھول چکا ہے۔ اس کی مدد کی کوشش کریں وہ گہری سانس لے اور ، اسے 5-10 سیکنڈ تک روکے اور تب اسے (سانس) باہرچھوڑے ۔ اسے یہ عمل 5-10بار دہرانے کے لیے کہیں اور اپنی سانس پر توجہ دینے کے لیے بھی کہیں۔ آپ بھی اس عمل کو گھبراہٹ کے وقت کرسکتے ہیں۔
اپنے نامعقول عقیدہ میں تبدیلی لانے کے قابل ہوجاتا ہے۔ اس طرح معقول نظام عقیدہ نامعقول نظام عقیدہ کی جگہ لے لیتا ہے اور نفسی دباؤ میں کمی آجاتی ہے۔
وقوفی علاج کا ایک دوسرا طریقہ ایرون کا ہے۔ نفسی دباؤ سے متعلق ان کے اصول کی امتیازی خصوصیت اندیشہ یا مایوسی ہے جو یہ بیان کرتی ہے کہ خاندان اورسماج سے حاصل ہوئے بچپن کے تجربے بنیادی نظام عمل تیار کرتے ہیں جس میں انسان کے عقائدو طریقۂ عمل شامل ہوتا ہے۔ اس طرح ایک مریض جسے ایک بچے کی حیثیت سے اس کے والدین نے نظر انداز کیاہو، ایک احساس پایا جاتا ہے کہ اسے لوگ نہیں چاہتے۔ ان کی زندگی میں ایک اہم واقعہ ہوتا ہے۔ اس کا اسکول میں اپنے استاد کے ذریعہ سرے عام مذاق اڑایاگیا ۔ اس حساس واقعہ نے اس میں وہ بنیادی احساس پیدا کیا کہ مجھے لوگ نہیں چاہتے جس کی وجہ سے اس میں لازمی منفی خیالات پیدا ہوگئے۔ یہ منفی خیالات نامعقول خیالات ہیں کہ لوگ مجھے چاہتے نہیں ، میں بدصورت ہوں، میں بیوقوف ہوں ، میں آگے ترقی نہیں کرسکتاوغیرہ ایسے منفی خیالات کی امتیازی خصوصیات وقوفی مسخ شدگی ہے۔ وقوفی مسخ شدگی ایک طریقۂ فکر ہے جس کی نوعیت ایک عام سوچ کی طرح ہوتی ہے لیکن یہ حقیقت کو منفی طور پر توڑ مروڑ دیتی ہے۔ فکر کا یہ اندازاعتدال سے متجاوز وقوفی ساخت کہا جاتا ہے۔ اس سے سماجی حقیقت سے متعلق وقوفی عمل میں بھول ہوجاتی ہے۔
ایسے خیالات کے بار بار آنے سے اندیشہ اوراداسی کا احساس ہونے لگتا ہے ۔ معالج ایسے سوالات کا استعمال کرتا ہے جو سیدھا مریض کے عقیدہ اور فکر کو مجروح کرنے والانہ ہوایسے سوالات کی مثال،لوگ آپ سے محبت کس وجہ سے کریں؟ آپ کے خیال میں کامیابی کا کیا مطلب ہوتا ہے؟ وغیرہ ایسے سوالات مریض کو اپنی منفی سوچ کے مخالف سمت سوچنے پر مجبور کرتے ہیں جہاں سے اسے اپنے نظام ناقص افعال کے بارے میں سوجھ بوجھ ملتی ہے اور وہ اپنے وقوفی ڈھانچہ میں تبدیلی لاتا ہے۔ اس علاج کا یہی مقصد ہوتا ہے کہ اس طرح کے وقوفی ردوبدل ہوں جس سے کہ اندیشہاور مایوسی میں کمی لائی جاسکے۔کرداری علاج کی طرح وقوفی علاج بھی مریض کے خصوصی مسائل کو حل کرنے پر توجہ دیتا ہے۔نفسیاتی حرکی علاج کے برعکس کرداری علاج میں کھلاپن ہے یعنی معالج اپنے طریقۂ عمل میں مریض کو شامل کرتا ہے۔ یہ چھوٹا ہوتا ہے جو 10-20 دن کی میقات میں ختم ہوتا ہے۔
وقوفی کرداری علاج
موجودہ دور میں وقوفی کرداری علاج (CBT) سب سے مقبول ہے۔ نفسی علاج کے نتائج و تاثرات سے متعلق تحقیقات سے یہ رائے قائم ہوچکی ہے کہ CBT بہت سارے نفسیاتی انتشار جیسے اندیشہ، اداسی، گھبراہٹ اورسرحدی شخصیت انتشار وغیرہ کے لیے ایک مختصر اوربااثر علاج ہے۔ CBT نفسی مریضیات کی خاکہ نگاری کے تئیں ایک حیاتی نفسیاتی سماجی نظریہ اپناتاہے۔ یہ وقوفی علاج کو کرداری طریقۂ کار کے ساتھ جوڑتا ہے۔
منطق یہ ہے کہ کسی مریض کی پریشانی کی جڑ حیاتیاتی، نفسیاتی اور سماجی معلومات میں ہوتی ہے۔ اس لیے استراحت کے طریقۂ عمل کے ذریعہ حیاتاتی پہلو ماحولیاتی خوش اسلوبی کے ساتھ ایک قابل فہم طریقۂ کاربناتی ہے جس کا استعمال آسان ، مؤثر اور مختلف قسم کے نفسیاتی انتشار کے علاج کے لیے مناسب بھی ہے۔
انسان مرکزی وجودی علاج
انسانی وجودی معالجات کا یہ ماننا ہے کہ نفسیاتی تکالیف تنہائی، علاحدگی اور زندگی میں ناکامی اور مقصد حاصل نہ ہونے کی وجہ سے پیدا ہوتی ہیں۔
انسان ذاتی نشوونما،خودیافتگی اور جذباتی فروغ کی خلقی ضرورت کے لیے متحرک ہوتا ہے۔ جب سماج اور خاندان کے ذریعہ ان ضرورتوں کی تکمیل میں رکاوٹ پیدا ہوتی ہے تو ایسی صورت میں اسے نفسیاتی پریشانیوں کا سامنا کرنا پڑتا ہے۔ خودیافتگی کی تعریف ایک پیدائشی قوت کی حیثیت سے کی گئی ہے جو انسان کو ایک زیادہ پیچیدہ ،متوازن اورمربوط ہونا یعنی پیچیدگی حاصل کرنا اور بغیر بکھرے،توازن قائم رکھنے سے کی جاتی ہے۔مربوط ہونے کا مطلب،پورے ہونے کا احساس ،ایک مکمل انسان ہونے کے سبب مختلف تجربات کا سامنا کرنے کے باوجود وہ شخص ویسا ہی رہتا ہے۔ جس طرح سے کھانا اور پانی کی کمی کی و جہ سے پریشانی پیدا ہوتی ہے ٹھیک اسی طرح خودیافتگیکی ناکامی کی و جہ سے بھی پریشانیاں پیدا ہوتی ہیں۔صحت یابی تبھی آتی ہے جب مریض اپنی زندگی میں خودیافتگی یا خودتحقق کی راہ میں اسے رکاوٹ کے طورپر سمجھ پاتا ہے اور اسے دور کرپاتاہے۔خودیافتگی کے لیے کھل کر جذباتوں کا اظہار ضروری ہوتا ہے۔ خاندان اور سماج جذباتی اظہار پر پابندی عائد کرتا ہے کیونکہ اس سے تخریبی قوت کے مسلط ہونے سے سماج کو نقصان پہنچ سکتا ہے۔ جذباتی اظہار پر اس طرح کی پابندی سے تخریبی طرز عمل اور منفی جذبات ابھرکر سامنے آتے ہیں اس طرح یہ علاج ایک جائز بصیرتی اورقابل قبول ماحول تیار کرتا ہے جس میں مریض کے جذبات کا کھلا اظہار ممکن ہوتا ہے ،پیچیدگی اور توازن کی تکمیل حاصل ہوسکتی ہے۔ اس میں بنیادی نظریہ یہ ہے کہ مریض کو اپنے طرز عمل کو کنٹرول کرنے کی آزادی اورذمہ داری ہوتی ہے ۔معالج صرف ایک رہبراورسہولت فراہم کرنے والا ہوتا ہے۔ مریض خود علاج کی کامیابی کے لیے ذمہ دار ہوتا ہے۔ اس علاج کا اہم مقصد مریض میں شعور کو بڑھانا ہوتا ہے۔ صحت یابی مریض کے اپنے بارے میں بے نظیر سوجھ بوجھ کے ذریعہ آتی ہے۔ مریض اپنی نمو کے لیے کام شروع کرتا ہے جس کی وجہ سے اس میں صحت یابی آتی ہے۔
وجودی علاج
Victor Frankl نام کے ایک نفسیاتی امراض کے معالج اور علم الاعصاب کے ماہر شخص نے علاج بذریعہ الفاظ کا نظریہ پیش کیا۔ Logo روح کے لیے ایک یونانی لفظ ہے اور’’Logotherapy ‘‘کا مطلب روح کاعلاج ہے۔ Frankl نے اس عمل کو یہاں تک کہ خطرناک حالات میں بھی معنوی عمل بتایاہے۔مطلب جاننے کی بنیاد اپنے وجود کی روحانی حقیقت تلاش کرنے کی کوشش ہے۔ ٹھیک ویسے ہی جیسے کہ لاشعور جس میں خواہشات دبی ہوتی ہیں
(باب 2 دیکھیں) ایک روحانی لاشعور بھی ہوتا ہے۔ جس میں محبت کا ذخیرہ جمالیاتی شعور اورزندگی کی قدر کا ذخیرہ ہوتا ہے ۔ اعصابی اندیشہ تب ہوتا ہے جب کسی شخص کی زندگی کے مسائل کو جسمانی، نفسیاتی اور روحانی پہلوؤں سے جوڑ دیا جاتا ہے۔ Frankl نے روحانی تشویش کے کردارپر بھی زوردیاجس کا نتیجہ مہمل ہوتا ہے اور اس لیے اسے وجودی اندیشہ بھی کہا جاسکتا ہے۔ یعنی اعصابی اندیشہ کی بنیاد روحانی ہوتی ہے۔علاج بذریعہ الفاظ کا مقصد اپنے مطلب کو جاننا و زندگی میں چاہے کیسے بھی حالات ہوں اس کی ذمہ داری کو سمجھنا۔ معالج مریض کی زندگی کی اس انوکھی نوعیت پر زور دیتا ہے اور اسے اپنی زندگی کے مطلب کو سمجھنے میں مدد کرتا ہے۔
علاج بذریعہ الفاظ میں معالج کھلے دل سے اپنے احساسات ، اقدار اور مریض کے ساتھ اپنی وجود کا ذکر کرتا ہے۔ جس میں ابھی اسی وقت پر زور دیا جاتا ہے۔ اس میں منتقلی کی شدّت سے حوصلہ شکنی کی جاتی ہے۔ معالج مریض کوحال کی بے وسیلگی کے بارے میں یاد دہانی کراتا ہے۔ اس مقصدسے مریض کو اپنے وجود کامطلب جاننے میں اس کی مدد کرنا ہے۔
مریض مرتکز علاج
مریض مرتکز علاج Carl Rogers نے دیا ہے۔راجرس نے سائنسی تحقیق کو مریض کے انفرادی عمل دستور کے ساتھ جوڑ دیا ہے۔راجرس نے نفسی علاج میں خودی کے تصور کو پیش کیا جو کسی انسان کے اندر آزادی اورمرضی سے رہتی ہے۔ اس علاج میں گرم جوشی کا رشتہ دیکھنے کو ملتا ہے۔ جس میں مرض اپنے بکھرے احساسات کو یاد کرپاتا ہے۔ معالج ہم احساس ہونے کا مظاہرہ کرتا ہے۔ وہ مریض کے تجربہ کو اس طرح سمجھتا ہے گویا کہ وہ اس کے ساتھ ہے اور وہ مریض کے لیے بلا شرط مثبت خیال رکھتا ہے یعنی مریض کو پوری طرح سے جیساوہ ہے اسی طرح اپنا لیتا ہے گویا کہ معالج و مریض کے اس ہم احساس دونوں کے بیچ جذباتی گونج پیدا ہوتی ہے۔ بلاشرط مثبت خیال اس بات کی نشاندہی کرتا ہے کہ معالج مریض کے ذریعہ علاج کے دوران بتائی گئی باتوں یا کیے گئے کاموں پر منحصر نہیں ہوتا ہے۔ یہ منفردغیرمشروط گرم جوشی اس بات کا تعین کرتی ہے کہ مریض خود کو بے خطر محسوس کررہا ہے اور وہ معالج پر بھروسہ کرسکتا ہے ۔ مریض خود کو اس حد تک محفوظ محسوس کرتا ہے کہ وہ اپنے احساسات کو ظاہر کردیتا ہے۔ معالج مریض کے احساسات کو ایک غیر بصری انداز میں دیکھتا ہے۔ یہ انداز نظر مریض کے بیانات کو سنوار کرکیا جاتا ہے یعنی اس معنی کو سمجھنے کے لیے معلومات میں وضاحت کی ضرورت ہوتی ہے۔ اس طرح کا خیال مریض کو مکمل بنانے میں مدد کرتا ہے۔ مطابقت کو بڑھا کر ذاتی تعلقات کو بہتر بنایا جاتا ہے خلاصہ یہ کہ یہ علاج مریض کو معالج کے سامنے حقیقی کرداروضع کرنے میں مدد کرتا ہے جو اس کے لیے ایک مدد گار کی حیثیت سے کام کرتا ہے۔
گیسٹالٹ نظریہ علاج
جرمنی لفظ گیسٹالٹ کا مطلب پورا یا مکمل ہوناہے۔ اس علاج کو (Frits) Freiderick Perls نے اپنی اہلیہ Laura Perls کے ساتھ مل کر پیش کیا ۔ Gestalt Therapy کا مقصد انسان کے ذاتی شعور کو بڑھانا ہے وہ خود کو اپناناتھا اس میں مریض کو جسمانی عملیات و جذبات کو جو شعور کے باہر دبے ہوئے ہیں ،کی پہچان کرنا سکھایا جاتا ہے ۔ معالج مریض کے تصادم اور احساسات سے متعلق تصورات کو باہر نکالنے میں مدد کرکے اسی کام کو انجام دیتا ہے۔ اس علاج کا استعمال کسی گروپ پر بھی کیا جاسکتا ہے۔
حیاتی طبّی علاج
نفسی پریشانیوں کے علاج میں دواؤں کا استعمال کیا جاسکتا ہے۔ اپنی بیماری کے علاج کے لیے دواؤں کے نسخہ کا استعمال پڑھے لکھے طبی پیشے ور کرتے ہیں جنھیں نفسی معالج کہاجاتاہے۔ وہ طبی ڈاکٹر ہوتے ہیں جن میں ذہنی بیماریوں کے علاج، اس کی تشخیص اورسمجھ میں مہارت ہوتی ہے۔ استعمال کی جانے والی دواؤں کی نوعیت بیماری کی نوعیت پر منحصر ہوتی ہے۔ شدید ذہنی بیماری جیسے انتشارنفسی یادوقطبی انتشار میں دافع نفسیاتی ادویات کی ضرورت ہوتی ہے۔ عام ذہنی بیماری جیسے تعمیمی تشویش یا رجعتی افسردگی میں ہلکی دواؤں کی ضرورت ہوسکتی ہے۔ ذہنی علاج کے لیے جن دواؤں کا استعمال کیا جاتاہے ان کے غلط اثرات بھی ہوسکتے ہیں جنھیں سمجھنا اوردھیان میں رکھنا ضروری ہوتا ہے۔ اس لیے یہ ضروری ہوتا ہے کہ اس طرح کا علاج مناسب طبی نگرانی میں ہو۔ یہاں تک کہ دیسی دوائیں جو ایک عام انسان پڑھائی کرنے کے واسطے جاگنے کے لیے کرتا ہے یا خود کو کسی پارٹی میں حوصلہ مند رکھنے کے لیے کرتا ہے ان کے بھی غلط اثرات ہوتے ہیں۔ ان دواؤں سے اس کی لت پڑجاتی ہے اور وہ دماغ اورجسم کو نقصان پہنچاتی ہے۔ اس لیے خود سے کسی دوا کا استعمال کرنا خطرناک ہوتا ہے ،وہ دماغ کو متاثر کرتی ہے۔
آپ نے فلموں میں ایسے لوگوں کو دیکھا ہوگا جن میں ذہنی انتشار پایا جاتا ہے اور انھیں بجلی کے جھٹکے دیے جاتے ہیں۔برقی تشنجی علاج (ECT) حیاتی طبی علاج کا ایک دوسرا طریقہ ہے۔ اس میں تشنج پیدا کرنے کے لیے مریض کوبرقیرہ کے ذریعہ دماغ میں بجلی کا ہلکا جھٹکا دیا جاتا ہے۔ یہ جھٹکا صرف نفسیاتی معالج ہی دے سکتا ہے۔ اور اسے تب دیا جاتاہے جب مریض میں سدھار کے لیے اسے دینا ضروری ہوتا ہے۔ECT ایک روز مرہ کا طریقۂ علاج نہیں ہے یہ صرف اسی حالت میں دیا جاتا ہے جب دوائیں مریض کی بیماریوں میں کام نہیں کرتی ہیں۔
نفسیاتی علاج میں صحت یابی کے معاون عوامل
جیسا کہ ہم نے پڑھا کہ نفسیاتی علاج نفسیاتی تکالیف کا ایک علاج ہے کئی ایسے اسبابی اجزا ہیں جو صحت یابی کے عمل میں مددگار ہوتے ہیں۔ کچھ ایسے اسبابی اجزا مندرجہ ذیل ہیں۔
1۔ معالج کے ذریعہ اپنا یاگیا طریقۂ کار اور اسے مریض پر لاگو کرنا صحت یابی کا ایک اہم جز ہے۔ اگر کرداری نظام و CBT اسکول کسی تشویش میں مبتلا مریض کی صحت یابی کے لیے اپنایا جاتا ہے تو اس میں آرام کرنے کے طریقۂ کارا ور وقوفی معقولیت زیادہ مددگار ہوتی ہے۔
2۔ معالجاتی تال میل جو معالج و مریض کے بیچ قائم ہو نا بھی صحت یابی کی ایک خوبی ہے کیونکہ یہ معالج کی لگاتار موجودگی اور اس کی گرم جوشی والے احساسات کے ذریعہ پیدا ہوتی ہے۔
3۔ علاج کے شروع میں جب کہ مریض کے مسائل کی نوعیت اور اس کے ذریعہ اظہار کیے گئے جذباتی خیالات کو سمجھنے کے لیے اس کا انٹرویو لیا جاتا ہے۔ جذبات کے اظہار کے اس عمل کو (Catharsis) کہا جاتا ہے اور اس کی اپنی صحت یابی کی خوبیاں ہیں۔
4۔ اس کے علاوہ کئی غیرنوعی اجزا ہیں جن کا تعلق نفسیاتی علاج سے ہے۔ ان میں سے کچھ اجزا مریض سے اور کچھ معالج سے تعلق رکھتے ہیں انھیں غیرنوعی اجزا اس لیے کہا جاتا ہے کیونکہ یہ مختلف نفسیاتی نظام علاج میں مریضوں اور معالج میں پائے جاتے ہیں۔ غیرنوعی اجزا مریضوں میں تبدیلی کی ترغیب علاج کی بنا پر بہتری کی توقع وغیرہ سے تعلق رکھتے ہیں۔ اسے مریض متغیرہ کہا جاتا ہے۔غیرنوعی اجزا جو معالج سے تعلق رکھتے ہیں۔ ان میں بہتر مزاج جذباتی تصادم کی کمی، اچھی صحت کی موجودگی وغیرہ شامل ہیں۔انھیںمعالج متغیرہ کہاجاتا ہے۔
نفسیاتی علاج میں اخلاقیات
کچھ اخلاقی معیار ہوتے ہیں جن کاخیال رکھناپیشہ ور معالج کو ضروری ہوتا ہے وہ درج ذیل ہیں:
1۔ مریض کی مرضی لینے کی ضرورت ہوتی ہے۔
2۔ مریض کے اعتماد کوبرقرار رکھنا ضروری ہوتا ہے۔
3۔ معالج کی کوششوں کا مقصد ذاتی تکالیف و پریشانیوں کو دور کرنا ہونا چاہیے۔
4۔ معالج اورمریض کے تعلقات کی یک جہتی اہمیت رکھتی ہے۔
5۔ انسانی حقوق اوروقار کا احترام کرنا۔
6۔ پیشہ ورانہ اہلیت اورہنر بہت ضروری ہوتی ہے۔
متبادل صورتی علاج
متبادل معالجات کو ایسا اس لیے کہا جاتا ہے کیونکہ یہ روایتی طبی علاج یا نفسی علاج کی متبادل علاجی صورت ہوتی ہیں۔ کئی متبادل معالجات موجود ہیں جیسی مراقبہ (meditation)،سوئی کے ذریعہ علاج،(acupuncture) جڑی بوٹیوں سے علاج، یوگا وغیرہ ۔پچھلے 25 سالوں میں یوگا اورمراقبہ کو نفسیاتی تکالیف کے علاج کی حیثیت سے کافی مقبولیت حاصل ہوئی ہے۔
یوگا ایک قدیم ہندوستانی تکنیک ہے جس کی تفصیل پاتا نجلی کے یوگ سوتر کے اشٹھانگ یوگ میں ملتی ہے۔یوگا جیساکہ عام طور پراسے آج کل کہا جاتا ہے کا مطلب صرف آسن یا جسمانی انداز نشست کے ترکیب یا سانس لینے کے دستور عمل یا پرانایم یا کسی دو کو ملاکرکرناہوتا ہے۔ مراقبے کا مطلب سانس پر توجہ دینے کا کام یا کسی چیز پر یا فکر یا منتر پر غور کرنے کے کام کو کہاجاتا ہے ۔ یہاں دھیان وگیان میں خود کو مشغول کرنا ہوتاہے۔گیان دھیان میں جسے پورے دماغ پر مبنی مراقبہ بھی کہا جاتا ہے کوئی طے شدہ چیز یا فکر دھیان دینے کے لیے نہیں ہوتی ہے۔ اسنان بذات خود جسم کے مختلف احساسات و فکر جو ان کے شعور سے ہوکر گزرتی ہے پر دھیان دیتا ہے بیش ہواداری (Hyperventilation) لانے کے لیے جلدی سانس لینے کی تکنیک جیسا کہ سودرشن کریا یوگ (SKY) میں ہے کہ کم جوکھم کم خرچ والا ایک طریقہ بتایا گیا جسے دباؤ ،تشویش (PTSD) اداسی دباؤ سے متعلق طبی بیماری وغیرہ کے لیے بہت ہی فائدہ مند سمجھاجاتا ہے SKY- کا استعمال صحت عامہ مداخلتی تکنیک (Public health intervention technique) کی حیثیت سے’’ PTSD‘‘ سے چھٹکارا پانے کے لیے کیا جاتا ہے۔یوگ تکنیک کے استعمال سے انسانی فلاح، مزاج، دھیان ،ذہن توجہ اوردباؤ کی برداشتگی میں اضافہ ہوتا ہے۔ ایک ہنرمند استاد سے مناسب تربیت اور آدھے گھنٹہ روزانہ مشق سے اس کے فائدہ میں اضافہ ہوتا ہے نم ہنس (NIMHANS)، ہندوستان، میں ہوئی تحقیقات سے یہ پتا چلا ہے کہ سدرشن کریایوگ سے اداسی اور مایوسی میں کمی آتی ہے۔ زیادہ الکوحل لینے والے مریض جو SKYروزانہ مشق کرتے ہیں میں بھی اداسی اوردباؤ کم ہوتے دیکھا گیا۔ بے خوابی کا علاج یوگا سے ہوتا ہے۔یوگا سونے کا وقت گھٹا دیتاہے اور نیند کی خوبیوںمیں بھی اضافہ کرتا ہے۔
کنڈلنی یوگا جسے امریکا میں پڑھایا جاتا ہے ذہنی بیماریوں کے علاج میں اثردار ہوتا ہے کیلیفورنیایونیورسٹی سانڈیگو،یو۔ایس۔اے۔ میں Institute of non-linear science نے بھی پایا کہ کنڈلنی یوگا بھی OCD کے علاج میں اثردار ہوتاہے کنڈلنی یوگا میں پرانا غم یا سانس کی تکنیک کو منتر کے ساتھ ملاتے ہیں۔ اداسی کے بار بار آنے سے روکنے کے لیے پورے دماغ پر مبنی گیان دھیان یا اُپاسنا مددگار ہوسکتی ہے اس طرح کے گیان دھیان سے مریض کو اپنی جذباتی مہیج کو بہتر طرز کاری میں مدد ملتی ہے اور اس طرح سے مہیج کے ناجائز طرز کاری سے روکتی ہے۔
ذہنی طور پر بیمار لوگوں کی بحالی
نفسی علاج کے دو پہلو ہوتے ہیں یعنی علامتوں میں کمی اور جسمانی کام کاج یا کیفیت زندگی میں بہتری، ہلکی بیماری کی حالت جیسے تعمیمی تشویش رجعتی افسردگی یا خوف کی علامتوں میں کمی کاتعلق زندگی کی کیفیت میں بہتری سے ہے۔بہرحال، شدید قسم کی ذہنی بیماری جیسے انتشارنفسی کی علامتوں میں کمی کا تعلق کیفیت زندگی میں بہتری سے نہیں ہے۔متعدد مریض جو دلچسپی میں کمی کسی کام کو کرنے کی خواہش میں کمی یا لوگوں سے بات چیت کرنے کی خواہش میں کمی جیسی منفی علامتوں میں مبتلا ہوتے ہیں، ایسے لوگوں کے لیے بحالی کی ضرورت ہوتی ہے تاکہ وہ خودکفیل ہوسکیں۔ بحالی کا مقصد ہوتاہے مریض کو طاقتور بنانا تاکہ وہ کسی حد تک سماج کا ایک سود مند رکن بن جائے ۔بحالی میں مریض کوسماجی ہنرمندی کی تربیت ا ور پیشہ جاتی علاج اوروکیشنل علاج دیاجاتا ہے ۔پیشہ جاتی علاج میں مریض کو کچھ ہنر سکھایا جاتا ہے جیسے موم بتی بنانا، کاغذ کا تھیلا بنانا اور بننا اس طرح ان کی مدد کی جاتی ہے تاکہ ان میں کام کرنے کی عادت پڑسکے۔سماجی ہنرمندی کی تربیت سے مریض میں ایسے بین شخصی تعلقات کے فروغ میں مددملتی ہے۔ یہ مددرول پلے اورہدایت کے ذریعہ دی جاتی ہے جس کا مقصد مریض کو سماجی گروپ میں کام کرنے کی تعلیم دینا ہوتا ہے۔ وقوفی تربیت بنیادی وقوفی عمل جیسے دھیان ،ذہن و دیگر کاموں میں اضافہ کے لیے دی جاتی ہے۔ مریض میں خاطر خواہ بہتری آنے کے بعد انھیں اوروکیشنل تربیت دی جاتی ہے جن میں مریض کے ہنر بڑھانے میں مدد کی جاتی ہے تاکہ وہ کوئی سود مند روزگار کرسکیں۔
کلیدی اصطلاحات
متبادل کرداری علاج، حیاتی طبی علاج، مریض مرکزی علاج، وقوفی کرداری علاج ،ہم احساس ہونا، گیسٹالٹ علاج، انسانی فطری علاج ،نفسی حرکی علاج نفسی علاج ، آبادکاری، رکاوٹ ،ذاتی حقیقت جاننا، مصالحاتی تال میل ٹرانسفیرنس، بلاشرط ایجابی لگاؤ۔
خلاصہ
◊ نفسی علاج نفسیاتی تکالیف سے صحت یابی کے لیے ایک طریقہ علاج ہے۔ یہ یکساں طریقۂ علاج نہیں ہے لگ بھگ 400 مختلف قسم کے نفسی علاج ہوتے ہیں۔
◊ نفسی تحلیل طرز عملی اوروقوفی و انسانیت وجودی جیسے کچھ اہم نظام نفسی علاج ہیں ۔ ان میں سے ہر ایک نظام کے اندر کئی نظریہ ہوتے ہیں۔
◊ نفسی علاج کا اہم جزوطبی ترتیب ہوتی ہے یعنی مریض کے مسائل سے متعلق بیانات اور کسی خاص نظریہ علاج کے تحت کسی مریض کا علاج۔
◊ معالجاتی تال میل معالج اور مریض کے درمیان کے تعلقات ہوتے ہیں۔معالج جس پر مریض کو بھروسہ ہوتا ہے اورمعالج مریض کی جانب ہمدردانہ تعلق رکھتا ہے۔
◊ نفسی تکلیف میں مبتلا بڑوں کے نفسی علاج کا اہم طریقہ انفرادی نفسی علاج ہے اس میں معالج کو علاج سے قبل پیشہ ورانہ تربیت کی ضرورت ہوتی ہے۔
◊ Meditation, Yoga جیسے کچھ متبادل معلوجات بھی کچھ مخصوص نفسیاتی تکلیف کے علاج میں اثردار ثابت ہوتی ہیں۔
◊ ذہنی طور پر بیمار لوگوں کی کیفیت زندگی کو بہتر بنانے کے لیے آبادکاری بہت ضروری ہے جب ایک بار ان کی علامتوں میں کمی ہوجائے۔
اعادہ کے سوالات
1۔ نفسی علاج کی نوعیت اوررسائی کو بیان کریں۔ نفسی معالجات میں معالجاتی تعلقات کی اہمیت پر روشنی ڈالیں۔
2۔ نفسی علاج کی مختلف قسمیں کون کون سی ہیں؟ کس بنیاد پر انھیں درجہ بند کیا گیا ہے۔
3۔ معالج مریض سے کہے کہ وہ اپنے سارے جذبات کو بیان کرے یہاں تک کہ بچپن کے تجربات کو بھی ۔ استعمال میں آنے والے تکنیک اورطریقۂ علاج کو بیان کریں۔
4۔ طرز عملی علاج میں استعمال ہونے والی مختلف تکنیک کی وضاحت کریں۔
5۔ ایک مثال کے ساتھ وضاحت کریں کس طرح وقوفی تحریف ہوا کرتی ہیں۔
6۔ کون سے علاج مریض کے ذاتی فروغ اورقوت کو جاننے کو بڑھاوا دیتے ہیں؟ اس طریقۂ علاج کے بارے میں لکھیں جو اسی اصول پر مبنی ہیں۔
7۔ وہ کون سے اسابی اجزا ہیں جو نفسی علاج کے تحت صحت یابی میں مدد کرتے ہیں؟ کچھ متبادل معالجات کی وضاحت کریں۔
8۔ ذہنی طور پر بیمار لوگوں کی آبادکاری کے لیے کون کون سی تکنیک استعمال میں آتی ہیں۔
9۔ ایک سماجی سیکھ کے نظریہ کا بانی چھپکلی سے ہونے والے ڈر کو کس طرح دیکھتا ہے؟ نفسی تحلیل کرنے والااسے کس طرح دیکھتا ہے؟
10۔ کیاالیکٹروکنولسوتھراپی (ECT) کو ذہنی تکالیف کے علاج میں استعمال کرنا چاہیے؟
11۔ وقوفی طرز عملی علاج کس طرح کے مسائل میں سب سے زیادہ مناسب ہوتا ہے؟
پروجیکٹ کی تجاویز
� اسکول میں جب آپ اچھا کرتے ہیں تو اچھے پوائنٹ (سنہرے پوائنٹ یا اسٹار) حاصل کرتے ہیں اور کالے پوائنٹ پاتے ہیں جب آپ غلط کرتے ہیں یہ ٹوکن ایکونمی کا ایک نمونہ ہے اپنے ساتھیوں کی مدد سے آپ تمام اسکول و کلاس روم کے کام کاجوں کی ایک فہرست بنائیں جس کے لیے آپ کو کلاس ٹیچر سے یا دوستوں سے انعام یا تعریفیں ملی ہوں۔ آپ ان تمام کام کاجوں کی بھی ایک فہرست بنائیں جس کی وجہ سے ٹیچر نے سرزنش کی ہو یا دوستو ں نے ناراضگی دکھائی ہو۔
� اپنے ماضی کے کسی ایسے شخص کے بارے میں بیان کریں جنھوں نے لگاتار آپ کے ساتھ ہمدردانہ رویہ رکھا ہو۔ اس کا آپ پر کیا اثر پڑا؟ وضاحت کریں۔
اس طرح کی معلومات اپنے دوسرے دوستوں سے بھی کریں اور ایک رپورٹ تیار کریں۔
ویب لنکس
http://www.sciencedirect.com.
http//allpsych.com.
http://mentalhealth.com
تعلیماتی اشارات
1۔ طلباسے یہ کہا جاسکتا ہے کہ باب 2 میں خودی اور شخصیت میں مطالعہ کی بنیاد پرشخصیت کے کچھ نظریات کے ساتھ مختلف معالجاتی نظریہ کا تعلق قائم کریں۔
2۔ رول پلے اورطلبا سے متعلق کچھ کردار ی امور پر ڈرامے کا انعقاد کریں جیسے دوستوں کے ساتھ رشتہ ٹوٹنے سے طلبا میں دلچسپی ہوگی اور اس میں نفسیات کے اطلاق پر زور ڈالیں۔
3۔ چونکہ علاج ایک ہنر مندی کا کام ہے اس لیے اس میں پیشہ ورانہ ترتیب کی ضرورت ہوتی ہے طلبا کو اس کے استعمال سے بچنا چاہیے۔
4۔ کوئی سرگرمی یا بات چیت جس کا گہرا اثر طلبا کے نفس پر پڑتا ہو، کوٹھیک ڈھنگ سے استاد کے سامنے انجام دینا چاہیے۔