5صنعتی سماج میں تبدیلی اورترقی

5.1صنعتی سماج کاخاکہ(Images of industrial Society)

سماجیات کی بہت سی اہم تصنیفات اس وقت سامنے آئیں جب صنعت کاری نئی نئی تھی اورمشینوں کو اہمیت حاصل ہو رہی تھی۔کارل مارکس،میکس ویبر اورریمل درخائم جیسے مفکرین نے صنعت کے ساتھ بہت سی سماجی خصوصیات منسلک کیں۔جیسے شہرکاری جس میں راست رشتوں کوکافی نقصان پہنچا جو دیہی علاقوں میں پائے جاتے تھے جہاں کے لوگ اپنے کھیتوں یا اپنی جان پہچان کے زمین مالکوں کے یہاں کام کرتے تھے۔ان کی جگہ جدید فیکٹریوں اورکام کی جگہوں پر انجان پیشہ ورانہ رشتوں نے لے لی۔صنعت کاری میں قوت کار کی ایک تفصیلی تقسیم ہوتی ہے۔لوگ اپنے کام کے آخری نتیجے کواکثرنہیں دیکھتے کیونکہ انھیں پروڈکٹ کے صرف ایک چھوٹے سے حصے کو بنانا ہوتاہے۔یہ کام اکثردہرانے اورتھکانے والاہوتا ہے لیکن پھر بھی بالکل ہی کام نہ کرنے یا بے روزگار ہونے سے تو بہتر ہی ہے۔ مارکس نے اس صورت حال کو بے گانگی کاعمل کہاجس میں لوگ اپنے کام سے خو ش نہیں ہوتے اور کام کو صرف اپنی بقاکے لیے کچھ کرنے جیسا سمجھتے ہیں۔ان کی بقابھی اس بات پر منحصر ہوتی ہے کہ کیا ٹیکنالوجی نے انسانی محنت کے لیے کچھ جگہ چھوڑی بھی ہے؟

صنعت کاری کم سے کم بعض حلقوں میں زبردست مساوات پیداکرتی ہی ہے۔ مثلاً  ریل، گاڑیوں بسوں اور سائبرکیفے میں ذات پات پر مبنی امتیاز نہیں ہوتاجب کہ دوسری طرف نئی فیکٹری یاکام کی جگہوں پر تفریق کی پرانی شکلیں اب بھی دیکھی جاسکتی ہیں۔حالانکہ اب سماجی عدم مساوات کم ہورہی ہے معاشی یاآمدنی سے متعلق عدم مساوات بڑھ رہی ہے۔اکثرسماجی عدم مساوات اورآمدنی سے متعلق نابرابری ایک دوسرے سے پیوست ہو بھی جاتی ہے،مثال کے طورپر اچھی تنخواہ والے پیشوں جیسے طب ،قانون یاصحافت میں اونچی ذات کااب بھی غلبہ ہے۔ زیادہ ترایسا بھی ہوتا ہے کہ یکساں کام کے لیے عورتوں کو مردوں کی نسبت کم ادائیگی ہوتی ہے۔

اولین ماہرین سماجیات نے صنعت کاری کومثبت اورمنفی دونوں سے دیکھا ہے۔ جدیدکاری نظریہ کے زیر اثر20ویں صدی کے وسط سے صنعت کاری کو ناگزیر اورمثبت دیکھا جارہا ہے۔جدید کاری نظریے میں یہ دلیل دی جاتی ہے کہ جدیدکاری میں سماج مختلف مراحل سے گزرتا ہے لیکن ان سبھی میں ایک ہی سمت ہوتی ہے۔ان نظریہ سازوں کے مطابق جدید سماج کی نمائندگی مغرب کے ذریعہ کی جارہی ہے۔

5.2ہندوستان میں صنعت کاری(Industrialisation in india)

ہندوستانی صنعت کاری  کی خصوصیات(The Specificity Of Indian Industrialisation)

ہندوستان میں صنعت کاری کا تجربہ کئی لحاظ سے مغربی نمونے جیساتھاتو کئی لحاظ سے مختلف بھی تھا۔ مختلف ملکوں کے تقابلی تجزیے سے پتہ چلتا ہے کہ صنعتی سرمایہ کاری کا کوئی معیاری نمونہ نہیں ہے۔آیئے ہم اسے ایک فرق سے شروع کرتے ہیں،لوگ کیاکررہے ہیں ان کے کام کی قسم سے اس کو وابستہ کرتے ہیں۔ترقی یافتہ ممالک میں لوگوں کی اکثریت سروس یاخدماتی شعبہ میں کام کرتی ہے،اس کے بعد صنعت میں اور10فی صد سے کم زراعت میں کام کرتے ہوتے۔(بین الاقوامی محنت تنظیم(ILO)کے اعدادوشمار) ہندوستان میں،19-2018میں تقریباً43 فی صد لوگ ابتدائی شعبہ(زراعت اورکان کنی)میں،25 فی صد ثانوی شعبہ(مینوفیکچرنگ،تعمیرات اورافادیت وسہولیات)اور32 فی صد لوگ ثالثی شعبہ(تجارت،نقل وحمل مالی خدمات وغیرہ) میں لگے ہوئے تھے۔تاہم،اگر ہم ان شعبوں کی معاشی نمودیکھیں توزراعتی عمل کاحصہ تیزی سے کم ہواہے اوراس شعبہ میں یہ اشتراک تقریباًنصف ہوگیا۔یہ ایک کافی سنجیدہ صورت حال ہے کیونکہ اس کا مطلب یہ ہواکہ جس شعبہ میں زیادہ لوگ کام سے لگے ہیں وہ  زیادہ آمدنی کے اہل نہیں ہے.ہندوستان میں 19-2018میں زراعت میں روزگار کا حصہ 42.5فیصد تھا،کان کنی اور کھدائی میں 0.4فیصد ، مینوفیکچرنگ میں یہ 12.1فی صد تھا ، تجارت ہوٹل اور ریستوراں میں یہ 12.6فی صد تھا، ٹرانسپورٹ، اسٹوریج، مواصلات میں 5.9فی صد ، کمیونٹی، معاشرتی اور ذاتی خدمات میں یہ 13.8فی صد تھا ۔ 

ترقی پذیراورترقی یافتہ ملکوں میں ایک اوربڑا فرق باقاعدہ تنخواہ یافتہ روزگار میں لوگوں کی تعداد سے متعلق ہے۔ترقی یافتہ ملکوں میں اکثریت باضابطہ روزگار میں لگی ہے۔ہندوستان میں 52فی صد سے زیادہ خود کے روزگار سے وابستہ ہیں،صرف تقریباً24 فی صد باقاعدہ تنخواہ یافتہ روزگار ہیں جب کہ تقریباً24 فی صد بے ضابطہ یااتفاقی مزدور ہیں 

ساتھ میں دیے گئے چارٹ سے 73-1972اور19-2018کے درمیان تبدیلیوں کا پتہ چلتا ہے۔ماہرین معاشیات اور دوسرے منظم اورغیرمنظم شعبہ کے درمیان فرق کرتے ہیں۔

یہ بحث کا موضوع ہے کہ ان شعبوں کی تعریف کیسے کی جائے۔ایک تعریف کے مطابق منظم شعبہ کی کل اکائی میں10اوریااس سے زائدلوگوں کے پورے سال روزگار میںرہنے سے ان شعبوں کی تشکیل ہوتی ہے۔سرکاری طورپر ان کا رجسٹریشن ہونا چاہیے تاکہ ملازمین کو تنخواہ،پنشن اورد وسرے فوائد مل سکیں۔ ہندوستان میں90فی صد لوگ زراعت اور خدمات کے غیر منظم یا غیر رسمی شعبوں میں کام کرتے ہیں۔منظم شعبہ کی چھوٹی سی تعداد کا سماجی اطلاق کیا ہے؟ زراعت،صفت اور خدمات کے غیر منظم یاغیررسمی شعبوں میں ۔

پہلا،اس کا مطلب یہ ہے کہ بہت کم لوگ بڑی فرموں میں روزگار کرتے ہیں جہاں وہ دیگر علاقوں اورپس منظر کے لوگوں سے مل پاتے ہیں۔شہری  زندگی اس کے لیے کچھ اصلاحی عمل کا موقع فراہم کرتی ہے۔کیونکہ شہر میں رہنے والا آپ کا پڑوسی کسی مختلف جگہ کا ہوسکتا ہے۔جب کہ بڑے پیمانے پر زیادہ تر ہندوستانی اب بھی چھوٹے پیمانے والے کام کے مقاما ت پر کام کرتے ہیں۔یہاں ذاتی رشتے کام کے متعدد پہلوؤں کا تعین کرتے ہیں۔اگر آجر آپ کو پسند کرتا ہے تو تنخواہ بڑھ سکتی ہے اور اگر آپ اس سے لڑتے جھگڑتے ہیں توآپ ملازمت یاکام سے محروم ہوسکتے ہیں۔بڑی تنظیموں میں ایسا نہیں ہوتا کیونکہ وہاں کچھ مقررہ اصول ہوتے ہیں۔جن کی بہتر طورپر توضیح کی جاتی ہے،وہاں تقرری کا معاملہ زیادہ شفاف ہوتا ہے۔اگر آپ کے اپنے سرپرست حاکم سے بعض اختلاف ہوتے ہیں تو اس کے لیے شکایتوں اوران کی تلافی کاطریقۂ کار مقرر ہوتا ہے۔ دوسرے،بہت ہی کم ہندوستانیوں کی رسائی نفع بخش اورمحفوظ ملازمت کے تئیں ہوپاتی ہے جن میں دو تہائی سرکاری ملازمت میں ہیں۔ یہی وجہ ہے کہ سرکاری ملازمت زیادہ مقبول ہے۔باقی ضعیفی میں اپنے بچوں کے دست نگر ہونے پر مجبور ہیں۔ذات،مذہب اورعلاقائی حدوں پر قابو پانے میں سرکاری ملازمتوں نے ایک اہم کردارنبھایاہے۔ایک ماہرسماجیات نے دلیل دی ہے کہ یہی وجہ ہے کہ عوامی شعبہ کے بھیلائی اسٹیل پلانٹ میں فرقہ وارانہ فساد کبھی نہیں واقع ہوئے۔کیوں کہ وہاں ہندوستان کے سبھی علاقوں کے لوگ مل جل کر کام کرتے ہیں۔ تیسرے،چونکہ بہت ہی کم لوگ یونین ممبر ہیں جو منظم شعبہ کی خاصیت ہے وہ مناسب اجرتوں اورمحفوظ کام کرنے کی حالتوں کے لیے اجتماعی جدوجہد کاتجربہ نہیں رکھتے۔ حکومت نے اب غیرمنظم شعبوں کی صورت حال پر نگرانی رکھنے کے لیے قانون بنائے ہیں لیکن عملاًآجر یاٹھیکے دار کی متلون مزاجی اورخیالات کادخل زیادہ ہوتاہے۔

ہندوستان کی آزادی کے ابتدائی سالوں میں  صنعت کاری(Industrialisation in the early years of indian independence)

ہندوستان کی آزادی کے ابتدائی سالوں میں کپاس،جوٹ،کوئلہ کانیں اورریلوے ہندوستان کی پہلی جدید صنعتیں تھیں۔آزادی کے بعدحکومت نے معیشت کی فیصلہ کن بلندیوں کو اختیارکیا۔اس میں دفاع، نقل وحمل،مواصلات،توانائی اوردیگر پروجیکٹوں کو شامل کیاگیاجنھیں صرف حکومت ہی انجام دینے کی قدرت رکھتی تھی اوریہ نجی صنعت کے فروغ کے لیے بھی ضروری تھا۔ ہندوستان کی مخلوط معاشی پالیسی میں کچھ شعبوں کوحکومت کے لیے محفوظ کیاگیاجب کہ کچھ کونجی شعبو ں کے لیے کھول دیاگیا۔ اس میں بھی حکومت نے اپنی لائسنس دینے کی پالیسی کے ذریعہ یہ یقینی بنانے کی کوشش کی کہ یہ صنعتیں مختلف علاقوں میں پھیلی ہوئی ہوں۔ آزادی سے پہلے صنعتیں خاص طورپر بندرگاہ والے شہروں جیسے مدراس،ممبئی اورکلکتہ میں واقع تھیں لیکن اس کے بعد دیگرمقامات جیسے بڑودہ، کوئمبٹور، بنگلور، پونے،فریدآباد اورراج کوٹ بھی اہم صنعتی مراکز بن گئے۔دیگرچھوٹے پیمانے کی صنعتوں کو بھی خصوصی ترغیب اورمدددے کر حوصلہ افزائی کی کوشش کی گئی۔بہت سی اشیا جیسے کاغذ اورلکڑی کے سامان،اسٹیشنری،شیشہ اورچینی مٹی چھوٹے پیمانے کے شعبہ کے لیے محفوظ تھے۔1991تک کل کام کرنے والی آبادی میں سے صرف 28فی صد بڑی صنعتوں میںملازمت کررہے تھے جب کہ72فی صد لوگ چھوٹے پیمانے اورروایتی صنعتوں سے وابستہ تھے۔(رائے2001:11)

گلوبلائزیشن،نرم کاری اورہندوستانی صنعت میں تبدیلی(Globalisation, Liberalisation and change in indian industry)

1990کی دہائی سے حکومت نے نرم کاری(لبرلائزیشن)کی پالیسی اپنائی ۔نجی کمپنیاں خاص طورسے غیر ملکی فرموں کو ان شعبوں میں سرمایہ کاری کے لیے حوصلہ افزائی کی جارہی ہے جو پہلے حکومت کے لیے محفوظ تھے۔ ان میں ٹیلی مواصلات،شہری ہوابازی اورتوانائی وغیرہ کے شعبہ شامل ہیں۔صنعتوں کو کھولنے کے لیے آسانی سے دستیاب ہیں ۔نرم کاری کے نتیجے میں بہت سی ہندوستانی کمپنیوں کو کثیر قومی کمپنیوں کے ذریعہ خرید لیاگیا۔ساتھ ہی کچھ ہندوستانی کمپنیاں بھی کثیرقومی کمپنیاں بنتی جارہی ہیں۔اس کی پہلی مثال جب پارلے مشروبات کوکوکاکولا کے ذریعہ خرید لیاگیا۔ پارلے مشروبات کی سالانہ آمدنی250کروڑ روپیے تھی جب کہ کوکاکولا اشتہار پر ہی400کروڑ روپیے خرچ کرتی تھی۔اشتہار کی اس سطح سے پورے ہندوستان میں کوک کے صرف کی مقدار بڑھی اوریہ بہت سے روایتی مشروبات کی جگہ اس کے ذریعہ پرُکی گئی۔نرم کاری کادوسرا میدان خوردہ فروشی ہوسکتی ہے۔ کیاآپ کے خیال میں ہندوستانی ڈپارٹ مینٹل اسٹور سے خریداری کرناپسندکریں گے یا وہ کاروبار سے باہر ہوجائیں گے؟

حکومت متعدد عوامی شعبہ کی کمپنیوں میں اپنے شیئرزکو نجی شعبہ کو فروخت کرنے کی کوشش کررہی ہے جسے نااصل کاری  (سرمایہ فروخت کرنا)کہاجاتا ہے۔کئی سرکاری ملازم اس بات سے خوف زدہ ہیں کہ اس کے بعد وہ اپنی ملازمت سے محروم ہوجائیں گے۔ماڈرن فوڈز جسے حکومت نے سستی قیمتوں پر صحت بخش بریڈ بنانے کے لیے قائم کیا تھا، وہ پہلی کمپنی تھی جس کی نجی کاری کی گئی تھی تو اس نے پہلے پانچ سالوں میں لگے ہوئے ملازمین کوجبراًملازمت سے ریٹائر کردیا۔

آئیے اب ہم دیکھیں کہ کس طرح یہ عالمی رجحانات کے مطا بق ہے۔زیادہ سے زیادہ کمپنیاں مستقل ملازمین کی تعداد میں کمی کررہی ہیں اور اپنے کام کو چھوٹی چھوٹی کمپنیوں اورگھروں کو سونپ رہی ہیں۔ جہاں تک کثیر قومی کمپنیوں کاسوال ہے وہ پوری دنیا میں باہر والوں سے کام کا معاہدہ کرتی ہیں جس میں ہندوستان جیسے ممالک بھی شامل ہیں جہاں مزدور سستے مل جاتے ہیں۔ چونکہ چھوٹی کمپنیوں کو بڑی کمپنیوں سے آرڈر لینے میں مسا بقت کاسامنا کرنا پڑتا ہے اس لیے وہ اپنی اجرتیں کم رکھتی ہیں اوران میں کام کے حالات بھی کمزورہوتے ہیں۔چھوٹی چھوٹی فرموں کے لیے ٹریڈیونین بنانا بھی زیادہ مشکل ہوتا ہے۔ تقریباًسبھی کمپنیاں حتی کہ حکومت بھی کسی نہ کسی شکل میں بیرونی وسائل اورمعاہدے پر کام کرانے لگی ہیں۔ لیکن یہ رجحان خاص طورپر نجی شعبہ میں دیکھاجاسکتا ہے۔

بحیثیت مجموعی کہاجاسکتاہے کہ ہندوستان اب بھی بڑے پیمانے پر ایک زرعی ملک ہے۔سروس یاخدماتی شعبہ جیسے دکانیں، بینک،انفارمیشن ٹیکنالوجی(IT)صنعت،ہوٹل اوردیگر خدمات میں زیادہ سے زیادہ ملازمت لوگ حاصل کررہے ہیں تعداد بڑھ رہی ہے اس کے ساتھ وہ قدریں بھی بڑھ رہی ہیں جو ٹیلی ویژن سیریل اورفلموں میں ہم دیکھتے ہیں۔ ہم یہ بھی دیکھتے ہیں کہ ہندوستان میں بہت کم لوگوں کے پاس محفوظ روزگار ہیں یہاں تک کہ کم تعداد کے باقاعدہ تنخواہ یافتہ روزگار بھی معاہدہ محنت میں اضافے کے سبب زیادہ غیر محفوظ ہوتے جارہے ہیں۔اب تک سرکاری ملازمت بیشترلوگوں کی فلاح وبہبود میں اضافے کاذریعہ تھا جس میں اب کمی آتی جارہی ہے۔بعض ماہرین معاشیات نے اس پر غور وخوض کیاہے لیکن عالمی پیمانے پر نرم کاری اورنجی کاری سے آمدنی کی نابرابری بڑھنے کی وجہ دکھائی دیتی ہے۔آپ گلوبلائزیشن کے موضوع پر اگلے باب میں مزیدپڑھیں گے۔

                                                       منظم شعبوں میں روزگار

اس کے ساتھ ہی بڑی صنعتوں میں محفوظ روزگار میں بھی کمی ہورہی ہے۔حکومت نے بھی صنعت لگانے کے لیے زمین حاصل کرنے کی پالیسی کی شروعات کی ہے۔ ضروری نہیں کہ یہ صنعتیں آس پاس کے لوگوں کو روزگار فراہم کریں لیکن آلودگی کاایک بہت بڑا سبب ضروربنتی ہیں۔ بہت سے کسان جن میں خاص طورپر قبائلی شامل ہیں بے دخل لوگوں میں یہ تقریباً40فی صد کی تشکیل کرتے ہیں،تلافی کی کم شرحوں پراحتجاج کررہے ہیں اورحقیقت یہ ہے انھیں بے ضابطہ مزدور بننے اورہندوستان کے بڑے شہروں میں فٹ پاتھ پر کام کرنے پر مجبور ہونا پڑے گا۔آپ باب3 (II) میں دیے گئے مسابقتی مفادات پربحث یادکریں۔

اگلے سیکشنوں میں آپ دیکھیں گے کہ کس طرح لوگ کوکام ملتے ہیں،وہ حقیقتاً اپنے کام کے مقامات پر کیاکرتے ہیں اورکس طرح کام کی حالتوں کا سامنا کرتے ہیں۔

5.3 لوگوں کوکام کس طرح ملتے ہیں(How people finds jobs)

اگر آپ بدھ کی صبح ٹائمز آف انڈیا دیکھتے ہیں توآپ اس میں’Times Ascent‘نام کا ایک سیکشن دیکھیں گے۔یہاں روزگار کے اشتہار ہوتے ہیں اوراپنے آپ سے یا اپنے ورکرز اچھا کام لینے کے لیے ترغیب دینے کے بارے میں تجاویز ہوتی ہیں۔

باکس5.3میں نجی شعبہ کی ملازمت کے بارے میں معلومات حاصل کرتے ہیں ۔ یہ بھی باضابطہ تنخواہ والی ملازمت ۔ یہ اکی معروف ہوٹل کی ملازمت ہے لیکن یہاں تنخواہ اور ضروری اہلیت لچک دار ہیں ، اور یہ ایک معاہدے کی طرح کام ہے ۔ نیچے دیئے گئے اشتہار میں دی گئی زبان کو ذرا دیکھئے جیسے ایک خلوص مند پروگرام ہر تنظیم اپنے اصولوں کے مطابق کرتی ہے۔ 

اب ہم باکس5.3میں نجی شعبہ کی ملازمت کے بارے میں معلومات حاصل کرتے ہیں۔ یہ بھی باضابطہ تنخواہ والی ملازمت ہے۔یہ ایک معروف ہوٹل کی ملازمت ہے لیکن یہاں تنخواہ اورضروری اہلیت لچک دار ہیں اوریہ ایک معاہدے کی طرح کام ہے۔ نیچے دیے گئے اشتہار میں دی گئی زبان کو ذرادیکھیے جیسے ایک خلوص مند پروگرام ہر تنظیم اپنے اصولوں کے مطابق کرتی ہے۔

 بہت کم فی صد میں لوگ اشتہارات یاروزگار دفتر کے ذریعہ ملازمت حاصل کرپاتے ہیں ۔وہ لوگ جو خود روزگار یافتہ ہیں جیسے ایک طرف پلمبر،الکٹریشین اوربڑھئی اوردوسری طرف ٹیچر جو پرائیویٹ ٹیوشن دیتے ہیں، ماہر تعمیرات اورآزادانہ کام کرنے والے فوٹو گرافر ہیں یہ سب ذاتی رابطوں پر منحصر ہیں۔وہ امید کرتے ہیں کہ ان کے کام ہی ان کے لیے اشتہار ہوں گے۔ پلمبروں(نل سازوں)اوردیگر لوگوں کے موبائل فون سے زندگی آسان بن گئی ہے اوروہ اب زیادہ لوگوں تک رسائی حاصل کرسکتے ہیں۔

فیکٹری ورکرکے طورپر کام کرنے کے لیے بھرتی کاطریقہ مختلف ہوتا ہے۔ پہلے بہت سے مزدورٹھیکے داروں یا کام دینے والوں سے روزگار حاصل کرتے تھے۔کان پور کپڑاملوں میں ان کام دلانے والوں کو مستری کے طورپر جاناجاتا تھاجو خود بھی وہاں کام کرتے تھے۔وہ اسی خطے اورکمیونٹی سے ورکر کے طورپر آتے تھے لیکن مالکوں کی مہربانی سے ورکر یامزدور کے باس بن جاتے تھے جب کہ دوسری طرف مستری ورکر پر کمیونٹی سے متعلق دباؤ بھی رکھتے تھے۔آج کل کام دلانے والوں کی اہمیت کم ہوگئی ہے اورمینجمنٹ نیزیونین اپنے لوگوں کی تقرری میں اہم کردارنبھاتی ہیں۔کچھ مزدور یہ بھی امید کرتے ہیں کہ ان کے کام ان کے بچوں کو منتقل کیے جائیں۔ بہت سی فیکٹریوں میں بدل کام گاروں کو روزگار پر رکھاجاتا ہے جو مستقل وباقاعدہ مزدوروں کے چھٹی پرجانے کے موقع پر بدلے میں کام کرتے ہیں۔ ان میں بہت سے بدل ورکر دراصل اسی کمپنی میں سالوں کام کرتے رہتے ہیں۔لیکن وہ حیثیت اورتحفظ نہیں دیاجاتا۔اسے منظم شعبہ میں معاہدہ پر مبنی کام کہاجاتا ہے۔ روزگار کے مواقعوں میں دو عناصر شامل ہوتے ہیں۔ (i) کسی تنظیم میں روزگار (ii) ذاتی روزگار۔حکومت ہند کے منصوبوں میں ’’اسٹینڈ اپ انڈیا اسکیم ‘‘،’’ میک اِن انڈیا‘‘اور منصوبہ بند کوششیں ایسی ہیں جو روزگار اور ذاتی روزگار کو ممکن بناتے ہیں۔ ان کی کوششوں سے حاشیہ پع کھڑے لوگ جیسے درج فہرست ذات  اور درج فہرست قبائل اور خواتین بھی روزگار کےمواقع کا فائدہ اٹھا رہی ہیں۔ ان مثبت کوششوں نے ہندوستان کے نوجوانوں کو ترقی کے عمل سے جوڑ دیا ہے ۔  

تاہم تعمیراتی کاموں اینٹ کے بھٹوںوغیرہ پر کام کے لیے بے ضابطہ یااتفاقی مزدوروں کی بھرتی میں ٹھیکے داری نظام دیکھنے میں آتا ہے۔ ٹھیکے دار گاؤں میں جاتا ہے اوران لوگوں کے بارے میں معلوم کرتا ہے جو کام کرنا چاہتے ہیں۔وہ انھیں کچھ رقم ادھار بھی دیتا ہے۔اس ادھار میں کام کے مقام تک جانے کی لاگت بھی شامل ہوتی ہے۔جس کو پیشگی اجرت ماناجاتا ہے اورمزدوراس وقت تک اجرت کے بغیر کام کرتارہتا ہے جب تک اس ادھار کی ادائیگی نہیں ہوجاتی۔ماضی میں زرعی مزدورقرض کے ذریعہ اپنے مالکوں کے پاس بندھوا ہواکرتے تھے۔ حالانکہ اب بھی بے ضابطہ صنعتی مزدور کی حیثیت سے وہ قرض دار رہتے ہیں لیکن وہ ٹھیکے داروں کے تئیں دیگر سماجی ذمہ داریوں سے نہیں بندھے ہوتے ۔اس معنی میں وہ ایک صنعتی سماج میں زیادہ آزاد ہوتے ہیں۔وہ معاہدہ توڑ سکتے ہیں اوردوسرے آجر کے پاس ملازمت تلاش کرسکتے ہیں۔کبھی پوری فیملی ہی ہجرت کرجاتی ہے اوربچے اپنے والدین کی مدد کرتے ہیں۔

باکس5.4

جنوبی گجرات میں اینٹ کے بھٹوں میں مزدوروں کی ٹولی

جنوبی گجرات میں اینٹ کے بھٹے میںکام کے موسم میں تقریباً30  سے 40 ہزار مزدور ملازمت پر رکھے جاتے ہیں۔ اینٹ کے بھٹوں کے مالک اونچی ذات کے لوگ جیسے پارسی یاڈیسائی ہوتے ہیں۔کمہار ذات کے ممبران اینٹ کے بھٹے پر اپنا روایتی مٹی کا کام کرتے ہیں۔مزدور زیادہ تر مقامی یامہاجر دلت ہوتے ہیں۔ انھیں ٹھیکے داروں کے ذریعہ رکھاجاتا ہے۔یہ نوتاا گیارہ لوگوں کی ٹولی میں کام کرتے ہیں۔ جہاںمرد مٹی گوندھتے ہیں اوراینٹ کو شکل دیتے ہیں اورہراینٹ کو خشک کرنے کے مقامات پر لے جاتے ہیں۔ عورتوں اورلڑکیوں کی ٹولی اینٹوں کو بھٹوں پر لے جاتی ہے جہاں مرد انھیں پکاتے ہیں اوروہاں سے پھر انھیں ٹرکوں پر لاداجاتا ہے۔

ہرٹولی روزانہ 2,500تا3,000اینٹیں بنالیتی ہے۔جلدی کام کرنے والاگروپ 10گھنٹے میں اورآہستہ کرنے والا گروپ14 گھنٹے میں اپناکام ختم کرتا ہے۔ 6سال کی عمرسے بچے اپنے والد کے ذریعہ بنائی گئی تازہ اینٹوں کو رات میں اٹھانے کاکام کرتے ہیں۔گیلی اینٹوں کا وزن تقریباً3کلو ہوتا ہے۔رات کے اندھیرے میں چھوٹے بچے ایک ایک اینٹ کو بنیادی پلیٹ پررکھنے کے لیے دوڑتے ہیں۔ جب وہ نوسال کے ہوجاتے ہیں توانھیں دواینٹیں اٹھانے کے لیے ترقی دی جاتی ہے۔ماہرسماجیاتی جان بریمن کہتا ہے کہ کبھی کبھی ان کے والدین انھیں رولا ہوئے ان کے گڈری جیسی بستروں سے جگاکر اٹھا دیتے ہیں۔

5.4کام کس طرح انجام دیاجاتاہے؟(How is work carried out)

اس سیکشن میں ہم یہ جانیں گے کہ اصلاًکام کو کس طرح انجام دیاجاتا ہے۔ اپنے آس پاس ہم جن اشیاکو دیکھتے ہیں وہ کیسے بنائی جاتی ہیں؟ایک آفس یا فیکٹری میں منیجر اورمزدوروں کے تعلقات کیسے ہوتے ہیں؟ہندوستان میں بڑے کام کے مقامات میں پورا کام خودکار طریقے سے چھوٹے گھر پر مبنی پیداواری نظام میں منتقل ہوتا ہے۔

منیجرکا بنیادی کام کارکنان پر کنٹرول رکھنا اوران سے زیادہ سے زیادہ کام نکلواناہوتاہے۔مزدوروں سے زیادہ کام کرانے کے دوطریقے ہوتے ہیں۔ پہلاکام کے گھنٹوں میں اضافہ،دوسرا مقررہ دیے گئے وقت میں تیار کی گئی اشیا کی مقدار کو بڑھادینا۔ مشینیں پیداوار کوبڑھانے میں مددگار ہوتی ہیں لیکن یہ خطرے بھی پیداکرتی ہیں آخر کار مشینیں مزدوروں کی جگہ لے رہی ہیں۔اسی لیے مارکس اورمہاتماگاندھی دونوں نے مشین کاری کو روزگار کے لیے خطرہ بتایاہے۔

سرگرمی5.2

ہندسوراج 1924میں مشینوں پر گاندھی جی:

’’میں مشینوں کے تئیں جنون کامخالف ہوں نہ کہ مشینوں کا۔میں اس خبط کامخالف ہوں جو مزدوروں کو کم کرنے کی مشینری ہے۔ لوگ محنت سے بچنے کے لیے مزدوروں کو کم کرتے جائیں گے اورانھیں فاقہ کشی سے مرنے کے لیے کھلی سڑکوں پر چھوڑ دیں گے۔ میں نوع انسانی کے ایک حصے کے لیے نہیں بلکہ سبھی کے لیے وقت اور مزدور دونوں کوبچاناچاہتا ہوں۔میں دولت کو کچھ ہاتھوں میں اکٹھانہیں ہونے دینا چاہتا بلکہ سب کے ہاتھ میں دیکھنا چاہتاہوں‘‘

1934:’’ایک قوم کے طورپر جب ہم چرخے کواپناتے ہیں توہم نہ صرف بے روزگاری کے مسئلے کاحل کرتے ہیں بلکہ یہ بھی اعلان کرتے ہیں کہ ہماراکسی قوم کے استحصال کا ارادہ نہیں اورہم امیر کے ذریعہ غریب کے استحصال کو بھی ختم کرنا چاہتے ہیں۔

مثال کے ذریعہ بتائیے کہ مشین کس طرح مزدوروں کے لیے مسائل پیداکرتی ہیں؟گاندھی جی کے ذہن میں کیامتبادل تھا؟چرخے کو اپنانے سے استحصال کو کیسے روکاجاسکتا ہے؟

پیداوار بڑھانے کا دوسرا طریقہ ہے کام کومنظم کرنا۔ ایک امریکی فریڈرک ونسلوٹیلر نے 1890کی دہائی میں’’سائنٹفک مینجمنٹ ‘‘کے نام سے ایک نظام کااختراع کیاتھا۔ اسے ’’ٹیلرزم‘‘یاصنعتی انجینئرنگ کے طورپر بھی جاناجاتا ہے۔ اس نظام کے تحت سبھی کاموں کو اس کے چھوٹے چھوٹے تکراری عناصر میں توڑ کر مزدوروں میں تقسیم کرنے کا اہتمام تھا۔ مزدوروں کو جتنا وقت دیاجاتا تھا اس میں انھیں کام کوروزانہ اتنے ہی وقت میں لازما ًختم کرنا پڑتاتھا۔ اس کے لیے وہ اسٹاپ واچ]روک گھڑی[کی مدد لیتے تھے۔کام کوتیزی سے ختم کرنے کے لیے اسمبلی لائن کی شروعات ہوئی۔ہر ایک مزدور کو کنویربیلٹ(Conveyor belt) کی رفتار کے ساتھ منظم کیاگیا۔1980کی دہائی میں اس طرح کی کوشش کی گئی جس میں راست کنٹرول کی جگہ بالواسطہ کنٹرول کا بندوبست کیا گیا تھا جہاں مزدوروں کو ترغیب دیے جانے اورخود کی نگرانی کیے جانے کا اہتمام کیاگیاتھا۔ اکثر ہم یہی دیکھتے ہیں کہ پرانی ٹیلرسٹ   عمل کاری ہی بچی ہوئی ہے۔

کپڑاملوں میں جو ہندوستان میں سب سے پرانی صنعتوں میں سے ایک ہے کام کرنے والے اکثر خود کو مشینوں کی توسیع کے طورپر بیان کرتے ہیں۔ بنکر رام چرن جس نے1940کے دہے سے کان پور کپڑامل میں کام کیاتھا، کاکہنا ہے۔

آپ کو توانائی کی ضرورت ہے،آنکھیں،گردن،ٹانگیں،ہاتھ اورجسم کا ہر ایک حصہ گھومتا ہے۔بننے کے کام میں لگاتار ٹکٹکی لگانی پڑتی ہے،آپ نہیں جاسکتے،آپ کی پوری توجہ مشین پر مرکوز ہونی چاہیے۔جب چارمشینیں چل رہی ہوں توچاروں کوساتھ چلنا چاہیے وہ ہر گز نہ رکیں۔ (جوشی2003)

کسی صنعت میں جتنی زیادہ مشینیں ہوتی ہیں اتنا ہی کم لوگوں کو کام ملتا ہے لیکن انھیں مشینوںکی رفتار سے کام کرنا ہوتا ہے۔ ماروتی ادیوگ لمیٹڈ میں دوکاریں ہر منٹ اسمبلی لائن پر آجاتی ہیں۔ مزدوروں کو پورے دن میں صرف 45 منٹ کا وقفہ ملتا ہے۔7.5منٹ کے دوچائے کے وقت اورآدھے گھنٹے کھانے کا وقفہ ہوتا ہے۔ 40کی عمر تک پہنچتے پہنچتے پوری طرح تھکے ہونے کی کیفیت پیداہوجاتی ہے اوروہ رضاکارانہ سبکدوشی لے لیتے ہیں۔فیکٹری میں جہاں پیداوار بڑھی ہے وہیں مستقل ملازمت کی تعدادکم ہوئی ہے۔فرم تمام خدمات جیسے صفائی اورسیکورٹی کے ساتھ ساتھ پرزوں کے بنانے کے کام بیرونی وسائل سے معاہدے (out–sourcing)پر کرانے لگی ہیں۔پرزے فراہم کرنے والے فیکٹری کے آس پاس ہی واقع ہوتے ہیں اورپرزے ہردوگھنٹے یا مقررہ وقت پر بھیج دیتے ہیں۔ بیرونی وسائل سے کرایاگیا کام وقت پر پورا ہوجاتا ہے اورکمپنی کو سستا پڑجاتا ہے لیکن مزدوروں میں کافی تناؤ رہتا ہے کیونکہ اگر ان کی سپلائی وہاں نہیں پہنچ پاتی توان کے پیداوار کا ہدف حاصل ہونے میں تاخیر ہوتی ہے جس کو بعد میں پورا کرنا ہوتا ہے۔اگر ایسا کرنے میں وہ پوری طرح نڈھال ہوجاتے ہیں تو یہ حیرت کی بات نہیں۔

اب ہم ایک نظر سروس سیکورٹیز پرڈالیں۔سافٹ ویئر پیشے سے منسلک لوگ متوسط طبقے کے اور تعلیم یافتہ ہوتے ہیں۔ ان کے کام خود محرک اورتخلیقی مانے جاتے ہیں۔ہم جیساکہ باکس میں دیکھتے ہیں کہ ان کے کام بھی ٹیلرسٹ محنت عمل کاری کے لحاظ سے ہوتے ہیں۔

باکس5.5

انفارمیشن ٹیکنالوجی کے شعبہ میں وقت کی تابع داری

 پروجیکٹ کی تکمیل کے مقررہ وقت پراوسط10–12گھنٹے کے کام کا دن اورپروجیکٹ کی تکمیل پرآجاتا ہے تو پوری رات دفترمیں رکنا ملازمین کے لیے کوئی خلاف معمول بات نہیںہے۔(اسے نائٹ آؤٹ کے طورپر جاناجاتاہے)طویل اوقات کارصنعت کے ’کام کے ماحول‘کابنیادی جزوہے۔کسی حد تک اس کی وجہ ہندوستان اورگاہک ملک کے درمیان وقت کافرق ہوتا ہے جیسے جوکانفرنس کال(بیک وقت بات چیت کاسلسلہ)شام میں واقع ہونے والی ہوتی ہے اس وقت ریاست ہائے متحدہ امریکہ میں کام کے دن کی شروعات ہوتی ہے۔ایک اور وجہ یہ ہے کہ بیرونی وسائل کے پروجیکٹوں کی ساخت اس طرح کی بنی ہوتی ہے کہ اس میں بساط سے زائد کام اختیارکیے جاتے ہیں؛پروجیکٹ کی لاگت اورپوراکرنے کے وقت کے لیے متوقع مقدار کار کے لحاظ سے دنوں یاگھنٹوں کا اندازہ عموماًکم یا غلط لگایاجاتا ہے ۔چونکہ متوقع مقدار کار کی بنیاد آٹھ گھنٹے یومیہ ہوتی ہے اس لیے انجینئروں کو وقت مقررہ پر کام پورا کرنے کے لیے زائد گھنٹوں اوردنوں تک کام کرنا پڑتا ہے۔توسیعی اوقات کار 'Flexi–time'(ملازم کی مرضی کے مطابق کام کے دوران کار کا تعین)کے عام عمل کو انتظامیہ کے ذریعہ جائز ٹھرایاجاتاہے۔اس اصول کے تحت ملازم کو اپنے کام کے گھنٹوں(حدود میں)کو منتخب کرنے کی آزادی ہوتی ہے لیکن عملاً اس کامطلب یہ ہوتا ہے کہ انھیں موجودہ کاموں کو پوراکرنے کے لیے جتنا ضروری ہوگاکام کرنا ہوگا۔ جب ان کے پاس واقعتا کام کا دباؤ نہیں ہوتاپھر بھی وہ آفس میں دیر تک رکنے کی طرف مائل ہوتے ہیں جس کی وجہ ان کے ساتھیوں کا دباؤ ہوتاہے یا وہ اپنے باس کو دکھانا چاہتے ہیں کہ وہ کتنی سخت محنت کررہے ہیں۔

ان اوقات کارکے نتیجے میں بنگلور،حیدرآباد اورگڑگاؤں جیسے مقامات میں جہاں بہت سیITفرمیں یاکال سینٹرواقع ہیں،دکانوں اورریسٹورنٹ نے بھی اپنے کھلنے کے اوقات میں تبدیلی کی ہے اور دیر میں کھلنے لگے ہیں۔اگر شوہر اوربیوی دونوں کام کرتے ہیں تب بچوں کو نگہداشت مرکز برائے اطفال میں پہنچادیتے ہیں۔ صنعت کاری سے مشترکہ فیملی ختم ہوتی دکھائی دیتی ہے،مگراب لگتا ہے کہ پھرابھر رہی ہیں کیونکہ دادا دادی اب بچوں کی مدد میں شریک ہونے لگے ہیں۔

سماج میں ایک اوراہم موضوع بحث ہے کہ کیاصنعت کاری ،خدمات کی منتقلی اورانفارمیشن ٹیکنالوجی جیسے علم پر مبنی کام سے سماج میں مہارتوں میں اضافہ ہوا ہے۔ہم اکثر جزوجملہ’معیشت علم‘(knowledge economy)سنتے ہیں جو ہندوستان میں انفارمیشن ٹیکنالوجی کے نموکو بیان کرتا ہے، لیکن آپ ایک کسان کی مہارتوں کا موازنہ کیسے کرتے ہیں جو موسم،مٹی اوربیجوں کے بارے میں اپنی سمجھ پر بھروسہ کرتے ہوئے یہ جانتا ہے کہ سیکڑوں فصلوں کو کیسے اگایاجاتا ہے۔ ایک سافٹ ویئر کے پیشہ ور علم کے ساتھ اس کا موازنہ کرسکتے ہیں؟دونوں ہی مہارت رکھتے ہیں لیکن دونوں کاانداز الگ ہے۔مشہور ماہر سماجیات ہیری بریورمین یہ دلیل دیتے ہیں کہ دراصل مشینوں کا استعمال کارکنان کی مہارتوں کو کم کردیتا ہے۔مثال کے طورپر،جہاں ابتدائی ماہرین تعمیرات اورانجینئروں کو نقشہ نویسی کی مہارت حاصل کرنی ہوتی تھی وہیں اب کمپیوٹر ان کے لیے بہت سے کام کرتے ہیں۔

5.5کام کے حالات(Working Conditions)

ہم سب کوتوانائی،ایک مضبوط گھر،کپڑے اوردیگر سامانوں کی ضرورت ہوتی ہے،لیکن ہمیں یہ یادرکھنا چاہیے کہ کوئی انھیں پیش کرنے کے لیے کام کررہا ہے اوراکثر بہت ہی خراب حالات میں حکومت نے کام کے حالات کو بہتر بنانے کے لیے مختلف قانون بنائے ہیں۔ آئیے کان کنی کے کام پرنظرڈالیں جہاں لوگوں کی ایک بڑی تعداد کام پر لگی ہوتی ہے۔صرف کوئلے کی کانوں میں5.5لاکھ مزدور کام کرتے ہیں۔کان کنی ایکٹ1952(جسے اب پیشہ وارانہ تحفظ ، صحت اور کام کرنے کی صورت حال کووڈ2020میں شامل کیا گیا ہے)میں واضح کیاگیا ہے کہ ایک فردکان میں ہفتے میں زیادہ سے زیادہ کتنے گھنٹے کام کرسکتا ہے،زائدگھنٹوں تک کام کرنے پر اسے اوورٹائم رقم کی ضرورت ہوتی ہے اس کے علاوہ حفاظت کے اصولوں کی پابندی بھی کرنی ہوتی ہے۔بڑی کمپنیوں میں ہوسکتاکہ ان ضوابط اوراصولوں کی پابندی کی جاتی ہو لیکن چھوٹے کانوں اورپتھرکے کانوں میں ایسا نہیں ہے۔مزیدبرآں ذیلی ٹھیکوں کاچلن بھی عام ہورہاہے۔بہت سے ٹھیکے دار مزدوروں کا رجسٹربھی صحیح نہیں رکھتے،اس طرح حادثات اورفوائد کی کسی طرح کی ذمہ داری سے بچاجاتا ہے۔ کسی علاقے میں کان کنی ختم ہونے کے بعد کمپنی کو کھلے گڈھوں کو بھر کر اس جگہ کوپہلے جیسی کردینا ہوتا ہے لیکن وہ ایسا نہیں کرتے۔

زیرزمین کانوں میں مزدور پانی بھرجانے، آگ لگنے،چھتوں اوردیواروں کے گرنے،گیسوں کے اخراج اورآکسیجن کے بندہونے سے زیادہ خطرناک صورت حال کاسامناکرتے ہیں۔ بہت سے مزدورسانس کی تکلیف تپ دق اورسلی کوسس (پھیپھڑے کی سوزش) جیسی بیماریوں میں مبتلاہوجاتے ہیں۔ جو کانوں میں زمین کی اوپری سطح میں کام کرتے ہیں وہ تیزدھوپ اور بارش میں بھی کام کرتے ہیں۔ انھیں کان کے پھٹنے، چیزوں کے گرنے وغیرہ کے سبب چوٹ کا سامنا کرنا پڑتاہے۔دوسرے ملکوں کے مقابلے ہندوستان میں کان کنی کے حادثات کی شرح بہت زیادہ ہے۔

باکس5.6

جھارکھنڈ میں کان میں پھنسے54کام کرنے والوں کے لیے وقت ختم ہورہا ہےIANS،7ستمبر2006

ناگدا کی بھٹ دیہہ کوئلہ کان میں54کام کرنے والے بدھ کی رات کو پھنس گئے تھے جہاں گیسوں کی زیادتی کے سبب دھماکہ ہوا۔رات کے تقریباً 8بجے متھن اورکاربن موناآکسائڈ کی زیادتی اوردباؤکے سبب یہ دھماکاہواجس سے بھارت کوکنگ کول لمیٹڈ(BCCL)کی یہ کوئلے کی کان پوری ہل گئی۔اس کی شدت اتنی زیادہ تھی کہ17نمبر والی ایک ٹن کی ٹرالی باہر نکل گئی۔

چاربچاؤٹیمیں بنائی گئیں لیکن ان کے پاس جہاں یہ حادثہ واقع ہوا اس گہری کان میں داخل ہونے کے لیے آکسیجن کی مناسب تعداد نہیں تھی۔

کان میں پھنسے ہوئے زیادہ تر ملازم 20سے 30سال کی عمر کے تھے۔ گھر کے لوگوں اوریونین لیڈروں نے بھی بی سی سی ایل کے مینجمنٹ پرالزام لگایا ۔یہ بی سی سی ایل کی زہریلی کانوں میں ایک ہے،مینجمنٹ نے وہاں سلامتی کی کوئی تدبیر مہیانہیں کی۔ یونین کے ایک ممبر نے بتایاکہ کان میں پانی چھڑکنے کی مشین اورگیس ٹیسٹنگ مشین فراہم ہونی چاہیے تھی،لیکن وہاں ایساکوئی انتظام نہیں کیاگیا۔

بہت سی صنعتوں میں کام کرنے والے مہاجر ہوتے ہیں۔ مچھلی پروسسنگ پلانٹ جو سمندر کے کنارے ہوتے ہیں ، میں زیادہ تر تمل ناڈو،کرناٹک اورکیرل کی اکیلی نوجوان عورتیں کام کرتی ہیں۔ یہ دس بارہ کی تعداد میں چھوٹے سے کمرے میں رہتی ہیں،کبھی کبھی تووہ شفٹ بدلتی رہتی ہیں۔نوجوان عورتوں کو اطاعت شعار کام کرنے والیوں کے طورپر دیکھاجاتا ہے۔بہت سے مردبھی اکیلے ہجرت کرتے ہیں،وہ یاتوغیر شادی شدہ ہوتے ہیں یا گاؤں میں اپنے اہل وعیال کو چھوڑ کر آتے ہیں۔1992میں سورت میں اڑیسہ کے 2لاکھ مہاجروں میں85فی صد غیر شادی شدہ نوجوان تھے جن کے پاس رسم وراہ نبھانے کے لیے بہت کم وقت ہوتا اورجو بھی ملتااسے وہ دیگر مہاجرکارکنان کے ساتھ گزارتے۔ایسی گزارتے۔ایسی قوم جہاںمشترکہ خاندان کی مداخلت ہوتی ہے، عالم کاری معیشت میں کام کی نوعیت لوگوں کو اکیلے پن اورضررریزی کی طرف لے جاتی ہے۔تاہم بہت سی نوجوان عورتوں کے لیے یہ کسی حد تک آزادی اورمعاشی خودمختاری بھی ہے۔

5.6گھروں میں ہونے والے کام(Home- based work)

گھروں میں ہونے والے کام معیشت کاایک اہم حصہ ہیں۔اس میں لیس بنانا،زری کمخواب(بروکڈ)،قالین سازی،بیڑی اوراگربتیاں اوربہت سی ایسی اشیا بنانے کاکام شامل ہے۔یہ کام خاص طورپر عورتوں اوربچوں کے ذریعہ انجام دیاجاتا ہے۔ایک ایجنٹ خام مواد فراہم کرتا ہے اورتیاراشیا لے جاتا ہے۔گھر میں کام کرنے والوں کو عدد کی شرح کی بنیادپر ادائیگی کی جاتی ہے ۔وہ جتنی مقدار تیارکرتے ہیں اسی حساب سے ان کی آمدنی ہوتی ہے۔

آئیے ایک نظربیڑی صنعت پرڈالیں۔بیڑی بنانے کے کام کا طریقہ جنگل کے پاس کے گاؤں سے شروع ہوتا ہے جہاں گاؤں والے تیندوے توڑتے ہیں اور محکمہ جنگلات یا نجی ٹھیکے دار کو فروخت کردیتے ہیں جو اسے واپس محکمہ جنگلات کو فروخت کردیتے ہیں۔اوسطاً ایک شخص پتیوں کے 100بنڈل یکجا کرسکتا ہے۔حکومت انھیں بیڑی کے کارخانوں کے مالکوں کو یہ پتے نیلام کردیتی ہے جو ان ٹھیکے داروں کو دیے ہیں جوگھر میں کام کرنے والوں کو تمباکو اوریہ پتیاں فراہم کرتے ہیں۔یہ کام کرنے والے زیادہ تر عورتیں پہلے ان پتیوں کو گیلا کرتی ہیں،انھیں کاٹتی ہیں اورتمباکو بھرتی ہیں،انھیں دھاگے سے باندھتی ہیں اورگول شکل میں لپیٹ کر بیڑی تیارکرتی ہیں۔ٹھیکے داران بیڑیوں کووہاں سے لے مینوفیکچررکو فروخت کردیتا ہے جو انھیں گرم کرتے ہیں اوراپنا خود کا برانڈ لیبل لگادیتے ہیں۔ مینوفیکچررانھیں ڈسٹری بیوٹر کوفروخت کرتا ہے اوران بیڑیوں کو  تھوک فروش کو فروخت کرتا ہے اوراسی سلسلے کوآگے بڑھاتے ہوئے وہ اپنے پڑوس کی پان کی دکان میں فروخت کرتا ہے۔

                    

سوالات