رزمیہ کے واقعات کی باز گوئی یا اس کے نئے ڈرامائی روپ، اس کے خاص بیانیہ سے اخذ کر کے ایک تخلیقی عمل کی آمیزش کے ساتھ پیش کیے جاتے ہیں۔ ہم مہابھارت کے ایک واقعے کی مثال لیتے ہیں جسے ہماری ہم عصر ایک ہنگامی ادیبہ مہاشو یتادیوی نے، جو ہر طرح کی زیادتیوں او رظلم وجبر کے خلاف صدائے احتجاج بلند کرتی رہی ہیں، ایک نئے روپ میں پیش کیا ہے۔ اس خاص موقع پر انھوں نے مہابھارت کی خاص کہانی کے متبادل امکانات ظاہر کیے ہیں اور ان سوالات کی طرف توجہ مرکوز کرنے کی کوشش کی ہے جن پر سنسکرت متن خاموش ہے۔ سنسکرت متن میں بیان کیا گیا ہے کہ کس طرح دریودھن نے پانڈووں کو مارڈالنے کے لیے لاکھ سے بنائے گئے ایک خصوصی گھر میں انھیں ٹھہراکر اور اسے آگ لگواکر تباہ کردینے کی سازش کا منصوبہ بنایاتھا۔اس سازش کے بارے میں جانکاری ملتے ہی پانڈؤں نے ایک سرنگ کھودی تاکہ ہر صورت میں وہاں سے بچ کر نکل سکیں۔پھر کنتی نے دعوت کا اہتمام کیا۔گوکہ دعوت میں شریک زیادہ تر افراد برہمن تھے مگر ان میں ایک ’نشاد‘ عورت اپنے پانچ بچوں سمیت بھی آئی۔جب وہ سب نشے میں چور ہوکر سونے کے لیے لیٹ گئے،تو پانڈؤوں نے گھر کو آگ لگادی اور وہاں سے نکل آئے۔جب ایک عورت اور پانچ بچوں کی لاشیں نظرآئیں تو لوگوں کو خیال ہوا کہ پانڈو مرگئے۔مہا شویتا دیوی نے اپنی مختصر کہانی’کنتی ونشادی‘ میں کہانی کے بیان کو وہاں سے شروع کیا جہاں مہابھارت نے اسے چھوڑا ہے۔انھوں نے اپنی کہانی ایک جنگل میں رکھی ہے جہاں جنگ کے بعد کنتی پہنچتی ہے۔اس وقت کنتی کے پاس پچھلے واقعات پر نگاہ ڈالنے کا وقت ہے،چنانچہ زمین جسے قدرت کی علامت کے طور پر رکھا گیا ہے اس سے باتیں کرتے ہوئے کُنتی بعض بعض موقعوں پر اپنے خیال میں اپنی کمزوریوں کا اعتراف کرتی ہے۔ہر روز وہ نشادوں کو دیکھتی ہے جووہاں لکڑیاں،شہد،زمین دوز پھل،اور جڑیں اکٹھا کرنے آتے ہیں۔ایک نشادی(عورت) کبھی کبھی کنتی کو زمین سے باتیں کرتی سنتی تھی۔ایک روز جب ہوا میں کچھ عجیب سنسناہٹ سی تھی،جانور جنگل چھوڑ کر بھاگ رہے تھے،کنتی نے دیکھا کہ نشادی اسے برابر دیکھے جارہی ہے۔پھر جب وہ بولی اور اس سے پوچھا کہ کیا اسے وہ لاکھ کا بنا گھر یاد ہے تو وہ چونک پڑی۔’ہاں‘کنتی نے کہا:اسے یاد ہے۔کیا اسے چھوٹے پانچ بیٹوں کے ساتھ ایک ادھیڑ سی عورت بھی یاد ہے؟اور کیا یہ بھی یاد ہے کہ وہ انھیں اس وقت تک شراب پلاتی رہی تھی جب تک وہ نشے میں چور ہو کر بے ہوش نہیں ہوگئے تھے۔اور پھر وہ خود اپنے بچوں سمیت بچ کر نکل آئی تھی؟وہ نشادی …’’تو،تو نہیں تھی!‘‘کنتی نے حیرت سے پوچھا۔نشادی نے جواب دیا،جو عورت وہاں مری وہ اس کی ساس رہی تھی۔اس نے یہ بھی کہا کہ جب کنتی اپنے گزرے واقعات کو یاد کرتی تھی تو اس نے ایک بار بھی ان چھ معصوموں کے بارے میں نہیں سوچاجو صرف اس لیے ختم ہوگئے کہ وہ خود کو اور اپنے بچوں کو بچانا چاہتی تھی۔جب یہ دونوں باتیں کررہی تھیں تو بھڑکتے شعلے قریب آگئے۔نشادی بھاگ کر محفوظ جگہ پہنچ گئی مگر کنتی وہیں بیٹھی رہی جہاں وہ تھی۔

گفتگو کیجیے:

100—150لفظوں میں جواب لکھیے